1. ¿Ndáaña kúú iin ña̱ va̱ʼaní kúúmiíyó?

IIN ña̱ va̱ʼaní kúú ña̱ ñúʼuyó ti̱xin congregación Jehová. Ndiʼiyó táxi̱n íyo iniyó, ta kúsi̱í-iniyó xa̱ʼa̱ ña̱ inkáchi ndásakáʼnuyó Jehová xíʼin na̱ hermano ña̱ congregación. Soo, ¿ndáa chiñu kúú ña̱ kúúmií iin tá iinyó ti̱xin congregación?

2. ¿Ndáa ejemplo xi̱niñúʼu ta̱ apóstol Pablo nu̱ú carta ña̱ ka̱ʼyíra xíʼin espíritu santo?

² Nu̱ú carta ña̱ ka̱ʼyí ta̱ apóstol Pablo xíʼin espíritu santo, ni̱ka̱ʼa̱nra xa̱ʼa̱ iin ejemplo ña̱ sánáʼa̱ miíyó xa̱ʼa̱ ña̱yóʼo. Ni̱ka̱ʼa̱nra ña̱ nda̱a̱ táki̱ʼva íyo ku̱ñu na̱ yiví saá íyo congregación, ta na̱ ñúʼu ti̱xin congregación chi̱táʼanrana xíʼin sava táʼví ku̱ñuyó (Rom. 12:4-8; 1 Cor. 12:12-27; Efes. 4:16).

3. ¿Ndáa u̱ni̱ ña̱ʼa sakuaʼayó nu̱ú ña̱ artículo yóʼo?

³ Nu̱ú ña̱ artículo yóʼo, ka̱ʼa̱nyó xa̱ʼa̱ u̱ni̱ ña̱ʼa ña̱ sákuaʼayó xíʼin ejemplo ña̱ ni̱ka̱ʼa̱n ta̱ Pablo xa̱ʼa̱. Ña̱ nu̱ú, kunda̱a̱-iniyó ña̱ iin tá iinyó kúúmiíyó iin chiñu ti̱xin congregación Jehová. * Ña̱ u̱vi̱, sakuaʼayó ndáaña kivi keʼéyó tá íxayo̱ʼvi̱ña xíʼinyó kotoyó ndáa chiñu kúú ña̱ kúúmiíyó ti̱xin congregación. Ta ña̱ u̱ni̱, sakuaʼayó nda̱chun xíniñúʼu kundi̱ʼi̱-iniyó keʼéyó chiñu ña̱ ta̱xi Jehová ndaʼa̱yó.

4. ¿Ndáaña sákuaʼayó xíʼin ña̱ káʼa̱n Romanos 12:4, 5?

⁴ Ña̱ nu̱ú sákuaʼayó xíʼin ejemplo ña̱ ni̱ka̱ʼa̱n ta̱ Pablo xa̱ʼa̱ kúú ña̱ iin tá iinyó kúúmiíyó iin chiñu ti̱xin ñuu Jehová. Tá ki̱xáʼa ta̱ Pablo káʼa̱nra xa̱ʼa̱ ejemplo yóʼo, ka̱chira: “Saáchi nda̱a̱ táki̱ʼva íyo ku̱ñuyó ku̱a̱ʼá kúú ña̱ kítáʼan xíʼinña, soo va̱ása inkáchi íyo chiñu  ña̱ kéʼé ña̱yóʼo, ta saátu miíyó ni ku̱a̱ʼá kúúyó, iinláva kúúyó xíʼin ta̱ Cristo, soo iin tá iinyó chíndeétáʼanyó xíʼin táʼanyó” (Rom. 12:4, 5). Ña̱ xi̱kuni̱ kachi ta̱ Pablo kúú ña̱ iin tá iinyó xa̱a̱ síín síín chiñu kúúmiíyó ti̱xin congregación, soo ndiʼiyó ndáyáʼvinívayó.

5. ¿Ndáa regalo ta̱xi Jehová ndaʼa̱ na̱ congregación?

