Nu̱ú artículo kán sa̱kuaʼayó ña̱ íyo iin ña̱ xíniñúʼu kundayáʼví nu̱ú ndiʼi miíyó na̱ yiví xíʼin na̱ ángel: ña̱yóʼo kúú ña̱ nduyi̱i̱ ki̱vi̱ Jehová. Ta ña̱ va̱ʼa nduyi̱i̱ ki̱vi̱ra xíniñúʼu kunda̱a̱-iniyó ña̱ iinlá miíra kúú ta̱ xíniñúʼu káʼndachíñu. Ta íyo inkaña kítáʼan xíʼin ña̱yóʼo, ña̱ iin tá iin na̱ yiví xíniñúʼu nda̱kú koo inina xíʼin Jehová ta ndasayi̱i̱na ki̱vi̱ra.

Nu̱ú artículo kán ni̱ka̱ʼa̱nña ña̱ ndáyáʼviníka kúú ki̱vi̱ Jehová xíʼin ña̱ nduyi̱i̱ña, ¿nda̱chun? Ná ka̱ʼa̱nyó xa̱ʼa̱ u̱ni̱ ña̱ chindeétáʼan xíʼinyó kunda̱a̱-iniyó xa̱ʼa̱ ña̱yóʼo.

Ña̱ nu̱ú, ta̱ Ndi̱va̱ʼa ni̱ka̱ʼa̱nra ña̱ vatá xa̱ʼa̱ ki̱vi̱ Jehová chí jardín ña̱ Edén. Ke̱ʼéra ña̱yóʼo saáchi xi̱kuni̱ra ná ka̱ʼa̱nna ña̱ va̱ása va̱ʼa xa̱ʼa̱ Jehová. Xíʼin ña̱ ni̱ndaka̱tu̱ʼún ta̱ Ndi̱va̱ʼa ñá Eva xí̱kuni̱ra ná ndakanixi̱níñá ña̱ va̱ása va̱ʼa ini Ndióxi̱ ta síʼndaníra chi kǒo xíínra taxira ña̱ keʼéna ndiʼi ña̱ kúni̱ miína, saátu ni̱ka̱ʼa̱nra xíʼinñá ña̱ ta̱ vatá kúú Ndióxi̱ ta su̱ví ña̱ nda̱a̱ káʼa̱nra. Tá ni̱ka̱ʼa̱nra ña̱yóʼo xíʼinñá saá kúú ña̱ i̱xayaku̱a̱ra ki̱vi̱ Jehová, tasaá kúú ña̱ ni̱xa̱a̱ra ndu̱ura “Diablo” ña̱ kúni̱ kachi ta̱ vatá á ta̱ to̱ʼón (Juan 8:44). Ñá Eva xi̱niso̱ʼoñá ña̱ ni̱ka̱ʼa̱n ta̱ Ndi̱va̱ʼa ta kǒo níkandíxañá ña̱ ni̱ka̱ʼa̱n Ndióxi̱ tasaá ni̱na̱ʼa̱ñá ña̱ va̱ása kúni̱ñá ná kaʼndachíñura (Gén. 3:1-6). Saátu tiempo vitin, ta̱ Ndi̱va̱ʼa íxayaku̱a̱kara ki̱vi̱ Ndióxi̱ saáchi káʼa̱nra ña̱ vatá xa̱ʼa̱ra, ta ña̱ kúni̱ra kúú ña̱ ná ka̱ʼa̱nkana ña̱ vatá xa̱ʼa̱ra. Na̱ yiví na̱ kándíxa ña̱ káʼa̱n ta̱ Ndi̱va̱ʼa kǒo xíínna kuniso̱ʼona ña̱ káʼa̱n Ndióxi̱, ta ku̱a̱ʼání ña̱ vatá káʼa̱nna xa̱ʼa̱ra ta íxayaku̱a̱na ki̱vi̱ra. Soo nu̱ú miíyó na̱ ndásakáʼnu Ndióxi̱ iin ku̱a̱chi káʼnuní kúú ña̱yóʼo, ta xa̱ʼa̱ ña̱ ku̱a̱ʼání ña̱ vatá káʼa̱nna xa̱ʼa̱ Ndióxi̱ xóʼvi̱níyó, ta íyoní ña̱ va̱ása va̱ʼa nu̱ú ñuʼú yóʼo.

