1, 2. ¿Ndáaña sakúaʼayó nu̱ú artículo yóʼo?

NÁ NDAKANIXI̱NÍYÓ ña̱ ndátuyó ndakiʼinyó iin ña̱ʼa ña̱ chi̱ndaʼána ndaʼa̱yó ta xíniñúʼuníyóña, soo xa̱a̱ naʼání ndátuyóña ta ta̱ʼán kixaa̱ña. ¿Ndáaña kundoʼoyó? Sana kixáʼayó ndi̱ʼi̱-iniyó. Xa̱ʼa̱ ña̱yóʼo Proverbios 13:12 káchiña: “Ña̱ʼa ña̱ va̱ása kama xínu, sándi̱ʼi̱níña iniyó”. Soo, ¿ndáaña keʼéyó tá ku̱ndaa̱-iniyó ña̱ íyo iin ña̱ ku̱u ta xa̱ʼa̱ ña̱yóʼo ta̱ʼán kixaa̱ ña̱ʼa ña̱ ndátuyó? Sana kúee koo iniyó ta kundatuyóña.

² Nu̱ú artículo yóʼo ka̱ʼa̱nyó xa̱ʼa̱ consejo ña̱ va̱xi nu̱ú Biblia ña̱ kivi chindeétáʼan xíʼinyó ña̱ ndakundeéyó kúee koo iniyó ta kundatuyó (Miq. 7:7). Tasaá ka̱ʼa̱nyó ama kivi na̱ʼa̱yó ña̱ kúee íyo iniyó, ta kundatuyó Jehová. Tándi̱ʼi, ka̱ʼa̱nyó xa̱ʼa̱ bendición ña̱ ndakiʼin na̱ chíka̱a̱-ini ña̱ kundatuna Jehová.

3. ¿Ndáaña sákuaʼayó xíʼin Proverbios 13:11?

³ Nu̱ú Proverbios 13:11 va̱xi iin ña̱ chindeétáʼan xíʼinyó ña̱ kúee koo iniyó. Ña̱yóʼo káchiña: “Na̱ yiví na̱ kamaní ndúkúiká, kamava ndiʼi ña̱yóʼo ndaʼa̱na, soo na̱ ndákaya loʼo tá loʼoña, nduku̱a̱ʼákaña ndaʼa̱na”. ¿Ndáaña sákuaʼayó xíʼin versículo yóʼo? Tá ndíchi ndákanixi̱níyó, kúee keʼéyó iin ña̱ʼa tasaá vií kanaña.

4. ¿Ndáa consejo va̱xi nu̱ú Proverbios 4:18?

⁴ Proverbios 4:18 káchiña: “Yichi̱ na̱ kéʼé ña̱ nda̱kú íyoña nda̱a̱ táki̱ʼva íyo ñu̱ʼu tá kítaña xi̱ta̱a̱n, ta ña̱yóʼo loʼo tá  loʼo ndeéka ndáyeʼe̱ña tá xa̱a̱ ku̱a̱ʼa̱n túvi”. Ña̱ versículo yóʼo náʼa̱ña nu̱úyó ña̱ loʼo tá loʼo sánáʼa̱ Jehová na̱ ñuura xa̱ʼa̱ ña̱ kúni̱ra keʼéra chí nu̱únínu. Ta saátu chíndeétáʼanña xíʼinyó kunda̱a̱-iniyó ndáa ki̱ʼva násamayó ña̱ kéʼéyó, ta kúyatinyó nu̱ú Jehová. Va̱ása kuchiñuyó kamaní xa̱a̱yó keʼéyó ña̱yóʼo, chi xíniñúʼu ya̱ʼa ku̱a̱ʼá tiempo saáví keʼéyóña. Tá ná kaʼviyó tu̱ʼun Ndióxi̱ ta kundiku̱nyó consejo ña̱ va̱xi nu̱úña, ta saátu consejo ña̱ táxi na̱ ñuura, loʼo tá loʼo kixáʼayó keʼéyó nda̱a̱ táki̱ʼva ke̱ʼé ta̱ Cristo ta kuxini̱kayó Ndióxi̱. Ná ka̱ʼa̱nyó xa̱ʼa̱ iin ejemplo ña̱ xi̱niñúʼu ta̱ Jesús ña̱ va̱ʼa ka̱ʼa̱nra xa̱ʼa̱ ña̱yóʼo.

