1. ¿Ndáaña kivi xa̱a̱yó ndakanixi̱níyó tá xítoyó ndiʼi ña̱ʼa ña̱ i̱xava̱ʼa Jehová?

TÁ NÁ ndakanixi̱níyó xa̱ʼa̱ ndiʼi ña̱ i̱xava̱ʼa Jehová, sana ka̱ʼa̱nyó nda̱a̱ táki̱ʼva ni̱ka̱ʼa̱n ta̱ David, tá ka̱chira: “Tá xítoi̱ chí ndiví, ta saátu tá xítoi̱ ña̱ʼa ña̱ i̱xava̱ʼún, tá kúú yo̱o̱ xíʼin tí ki̱mi. Saá xái̱ ndákanixi̱níi̱, ¿ndáana kúú na̱ yiví ña̱ ndíʼi̱-iniún xa̱ʼa̱na ta ndáúnna?” (Sal. 8:3, 4). Kivi xa̱a̱yó ndakanda̱-iniyó nda̱a̱ táki̱ʼva ndo̱ʼo ta̱ David tá ná chitáʼanyó miíyó xíʼin tí ki̱mi, chi tíyóʼo náʼnunírí ta miíyó válíníyó, soo ni saá kíʼinva Jehová kuenta xíʼinyó. Ta nda̱a̱ táki̱ʼva sakúaʼayó nu̱ú artículo yóʼo, Jehová va̱ása níxi̱kiʼin kuitíra kuenta xíʼin ta̱ Adán xíʼin ñá Eva, chi nda̱a̱ táki̱ʼva ni̱xi̱yo se̱ʼera saá ni̱xi̱yona nu̱úra.

2. ¿Ndáa chiñu kúú ña̱ ta̱xi Jehová ndaʼa̱ ta̱ Adán xíʼin ñá Eva?

² Ta̱ Adán xíʼin ñá Eva xi̱kuuna se̱ʼe nu̱ú Ndióxi̱ nu̱ú ñuʼú yóʼo, ta xi̱kuura yivána. Ta saátu ta̱xira iin chiñu ndaʼa̱na, ña̱yóʼo ni̱ka̱ʼa̱nra xíʼinna: “Ná kaku se̱ʼendó ta ku̱a̱ʼá ná koona, sakútundó nu̱ú ñuʼú ta kundaandóña” (Gén. 1:28). Jehová xi̱kuni̱ra ná kaku se̱ʼena ta kundaana ñuʼú yóʼo. Tá níkandíxana ña̱ ni̱ka̱ʼa̱nra xíʼinna, ta saátu tá nísaxínuna ña̱ xi̱kuni̱ra keʼéna, saá kúú ña̱ miína xíʼin se̱ʼena koona se̱ʼe Jehová ndiʼi tiempo.

3. ¿Nda̱chun va̱ʼaní ña̱ ta̱xi Jehová ndaʼa̱ ta̱ Adán xíʼin ñá Eva?

³ Va̱ʼaní ña̱ ta̱xi Jehová ndaʼa̱ ta̱ Adán xíʼin ñá Eva chi xi̱kuuna se̱ʼera. Ta̱ David ni̱ka̱ʼa̱nra ña̱yóʼo xíʼin Jehová xa̱ʼa̱ ki̱ʼva ña̱ i̱xava̱ʼara miíyó na̱ yiví, ka̱chira: “Síín i̱xava̱ʼún na̱ yiví nu̱ú na̱ ángel, soo loʼova kánuu ña̱ ndáyáʼví na̱ ángel nu̱ú na̱yóʼo, ndu̱káʼnu na̱ yiví i̱xaún ta ku̱a̱ʼání ña̱ va̱ʼa ta̱xiún ndaʼa̱na” (Sal. 8:5, nota). Ña̱ nda̱a̱ kúúvaña, síínva i̱xava̱ʼa Jehová na̱ ángel nu̱ú miíyó, saáchi na̱yóʼo ku̱a̱ʼání ndee̱ kúúmiína, ndíchiníkana nu̱ú  miíyó ta saátu kéʼéna ña̱ʼa ña̱ va̱ása kúchiñuyó keʼéyó (Sal. 103:20). Soo loʼova “kánuu ña̱ ndáyáʼvi” na̱ ángel nu̱ú miíyó na̱ yiví. ¿Á va̱ása ndákanda̱-iniyó xíʼin ña̱yóʼo? Tá i̱xava̱ʼa Jehová ta̱ Adán xíʼin ñá Eva, ta̱xira ku̱a̱ʼání ña̱ va̱ʼa ndaʼa̱na ña̱ va̱ʼa si̱í koona.

