1, 2. a) ¿Ndáa ki̱ʼva kúni Jehová tá kíʼvi iinna ku̱a̱chi ta va̱ása ndíkó-inina? b) ¿Ndáaña kúni̱ Jehová keʼé na̱ ni̱ki̱ʼvi ku̱a̱chi?

 JEHOVÁ va̱ása táxira keʼéyó ndiʼi ña̱ kúni̱ miíyó ta ni va̱ása kútóora ña̱ ki̱ʼviyó ku̱a̱chi (Sal. 5:​4-6). Ta̱kán kúni̱ra ña̱ ná keʼéyó ña̱ káʼa̱n tu̱ʼunra soo kúnda̱a̱va-inira ña̱ kúúyó na̱ yiví ku̱a̱chi ta xa̱ʼa̱ ña̱kán íxayo̱ʼvi̱ña xíʼinyó ña̱ viíní keʼéyó ndiʼi ña̱ káʼa̱nra (Sal. 130:​3, 4). Soo saátu kúndasíra xínira na̱ kǒo íxato̱ʼó ña̱ káʼa̱nra ta ndákanixi̱nína ña̱ kivi keʼéna ña̱ kini ña̱ kǒo kúkaʼan nu̱úna xíʼin xa̱ʼa̱ ña̱ va̱ʼaní-inira (Jud. 4). Biblia káʼa̱nña ña̱ sandíʼi-xa̱ʼa̱va Ndióxi̱ na̱ kǒo íxato̱ʼó-ñaʼá tá ná koo ku̱a̱chi ña̱ Armagedón (2 Ped. 3:7; Apoc. 16:16).

² Va̱ása kúni̱ví Jehová ña̱ ndiʼi-xa̱ʼa̱ nda̱a̱ ni iin na̱ yiví. Nda̱a̱ táki̱ʼva xa̱a̱ sa̱kúaʼayó nu̱ú artículo ña̱ xa̱a̱ ni̱ya̱ʼa, Biblia káʼa̱nña ña̱ kúni̱ra ná ndikó-ini ndiʼina (2 Ped. 3:9). Na̱ anciano ndíku̱nna yichi̱ Jehová ta kúee íyo inina chi kúni̱na chindeétáʼanna xíʼin na̱ ni̱ki̱ʼvi iin ku̱a̱chi ndeé ña̱ ndikó-inina ta kutáʼan tukuna xíʼinra. Soo su̱ví ndiʼivína táxi ña̱ chindeétáʼanna xíʼinna (Is. 6:9). Íyo sava na̱ kǒo xíín nasama ña̱ kéʼéna ni chíkaa̱ní na̱ anciano ndee̱ ña̱ chindeétáʼanna xíʼinna ña̱ ndikó-inina xa̱ʼa̱ ña̱ ke̱ʼéna. Tá saá, ¿ndáaña xíniñúʼu keʼé na̱ anciano tá kúu ña̱yóʼo?

 “TAVÁNDÓ NA̱ KÉʼÉ ÑA̱ KINI”

3. a) ¿Ndáaña káʼa̱n Biblia xíniñúʼu keʼé na̱ anciano tá iinna kíʼvina ku̱a̱chi ndeé ta va̱ása ndíkó-inina? b) Tá va̱ása ndíkó-inina, ¿nda̱chun káʼa̱nyó ña̱ ta̱vána miína ti̱xin congregación?

³ Tá iin na̱ yiví ni̱ki̱ʼvina iin ku̱a̱chi ndeé ta va̱ása ndíkó-inina, na̱ anciano xíniñúʼu keʼéna ña̱ káʼa̱n 1 Corintios 5:13 ña̱ tavána na̱ yiví na̱ kéʼé ña̱ kini na̱ ndíkaa̱ ti̱xin congregación. Ña̱kán miíva na̱ yiví yóʼo tává miína ti̱xin congregación saáchi xa̱a̱ kúnda̱a̱va-inina ndáaña kundoʼona xa̱ʼa̱ ña̱ kǒo ndíkó-inina (Gál. 6:7). ¿Nda̱chun? Saáchi kǒo nítaxina ña̱ chindeétáʼan na̱ anciano xíʼinna ni xa̱a̱ ku̱a̱ʼání yichi̱ ni̱ka̱ʼa̱nna xíʼinna (2 Rey. 17:​12-15). Xíʼin ña̱ kéʼé na̱ yiví yóʼo náʼa̱na ña̱ xa̱a̱ nda̱kaxinna ña̱ kǒo kúni̱kana keʼéna ña̱ káʼa̱n Jehová (Deut. 30:​19, 20).

