ARTÍCULO ÑA KAʼVIYÓ 32
YAA 44 Chindeé yi̱ʼi̱ nu̱ú tu̱ndóʼo
Jehová kúni̱ra ña̱ ndiʼina ná ndikó-ini
“Jehová […] kǒo kúni̱ra ña̱ ndiʼi-xa̱ʼa̱ nda̱a̱ ni iin ndóʼó, chi ña̱ kúni̱ra kúú ña̱ ná ndikó-ini ndiʼindó” (2 PED. 3:9).
TEMA
Nu̱ú artículo yóʼo kunda̱a̱-iniyó ndáaña kéʼé iin na̱ yiví na̱ ndixa ndíko-ini xa̱ʼa̱ ku̱a̱chi ña̱ ni̱ki̱ʼvina, ta nda̱chun xíniñúʼu ndikó-iniyó ta saátu kotoyó ndáa ki̱ʼva chíndeétáʼan Jehová xíʼinyó keʼéyó ña̱yóʼo.
1. ¿Ndáaña kéʼé na̱ yiví na̱ ndíkó-ini?
TÁ KÉʼÉYÓ iin ña̱ʼa ña̱ va̱ása va̱ʼa, ndáyáʼviní ndikó-iniyó. Biblia káchiña ña̱ tá iin na̱ yiví ndíkó-inina xa̱ʼa̱ ña̱ va̱ása va̱ʼa ke̱ʼéna, kíxáʼana kúndasína xínina ña̱ va̱ása va̱ʼa ke̱ʼéna, va̱ása kéʼékanaña ta kǒo ndákanikaxi̱nína xa̱ʼa̱ ña̱yóʼo (koto nu̱ú káʼa̱nña “ña̱ ndikó-iniyó” ña̱ va̱xi nu̱ú Glosario).
2. ¿Nda̱chun xíniñúʼu sakúaʼa ndiʼiyó ndáaña kúni̱ kachi ña̱ ndikó-iniyó? (Nehemías 8:9-11).
2 Ndiʼiyó xíniñúʼu sakúaʼayó ndáaña kúni̱ kachi ña̱ ndikó-iniyó saáchi ndiʼi ki̱vi̱ ku̱a̱kiʼviyó ku̱a̱chi. Xa̱ʼa̱ ña̱ kúúyó se̱ʼe ta̱ Adán xíʼin ñá Eva, kíʼviyó ku̱a̱chi ta xíʼi̱yó (Rom. 3:23; 5:12). Ndiʼiyó kúúmiíyó ku̱a̱chi, ña̱kán xíniñúʼu ndikó-iniyó. Nda̱a̱ ta̱ apóstol Pablo ta̱ va̱ʼaní xi̱kandíxa Ndióxi̱, chi̱kaa̱níra ndee̱ ña̱ va̱ása ki̱ʼvira ku̱a̱chi (Rom. 7:21-24). Soo ña̱yóʼo va̱ása kúni̱ kachiña ña̱ ndiʼi tiempo ndakanixi̱níyó xa̱ʼa̱ ku̱a̱chi ña̱ ni̱ki̱ʼviyó ta ndakava-iniyó. Jehová íxakáʼnu-inira xa̱ʼa̱yó ta kúni̱ra ña̱ si̱íní ná kooyó. Ná ndakanixi̱níyó xa̱ʼa̱ ña̱ ndo̱ʼo na̱ judío na̱ xi̱ndoo tá tiempo ña̱ ni̱xi̱yo ta̱ Nehemías (kaʼvi Nehemías 8:9-11). a Jehová va̱ása níxi̱kuni̱ra ña̱ kusuchíní-inina xa̱ʼa̱ ku̱a̱chi ña̱ ni̱ki̱ʼvina chi ña̱ xi̱kuni̱ra kúú ña̱ kusi̱í-inina kachíñuna nu̱úra. Saátu vitin kúnda̱a̱-inira ña̱ kusi̱í-iniyó tá ná ndikó-iniyó xa̱ʼa̱ ku̱a̱chiyó, xa̱ʼa̱ ña̱kán sánáʼa̱ra miíyó ndáaña kúni̱ kachi ña̱ ndikó-iniyó. Ña̱kán kǒo xíka-iniyó ña̱ kúndáʼviní-ini Jehová xínira miíyó ta ixakáʼnu-inira xa̱ʼa̱ ku̱a̱chiyó tá ná ndikó-iniyó.
3. ¿Ndáaña sakúaʼayó nu̱ú artículo yóʼo?