⁵ Tá káʼa̱nyó xa̱ʼa̱ na̱ kúúmií iin chiñu ti̱xin congregación, sana na̱ siʼna ndákanixi̱níyó xa̱ʼa̱ kúú na̱ níʼi yichi̱ nu̱úyó (1 Tes. 5:12; Heb. 13:17). Ña̱ nda̱a̱ kúúña, mií Jehová xi̱niñúʼura ta̱ Cristo ña̱ va̱ʼa taxira iin regalo ndaʼa̱ na̱ congregación, na̱yóʼo kúú na̱ ta̱a na̱ chíndeétáʼan xíʼinna (Efes. 4:8). Tá kúú na̱ Cuerpo Gobernante xíʼin na̱ chíndeétáʼan xíʼinna, na̱ Comité ña̱ Sucursal, na̱ superintendente ña̱ circuito, na̱ sánáʼa̱ ti̱xin escuela ña̱ kúúmií na̱ ñuu Ndióxi̱, na̱ anciano ña̱ congregación, xíʼin na̱ siervo ministerial. Espíritu santo kúú ña̱ nda̱kaxin na̱ hermano yóʼo ña̱ va̱ʼa chindeétáʼanna xíʼin ndikachi sa̱na̱ Jehová, ta ndasandakúna-ini na̱ congregación (1 Ped. 5:2, 3).

6. Na̱ hermano na̱ nda̱kaxin espíritu santo, ¿ndáaña chíka̱a̱na ndee̱ keʼéna nda̱a̱ táki̱ʼva káchi 1 Tesalonicenses 2:6-8?

⁶ Espíritu santo kúú ña̱ ndáka̱xin na̱ hermano yóʼo ña̱ va̱ʼa keʼéna ku̱a̱ʼá chiñu ti̱xin congregación. Nda̱a̱ táki̱ʼva kéʼé ndaʼa̱yó, xa̱ʼa̱yó xíʼin inkaka ña̱ íyo ku̱ñuyó kéʼéña sava chiñu ña̱ chíndeétáʼan xíʼin ndiʼi ku̱ñuyó, saá íyo chiñu ña̱ kéʼé na̱ hermano yóʼo chi chíndeétáʼanña xíʼin ndiʼi na̱ congregación. Nu̱úka ña̱ kuni̱na ndukáʼnuna nu̱ú inkana, chíka̱a̱na ndee̱ ña̱ ndasandakúna-ini na̱ hermano ta káʼa̱nna tu̱ʼun va̱ʼa xíʼinna (kaʼvi 1 Tesalonicenses 2:6-8). * Táxiyó tíxa̱ʼvi ndaʼa̱ Jehová xa̱ʼa̱ ña̱ íyo na̱ hermano na̱ viíní kéʼé chiñu ti̱xin congregación, ta ndíʼi̱ka-inina xa̱ʼa̱ ña̱ kúni̱ inkana nu̱úka ña̱ kúni̱ miína.

7. ¿Ndáa bendición ndákiʼin na̱ precursor xíʼin na̱ misionero?

⁷ Sana ti̱xin congregación nu̱ú ndíka̱a̱yó íyo na̱ kúú misionero, precursor especial á na̱ precursor regular. Nu̱ú iníí saá ñuyǐví íyo ku̱a̱ʼání na̱ hermano xíʼin ná hermana na̱ xíka nátúʼun xíʼin na̱ yiví xa̱ʼa̱ Ndióxi̱ ku̱a̱ʼání tiempo. Xa̱ʼa̱ ña̱ kéʼéna ña̱yóʼo, xa̱a̱ ku̱a̱ʼání na̱ yiví chíndeétáʼanna xíʼin ta xáa̱na ndúuna discípulo ta̱ Cristo Jesús. Ku̱a̱ʼání na̱ hermano yóʼo loʼova ña̱ʼa kúúmiína, soo ku̱a̱ʼání bendición táxi Jehová ndaʼa̱na (Mar. 10:29, 30). ¿Á su̱ví ña̱ nda̱a̱ kúúña, táxiníyó tíxa̱ʼvi xa̱ʼa̱ ña̱ íyo na̱ hermano yóʼo ti̱xin congregación?

8. ¿Nda̱chun kúú ña̱ ndáyáʼviní iin tá iin na̱ publicador nu̱ú Jehová?

