1. Nda̱a̱ táki̱ʼva káchi Hebreos 12:1, ¿ndáaña xíniñúʼu keʼéyó ña̱ va̱ʼa sandíʼiyó carrera ña̱ xínuyó ku̱a̱ʼa̱nyó?

 BIBLIA káʼa̱nña ña̱ miíyó na̱ ndásakáʼnu Ndióxi̱ nda̱a̱ táki̱ʼva íyo na̱ xínu ku̱a̱ʼa̱n saá íyoyó. Na̱ xáa̱ nu̱ú ndíʼi carrera yóʼo níʼi̱na ña̱ kutakuna ndiʼi saá tiempo (2 Tim. 4:7, 8). Ndiʼiyó xíniñúʼu chikaa̱níyó ndee̱ ña̱ ndakundeéyó kunuyó chi si̱lóʼoní kúma̱ní tasaá xa̱a̱yó nu̱ú ndíʼi carrera yóʼo. Ta̱ apóstol Pablo chi̱kaa̱níra ndee̱ ta sa̱ndíʼira xi̱nura carrera yóʼo, ta ni̱ka̱ʼa̱nra sava ña̱ʼa ña̱ chindeétáʼan xíʼinyó ña̱ sandíʼiyóña. Ta̱yóʼo ni̱ka̱ʼa̱nra: “Ná sakútaʼayó ndiʼi ña̱ʼa ña̱ ve̱ení ndísoyó […], ta ná ixandakúní-iniyó kunuyó carrera ña̱ xa̱a̱ xínuyó ku̱a̱ʼa̱nyó” (kaʼvi Hebreos 12:1).

2. ¿Ndáaña xi̱kuni̱ kachi ta̱ Pablo tá ni̱ka̱ʼa̱nra “ná sakútaʼayó ndiʼi ña̱ʼa ña̱ ve̱ení ndísoyó”?

² ¿Ndáaña kúni̱ kachi ña̱ tu̱ʼun “ná sakútaʼayó ndiʼi ña̱ʼa ña̱ ve̱ení ndísoyó”? Ta̱ Pablo kǒo níxi̱kuni kachira ña̱ sakútaʼayó ndiʼi ña̱ʼa ña̱ ndísoyó, chi ña̱ xi̱kuni̱ kachira kúú ña̱ sakútaʼayó sava ña̱ kivi kasi nu̱úyó ña̱ ndakundeéyó kunuyó. Ña̱yóʼo kǒo táxiña kunuyó ta kamaní sákunaáña miíyó. Ña̱ va̱ʼa ndakundeéyó kunuyó ná kotoyó á íyoka inka ña̱ʼa ndísoyó, ta tá íyoña ndi̱ku̱n kama ná sandákooyóña. Soo, íyo sava ña̱ ndáyáʼviní ña̱ ndísoyó ta kǒo xíniñúʼu sandákooyóña, chi tá ná sandákooyóña kǒo kivika kunuyó ta ni kǒo kivika ni̱ʼíyó ña̱ kutakuyó ndiʼi saá tiempo (2 Tim. 2:5). Ná kotoyó ndáaña kúú sava ña̱ xíniñúʼu kundisoyó.

3. a) Nda̱a̱ táki̱ʼva káchi Gálatas 6:5, ¿ndáaña xíniñúʼu kundiso iin tá iinyó? b) ¿Ndáaña sakúaʼayó nu̱ú artículo yóʼo, ta nda̱chun?