4. ¿Nda̱chun táxina anuncio tá távána iin na̱ yiví ti̱xin congregación?

⁴ Tá távána iin na̱ yiví na̱ ni̱ki̱ʼvi ku̱a̱chi ndeé ti̱xin congregación xa̱ʼa̱ ña̱ va̱ása ndíkó-inina, táxina iin anuncio ña̱ va̱ʼa kunda̱a̱-ini ndiʼi na̱ congregación ña̱ su̱víka testigo Jehová kúúna. a Soo va̱ása kéʼéna ña̱yóʼo xa̱ʼa̱ ña̱ kúni̱na sakúkaʼanna nu̱úna chi kéʼénaña ña̱ va̱ʼa ná kundiku̱n na̱ congregación ña̱ káʼa̱n Biblia ña̱ kǒo kutáʼankana xíʼinna ta ni va̱ása ndakutáʼanna xíʼinna ña̱ kuxuna (1 Cor. 5:​9-11). Ta ña̱ va̱ʼava kúú ña̱ káʼa̱n Jehová ña̱yóʼo xíʼinyó saáchi ta̱ apóstol Pablo ka̱ʼyira: “¿Á va̱ása xíni̱ndó ña̱ loʼo ña̱ sáxi̱ya̱ yuxa̱n sáxi̱ya̱ña ndiʼi yuxa̱n?” (1 Cor. 5:6). Tá ná taxina kundikaa̱ na̱ yiví na̱ ni̱ki̱ʼvi ku̱a̱chi ta va̱ása ndíkó-inina ti̱xin congregación, sana inka na̱ hermano va̱ása chikaa̱vína ndee̱ ña̱ kundiku̱nna ña̱ káʼa̱n Jehová (Prov. 13:20; 1 Cor. 15:33).

5. ¿Ndáaña xíniñúʼu ndakanixi̱níyó xa̱ʼa̱ na̱ va̱ása kúúka testigo Jehová, ta nda̱chun?

⁵ Tá saá, ¿ndáaña xíniñúʼu ndakanixi̱níyó xa̱ʼa̱ na̱ va̱ása kúúka testigo Jehová? Ni kǒo kítáʼankayó xíʼinna kǒo ndákanixi̱níyó xa̱ʼa̱na ña̱ va̱ása kivi ndikó tukuna ñuu Jehová, chi íyona nda̱a̱ táki̱ʼva íyo tí ndikachi tí nda̱ñúʼu tí kivi ndikó tuku nu̱ú xi̱toʼorí. Ná ndakaʼányó chi tá ya̱chi̱ nda̱taxina miína ndaʼa̱ Jehová ta vitin kǒo kéʼékana ña̱ ki̱ndoona xíʼinra ta nda̱a̱ i̱yo kuvina xa̱ʼa̱ ña̱yóʼo (Ezeq. 18:31). Ña̱kán, nani táxika Jehová tiempo ndaʼa̱na ña̱ ndikó-inina, kúnda̱a̱-iniyó ña̱ kivi ndikó tukuna nu̱úra. Tá saá ¿ndáaña kivi keʼé na̱ anciano ña̱ va̱ʼa chindeétáʼanna xíʼin na̱ ke̱e ti̱xin congregación?

¿NDÁA KI̱ʼVA CHÍNDEÉTÁʼAN NA̱ ANCIANO XÍʼIN NA̱ KE̱E TI̱XIN CONGREGACIÓN?

6. ¿Ndáaña kéʼé na̱ anciano ña̱ va̱ʼa chindeétáʼanna xíʼin na̱ ke̱e ti̱xin congregación?

