¿Á ka̱ʼviún ndiʼi Tutu Ña̱ Nátúʼun xíʼinyó? Koto á kuchiñún ndakuiún ndiʼi ña̱yóʼo:

¿Ndáaña va̱xi nu̱ú Biblia náʼa̱ nu̱úyó ña̱ kúʼvi̱-ini Jehová xínira miíyó?

Tá xi̱kuu na̱ israelita esclavo ti̱xin ñuu Egipto, Ndióxi̱ xi̱kunda̱a̱-inira ña̱ xi̱xoʼvi̱nína ta xi̱kusuchíní-inira xa̱ʼana (Éx. 3:7; Is. 63:9). Miíyó íyoyó nda̱a̱ táki̱ʼva íyo mií Ndióxi̱, xa̱ʼa ña̱kán kúʼvi̱-iniyó xíniyó inkana. Ta̱kán kúʼvi̱ní-inira xínira miíyó ni sana ndákanixi̱níyó ña̱ kǒo ndíʼi-inira xa̱ʼayó (wp18.3-S, página 8 xíʼin 9).

¿Nda̱saa chi̱ndeétáʼan ta̱ Jesús xíʼin na̱ yiví ña̱ va̱ʼa kǒo kundasítáʼanna?

Tá tiempo ta̱ Jesús ku̱a̱ʼání na̱ judío xi̱kundasítáʼanna. Saá ta̱ Jesús ni̱ka̱ʼa̱nra ña̱ ndáyáʼviní vitá koo inina ta va̱ása kundasítáʼanna. Ni̱ka̱ʼa̱nra xíʼin na̱ discípulora ña̱ xíniñúʼu kuʼvi̱-inina kuni táʼanna, chi inkáchi íyo ndiʼina (w18.06, página 9 xíʼin 10).

¿Ndáaña sákuaʼayó xa̱ʼa ña̱ kǒo nítaxi Ndióxi̱ ki̱ʼvi ta̱ Moisés nu̱ú ñuʼú ña̱ ni̱ka̱ʼa̱nra taxira ndaʼa̱na?

Ta̱ Moisés va̱ʼaní xi̱kitáʼanra xíʼin Jehová (Deut. 34:10). Tá xa̱a̱ ni̱ya̱ʼa 40 ku̱i̱ya̱ ña̱ xíka na̱ ñuu Israel nu̱ú ñuʼú yi̱chí, saá ndi̱ʼi ti̱kui̱í koʼona, ta xa̱a̱ u̱vi̱ yichi̱ ku̱u ña̱ káʼa̱n kúáchina xíʼin ta̱ Moisés. Ndióxi̱ ni̱ka̱ʼa̱nra xíʼin ta̱ Moisés, ña̱ ná sandátakara ndiʼi na̱ yiví yatin nu̱ú íyo iin yu̱u̱, ta ná ka̱ʼa̱nra xíʼinña. Soo ta̱ Moisés kǒo ni̱keʼéra ña̱yóʼo, chi ka̱nira yu̱u̱ xíʼin yitu̱n ña̱ va̱ʼa kita ti̱kui̱í nu̱úña. Sana xa̱ʼa ña̱ kǒo níxindiku̱nra ña̱ ni̱ka̱ʼa̱nra xíʼinra kúú ña̱ ni̱sa̱a̱ra xíʼin ta̱ Moisés, á xa̱ʼa ña̱ kǒo ni̱na̱ʼa̱ra ña̱ miíra kúú ta̱ ke̱ʼé milagro yóʼo (Núm. 20:6-12). Ña̱yóʼo náʼa̱ña nu̱úyó ña̱ ndáyáʼviní kuniso̱ʼoyó ña̱ káʼa̱n Jehová xíʼinyó, ta saátu ña̱ ndasakáʼnuyóra (w18.07, página 13 xíʼin 14).

¿Ndáaña kivi keʼéyó tá kúndasíyó na̱ yiví xa̱ʼa ki̱ʼva ña̱ íyona?

