1-3. ¿Nda̱chun sava na̱ hermano na̱ káchíñu ku̱a̱ʼá tiempo nu̱ú Jehová xíniñúʼu sandákoona chiñuna?

TA̱ ROBERT xíʼin ñá Mary Jo ndákaʼánna xa̱ʼa̱ ña̱ xi̱kusi̱íní-inina tá xi̱kuuna misionero ki̱ʼva 21 ku̱i̱ya̱, soo ki̱ʼin kue̱ʼe̱ na̱ yivá u̱vi̱ saána. Káchina: “Xi̱kusi̱íní-inindi̱ xa̱ʼa̱ ña̱ xi̱ndaandi̱na. Soo ni̱kusuchíní-inindi̱ tá sa̱ndákoondi̱ ñuu nu̱ú ni̱xi̱yondi̱”.

² Ta̱ William xíʼin ñá Terrie káchina: “Tá ku̱nda̱a̱-inindi̱ ña̱ va̱ása kivika ndikóndi̱ ndakiʼinndi̱ chiñundi̱ xa̱ʼa̱ ña̱ ndeé ndóʼondi̱, ki̱xáʼandi̱ xa̱kundi̱. Ta va̱ása níkivika ku̱ʼu̱nndi̱ inka país ña̱ kachíñundi̱ nu̱ú Jehová nda̱a̱ táki̱ʼva nda̱kanixi̱níndi̱”.

³ Ta̱ Alexéi káchira: “Xi̱kunda̱a̱-inindi̱ ña̱ ná sáa̱-ini xíni ndi̱ʼi̱ xi̱kuni̱na ndakasina Betel nu̱ú xi̱ndikai̱. Tasaá kúú ña̱ ke̱ʼévana, ni̱kusuchíní-inindi̱ tá sa̱ndákoondi̱ Betel”.

4. ¿Ndáa pregunta ndakuiinyó nu̱ú artículo yóʼo?

⁴ Ta su̱ví nda̱saa na̱ hermano yóʼo kúú na̱ nínasa̱ma chiñu ña̱ xi̱kuumií. Chi saátu ndo̱ʼo ku̱a̱ʼání na̱ xi̱ñuʼu Betel xíʼin inkaka na̱ hermano na̱ káchíñu ku̱a̱ʼá tiempo nu̱ú Jehová. * Sana íxayo̱ʼvi̱níña xíʼin na̱ hermano yóʼo ña̱ sandákoona chiñu ña̱ kútóonína. ¿Ndáaña kivi chindeétáʼan xíʼinna? ¿Ndáaña kivi keʼéyó ña̱ va̱ʼa chindeétáʼanyó xíʼinna? Ña̱ respuesta ña̱ pregunta yóʼo kivi chindeétáʼanña xíʼin ndiʼiyó tá ná kixa̱a̱ iin ki̱vi̱ ña̱ nasa̱ma chiñu ña̱ kúúmiíyó.

5. ¿Ndáaña kivi kundoʼoyó tá ná nasa̱ma chiñuyó?

⁵ Ni kúúyó na̱ káchíñu Betel á na̱ kéʼé inkaka chiñu ña̱ ku̱a̱ʼá  tiempo, xa̱a̱yó kúʼvi̱-iniyó xíniyó na̱ yiví ta saátu ñuu nu̱ú káchíñuyó. Xa̱ʼa̱ ña̱kán, tá sándakooyó chiñuyó xa̱ʼa̱ sava ña̱ʼa, kúsuchíní-iniyó. Ta ndákaʼányó xa̱ʼa̱ na̱ sa̱ndákooyó ta ndíʼi̱-iniyó xa̱ʼa̱na, kachikaví ta sa̱ndákooyó ñuu kán xa̱ʼa̱ ña̱ va̱ása táxikana ña̱ natúʼunyó xa̱ʼa̱ Ndióxi̱ (Mat. 10:23; 2 Cor. 11:28, 29). Ta tá ndákiʼinyó inka chiñu kivi ixayo̱ʼvi̱ña xíʼinyó ña̱ sakuaʼayó ndáa ki̱ʼva íyo na̱ yiví inka ñuu, ta saátu tá nda̱ndikóyó veʼeyó. Ta̱ Robert xíʼin ñá Mary Jo káchina: “Túvindi̱ ña̱ síínní íyo ñuu miíndi̱, ta síínní kúnindi̱ ki̱vi̱ ku̱a̱ʼa̱nndi̱ nátúʼunndi̱ xíʼin na̱ yiví na̱ káʼa̱n tu̱ʼun miíndi̱. Túvindi̱ ña̱ su̱víka na̱kán kúúndi̱”. Ta saátu sana nda̱a̱ kivi kuma̱ní xu̱ʼún ndaʼa̱yó. Ña̱ kaka-iniyó xa̱ʼa̱ ña̱ kuu chí nu̱únínu ta nda̱a̱ kivitu ndakava-iniyó. ¿Ndáaña kivi chindeétáʼan xíʼinyó?