³ (Kaʼvi Gálatas 6:5). Nu̱ú versículo yóʼo ta̱ Pablo ni̱ka̱ʼa̱nra ña̱ iin tá iin na̱ ndásakáʼnu Ndióxi̱ “ndakuiinna xa̱ʼa̱ ña̱ kéʼéna”.  ¿Ndáaña kúni̱ kachi ña̱yóʼo? Ña̱ iin tá iinyó xíniñúʼu sáxi̱nuyó chiñu ña̱ ta̱xi Ndióxi̱ ndaʼa̱yó, ta ni iin na̱ yiví kǒo kivi keʼé ña̱yóʼo nu̱úyó. Nu̱ú artículo yóʼo sakúaʼayó ndáa chiñu kúú ña̱ xíniñúʼu kundi̱ʼi̱-iniyó xa̱ʼa̱, ta ndáaña chindeétáʼan xíʼinyó ña̱ saxínuyóña. Saátu ka̱ʼa̱nyó xa̱ʼa̱ sava ña̱ʼa ña̱ ve̱e ña̱ ndísoyó, ta kotoyó ndáa ki̱ʼva sándakooyó ña̱yóʼo tasaá kǒo kasiña nu̱úyó ña̱ kachíñuyó nu̱ú Ndióxi̱. Ña̱kán ná kuiso kuitíyó ña̱ʼa ña̱ xíniñúʼu kundisoyó. Tá ná keʼéyó ña̱yóʼo saá kúú ña̱ sandíʼiyó carrera ña̱ xínuyó ku̱a̱ʼa̱nyó ta ni̱ʼíyó ña̱ kutakuyó ndiʼi saá tiempo.

4. ¿Nda̱chun va̱ása xíniñúʼu ixayo̱ʼvi̱ña xíʼinyó saxínuyó chiñu ña̱ ki̱ndooyó keʼéyó nu̱ú Jehová? (Koto na̱ʼná).

⁴ Chiñu ña̱ ki̱ndooyó keʼéyó nu̱ú Ndióxi̱ va̱ása yo̱ʼvi̱nívíña. Tá nda̱taxiyó miíyó ndaʼa̱ Jehová ta nda̱kuchiyó ki̱ndooyó ña̱ ndasakáʼnuyóra ta saátu ña̱ ndiʼi tiempo kachíñuyó nu̱úra. Xíniñúʼu keʼéyó ña̱ ni̱ka̱ʼa̱nyó xíʼinra saáchi iin chiñu ña̱ ndáyáʼviní kúúña ta kuchiñuvayó keʼéyóña. ¿Nda̱chun káʼa̱nyó ña̱yóʼo? Saáchi mií Jehová i̱xava̱ʼara miíyó ña̱ ndasakáʼnuyóra (Apoc. 4:11). I̱xava̱ʼara miíyó nda̱a̱ táki̱ʼva íyora, saátu chi̱kaa̱ra iniyó ña̱ kuni̱yó sakúaʼayó  xa̱ʼa̱ra ta ndasakáʼnuyóra. Ña̱kán kiviva viíní kitáʼanyó xíʼinra ta kusi̱íní-iniyó ña̱ kachíñuyó nu̱úra (Sal. 40:8). Tá kéʼéyó ña̱ káʼa̱n Jehová ta ndíku̱nyó yichi̱ ta̱ Jesús saá va̱ʼaní kúniyó (Mat. 11:28-30).

5. ¿Ndáaña chindeétáʼan xíʼún ña̱ sáxi̱nún ña̱ ki̱ndoún keʼún nu̱ú Ndióxi̱? (1 Juan 5:3).

⁵ ¿Ndáaña chindeétáʼan xíʼún ña̱ sáxi̱nún chiñu ña̱ ki̱ndoún keʼún nu̱ú Ndióxi̱? Ña̱ nu̱ú, chikaa̱ ndee̱ ña̱ kuʼvi̱ka-iniún kuniún Jehová. Tá ndákanixi̱níún xa̱ʼa̱ ña̱ xa̱a̱ kéʼé Jehová xa̱ʼún ta saátu ña̱ ndátún ndakiʼún chí nu̱únínu, ña̱yóʼo chindeétáʼan xíʼún ña̱ kuʼvi̱ka-iniún kuniúnra. Tá ná kuʼvi̱ka-iniún kuniún Jehová saá kúú ña̱ va̱ása ixayo̱ʼvi̱ña xíʼún keʼún ña̱ káʼa̱nra (kaʼvi 1 Juan 5:3). Ña̱ u̱vi̱, keʼé ña̱ ke̱ʼé ta̱ Jesús. Ta̱yóʼo ku̱chiñura ke̱ʼéra chiñu Ndióxi̱ saáchi xi̱ka̱ʼa̱nra xíʼinra ña̱ taxira ndee̱ ndaʼa̱ra ta kǒo nínandósó-inira xa̱ʼa̱ ña̱ ni̱ka̱ʼa̱n Ndióxi̱ taxira ndaʼa̱ra (Heb. 5:7; 12:2). Nda̱a̱ táki̱ʼva ke̱ʼé ta̱ Jesús, saátu miíún ka̱ʼa̱n xíʼin Jehová ná taxira ndee̱ ndaʼún, ta saátu kǒo nandósó-iniún xa̱ʼa̱ ña̱ ndátún ndakiʼún chí nu̱únínu. Tá kúʼvi̱ní-iniún xíniún Jehová ta ndíku̱n ña̱ ke̱ʼé se̱ʼera, saá kúú ña̱ kuchiñún keʼún ña̱ ki̱ndoún keʼún nu̱úra.

