1. Nda̱a̱ táki̱ʼva káchi 1 Tesalonicenses 5:11, ¿ndáa chiñu kúú ña̱ kéʼé ndiʼiyó?

 ¿Á XA̱A̱ sava yichi̱ chíndeétáʼún xíʼin iin congregación ña̱ kuva̱ʼa veʼe nu̱ú ndásakáʼnuyó Ndióxi̱ á ña̱ ndaʼaña? Tá saá íyoña, sana ndákaʼún ña̱ yichi̱ nu̱ú ña̱ ni̱xa̱ʼún congregación kán, ta ta̱xikavíún tíxa̱ʼvi ndaʼa̱ Jehová xa̱ʼa̱ ña̱ ni̱xi̱nu ña̱yóʼo. Ta xa̱ʼa̱ ña̱ kúsi̱íní-iniún sana nda̱a̱ i̱xayo̱ʼvi̱ña xíʼún kataún yaa ña̱ nu̱ú ña̱ chi̱kaa̱na. Veʼe nu̱ú ndátakayó va̱ʼaní ndásakáʼnuña Jehová, soo ndásakáʼnukayóra tá chíka̱a̱yó ndee̱ xíʼin na̱ yiví na̱ ku̱a̱ʼa̱n iniña. Ta ña̱yóʼo kúú ña̱ nda̱kanixi̱ní ta̱ apóstol Pablo xa̱ʼa̱ tá ka̱ʼyíra ña̱ va̱xi nu̱ú 1 Tesalonicenses 5:11 (kaʼviña).

2. ¿Ndáaña sakúaʼayó nu̱ú artículo yóʼo?

² Ña̱ va̱ʼa ndasandakúyó-ini na̱ hermanoyó, kivi kundiku̱nyó yichi̱ ña̱ sa̱ndákoo ta̱ apóstol Pablo nu̱úyó. Ta̱yóʼo xi̱kunda̱a̱-inira xíʼin ña̱ xi̱ndoʼo inkana. Nu̱ú artículo yóʼo sakúaʼayó ndáa ki̱ʼva chi̱ndeétáʼanra xíʼin na̱ hermano ña̱ va̱ʼa ya̱ʼana nu̱ú tu̱ndóʼo, ña̱ vií kundoona xíʼin táʼanna, ta saátu ña̱ xa̱a̱na kandíxakana Ndióxi̱. Ta ná kotoyó ndáa ki̱ʼva kundiku̱nyó yichi̱ra (1 Cor. 11:1).

3. ¿Ndáa chiñu kúú ña̱ xi̱ndi̱ʼi̱ka-ini ta̱ apóstol Pablo xa̱ʼa̱?

³ Ta̱ Pablo xi̱kuʼvi̱ní-inira xi̱xinira na̱ hermano. Ta xa̱ʼa̱ ña̱ ni̱ya̱ʼara nu̱ú ku̱a̱ʼání tu̱ndóʼo ña̱ yo̱ʼvi̱ní, va̱ʼaní xi̱kunda̱a̱-inira xíʼin ña̱ xi̱ndoʼo na̱ hermano tá xi̱yaʼana nu̱ú tu̱ndóʼo. Ta xi̱kundáʼviní-inira xi̱xinira na̱yóʼo. Iin yichi̱ ndi̱ʼi xu̱ʼún ndaʼa̱ra, xa̱ʼa̱ ña̱kán ka̱chíñura ña̱ va̱ʼa ni̱ʼíra xu̱ʼún kuniñúʼura ta saátu ña̱ kuniñúʼu na̱ xi̱kitáʼan xíʼinra (Hech. 20:34). Chiñu ña̱ xi̱keʼéra kúú ña̱ xi̱keʼéra veʼe válí. Ta tá ni̱xa̱a̱ra ñuu Corinto, ka̱chíñura xíʼin ta̱ Áquila xíʼin ñá Priscila, saáchi inkáchi chiñu xi̱kuumiína. Soo “ndiʼi sábado”  xi̱natúʼunra xa̱ʼa̱ Ndióxi̱ xíʼin na̱ judío ta saátu xíʼin na̱ griego. Ta tá ki̱xaa̱ ta̱ Silas xíʼin ta̱ Timoteo, ta̱ Pablo ki̱xáʼara “nátúʼun ni̱ʼira xa̱ʼa̱ tu̱ʼun Ndióxi̱” (Hech. 18:2-5). Ña̱kán ña̱ xi̱ndayáʼvika nu̱ú ta̱ apóstol Pablo kúú ña̱ kachíñura nu̱ú Ndióxi̱. Ta saátu xi̱kachíñura ña̱ va̱ʼa kee xu̱ʼún kuniñúʼura ta saátu xi̱ndi̱ʼi̱ní-inira ña̱ natúʼunra xa̱ʼa̱ Ndióxi̱. Xa̱ʼa̱ ña̱kán va̱ʼaní consejo ta̱xira ndaʼa̱ na̱ hermano ña̱ va̱ása taxina kasi ña̱ʼa ña̱ íyo ñuyǐví yóʼo nu̱úna, ni chiñu ña̱ kúúmiína, ña̱ va̱ʼa kachíñuna nu̱ú Ndióxi̱ (Filip. 1:10).

