1. ¿Nda̱chun iin ña̱ va̱ʼa kúú ña̱ natúʼunyó xíʼin inka ndáa ki̱ʼva sa̱kúaʼayó ña̱ nda̱a̱ xa̱ʼa̱ Jehová?

 “¿NDÁA ki̱ʼva ni̱xa̱ún sa̱kúaʼún ña̱ nda̱a̱ xa̱ʼa̱ Ndióxi̱?”. Sana ku̱a̱ʼáníva yichi̱ xa̱a̱ nátúʼunyó xíʼin inkana xa̱ʼa̱ ña̱yóʼo. Tá sa̱kán xínitáʼanyó xíʼin iin na̱ hermano saá kúú ña̱ ndáka̱tu̱ʼunna miíyó xa̱ʼa̱ ña̱yóʼo. Kútóoníyó kunda̱a̱-iniyó ndáa ki̱ʼva ni̱xa̱a̱ na̱ hermanoyó sa̱kúaʼana xa̱ʼa̱ Jehová. Saátu miíyó kútóoyó natúʼunyó xíʼinna ndáa ki̱ʼva ni̱xa̱a̱yó sa̱kúaʼayó ña̱ nda̱a̱ xa̱ʼa̱ra (Rom. 1:11). Ta tá nátúʼunyó xíʼinna xa̱ʼa̱ ña̱yóʼo, sándakaʼánña miíyó ña̱ xíniñúʼu chindayáʼviníyó ña̱ kúúyó testigo Jehová. Saátu tá nátúʼunyó xíʼinna chíndeétáʼanña xíʼinyó ña̱ ndakundeéyó keʼéyó ña̱ kúni̱ Jehová, tasaá sakúsi̱íyó-inira ta taxira ku̱a̱ʼá bendición ndaʼa̱yó (3 Juan 4).

2. ¿Ndáaña sakúaʼayó nu̱ú artículo yóʼo?

² Nu̱ú ña̱ artículo yóʼo sakúaʼayó nda̱chun kúú ña̱ kúʼvi̱-iniyó xíniyó ña̱ nda̱a̱. Saátu sakúaʼayó nda̱chun kúú ña̱ xíniñúʼu ndakundeéyó chindayáʼviyóña. Ta tá ná ndiʼi sakúaʼayó xa̱ʼa̱ ña̱yóʼo, saá kúú ña̱ taxiníkayó tíxa̱ʼvi ndaʼa̱ Jehová xa̱ʼa̱ ña̱ chi̱ndeétáʼanra xíʼinyó ña̱ sa̱kúaʼayó xa̱ʼa̱ra (Juan 6:44). Ta saátu kuni̱kayó natúʼunyó xíʼin inkana xa̱ʼa̱ña.

3. ¿Nda̱chun kúú ña̱ kúʼvi̱-iniyó xíniyó ña̱ nda̱a̱?

³ Íyo ku̱a̱ʼáníva xa̱ʼa̱ kúú ña̱ kúʼvi̱-iniyó xíniyó ña̱ nda̱a̱ ña̱ sa̱kúaʼayó xa̱ʼa̱ Ndióxi̱. Ta ña̱ ndáyáʼvi va̱ʼa kúú ña̱ ni̱xa̱a̱yó kúʼvi̱-iniyó xíniyóra, chi ta̱yóʼo kúú ta̱ sánáʼa̱ ndiʼi ña̱ nda̱a̱. Nu̱ú  tu̱ʼunra sa̱kúaʼayó ña̱ kúúra iin Ndióxi̱ ta̱ kúúmií ndiʼi ndee̱, ta i̱xava̱ʼara ndiví xíʼin ñuʼú yóʼo. Ta kúúra yiváyó ta̱ íyo chí ndiví ta kúʼvi̱ní-inira xínira miíyó ta ndíʼi̱-inira xa̱ʼa̱yó (1 Ped. 5:7). Kúnda̱a̱-iniyó ña̱ kúúra iin Ndióxi̱ ta̱ íxakáʼnu-ini xa̱ʼa̱yó, ta kúndáʼvi-inira xínira miíyó, kúee íyo inira ta ndiʼi tiempo ndixaní kúʼvi̱-inira xínira miíyó (Éx. 34:6). Ta nda̱kúní íyo inira (Is. 61:8). Jehová kúsuchíní-inira xíʼinyó tá xóʼvi̱yó, ta xa̱a̱ kúni̱níra sandíʼi-xa̱ʼa̱ra ndiʼi ña̱ sáxo̱ʼvi̱ miíyó ta keʼévaraña mií tiempo ña̱ xa̱a̱ nda̱kaxinra keʼéraña (Jer. 29:11). Ta xa̱a̱ kúni̱níyó ná kixaa̱ ki̱vi̱ kán. Ta xa̱ʼa̱ ña̱yóʼo kúʼvi̱ní-iniyó xíniyó Jehová.