6. ¿Nda̱saa kivi yatinka kooyó nu̱ú Jehová?

⁶ Yatin ná kooyó nu̱ú Jehová (Sant. 4:8). ¿Ndáa ki̱ʼva keʼéyóña? Kandíxayóra, chi ta̱kán kúú ta̱ xíniso̱ʼo tá káʼa̱nyó xíʼinra (Sal. 65:2). Ná ka̱ʼa̱nyó xíʼin Jehová xa̱ʼa̱ ndiʼi ña̱ ndóʼoyó táki̱ʼva káchi Salmo 62:8. Jehová kivi keʼéra ndiʼi ña̱ káʼa̱nyó xíʼinra á ña̱ ndákanixi̱níyó xa̱ʼa̱ (Efes. 3:20). Su̱ví nda̱saa ña̱ káʼa̱n kuitíyó xa̱ʼa̱ xíʼin Jehová kéʼéra, chi saátu kivi ndasaviíra ku̱a̱chi ña̱ kúúmiíyó, ta kivitu keʼéra ña̱ʼa ña̱ ni kǒo ndákanixi̱níyó xa̱ʼa̱.

7. a) ¿Ndáaña chindeétáʼan xíʼinyó ña̱ yatin kooyó xíʼin Jehová? b) Nda̱a̱ táki̱ʼva káchi Hebreos 6:10-12, ¿ndáaña va̱ʼa ndakiʼinyó tá ná chika̱a̱yó ndee̱ ña̱ nda̱kú koo iniyó xíʼin Jehová?

⁷ Saátu inka ña̱ kivi chindeétáʼan xíʼinyó ña̱ yatinka kooyó xíʼin Jehová kúú ña̱ kaʼviyó Biblia ndiʼi ki̱vi̱ ta ndakanixi̱níyó xa̱ʼa̱ña. Iin ta̱ xi̱kuu misionero káchira: “Xíniñúʼu chika̱a̱yó ndee̱ kaʼviyó xíʼin na̱ veʼeyó ta saátu sakuaʼa kúeeyó ña̱ ku̱ʼu̱nyó reunión, nda̱a̱ táki̱ʼva xi̱keʼéyó tá ya̱chi̱”. Ta saátu ná chika̱a̱yó ndee̱ ña̱ ku̱ʼu̱nyó natúʼunyó xa̱ʼa̱ Ndióxi̱ xíʼin na̱ congregación nu̱ú ni̱xa̱a̱yó. Jehová va̱ása nándósóra xa̱ʼa̱ na̱ nda̱kú íyo ini xíʼinra, ni tá va̱ása kívika keʼéna táʼan ña̱ xi̱keʼéna tá ya̱chi̱ (kaʼvi Hebreos 6:10-12). *

8. ¿Nda̱saa chíndeétáʼan ña̱ káʼa̱n 1 Juan 2:15-17 xíʼinyó xa̱ʼa̱ ña̱ loʼo ña̱ʼa kuumiíyó?

 ⁸ Loʼo ña̱ʼa ná kuumiíyó. Ná kǒo kundi̱ʼi̱ní-iniyó xa̱ʼa̱ ña̱ʼa ña̱ íyo ñuyǐví ta̱ Ndi̱va̱ʼa chi kivi kasiña nu̱úyó ña̱ ndasakáʼnuyó Jehová (Mat. 13:22). Ná kǒo kandíxayó ña̱ káʼa̱n na̱ migoyó, na̱ táʼanyó á inkaka na̱ yiví xíʼinyó xa̱ʼa̱ ña̱ xíniñúʼu koo ku̱a̱ʼá xu̱ʼúnyó ña̱ va̱ʼa vií kutakuyó ñuyǐví yóʼo (kaʼvi 1 Juan 2:15-17). * Ná kandíxayó ña̱ mií Jehová taxi ndiʼi ña̱ xíniñúʼuyó ña̱ sakuaʼayó xa̱ʼa̱ra xíʼin ndiʼika ña̱ xíniñúʼuyó ña̱ kutakuyó mií tiempo ña̱ xíni̱ miíra (Heb. 4:16; 13:5, 6).