4. ¿Ndáaña ndo̱ʼo ta̱ Adán ta saátu ñá Eva, ta ndáaña sakúaʼayó nu̱ú artículo yóʼo?

 ⁴ Ta̱ Adán xíʼin ñá Eva va̱ása níkivika koona se̱ʼe Jehová. Ta xa̱ʼa̱ ña̱yóʼo ku̱a̱ʼání tu̱ndóʼo ki̱xi nu̱ú na̱ se̱ʼena nda̱a̱ táki̱ʼva íyo ña̱ sakúaʼayó nu̱ú artículo yóʼo. Soo ta̱ʼán nasamaví Jehová ña̱ kúni̱ra keʼéra: saáchi kúni̱ra ña̱ ndiʼi na̱ yiví na̱ kándíxa ña̱ káʼa̱nra, ná xa̱a̱na koona se̱ʼera ndiʼi tiempo. Ña̱kán ná kotoyó ndáaña va̱ʼa xa̱a̱ táxi Jehová ndaʼa̱yó. Tándi̱ʼi, kotoyó ndáaña kivi keʼéyó tiempo vitin ña̱ va̱ʼa na̱ʼa̱yó ña̱ kúni̱yó kooyó se̱ʼe Jehová. Ta saátu ka̱ʼa̱nyó xa̱ʼa̱ bendición ña̱ ndakiʼin na̱ se̱ʼe Jehová na̱ kundoo nu̱ú ñuʼú yóʼo.

5. ¿Ndáa ki̱ʼva taxiyó tíxa̱ʼvi ndaʼa̱ Ndióxi̱ xa̱ʼa̱ ña̱ i̱xava̱ʼara miíyó táki̱ʼva íyora?

⁵Jehová i̱xava̱ʼara miíyó nda̱a̱ táki̱ʼva íyora (Gén. 1:26, 27). Xa̱ʼa̱ ña̱yóʼo kivi na̱ʼa̱yó táʼan ña̱ va̱ʼa ña̱ kúúmiíra, tá kúú ña̱ kuʼvi̱-iniyó kuniyó inkana, ña̱ kundáʼvi-iniyó kuniyóna, xíʼin ña̱ nda̱kú koo iniyó (Sal. 86:15; 145:17). Tá chíka̱a̱yó ndee̱ ña̱ na̱ʼa̱yó ña̱yóʼo, saá kúú ña̱ íxato̱ʼóyó Jehová ta táxiyó tíxa̱ʼvi ndaʼa̱ra (1 Ped. 1:14-16). Tá kéʼéyó ña̱ kútóo mií Jehová saá kúú ña̱ kúsi̱íní-iniyó. Saátu xa̱ʼa̱ ña̱ ke̱ʼé Jehová miíyó nda̱a̱ táki̱ʼva íyora, kivi xa̱a̱yó keʼéyó nda̱a̱ táki̱ʼva kúni̱ra ná keʼé na̱ se̱ʼera.

6. ¿Ndáaña va̱ʼaní ta̱xi Jehová ndaʼa̱ na̱ yiví?

⁶Jehová i̱xava̱ʼara nu̱ú kundooyó. Tá kúma̱níka ixava̱ʼara ta̱ Adán, siʼna i̱xava̱ʼara ñuʼú yóʼo ña̱ va̱ʼa kundoo na̱ yiví nu̱úña (Job 38:4-6; Jer. 10:12). Ta xa̱ʼa̱ ña̱ va̱ʼaní-ini Jehová, i̱xava̱ʼara ku̱a̱ʼání ña̱ʼa nu̱úña ña̱ va̱ʼa si̱íní kundooyó (Sal. 104:14, 15, 24). Ta ta̱vára tiempo ña̱ xi̱tora ndiʼi ña̱ i̱xava̱ʼara, ta ki̱ʼinra kuenta ña̱ va̱ʼaní íyoña (Gén. 1:10, 12, 31). Ta iin ña̱ va̱ʼaní ta̱xira ndaʼa̱ na̱ yiví kúú ña̱ ná kiʼinna kuenta xíʼin ña̱ʼa ña̱ i̱xava̱ʼara nu̱ú ñuʼú yóʼo (Sal. 8:6). Ndióxi̱ kúni̱ra ná kusi̱í-ini na̱ yiví kundaana ña̱ʼa ña̱ i̱xava̱ʼara, ta ndiʼi tiempo ná kundaanaña. ¿Á táxiyó tíxa̱ʼvi ndaʼa̱ Jehová xa̱ʼa̱ ña̱yóʼo?