6. ¿Nda̱chun xíniñúʼu kundi̱ʼi̱-iniyó xa̱ʼa̱ na̱ veʼeyó? (Koto na̱ʼná).

⁶ Ña̱ kiʼinyó kuenta xíʼin na̱ veʼeyó. Jehová xíʼin ta̱ Jesús kúú na̱ xíniñúʼuníka kuʼvi̱-iniyó kuniyó nu̱úka na̱ veʼeyó (Mat. 10:37). Soo, ña̱yóʼo kǒo kúni̱ kachiña ña̱ kǒo xíniñúʼu kundi̱ʼi-iniyó xa̱ʼa̱ na̱ veʼeyó ta iinlá chiñu Jehová kuití keʼéyó, saáchi tá kúni̱yó sákusi̱íyó-ini Jehová xíʼin ta̱ Jesús, saátu xíniñúʼu taxiyó ña̱ xíniñúʼu na̱ veʼeyó (1 Tim. 5:4, 8). Tá ná keʼéyó ña̱yóʼo saá kúú ña̱ si̱íní kooyó saáchi mií Jehová kúú ta̱ ni̱ka̱ʼa̱n ña̱ saá xíniñúʼu keʼé na̱ yiví. Tá kúú, na̱ xa̱a̱ ti̱ndaʼa̱ xíniñúʼu ixato̱ʼóna na̱ ti̱ndaʼa̱ xíʼinna ta kuʼvi̱-inina kunitáʼanna, na̱ íyo se̱ʼe xíniñúʼu kuʼvi̱-inina kunina se̱ʼena ta sanáʼa̱nana xa̱ʼa̱ Jehová, ta na̱ va̱lí xíniñúʼu kuniso̱ʼona ña̱ káʼa̱n na̱ yivána (Efes. 5:33; 6:1, 4).

7. ¿Ndáaña keʼún ña̱ va̱ʼa sáxi̱nún chiñu ña̱ ta̱xi Ndióxi̱ ndaʼún ña̱ kundaún na̱ veʼún?

⁷ ¿Ndáaña chindeétáʼan xíʼún ña̱ sáxi̱nún chiñu ña̱ ta̱xi Ndióxi̱ ndaʼún? Iin tá iin na̱ familia xíniñúʼu chikaa̱na ndee̱ ña̱ kundiku̱nna consejo ña̱ va̱xi nu̱ú Biblia. Kǒo keʼún ña̱ kúni̱ miíún ta ni kǒo kundiku̱ún costumbre ña̱ íyo ñuún, saátu kǒo kandíxaún ña̱ káʼa̱n na̱ ndíchi na̱ kǒo ndásakáʼnu Ndióxi̱ (Prov. 24:3, 4). Kaʼvi tutu ña̱ tává na̱ ñuu Ndióxi̱ chi nu̱ú ña̱kán kivi ndani̱ʼún consejo ña̱ chindeétáʼan xíʼún. Tá kúú, nu̱ú folleto ña̱ naní “Va̱ʼava kundoo si̱índó xíʼin na̱ veʼendó”, xíʼin lección 49 xíʼin 50 libro ña̱ naní “Kivi koo si̱íún vitin ta saátu chí nu̱únínu”, va̱xi ña̱ kivi chindeétáʼan xíʼin na̱ ti̱ndaʼa̱, na̱ íyo se̱ʼe xíʼin na̱ va̱lí ña̱ va̱ʼa kunda̱a̱-inina ndáaña kivi keʼéna tá ná ya̱ʼana nu̱ú iin tu̱ndóʼo. b Chikaa̱ ndee̱ ña̱ kundiku̱ún consejo ña̱ va̱xi nu̱ú Biblia ni na̱ veʼún kǒo xíínna keʼéna ña̱yóʼo. Tá ná keʼún ña̱yóʼo ku̱a̱ʼání ña̱ va̱ʼa taxi Jehová ndaʼún ta va̱ʼaní kutáʼún xíʼin na̱ veʼún (1 Ped. 3:1, 2).