9. Nda̱a̱ táki̱ʼva káchi Proverbios 22:3, 7, ¿nda̱chun va̱ása xíniñúʼu kuníkaníyó, ta ndáaña kivi chindeétáʼan xíʼinyó ña̱ vií ndaka̱xinyó ña̱ keʼéyó?

⁹ Ná va̱ása kuníkaníyó (kaʼvi Proverbios 22:3, * 7). * Ki̱vi̱ násamayó veʼe nu̱ú íyoyó xíniñúʼuyó ku̱a̱ʼání xu̱ʼún, ta nda̱a̱ kivi kuníkayó nu̱ú inkana. Xa̱ʼa̱ ña̱kán ná va̱ása satáyó ña̱ʼa ña̱ kǒo xíniñúʼuyó ta loʼo tá loʼo chaʼviyóña. Tá yáʼayó nu̱ú sava tu̱ndóʼo tá kúú ña̱ kundaayó na̱ veʼeyó na̱ ndeé ndóʼo, sana ixayo̱ʼvi̱ña xíʼinyó ña̱ ndakani vií xi̱níyó nda̱saa xu̱ʼún ndukú naʼayó nu̱ú iin na̱ yiví. Tá saá ndóʼoyó, ná ka̱ʼa̱nyó xíʼin Jehová xa̱ʼa̱ ndiʼi ña̱ ndóʼoyó ta miíra chindeétáʼan xíʼinyó ña̱ kǒo ndi̱ʼi̱ní-iniyó ta vií ndaka̱xinyó ña̱ keʼéyó (Filip. 4:6, 7; 1 Ped. 5:7).

10. ¿Ndáaña chindeétáʼan xíʼinyó ña̱ ndukúyó inka na̱ koo migoyó?

¹⁰ Ña̱ vií kitáʼanyó xíʼin na̱ migoyó ta saátu xíʼin na̱ veʼeyó. Ná ka̱ʼa̱nyó xíʼin na̱ migoyó xa̱ʼa̱ ña̱ ndákanixi̱níyó xíʼin ña̱ ndóʼoyó, tá kúú xíʼin na̱ ni̱ya̱ʼa nu̱ú táʼan ña̱ ndóʼoyó. Tá ná keʼéyó ña̱yóʼo nda̱a̱ va̱ʼa kuniyó (Ecl. 4:9, 10). Ni ndákaʼánkavayó xa̱ʼa̱ na̱ migoyó na̱ xi̱kuumiíyó tá ya̱chi̱, xíniñúʼu ndukúyó inka na̱ migoyó. Ta ña̱ va̱ʼa keʼéyóña xíniñúʼu miíyó kixáʼa ka̱ʼa̱n xíʼinna. Ná ka̱ʼa̱nyó xíʼinna xa̱ʼa̱ ña̱ va̱ʼa ña̱ táxi Jehová ndaʼa̱yó ña̱ va̱ʼa kunda̱a̱-inina ña̱ kúsi̱íní-iniyó ndásakáʼnuyóra. Ni sava na̱ hermano va̱ása kúnda̱a̱-inina nda̱chun kúú ña̱ kútóoyó kachíñuyó ku̱a̱ʼá tiempo nu̱ú Jehová, soo savana kivi kútóona ña̱ kéʼéyó ta xa̱a̱na koona migoyó. Soo ná kiʼinyó kuenta ña̱ ná kǒo ka̱ʼa̱nníyó xa̱ʼa̱ miíyó á xa̱ʼa̱ ña̱ kéʼéyó á xa̱ʼa̱ ña̱ va̱ása va̱ʼa ña̱ ndóʼoyó.