⁸ Tá saá, ¿á na̱ hermano na̱ nda̱kaxin espíritu santo kuití xíʼin na̱ káchíñu ku̱a̱ʼá tiempo nu̱ú Jehová kúú na̱ kúúmií iin chiñu ti̱xin congregación? Va̱ása, chi iin tá iin na̱ publicador ndáyáʼvinína nu̱ú Jehová ta saátu nu̱ú na̱ congregación (Rom. 10:15; 1 Cor. 3:6-9). Saáchi iin chiñu ña̱ ndáyáʼvi va̱ʼaka nu̱ú na̱ congregación kúú ña̱ chindeétáʼanna xíʼin na̱ yiví ña̱ xa̱a̱na koona discípulo ta̱ Cristo (Mat. 28:19, 20; 1 Tim. 2:4). Ndiʼi na̱ publicador na̱ íyo ti̱xin congregación ni xa̱a̱ nda̱kuchina á va̱ása, chíka̱a̱na ndee̱ ña̱ keʼéna chiñu yóʼo ta ndáyáʼviníña nu̱úna (Mat. 24:14).

9. ¿Nda̱chun ndáyáʼvi ná hermana nu̱úyó?

⁹ ¿Ndáaña kivi ka̱ʼa̱nyó xa̱ʼa̱ ná hermana? Jehová táxira iin chiñu ndaʼa̱ná ti̱xin congregación. Chíndayáʼviníra ná íyo yií, ná íyo se̱ʼe, ná ni̱xi̱ʼi̱ yií xíʼin ná ta̱ʼán tindaʼa̱ chi nda̱kúní íyo ininá káchíñuná nu̱úra. Ña̱ Biblia káʼa̱nña xa̱ʼa̱ ku̱a̱ʼání ná ñaʼá ná sa̱kúsi̱í-ini Ndióxi̱ xa̱ʼa̱ ña̱ ndíchi ni̱xi̱yoná, xi̱kandíxanára, si̱í ni̱xi̱yo ininá, ndakú ni̱xi̱yo ininá, va̱ʼa ni̱xi̱yo ininá ta ke̱ʼéná  ña̱ va̱ʼa (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Táxiníyó tíxa̱ʼvi ndaʼa̱ Jehová, xa̱ʼa̱ ña̱ íyo ná hermana ná kúúmií táʼan ña̱ va̱ʼa yóʼo ti̱xin congregación.

10. ¿Nda̱chun chíndayáʼviyó na̱ hermano na̱ xa̱a̱ chée?

¹⁰ Ta saátu, ti̱xin congregación íyo na̱ hermano na̱ xa̱a̱ chée ta iin bendición kúú na̱yóʼo. Sava na̱yóʼo, ndiʼi tiempo ña̱ xa̱a̱ tákuna káchíñuna nu̱ú Jehová ta nda̱kú íyo inina xíʼinra. Ta inkana, sana sa̱kán loʼo tiempo kúú ña̱ sa̱kuaʼana xa̱ʼa̱ ña̱ nda̱a̱. Ku̱a̱ʼání na̱yóʼo xóʼvi̱na xa̱ʼa̱ ña̱ xa̱a̱ ku̱chéena chi va̱ása kívika keʼéna ku̱a̱ʼáka chiñu ti̱xin congregación. Soo ni saá, chíka̱a̱nína ndee̱ ña̱ natúʼunna xíʼin na̱ yiví xa̱ʼa̱ Ndióxi̱ ta xíniñúʼuna ndee̱na ña̱ va̱ʼa ka̱ʼa̱nna tu̱ʼun va̱ʼa xíʼin inkana ta sánáʼa̱nana. Ku̱a̱ʼání ña̱ʼa sákuaʼayó xíʼin ña̱ xíni̱na keʼéna. Ndáyáʼvinína nu̱ú Jehová ta saátu nu̱ú miíyó (Prov. 16:31).

11, 12. ¿Ndáa ki̱ʼva chíka̱a̱ ña̱ kéʼé na̱ va̱lí na̱ íyo ti̱xin congregación ndee̱ xíʼún?