3 Nu̱ú artículo yóʼo sakúaʼayó ndáaña kúni̱ kachi ña̱ ndikó-iniyó. Siʼna sakúaʼayó ndáaña ni̱ka̱ʼa̱n Jehová xíʼin na̱ ñuu Israel xa̱ʼa̱ ña̱ ndikó-inina. Tándi̱ʼi, sakúaʼayó ndáa ki̱ʼva chi̱ndeétáʼan Jehová xíʼin na̱ yiví ña̱ va̱ʼa ndikó-inina. Ta saátu sakúaʼayó ndáaña sa̱náʼa̱ ta̱ Jesús na̱ discípulora xa̱ʼa̱ ña̱ ndikó-inina.
ÑA̱ NI̱KA̱ʼA̱N JEHOVÁ XÍʼIN NA̱ ÑUU ISRAEL XA̱ʼA̱ ÑA̱ NDIKÓ-ININA
4. ¿Ndáaña sa̱náʼa̱ Jehová na̱ ñuu Israel xa̱ʼa̱ ña̱ ndikó-inina?
4 Tá ni̱xa̱a̱ na̱ ñuu Israel ndu̱una na̱ ñuu Jehová ke̱ʼéra iin trato xíʼinna. Jehová ni̱ka̱ʼa̱nra ña̱ kundaarana ta taxira ña̱ va̱ʼa ndaʼa̱na tá ná kundiku̱nna ley ña̱ ta̱xira ta ka̱chira: “Chiñu ña̱ xáʼndai̱ nu̱úndó vitin va̱ása yo̱ʼvi̱ kunda̱a̱-inindó xíʼinña, ta ni va̱ása ixayo̱ʼvi̱ña xíʼinndó keʼéndóña” (Deut. 30:11, 16). Soo tá ná ixaso̱ʼona nu̱úra, tá kúú tá ná ndasakáʼnuna inka ndióxi̱ va̱ása kusi̱íka-inira xíʼinna ta kixi ku̱a̱ʼá tu̱ndóʼo nu̱úna soo ña̱yóʼo va̱ása kúni̱ kachiña ña̱ sa̱ndákoondaʼa̱ Jehová na̱yóʼo saáchi ley xi̱kaʼa̱nña ña̱ kiviva ndikóna nu̱ú Jehová ta kuniso̱ʼona ña̱ káʼa̱nra (Deut. 30:1-3, 17-20). Ña̱kán kiviva ndikó-inina. Tasaá kivi kuyatin Jehová nu̱úna ta taxira ku̱a̱ʼá ña̱ va̱ʼa ndaʼa̱na.
5. ¿Ndáa ki̱ʼva chi̱ndeétáʼan Jehová xíʼin na̱ ñuura ña̱ va̱ʼa ndikó tukuna nu̱úra? (2 Reyes 17:13, 14).
5 Ku̱a̱ʼání yichi̱ i̱xaso̱ʼo na̱ ñuu Israel nu̱ú Jehová. Nda̱sakáʼnuna inka ndióxi̱ ta ke̱ʼéna inka ña̱ʼa ña̱ kininí ta xa̱ʼa̱ ña̱yóʼo ki̱xi ku̱a̱ʼání tu̱ndóʼo nu̱úna. Soo chi̱ndeétáʼan Jehová xíʼinna ña̱ ndikó tukuna kachíñuna nu̱úra, saáchi chi̱ndaʼára ku̱a̱ʼání na̱ profeta ña̱ va̱ʼa ka̱ʼa̱nna xíʼinna ña̱ ndikó-inina ta ndikó tukuna nu̱úra (kaʼvi 2 Reyes 17:13, 14). b
6. ¿Ndáa ki̱ʼva xi̱niñúʼu Jehová na̱ profeta ña̱ sanáʼa̱na na̱ ñuura ña̱ ndáyáʼviní ndikó-inina? (Koto na̱ʼná).