4, 5. ¿Nda̱chun ni̱ka̱ʼa̱n ta̱ Pablo xa̱ʼa̱ ña̱ ndátuyó ndakiʼinyó chí nu̱únínu ña̱ íyoña nda̱a̱ táki̱ʼva íyo iin ka̱a ña̱ tíin barco?

⁴ Inka xa̱ʼa̱ ña̱ kúʼvi̱ní-iniyó xíniyó ña̱ nda̱a̱ kúú ña̱ va̱ʼaní chíndeétáʼanña xíʼinyó. Tá kúú, sa̱kuaʼayó nu̱ú tu̱ʼun Ndióxi̱ xa̱ʼa̱ ña̱ ndátuyó ndakiʼinyó chí nu̱únínu. Ta ta̱ apóstol Pablo ni̱ka̱ʼa̱nra xa̱ʼa̱ ña̱yóʼo ña̱ ndáyáʼviníña, ta ña̱yóʼo ka̱ʼyíra: “Ña̱ ndátuyó, chíndeétáʼanña xíʼinyó ña̱ va̱ʼa kutakuyó ta íyoña nda̱a̱ táki̱ʼva íyo iin ka̱a ña̱ tíin iin barco” (Heb. 6:19). Ta nda̱a̱ táki̱ʼva chíndeétáʼan ka̱a yóʼo xíʼin tú barco, saátu chíndeétáʼan ña̱ káʼa̱n Ndióxi̱ keʼéra chí nu̱únínu xíʼinyó tá yáʼayó nu̱ú tu̱ndóʼo.

⁵ Tá ni̱ka̱ʼa̱n ta̱ Pablo tu̱ʼun yóʼo, xa̱ʼa̱ na̱ cristiano na̱ ku̱ʼu̱n koo chí ndiví kúú ña̱ ni̱ka̱ʼa̱nra. Soo saátu chíndeétáʼanña xíʼin miíyó na̱ ndátu koo nu̱ú ñuyǐví xa̱á (Juan 3:16). Ta ña̱ ndátuyó kooyó ndiʼi tiempo kúú ña̱ sákusi̱íní-iniyó.

6, 7. Ña̱ ku̱nda̱a̱-ini ñá Yvonne xa̱ʼa̱ ña̱ koo chí nu̱únínu, ¿ndáa ki̱ʼva chi̱ndeétáʼanña xíʼinñá?