8. ¿Ndáaña kivi kundoʼoyó xíʼin ña̱ ndáka̱xinyó keʼéyó?

⁸ Ña̱ ndákiʼinyó xa̱ʼa̱ ña̱ ndáka̱xinyó keʼéyó. Jehová ta̱xira ña̱ ná ndaka̱xinyó ña̱ keʼéyó, ta kúni̱ra ña̱ nina ña̱ va̱ʼa ná ndaka̱xinyó chi saá kusi̱í-ini miívayó, soo va̱ása sáku̱taʼara tu̱ndóʼo ña̱ va̱xi nu̱úyó xa̱ʼa̱ ña̱ va̱ása va̱ʼa ndáka̱xinyó (Gál. 6:7, 8). Ña̱kán, tá va̱ása va̱ʼa íyo ña̱ nda̱kaxinyó, tá kúú ña̱ kamaní ni̱ka̱ʼa̱nyó ña̱ va̱ása va̱ʼa á kamaní keʼéyó iin ña̱ʼa, kixiva tu̱ndóʼo  nu̱úyó. Sava yichi̱ ña̱ xínitúni̱yó sándi̱ʼi̱ña miíyó xa̱ʼa̱ iin ña̱ va̱ása va̱ʼa ke̱ʼéyó, ta xa̱ʼa̱ ña̱kán va̱ása va̱ʼa kúniyó. Soo, iin tá iinyó ndáka̱xinyó ndáaña keʼéyó, ña̱kán tá va̱ása vií kána ña̱yóʼo miíyó kúú na̱ kúúmií ku̱a̱chi. Va̱ʼaka ná natúʼunyó xa̱ʼa̱ ku̱a̱chiyó, ná chikaa̱yó ndee̱ ña̱ nasamayó ki̱ʼva ña̱ íyoyó ta ná kǒo ndikóyó keʼéyó ña̱ va̱ása va̱ʼa. Ña̱yóʼo chindeétáʼan xíʼinyó ña̱ ndakundeéyó kunuyó carrera ña̱ xínuyó ku̱a̱ʼa̱nyó.

9. ¿Ndáaña chindeétáʼan xíʼún tá va̱ása vií íyo ña̱ nda̱kaxiún? (Koto na̱ʼná).