6 Jehová xi̱chindaʼára na̱ profetara nu̱ú na̱ ñuura ña̱ ka̱ʼa̱nna xíʼinna ndáaña kundoʼona tá va̱ása násamana ña̱ kéʼéna ta saátu ña̱ taxina consejo ndaʼa̱na. Tá kúú, xi̱niñúʼura ta̱ Jeremías ña̱ ka̱ʼa̱nra tu̱ʼun yóʼo: “Ndóʼó na̱ ñuu Israel na̱ kǒo xíín kuniso̱ʼo, ndikóndó nu̱úi̱ […]. Va̱ása sa̱íi̱ xíʼinndó saáchi nda̱kúva íyo inii̱ […]. Su̱ví ndiʼi tiempoví sa̱íi̱ xíʼinndó. Ndakuni kuitíún ña̱ kúúmiíún ku̱a̱chi saáchi ni̱xa̱ún íyoún contra Jehová” (Jer. 3:12, 13). Saátu xi̱niñúʼu Jehová ta̱ profeta Joel ña̱ ka̱ʼa̱nra ña̱yóʼo: “Ndikóndó nu̱úi̱ xíʼin ndiʼi níma̱ndó” (Joel 2:12, 13). Ta saátu xi̱niñúʼura ta̱ Isaías ña̱ va̱ʼa ka̱ʼa̱nra ña̱yóʼo: “Ndasandiindó miíndó; kǒo kúni̱i̱ kotokai̱ ña̱ va̱ása va̱ʼa kéʼéndó; sandákoondó keʼéndó ña̱ va̱ása va̱ʼa” (Is. 1:16-19). Saátu ni̱ka̱ʼa̱n Jehová xíʼin ta̱ Ezequiel ná ka̱ʼa̱nra ña̱yóʼo: “Va̱ása kúsi̱íví-inii̱ tá xíʼi̱ iin na̱ ndi̱va̱ʼa-ini […], ña̱ kúnii̱ kúú ña̱ ná sandákoona keʼéna ña̱ va̱ása va̱ʼa ta ná kutakuna”. “Va̱ása kúsi̱í-inii̱ tá xíʼi̱ iin na̱ yiví […]. Ña̱kán, ndikóndó nu̱úi̱ ta kutakundó” (Ezeq. 18:23, 32). Kúsi̱í-ini Jehová tá ndíkó-ini iin na̱ yiví xa̱ʼa̱ ku̱a̱china chi kúni̱ra ná kutakuna ndiʼi tiempo. Soo Jehová va̱ása ndátuvíra nda̱a̱ ná ndikó-ini iin na̱ yiví tasaá chindeétáʼanra xíʼinna. Ná kotoyó sava ejemplo.
Ku̱a̱ʼání na̱ profeta xi̱niñúʼu Jehová ña̱ chindeétáʼanra xíʼin na̱ ñuura ña̱ ndandikó-inina. (Koto párrafo 6 xíʼin 7).
7. ¿Ndáaña sa̱náʼa̱ Jehová na̱ ñuura xíʼin ejemplo ta̱ Oseas xíʼin ñá síʼira?
7 Ná kotoyó ndáa ki̱ʼva xi̱niñúʼu Jehová ña̱ ndo̱ʼo ta̱ profeta Oseas xíʼin ñá síʼira ñá Gómer ña̱ sanáʼa̱ra na̱ ñuura. Ñáyóʼo ni̱ki̱si̱ñá xíʼin inka ta̱a ta tá ni̱ya̱ʼa tiempo sa̱ndákooñá ta̱ Oseas xa̱ʼa̱ inka ta̱a. ¿Á nda̱kanixi̱ní Jehová ña̱ va̱ása kivika ndikó-ini ñáyóʼo? Jehová kúnda̱a̱-inira ndáaña ndíkaa̱ níma̱yó ña̱kán ni̱ka̱ʼa̱nra ña̱yóʼo xíʼin ta̱ Oseas: “Kúáʼan ta nandukú tukún ñaʼá ñá kúni̱ ku̱a̱ʼání na̱ ta̱a xínina ta kíʼviñá ku̱a̱chi xíʼin ta̱a ta̱ va̱ása kúú yii̱ñá, ta tuku kuʼvi̱-iniún kuniúnñá nda̱a̱ táki̱ʼva kúʼvi̱-ini Jehová xínira na̱ ñuu Israel ni ndákundeéna ndásakáʼnuna inka ndióxi̱” (Os. 3:1; Prov. 16:2). Ñá Gómer xi̱kiʼvikavañá ku̱a̱chi kini. Soo Jehová ni̱ka̱ʼa̱nra xíʼin ta̱ Oseas ná ixakáʼnu-inira xa̱ʼa̱ñá ta ná ndakiʼin tukurañá. c Xíʼin ejemplo yóʼo sa̱náʼa̱ Jehová na̱ ñuura ña̱ xi̱kuni̱ra ná ndikó-inina ni ndeéní ku̱a̱chi xi̱kiʼvina. Xi̱kuʼvi̱kava-inira xi̱xinirana ta xi̱chindaʼára na̱ profeta ña̱ chindeétáʼanna xíʼinna ña̱ ndikó-inina ta nasamana ña̱ kéʼéna. Ña̱kán kúnda̱a̱va-ini Jehová ndáaña ndíkaa̱ níma̱ na̱ yiví ta kivi chindeétáʼanra xíʼinna ña̱ ndikó-inina tá kíʼvikana ku̱a̱chi (Prov. 17:3). Ná kotoyó ndáa ki̱ʼva kéʼé Jehová ña̱yóʼo.