⁶ Tá távána iin na̱ yiví ti̱xin congregación, ¿ndáaña kéʼé na̱ anciano? ¿Á sándákoondaʼa̱nana ta va̱ása chíndeétáʼankana xíʼinna ña̱ ndikóna nu̱ú Jehová? Va̱ása. Tá ná ka̱ʼa̱n na̱ anciano xíʼinna ña̱ va̱ása kivi kookana testigo Jehová, ka̱ʼa̱ntuna xíʼinna ndáaña xíniñúʼu keʼéna ña̱ va̱ʼa ndikóna nu̱ú Jehová. Ta saátu ka̱ʼa̱nna xíʼinna ña̱ ndataka tukuna xíʼinna tá ná ya̱ʼa loʼo yo̱o̱ ña̱ va̱ʼa kunda̱a̱-inina á kúni̱na ndikóna. Tá ná ka̱ʼa̱nna ña̱ kivi ndataka na̱ anciano xíʼinna saá ka̱ʼa̱nna xíʼinna ña̱ ná ndikó-inina ta ná ndikóna nu̱ú Jehová. ¿Soo tá kǒo xíínna ndandikó-inina? Ni saá ndatakava na̱  anciano xíʼinna inka yichi̱ ña̱ va̱ʼa ka̱ʼa̱nna xíʼinna.

7. Tá kíta iinna ti̱xin congregación, ¿ndáa ki̱ʼva ndíku̱n na̱ anciano yichi̱ Jehová ña̱ kundáʼvi-inina kuninana? (Jeremías 3:12).

⁷ Na̱ anciano xíniñúʼu chikaa̱na ndee̱ ña̱ kundiku̱nna yichi̱ Jehová ta kundáʼvi-inina kunina na̱ ke̱e ti̱xin congregación. Tá kúú tá xi̱ ixaso̱ʼo na̱ israelita nu̱ú Jehová, va̱ása níxi̱ndatura ña̱ ná ndikó miína nu̱úra chi siʼna miíra kúú ta̱ xi̱kuni̱ chindeétáʼan xíʼinna ni va̱ása níxi̱naʼa̱na ña̱ kúni̱na ndikó-inina. Nda̱a̱ táki̱ʼva sa̱kúaʼayó nu̱ú artículo ña̱ xa̱a̱ ni̱ya̱ʼa, Jehová xi̱niñúʼura ña̱ ndo̱ʼo ta̱ profeta Oseas ña̱ va̱ʼa na̱ʼa̱ra ña̱ kúndáʼvi-inira xínira na̱ ñuura. Ni̱ka̱ʼa̱nra xíʼin ta̱ Oseas ña̱ ná ndakiʼin tukura ñá síʼira ni xi̱kiʼviñá ku̱a̱chi (Os. 3:1; Mal. 3:7). Na̱ anciano ndíku̱nna yichi̱ Jehová, saáchi xíʼin ndiʼi níma̱na kúni̱na ná ndikó-ini na̱ ni̱ki̱ʼvi ku̱a̱chi ta ná ndikóna ñuura. Ta chíndeétáʼanna xíʼinna ña̱ va̱ása ixayo̱ʼvi̱ña xíʼinna ndikóna nu̱ú Jehová (kaʼvi Jeremías 3:12). b

8. ¿Ndáaña sákuaʼayó xíʼin ña̱ na̱túʼun ta̱ Jesús xa̱ʼa̱ ta̱ loʼo ta̱ nda̱ñúʼu? (Lucas 15:7).

⁸ Ná ndakaʼányó xa̱ʼa̱ ta̱ loʼo ta̱ nda̱ñúʼu ta̱ ni̱ka̱ʼa̱n ta̱ Jesús xa̱ʼa̱, ta̱ ni̱ka̱ʼa̱nyó xa̱ʼa̱ nu̱ú artículo ña̱ xa̱a̱ ni̱ya̱ʼa. Tá xi̱ni yivárara “xínura ni̱xa̱ʼa̱nra nda̱a̱ nu̱ú va̱xi ta̱ loʼo kán ta nu̱mirara ta chi̱tóra nu̱úra” (Luc. 15:20). Xa̱ʼa̱ ña̱ xi̱kuʼvi̱ní-inira xi̱xinira se̱ʼera, kǒo níxi̱ndatura ña̱ ndukúra ña̱ káʼnu-ini nu̱úra ta siʼnaka miíra ku̱yatin nu̱ú se̱ʼera. Ki̱ʼva saátu ndóʼo na̱ anciano tá kíta iinna ti̱xin ñuu Jehová ña̱kán chíkaa̱nína ndee̱ ña̱ chindeétáʼanna xíʼinna ña̱ ndikóna ñuura (Luc. 15:​22-24, 32). Tá ndíkó iin na̱ ni̱ki̱ʼvi ku̱a̱chi ñuu Jehová, kúsi̱íní-inina chí ndiví ta saátu miíyó kúsi̱íní-iniyó (kaʼvi Lucas 15:7).

