Ta̱ apóstol Pablo ni̱ka̱ʼa̱nra xíʼin na̱ hermano na̱ ñuu Tesalónica: “Tá iinna kǒo xíínna kuniso̱ʼona ña̱ káʼa̱n carta yóʼo, kuenta koondó xíʼin na̱ yiví yóʼo” (2 Tes. 3:14). Tá ya̱chi̱ xi̱kaʼa̱nyó ña̱ na̱ anciano kúú na̱ xi̱niñúʼu kundiku̱n tu̱ʼun yóʼo, ta xi̱taxina iin discurso nu̱ú na̱ congregación tá iin na̱ ndíkaa̱ ti̱xin congregación kǒo níxi̱ndiku̱nna consejo ña̱ káʼa̱n tu̱ʼun Ndióxi̱. Tasaá va̱ása níxi̱kitáʼanka na̱ hermano xíʼin na̱ yiví yóʼo, ta ti̱xin congregación kuití xi̱ndakutáʼanna xíʼinna á tá xi̱xaʼa̱nna xi̱natúʼunna xa̱ʼa̱ tu̱ʼun Ndióxi̱.

Soo vitin kúnda̱a̱-iniyó ña̱ su̱ví na̱ anciano kuití xíniñúʼu kundiku̱n ña̱ káʼa̱n tu̱ʼun yóʼo, chi iin tá iinyó xíniñúʼu ndaka̱xin ndáaña keʼéyó. Ña̱kán va̱ása xíniñúʼuví taxi na̱ anciano iin discurso nu̱ú ka̱ʼa̱nna xíʼinyó ña̱ xíniñúʼu kiʼinyó kuenta xíʼin na̱ yiví na̱ kǒo xíín kuniso̱ʼo. ¿Nda̱chun va̱ása kéʼékana ña̱yóʼo? Ná kotoyó ndáaña ni̱ka̱ʼa̱n ta̱ Pablo xa̱ʼa̱ tá ta̱xira consejo yóʼo.

Ta̱ Pablo ni̱ka̱ʼa̱nra ña̱ ti̱xin congregación xi̱ñuʼu sava na̱ hermano “na̱ íxaso̱ʼo”. Na̱yóʼo va̱ása níxiinna kundiku̱nna consejo ña̱ ta̱xira ndaʼa̱na ña̱ va̱xi nu̱ú tu̱ʼun Ndióxi̱. Tá kúú, iin yichi̱ ni̱ka̱ʼa̱nra xíʼinna: “Tá iinna kǒo xíínna kachíñuna ná va̱ása kuxuna”. Soo ni saá savana kǒo níxi̱xiinna kachíñuna. Saátu xi̱kutóonína kunda̱a̱-inina xa̱ʼa̱ ña̱ xi̱keʼé inkana. ¿Ndáa ki̱ʼva xi̱niñúʼu keʼé na̱ hermano xíʼin na̱ xi̱keʼé ña̱yóʼo? (2 Tes. 3:​6, 10-12).

Tá ni̱ka̱ʼa̱n ta̱ Pablo “kuenta koondó xíʼin na̱ yiví yóʼo”, tu̱ʼun griego ña̱ xi̱niñúʼura kúni̱ kachiña ña̱ xíniñúʼu kunda̱a̱-inina ndáana kúú na̱ yiví yóʼo ta kiʼinna kuenta ña̱ kǒo keʼéna táʼan ña̱ kéʼé na̱ yiví yóʼo. Xíʼin ndiʼi na̱ congregación ni̱ka̱ʼa̱nra tu̱ʼun yóʼo ta su̱ví xíʼin na̱ anciano kuití níka̱ʼa̱nraña (2 Tes. 1:1; 3:6). Ña̱kán tá ku̱ndaa̱-iniyó ña̱ inkana yáʼandosóna ña̱ káʼa̱n tu̱ʼun Ndióxi̱, iin tá iinyó xíniñúʼu ndaka̱xin ña̱ va̱ása kutáʼankayó xíʼin na̱ yiví kán.