NDÁA KI̱ʼVA CHÍNDEÉTÁʼAN JEHOVÁ XÍʼIN NA̱ NI̱KI̱ʼVI KU̱A̱CHI ÑA̱ NDIKÓ-ININA
8. ¿Ndáaña ke̱ʼé Jehová ña̱ va̱ʼa chindeétáʼanra xíʼin ta̱ Caín ña̱ ndikó-inira? (Génesis 4:3-7; koto na̱ʼná).
8 Ta̱ Caín xi̱kuu se̱ʼenu̱ú ta̱ Adán xíʼin ñá Eva. Ta xa̱ʼa̱ ña̱ ndu̱u ta̱yóʼo ta̱ yiví ku̱a̱chi, Biblia káchiña ña̱ “xi̱keʼéra ña̱ va̱ása va̱ʼa” (1 Juan 3:12). Ta xa̱ʼa̱ ña̱kán tá ni̱so̱kóra iin ña̱ʼa nu̱ú Jehová “kǒo níkindo̱o-inira xíʼin ta̱ Caín ni ña̱ ni̱so̱kóra nu̱úra”. Ta nu̱úka ña̱ nasamara ña̱ xi̱keʼéra “ni̱sa̱a̱níra ta nda̱kava-inira”. Xa̱ʼa̱ ña̱kán ni̱ka̱ʼa̱n Jehová xíʼinra (kaʼvi Génesis 4:3-7). Viíní ni̱ka̱ʼa̱n Jehová xíʼinra ta ni̱ka̱ʼa̱nra xíʼinra ña̱ taxira ña̱ va̱ʼa ndaʼa̱ra tá ná keʼéra ña̱ va̱ʼa, ta saátu ni̱ka̱ʼa̱nra xíʼinra ña̱ xo̱ʼvi̱ra tá kǒo násamara ña̱ kéʼéra. Ta̱ Caín va̱ása níxiniso̱ʼora ña̱ ni̱ka̱ʼa̱n Jehová ta va̱ása nítaxira ña̱ chindeétáʼanra xíʼinra ña̱ ndikó-inira. ¿Ndáaña ke̱ʼé Jehová tá va̱ása níxiin ta̱ Caín nasa̱mara? ¿Á nda̱kanixi̱ní Jehová ña̱ va̱ása chindeétáʼankara xíʼin nda̱a̱ ni iin na̱ yiví ña̱ ndikó-inina? Va̱ásaví.
Viíní ni̱ka̱ʼa̱n Jehová xíʼin ta̱ Caín. Ni̱ka̱ʼa̱nra xíʼinra ña̱ taxira ña̱ va̱ʼa ndaʼa̱ra tá ná keʼéra ña̱ va̱ʼa, ta saátu ni̱ka̱ʼa̱nra xíʼinra ña̱ xo̱ʼvi̱ra tá kǒo násamara ña̱ kéʼéra. (Koto párrafo 8).
9. ¿Ndáa ki̱ʼva chi̱ndeétáʼan Jehová xíʼin ta̱ David ña̱ ndikó-inira?
9 Jehová xi̱kuʼvi̱ní-inira xi̱xinira ta̱ rey David. Ni̱ka̱ʼa̱nra ña̱yóʼo xa̱ʼa̱ra: “Iin ta̱a ta̱ sákusi̱íní-inii̱ kúúra” (Hech. 13:22). Soo ta̱ David ni̱ki̱ʼvira ku̱a̱chi ña̱ ndeéní, ni̱ki̱si̱ra xíʼin ñá síʼi inka ta̱a ta xa̱ʼníra yii̱ ñáyóʼo, ta xi̱niñúʼu kuvira xa̱ʼa̱ ña̱yóʼo nda̱a̱ táki̱ʼva xi̱kaʼa̱n Ley ta̱ Moisés (Lev. 20:10; Núm. 35:31). Soo xa̱ʼa̱ ña̱ va̱ʼaní-ini Jehová, chi̱ndaʼára ta̱ profeta Natán ña̱ ka̱ʼa̱nra xíʼin ta̱ David ni ta̱ʼánví ndikó-ini ta̱ David xa̱ʼa̱ ña̱ ke̱ʼéra. d Ta̱ Natán xi̱niñúʼura iin ejemplo ña̱ va̱ʼa chindeétáʼanra xíʼin ta̱ David ña̱ kunda̱a̱-inira ña̱ ndeéní ku̱a̱chi ni̱ki̱ʼvira. Tasaá ku̱ndaa̱-ini ta̱ David ña̱ ni̱ki̱ʼvira ku̱a̱chi nu̱ú Jehová ta ndi̱kó-inira (2 Sam. 12:1-14). Ka̱ʼyira iin salmo ña̱ ni̱na̱ʼa̱ ña̱ ndixaní ndi̱kó-inira xa̱ʼa̱ ña̱ ke̱ʼéra (Sal. 51, encabezamiento). Xa̱a̱ ku̱a̱ʼání na̱ yiví na̱ ku̱a̱kiʼvi ku̱a̱chi va̱ʼaní chíndeétáʼan salmo yóʼo xíʼinna ña̱ ndikó-inina xa̱ʼa̱ ku̱a̱chi ña̱ ni̱ki̱ʼvina. Kúsi̱íní-iniyó tá sákuaʼayó ña̱ viíní chi̱ndeétáʼan Jehová xíʼin ta̱ David ña̱ ndikó-inira.