4. ¿Ndáa ki̱ʼva chi̱ndeétáʼan ta̱ Pablo ta̱ Timoteo xíʼin na̱ hermano ña̱ kundeé-inina ya̱ʼana nu̱ú tu̱ndóʼo?

⁴ Tá sa̱kán íyo loʼo tiempo ña̱ ki̱xáʼa íyo congregación ña̱ Tesalónica. Na̱ yiví ki̱xáʼana íxandi̱va̱ʼana xíʼin na̱ cristiano kán. Tá iin tiʼvi na̱ yiví ni̱xa̱ʼa̱nna na̱ndukúna ta̱ Pablo xíʼin ta̱ Silas ta xa̱ʼa̱ ña̱ kǒo na̱yóʼo níndani̱ʼína, “nda̱kiʼinna sava na̱ hermano ku̱a̱ʼa̱n xíʼinna nu̱ú na̱ chíñu ñuu kán”. Ta ña̱yóʼo ni̱ka̱ʼa̱nna: “Na̱ ta̱a yóʼo kǒo ndíku̱nna ña̱ káʼa̱n ta̱ César” (Hech. 17:6, 7). Ña̱kán, sana ni̱yi̱ʼvíní na̱ hermano yóʼo tá xi̱nina ña̱ ki̱xáʼa na̱ ñuu miína sáa̱-inina xíninana. Ta xa̱ʼa̱ ña̱ xi̱ndoʼona ña̱yóʼo, kivi sandákavaña-inina ta va̱ása kusi̱íka-inina kachíñuna nu̱ú Jehová. Soo ta̱ Pablo va̱ása nítaxira ña̱ kundoʼona ña̱yóʼo. Saáchi ni xi̱niñúʼu ku̱ʼu̱nra xíʼin ta̱ Silas inka ñuu, xa̱ʼndana chiñu ña̱ viíní ná kiʼinna kuenta xíʼin na̱ cristiano yóʼo. Ta tá ni̱ya̱ʼa tiempo ta̱ Pablo sa̱ndákaʼánra ña̱yóʼo na̱ ñuu Tesalónica: “Chi̱ndaʼándi̱ ñaniyó ta̱ Timoteo ku̱xa̱a̱ra nu̱úndó, [...] ña̱ va̱ʼa ndasandakúra-inindó ta saátu ña̱ sandíkora-inindó ña̱ va̱ʼa kandíxakandó Ndióxi̱, ta saá ni iinndó kǒo ndakava-ini ixaa tu̱ndóʼo yóʼo” (1 Tes. 3:2, 3). Ña̱kán tá ni̱xi̱yo ta̱ Timoteo chí Listra, sana nda̱a̱ ta̱yóʼo i̱xandi̱va̱ʼa na̱ yiví xíʼin. Ña̱kán xi̱nira ndáa ki̱ʼva chi̱kaa̱ ta̱ apóstol Pablo ndee̱ xíʼin na̱ hermano na̱ ni̱xi̱yo ñuu kán. Ta saátu xi̱nira ndáa ki̱ʼva chi̱ndeétáʼan Jehová xíʼinna. Ña̱kán va̱ʼaní chi̱kaa̱ra ndee̱ xíʼin na̱ hermano, ta ni̱ka̱ʼa̱nra xíʼinna ña̱ kǒo ña̱ kundoʼona chi mií Jehová íyora xíʼinna (Hech. 14:8, 19-22; Heb. 12:2).

5. ¿Ndáa ki̱ʼva chi̱ndeétáʼan ña̱ ni̱ka̱ʼa̱n iin ta̱ anciano xíʼin ta̱ Bryant?