Ña̱ u̱vi̱, xa̱ʼa̱ ña̱ kúni̱ Ndióxi̱ ná koo va̱ʼa ndiʼi na̱ i̱xava̱ʼara, chi̱kaa̱-inira ña̱ ndaya̱kúnra ki̱vi̱ra ta ndasayi̱i̱raña. Ta ña̱yóʼo kúú iin ña̱ ndáyáʼviníka nu̱úra. Ña̱kán káʼa̱nra ña̱yóʼo: “Mií ña̱ nda̱a̱ ndasayi̱i̱ ki̱víi̱” (Ezeq. 36:23). Nu̱ú oración ña̱ sa̱náʼa̱ ta̱ Jesús miíyó ni̱ka̱ʼa̱nra ña̱yóʼo: “Ná nduyi̱i̱ ki̱vi̱ún”. Nu̱ú oración yóʼo ni̱ka̱ʼa̱nra ndáaña kúú iin ña̱ ndáyáʼviníka ka̱ʼa̱nyó xa̱ʼa̱ tá xa̱a̱ káʼa̱nyó xíʼin Jehová (Mat. 6:9). Ndiʼi tiempo káʼa̱n Biblia xíʼinyó ña̱ ndáyáʼviní ndasayi̱i̱yó ki̱vi̱ Jehová. Ná ka̱ʼa̱nyó xa̱ʼa̱ sava ña̱yóʼo: “Ndasakáʼnundó ki̱vi̱ Jehová chi ña̱yóʼo kúú ña̱ xíniñúʼu ndukáʼnu” (1 Crón. 16:29; Sal. 96:8). “Katandó yaa nu̱úra ña̱ va̱ʼa ná ndukáʼnu ki̱vi̱ra” (Sal. 66:2). “Ndasakáʼnui̱ ki̱vi̱ún ndiʼi tiempo” (Sal. 86:12). Iin yichi̱, tá ndíkaa̱ ta̱ Jesús ini templo ñuu Jerusalén ni̱ka̱ʼa̱nra ña̱yóʼo xíʼin yivára: “Ndasakáʼnu ki̱vi̱ún”. Tasaá nda̱a̱ chí ndiví nda̱kuiin Jehová yuʼúra ta ka̱chira: “Xa̱a̱ nda̱sakáʼnui̱ña ta tuku ndasakáʼnui̱ña” (Juan 12:28). a

Ña̱ u̱ni̱, ndíʼi ña̱ kúni̱ Jehová keʼéra kéʼéraña xa̱ʼa̱ ki̱vi̱ra, chi kúni̱ra ña̱ yi̱i̱ ná kooña ndiʼi tiempo. Ná ndakanixi̱níyó xa̱ʼa̱ ña̱yóʼo, tá xa̱a̱ ná ya̱ʼa mil ku̱i̱ya̱ ña̱ kaʼndachíñu ta̱ Jesús ta saátu tá xa̱a̱ ná ya̱ʼa prueba ña̱ so̱ndíʼi, ¿ndáaña kuu xíʼin ki̱vi̱ Ndióxi̱? ¿Ndáaña ndakanixi̱ní na̱ yiví ta saátu  na̱ ángel xa̱ʼa̱ ña̱ ndáyáʼviní nduyi̱i̱ ki̱vi̱ Jehová? Ña̱ va̱ʼa kunda̱a̱-iniyó xa̱ʼa̱ ña̱yóʼo ná ka̱ʼa̱nyó xa̱ʼa̱ u̱vi̱ ña̱ xa̱a̱ ni̱ka̱ʼa̱nyó xa̱ʼa̱: ña̱ nda̱kú koo ini na̱ yiví xíʼin Ndióxi̱ ta saátu ña̱ xáʼndachíñura. Tá xa̱a̱ ná ya̱ʼa prueba ña̱ so̱ndíʼi, na̱ yiví na̱ʼa̱na ña̱ iinlá mií Jehová nda̱kú íyo inina xíʼin. ¿Nda̱chun? Saáchi va̱ása kuumiíkana ku̱a̱chi. Ta saátu xa̱a̱ ku̱chiñuna ni̱ya̱ʼana nu̱ú prueba ña̱ so̱ndíʼi, tasaá kivi kutakuna ndiʼi tiempo. Ta, ¿ndáaña kivi ka̱ʼa̱nyó xa̱ʼa̱ ña̱ xáʼndachíñu Jehová? Va̱ása kakaka-ini na̱ yiví xa̱ʼa̱ ña̱yóʼo, ¿nda̱chun? Saáchi xa̱a̱ kunda̱a̱ káxi-inina ña̱ iinlá Jehová kúú ta̱ kúúmií derecho ña̱ kaʼndachíñura ta iinlá ta̱yóʼo kúú ta̱ va̱ʼaníka xáʼndachíñu. Ndiʼi na̱ yiví xíʼin na̱ ángel taxina ña̱ kaʼndachíñura nu̱úna. Soo, ¿ndáaña kuu xíʼin ki̱vi̱ Jehová?