10. ¿Ndáa ki̱ʼva kúniún tá kúnda̱a̱-iniún ña̱ kúee íyo ini Jehová xíʼinyó ta íxakáʼnu-inira xa̱ʼa̱yó?
10 Jehová kúndasíra xínira ndiʼi nu̱ú ku̱a̱chi (Sal. 5:4, 5). Soo kúnda̱a̱va-ini Jehová ña̱ ndiʼiyó kúúyó na̱ yiví ku̱a̱chi ta xa̱ʼa̱ ña̱ kúʼvi̱-inira xínira miíyó, chíndeétáʼanra xíʼinyó ña̱ va̱ása ki̱ʼviyó ku̱a̱chi. Nda̱a̱ na̱ ni̱ki̱ʼvi iin ku̱a̱chi ña̱ ndeéní chíndeétáʼanra xíʼinna ña̱ ndikó-inina ta kuyatinna nu̱úra. Sándi̱kóní ña̱yóʼo iniyó. Tá ndákanixi̱níyó xa̱ʼa̱ ña̱ kúeení íyo ini Jehová xíʼinyó ta íxakáʼnu-inira xa̱ʼa̱yó, kúni̱yó nda̱kú koo iniyó xíʼinra ta kama ndikó-iniyó tá kíʼviyó ku̱a̱chi. Vitin ná kotoyó ndáaña sa̱kúaʼa na̱ xi̱ndiku̱n ta̱ Jesús xa̱ʼa̱ ña̱ ndikó-iniyó.
ÑA̱ SA̱KÚAʼA NA̱ XI̱NDIKU̱N TA̱ JESÚS XA̱ʼA̱ ÑA̱ NDIKÓ-ININA
11, 12. ¿Ndáa ejemplo xi̱niñúʼu ta̱ Jesús ña̱ va̱ʼa na̱ʼa̱ra ña̱ íxakáʼnu-ini yivára xa̱ʼa̱yó? (Koto na̱ʼná ña̱ va̱xi nu̱ú kíxáʼa tutu yóʼo).
11 Ta̱ Mesías ki̱xaa̱ra tá siglo nu̱ú. Nda̱a̱ táki̱ʼva sa̱kúaʼayó nu̱ú artículo ña̱ xa̱a̱ ni̱ya̱ʼa, Jehová xi̱niñúʼura ta̱ Jesús ta saátu ta̱ Juan ta̱ xi̱sandákuchi na̱ yiví ña̱ va̱ʼa sanáʼa̱na na̱ yiví ña̱ ndáyáʼviní ndikó-inina (Mat. 3:1, 2; 4:17).