⁶ Ná ka̱ʼa̱nyó xa̱ʼa̱ ña̱ ndo̱ʼo iin ñá hermana ñá naní Yvonne. Xa̱ʼa̱ ña̱ kǒo níxi̱xini̱ñá xa̱ʼa̱ ña̱ nda̱a̱, tá loʼoñá xi̱yiʼvíñá kuviñá. Ñáyóʼo nda̱kanda̱ní-iniñá xíʼin ña̱ ka̱ʼviñá nu̱ú iin libro, ta ña̱ ka̱ʼviñá nu̱ú libro kúú ña̱yóʼo: “Kixaa̱ ki̱vi̱ ña̱ ndiʼivana kuvi”. Ñáyóʼo káchiñá: “Va̱ása níxi̱kuchiñu ku̱su̱i̱n tá xi̱ndakanixi̱níi̱ xa̱ʼa̱ ña̱yóʼo. Xi̱ndakanixi̱níi̱ xa̱ʼa̱ ña̱ koo chí nu̱únínu. Ta xi̱ndakanixi̱níi̱: ‘Nda̱chun loʼoní tiempo tákuyó ta xíʼi̱yó. Kǒo níxi̱kunda̱a̱-inii̱ nda̱chun íyoi̱ ñuyǐví yóʼo’. Ta va̱ása níxi̱kutói̱ kuvii̱”.

⁷ Tá xa̱a̱ xa̱ʼnu ñá Yvonne, ni̱xa̱a̱ñá xi̱nitáʼanñá xíʼin na̱ testigo. Ñáyóʼo káchiñá: “Ki̱xáʼíi̱ kándíxai̱ ña̱ kivi koi̱ ndiʼi tiempo nu̱ú ñuyǐví xa̱á”. Ta ña̱ sa̱kúaʼañá ña̱yóʼo va̱ʼaní chíndeétáʼanñá xíʼinñá, saáchi ñáyóʼo káchiñá: “Va̱ása ndákanikaxi̱níi̱ ndáaña kundoʼi̱ chí nu̱únínu, ta va̱ása ndákanikaxi̱níi̱ xa̱ʼa̱ ña̱ xíʼi̱yó”. Nu̱ú ñá Yvonne ndáyáʼviní ña̱ ni̱xa̱a̱ñá sa̱kúaʼañá xa̱ʼa̱ Ndióxi̱ ta kútóoníñá natúʼunñá xa̱ʼa̱ ña̱yóʼo xíʼin inka na̱ yiví (1 Tim. 4:16).

8, 9. a) Ta̱a ta̱ na̱túʼun ta̱ Jesús xa̱ʼa̱, ¿ndáa ki̱ʼva ni̱na̱ʼa̱ra ña̱ chi̱ndayáʼvira ña̱ nda̱ni̱ʼíra? b) ¿Á ndáyáʼvi ña̱ nda̱a̱ nu̱ún?

⁸ Inka ña̱ nda̱a̱ ña̱ va̱xi nu̱ú Biblia kúú ña̱ káʼa̱n xa̱ʼa̱ Reino Ndióxi̱. Ta̱ Jesús chi̱táʼanra ña̱ nda̱a̱ xa̱ʼa̱ Reino Ndióxi̱ xíʼin iin ña̱ʼa ña̱ ndáyáʼviní ña̱ xi̱ndika̱a̱ se̱ʼé. Ta̱yóʼo ka̱chira: “Reino Ndióxi̱ ña̱ íyo chí ndiví, íyoña táki̱ʼva íyo iin ña̱ʼa ña̱ ndáyáʼviní ña̱ xi̱ndika̱a̱ se̱ʼé ti̱xin ñuʼú ta iin ta̱a nda̱ni̱ʼíña. Ta̱yóʼo chi̱se̱ʼé tukuraña, ta xa̱ʼa̱ ña̱ ni̱kusi̱íní-inira ki̱tara ku̱a̱ʼa̱nra ta ni̱xi̱kóra ndiʼi ña̱ kúúmiíra ta sa̱tára ñuʼú kán” (Mat. 13:44). Nda̱a̱ táki̱ʼva xi̱niyó, su̱ví ña̱yóʼoví kúú ña̱ xíkara nándukúra, soo tá nda̱ni̱ʼíraña chi̱ka̱a̱níra ndee̱ ña̱ va̱ʼa kuumiíraña: saáchi ni̱xi̱kóra ndiʼi ña̱ʼa ña̱ xi̱kuumiíra. ¿Nda̱chun ke̱ʼéra ña̱yóʼo? Saáchi ku̱nda̱a̱-inira ña̱ ndáyáʼviníña, ta ndáyáʼviníkaña nu̱úka ña̱ʼa ña̱ cha̱ʼvíra xa̱ʼa̱ña.