⁹ ¿Ndáaña chindeétáʼan xíʼún ña̱ kǒo ndakava-iniún? Tá ni̱ka̱ʼún á ke̱ʼún iin ña̱ʼa ña̱ va̱ása va̱ʼa kǒo kívika nasamaún ña̱yóʼo, ña̱kán kǒo ndakaniníkaxi̱níún xa̱ʼa̱ña. Kǒo chika̱ún ku̱a̱chi inkana ta kǒo ka̱ʼún ña̱ su̱ví ku̱a̱chi miíún níxi̱yoña, va̱ʼaka ndakuni ña̱ ku̱a̱chi miíún kúúña ta chikaa̱ ndee̱ ña̱ ndasaviíúnña. Ta tá va̱ása va̱ʼa kúni̱ún xa̱ʼa̱ ña̱ ke̱ʼún, ka̱ʼa̱n xíʼin Jehová ná chindeétáʼanra xíʼún, ka̱ʼa̱n xíʼinra ña̱ ku̱a̱chi miíún xi̱kuuña ta ná ixakáʼnu-inira xa̱ʼún (Sal. 25:11; 51:3, 4). Tá ke̱ʼún á ni̱ka̱ʼún ña̱ va̱ása va̱ʼa xíʼin inkana, ndukú ña̱ káʼnu-ini nu̱úna ta saátu kivi ka̱ʼún xíʼin na̱ anciano ña̱ chindeétáʼanna xíʼún (Sant. 5:14, 15). Sakúaʼa xíʼin ña̱ va̱ása va̱ʼa kéʼún, ta chikaa̱ ndee̱ ña̱ kǒo keʼékaúnña. Kǒo kaka-iniún saáchi mií Jehová chindeétáʼan xíʼún chi kúndáʼviní-inira xínira yóʼó (Sal. 103:8-13).

10. ¿Ndáaña kivi kundo’oyó tá ná chitá’anyó miíyó xí’in inkana? (Gálatas 6:4).

¹⁰ Ña̱ kuni̱yó keʼéyó ku̱a̱ʼáníka ña̱ʼa. Iin ña̱ kivi kasi nu̱úyó ña̱ kusi̱í-iniyó kachíñuyó nu̱ú Jehová kúú ña̱ chitáʼanyó miíyó xíʼin inkana (kaʼvi Gálatas 6:4). Tá saá ná keʼéyó, kivi kixáʼayó keetáʼanyó xíʼin inkana á ña̱ kukúini̱-iniyó kuniyóna (Gál. 5:26). Ña̱kán, tá chítáʼanyó miíyó xíʼin inkana kivi ndakava-iniyó chi kǒo kívi keʼéyó nda̱a̱ táki̱ʼva kéʼé na̱kán. Tá ndátuyó iin ña̱ʼa soo va̱ása kama xínuña, kivi ndi̱ʼi̱ní-iniyó (Prov. 13:12). Ta saátu íyo ña̱ chitáʼanyó miíyó xíʼin inkana, chi ndátuyó ña̱ kixaa̱ ki̱vi̱ ña̱ kivi keʼéyó nda̱a̱ táki̱ʼva kéʼé na̱kán soo kǒo kuchiñuvíyó keʼéyóña, ta xa̱ʼa̱ ña̱kán ndákava-iniyó. Tá saá ná keʼéyó va̱ása kuumiíkayó ndee̱ ña̱ kachíñuyó nu̱ú Jehová ta kǒo kusi̱íka-iniyó (Prov. 24:10).

11. ¿Ndáaña chindeétáʼan xíʼinyó ña̱ kǒo chitáʼanyó miíyó xíʼin inkana?

¹¹ ¿Ndáaña chindeétáʼan xíʼún ña̱ kǒo chitáʼún miíún xíʼin inkana? Kǒo keʼún ña̱ʼa ña̱ kǒo kívi keʼún, saáchi Jehová kǒo íxandúxara xíʼún ña̱ keʼún iin chiñu ña̱ kǒo kuchiñún keʼún (2 Cor. 8:12). Kǒo kundi̱ʼi̱-iniún saáchi Jehová va̱ása chítáʼanra yóʼó xíʼin inkana (Mat. 25:20-23). Ta̱kán chíndayáʼvira chiñu ña̱ kéʼún nu̱úra: ña̱ nda̱kú íyo iniún xíʼinra, ña̱ kúndeé-iniún tá yáʼún nu̱ú tu̱ndóʼo. Tá vitá íyo iniún, saá ndakuniún ña̱ íyo sava ña̱ʼa ña̱ kivi kasi nu̱ún ña̱ kachíñún nu̱ú Jehová. Tá kúú, sana xa̱a̱ ku̱chéeún á kúúmiíún iin kue̱ʼe̱. Keʼé nda̱a̱ táki̱ʼva ke̱ʼé ta̱ Barzilái, tá káʼa̱nna xíʼún ña̱ keʼún iin chiñu ti̱xin ñuu Ndióxi̱, soo túviún ña̱ va̱ása kuchiñún keʼúnña xa̱ʼa̱ kue̱ʼe̱ ña̱ kúúmiíún va̱ʼaka kǒo keʼúnña (2 Sam. 19:35, 36). Á keʼé nda̱a̱ táki̱ʼva ke̱ʼé ta̱ Moisés, taxi ná chindeétáʼan inkana xíʼún ña̱ keʼún chiñu ña̱ kúúmiíún (Éx. 18:21, 22). Tá vitá íyo iniún kǒo chitáʼún miíún xíʼin inkana, tasaá kúú ña̱ kusi̱í-iniún keʼún chiñu ña̱ va̱ʼa keʼún.