⁵ ¿Ndáaña ke̱ʼéka ta̱ apóstol Pablo ña̱ ndasandakúra-ini na̱ hermano? Tá ndi̱kóra xíʼin ta̱ Bernabé ñuu Listra, ñuu Iconio xíʼin ñuu Antioquía, “iin iin congregación nda̱kaxinna na̱ koo anciano” (Hech. 14:21-23). Ta na̱ anciano na̱ nda̱kaxinna yóʼo va̱ʼaní chi̱kaa̱na ndee̱ xíʼin na̱ hermano, nda̱a̱ táki̱ʼva kéʼé na̱ anciano tiempo vitin. Ná kotoyó ña̱ káʼa̱n iin ta̱ hermano ta̱ naní Bryant: “Tá xa̱a̱ kúúmiíi̱ 15 ku̱i̱ya̱, nda̱koo yivái̱ ndi̱ʼi̱, ta siʼíi̱ ki̱tañá ti̱xin congregación. Tá ndo̱ʼi̱ ña̱yóʼo ku̱suchíní-inii̱ ta nda̱kavaní-inii̱”. ¿Ndáaña chi̱ndeétáʼan xíʼinra tá ndo̱ʼora ña̱yóʼo? Ta̱yóʼo káchira: “Iin ta̱ anciano ta̱ naní Tony xi̱ka̱ʼa̱nra xíʼi̱n tá xi̱xaʼi̱n reunión, ta va̱ása níxi̱ndakoora ña̱ ka̱ʼa̱nra xíʼi̱n. Ta̱yóʼo xi̱natúʼunra xíʼi̱n xa̱ʼa̱ na̱ hermano na̱ xi̱yaʼa nu̱ú tu̱ndóʼo, ta nixi̱ndoʼona ña̱yóʼo xi̱kusi̱íva-inina xi̱kachíñuna nu̱ú Jehová. Xi̱kaʼvira Salmo 27:10 nu̱úi̱, ta saátu ku̱a̱ʼání yichi̱ xi̱natúʼunra xa̱ʼa̱ ta̱ Ezequías xíʼi̱n, ni yivá ta̱yóʼo va̱ása va̱ʼa yichi̱ ní chinúura nu̱úra soo ni saá chi̱ka̱a̱níra ndee̱ ña̱ kachíñura nu̱ú Jehová”. Ta, ¿ndáa ki̱ʼva chi̱ndeétáʼan ña̱ ni̱ka̱ʼa̱n ta̱ Tony xíʼin ta̱ Bryant? Ta̱yóʼo káchira: “Ña̱ ni̱ka̱ʼa̱n ta̱ Tony xíʼi̱n va̱ʼaní chi̱ndeétáʼanña xíʼi̱n, saáchi tá ni̱ya̱ʼa loʼo tiempo ni̱xa̱i̱ ku̱i̱ precursor, ta ña̱yóʼo sákusi̱íníña-inii̱”. Ndóʼó na̱ anciano koo tu̱ʼvandó ña̱ sandíkondó-ini na̱ hermano ta ka̱ʼa̱nndó tu̱ʼun va̱ʼa xíʼinna tá yáʼana nu̱ú tu̱ndóʼo (Prov. 12:25).

6. ¿Ndáa ki̱ʼva xi̱niñúʼu ta̱ Pablo ña̱ ndo̱ʼo na̱ cristiano na̱ xi̱ndoo tá ya̱chi̱ ña̱ chi̱ka̱a̱ra ndee̱ xíʼin inkana?

⁶ Ta̱ Pablo sa̱ndákaʼánra na̱ hermano ña̱ ku̱a̱ʼání na̱ cristiano na̱ xi̱ndoo tá ya̱chi̱ ku̱chiñuna ni̱ya̱ʼana nu̱ú ku̱a̱ʼání tu̱ndóʼo ña̱ ndeéní, saáchi mií Jehová chi̱ndeétáʼan xíʼinna (Heb. 12:1). Ta xi̱kunda̱a̱-inira ña̱ va̱ʼaní chindeétáʼan ña̱ ndo̱ʼo na̱ hermano na̱ xi̱ndoo tá ya̱chi̱ xíʼinna, ña̱  ndakú koo inina xíʼin Ndióxi̱, ta saátu va̱ʼaní chindeétáʼanña xíʼinna ña̱ kundi̱ʼi̱-inina xa̱ʼa̱ iinlá “ñuu ña̱ kúú kuenta mií Ndióxi̱ ta̱ táku” (Heb. 12:22). Kivitu chindeétáʼanña xíʼin miíyó tiempo vitin. Tá káʼviyó xa̱ʼa̱ ndáa ki̱ʼva chi̱ndeétáʼan Jehová xíʼin ta̱ Gedeón, ta̱ Barac, ta̱ David, xíʼin ta̱ Samuel ndásandakúní ña̱yóʼo iniyó (Heb. 11:32-35). Ña̱ kéʼé na̱ hermano tiempo vitin, va̱ʼanítu chíka̱a̱ña ndee̱ xíʼinyó. Ti̱xin ña̱ central mundial ku̱a̱ʼání carta ndákiʼinna, ta nu̱ú ña̱ carta yóʼo ku̱a̱ʼá na̱ hermano káʼa̱nna ña̱ ndundakúní ña̱ kándíxana Jehová tá káʼvina xa̱ʼa̱ ña̱ nátúʼun xa̱ʼa̱ ña̱ ndóʼo na̱ hermano tiempo vitin.