Tá saá, ¿á inkáchi xi̱niñúʼu keʼéna xíʼin na̱yóʼo nda̱a̱ táki̱ʼva xi̱keʼéna xíʼin na̱ ta̱vána ti̱xin congregación? Va̱ásaví, saáchi ta̱ Pablo ni̱ka̱ʼa̱nra ña̱yóʼo: “Ndakundeéndó taxindó consejo ndaʼa̱na nda̱a̱ táki̱ʼva kéʼéndó xíʼin ndiʼika na̱ ñaniyó”. Ña̱kán ndiʼiva na̱ hermano kivi kutáʼan xíʼin na̱yóʼo tá ku̱a̱ʼa̱nna reunión á tá ku̱a̱ʼa̱nna natúʼunna xa̱ʼa̱ Ndióxi̱, soo va̱ása kutáʼanna xíʼinna ña̱ keʼéna inkaka ña̱ʼa. Ta̱ Pablo ni̱ka̱ʼa̱nra nda̱chun xíniñúʼu keʼéna ña̱yóʼo: “Ña̱ va̱ʼa ná kukaʼan nu̱úna”. Tá ná va̱ása kutáʼankana xíʼin na̱ yáʼandosó ña̱ káʼa̱n tu̱ʼun Ndióxi̱, saá kivi kukaʼan nu̱úna ta nasamana ña̱ kéʼéna (2 Tes. 3:​14, 15).

¿Ta ndáa ki̱ʼva kivi kundiku̱n miíyó consejo yóʼo tiempo vitin? Siʼna xíniñúʼu kunda̱a̱ va̱ʼa iniyó á ndixa yáʼandosó na̱ yiví kán ña̱ káʼa̱n tu̱ʼun Ndióxi̱ nda̱a̱ táki̱ʼva ka̱chi ta̱ Pablo. Va̱ása níka̱ʼa̱nra xa̱ʼa̱ na̱ hermano na̱ xa̱a̱ síín ndákanixi̱ní xíʼin ki̱ʼva ña̱ ndákanixi̱ní miíyó á na̱ kǒo kéʼé táʼan ña̱ kútóo miíyó. Ta ni va̱ása níka̱ʼa̱ntura xa̱ʼa̱ na̱ ke̱ʼé iin ña̱ʼa ña̱ sa̱sáa̱ miíyó. Na̱ hermano na̱ ni̱ka̱ʼa̱n ta̱ Pablo xa̱ʼa̱ kúú na̱ xa̱a̱ ta̱xina consejo ndaʼa̱ soo kǒo xíínna kundiku̱nnaña.

Tá ki̱ʼinyó kuenta ña̱ iin na̱ hermano yáʼandosóna ña̱ káʼa̱n tu̱ʼun Ndióxi̱, a xa̱a̱ kúnda̱a̱va-iniyó ña̱ kivi kutáʼanyó xíʼinna tá ku̱a̱ʼa̱nyó reunión á tá ku̱a̱ʼa̱nyó natúʼunyó xa̱ʼa̱ tu̱ʼun Ndióxi̱, soo iin tá iin miíyó xíniñúʼu ndaka̱xin ña̱ va̱ása kutáʼanyó xíʼinna ña̱ keʼéyó nda̱a̱ ni iinka ña̱ʼa. Xa̱ʼa̱ ña̱ iin tá iin miíyó xíniñúʼu ndaka̱xin ndáaña keʼéyó, kivi natúʼun kuitíyó xa̱ʼa̱ ña̱ nda̱kaxinyó xíʼin na̱ veʼeyó na̱ kúú Testigo na̱ ndóo xíʼinyó, soo va̱ása xíniñúʼu natúʼunyó xíʼin inkana. Tá ná kixáʼa na̱ ni̱ya̱ʼandosó ña̱ káʼa̱n tu̱ʼun Ndióxi̱ kundiku̱nna ña̱ káʼa̱nña saá kivi kutáʼan tukuyó xíʼinna.