⁹ ¿Á saá chíndayáʼviún ña̱ nda̱a̱ ña̱ sa̱kúaʼún xa̱ʼa̱ Ndióxi̱? Sana ndáyáʼvivaña nu̱ún.  Kúnda̱a̱-iniyó ña̱ ni iin ña̱ʼa ña̱ íyo ñuyǐví yóʼo va̱ása kítáʼanña xíʼin ña̱ kúsi̱íní-iniyó káchíñuyó nu̱ú Jehová ta saátu ña̱ ndátuyó kooyó ndiʼi tiempo nu̱ú ñuʼú yóʼo tá ná kaʼndachíñu Reino Ndióxi̱. Ndáyáʼviníka ña̱ kutáʼan viíyó xíʼin Jehová nu̱úka ña̱ʼa ña̱ íyo ñuyǐví yóʼo. Ta ña̱ kooyó migo Jehová kúú ña̱ ndáyáʼviníka. Ña̱ sákusi̱íníka-iniyó kúú ña̱ keʼéyó ña̱ kúni̱ Jehová (Col. 1:10).

10, 11. ¿Ndáaña chi̱ndeétáʼan xíʼin ta̱ Michael ña̱ na̱samara ki̱ʼva ña̱ ni̱xi̱yora?

¹⁰ Ku̱a̱ʼá na̱ hermano sándakoona ku̱a̱ʼá ña̱ʼa ña̱ va̱ʼa sakúsi̱ína-ini Jehová. Ta saátu ku̱a̱ʼána sándakoona ña̱ kaʼvi va̱ʼana ña̱ va̱ʼa sakúsi̱ína-inira. Ta savatuna sándakoona ña̱ ndukúna ña̱ kúiká. Inkana na̱samana ki̱ʼva ña̱ ni̱xi̱yona tá ni̱xa̱a̱na sa̱kúaʼana xa̱ʼa̱ Jehová. Ña̱yóʼo kúú ña̱ ke̱ʼé ta̱ Michael tá ta̱ʼán sakúaʼara xa̱ʼa̱ Jehová. Tá ni̱xi̱yo loʼora sa̱kúaʼara kanitáʼanra. Ta̱yóʼo káchira: “Xi̱kusi̱íní-inii̱ xa̱ʼa̱ ña̱ ndakúní ni̱xi̱yoi̱. Ta xi̱ndakanixi̱níi̱ ña̱ nda̱a̱ ni iinna kǒo kuchiñu xíʼi̱n”. Soo tá ki̱xáʼara sákuaʼara xa̱ʼa̱ ña̱ káʼa̱n Biblia, na̱kunda̱a̱-inira ndáaña ndákanixi̱ní Ndióxi̱ xa̱ʼa̱ ña̱ kánitáʼanna (Sal. 11:5). Ña̱yóʼo káʼa̱nra xa̱ʼa̱ na̱ matrimonio na̱ sa̱náʼa̱ miíra: “Nda̱a̱ ni iin yichi̱ va̱ása níka̱ʼa̱nna xíʼi̱n ña̱ sandákoi̱ kanitáʼi̱n. Chi ña̱ xi̱keʼéna kúú ña̱ xi̱sanáʼa̱na yi̱ʼi̱ xa̱ʼa̱ ña̱ nda̱a̱”.