7. ¿Ndáaña sákuaʼayó xíʼin consejo ña̱ ni̱ka̱ʼa̱n ta̱ Pablo nu̱ú Romanos 14:19-21?

⁷ Inka ki̱ʼva ña̱ ndasandakúyó-ini na̱ hermanoyó kúú ña̱ vií kutáʼanyó xíʼinna. Sava yichi̱ va̱ása inkáchiví íyo ña̱ ndakanixi̱níyó xíʼin na̱ hermanoyó, soo ná va̱ása taxiyó kasi ña̱yóʼo nu̱úyó ña̱ kutáʼanyó xíʼinna. Tá ndáka̱xinna keʼéna iin ña̱ʼa, va̱ása káʼa̱n kúáchiyó xa̱ʼa̱ ña̱yóʼo, saáchi kúnda̱a̱-iniyó ña̱ kǒo yáʼandosóna ña̱ káʼa̱n ley Ndióxi̱. Ná kotoyó ndáaña ku̱u ti̱xin congregación ñuu Roma, nu̱ú xi̱ñuʼu na̱ judío xíʼin inka na̱ ñuu. Xa̱ʼa̱ ña̱ va̱ása níxi̱ndiku̱nkana ley ta̱ Moisés, ña̱kán ki̱xáʼana xíxina sava ña̱ʼa ña̱ xi̱ka̱ʼa̱n ley xa̱ʼa̱ ña̱ va̱ása níxi̱xiniñúʼu kuxuna (Mar. 7:19). Sava na̱ judío va̱ʼava xi̱kunina tá xi̱xixina ndíʼi saá nu̱ú ña̱ʼa. Soo nu̱ú inka na̱ judío iin ku̱a̱chi ndeéní xi̱kuu ña̱yóʼo. Ta xa̱ʼa̱ ña̱yóʼo nda̱taʼvína ti̱xin congregación. Ta̱ Pablo ni̱ka̱ʼa̱nra xíʼinna ña̱ ndáyáʼviní vií kutáʼanna ti̱xin congregación, ña̱yóʼo ka̱chira: “Va̱ʼaka kǒo kuxún ku̱ñu ni kǒo koʼún vino ni kǒo keʼún nda̱a̱ ni iin ña̱ʼa ña̱ sandákava-ini na̱ ñaniún” (kaʼvi Romanos 14:19-21). Ta ña̱ ni̱ka̱ʼa̱nra xíʼinna yóʼo, chi̱ndeétáʼanña xíʼinna ña̱ ku̱nda̱a̱-inina ña̱ xo̱ʼvi̱nína ta saátu na̱ congregación tá ná keʼékana ña̱yóʼo. Nda̱a̱ mií ta̱ apóstol Pablo nda̱koora ña̱ keʼéra sava ña̱ʼa, ña̱ va̱ʼa ná kǒo sandákavara-ini inkana (1 Cor. 9:19-22). Ta nda̱a̱ táki̱ʼva ke̱ʼé ta̱ Pablo, tá kúni̱yó ndasandakúyó-ini na̱ hermanoyó ná kǒo kanitáʼanyó xíʼinna xa̱ʼa̱ ña̱ xa̱a̱ síín síín íyo ña̱ ndáka̱xinyó keʼéyó.

8. ¿Ndáaña ke̱ʼé ta̱ apóstol Pablo tá ki̱xáʼa íyo iin ku̱a̱chi ti̱xin congregación?

⁸ Ta, ¿ndáaña kivi keʼéyó tá va̱ása inkáchi ndákanixi̱níyó xa̱ʼa̱ iin ña̱ʼa ña̱ ndáyáʼviní? Ná keʼéyó nda̱a̱ táki̱ʼva ke̱ʼé ta̱ apóstol Pablo ña̱ vií kutáʼanyó ti̱xin congregación. Ti̱xin congregación ña̱ ni̱xi̱yo tá siglo nu̱ú, ni̱xi̱yo sava na̱ xi̱ka̱ʼa̱n ña̱ xi̱niñúʼu ta̱ʼnda̱ nu̱ú yi̱i̱ na̱ ta̱a na̱ va̱ása kúú judío tá xi̱xaa̱na xi̱nduuna na̱ xi̱ndiku̱n sa̱tá ta̱ Jesús. Ta xi̱niñúʼu keʼénaña ña̱ va̱ʼa ná kǒo ka̱ʼa̱n kúáchi na̱ yiví xa̱ʼa̱ ña̱yóʼo (Gál. 6:12). Ta̱ apóstol Pablo kǒo níkutóovíra ña̱ ni̱ka̱ʼa̱n na̱yóʼo, soo va̱ása níka̱ʼa̱nra xíʼinna xa̱ʼa̱ ña̱ xi̱ndakanixi̱níra. Va̱ʼaka ni̱ka̱ʼa̱nra xíʼin na̱ apóstol xíʼin na̱ anciano na̱ ni̱xi̱yo ñuu Jerusalén xa̱ʼa̱ ña̱yóʼo (Hech. 15:1, 2). Ki̱ʼva ña̱ xi̱ndasaviíra ku̱a̱chi ña̱yóʼo va̱ʼaví chi̱ndeétáʼanña xíʼin na̱ hermano ña̱ vií kutáʼanna ti̱xin congregación ta kusi̱í-inina (Hech. 15:30, 31).