5. ¿Ndáa ejemplo xi̱niñúʼu ta̱ Jesús ña̱ va̱ʼa na̱ʼa̱ra nu̱úyó ña̱ loʼo tá loʼo násama na̱ yiví ña̱ kéʼéna?

⁵ Ta̱ Jesús chi̱táʼanra ña̱ nátúʼunyó xa̱ʼa̱ Reino Ndióxi̱ xíʼin iin si̱ʼva̱ ña̱ xáʼnu loʼo tá loʼo níma̱ na̱ yiví. Ka̱chira: “Si̱ʼva̱ yóʼo ndúta̱ña ta xáʼnuña, ni kǒo kúnda̱a̱ va̱ʼa inira ndáa ki̱ʼva kúu ndiʼi ña̱yóʼo. Ñuʼú yóʼo kúee kúee sákuaʼnuñaña: siʼna xáʼnuña, saá xáʼnu yo̱kóña ta tándi̱ʼi saá kána si̱ʼva̱ña” (Mar. 4:27, 28). ¿Ndáaña xi̱kuni̱ kachi ta̱ Jesús xíʼin ña̱yóʼo? Na̱ yiví na̱ kíxáʼa sákuaʼa xa̱ʼa̱ Ndióxi̱, loʼo tá loʼo xáʼnuna xíʼin tu̱ʼunra nda̱a̱ táki̱ʼva xáʼnu iin planta. Tá kúú, kivi kotoyó ña̱yóʼo tá kíxáʼa na̱ káʼviyó xíʼin kúyatinna nu̱ú Jehová, ta násamana ña̱ va̱ása va̱ʼa kéʼéna (Efes. 4:22-24). Soo ná ndakaʼányó chi mií Jehová kúú ta̱ sákuaʼnu ña̱ nda̱a̱ níma̱na (1 Cor. 3:7).

6, 7. ¿Ndáaña sákuaʼayó xíʼin ki̱ʼva ña̱ i̱xava̱ʼa Jehová ñuʼú yóʼo?

⁶ Ni nda̱a̱ ndáaka ña̱ʼa kéʼé Jehová, kúee íyo inira ta ndátura nda̱a̱ ná saxínuraña. Ta kéʼéraña ña̱ va̱ʼa ndukáʼnu ki̱vi̱ra ta saátu xa̱ʼa̱ ña̱ va̱ʼa inkana. Ná kotoyó ndáa ki̱ʼva loʼo tá loʼo i̱xava̱ʼa Jehová ñuʼú yóʼo, tasaá kivi kundooyó nu̱úña.

⁷ Tu̱ʼun Ndióxi̱ káʼa̱nña ndáa ki̱ʼva i̱xava̱ʼa Jehová ñuʼú yóʼo, siʼna xi̱tora ndáa ki̱ʼva kooña, ndáa ki̱ʼva kuva̱ʼaña tasaá ki̱xáʼara i̱xava̱ʼaraña (Job 38:5, 6). Ta nda̱a̱ ta̱vára tiempo ña̱ va̱ʼa kotora ña̱ i̱xava̱ʼara (Gén. 1:10, 12). ¿Á kivi ndakanixi̱níyó ndáaña ndo̱ʼo na̱ ángel tá  xi̱nina ndáa ki̱ʼva ki̱xáʼa Jehová íxava̱ʼara iin tá iin ña̱ʼa? Ku̱si̱íníva-inina tá xi̱nina ña̱yóʼo ta nda̱a̱ ki̱xáʼana xítana nu̱úra (Job 38:7). ¿Ndáaña sákuaʼayó xíʼin ña̱yóʼo? Ku̱a̱ʼání ku̱i̱ya̱ i̱xava̱ʼa Jehová ñuʼú yóʼo, tí ki̱mi, saátu ndiʼi ña̱ʼa ña̱ íyo nu̱úña, ta tá ki̱xáʼara xítora ndiʼi ña̱ i̱xava̱ʼara saá ki̱ʼinra kuenta ña̱ va̱ʼaní íyoña (Gén. 1:31).