12 Tá ni̱xi̱ka ta̱ Jesús na̱túʼunra xíʼin na̱ yiví sa̱náʼa̱rana ña̱ íxakáʼnu-ini yivára xa̱ʼa̱ na̱ kíʼvi ku̱a̱chi. Ta ña̱ va̱ʼa kunda̱a̱-inina xa̱ʼa̱ ña̱yóʼo, na̱túʼunra xa̱ʼa̱ iin ta̱a xíʼin se̱ʼera. Ta̱ loʼo yóʼo sa̱ndákoora veʼera ta ki̱xáʼara kéʼéra ña̱ va̱ása va̱ʼa, soo tá ni̱ya̱ʼa tiempo ki̱xáʼara vií ndákanixi̱níra ta ndi̱kóra nu̱ú yivára. ¿Ndáaña ke̱ʼé yivára? Ta̱ Jesús ni̱ka̱ʼa̱nra “Tá xíkáka va̱xira xi̱ni yivárara ta ndeéní ku̱ndáʼvi-inira xi̱nirara. Ta xínura ni̱xa̱ʼa̱nra nda̱a̱ nu̱ú va̱xi ta̱ loʼo kán ta nu̱mirara ta chi̱tóra nu̱úra”. Ta̱ loʼo yóʼo xi̱kuni̱ra ka̱ʼa̱nra xíʼin yivára ña̱ ná taxira ña̱ kachíñundáʼvira nu̱úra. Soo xi̱kuni̱níva yivá ta̱ loʼo yóʼo ixakáʼnu-inira xa̱ʼa̱ra ta ndakiʼin tukurara koora xíʼinra. Ka̱chira: “Ta̱ loʼo se̱ʼi̱ yóʼo [...] ta̱ nda̱ñúʼu kúúra soo nda̱ni̱ʼíyóra” (Luc. 15:11-32). Tá kúma̱níka kixi ta̱ Jesús nu̱ú ñuʼú yóʼo xi̱nira ña̱ ku̱a̱ʼání yichi̱ i̱xakáʼnu-ini Jehová xa̱ʼa̱ na̱ xi̱kiʼvi ku̱a̱chi tá xi̱ndikó-inina. Ejemplo ña̱ ni̱ka̱ʼa̱n ta̱ Jesús xa̱ʼa̱, va̱ʼaní sándi̱koña-iniyó ta náʼa̱ña nu̱úyó ña̱ kúndáʼviní-ini Jehová xínira miíyó.
Nu̱ú ejemplo ña̱ xi̱niñúʼu ta̱ Jesús, ni̱ka̱ʼa̱nra xa̱ʼa̱ iin ta̱ loʼo ta̱ nda̱koo veʼera ta tá nda̱ndikóra, nda̱numi yivárara. (Koto párrafo 11 xíʼin 12).
13, 14. ¿Ndáaña sa̱kúaʼa ta̱ apóstol Pedro xa̱ʼa̱ ña̱ ndandikó-iniyó, ta ndáaña ni̱ka̱ʼa̱nra xa̱ʼa̱ ña̱yóʼo? (Koto na̱ʼná).
13 Ku̱a̱ʼání ña̱ sa̱kúaʼa ta̱ apóstol Pedro xa̱ʼa̱ ña̱ sa̱náʼa̱ ta̱ Jesús ña̱ íxakáʼnu-ini Jehová xa̱ʼa̱ na̱ ndándikó-ini. Ku̱a̱ʼání ña̱ va̱ása va̱ʼa ke̱ʼé ta̱ Pedro soo i̱xakáʼnu-ini ta̱ Jesús xa̱ʼa̱ra, tá kúú u̱ni̱ yichi̱ ni̱ka̱ʼa̱n ta̱ Pedro ña̱ va̱ása xíni̱ra ta̱ Jesús ta tándi̱ʼi nda̱kavaní-inira xa̱ʼa̱ ña̱yóʼo (Mat. 26:34, 35, 69-75). Soo tá nda̱taku ta̱ Jesús nde̱tara nu̱ú ta̱ Pedro tá íyo mitúʼunra (Luc. 24:33, 34; 1 Cor. 15:3-5). Xi̱kunda̱a̱-ini ta̱ Jesús ña̱ nda̱ndikó-ini ta̱ Pedro ña̱kán sa̱ndíkora-inira ta ni̱na̱ʼa̱ra nu̱úra ña̱ i̱xakáʼnu-inira xa̱ʼa̱ra (Mar. 16:7).