9. ¿Ndáaña xíniñúʼu keʼéyó ña̱ va̱ʼa kundiku̱nyó yichi̱ ta̱ Pablo?

⁹ Sava yichi̱ va̱ása inkáchiví koo ña̱ ndakanixi̱níyó xíʼin na̱ hermanoyó, xa̱ʼa̱ ña̱kán kivi kaku ku̱a̱chi xíʼinyó. Ña̱kán kivi ka̱ʼa̱nyó xíʼin na̱ anciano ña̱ chindeétáʼanna xíʼinyó, chi Jehová kúú ta̱ nda̱kaxin na̱yóʼo ña̱ kundaana congregación. Saátu kivi ndani̱ʼíyó consejo nu̱ú tutu ña̱ tává na̱ ñuu Ndióxi̱, xíʼin inkaka ña̱ káʼa̱nna xíʼinyó keʼéyó. Ta tá chíka̱a̱yó ndee̱ ña̱ kundiku̱nyó consejo yóʼo ta va̱ása keʼéyó ña̱ kúni̱ miíyó, saá kúú ña̱ viíní kutáʼanyó ti̱xin congregación.

10. ¿Ndáa inka ña̱ ke̱ʼé ta̱ Pablo ña̱ va̱ʼa chi̱ndeétáʼanra xíʼin na̱ hermano ña̱ vií kutáʼanna?

¹⁰ Ta̱ Pablo chi̱ka̱a̱ra ndee̱ ña̱ viíní kutáʼanra xíʼin na̱ hermano. Ta nu̱úka ña̱ ka̱ʼa̱nra xa̱ʼa̱ ña̱  va̱ása va̱ʼa xi̱keʼéna, xi̱chika̱a̱ra ndee̱ ña̱ kotora ña̱ va̱ʼa xi̱keʼéna. Tá kúú, tá kúma̱níka sandíʼira kaʼyíra carta ña̱ ku̱ʼu̱n ndaʼa̱ na̱ hermano na̱ ñuu Roma, nu̱ú ña̱yóʼo va̱ʼaní ni̱ka̱ʼa̱nra xa̱ʼa̱ ku̱a̱ʼá ná hermana xíʼin na̱ hermano. Ta nda̱a̱ sava yichi̱ xi̱ka̱ʼa̱nra ki̱vi̱ na̱yóʼo, ta xi̱ka̱ʼa̱nra xíʼinna ndáa ña̱ va̱ʼa kúú ña̱ xi̱keʼéna. ¿Ndáa ki̱ʼva kundiku̱nyó yichi̱ra? Ña̱ ka̱ʼa̱nyó xa̱ʼa̱ ña̱ va̱ʼa ña̱ kéʼé inkana, saá chindeétáʼanyó xíʼin na̱ hermano ña̱ vií kutáʼanna, ta kuʼvi̱-inina kunitáʼanna.

11. ¿Ndáaña kivi keʼéyó ña̱ ndasaviíyó ku̱a̱chi ña̱ kúúmiíyó xíʼin na̱ hermanoyó?