8. ¿Ndáaña ka̱ʼa̱nyó xa̱ʼa̱?

⁸ Nda̱a̱ táki̱ʼva xa̱a̱ sa̱kuaʼayó, nu̱ú tu̱ʼun Ndióxi̱ va̱xi ku̱a̱ʼání consejo ña̱ sánáʼa̱ miíyó ña̱ xíniñúʼu kúee koo iniyó ta kundatuyó. Vitin ná ka̱ʼa̱nyó ama kivi na̱ʼa̱yó ña̱ ndátuyó Jehová.

9. ¿Ama xíniñúʼu kúee koo iniyó ta kundatuyó Jehová?

⁹Tá túviyó ña̱ va̱ása kama ndákuiin Jehová ña̱ káʼa̱nyó xíʼinra. Tá ndúkúyó ndee̱ nu̱ú Jehová ña̱ va̱ʼa ya̱ʼayó nu̱ú iin tu̱ndóʼo á tá káʼa̱nyó xíʼinra ña̱ ná chindeétáʼanra xíʼinyó ña̱ va̱ása keʼékayó iin ña̱ va̱ása va̱ʼa, sana túviyó ña̱ va̱ása kama ndákuiinra. ¿Nda̱chun va̱ása kama ndákuiin Jehová ndiʼi oración ña̱ kéʼéyó nu̱úra?

10. ¿Nda̱chun xíniñúʼu kúee koo iniyó tá káʼa̱nyó xíʼin Ndióxi̱?

¹⁰ Jehová viíní xíniso̱ʼora ndiʼi oración ña̱ kéʼéyó nu̱úra (Sal. 65:2). Ta kúnda̱a̱-inira ña̱ xíʼin ña̱yóʼo náʼa̱yó ña̱ kándíxaníyóra (Heb. 11:6). Ta xítora á ndixa kúni̱yó keʼéyó ña̱ ndúkúyó nu̱úra, ta saátu á kéʼéyó ña̱ kúni̱ra (1 Juan 3:22). Soo tá kúni̱yó sandákooyó keʼéyó iin ña̱ va̱ása va̱ʼa, xíniñúʼu kúee koo iniyó ta keʼéyó ña̱ ndúkúyó nu̱ú Jehová. Ta̱ Jesús ni̱ka̱ʼa̱nra ña̱yóʼo nu̱ú Mateo 7:7, 8: “Ndakundeéndó ndukúndó ña̱ va̱ʼa nu̱ú Ndióxi̱ ta taxiraña ndaʼa̱ndó, ndakundeéndó nandukúndóña ta ndani̱ʼívandóña, ndakundeéndó kani ndaʼa̱ndó yéʼé ta nu̱náña nu̱úndó. Saáchi ndiʼi na̱ ndúkúña ndákiʼinvanaña, ta ndiʼi na̱ nándukúña ndáni̱ʼívanaña, ta ndiʼi na̱ káni ndaʼa̱ yéʼé nu̱návaña nu̱úna”. Ña̱ xi̱kuni̱ kachi ta̱ Jesús nu̱ú versículo yóʼo kúú ña̱ sana va̱ása kama ndakuiin Ndióxi̱ ndiʼi oración ña̱ kéʼéyó nu̱úra. Tá ndíku̱nyó consejo yóʼo ta ndákundeéyó káʼa̱nyó xíʼin Jehová, kivi kandíxayó ña̱ kuniso̱ʼovara ña̱ káʼa̱nyó xíʼinra ta ndakuiinra yuʼúyó (Col. 4:2).

11. ¿Ndáa ki̱ʼva chíndeétáʼan Hebreos 4:16 xíʼinyó tá túviyó ña̱ va̱ása kama ndákuiin Jehová?

