“Na̱ va̱ʼa ini kándíxana Jehová ta kúsi̱íní-inina”
ÑÁ Diana xa̱a̱ yáʼa 80 ku̱i̱ya̱ kúúmiíñá. Ta̱ yiíñá xi̱kuumiíra iin kue̱ʼe̱ ña̱ xi̱nándosó-inira xa̱ʼa ña̱ʼa, ta̱yóʼo ni̱xi̱yora si̱lóʼo tiempo nu̱ú ndóo na̱ xa̱a̱ chée. Ta saátu ni̱xo̱ʼvi̱níñá tá ni̱xi̱ʼi̱ u̱vi̱ se̱ʼeñá, saátu xi̱kuumiíñá kue̱ʼe̱ ña̱ naní cáncer de mama. Soo ni saá, na̱ hermano ti̱xin congregación xítona ña̱ ndiʼi tiempo si̱íní kúniñá tá xáʼa̱nñá reunión, ta saátu tá xáʼa̱nñá nátúʼunñá xíʼin na̱ yiví xa̱ʼa Ndióxi̱.
Ta̱ John xi̱kuura superintendente viajante yáʼaka 43 ku̱i̱ya̱. Xi̱kutóoníra chiñu yóʼo, soo xi̱niñúʼu ndakooraña ña̱ va̱ʼa kundaara iin na̱ veʼera na̱ ndée ndóʼo. Soo tá xíni sava na̱ hermano miíra ti̱xin asamblea, káʼa̱nna ña̱ ndiʼi tiempo si̱íní íyo inira.
¿Ndáaña kéʼé ñá Diana xíʼin ta̱ John ña̱ va̱ʼa kúsi̱íní-inina? ¿Nda̱chun si̱í íyo ini savana ni yáʼana nu̱ú tu̱ndóʼo, á ni kǒo kívi keʼékana iin chiñu ña̱ xi̱kutóonína? Ña̱ Biblia káchiña: “Na̱ va̱ʼa ini kándíxana Jehová ta kúsi̱íní-inina” (Sal. 64:10). Ña̱ kunda̱a̱ va̱ʼaka iniyó xa̱ʼaña, ná ka̱ʼa̱nyó xa̱ʼa ndáaña táxi ña̱ kúsi̱í-iniyó tá ndáaña va̱ása táxi ña̱ kusi̱í-iniyó.
SU̱VÍ NDIʼI TIEMPO KÚSI̱Í-INIYÓ
Íyo ku̱a̱ʼá ña̱ʼa ña̱ kivi sakusi̱í-iniyó, tá kúu ña̱ tindaʼa̱yó, ña̱ koo iin se̱ʼeyó á ña̱ ndakiʼinyó iin chiñu ti̱xin ñuu Ndióxi̱. Soo ña̱ va̱ʼava kúú ña̱ si̱í kúniyó xíʼin ña̱yóʼo, chi Jehová kúú ta̱ táxi ndiʼi ña̱yóʼo ndaʼa̱yó. Mií ta̱ kán kúú ta̱ chi̱ndúʼú xa̱ʼa ña̱ tindaʼa̱yó, táxira ña̱ koo se̱ʼeyó ta saátu táxira chiñu ndaʼa̱yó ti̱xin ñuura (Gén. 2:18, 22; Sal. 127:3; 1 Tim. 3:1).
Soo sava, su̱ví ndiʼi tiempo kúsi̱í-iniyó. Chi savana xíʼi̱ na̱ ti̱ndaʼa̱ xíʼinna á sava sándáʼvi táʼanna (Ezeq. 24:18; Os. 3:1). Savatu na̱ válí íxaso̱ʼona nu̱ú yivána, ta nda̱a̱ saátu kéʼéna xíʼin Jehová ta xa̱ʼa ña̱yóʼo kéena ti̱xin ñuu Ndióxi̱. Tá kúú na̱ se̱ʼe ta̱ profeta Samuel xi̱ndasakáʼnuna Jehová soo su̱ví ña̱ va̱ʼa ni̱xikéʼéna; ta saátu ta̱ rey David ni̱ki̱ʼvira iin ku̱a̱chi káʼnu nu̱ú Ndióxi̱, ta xa̱ʼa ña̱yóʼo ku̱a̱ʼání tu̱ndóʼo ki̱xi nu̱ú na̱ veʼera (1 Sam. 8:1-3; 2 Sam. 12:11). Xíʼin tu̱ndóʼo yóʼo va̱ása kúsi̱í-iniyó ta xóʼvi̱yó.