9. ¿Ndáaña káʼa̱n Jehová xíʼin na̱ ni̱ki̱ʼvi ku̱a̱chi ndeé?

⁹ Ndiʼi ña̱ xa̱a̱ sa̱kúaʼayó náʼa̱ña nu̱úyó ña̱ va̱ása kútóo Jehová koo na̱ kíʼvi ku̱a̱chi ti̱xin ñuura tá va̱ása ndándikó-inina. Soo kǒo sándákoondaʼa̱rana chi kúni̱ra ná ndikóna nu̱úra. Nu̱ú Oseas 14:4 sákuaʼayó ndáa ki̱ʼva kúni Jehová xíʼin na̱ ndíkó-ini: “Sandáʼi̱na tasaá va̱ása sandáʼvikana yi̱ʼi̱. Xa̱ʼa̱ ña̱ kúni̱ miíi̱ kúú ña̱ kuʼvi̱-inii̱ kunii̱na, saáchi va̱ása sa̱a̱kai̱ xíʼinna”. Ña̱kán ndáyáʼviní kiʼin na̱ anciano kuenta tá kíxáʼa iin na̱ yiví ndándikó-inina. Ta saátu ndáyáʼviní ña̱ chikaa̱ na̱ ke̱e ti̱xin ñuu Jehová ndee̱ ña̱ ndikóna nu̱úra.

10, 11. ¿Ndáa ki̱ʼva chíndeétáʼan na̱ anciano xíʼin na̱ xa̱a̱ ku̱a̱ʼá ku̱i̱ya̱ ke̱e ti̱xin ñuu Jehová?

¹⁰ ¿Ndáa ki̱ʼva chindeétáʼan na̱ anciano xíʼin na̱ xa̱a̱ ku̱a̱ʼání ku̱i̱ya̱ ke̱e ti̱xin ñuu Jehová? Sana va̱ása kíʼvikana ku̱a̱chi ña̱ ke̱ena xa̱ʼa̱, á sana ni va̱ása ndákaʼánkana ndáa xa̱ʼa̱ kúú ña̱ ke̱ena. Ni nda̱saaka tiempo ni̱ya̱ʼa ña̱ ke̱e na̱yóʼo, na̱ anciano nandukúnana ta ku̱ʼu̱nna kotonana. Tá ná ku̱ʼu̱nna kotonana kivi ka̱ʼa̱nna xíʼinna ña̱ ka̱ʼa̱nna xíʼin Ndióxi̱ xa̱ʼa̱na, ta viíkaví ka̱ʼa̱nna xíʼinna ña̱ ná ndikóna ti̱xin congregación. Tá iin na̱ yiví xa̱a̱ ku̱a̱ʼání ku̱i̱ya̱ kúú ña̱ ki̱tana ti̱xin ñuu Jehová, xíniñúʼu sakúaʼa tukuna xa̱ʼa̱ Jehová, ña̱kán tá káʼa̱nna ña̱ kúni̱na ndikóna, kivi ka̱ʼa̱n na̱ anciano ña̱ ná kaʼvi iin ñá hermana á iin ta̱ hermano xíʼinna ni kúma̱ní nduu tukuna testigo Jehová. Soo mií na̱ anciano kúú na̱ ndaka̱xin ndáana kaʼvi xíʼinna.

 ¹¹ Na̱ anciano kúni̱na kundiku̱nna yichi̱ Jehová ña̱ kundáʼvi-inina kunina na̱ ke̱e ti̱xin ñuura. Ña̱kán chíkaa̱na ndee̱ ña̱ nandukúna na̱yóʼo ta chindeétáʼanna xíʼinna ña̱ ndikóna nu̱ú Jehová. Tá na̱yóʼo náʼa̱na ña̱ ndíkó-inina ta va̱ása kíʼvikana ku̱a̱chi, va̱ása xíniñúʼu ya̱ʼa ku̱a̱ʼáníví tiempo tasaá ndikó tuku na̱yóʼo (2 Cor. 2:​6-8).

12. a) ¿Ama kúú ña̱ xíniñúʼu kiʼinníka na̱ anciano kuenta tá kúni̱ iinna ndikóna ñuu Jehová? b) ¿Nda̱chun va̱ása xíniñúʼu ka̱ʼa̱nyó ña̱ va̱ása kivi ixakáʼnu-ini Jehová xa̱ʼa̱ sava na̱ kíʼvi ku̱a̱chi? (Koto nota).