11. ¿Nda̱saa kivi chika̱a̱yó ndee̱ ña̱ si̱í kooyó xíʼin na̱ ti̱ndaʼa̱ xíʼinyó?

 ¹¹ Tá sa̱ndákooyó chiñuyó xa̱ʼa̱ ña̱ ndeé ndóʼo na̱ ti̱ndaʼa̱ xíʼinyó ná va̱ása chika̱a̱yó ku̱a̱china. Soo tá miíyó kúú na̱ ndeé ndóʼo ná va̱ása ndakava-iniyó ta ni ná va̱ása ndakanixi̱níyó ña̱ sa̱ndákavayó-ini na̱ ti̱ndaʼa̱ xíʼinyó. Ná ndakaʼányó ña̱ iinlá ku̱ñu kúúyó nu̱ú Jehová ta ni̱ka̱ʼa̱nyó xíʼinra ña̱ kundaa táʼanyó nda̱a̱ ndáaka ña̱ ná kuu (Mat. 19:5, 6). Soo tá kǒo níndakanixi̱níyó ña̱ koo se̱ʼeyó soo ka̱kuna, ná ka̱ʼa̱nyó xíʼinna ña̱ ndáyáʼviníkana nu̱úyó nu̱úka chiñu ña̱ sa̱ndákooyó. Ná ka̱ʼa̱n ni̱ʼiyó xíʼinna ña̱ iin regalo ña̱ ta̱xi Jehová ndaʼa̱yó kúúna (Sal. 127:3-5). Saátu ná ka̱ʼa̱nyó xíʼinna xa̱ʼa̱ ndiʼi chiñu ña̱ ke̱ʼéyó nu̱ú Jehová tá ya̱chi̱, chi ña̱yóʼo kivi chindeétáʼanña xíʼinna ña̱ xa̱a̱na kachíñuna ku̱a̱ʼá tiempo nu̱ú Jehová nda̱a̱ táki̱ʼva ke̱ʼé miíyó.

12. a) ¿Nda̱saa kivi chindeétáʼanyó xíʼin na̱ káchíñu ku̱a̱ʼá tiempo nu̱ú Jehová ña̱ chika̱a̱kana ndee̱ keʼéna chiñuna? b) ¿Ndáaña kivi keʼéyó ña̱ vií ndakiʼinyóna tá na̱sama chiñuna?

¹² Íyo ku̱a̱ʼání congregación xíʼin na̱ hermano na̱ chíka̱a̱ní ndee̱ ña̱ chindeétáʼanna xíʼin na̱ hermano na̱ káchíñu ku̱a̱ʼá tiempo nu̱ú Jehová. Tá kúú, chíka̱a̱na ndee̱ xíʼinna, táxina xu̱ʼún ndaʼa̱na á inkaka ña̱ʼa ña̱ xíniñúʼuna, á saátu ndáana na̱ veʼena. Xíʼin ña̱yóʼo ndásakáʼnuna Jehová (Gál. 6:2). ¿Ndáaña kivi keʼéyó tá ná kixa̱a̱ sava na̱ hermano na̱ ka̱chíñu ku̱a̱ʼá tiempo nu̱ú Jehová ti̱xin congregaciónyó? Ná va̱ása ndakanixi̱níyó ña̱ xa̱ʼa̱ ña̱ va̱ása va̱ʼa níkeʼéna chiñuna kúúña á xa̱ʼa̱ ña̱ ke̱ʼéna iin ña̱ va̱ása va̱ʼa. *  Viíní ná ndakiʼinyóna, ta ná taxiyó tíxa̱ʼvi ndaʼa̱na xa̱ʼa̱ ndiʼi ña̱ ke̱ʼéna, ni vitin va̱ása kívika keʼéna ku̱a̱ʼá chiñu xa̱ʼa̱ ña̱ ndee̱ ndóʼona nda̱a̱ táki̱ʼva xi̱keʼéna tá ya̱chi̱. Ná chika̱a̱yó ndee̱ ña̱ kuxini̱yóna. Ná sakuaʼayó xa̱ʼa̱ ndiʼi ña̱ va̱ʼa kúúmiína.

13. ¿Nda̱saa kivi chindeétáʼanyó xíʼin na̱ hermano na̱ na̱sama chiñu?