¹¹ Tá xi̱chika̱a̱ka ta̱ Michael ndee̱ ña̱ xi̱sakúaʼara xa̱ʼa̱ Jehová, ni̱xa̱a̱ra ni̱kuʼvi̱ka-inira xi̱nira Jehová. Iin ña̱ ni̱xa̱a̱ nda̱a̱ níma̱ra kúú ña̱ na̱kunda̱a̱-inira ña̱ kúʼvi̱ní-ini Jehová xínira na̱ káchíñu nu̱úra. Ta̱ Michael xi̱niñúʼu ndaka̱xinra keʼéra iin ña̱ʼa ta ña̱yóʼo nasamaña ki̱ʼva ña̱ íyora. Ta̱yóʼo káchira: “Xi̱kunda̱a̱va-inii̱ ña̱ ixayo̱ʼvi̱níña xíʼi̱n ña̱ sandákoi̱ karate á ña̱ kanitáʼi̱n. Soo xi̱kunda̱a̱-inii̱ ña̱ tá ná sandákoi̱ kanitáʼi̱n saá kúú ña̱ sakúsi̱íi̱-ini Jehová. Ta xi̱kunda̱a̱ káxi inii̱ ña̱ va̱ʼaníka kúú ña̱ sakúsi̱íi̱-inira”. Nu̱ú ta̱ Michael ndáyáʼviní ña̱ nda̱a̱ ña̱ ni̱xa̱a̱ra sa̱kúaʼara xa̱ʼa̱ Ndióxi̱, ta ña̱yóʼo chi̱ndeétáʼan xíʼinra ña̱ ni̱xa̱a̱ra na̱samara ki̱ʼva ña̱ íyora (Sant. 1:25).

12, 13. ¿Ndáa ki̱ʼva chi̱ndeétáʼan ña̱ sa̱kúaʼa ñá Mayli xíʼinñá?

¹² Ña̱ va̱ʼa kunda̱a̱-iniyó ña̱ ndáyáʼviní ña̱ nda̱a̱, tu̱ʼun Ndióxi̱ chítáʼanña ña̱ nda̱a̱ yóʼo xíʼin luz ña̱ túun nu̱ú naá (Sal. 119:105; Efes. 5:8). Ñá Mayli ñá íyo chí Azerbaiyán, táxiníñá tíxa̱ʼvi ndaʼa̱ Ndióxi̱ xa̱ʼa̱ ña̱ ni̱xa̱a̱ñá ku̱nda̱a̱-iniñá xa̱ʼa̱ra. Saáchi táki̱ʼva íyo ña̱ sa̱ndáye̱ʼe̱ nu̱úñá saá íyo tu̱ʼunra. U̱vi̱ nu̱ú veʼe-ñu̱ʼu xi̱ndiku̱n na̱ veʼeñá: musulmán xi̱kuu yiváñá ta siʼíñá xi̱kuuñá judía. Ñá Mayli káchiñá: “Xi̱kandíxavai̱ ña̱ íyo Ndióxi̱, soo ni̱xi̱yo sava ña̱ va̱ása níxi̱kunda̱a̱-inii̱ xa̱ʼa̱. Xi̱ndakanixi̱níi̱: ‘¿Nda̱chun i̱xava̱ʼa Ndióxi̱ miíyó? ¿Nda̱chun xóʼvi̱ní na̱ yiví tá tákuna ta saátu xóʼvi̱nína ti̱xin infierno á ndayá tá xíʼi̱na?’. Na̱ yiví káʼa̱nna ña̱ ndiʼi ña̱ kúu, mií Ndióxi̱ kúni̱ ña̱ saá ná kuuña ta xa̱ʼa̱ ña̱kán xi̱ndakanixi̱níi̱: ‘¿Á Ndióxi̱ kúú ta̱ sáxo̱ʼvi̱ miíyó? ¿Á kúsi̱í-ini Ndióxi̱ tá xítora xóʼvi̱yó?’”.