12. ¿Á ku̱a̱chi miíyó kúúña tá va̱ása vií íyo ña̱ ndáka̱xin inkana keʼéna?

¹² Ña̱ ndakanixi̱níyó ña̱ miíyó kúúmií ku̱a̱chi xa̱ʼa̱ ña̱ va̱ása va̱ʼa ndáka̱xin inkana. Va̱ása kívi ka̱ʼa̱nyó xíʼin inkana ndáaña kivi keʼéna. Ta saátu su̱ví ndiʼi tiempo kivi kundaayóna nu̱ú tu̱ndóʼo ña̱ kivi kixi nu̱úna xa̱ʼa̱ ña̱ va̱ása va̱ʼa  ndáka̱xinna keʼéna. Na̱ íyo se̱ʼe, xóʼvi̱nína tá iin se̱ʼena sándakoona Jehová ta kéena ti̱xin ñuura. Ña̱kán, tá na̱ íyo se̱ʼe ndákanixi̱nína ña̱ ku̱a̱chi miína kúú ña̱ ke̱e se̱ʼena ti̱xin ñuu Jehová, xóʼvi̱nína. Ta nda̱a̱ táki̱ʼva íyo iin ña̱ʼa ña̱ ve̱ení saá íyo ña̱ ndísona. Soo Jehová kǒo kúni̱ra ña̱ ná ndakanixi̱níndó saá chi su̱ví ku̱a̱chi ndóʼó kúúña (Rom. 14:12).

13. ¿Ndáaña keʼún tá va̱ása vií íyo ña̱ nda̱kaxin ta̱ loʼo se̱ʼún?

¹³ Ña̱ chindeétáʼan xíʼin ta̱ íyo se̱ʼe. Ndakaʼán chi Jehová ta̱xira ña̱ ná ndaka̱xin miíyó ndáaña keʼéyó, ta saátu ña̱ ndasakáʼnuyóra á va̱ása. Ña̱ kúni̱ kuití Jehová kúú ña̱ chika̱ún ndee̱ ña̱ viíní sanáʼún se̱ʼún. Ña̱kán, tá se̱ʼún kǒo xíínkara ndasakáʼnura Jehová ku̱a̱chi miíra kúúña, su̱ví ku̱a̱chi yóʼó (Prov. 20:11). Ta sana ndákaniníxi̱níún ña̱ va̱ása vií nísanáʼún ta̱ loʼo se̱ʼún ña̱kán ke̱ʼéra ña̱ va̱ása va̱ʼa. Soo, ka̱ʼa̱n xíʼin Jehová ndáaña ndóʼún ta ná ixakáʼnu-inira xa̱ʼún. Ta̱kán kúnda̱a̱-inira ña̱ va̱ása kivika nasamaún ña̱ ku̱u. Ta saátu Jehová kǒo kúni̱ra ña̱ ndiʼi tiempo chindeétáʼún xíʼin se̱ʼún tá ni̱ki̱ʼvira nu̱ú iin tu̱ndóʼo xa̱ʼa̱ ña̱ va̱ása va̱ʼa ña̱ nda̱kaxinra. Soo ndakaʼán, Jehová kusi̱íníva-inira tá ná ndandikó-ini se̱ʼún xa̱ʼa̱ ña̱ va̱ása va̱ʼa ke̱ʼéra ta ixakáʼnu-inira xa̱ʼa̱ra (Luc. 15:18-20).