7. ¿Ndáa ki̱ʼva náʼa̱ Josué 24:15 ña̱ kiviva ndaka̱xinyó ndáaña keʼéyó?

⁷Jehová ta̱xira ña̱ ná ndaka̱xinyó ndáaña keʼéyó. Xa̱ʼa̱ ña̱yóʼo kivi ndaka̱xinyó ndáaña keʼéyó ndiʼi tiempo ña̱ tákuyó (kaʼvi Josué 24:15). * Tá ná ndaka̱xinyó ndasakáʼnuyó Ndióxi̱, kusi̱íní-inira xíʼin ña̱yóʼo (Sal. 84:11; Prov. 27:11). Ta su̱ví ña̱yóʼo kúú ndiʼi ña̱ kivi ndaka̱xinyó keʼéyó, chi saátu kivi vií ndaka̱xinyó keʼéyó inkaka ña̱ʼa. Ná ka̱ʼa̱nyó xa̱ʼa̱ ña̱ viíní nda̱kaxin ta̱ Jesús ke̱ʼéra.

8. ¿Ndáa ki̱ʼva viíní nda̱kaxin ta̱ Jesús ña̱ ke̱ʼéra?

⁸ Xíʼin ña̱ nda̱kaxin ta̱ Jesús ke̱ʼéra ni̱na̱ʼa̱ra ña̱ xi̱ndi̱ʼi̱ka-inira xa̱ʼa̱ inkana. Iin yichi̱ ta̱ Jesús xíʼin na̱ apóstolra, ku̱naánína ña̱kán nda̱kiʼinna ku̱a̱ʼa̱nna iin lugar nu̱ú kivi ndakindee̱na. Soo va̱ása níkivi ndakindee̱na, chi ku̱a̱ʼání na̱ yiví ni̱xa̱a̱ nda̱a̱ nu̱ú ndóona ña̱ va̱ʼa kuniso̱ʼona ña̱ xi̱sanáʼa̱ ta̱ Jesús. Va̱ása nísa̱a̱ ta̱ Jesús xíʼin na̱ yiví kán, saáchi ku̱ndáʼvi-inira xi̱nirana ta ki̱xáʼara sánáʼa̱rana xa̱ʼa̱ ku̱a̱ʼání ña̱ʼa (Mar. 6:30-34). Ta kivi kundiku̱nyó yichi̱ ta̱ Jesús tá ná kuniñúʼuyó tiempoyó xíʼin ndee̱yó ña̱ chindeétáʼanyó xíʼin inkana, ta tá kéʼéyó ña̱yóʼo saá ndásakáʼnuyó Jehová  (Mat. 5:14-16). Tasaá náʼa̱yó ña̱ kúni̱yó kooyó se̱ʼera.

9. ¿Ndáaña xíniñúʼu keʼé na̱ íyo se̱ʼe?