¹³ Ñá Mayli xi̱kuni̱ñá kunda̱a̱-iniñá xa̱ʼa̱ ña̱ xi̱ndakanixi̱níñá. Ta tá ni̱ya̱ʼa loʼo tiempo, ki̱xáʼañá sákuaʼañá ña̱ nda̱a̱ xa̱ʼa̱ Ndióxi̱ ta ni̱xa̱a̱ñá ndu̱uñá testigo Jehová. Káchiñá: “Kúsi̱íní-inii̱ xa̱ʼa̱ ña̱ ni̱xa̱i̱ ku̱nda̱a̱-inii̱ xa̱ʼa̱ ña̱ nda̱a̱ ña̱ va̱xi nu̱ú Biblia”. Nda̱a̱ táki̱ʼva ndo̱ʼo ñá Mayli, saátu miíyó na̱ ndásakáʼnu Jehová kúsi̱íní-iniyó saáchi ta̱kán kúú ta̱ nda̱tavá miíyó nu̱ú ña̱ naá ña̱ va̱ʼa kooyó nu̱ú íyo luz (1 Ped. 2:9).

14. ¿Ndáaña xíniñúʼu keʼéyó ña̱ kuʼvi̱ka-iniyó kuniyó ña̱ nda̱a̱? (Koto recuadro ña̱ naní “ Inkaka ilustración”).

¹⁴ Ilustración ña̱ sa̱kúaʼayó nu̱ú sava párrafo yóʼo náʼa̱ña nu̱úyó ña̱ ndáyáʼviní ña̱ nda̱a̱. Ta sana ndákaʼányó xa̱ʼa̱ savaka ña̱yóʼo. ¿Á kivi chika̱a̱yó ndee̱ ña̱ sakúaʼakayó xa̱ʼa̱ ña̱ nda̱a̱ ña̱ va̱ʼa kuʼvi̱ka-iniyó kuniyóña? Tá ná  sakúaʼakayó xa̱ʼa̱ña, xa̱a̱yó kuʼvi̱níka-iniyó kuniyóña.

15. ¿Ndáa ki̱ʼva na̱ʼa̱yó ña̱ kúʼvi̱ní-iniyó xíniyó ña̱ nda̱a̱?

¹⁵ Iin ki̱ʼva ña̱ na̱ʼa̱yó ña̱ kúʼvi̱ní-iniyó xíniyó ña̱ nda̱a̱ kúú ña̱ kaʼvi ni̱ʼiyó Biblia ta saátu inkaka tutu ña̱ tává na̱ ñuu Ndióxi̱. Saáchi ni loʼo á ku̱a̱ʼá tiempo ñúʼuyó ti̱xin ñuu Ndióxi̱, ndiʼi tiempova íyo ña̱ sákuaʼayó. Ña̱yóʼo ni̱ka̱ʼa̱n La Atalaya ña̱ ka̱na tá ku̱i̱ya̱ 1879: “Ña̱ nda̱a̱ ña̱ sa̱kúaʼayó xa̱ʼa̱ Ndióxi̱, nda̱a̱ táki̱ʼva íyo iin yita loʼo ña̱ níndichi desierto saá íyoña, ta ku̱a̱ʼání ku̱ʼu̱ ña̱ va̱ása va̱ʼa ndíta xíʼinña ta kúni̱ña kaʼníñaña. Kiʼin va̱ʼún kuenta tá kúni̱ún ndani̱ʼún yita loʼo yóʼo; [...] tá kúni̱ún kiʼún yita loʼo yóʼo, xíniñúʼu kuxítíún. Tá xa̱a̱ nda̱ni̱ʼún iin yita loʼo yóʼo, chika̱a̱ ndee̱ ña̱ nandukún ku̱a̱ʼákaña”. Ta nda̱a̱ táki̱ʼva íyo yita yóʼo saá íyo ña̱ nda̱a̱ ña̱ sákuaʼayó xa̱ʼa̱ Ndióxi̱, xíniñúʼu chika̱a̱níyó ndee̱ ña̱ sakúaʼayó xa̱ʼa̱ña ta ku̱a̱ʼání ña̱ va̱ʼa ndakiʼinyó tá ná keʼéyóña.