14. ¿Nda̱chun kǒo xíniñúʼu ndakaniníxi̱níyó xa̱ʼa̱ ku̱a̱chi ña̱ ni̱ki̱ʼviyó?

¹⁴ Ña̱ ndakaniníxi̱níyó xa̱ʼa̱ ña̱ va̱ása va̱ʼa ke̱ʼéyó. Tá ku̱a̱kiʼviyó iin ku̱a̱chi ndeé nu̱ú Jehová, va̱ása va̱ʼa kúniyó. Soo Jehová kǒo kúni̱ra ña̱ ndiʼi tiempo ná ndakanixi̱níyó xa̱ʼa̱ ña̱yóʼo. Saáchi nda̱a̱ táki̱ʼva íyo ña̱ ve̱ení ña̱ ndísoyó saá íyoña ta xíniñúʼu sandákooyóña. Ña̱kán, ¿ndáaña kivi keʼéyó tá ndákaniníxi̱níyó xa̱ʼa̱ ku̱a̱chi ña̱ ni̱ki̱ʼviyó? Tá xa̱a̱ ni̱na̱ʼma̱yó xa̱ʼa̱ ña̱ ke̱ʼéyó, nda̱ndikó-iniyó ta kǒo kéʼékayóña, saá kivi kandíxayó ña̱ xa̱a̱ i̱xakáʼnu-ini Jehová xa̱ʼa̱yó (Hech. 3:19). Tá xa̱a̱ ke̱ʼéyó ña̱yóʼo, Jehová kúni̱ra ña̱ ná nandósoyó xa̱ʼa̱ ku̱a̱chi ña̱ ni̱ki̱ʼviyó. Saáchi kúnda̱a̱-inira ña̱ tá ná ndakanika̱xi̱níyó xa̱ʼa̱ ña̱yóʼo kusuchíní-iniyó ta xo̱ʼvi̱níyó xíʼinña (Sal. 31:10). Tá ná ndakaʼánníyó xa̱ʼa̱ ku̱a̱chi ña̱ ni̱ki̱ʼviyó  kivi ndakavaní-iniyó ta kǒo kusi̱íka-iniyó kachíñuyó nu̱ú Jehová (2 Cor. 2:7).

15. ¿Ndáaña kivi chindeétáʼan xíʼún tá ndákaniníxi̱níún xa̱ʼa̱ ña̱ va̱ása va̱ʼa ke̱ʼún? (1 Juan 3:19, 20; koto na̱ʼná).

¹⁵ ¿Ndáaña chindeétáʼan xíʼún ña̱ kǒo ndakaniníxi̱níún xa̱ʼa̱ ña̱ va̱ása va̱ʼa ke̱ʼún? Tá ndákaniníxi̱níún xa̱ʼa̱ ku̱a̱chi ña̱ ni̱ki̱ʼviún ndákaʼán chi Jehová xa̱a̱ i̱xakáʼnu-inira xa̱ʼún (Sal. 130:4). Tá iinna ndixaní nda̱ndikó-inina xa̱ʼa̱ ku̱a̱chi ña̱ ni̱ki̱ʼvina ña̱yóʼo káʼa̱n Jehová xíʼinna: “Kǒo ndakaʼánkai̱ xa̱ʼa̱ ku̱a̱chi ña̱ ni̱ki̱ʼvindó” (Jer. 31:34). Ña̱yóʼo kúni̱ kachiña ña̱ tá íxakáʼnu-ini Jehová xa̱ʼa̱ iin na̱ ni̱ki̱ʼvi ku̱a̱chi, kǒo ndíkokara káʼa̱nra xa̱ʼa̱ ña̱yóʼo xíʼinna. Kixiva tu̱ndóʼo nu̱úna xa̱ʼa̱ ña̱ va̱ása va̱ʼa nda̱kaxinna, soo ña̱yóʼo kǒo kúni̱ kachiña ña̱ va̱ása ní ixakaʼnu-ini Jehová xa̱ʼa̱na. Ta kǒo ndakava-iniún tá va̱ása kéʼékaún chiñu ti̱xin congregación. Saáchi Jehová xa̱a̱ na̱ndósova-inira xa̱ʼa̱ ku̱a̱chi ña̱ ni̱ki̱ʼviún. Saátu kivi keʼé miívaún, kivi nandóso-iniún xa̱ʼa̱ ña̱ va̱ása va̱ʼa ke̱ʼún (kaʼvi 1 Juan 3:19, 20).