Íyo u̱ni̱ ña̱ʼa ña̱ chíndaʼá savana ña̱ ndakanixi̱nína inka ña̱ʼa xa̱ʼa na̱ yiví: xa̱ʼa razana, xa̱ʼa ñuu nu̱ú ke̱ena, xa̱ʼa xu̱ʼúnna á ku̱i̱ya̱na. Ndáyáʼviní ña̱ sakuaʼayó kitáʼan va̱ʼayó xíʼin inkana ta kǒo kundasíyóna, ta kotoyóna nda̱a̱ táki̱ʼva xíto Jehová miína (Hech. 10:34, 35) (w18.08, página 8 nda̱a̱ 12).

¿Ndáa ki̱ʼva kivi chindeétáʼan na̱ hermano na̱ xa̱a̱ chée xíʼinyó ti̱xin congregación?

Tá na̱sama chiñu ña̱ kúúmií na̱ hermano na̱ xa̱a̱ chée, Jehová chíndayáʼvinívara na̱yóʼo, ta saátu kiviva chindeétáʼankana xíʼinyó. Saátu kivi chindeétáʼanna xíʼin yií sava ná hermana na̱ kǒo kúú Testigo, chíndeétáʼanna xíʼin na̱ sa̱ndákoo ñuu Ndióxi̱, káʼvina xíʼin inka na̱ yiví ta keʼékana chiñu ti̱xin ñuura (w18.09, página 8 nda̱a̱ 11).

¿Ndáa ña̱ʼa ña̱ xíniñúʼuyó kúú ña̱ íyo nu̱úyó tá ku̱a̱ʼa̱nyó nátúʼunyó xíʼin na̱ yiví?

Sava ña̱ xíniñúʼuyó yóʼo kúú ña̱ tarjeta, ña̱ invitación, xíʼin u̱na̱ tratado ta saátu ña̱ revista Tutu Ña̱ Nátúʼun xíʼinyó xíʼin ña̱ ¡Despertad! Saátu íyo sava folleto nu̱úyó xíʼin u̱vi̱ libro ña̱ káʼviyó xíʼin na̱ yiví, ta saátu ku̱mí video, iin ña̱yóʼo naníña ¿Ndachun kaʼviyó Biblia? (w18.10, página 16).

¿Ndáaña xíniñúʼu keʼé iin na̱ ndásakáʼnu Ndióxi̱ ña̱ va̱ʼa satána ña̱ nda̱a̱, táki̱ʼva káchi Proverbios 23:23?

Su̱ví xu̱ʼún xíniñúʼu taxiyó ña̱ va̱ʼa satáyó ña̱ nda̱a̱. Soo xíniñúʼuyó tiempoyó xíʼin ndéeyó ña̱ va̱ʼa ndakiʼinyóña (w18.11, página 4).

¿Ndáaña sákuaʼayó xíʼin ña̱ ke̱ʼé ta̱ Oseas xíʼin ñá síʼíra, ñá Gómer?

Ñá Gómer ku̱a̱ʼá yichi̱ ni̱ki̱ʼviñá ku̱a̱chi xíʼin inka ta̱a. Soo ta̱ Oseas ni̱xi̱yora ña̱ káʼnu-ini xa̱ʼañá ta kǒo nísandákoorañá. Tá iin na̱ ndásakáʼnu Ndióxi̱, ni̱ki̱ʼvi na̱ ti̱ndaʼa̱ xíʼinna iin ku̱a̱chi kivi koona ña̱ káʼnu-ini xa̱ʼana. Soo tá tuku kísi̱na xíʼin na̱ sa̱ndáʼvi-ñaʼá, náʼa̱na ña̱ íyona ña̱ káʼnu-ini xa̱ʼa na̱yóʼo, tásaá ná keʼéna va̱ása kívika sandákoo táʼanna (w18.12, página 13).