⁹Jehová ta̱xira ña̱ ná koo se̱ʼeyó, ta ta̱xira chiñu ndaʼa̱yó ña̱ kundaayóna ta sanáʼa̱yóna ña̱ ná kuʼvi̱-inina kuninara ta ndasakáʼnunara. Tá íyo se̱ʼún, ¿á ndáyáʼvina nu̱ún? Ni ta̱xiva Jehová ndee̱ ndaʼa̱ na̱ ángel ña̱ keʼéna ku̱a̱ʼá ña̱ʼa, soo na̱yóʼo va̱ása kívi koo se̱ʼena. Xa̱ʼa̱ ña̱kán ndiʼi na̱ íyo se̱ʼe xíniñúʼu taxinína tíxa̱ʼvi ndaʼa̱ Jehová xa̱ʼa̱ ña̱ ta̱xira íyo se̱ʼena. Ta saátu ta̱xira iin chiñu ña̱ ndáyáʼviní ndaʼa̱na, ña̱ sákuaʼnuna se̱ʼena ta saátu ña̱ chinúuna iin yichi̱ va̱ʼaní nu̱úna nda̱a̱ táki̱ʼva kúni̱ mií Jehová (Efes. 6:4; Deut. 6:5-7; Sal. 127:3). Ta na̱ ñuura táxina ku̱a̱ʼání ña̱ʼa ndaʼa̱na ña̱ chíndeétáʼan xíʼinna sákuaʼnuna se̱ʼena, tá kúú tutu, video, yaa xíʼin inkaka ña̱ va̱xi nu̱ú sitio ña̱ kúúmiíyó nu̱ú Internet, ta ndiʼi ña̱yóʼo nu̱ú tu̱ʼun Ndióxi̱ kánaña. Ña̱yóʼo náʼa̱ña ña̱ kúʼvi̱ní-ini Jehová xíʼin ta̱ Jesús xínira na̱ va̱lí se̱ʼeyó (Luc. 18:15-17). Kúsi̱íní-ini Jehová tá xítora ña̱ chíka̱a̱ní na̱ íyo se̱ʼe ndee̱ ña̱ kundaana na̱ va̱lí se̱ʼena, ta saátu kúsi̱í-inira tá ndáa-ininara. Tá kéʼéna ña̱yóʼo, chíndeétáʼanna xíʼin se̱ʼena ña̱ xa̱a̱na koona se̱ʼe Jehová ndiʼi tiempo.

10, 11. ¿Ndáaña va̱ʼa ndákiʼinyó xa̱ʼa̱ ña̱ ta̱xi Jehová ta̱ Jesús ni̱xi̱ʼi̱ra xa̱ʼa̱yó?

¹⁰Jehová ta̱xira ta̱ Jesús ni̱xi̱ʼi̱ra xa̱ʼa̱yó tasaá xa̱a̱ tukuyó kooyó na̱ veʼera. Nda̱a̱ táki̱ʼva sa̱kuaʼayó nu̱ú  párrafo ku̱mí, xa̱ʼa̱ ña̱ ke̱ʼé ta̱ Adán xíʼin ñá Eva va̱ása níkivika koona se̱ʼe Jehová, ta nda̱a̱ na̱ se̱ʼena ni̱ni̱ʼí ña̱yóʼo (Rom. 5:12). Ta xa̱ʼa̱ ña̱ i̱xaso̱ʼona, va̱ása níxiinka Ndióxi̱ koona se̱ʼera. Soo, ¿ndáaña kundoʼo na̱ se̱ʼena? Xa̱ʼa̱ ña̱ kúʼvi̱ní-ini Jehová xínira na̱ yiví, ta̱xira se̱ʼera ña̱ ni̱xi̱ʼi̱ra xa̱ʼa̱na tasaá kivi xa̱a̱ tukuna koona na̱ veʼera tá ná kandíxanara (Juan 3:16; Rom. 5:19). Ta saátu xa̱ʼa̱ ña̱ ni̱xi̱ʼi̱ ta̱ Jesús, va̱ʼa nda̱kaxin Ndióxi̱ 144,000 na̱ yiví ña̱ koona se̱ʼera (Rom. 8:15-17; Apoc. 14:1).

¹¹ Ta saátu íyo ku̱a̱ʼání na̱ yiví na̱ kándíxa ña̱ káʼa̱n Ndióxi̱ ta kéʼéna ña̱ kúni̱ra. Ta na̱yóʼo xa̱a̱na koona se̱ʼe mií Ndióxi̱ tá ná kundeé-inina ya̱ʼana nu̱ú prueba ña̱ so̱ndíʼi, ña̱ kuu tá ná ndiʼi ña̱ 1,000 ku̱i̱ya̱ (Sal. 25:14; Rom. 8:20, 21). Xa̱ʼa̱ ña̱ kúnda̱a̱-inina ña̱ xa̱a̱na koona se̱ʼera chí nu̱únínu, tiempo vitin xa̱a̱ ki̱xáʼana káʼa̱nna “yivá” xíʼinra (Mat. 6:9). Ta saátu na̱ ndataku, kivi xa̱a̱na sakúaʼana ndáaña kúni̱ Jehová keʼéna. Saátu na̱yóʼo kivi xa̱a̱na koona se̱ʼera tá ná chika̱a̱-inina kandíxana ña̱ káʼa̱nra.

12. ¿Ndáa pregunta ka̱ʼa̱nyó xa̱ʼa̱?