16. Ku̱a̱ʼání ña̱ʼa kéʼé ta̱ Corey tá káʼvira Biblia, ta yóʼó ¿ndáa ki̱ʼva káʼviún? (Proverbios 2:4-6).

¹⁶ Su̱ví ndiʼiviyó kútóo kaʼvi á sakúaʼa xa̱ʼa̱ iin ña̱ʼa, soo Jehová káʼa̱nra xíʼinyó ña̱ ná ndakundeéyó sakúaʼayó ña̱ va̱ʼa kunda̱a̱-iniyó xa̱ʼa̱ ña̱  nda̱a̱ (kaʼvi Proverbios 2:4-6). * Tá ná chika̱a̱yó ndee̱ ña̱ keʼéyóña, ku̱a̱ʼání ña̱ va̱ʼa ndakiʼinyó. Iin ta̱ hermano ta̱ naní Corey káʼa̱nra ña̱ tá xa̱a̱ káʼvira Biblia, iin tá iin versículo kíʼinra kuenta xíʼin. Ta̱yóʼo káchira: “Káʼvii̱ nota ña̱ va̱xi xíʼinña, nándukúi̱ versículo ña̱ kítáʼan xíʼinña ta saátu nándukúkai̱ xa̱ʼa̱ ña̱ versículo yóʼo. [...] Chi saá kúú ña̱ kúnda̱a̱ka-inii̱ xíʼin ña̱ káʼvii̱”. Ni kéʼéyó á va̱ása kéʼéyó nda̱a̱ táki̱ʼva kéʼé ta̱ hermano yóʼo, soo tá chíka̱a̱yó ndee̱ ña̱ káʼviyó Biblia, saá náʼa̱yó ña̱ ndáyáʼviní ña̱ nda̱a̱ nu̱úyó (Sal. 1:1-3).

17. ¿Ndáaña kúni̱ kachi ña̱ kundiku̱nyó ña̱ nda̱a̱? (Santiago 1:25).

¹⁷ Su̱ví nda̱saa xíniñúʼu kaʼvi kuitíyó Biblia, chi xíniñúʼu keʼéyó ña̱ sákuaʼayó. Chi tá saá ná keʼéyó, si̱íní xa̱a̱yó kooyó (kaʼvi Santiago 1:25). Soo, ¿ndáaña xíniñúʼu keʼéyó ña̱ va̱ʼa kunda̱a̱-iniyó ña̱ ndíku̱nyó ña̱ nda̱a̱ yóʼo? Iin ta̱ hermano káʼa̱nra ña̱ viíní ná kotoyó ndáaña xa̱a̱ va̱ʼaní kéʼéyó ta ná kotoyó ndáaña kivi chika̱a̱yó ndee̱ ña̱ viíka keʼéyó. Ta̱ apóstol Pablo ni̱ka̱ʼa̱nra xa̱ʼa̱ ña̱yóʼo tá ka̱chira: “Ni nda̱a̱ ndáaka ki̱ʼva kúú ña̱ xu̱xa-iniyó xíʼin tu̱ʼun Ndióxi̱, ná ndakundeéyó viíní kakayó ti̱xin yichi̱ yóʼo” (Filip. 3:16).

18. ¿Nda̱chun kúú ña̱ ndákundeéyó ndíku̱nyó “ña̱ nda̱a̱”?

¹⁸ Ná ndakanixi̱níyó ndáa ki̱ʼva xa̱a̱ chíndeétáʼan ña̱ nda̱a̱ xíʼinyó xa̱ʼa̱ ña̱ ndákundeéyó ndíku̱nyóña. Ña̱yóʼo va̱ása chíndeétáʼan kuitíña xíʼinyó ña̱ si̱í kutakuyó, chi saátu tá ndákundeéyó ndíku̱nyóña saá kúú ña̱ sákusi̱íyó-ini Jehová ta saátu sákusi̱íyó-ini na̱ hermanoyó (Prov. 27:11; 3 Juan 4). Ta xa̱ʼa̱ ña̱yóʼo kúú ña̱ kúʼvi̱ní-iniyó xíniyó ña̱ nda̱a̱ ta ndíku̱nyó ña̱ káʼa̱nña.