14 Va̱ʼaní xi̱kunda̱a̱-ini ta̱ Pedro ndáaña ndóʼoyó tá ndíkó-iniyó ta íxakáʼnu-inina xa̱ʼa̱yó. Ña̱kán va̱ʼaní sa̱náʼa̱ra inkana xa̱ʼa̱ ña̱yóʼo. Tá xa̱a̱ ni̱ya̱ʼa vikó ña̱ Pentecostés, ta̱ Pedro ni̱ka̱ʼa̱nra nu̱ú iin tiʼvi na̱ judío ña̱ miína xa̱ʼní ta̱ Mesías, ta viíní ni̱ka̱ʼa̱nra ña̱yóʼo xíʼinna: “Ndikó-inindó ta ndikóndó nu̱ú Ndióxi̱ ña̱ va̱ʼa ná ndoo ku̱a̱chindó, tasaá mií Jehová sandíkora-inindó” (Hech. 3:14, 15, 17, 19). Xíʼin ña̱ ni̱ka̱ʼa̱nra xíʼinna xi̱kuni̱ra ná kunda̱a̱-inina ña̱ xíniñúʼu nasama na̱ ndándikó-ini ña̱ ndákanixi̱nína, sandákoona ña̱ va̱ása va̱ʼa kéʼéna ta kixáʼana keʼéna ña̱ sákusi̱í-ini Ndióxi̱. Ta̱ apóstol Pedro ni̱ka̱ʼa̱nra ña̱ tá íxakáʼnu-ini Jehová xa̱ʼa̱ ku̱a̱chiyó, nda̱a̱ táki̱ʼva íyo ña̱ ndákatara saá íyoña. Tá ni̱ya̱ʼa tiempo, ta̱ Pedro ni̱ka̱ʼa̱nra ña̱yóʼo xa̱ʼa̱ Jehová: “Ta̱yóʼo kúee íyo inira chi kǒo kúni̱ra ña̱ ndiʼi-xa̱ʼa̱ nda̱a̱ ni iin ndóʼó, chi ña̱ kúni̱ra kúú ña̱ ná ndikó-ini ndiʼindó” (2 Ped. 3:9). Va̱ʼaní kúniyó tá íxakáʼnu-ini Jehová xa̱ʼa̱yó ni kíʼviyó ku̱a̱chi ña̱ ndeéní.
Nda̱ndikóva-ini ta̱ apóstol Pedro ña̱kán i̱xakáʼnu-ini ta̱ Jesús xa̱ʼa̱ra ta ni̱na̱ʼa̱ra ña̱ kúʼvi̱ní-inira xínirara. (Koto párrafo 13 xíʼin 14).
15, 16. a) ¿Ndáaña sa̱kúaʼa ta̱ Pablo xa̱ʼa̱ ña̱ i̱xakáʼnu-ini Ndióxi̱ xa̱ʼa̱ra? (1 Timoteo 1:12-15). b) ¿Ndáaña sakúaʼayó nu̱ú inka artículo?
15 Ku̱a̱ʼání ña̱ va̱ása va̱ʼa ke̱ʼé ta̱ Pablo. I̱xandi̱va̱ʼara xíʼin na̱ xi̱ndiku̱n ta̱ Jesús, ña̱kán sava na̱kán xi̱ndakanixi̱nína ña̱ va̱ása kivi nasa̱mara. Soo xi̱kunda̱a̱va-ini ta̱ Jesús ña̱ kivi nasa̱ma ta̱ Pablo ta kivi ndandikó-inira. Ta̱ Jesús xíʼin Jehová ki̱ʼinna kuenta xíʼin ña̱ va̱ʼa ña̱ xi̱kuumií ta̱ Pablo. Ta̱ Jesús ka̱chira: “Nda̱kaxii̱n ta̱ ta̱a yóʼo ña̱ natúʼunra xa̱ʼíi̱ xíʼin na̱ ñuu” (Hech. 9:15). Ta nda̱a̱ ke̱ʼéra iin milagro ña̱ va̱ʼa chindeétáʼanra xíʼinra ña̱ ndandikó-inira (Hech. 7:58–8:3; 9:1-9, 17-20). Tá ni̱ya̱ʼa tiempo, tá ni̱xa̱a̱ ta̱ Pablo nda̱kundiku̱nra ta̱ Jesús ta ndu̱ura apóstol, ta̱xiníra tíxa̱ʼvi ndaʼa̱ Jehová xíʼin ta̱ Jesús xa̱ʼa̱ ña̱ va̱ʼaní ni̱xi̱yo inina xíʼinra chi ku̱ndáʼvi-inina xi̱ninara (kaʼvi 1 Timoteo 1:12-15). Ña̱kán ni̱ka̱ʼa̱nra xíʼin na̱ hermano: “Xa̱ʼa̱ ña̱ va̱ʼaní-ini Ndióxi̱ xíʼún kúú ña̱ kúni̱ra ña̱ ná ndikó-iniún” (Rom. 2:4).
16 Iin yichi̱, ku̱ndaa̱-ini ta̱ Pablo ña̱ xi̱ndikaa̱ iin ta̱a ta̱ xi̱keʼé ku̱a̱chi kini ti̱xin congregación ña̱ Corinto. ¿Ndáa ki̱ʼva nda̱saviíra ku̱a̱chi yóʼo? Tá ná kaʼviyó xa̱ʼa̱ ña̱ ke̱ʼéra, sakúaʼayó ña̱ kúʼvi̱ní-ini Jehová xínira miíyó ta viíní táxira consejo ndaʼa̱yó ta saátu íxakáʼnu-inira xa̱ʼa̱yó tá ndándikó-iniyó. Saátu sakúaʼayó ndáa ki̱ʼva kundiku̱nyó yichi̱ra. Nu̱ú inka artículo ka̱ʼa̱nyó xa̱ʼa̱ ña̱yóʼo.