¹³ Sana na̱ hermano yóʼo kuni̱na ña̱ chindeétáʼanyó xíʼinna ña̱ ndani̱ʼína iin veʼe nu̱ú koona, carro tú kakana, iin chiñu á inkaka ña̱ʼa. Á ña̱ sana ka̱ʼa̱nyó xíʼinna xa̱ʼa̱ ña̱ xíniñúʼuna ki̱vi̱ tá ki̱vi̱, tá kúú ña̱ chaʼvina impuesto á ña̱ chaʼvina iin seguro. Soo ña̱ xíniñúʼukana kúú ña̱ ná kunda̱a̱-iniyó xíʼin ña̱ ndóʼona ta su̱ví ña̱ kundáʼvi kuití iniyó kuniyóna. Sana miína á iin na̱ veʼena ndeé ndóʼona, á sanatu xóʼvi̱na xa̱ʼa̱ ña̱ ni̱xi̱ʼi̱ iin na̱ veʼena. * Ni tá va̱ása káʼa̱nna xa̱ʼa̱ ña̱ ndóʼona, sana kúsuchí-inina xa̱ʼa̱ na̱ migona. Ña̱ va̱ʼa ndi̱ko-inina xa̱ʼa̱ ña̱ ndóʼona xíniñúʼuna ku̱a̱ʼá tiempo.

14. ¿Nda̱saa chi̱ndeétáʼan na̱ publicador xíʼin iin ñá hermana ña̱ sa̱kuaʼañá natúʼunñá xíʼin na̱ yiví nu̱ú territorio xa̱á?

¹⁴ Saátu kivi chindeétáʼanyó xíʼinna xíʼin ña̱ kéʼéyó ña̱ va̱ʼa kusi̱í-inina xíʼin chiñu ña̱ nda̱kiʼinna. Iin ñá hermana ñá ka̱chíñu nu̱ú Jehová ku̱a̱ʼání ku̱i̱ya̱ inka país káchiñá: “Tá ya̱chi̱ xi̱kaʼvii̱ Biblia xíʼin na̱ yiví ndiʼi ki̱vi̱. Soo tá na̱sama chiñui̱ xi̱ ixayo̱ʼvi̱ña xíʼi̱n kaʼvi iin texto ña̱ Biblia nu̱ú na̱ yiví á ña̱ na̱ʼi̱ iin video tá ku̱a̱ʼi̱n veʼe tá veʼe. Soo na̱ hermano ti̱xin congregación ña̱ xa̱á nu̱ú ndíka̱i̱ xi̱ka̱ʼa̱nna xíʼi̱n ña̱ ku̱ʼi̱n xíʼinna nu̱ú na̱ káʼvina xíʼin á na̱ revisitana. Xa̱ʼa̱ ña̱ ki̱ʼii̱n kuenta ña̱ na̱ káʼvi na̱ publicador yóʼo xíʼin va̱ʼaní chíka̱a̱na ndee̱, chi̱ndeétáʼanña xíʼi̱n ña̱ va̱ása ndakava-inii̱. Sa̱kuaʼi̱ ndáa ki̱ʼva kixáʼíi̱ ka̱ʼi̱n xíʼin na̱ yiví na̱ íyo nu̱ú ña̱ territorio xa̱á. Tíxa̱ʼvi ndiʼi ña̱yóʼo tuku ki̱xáʼíi̱ kúsi̱í-inii̱”.

15. ¿Nda̱saa kivi kusi̱í-iniyó ni nda̱kiʼinyó iin chiñu ña̱ xa̱á?

¹⁵ Kiviva kusi̱í-iniyó ni nda̱kiʼinyó inka  chiñu ña̱ xa̱á. Ná va̱ása ndakanixi̱níyó ña̱ na̱samayó xa̱ʼa̱ ña̱ va̱ása va̱ʼa níkeʼéyó ta va̱ása ndáyáʼvikayó vitin. Ná kotoyó nda̱saa chíndeétáʼan Jehová xíʼinyó ta ná chika̱a̱yó ndee̱ ña̱ natúʼunyó xa̱ʼa̱ra. Ná kundiku̱nyó yichi̱ na̱ cristiano na̱ ni̱xi̱yo tá siglo nu̱ú, chi nda̱a̱ ndáaka nu̱ú ni̱xi̱kana chi̱ka̱a̱na ndee̱ ña̱ na̱túʼunna xa̱ʼa̱ tu̱ʼun Ndióxi̱ (Hech. 8:1, 4). Tá chíka̱a̱yó ndee̱ ña̱ nátúʼunyó ndakiʼinyó ku̱a̱ʼání ña̱ va̱ʼa. Tá kúú, sava na̱ precursor ta̱vánana iin país, soo na̱yóʼo nda̱kiʼinna ku̱a̱ʼa̱nna iin ñuu nu̱ú xíniñúʼuníka na̱ natúʼun xa̱ʼa̱ Ndióxi̱ tu̱ʼun miína. Tá ni̱ya̱ʼa loʼo yo̱o̱, ni̱xa̱a̱na ku̱una iin grupo ta kamaní ku̱a̱ʼa̱n xáʼnuna.