¹¹ Ná ndakanixi̱níyó xa̱ʼa̱ na̱ va̱lí. Na̱yóʼo íxayo̱ʼvi̱níña xíʼinna ña̱ koona nu̱ú ñuyǐví ta̱ Ndi̱va̱ʼa chi íyoní ña̱ va̱ása va̱ʼa (1 Juan 5:19). Soo, tá xítoyó ña̱ táxina comentario ti̱xin reunión, xáʼa̱nna nátúʼunna xa̱ʼa̱ Ndióxi̱ ta va̱ása yíʼvina ka̱ʼa̱nna xa̱ʼa̱ ña̱ kándíxana, ña̱yóʼo chíka̱a̱níña ndee̱ xíʼinyó. Ndóʼó na̱ va̱lí, kúúmiíndó iin chiñu ña̱ ndáyáʼviní ti̱xin congregación Jehová (Sal. 8:2).

¹² Soo sava na̱ hermano xíʼin ná hermana íxayo̱ʼvi̱ña xíʼinna kandíxana ña̱ ndáyáʼvina ti̱xin congregación. ¿Ndáaña kivi chindeétáʼan xíʼinyó ña̱ va̱ʼa kotoyó ña̱ iin tá iinyó kúúmiíyó iin chiñu ti̱xin congregación? Ná ka̱ʼa̱nyó xa̱ʼa̱ ña̱yóʼo.

13, 14. ¿Nda̱chun kivi ndakanixi̱ní savana ña̱ va̱ása ndáyáʼvina ti̱xin congregación?

¹³ Ña̱ u̱vi̱ ña̱ sákuaʼayó xíʼin ejemplo ña̱ ni̱ka̱ʼa̱n ta̱ Pablo xa̱ʼa̱, sándakaʼánña miíyó xa̱ʼa̱ iin ña̱ ndóʼo na̱ hermano, ku̱a̱ʼánína íxayo̱ʼvi̱ña xíʼinna ña̱ kandíxana ña̱ ndáyáʼvina ti̱xin congregación. Ta̱ Pablo ka̱ʼyíra ña̱yóʼo: “Tá xa̱ʼa̱yó ná kachiña ‘Xa̱ʼa̱ ña̱ va̱ása kúi̱ ndaʼa̱, va̱ása kúi̱ táʼan ku̱ñuʼ, soo su̱ví xa̱ʼa̱ ña̱yóʼo va̱ása kookaña táʼan ku̱ñuyó. Ta, tá so̱ʼoyó ná kachiña ‘Xa̱ʼa̱ ña̱ va̱ása  kúi̱ nduchúnu̱ú, va̱ása kúi̱ táʼan ku̱ñuʼ, soo su̱ví xa̱ʼa̱ ña̱yóʼo va̱ása kookaña táʼan ku̱ñuyó” (1 Cor. 12:15, 16). ¿Ndáaña sákuaʼayó xíʼin ña̱ ni̱ka̱ʼa̱nra?

¹⁴ Tá ná chitáʼanyó ña̱ kéʼéyó xíʼin ña̱ kéʼé inka na̱ hermano, ixayo̱ʼvi̱ña xíʼinyó kotoyó ña̱ ndáyáʼviyó ti̱xin congregación. Sava na̱ hermano va̱ʼaní sánáʼa̱na, viíní kéʼéna chiñuna á va̱ʼaní sándi̱kona-ini inkana. Ta sana kivi ndakanixi̱níyó ña̱ va̱ása kúchiñuyó keʼéyó táʼan ña̱ kéʼé na̱kán. Ña̱yóʼo náʼa̱ña ña̱ vitá-iniyó ta ndákuniyó ña̱ íyo sava ña̱ʼa ña̱ va̱ása kívi keʼéyó (Filip. 2:3). Soo ná kiʼinyó kuenta. Chi tá ndiʼi tiempo ná chitáʼanyó miíyó xíʼin na̱ xíni̱ní keʼé iin ña̱ʼa, ndakava-iniyó. Nda̱a̱ táki̱ʼva ni̱ka̱ʼa̱n ta̱ Pablo, nda̱a̱ kivi xa̱a̱yó ndakanixi̱níyó ña̱ kǒo iin chiñu kéʼéyó ti̱xin congregación. ¿Ndáaña kivi chindeétáʼan xíʼinyó ña̱ va̱ása ndakanixi̱níyó saá?