¹² Íyo sava ña̱ʼa ña̱ xíniñúʼu kiʼin na̱ anciano kuenta xíʼin tá kúni̱ iin na̱ yiví ndikóna ti̱xin congregación, tá kúú na̱ ke̱ʼé ña̱ kini xíʼin na̱ va̱lí, na̱ ni̱xi̱yo contra Ndióxi̱ á iin na̱ sa̱ndákoo na̱ ti̱ndaʼa̱ xíʼinna soo xa̱a̱ ya̱chi̱ka nda̱kanixi̱nína ndáa ki̱ʼva keʼénaña. Na̱ anciano xíniñúʼu kiʼinnína kuenta á ndixa nda̱ndikó-ini na̱ ke̱ʼé ña̱yóʼo (Mal. 2:14; 2 Tim. 3:6). Na̱yóʼo xíniñúʼu kundaana na̱ congregación. Soo xíniñúʼu ndakaʼányó tá iin na̱ yiví na̱ ni̱ki̱ʼvi ku̱a̱chi, ndíkó-inina xíʼin ndiʼi níma̱na ta va̱ása kíʼvikana ku̱a̱chi ndeé, taxiva Jehová ña̱ ná ndikóna ñuura. Ña̱kán ni xíniñúʼu kiʼinní na̱ anciano kuenta á ndixa ndándikó-ini na̱ ni̱ki̱ʼvi ku̱a̱chi yóʼo, va̱ása xíniñúʼu  ndakanixi̱nína ña̱ va̱ása kivi ixakáʼnu-ini Jehová xa̱ʼa̱na (1 Ped. 2:10). c

ÑA̱ KIVI KEʼÉ NA̱ CONGREGACIÓN

13. ¿Ndáa ki̱ʼva kéʼéyó xíʼin na̱ íyo censurado, soo ndáa ki̱ʼva kéʼéyó xíʼin na̱ távána ti̱xin congregación?

¹³ Nda̱a̱ táki̱ʼva sa̱kúaʼayó nu̱ú artículo ña̱ xa̱a̱ ni̱ya̱ʼa, sava yichi̱ táxina anuncio ti̱xin congregación xa̱ʼa̱ iin na̱ hermano ña̱ íyo censurado na̱yóʼo. Kiviva kutáʼanyó xíʼinna saáchi nda̱ndikó-inina ta va̱ása kíʼvikana ku̱a̱chi (1 Tim. 5:20). Na̱yóʼo ndíkaa̱kavana xíʼinyó ti̱xin congregación ta xíniñúʼu chindeétáʼanyó xíʼinna ña̱ keʼéna ña̱ va̱ʼa (Heb. 10:​24, 25). Soo síínva kúu tá távána iin yiví ti̱xin congregación. Saáchi va̱ása kivi kutáʼankayó xíʼin na̱yóʼo ta ni va̱ása kivi kuxuyó xíʼinna (1 Cor. 5:11).

14. Tá ki̱xaa̱ iin na̱ ta̱vána ti̱xin congregación reunión, ¿ndáaña xíniñúʼu ndaka̱xin iin tá iin na̱ hermano keʼéna? (Koto na̱ʼná).

¹⁴ ¿Á kúni̱ kachi ña̱yóʼo ña̱ tá távána iin na̱ yiví ti̱xin congregación ni loʼoví va̱ása xíniñúʼu ka̱ʼa̱nyó xíʼinna? Va̱ásaví. Xa̱a̱ kúnda̱a̱va-iniyó ña̱ va̱ása xíniñúʼu kutáʼanyó xíʼinna. Soo xa̱ʼa̱ ña̱ xa̱a̱ sákuaʼayó nu̱ú Biblia iin tá iinyó kivi ndaka̱xinyó á ka̱ʼa̱nyó xíʼin na̱ ta̱vána ti̱xin congregación ña̱ ku̱ʼu̱nna reunión, kúúna na̱ veʼeyó á iin na̱ migoyó. ¿Ta ndáa ki̱ʼva xíniñúʼu keʼéyó xíʼinna tá ná xa̱a̱na salón? Tá ya̱chi̱ ni va̱ása chindeévíyóna. Soo xa̱ʼa̱ ña̱ xa̱a̱ sákuaʼayó nu̱ú Biblia, iin tá iinyó kivi ndaka̱xinyó á chindeéyóna á va̱ása. Sana savayó chindeévayó na̱yóʼo á sanatu ka̱ʼa̱nyó xíʼinna ña̱ va̱ʼaní ku̱u ki̱xaa̱na. Ña̱ kǒo kívi keʼéyó kúú ña̱ ku̱a̱ʼání tiempo natúʼunyó xíʼinna á kixáʼayó kutáʼanyó xíʼinna.