YAA 33 Ka̱ʼa̱n xíʼin Jehová ña̱ ndóʼún
a Nehemías 8:9-11: “Ta̱ Nehemías ta̱ xi̱xaʼndachíñu nu̱úna, ta̱ su̱tu̱ Esdras ta̱ xi̱xini̱ní kaʼyi ley ta saátu na̱ levita na̱ xi̱sanáʼa̱ na̱ yiví ni̱ka̱ʼa̱nna xíʼin ndiʼi na̱ ñuu: ‘Vitin iin ki̱vi̱ yi̱i̱ kúúña nu̱ú Jehová Ndióxi̱yó. Ña̱kán va̱ása kuakundó ta ni kǒo kusuchí-inindó’. Saáchi ndiʼi na̱ ñuu ki̱xáʼana xákuna tá xi̱niso̱ʼona ña̱ káʼa̱n Ley. 10 Ta ni̱ka̱ʼa̱nra xíʼinna: “Kúáʼanndó ta kuxundó ña̱ʼa mií ña̱ va̱ʼaka ta koʼondó vino vi̱si̱ ta chindaʼándó ña̱ kuxu na̱ kǒo ña̱ʼa kúúmií. Saáchi vitin kúúña iin ki̱vi̱ ña̱ yi̱i̱ nu̱ú tátayó. Va̱ása kusuchí-inindó, saáchi ña̱ si̱í-ini ña̱ táxi Jehová kúú ña̱ ndasandakú-inindó”. 11 Ta na̱ levita xi̱sandíkona-ini na̱ yiví ta xi̱kachina xíʼinna: ‘Kǒo kuakundó, saáchi vitin iin ki̱vi̱ yi̱i̱ kúúña. Va̱ása kusuchí-inindó’”.
b 2 Reyes 17:13, 14: “Jehová xi̱xiniñúʼura ndiʼi na̱ profeta xíʼin na̱ ta̱a na̱ xi̱xini visión ña̱ va̱ʼa ka̱ʼa̱nna xíʼin na̱ ñuu Israel ta saátu na̱ Judá xa̱ʼa̱ ña̱ kivi kundoʼona. Xi̱kaʼa̱nra xíʼinna: ‘Sandákoondó ña̱ va̱ása va̱ʼa kéʼéndó ta ndikóndó nu̱úi̱. Kandíxandó ndiʼi ña̱ káʼi̱n xíʼinndó ta saátu ña̱ ni̱ka̱ʼyi̱ nu̱ú ley ña̱ ta̱xii̱ ndaʼa̱ na̱ táʼanndó na̱ xi̱ndoo xi̱naʼá, ta saátu ña̱ ni̱ka̱ʼi̱n xíʼin na̱ profeta na̱ xi̱kachíñu nu̱úi̱ ña̱ ná ka̱ʼa̱nna xíʼinna’. 14 Soo na̱yóʼo va̱ása níkandíxana. So̱ʼoní ni̱xi̱yona nda̱a̱ táki̱ʼva ni̱xi̱yo na̱ táʼanna na̱ xi̱ndoo xi̱naʼá, saáchi na̱kán va̱ása nína̱ʼa̱na ña̱ kándíxana Jehová Ndióxi̱na xíʼin ndiʼi níma̱na”.
c Iinlá ta̱ Oseas kúú ta̱ ni̱ka̱ʼa̱n Jehová xíʼin keʼé ña̱yóʼo. Tiempo vitin Jehová va̱ása ndúkura nu̱ú na̱ ti̱ndaʼa̱ ña̱ koona xíʼin táʼanna tá sa̱ndáʼvinana ta ni̱ki̱si̱na xíʼin inkana. Jehová ni̱ka̱ʼa̱nra xíʼin se̱ʼera ña̱ ná sanáʼa̱ra miíyó ña̱ kiviva ndaka̱xin na̱ xa̱a̱ ti̱ndaʼa̱ á sandákootáʼanna tá iin na̱yóʼo ni̱ki̱ʼvi ku̱a̱chi kini (Mat. 5:32; 19:9).
d Koto artículo ña̱ naní “¿Qué significa para usted el perdón de Jehová?”, ña̱ ka̱na nu̱ú La Atalaya 15 tí noviembre ña̱ ku̱i̱ya̱ 2012, página 21 nda̱a̱ 23, párrafo 3 nda̱a̱ 10.