¹¹ Sava yichi̱ nda̱a̱ na̱ hermano na̱ xa̱a̱ xu̱xa-ini xíʼin tu̱ʼun Ndióxi̱ va̱ása inkáchi ndákanixi̱nína xíʼin inkana, ta xa̱ʼa̱ ña̱yóʼo nda̱a̱ kivi kaku ku̱a̱chi. Ña̱yóʼo kúú ña̱ ndo̱ʼo ta̱ Pablo xíʼin ta̱ Bernabé ni va̱ʼaní xi̱kitáʼanna. Ta̱ Bernabé xi̱kuni̱ra ña̱ ná ku̱ʼu̱n ta̱ Marcos xíʼinna natúʼunna xa̱ʼa̱ Ndióxi̱, soo ta̱ Pablo kǒo níxiinra ku̱ʼu̱n ta̱yóʼo xíʼinna. ¿Ndáaña ku̱u tándi̱ʼi? Tu̱ʼun Ndióxi̱ káchiña: “Ndeéní ni̱nda̱ʼyi̱ nu̱ú táʼanna ta ni̱sa̱a̱na nu̱ú táʼanna ta ta̱ʼví-táʼanna” (Hech. 15:37-39). Soo ta̱ Pablo, ta̱ Bernabé xíʼin ta̱ Marcos nda̱saviína ku̱a̱chi yóʼo. Saá ni̱na̱ʼa̱na ña̱ xi̱ndayáʼvika nu̱úna kúú ña̱ kutáʼan vií na̱ hermano ti̱xin congregación. Tá ni̱ya̱ʼa tiempo ta̱ Pablo va̱ʼaní ni̱ka̱ʼa̱nra xa̱ʼa̱ ta̱ Bernabé ta saátu ta̱ Marcos (1 Cor. 9:6; Col. 4:10). Saátu miíyó xíniñúʼu ndasaviíyó ku̱a̱chi ña̱ kúúmiíyó xíʼin na̱ hermanoyó, ta chika̱a̱yó ndee̱ ña̱ kotoyó ña̱ va̱ʼa ña̱ kéʼéna. Tá saá ná keʼéyó viíní kutáʼanyó ti̱xin congregación (Efes. 4:3).

12. ¿Ndáaña kúú sava tu̱ndóʼo ña̱ yáʼa na̱ hermanoyó nu̱ú?

¹² Saátu ndásandakúyó-ini na̱ hermanoyó tá chíndeétáʼanyó xíʼinna ña̱ kandíxakana Ndióxi̱. Sava na̱yóʼo xíniñúʼu kundeé-inina tá kúsi̱kindaa na̱ veʼenana, na̱ káʼvi xíʼinna escuela á na̱ káchíñu xíʼinna. Sava na̱yóʼo ndeéní ndóʼona á ndákavatu-inina xa̱ʼa̱ ña̱ ke̱ʼé á ña̱ ni̱ka̱ʼa̱n iinna xíʼinna. Ta savana xa̱a̱ íyo ku̱a̱ʼá ku̱i̱ya̱ nda̱kuchina ta ndátuna ná kixaa̱ ña̱ ndíʼi-xa̱ʼa̱ ñuyǐví yóʼo. Ndiʼi ña̱yóʼo kivi ixayo̱ʼvi̱ña xíʼinyó ña̱ nda̱kú koo iniyó xíʼin Ndióxi̱. Na̱ cristiano na̱ ni̱xi̱yo tá siglo nu̱ú ni̱ya̱ʼana nu̱ú táʼan tu̱ndóʼo yóʼo. ¿Ndáaña ke̱ʼé ta̱ Pablo ña̱ chi̱ndeétáʼanra xíʼinna ña̱ ndakú koo inina?

13. ¿Ndáa ki̱ʼva chi̱ndeétáʼan ta̱ Pablo xíʼin na̱ cristiano tá xi̱kusi̱kindaa na̱ yiví na̱yóʼo?

¹³ Ta̱ Pablo xi̱niñúʼura tu̱ʼun Ndióxi̱ ña̱ ndasandakúra-ini na̱ hermano. Tá kúú, va̱ása níxi̱kunda̱a̱-ini na̱ xi̱ndiku̱n sa̱tá ta̱ Cristo na̱ xi̱kuu judío ndáa ki̱ʼva ka̱ʼa̱nna xíʼin na̱ veʼena tá xi̱ka̱ʼa̱nna xíʼinna ña̱ va̱ʼaníka íyo ña̱ kéʼé na̱ judaísmo nu̱ú na̱ xi̱ndiku̱n sa̱tá ta̱ Cristo. Carta ña̱ chi̱ndaʼá ta̱ Pablo ku̱a̱ʼa̱n ndaʼa̱ na̱ hebreo, va̱ʼaní chi̱ndeétáʼan ña̱yóʼo xíʼinna (Heb. 1:5, 6; 2:2, 3; 9:24, 25). Na̱ cristiano yóʼo va̱ʼaní xi̱niñúʼuna ndiʼi ña̱ sa̱náʼa̱ ta̱ apóstol Pablo miína, ña̱ ndakuiinna yuʼú na̱ yiví na̱ xi̱ka̱ʼa̱n ña̱ va̱ása va̱ʼa xa̱ʼa̱na. Ta miíyó, ¿ndáa ki̱ʼva chindeétáʼanyó xíʼin na̱ hermano tá kúsi̱kindaa na̱ yiví na̱yóʼo? Sanáʼa̱yóna ña̱ viíní kuniñúʼuna ndiʼi tutu ña̱ tává na̱ ñuu Ndióxi̱, ña̱ va̱ʼa kuxini̱na ka̱ʼa̱nna xíʼin na̱ yiví xa̱ʼa̱ ña̱ kándíxana. Tá kúú kivi kaʼvina folleto ña̱ naní ¿Es la vida obra de un Creador?, El origen de la vida. Cinco cuestiones dignas de análisis, saátu kivi chindeétáʼanyó xíʼin na̱ va̱lí ña̱ va̱ʼa nandukúna nu̱ú tutu ña̱ tává na̱ ñuu Ndióxi̱ ña̱ kivi chindeétáʼan xíʼinna ña̱ va̱ʼa kuxini̱na ka̱ʼa̱nna xíʼin inkana, nda̱chun kúú ña̱ kándíxana ña̱ íyo iin ta̱ i̱xava̱ʼa miíyó.