¹¹ Sana túviyó ña̱ va̱ása kama ndákuiin Jehová oración ña̱ kéʼéyó nu̱úra, soo ta̱yóʼo káʼa̱nra xíʼinyó ña̱ ndakuiinvara “mií tiempo ña̱ xíniñúʼuyóña” (kaʼvi Hebreos 4:16). * Ña̱kán ná va̱ása ndakanixi̱níyó ña̱ su̱ví ña̱ va̱ʼa kéʼé Jehová tá va̱ása kama ndákuiinra yuʼúyó. Tá kúú, xa̱a̱ ku̱a̱ʼání ku̱i̱ya̱ káʼa̱n savana xíʼin Jehová ña̱ ná kixaa̱ Reinora ta sandíʼi-xa̱ʼa̱ña ña̱ va̱ása va̱ʼa íyo nu̱ú ñuʼú yóʼo. Ta nda̱a̱ mií ta̱ Jesús sa̱náʼa̱ miíyó ña̱ ndukúyó Reino yóʼo (Mat. 6:10). Soo iin ña̱ kíʼviní kúú ña̱ sandákooyó kandíxayó Ndióxi̱ xa̱ʼa̱ ña̱ ta̱ʼán sa̱ndíʼi-xa̱ʼa̱ra ña̱ va̱ása va̱ʼa íyo nu̱ú ñuʼú yóʼo (Hab. 2:3; Mat. 24:44). Ta ña̱ va̱ʼaníka kúú ña̱ kúee koo iniyó ta kundatuyó ná sandíʼi-xa̱ʼa̱ Jehová ña̱ va̱ása va̱ʼa, ta saátu ndakundeéyó ka̱ʼa̱nyó xíʼinra. Xa̱a̱ nda̱kaxinva Jehová mií ki̱vi̱ xíʼin hora ña̱ sandíʼi-xa̱ʼa̱ra ña̱ va̱ása va̱ʼa íyo nu̱ú ñuʼú yóʼo. Ta keʼéraña mií tiempo ña̱ va̱ʼaka nu̱ú ndiʼiyó (Mat. 24:36; 2 Ped. 3:15).

12. ¿Ama kivi ixayo̱ʼvi̱ña xíʼinyó kúee koo iniyó?

¹²Tá xóʼvi̱yó xa̱ʼa̱ iin ña̱ʼa ña̱ va̱ása níkeʼéyó. Tiempo vitin na̱ yiví íxandi̱va̱ʼana xíʼin inkana xa̱ʼa̱ ña̱ síín íyona nu̱ú miína, tá kúú xa̱ʼa̱ ña̱  ke̱ena inka ñuu, xa̱ʼa̱ tu̱ʼun káʼa̱nna, xa̱ʼa̱ costumbre ña̱ kúúmiína á xa̱ʼa̱ ña̱ kúúmiína iin kue̱ʼe̱ á xa̱ʼa̱ ña̱ ndu̱chiʼñana. Ta saátu íxandi̱va̱ʼana xíʼin ku̱a̱ʼání na̱ ndásakáʼnu Ndióxi̱ xa̱ʼa̱ ña̱ kándíxana ña̱ va̱xi nu̱ú Biblia. Tá íxandi̱va̱ʼana xíʼinyó ná ndakaʼányó ña̱ ni̱ka̱ʼa̱n ta̱ Jesús tá ka̱chira: “Na̱ kundeé-ini nda̱a̱ nu̱ú ndíʼi kúú na̱ ka̱ku” (Mat. 24:13). Soo, ¿ndáaña keʼéyó tá ku̱ndaa̱-iniyó ña̱ iin na̱ íyo ti̱xin congregación ke̱ʼéna iin ña̱ va̱ása va̱ʼa? Tá xa̱a̱ kúnda̱a̱-ini na̱ anciano xa̱ʼa̱ ña̱yóʼo, ¿á kúee koo iniyó ta kandíxayó ña̱ vií ndatiinna ku̱a̱chi yóʼo nda̱a̱ táki̱ʼva kúni̱ mií Jehová? ¿Ndáaña keʼé na̱ anciano?