15. ¿Ndáana káʼa̱n 2 Juan 9-11 xa̱ʼa̱? (Koto recuadro “ ¿Á inkáchi kúú ku̱a̱chi ña̱ ni̱ka̱ʼa̱n ta̱ Juan xíʼin ta̱ Pablo xa̱ʼa̱?”).

¹⁵ Sana kivi ndakanixi̱níyó: “¿Á va̱ása káʼa̱n Biblia ña̱ va̱ása xíniñúʼu chindeéyó na̱ kíʼvi ku̱a̱chi saáchi tá kéʼéyó ña̱yóʼo táki̱ʼva íyo na̱ kítáʼan xíʼinna ña̱ kéʼéna ña̱ va̱ása va̱ʼa saá íyoyó?” (kaʼvi 2 Juan 9-11). Na̱ káʼa̱n versículo yóʼo xa̱ʼa̱ kúú na̱ íyo contra  Ndióxi̱ á na̱ káʼa̱n xíʼin inkana ña̱ ná keʼéna ña̱ kini nu̱ú Ndióxi̱ (Apoc. 2:20). Ña̱kán tá iin na̱ yiví íyona contra Ndióxi̱ á káʼa̱nna xíʼin inkana ña̱ ná keʼéna ña̱ kini nu̱ú Ndióxi̱, va̱ása ku̱ʼu̱nví na̱ anciano kotonana. Sana kiviva nasama na̱yóʼo ña̱ kéʼéna, soo tá ta̱ʼán nasamana ña̱ kéʼéna, va̱ása chindeéyóna ta ni va̱ása ka̱ʼa̱nyó xíʼinna ña̱ ku̱ʼu̱nna reunión.

NÁ KUNDIKU̱NYÓ YICHI̱ JEHOVÁ

16, 17. a) ¿Ndáaña kúni̱ Jehová ná keʼé na̱ ni̱ki̱ʼvi ku̱a̱chi? (Ezequiel 18:32). b) ¿Ndáa ki̱ʼva kivi kachíñu na̱ anciano xíʼin Jehová?

¹⁶ ¿Ndáaña sa̱kúaʼayó nu̱ú u̱ʼu̱n artículo yóʼo? Ña̱ va̱ása kúni̱ Jehová ná ndiʼi-xa̱ʼa̱ nda̱a̱ ni iin na̱ yiví (kaʼvi Ezequiel 18:32). d Kúni̱ra kutáʼan tuku na̱ ni̱ki̱ʼvi ku̱a̱chi xíʼinra (2 Cor. 5:20). Xa̱ʼa̱ ña̱kán xa̱a̱ xi̱naʼáví káʼa̱n Jehová xíʼin na̱ ku̱xíká nu̱úra ña̱ ná ndikó-inina ta ná ndikóna nu̱úra. Ndáyáʼviní chiñu ña̱ kúúmií na̱ anciano saáchi káchíñuna xíʼin Jehová ña̱ va̱ʼa chindeétáʼanna xíʼin na̱ ni̱ki̱ʼvi ku̱a̱chi ndeé ña̱ ndikó-inina (Rom. 2:4; 1 Cor. 3:9).

¹⁷ Ná ndakanixi̱níyó ndáa ki̱ʼva kúsi̱íní-inina chí ndiví tá ndíkó-ini iin na̱ ni̱ki̱ʼvi ku̱a̱chi. Yiváyó Jehová kúsi̱íní-inira tá ndíkó iin na̱ ku̱xíká ti̱xin congregación. Ña̱kán ná kǒo nandósoyó ña̱ kúndáʼvi-ini Jehová xínira miíyó, ña̱ íxakáʼnu-inira xa̱ʼa̱yó ta va̱ʼa-inira xíʼinyó. Tá ná ndakaʼányó xa̱ʼa̱ ña̱yóʼo xa̱a̱yó kuʼvi̱ka-iniyó kuniyóra (Luc. 1:78).