¹² Xa̱a̱ sa̱kuaʼayó ña̱ ku̱a̱ʼání ña̱ va̱ʼa táxi Jehová ndaʼa̱ na̱ yiví. Tá kúú, na̱ nda̱kaxinra ku̱ʼu̱n chí ndiví xa̱a̱ kúúna se̱ʼera tiempo vitin, ta na̱ ndátu koo nu̱ú ñuʼú yóʼo xa̱a̱na nduuna se̱ʼera (Apoc. 7:9). ¿Ndáaña kivi keʼéyó tiempo vitin ña̱ va̱ʼa na̱ʼa̱yó nu̱ú Jehová ña̱ kúni̱yó xa̱a̱yó kooyó se̱ʼera ndiʼi tiempo?

13. ¿Ndáaña xíniñúʼu keʼéyó ña̱ va̱ʼa xa̱a̱yó kooyó se̱ʼe Jehová? (Marcos 12:30).

¹³Ná kachíñuyó nu̱ú Jehová xíʼin ndiʼi níma̱yó ña̱ va̱ʼa na̱ʼa̱yó ña̱ kúʼvi̱-iniyó xíniyóra (kaʼvi Marcos 12:30). * Ku̱a̱ʼání ña̱ va̱ʼa ta̱xi Jehová ndaʼa̱yó, soo mií ña̱ ndáyáʼvi va̱ʼaka kúú ña̱ kivi ndasakáʼnuyóra. Tá kéʼéyó ndiʼi chiñu ña̱ xáʼndara nu̱úyó, saá náʼa̱yó ña̱ ndixa kúʼvi̱-iniyó xíniyóra (1 Juan 5:3). Ta iin ña̱yóʼo kúú chiñu ña̱ ta̱xi ta̱ Jesús ndaʼa̱yó: ña̱ ku̱ʼu̱nyó sanáʼa̱yó na̱ yiví ña̱ xa̱a̱na koona discípulora ta ndakuchina (Mat. 28:19). Ta saátu ni̱ka̱ʼa̱nra xíʼinyó ña̱ kuʼvi̱-iniyó kunitáʼanyó  (Juan 13:35). Ta ndiʼi na̱ xíniso̱ʼo ña̱ káʼa̱n Jehová kivi xa̱a̱na koona na̱ ñuura (Sal. 15:1, 2).

14. ¿Ndáa ki̱ʼva náʼa̱yó ña̱ kúʼvi̱-iniyó xíniyó inkana? (Mateo 9:36-38; Romanos 12:10).

¹⁴Ná kuʼvi̱-iniyó kuniyó inkana. Chi saá kéʼé Jehová, kúʼvi̱ní-inira xínira miíyó (1 Juan 4:8). Ta xa̱a̱ kúʼvi̱va-inira xínira miíyó tá kúma̱ní sakúaʼayó xa̱ʼa̱ra (1 Juan 4:9, 10). Ta tá kúʼvi̱-iniyó xíniyó inkana, saá náʼa̱yó ña̱ ndíku̱nyó yichi̱ra (Efes. 5:1). Iin ki̱ʼva ña̱ na̱ʼa̱yó ña̱ kúʼvi̱-iniyó xíniyó na̱ yiví kúú ña̱ chindeétáʼanyó xíʼinna ña̱ xa̱a̱na sákuaʼana xa̱ʼa̱ Jehová tá íyoka tiempo (kaʼvi Mateo 9:36-38). * Chi saá kúú ña̱ chíndeétáʼanyó xíʼinna ña̱ xa̱a̱na koona se̱ʼe Ndióxi̱ chí nu̱únínu. Tá xáa̱na ndákuchina, xíniñúʼu ndakundeéyó kuʼvi̱-iniyó kuniyóna ta ixato̱ʼóyóna (1 Juan 4:20, 21). ¿Ndáa ki̱ʼva keʼéyó ña̱yóʼo? Tá kúú, tá ke̱ʼéna iin ña̱ʼa ná kǒo ndakanixi̱níyó ña̱ ke̱ʼénaña xa̱ʼa̱ ña̱ ndíʼi̱-inina xa̱ʼa̱ mií kuitína á ke̱ʼénaña xa̱ʼa̱ ña̱ kúni̱na sáxo̱ʼvi̱na miíyó. Nu̱úka ña̱ ndakanixi̱níyó ña̱yóʼo, ná ixato̱ʼóyóna ta ná ndakanixi̱níyó ña̱ ndáyáʼvikana nu̱úyó (kaʼvi Romanos 12:10; * Filip. 2:3).