16. ¿Ndáaña chindeétáʼan xíʼinyó ña̱ kutóoyó chiñuyó?

¹⁶ Ta̱ Nehemías ni̱ka̱ʼa̱nra xíʼin na̱ judío ña̱ mií Jehová kúú ta̱ táxi ña̱ kúsi̱í-inira (Neh. 8:10). Ni kútóoníyó nu̱ú káchíñuyó, va̱ása xíniñúʼu kusi̱í-iniyó xa̱ʼa̱ ña̱yóʼo ná kusi̱í-iniyó xa̱ʼa̱ ña̱ kítáʼanyó xíʼin Jehová. Xa̱ʼa̱ ña̱yóʼo ná chika̱a̱yó ndee̱ ña̱ keʼéyó ña̱ kúni̱ Ndióxi̱ ta ná kandíxayó ña̱ miíra taxi yichi̱ nu̱úyó xíʼin ña̱ ndíchi. Ná ndakaʼányó chi ña̱ chi̱ndaʼá miíyó ña̱ ni̱xa̱a̱yó ku̱tóoyó chiñu ña̱ xi̱kuumiíyó kúú ña̱ chi̱ka̱a̱-iniyó chindeétáʼanyó xíʼin na̱ yiví. Ta mií Jehová chindeétáʼan tuku xíʼinyó ña̱ xa̱a̱yó kutóoyó chiñu ña̱ xa̱á ña̱ nda̱kiʼinyó tá ná chika̱a̱yóña níma̱yó (Ecl. 7:10).

17. ¿Ndáaña xíniñúʼu kunda̱a̱-iniyó xa̱ʼa̱ chiñu ña̱ kúúmiíyó vitin?

¹⁷ Xíniñúʼu kunda̱a̱-iniyó chi ña̱ ndásakáʼnuyó Jehová ndiʼi tiempo kúúña, soo chiñu ña̱ kéʼéyó vitin loʼova tiempo kéʼéyóña. Nu̱ú ñuyǐví xa̱á, sana su̱víka táʼan chiñu ña̱ kéʼéyó nu̱ú Jehová tiempo vitin keʼéyó chi xa̱a̱ síínva kooña. Ta̱ Alexéi, ta̱ ni̱ka̱ʼa̱nyó xa̱ʼa̱ chí nu̱ú ki̱xáʼa ña̱ artículo, túvira ña̱ chiñu ña̱ kéʼéra vitin chíndeétáʼanña xíʼinra ña̱ sákuaʼa kúeera nda̱a̱ ki̱ʼva keʼéra chí nu̱únínu. Káchira: “Ndiʼi tiempo xi̱kunda̱a̱-inii̱ ña̱ ndixa kúú ña̱ íyo Jehová soo xi̱ndakanixi̱níi̱ ña̱ xíkaní íyora, ta saátu ña̱ ñuyǐví xa̱á. Soo vitin xítoi̱ Jehová yatin nu̱úi̱ ta túvii̱ ña̱ ñuyǐví xa̱á íyoña yatin yóʼo” (Hech. 2:25). Nda̱a̱ ndáaka chiñu kúúmiíyó, yatin ná kooyó xíʼin Jehová. Ta̱kán nda̱a̱ ni iin ki̱vi̱ va̱ása sandákoora miíyó, chi chindeétáʼanra xíʼinyó ña̱ kusi̱í-iniyó keʼéyó chiñura, nda̱a̱ ndáaka nu̱ú xíkayó (Is. 41:13).