13. ¿Ndáa ki̱ʼva kúni̱ Jehová ná ndatiin na̱ anciano ku̱a̱chi ndeé?

¹³ Tá kúnda̱a̱-ini na̱ anciano xa̱ʼa̱ iin na̱ hermano na̱ ni̱ki̱ʼvi iin ku̱a̱chi ndeé, káʼa̱nna xíʼin Jehová ña̱ ná taxira ña̱ ndíchi ndaʼa̱na ña̱ vií ndatiinna ku̱a̱chi yóʼo nda̱a̱ táki̱ʼva kúni̱ miíra (Sant. 3:17). Chi ña̱ kúni̱na kúú ña̱ chindeétáʼanna xíʼin na̱ hermano na̱ ni̱ki̱ʼvi ku̱a̱chi yóʼo ña̱ sandákoona ña̱ va̱ása va̱ʼa kéʼéna (Sant. 5:19, 20). Ta saátu kúni̱na kundaana na̱ congregación, ta sándi̱kona-ini na̱ xóʼvi̱ (2 Cor. 1:3, 4). Tá ndátiin na̱ anciano iin ku̱a̱chi ndeé, ña̱ síʼina kéʼéna kúú ña̱ nándukúna xa̱ʼa̱ ndiʼi ña̱ ku̱u, ta ku̱a̱ʼáva tiempo xíniñúʼu keʼéna ña̱yóʼo. Tándi̱ʼi, xíniñúʼu ka̱ʼa̱nna xíʼin Jehová, ta saátu kuniñúʼuna tu̱ʼun Ndióxi̱ ña̱ va̱ʼa taxina consejo ndaʼa̱ na̱ hermano yóʼo ta viíní ndatiinna ku̱a̱chi xíʼinna (Jer. 30:11). Va̱ása kúáchi̱nína tá ndátiinna ku̱a̱chi yóʼo, soo saátu va̱ása kamaní ndátiinnaña. Tá ndíku̱nna ña̱ káʼa̱n Jehová, saá kúú ña̱ va̱ʼaní chíndeétáʼanna xíʼin na̱ congregación. Soo ni xa̱a̱ viíva nda̱tiin na̱ anciano ku̱a̱chi yóʼo, sana kivi koo iin na̱ hermano na̱ xóʼvi̱ka xa̱ʼa̱ ña̱ ke̱ʼé na̱ ni̱ki̱ʼvi ku̱a̱chi yóʼo. Tá ña̱yóʼo kúú ña̱ ndo̱ʼoyó, ¿ndáaña kivi keʼéyó ña̱ va̱ása xo̱ʼvi̱kayó?

14. ¿Ndáaña kivi chindeétáʼan xíʼinyó tá ke̱ʼé iin na̱ hermano ña̱ va̱ása va̱ʼa xíʼinyó?

¹⁴ ¿Á xa̱a̱ ke̱ʼéna iin ña̱ va̱ása va̱ʼa xíʼinyó, ta sana iin na̱ hermano kúú na̱ ke̱ʼé ña̱yóʼo xíʼinyó? Tá saá íyo ña̱ ndo̱ʼoyó, tu̱ʼun Ndióxi̱ káʼa̱nña xa̱ʼa̱ na̱ kúee ni̱xi̱yo ini, ta ña̱yóʼo kivi chindeétáʼan xíʼinyó kundatuyó ná ndasavií Jehová ña̱ ndóʼoyó. Tá kúú, ta̱ José va̱ása nísa̱a̱ra xíʼin na̱ ñanira xa̱ʼa̱ ña̱ va̱ása va̱ʼa ke̱ʼéna xíʼinra. Chi ña̱ ni̱ndi̱ʼi̱ka-inira xa̱ʼa̱ kúú ña̱ ndasakáʼnura Jehová, ta ku̱a̱ʼání bendición ta̱xi  Jehová ndaʼa̱ra xa̱ʼa̱ ña̱ kúee ni̱xi̱yo inira ta ku̱ndeé-inira (Gén. 39:21). Tá ni̱ya̱ʼa tiempo i̱xakáʼnu-ini ta̱ José xa̱ʼa̱ na̱ ñanira, ta xi̱nira ndáa ki̱ʼva ta̱xi Jehová ku̱a̱ʼání bendición ndaʼa̱ra (Gén. 45:5). Nda̱a̱ táki̱ʼva ndo̱ʼo ta̱ José, saátu miíyó va̱ʼaní kuniyó tá ná kuyatinyó nu̱ú Jehová ta taxiyó ndasaviíra ku̱a̱chi ña̱ ndóʼoyó (Sal. 7:17; 73:28).