15. ¿Ndáana xíniñúʼu kundáʼvi-iniyó kuniyó ta va̱ʼa koo iniyó xíʼin?

¹⁵Ná kundáʼvi-iniyó kuniyó na̱ yiví ta va̱ʼa ná koo iniyó xíʼinna. Tá kúni̱yó kooyó se̱ʼe Ndióxi̱ ndiʼi tiempo, ná keʼéyó ndiʼi ña̱ sánáʼa̱ra miíyó nu̱ú tu̱ʼunra. Tá kúú, ta̱ Jesús ni̱ka̱ʼa̱nra ña̱ kundáʼvi-iniyó kuniyó na̱ yiví ta va̱ʼa koo iniyó xíʼinna, ta kivi keʼéyó ña̱yóʼo xíʼin nda̱a̱ na̱ sáa̱-ini xíni miíyó (Luc. 6:32-36). Sava yichi̱ kivi ixayo̱ʼvi̱ña xíʼinyó keʼéyó ña̱yóʼo. Tásaá ná kundoʼoyó, xíniñúʼu sákuaʼayó ndakanixi̱níyó nda̱a̱ táki̱ʼva ndákanixi̱ní ta̱ Jesús, ta keʼéyó nda̱a̱ táki̱ʼva ke̱ʼéra. Tá ná chika̱a̱yó ndee̱ ña̱ kuniso̱ʼoyó ña̱ káʼa̱n Jehová ta kundiku̱nyó yichi̱ ta̱ Jesús, saá náʼa̱yó ña̱ kúni̱yó kooyó se̱ʼe Ndióxi̱ ndiʼi tiempo.

16. ¿Ndáaña xíniñúʼu keʼéyó tá va̱ása kúni̱yó ka̱ʼa̱nna ña̱ va̱ása va̱ʼa xa̱ʼa̱ na̱ ñuu Jehová?

¹⁶Ná kiʼinníyó kuenta xíʼin ña̱ kéʼéyó chi kivi ka̱ʼa̱nna ña̱ va̱ása va̱ʼa xa̱ʼa̱ na̱ ñuu Jehová. Ti̱xin iin familia, na̱ va̱lí xítondaana ña̱ kéʼé ñanina na̱ náʼnu. Tá ñanina na̱ náʼnu kéʼéna ña̱ káʼa̱n tu̱ʼun Ndióxi̱, va̱ʼaní yichi̱ chínúuna nu̱ú ñanina na̱ válíka. Soo tá kéʼéna ña̱ va̱ása va̱ʼa, na̱ va̱lí yóʼo kivi kixáʼana keʼéna táʼan ña̱ va̱ása va̱ʼa yóʼo. Ki̱ʼva saá kúu ti̱xin ñuu Jehová. Tá iin na̱ hermano va̱ása nda̱kúka íyo inina xíʼin Ndióxi̱ ta kíxáʼana kándíxana ña̱ káʼa̱n na̱ apóstata á kéʼéna ña̱ kini, kivi kixáʼa inka na̱ hermano kundiku̱nna yichi̱ na̱yóʼo. Ta xa̱ʼa̱ ña̱yóʼo, inka na̱ yiví kixáʼana ka̱ʼa̱nna ña̱ va̱ása va̱ʼa xa̱ʼa̱ na̱ ñuu Jehová (1 Tes. 4:3-8). Ná va̱ása kundiku̱nyó yichi̱ na̱yóʼo, ta ná va̱ása taxiyó ña̱ nda̱a̱ ni iin ña̱ʼa sakúxíkáña miíyó nu̱ú Ndióxi̱.

17. ¿Ndáaña va̱ása xíniñúʼu ndakanixi̱níyó, ta nda̱chun?