14. ¿Ndáaña ke̱ʼéka ta̱ Pablo ni xi̱niñúʼu natúʼunra xa̱ʼa̱ Ndióxi̱ ta saátu ña̱ sanáʼa̱ra na̱ yiví?

¹⁴ Ta̱ Pablo ni̱ka̱ʼa̱nra xíʼin na̱ hermano ña̱ ná chindeétáʼanna xíʼin inkana, tasaá na̱ʼa̱na ña̱ kúʼvi̱-inina xínina na̱yóʼo (Heb. 10:24). Ta̱ Pablo va̱ása níchika̱a̱ kuitíra ndee̱ xíʼin na̱ hermano, chi saátu chi̱ndeétáʼanra xíʼinna. Tá kúú, tándi̱ʼi ña̱ kuxu na̱ hermano ñuu Judea, ta̱ Pablo  ni̱xa̱ʼa̱nra xíʼin ña̱ xi̱xina (Hech. 11:27-30). Ni xi̱niñúʼu natúʼunra xíʼin na̱ yiví xa̱ʼa̱ Ndióxi̱, ta saátu sanáʼa̱rana, ndiʼi tiempo xi̱ndukúra ki̱ʼva ña̱ chindeétáʼanra xíʼin na̱ hermano na̱ ndá’vi (Gál. 2:10). Xíʼin ña̱ xi̱keʼéra yóʼo, xi̱chindeétáʼanra xíʼin na̱ hermano ña̱ kunda̱a̱-inina ña̱ ndiʼi tiempo kundaa Jehová miína. Saátu ná keʼéyó tiempo vitin, ná ndasandakúyó-ini na̱ hermanoyó, ná kuniñúʼuyó tiempoyó xíʼin ndee̱yó xíʼin ña̱ xíni̱yó keʼéyó ña̱ va̱ʼa chindeétáʼanyó xíʼinna nu̱ú kúu iin tu̱ndóʼo. Saátu chíndeétáʼanyó xíʼinna tá táxiyó donación, ña̱ kuniñúʼu na̱ ñuu Ndióxi̱ iníísaá ñuyǐví. Tá kéʼéyó ña̱yóʼo va̱ʼaní chindeétáʼanña xíʼin na̱ hermano ña̱ kandíxana ña̱ va̱ása ndakoo ndaʼa̱ Jehová miína.

15, 16. ¿Ndáaña xíniñúʼu keʼéyó xíʼin na̱ va̱ása chíka̱a̱ka ndee̱ kachíñu nu̱ú Ndióxi̱?

¹⁵ Ta̱ Pablo kǒo nísandákoora ña̱ chindeétáʼanra xíʼin na̱ hermano na̱ va̱ása níxi̱chika̱a̱ka ndee̱ kachíñu nu̱ú Ndióxi̱. Xi̱kundáʼvi-inira xi̱xinirana ta viíní xi̱ka̱ʼa̱nra xíʼinna (Heb. 6:9; 10:39). Tá kúú carta ña̱ ka̱ʼyíra ku̱a̱ʼa̱n nu̱ú na̱ hebreo, ku̱a̱ʼání yichi̱ xi̱ka̱ʼa̱nra nda̱a̱ xa̱ʼa̱ miíra, tá xi̱ka̱ʼa̱nra xíʼinna ndáaña xi̱xiniñúʼu keʼéna, ta xíʼin ña̱yóʼo ni̱na̱ʼa̱ra ña̱ nda̱a̱ miíra xi̱niñúʼu kundiku̱n consejo yóʼo (Heb. 2:1, 3). Nda̱a̱ táki̱ʼva ke̱ʼé ta̱ Pablo, saátu miíyó ná chindeétáʼanyó xíʼin na̱ va̱ása chíka̱a̱ka ndee̱ kachíñu nu̱ú Ndióxi̱. Ta náʼa̱yó ña̱ kúʼvi̱-iniyó xíniyóna ta saátu ndíʼi̱-iniyó xa̱ʼa̱na, tá ndásandakúyó-inina. Ná ndakaʼányó chi tu̱ʼun ña̱ káʼa̱nyó xíʼinna ndáyáʼviníña, saátu ndáyáʼviní ña̱ viíní ka̱ʼa̱nyó xíʼinna.