15. Nda̱a̱ táki̱ʼva káchi 1 Corintios 12:4-11, ¿ndáaña xíniñúʼu ndakanixi̱níyó xa̱ʼa̱ ña̱ xíni̱yó keʼéyó?

¹⁵ Ná ndakanixi̱níyó xa̱ʼa̱ ña̱yóʼo: sava na̱ cristiano na̱ ni̱xi̱yo tá siglo nu̱ú Jehová ta̱xira espíritu santora ndaʼa̱na ña̱ va̱ʼa ke̱ʼéna milagro, soo xa̱a̱ síín síín ni̱xi̱yo ña̱ xi̱keʼéna (kaʼvi 1 Corintios 12:4-11). * Ni xa̱a̱ síín síín íyo ña̱ ta̱xi Jehová ndaʼa̱ na̱ cristiano kán, soo ndiʼina xi̱ndayáʼvina nu̱úra. Tiempo vitin va̱ása kéʼéyó milagro, soo ndiʼi ña̱ kéʼéyó ndáyáʼvinívaña nu̱ú Jehová, ni va̱ása inkáchi íyo ña̱ xíni̱yó keʼéyó.

16. ¿Ndáa consejo ña̱ ta̱xi ta̱ apóstol Pablo xíniñúʼu kundiku̱nyó?

¹⁶ Nu̱úka ña̱ chitáʼanyó miíyó xíʼin inka na̱ hermano, va̱ʼaka ná kundiku̱nyó consejo ña̱ ta̱xi ta̱ apóstol Pablo: “Iin tá iinndó viíní kotondó ndáaña kúú ña̱ kéʼéndó, tasaá kivi kusi̱í-inindó xa̱ʼa̱ ña̱ kéʼéndó, ta va̱ása chitáʼanndó ña̱ kéʼéndó xíʼin ña̱ kéʼé inka na̱ yiví” (Gál. 6:4).

17. ¿Ndáaña va̱ʼa ndakiʼinyó tá ná kundiku̱nyó consejo ña̱ ta̱xi ta̱ Pablo?

 ¹⁷ Tá ná kundiku̱nyó consejo ña̱ ta̱xi ta̱ Pablo ta viíní kotoyó ndáaña kúú ña̱ kéʼéyó, sana kivi kunda̱a̱-iniyó ña̱ íyo sava ña̱ʼa ña̱ xíni̱yó keʼéyó soo va̱ása xíni̱ inkana keʼénaña. Tá kúú, sana iin ta̱ anciano íxayo̱ʼvi̱ña xíʼinra taxira discurso, soo va̱ʼaní nátúʼunra xíʼin na̱ yiví xa̱ʼa̱ Ndióxi̱. Á sana íxayo̱ʼvi̱ña xíʼinra keʼéra chiñura nda̱a̱ táki̱ʼva kéʼé inka na̱ anciano ti̱xin congregación, soo kúʼvi̱-inira xínira na̱ hermano ña̱kán va̱ʼaní kúnina tá ndúkúna consejo nu̱úra. Á sanatu ku̱a̱ʼána xíni̱na ña̱ va̱ʼaní-inira (Heb. 13:2, 16). Tá ná kunda̱a̱ káxi iniyó ndáaña kúú ña̱ xíni̱yó keʼéyó, saá kúú ña̱ kusi̱í-iniyó xa̱ʼa̱ ña̱ chíndeétáʼanyó xíʼin na̱ congregación. Ta saátu va̱ása sa̱a̱-iniyó kuniyó na̱ hermano na̱ xíni̱ keʼé inka ña̱ʼa nu̱ú miíyó.

18. ¿Ndáaña kivi keʼéyó ña̱ va̱ʼa viíka sanáʼa̱yó?

¹⁸ Ni nda̱a̱ ndáaka chiñu kúú ña̱ kúúmiíyó ti̱xin congregación, ndiʼiyó xíniñúʼu chika̱a̱-iniyó ña̱ va̱ʼaníka keʼéyó chiñu nu̱ú Ndióxi̱ ta viíníka sanáʼa̱yó inkana. Xa̱ʼa̱ ña̱yóʼo, Jehová xíniñúʼura na̱ ñuura ña̱ va̱ʼa sanáʼa̱ra miíyó. Tá kúú, ti̱xin reunión ña̱ xíyo ma̱ʼñú semana sánáʼa̱ra miíyó ndáa ki̱ʼva viíka natúʼunyó xíʼin na̱ yiví. ¿Á chíka̱a̱yó ndee̱ ña̱ keʼéyó ndiʼi ña̱ sákuaʼayó ti̱xin reunión yóʼo?