¹⁷Ná kundaa-iniyó Jehová ta su̱ví ña̱ ku̱i̱ká ña̱ íyo nu̱ú ñuʼú yóʼo. Jehová káʼa̱nra taxira ña̱ kuxuyó, ti̱ko̱to̱yó xíʼin iin veʼe nu̱ú kooyó, tá siʼna chiñura ná kundi̱ʼi̱-iniyó xa̱ʼa̱ ta ixato̱ʼóyó ña̱ káʼa̱nra (Sal. 55:22; Mat. 6:33). Ña̱kán ná va̱ása ndakanixi̱níyó ña̱ kivi kundaa ña̱ ku̱i̱ká miíyó á sakúsi̱íña-iniyó. Chi ña̱ sakúsi̱í-iniyó kúú ña̱ keʼéyó ña̱ kúni̱ Jehová (Filip. 4:6, 7). Ta ni kúúmiívayó xu̱ʼún ña̱ satáyó ku̱a̱ʼání ña̱ʼa, soo xíniñúʼu ndakanixi̱níyó á íyo tiempo nu̱úyó xíʼin ndee̱yó ña̱ kuniñúʼuyó ña̱yóʼo ta kundaayóña. Ná ndakanixi̱níyó xa̱ʼa̱ ña̱yóʼo: “¿Á kúʼvi̱ní-inii̱ xínii̱ ña̱ʼa ña̱ kúúmiíi̱?”. Ná ndakaʼányó  chi Jehová ta̱xira chiñu ndaʼa̱yó ti̱xin ñuura. Ña̱kán ná va̱ása taxiyó kasi nda̱a̱ ni iin ña̱ʼa nu̱úyó ña̱ kundi̱ʼi̱-iniyó xa̱ʼa̱ chiñu yóʼo. Va̱ása kúni̱yó keʼéyó táʼan ña̱ ke̱ʼé ta̱ loʼo ku̱i̱ká ta̱ ni̱xi̱yo tá tiempo ta̱ Jesús, saáchi va̱ása níxiinra kachíñura nu̱ú Jehová ta xa̱a̱ra koora se̱ʼera chí nu̱únínu. ¿Nda̱chun? Saáchi xi̱kuʼvi̱níka-inira xi̱xinira ña̱ ku̱i̱ká ña̱ xi̱kuumiíra (Mar. 10:17-22).

18. ¿Ndáaña keʼé na̱ xíniso̱ʼo ña̱ káʼa̱n Ndióxi̱ ta ndáa bendición ndakiʼinna?

¹⁸ Na̱ yiví na̱ kándíxa ña̱ káʼa̱n Jehová xa̱a̱na keʼéna iin ña̱ ndáyáʼviní: ña̱ kuʼvi̱-inina kunina Jehová ta ndasakáʼnunara ndiʼi saá tiempo. Ta kusi̱íní-inina kundaana ñuʼú yóʼo, ña̱ liviní i̱xava̱ʼa Jehová xa̱ʼa̱na. Xa̱a̱ ku̱nu̱mí ndasalivi Reino Ndióxi̱ ñuʼú yóʼo ta kooña nda̱a̱ táki̱ʼva xi̱kuni̱ra tá xa̱ʼa̱, ta saátu ndiʼika ña̱ʼa ña̱ íyo nu̱úña nduliviña. Ta̱ Jesús sandíʼi-xa̱ʼa̱ra ndiʼi tu̱ndóʼo ña̱ sa̱ndákoo ta̱ Adán xíʼin ñá Eva ndaʼa̱ na̱ yiví. Ta saátu sandátaku Jehová ku̱a̱ʼání na̱ yiví, ta taxira kutakuna ndiʼi tiempo nu̱ú ñuʼú yóʼo ta va̱ása kuumiíkana kue̱ʼe̱ (Luc. 23:42, 43). Tá ná kixaa̱ ki̱vi̱ ña̱ va̱ása kuumiíka na̱ yiví ku̱a̱chi, saá na̱ʼa̱na “ña̱ va̱ʼa” ña̱ ta̱xi Jehová ndaʼa̱na nda̱a̱ táki̱ʼva íyo ña̱ ni̱ka̱ʼa̱n ta̱ David xa̱ʼa̱ (Sal. 8:5).

19. ¿Ndáaña xíniñúʼu ndakaʼányó?

¹⁹ Tá na̱ koo nu̱ú ñuʼú yóʼo kúún, íyo iin ña̱ va̱ʼaní ndátún ndakiʼún. Ndióxi̱ kúʼvi̱-inira xínira yóʼó ta kúni̱ra ña̱ ná koún se̱ʼera. Ña̱kán chika̱a̱ ndee̱ keʼún ña̱ sákusi̱í-inira. Ndiʼisaá ki̱vi̱ ndakaʼún xa̱ʼa̱ ña̱ káʼa̱n Jehová taxira ndaʼún chí nu̱únínu. Chindayáʼvi ña̱ ndásakáʼnún Jehová tiempo vitin ta saátu ña̱ ndasakáʼnúnra ndiʼi tiempo chí nu̱únínu.