16. ¿Ndáaña xíniñúʼu ndakaʼányó?

¹⁶ Ña̱ va̱ʼa ni̱ʼíyó ña̱ kutakuyó ndiʼi saá tiempo, ná kundiku̱nyó consejo ña̱ va̱xi nu̱ú 1 Corintios 9:24 ña̱ káchi: “Kunundó ña̱ va̱ʼa ndakiʼinndóña”. Iin ña̱ kivi chindeétáʼan xíʼinyó ña̱ kǒo sandákooyó ña̱ kachíñuyó nu̱ú Jehová kúú ña̱ ndakaʼányó ndáa ña̱ʼa kúú ña̱ xíniñúʼu kundi̱ʼi̱-iniyó xa̱ʼa̱ ta ndáaña va̱ása. Nu̱ú artículo yóʼo sa̱kúaʼayó xa̱ʼa̱ sava na̱ xíniñúʼu kundiku̱nyó yichi̱, soo íyokava na̱ kivi sakúaʼayó xa̱ʼa̱. Ta̱ Jesús ni̱ka̱ʼa̱nra ña̱ ná kiʼinníyó kuenta chi kivi kixáʼayó kundi̱ʼi̱ní-iniyó xa̱ʼa̱ ña̱ kuxuyó xíʼin ña̱ koʼoyó saátu ña̱ kundi̱ʼi̱ní-iniyó xa̱ʼa̱ ña̱ʼa ña̱ xíniñúʼuyó (Luc. 21:34, nota). Texto ña̱ xa̱a̱ ni̱ka̱ʼa̱nyó xa̱ʼa̱ yóʼo xíʼin inkaka texto ña̱ va̱xi nu̱ú Biblia kivi chindeétáʼanña xíʼinyó ña̱ nasamayó sava ña̱ kéʼéyó tasaá chika̱a̱kayó ndee̱ ña̱ kachíñuyó nu̱ú Jehová.

17. ¿Nda̱chun kándíxayó ña̱ kivi ni̱ʼíyó ña̱ kutakuyó?

¹⁷ Kándixavayó ña̱ ni̱ʼíyó ña̱ kutakuyó ndiʼi saá tiempo saáchi mií Jehová kúú ta̱ chindeétáʼan xíʼinyó (Is. 40:29-31). Ña̱kán, kǒo sándakoún ña̱ kachíñún nu̱ú Ndióxi̱. Keʼé nda̱a̱ táki̱ʼva ke̱ʼé ta̱ apóstol Pablo chi ta̱yóʼo chi̱kaa̱níra ndee̱ ña̱ sa̱xínura chiñu ña̱ ta̱xi Jehová ndaʼa̱ra (Filip. 3:13, 14). Miíún kúú na̱ xíniñúʼu chika̱a̱ní ndee̱ ña̱ kéʼún chiñu nu̱ú Jehová ta su̱ví inkana. Ta ndakaʼán chi íyo Jehová ña̱ chindeétáʼanra xíʼún ña̱ keʼún ña̱yóʼo. Ta saátu chindeétáʼanra xíʼún ña̱ sandákoún sava ña̱ʼa ña̱ sási nu̱ún ña̱ kachíñún nu̱úra (Sal. 68:19). Mií Jehová kúú ta̱ taxi ndee̱ ndaʼún ña̱ kuchiñún sándiʼún carrera ña̱ xínún ku̱a̱ʼún.