¹⁶ Ta̱ Pablo ni̱ka̱ʼa̱nra xíʼin na̱ hermano ña̱ va̱ása nándósó Jehová xa̱ʼa̱ chiñu ña̱ ke̱ʼéna nu̱úra (Heb. 10:32-34). Saátu kivi keʼé miíyó, kivi chindeétáʼanyó xíʼin na̱ hermano na̱ va̱ása chíka̱a̱ka ndee̱ kachíñu nu̱ú Ndióxi̱. Kivi ka̱ʼa̱nyó xíʼinna ná natúʼunna xíʼinyó ndáa ki̱ʼva ni̱xa̱a̱na sa̱kuaʼana xa̱ʼa̱ Jehová. Saátu kivi chindeétáʼanyó xíʼinna ña̱ ná ndakaʼánna ndáa ki̱ʼva  chi̱ndeétáʼan Jehová xíʼinna sava yichi̱. Ná sándakaʼányóna ña̱ ta̱ʼán ndakoo Jehová ña̱ kuʼvi̱-inira kunirana, ta ndiʼi tiempo chindeétáʼanra xíʼinna (Heb. 6:10; 13:5, 6). Tá ná ka̱ʼa̱nyó ña̱yóʼo xíʼin na̱ hermanoyó, ña̱yóʼo va̱ʼaní chindeétáʼanña xíʼinna ña̱ chika̱a̱kana ndee̱ ña̱ kachíñukana nu̱ú Jehová.

17. ¿Ndáaña kivi keʼéyó ña̱ va̱ʼaníka ndasandakúyó-ini inkana?

¹⁷ Iin na̱ íxava̱ʼa veʼe, tá yáʼa tiempo saá kúú ña̱ xáa̱na va̱ʼaníka íxava̱ʼanaña. Saátu miíyó, tá yáʼa tiempo va̱ʼaníka kuxini̱yó ndáa ki̱ʼva ndasandakúyó-ini na̱ hermanoyó. Ña̱kán ná ndasandakúyó-ini na̱ hermanoyó ña̱ kundeé-inina ya̱ʼana nu̱ú tu̱ndóʼo ña̱ va̱xi nu̱úna. Ta iin ki̱ʼva ña̱ keʼéyó ña̱yóʼo kúú ña̱ natúʼunyó xíʼinna xa̱ʼa̱ inka na̱ hermano na̱ chíka̱a̱ní ndee̱ ña̱ kachíñuna nu̱ú Ndióxi̱. Ta saátu ná chika̱a̱yó ndee̱ ña̱ viíní ná kutáʼanyó xíʼin na̱ hermano ti̱xin congregación. Ta iin ki̱ʼva ña̱ keʼéyó ña̱yóʼo kúú ña̱ ka̱ʼa̱nyó xa̱ʼa̱ ña̱ va̱ʼa ña̱ kéʼéna. Ná chika̱a̱níyó ndee̱ ña̱ viíní kutáʼanyó xíʼin na̱ hermanoyó tá va̱ása inkáchi íyo ña̱ ndákanixi̱níyó. Saátu ná kuniñúʼuyó ña̱ nda̱a̱ ña̱ va̱xi nu̱ú tu̱ʼun Ndióxi̱ ña̱ ndasandakúyó-inina. Ná chindeétáʼanyó xíʼinna tá íyo ña̱ ndóʼona, ta saátu ná chindeétáʼanyó xíʼin na̱ va̱ása chíka̱a̱ka ndee̱ kachíñu nu̱ú Ndióxi̱.

18. ¿Ndáaña chika̱a̱-iniún keʼún?

¹⁸ Na̱ hermano na̱ chindeétáʼan nu̱ú íxava̱ʼana veʼe ña̱ ndasakáʼnuyó Ndióxi̱ va̱ʼaní kúnina tá kéʼéna chiñu yóʼo ta saátu kúsi̱íní-inina. Saátu miíyó kivi kusi̱íní-iniyó tá chíndeétáʼanyó xíʼin na̱ hermanoyó ña̱ ndasandakúyó-inina. Tá ná ya̱ʼa tiempo, iin veʼe kivi ndiʼi-xa̱ʼa̱ña soo ña̱ ndásandakúyó-ini na̱ hermanoyó ndiʼi tiempo va̱ʼaní chindeétáʼan ña̱yóʼo xíʼinna. Ña̱kán ná chika̱a̱níyó ndee̱ ña̱ kundiku̱nyó ña̱ va̱xi nu̱ú 1 Tesalonicenses 5:11: “Ndakundeéndó sandíkondó-ini táʼanndó ta ndasandakúndó-ini táʼanndó”.