15. ¿Ndáaña chi̱ndeétáʼan xíʼin iin ñá hermana tá ke̱ʼéna ña̱ va̱ása va̱ʼa xíʼinñá?

¹⁵ Sana va̱ása xa̱a̱víyó kundoʼoyó táʼan ña̱ ndo̱ʼo ta̱ José, soo ndiʼivayó xóʼvi̱yó tá kéʼéna iin ña̱ va̱ása va̱ʼa xíʼinyó. Tá kúúmiíyó iin ku̱a̱chi xíʼin inkana ta ni su̱ví testigo Jehová kúúna, kivitu kundiku̱nyó consejo ña̱ va̱xi nu̱ú Biblia ña̱ va̱ʼa ndasaviíyó ku̱a̱chi xíʼin na̱ yiví yóʼo (Filip. 2:3, 4). Ná kotoyó ndáaña ke̱ʼé iin ñá hermana tá ku̱ndaa̱-iniñá ña̱ iin ñá xi̱kachíñu xíʼinñá ki̱xáʼañá káʼa̱nñá ña̱ vatá xa̱ʼa̱ñá. Ni ni̱xo̱ʼvi̱ní-iniñá xíʼin ña̱yóʼo, soo va̱ása nísa̱a̱ñá ta ki̱xáʼañá ndákanixi̱níñá xa̱ʼa̱ ña̱ ke̱ʼé ta̱ Jesús, saáchi tá xi̱ka̱ʼa̱n ndi̱va̱ʼana xíʼinra va̱ása níka̱ʼa̱n ndi̱va̱ʼara xíʼinna (1 Ped. 2:21, 23). Ña̱kán ñá hermana yóʼo va̱ása níndi̱ʼi̱ka-iniñá xa̱ʼa̱ ña̱ ku̱u. Tándi̱ʼi ku̱ndaa̱-iniñá xa̱ʼa̱ ñá káchíñu xíʼinñá ña̱ kúúmiíñá iin kue̱ʼe̱ ña̱ ndeéní, ta kue̱ʼe̱ yóʼo xi̱sandíʼi̱níña-iniñá. Tasaá ñá hermana yóʼo ku̱ndaa̱-iniñá ña̱ su̱ví ña̱ kúni̱ mií ñá ñaʼá kán kúú ña̱ ni̱ka̱ʼa̱nñá ña̱ vatá xa̱ʼa̱ñá, saáchi íyo ña̱ ndóʼovañá. Xa̱ʼa̱ ña̱yóʼo va̱ása níndi̱ʼi̱ka-ini ñá hermana yóʼo, ta ni̱kusi̱íní-iniñá xa̱ʼa̱ ña̱ va̱ása kama nísa̱a̱ñá tá ke̱ʼéna ña̱ va̱ása va̱ʼa xíʼinñá.

16. ¿Ndáaña kivi sandíko-iniyó tá kéʼéna iin ña̱ va̱ása va̱ʼa xíʼinyó? (1 Pedro 3:12).