Saátu ndóʼoyó xíʼin chiñu ña̱ kéʼéyó nu̱ú Jehová chi sava kíʼin iin kue̱ʼe̱ miíyó ta nda̱a̱ sándákooyó chiñu yóʼo, á xa̱ʼa ña̱ taxiyó ña̱ xíniñúʼu na̱ veʼeyó á xa̱ʼa ña̱ na̱samana chiñu ti̱xin ñuu Ndióxi̱. Ku̱a̱ʼání na̱ hermano na̱ sa̱ndákoo chiñu ña̱ xi̱kuumiína ti̱xin ñuu Ndióxi̱, káʼa̱nna ña̱ xi̱kusi̱íní-inina tá xi̱keʼéna chiñu yóʼo.
Kúnda̱a̱-iniyó chi sava ña̱ʼa loʼova tiempo táxiña ña̱ kusi̱í-iniyó. Soo yichi̱ ta̱ Samuel xíʼin ta̱ David xíʼin inkakana náʼa̱ña ña̱ íyo inka ña̱ kivi taxi ña̱ si̱í-ini ndaʼa̱yó, ta ndiʼi tiempo íyo ña̱yóʼo ni ná kixi tu̱ndóʼo nu̱úyó.
ÑA̱ SÁKUSI̱Í-INIYÓ NDIʼI TIEMPO
Ta̱ Jesús xi̱xinira ndáaña kúú ña̱ ndixa kivi taxi ña̱ si̱í-ini ndaʼa̱yó. Va̱ʼaníva ni̱xi̱yora chí ndiví. Xa̱ʼa ña̱yóʼo ‘xi̱kusi̱í-inira nu̱ú Jehová ndiʼi tiempoʼ (Prov. 8:30). Soo tá ki̱xira nu̱ú ñuʼú yóʼo ni̱ya̱ʼara nu̱ú sava tu̱ndóʼo ña̱ ndéení. Ta ni saá xi̱kusi̱íníva-inira ña̱ xi̱kachíñura nu̱ú yivára (Juan 4:34). ¿Ndáaña chi̱ndeétáʼan xíʼinra ña̱ va̱ʼa ku̱ndeé-inira tá xa̱a̱ yatin kuvira? Ña̱ Biblia káchiña: “Ku̱si̱í-inira ni ni̱xo̱ʼvi̱níra ta ku̱ndeé-inira tá ndo̱ʼora” (Heb. 12:2). Ná ka̱ʼa̱nyó xa̱ʼa u̱vi̱ ña̱ʼa ña̱ ni̱ka̱ʼa̱n ta̱ Jesús kivi taxi ña̱ si̱í koo iniyó.
Iin yichi̱ nda̱ndikó na̱ 70 discípulora xíʼin ña̱ si̱í-ini xa̱ʼa ña̱ ni̱xa̱ʼa̱nna na̱túʼunna xíʼin na̱ yiví ta saátu xa̱ʼa ña̱ ke̱ʼéna sava milagro, tá kúu ña̱ ta̱vána na̱ ta̱chí ndi̱va̱ʼa ini na̱ yiví. Xa̱ʼa ña̱yóʼo ni̱ka̱ʼa̱n ta̱ Jesús xíʼinna: “Va̱ása kusi̱í-inindó xa̱ʼa ña̱yóʼo, xa̱ʼa ña̱ va̱ʼa távándó na̱ ta̱chí ndi̱va̱ʼa, va̱ʼaka kusi̱í-inindó xa̱ʼa ña̱ íyo ki̱vi̱ndó chi ndiví” (Luc. 10:1-9, 17, 20). Ña̱ kéʼéyó iin chiñu ti̱xin ñuu Ndióxi̱ sákusi̱ívaña iniyó, soo ña̱ ndáyáʼvika kúú ña̱ va̱ʼa kítáʼanyó xíʼin Jehová ta ña̱yóʼo kúú ña̱ ndixa sákusi̱í-iniyó.