Tiempo saá xa̱a̱ ndu̱yi̱i̱vaña ta kǒo ni inka ña̱ vatá ka̱ʼa̱nna xa̱ʼa̱ra. Ta ki̱vi̱ Jehová kúú ña̱ kundayáʼviníka nu̱ú miíyó na̱ ndásakáʼnu Ndióxi̱ na̱ kundoo nu̱ú ñuʼú yóʼo ta saátu nu̱ú na̱ íyo chí ndiví, ¿nda̱chun? Saáchi ku̱a̱ʼání ña̱ va̱ʼa keʼé Jehová xa̱ʼa̱ na̱ ñuura. Ta̱ Jesús vitání koo inira ta ndataxira ña̱ xáʼndachíñura ndaʼa̱ yivára. “Tasaá kúú ña̱ ndakiʼin Ndióxi̱ kaʼndachíñura nu̱ú ndiʼi ña̱ʼa” (1 Cor. 15:28). Tándi̱ʼi kuu ña̱yóʼo, na̱ kundoo nu̱ú ñuʼú yóʼo kusi̱íní-inina chi sa̱ñána ndaʼa̱ tu̱ndóʼo ta xa̱a̱na koona nda̱a̱ táki̱ʼva íyo na̱ se̱ʼe Ndióxi̱ (Rom. 8:21). Tasaá kúú ña̱ saxínu Ndióxi̱ ña̱ xi̱kuni̱ra tá xa̱ʼa̱, ña̱ iin kuití xa̱a̱ na̱ se̱ʼera nduuna, na̱ íyo nu̱ú ñuʼú yóʼo xíʼin na̱ íyo chí ndiví (Efes. 1:10).

¿Ndáa ki̱ʼva kuni ndiʼi na̱ se̱ʼe Jehová tá ná kuu ndiʼi ña̱yóʼo? Ndiʼi na̱ íyo chí ndiví xíʼin na̱ íyo nu̱ú ñuʼú yóʼo kúni̱nína ndasakáʼnuna ki̱vi̱ Jehová. Ta̱ David ni̱ka̱ʼa̱nra ña̱yóʼo: “Ná ndukáʼnu Jehová Ndióxi̱, ndiʼi tiempo ná ndukáʼnu ki̱vi̱ra” (Sal. 72:18, 19). Xa̱ʼa̱ ña̱ ku̱a̱ʼání tiempo kundooyó nu̱ú ñuʼú yóʼo, ku̱a̱ʼání ña̱ʼa kunda̱a̱-iniyó xa̱ʼa̱ ta ña̱yóʼo chindeétáʼan xíʼinyó ña̱ ndasakáʼnuyó ki̱vi̱ Jehová.

Tá xa̱a̱ káʼa̱nyó xa̱ʼa̱ ki̱vi̱ Jehová ndákaʼányó xa̱ʼa̱ ndiʼi ña̱ va̱ʼa ña̱ kúúmiíra. Xa̱ʼa̱ ña̱kán tá ndákanixi̱níyó xa̱ʼa̱ ki̱vi̱ra ndákaʼányó xa̱ʼa̱ ña̱ kúʼvi̱ní-inira xínira miíyó (1 Juan 4:8). Ndiʼi tiempo ná ndakaʼányó ña̱ xa̱ʼa̱ ña̱ va̱ʼaní-ini Jehová kúú ña̱ i̱xava̱ʼara miíyó ta kúʼvi̱ní-inira xínira miíyó. Ta̱xira se̱ʼera ni̱xi̱ʼi̱ra xa̱ʼa̱yó xa̱ʼa̱ ña̱ kúʼvi̱ní-inira xínira miíyó. Ta xa̱ʼa̱ ña̱ kúʼvi̱ní-inira xínira miíyó kúú ña̱ nda̱kúní xáʼndachíñura. Ta kuniyó ña̱ ku̱a̱ʼání bendición taxira ndaʼa̱yó. Ndiʼi tiempo koo ña̱ʼa ña̱ sakúyatin miíyó nu̱ú Jehová ta katayó yaa nu̱úra ña̱ va̱ʼa ndukáʼnu ki̱vi̱ra (Sal. 73:28).