¹⁶ Tá kúndeé-iniyó xa̱ʼa̱ ña̱ kéʼéna ña̱ va̱ása va̱ʼa xíʼinyó á xa̱ʼa̱ ña̱ kúúmiíyó inkaka tu̱ndóʼo ña̱ sáxo̱ʼvi̱ miíyó, ná ndakaʼányó ña̱ yatin íyo Jehová xíʼin na̱ kúsuchí-ini (Sal. 34:18). Ta̱yóʼo kúʼvi̱-inira xínira miíyó, saáchi kúee íyo iniyó ta sándakooyó ña̱ ndóʼoyó ndaʼa̱ra (Sal. 55:22). Jehová kúú ta̱ ndátiin ku̱a̱chi nu̱ú ñuʼú yóʼo ta xítora ndiʼi ña̱ kúu (kaʼvi 1 Pedro 3:12). * Xa̱ʼa̱ ña̱yóʼo tá yáʼayó nu̱ú iin tu̱ndóʼo ña̱ va̱ása kívi ndasaviíyó, ná ndakaʼányó ña̱ xíniñúʼu chika̱a̱-iniyó ña̱ kúee koo iniyó ta kundatuyó Jehová.

17. Nda̱a̱ táki̱ʼva káchi Isaías 30:18, ¿ndáaña káʼa̱n Jehová keʼéra?

¹⁷ Si̱lóʼo kúma̱ní ta ku̱a̱ʼání ña̱ va̱ʼa taxi Jehová ndaʼa̱yó ti̱xin Reinora. Isaías 30:18 káchiña: “Jehová kúee íyo inira ta ndátura ña̱ va̱ʼa chindeétáʼanra xíʼinna, ta na̱ʼa̱ra ña̱ kúndáʼvi-inira xínirana. Saáchi Jehová kúúra iin Ndióxi̱ ta̱ nda̱kúní ndátiin ku̱a̱chi. Ta si̱íní íyo ini na̱ ndátu miíra”. Na̱ kúsi̱í-ini ndátu Jehová ku̱a̱ʼání ña̱ va̱ʼa ndakiʼinna vitin, ta saátu chí nu̱únínu nu̱ú ñuyǐví xa̱á.

18. ¿Ndáaña va̱ʼa ndakiʼinyó chí nu̱únínu?

¹⁸ Nu̱ú ñuyǐví xa̱á miíyó na̱ ndásakáʼnu Ndióxi̱ va̱ása kuumiíkayó táʼan tu̱ndóʼo ña̱ kúúmiíyó tiempo vitin, ta ni va̱ása ndi̱ʼi̱ka-iniyó. Kǒokana keʼé ña̱ va̱ása va̱ʼa xíʼinyó ta ni va̱ása xo̱ʼvi̱yó (Apoc. 21:4). Ta va̱ása kundi̱ʼi̱ka-iniyó ña̱ ndukúyó ña̱ʼa ña̱ xíniñúʼuyó, saáchi koo ku̱a̱ʼáníña nu̱ú ñuyǐví xa̱á (Sal. 72:16; Is. 54:13). Va̱ʼaní koo ña̱ kutakuyó.

19. ¿Ndáa xa̱ʼa̱ kúú ña̱ íxatu̱ʼva Jehová miíyó tiempo vitin?

¹⁹ Tiempo vitin xa̱a̱ íxatu̱ʼva Jehová miíyó ña̱ va̱ʼa kooyó nu̱ú ñuʼú yóʼo tá ná kaʼndachíñu Reinora, saáchi chíndeétáʼanra xíʼinyó ña̱ sandákooyó keʼéyó ña̱ va̱ása va̱ʼa ta saátu ña̱ kuumiíyó táʼan ña̱ va̱ʼa ña̱ kúúmiíra. Ná va̱ása ndakava-iniyó ta ná ndakundeéyó kachíñuyó nu̱úra, saáchi si̱lóʼo kúma̱ní ta ndakiʼinyó ku̱a̱ʼání ña̱ va̱ʼa. Liviní koo ña̱ kutakuyó chí nu̱únínu, xa̱ʼa̱ ña̱kán ná chika̱a̱-iniyó ña̱ ndakundeéyó kúee koo iniyó ta kundatuyó ná saxínu Jehová ña̱ ni̱ka̱ʼa̱nra keʼéra.