19. ¿Ndáaña kivi keʼéyó ña̱ va̱ʼa ku̱ʼu̱nyó Escuela nu̱ú Sákuaʼa na̱ Nátúʼun xa̱ʼa̱ ña̱ Kaʼndachíñu Ndióxi̱?

¹⁹ Inka nu̱ú kivi sakuaʼayó kúú ti̱xin ña̱ Escuela nu̱ú Sákuaʼa na̱ Nátúʼun xa̱ʼa̱ ña̱ Kaʼndachíñu Ndióxi̱, ta na̱ kivi ku̱ʼu̱n escuela yóʼo kúú na̱ hermano á ná hermana na̱ káchíñu ku̱a̱ʼá tiempo nu̱ú Jehová, na̱ kúúmií 23 nda̱a̱ 65 ku̱i̱ya̱. ¿Á túviyó ña̱ va̱ása kuchiñuyó ku̱ʼu̱nyó escuela yóʼo? Nu̱úka ña̱ kaʼyíyó nu̱ú iin lista nda̱chun kúú ña̱ va̱ása kívi ku̱ʼu̱nyó, va̱ʼaka ná kaʼyíyó nda̱chun kúú ña̱ kúni̱yó ku̱ʼu̱nyó. Tándi̱ʼi ná keʼéyó ña̱ʼa ña̱ chindeétáʼan xíʼinyó ña̱ va̱ʼa ku̱ʼu̱nyó escuela kán. Tá ná chindeétáʼan Jehová xíʼinyó ta saátu tá ná chika̱a̱yó ndee̱, kivi xa̱a̱yó keʼéyó ña̱ nda̱kanixi̱níyó va̱ása kuchiñuyó keʼéyó.

20. ¿Ndáaña sákuaʼayó xíʼin ña̱ káʼa̱n Romanos 12:6-8?

²⁰ Ña̱ u̱ni̱, ña̱ sákuaʼayó xíʼin ejemplo ña̱ ni̱ka̱ʼa̱n ta̱ Pablo va̱xiña nu̱ú Romanos 12:6-8 * (kaʼviña). Nu̱ú ña̱yóʼo, ta̱ Pablo káʼa̱n tukura ña̱ ndiʼiyó na̱ ñúʼu ti̱xin congregación xa̱a̱ síín síín íyo ña̱ xíni̱yó keʼéyó. Soo, káʼa̱nra ña̱ iin tá iinyó xíniñúʼu kuniñúʼuyó ña̱ xíni̱yó keʼéyó ña̱ va̱ʼa chika̱a̱yó ndee̱ xíʼin na̱ congregación ta ndasandakúyó-inina.

21, 22. ¿Ndáaña sákuaʼayó xíʼin ña̱ ndo̱ʼo ta̱ Robert xíʼin ta̱ Felice?

²¹ Ná kotoyó ña̱ ndo̱ʼo iin ta̱ anciano ta̱ naní Robert. * Ta̱yóʼo ka̱chíñura inka ñuu, soo ni̱ka̱ʼa̱nna xíʼinra ña̱ ná kachíñura ti̱xin Betel ña̱ íyo ñuu nu̱ú ke̱era. Ni ni̱ka̱ʼa̱nna xíʼinra ña̱ su̱ví xa̱ʼa̱ ña̱ ke̱ʼéra iin ña̱ va̱ása va̱ʼa kúú ña̱ na̱sama chiñura, soo ka̱chira: “Ku̱a̱ʼání yo̱o̱ va̱ása níkusi̱í-inii̱ saáchi nda̱kanixi̱níi̱ ña̱ va̱ása níkuchiñui̱ keʼíi̱ chiñu ña̱ xi̱kuumiíi̱. Ta sava yichi̱ xi̱kuni̱i̱ sandákoi̱ Betel”. ¿Ndáaña ke̱ʼéra ña̱ va̱ʼa ki̱xáʼa kúsi̱í-inira? Iin ta̱ anciano ni̱ka̱ʼa̱nra xíʼinra, ña̱ sa̱náʼa̱ Jehová miíyó xíʼin chiñu ña̱ xi̱kuumiíyó tá ya̱chi̱ kivi chindeétáʼanña xíʼinyó ña̱ viíníka keʼéyó chiñu ña̱ kúúmiíyó vitin. Ta̱ Robert ku̱nda̱a̱-inira ña̱ va̱ása xíniñúʼu ndakanixi̱níra xa̱ʼa̱ chiñu ña̱ xi̱kuumiíra tá ya̱chi̱, ta kundi̱ʼi̱ka-inira xa̱ʼa̱ ña̱ kúúmiíra vitin.

²² Ki̱ʼva saá íyo ña̱ ndo̱ʼo ta̱ hermano Felice Epíscopo. Miíra xíʼin ñá síʼíra ni̱xa̱ʼa̱nna Escuela  ña̱ Galaad tá ku̱i̱ya̱ 1956, ta xi̱kuuna superintendente ña̱ circuito chí Bolivia. Tá ku̱i̱ya̱ 1964 ka̱ku iin ta̱ loʼo se̱ʼena. Ta̱ Felice ka̱chira: “I̱xayo̱ʼvi̱níña xíʼinndi̱ sandákoondi̱ chiñu ña̱ xi̱kuumiíndi̱. Ki̱ʼva iin ku̱i̱ya̱ nda̱kavaní-inii̱ xa̱ʼa̱ ña̱yóʼo. Soo xa̱ʼa̱ ña̱ chi̱ndeétáʼan Jehová xíʼi̱n, na̱samai̱ ña̱ xi̱ndakanixi̱níi̱ ta ki̱xáʼíi̱ ndíʼi̱ka-inii̱ xa̱ʼa̱ chiñu ña̱ kúúmiíi̱ vitin ña̱ kiʼii̱n kuenta xíʼin se̱ʼi̱”. ¿Á ndóʼoyó nda̱a̱ táki̱ʼva ndo̱ʼo ta̱ Robert á ta̱ Felice? ¿Á kúsuchí-iniyó xa̱ʼa̱ ña̱ va̱ása kúúmiíkayó chiñu ña̱ xi̱kuumiíyó tá ya̱chi̱? Tá saá íyoña, kusi̱íníka-iniyó tá ná ndakanixi̱níyó xa̱ʼa̱ ña̱ kivi keʼéyó vitin ña̱ va̱ʼa kachíñuyó nu̱ú Jehová ta saátu nu̱ú na̱ hermano. Ndiʼi tiempo ná kachíñuyó nu̱ú Ndióxi̱ ta ná kuniñúʼuyó ña̱ xíni̱yó keʼéyó ña̱ va̱ʼa chindeétáʼanyó xíʼin inkana. Ta kusi̱í-iniyó xa̱ʼa̱ ña̱ chíka̱a̱yó ndee̱ xíʼin na̱ congregación.

23. a) ¿Ndáa xa̱ʼa̱ kúú ña̱ xíniñúʼu taváyó tiempo? b) ¿Ndáaña ka̱ʼa̱nyó xa̱ʼa̱ nu̱ú ña̱ inka artículo?

²³ Iin tá iin na̱ káchíñu nu̱ú Jehová ndáyáʼvinína nu̱úra. Ta kúni̱ra ña̱ ná kooyó na̱ ñuura. Tá ná taváyó tiempo ña̱ ndakanixi̱níyó xa̱ʼa̱ ña̱ kivi keʼéyó ña̱ va̱ʼa ndasandakúyó-ini na̱ hermano, ta chíka̱a̱yó ndee̱ ña̱ keʼéyó ña̱yóʼo va̱ása ixayo̱ʼvi̱ña xíʼinyó kotoyó ndáaña kúú chiñu ña̱ kúúmiíyó ti̱xin congregación. Soo, ¿ndáa ki̱ʼva xítoyó inkana? ¿Ndáa ki̱ʼva kivi na̱ʼa̱yó ña̱ ndáyáʼvina nu̱úyó? Nu̱ú ña̱ inka artículo ka̱ʼa̱nyó xa̱ʼa̱ ña̱yóʼo.