Iin yichi̱ tá sánáʼa̱ ta̱ Jesús iin tiʼvi na̱ yiví, iin ñaʼá ñá kúú judía ni̱ka̱ʼa̱nñá ña̱, siʼí ta̱ maestro yóʼo xíniñúʼu kusi̱íní-iniñá xa̱ʼara. Soo ta̱ Jesús ni̱ka̱ʼa̱nra xíʼinñá: “Va̱ása; si̱íka ndóo na̱ xíniso̱ʼo tu̱ʼun Ndióxi̱ ta kéʼéna ña̱ Luc. 11:27, 28). Tá iin na̱ íyo se̱ʼe xítona ña̱ va̱ʼa ini na̱yóʼo, kúsi̱í-inina xíʼinna. Soo si̱íka kúnina tá xíniso̱ʼo se̱ʼena ña̱ káʼa̱n Jehová ta va̱ʼa kítáʼanna xíʼinra.
káʼa̱nña” (Ña̱ táxika ña̱ si̱í koo iniyó kúú ña̱ kítáʼan va̱ʼayó xíʼin Jehová. Soo tu̱ndóʼo va̱ása táxiña ña̱ si̱í kooyó, ta ni kǒo kivi kindaaña ña̱ si̱í íyo iniyó. Chi tá kúndeé-iniyó ta ndakúka íyo iniyó xíʼin Jehová, saá kúú ña̱ kusi̱íka-iniyó (Rom. 5:3-5). Ná ndakaʼányó chi Jehová táxira espíritura ndaʼa̱ na̱ kándíxa miíra, ta iin ña̱ va̱ʼa ña̱ táxi espíritu yóʼo kúú ña̱ si̱í koo iniyó (Gál. 5:22). Xa̱ʼa ña̱yóʼo Salmo 64:10 káʼa̱nña: “Na̱ va̱ʼa ini kándíxana Jehová ta kúsi̱íní-inina”.
¿Ndáaña chíndeétáʼan xíʼin ta̱ John ña̱ va̱ʼa kúsi̱í-inira ndiʼi tiempo?
Ndiʼi ña̱yóʼo náʼa̱ nu̱úyó nda̱chun va̱ʼa si̱íní ni̱xi̱yo ini ñá Diana xíʼin ta̱ John ni ni̱yáʼana nu̱ú ku̱a̱ʼá tu̱ndóʼo, na̱ xa̱a̱ ni̱ka̱ʼa̱nyó xa̱ʼa chi nu̱ú ki̱xaʼá ña̱ artículo yóʼo. Ñá Diana káchiñá: “Kándíxai̱ Jehová ña̱ ndáara yi̱ʼi̱ nda̱a̱ táki̱ʼva kándíxa iin ta̱ loʼo yivára”. Saátu káʼa̱nñá: “Túvii̱ ña̱ chíndeétáʼanva Jehová xíʼi̱n ña̱ kúsi̱í-inii̱ tá ku̱a̱ʼi̱n nátúʼi̱n xíʼin na̱ yiví xa̱ʼara”. ¿Nda̱saa ndóʼo ta̱ John? Miíra káʼa̱n ña̱ tá ku̱i̱ya̱ 1998 nda̱kiʼinra chiñu ña̱ sanáʼa̱ra ti̱xin ña̱ Escuela de Entrenamiento Ministerial ta ña̱yóʼo chi̱ndeétáʼan xíʼinra ña̱ sa̱kuaʼa va̱ʼakara kaʼvira. Xa̱ʼa ña̱yóʼo chi̱ka̱a̱ra ndeé ta ku̱si̱í-inira tá xi̱natúʼunra xa̱ʼa Ndióxi̱, tá ni̱yáʼa loʼo tiempo nda̱koora chiñu ña̱ xi̱kuura superintendente viajante. Káʼa̱nra ña̱ va̱ása yo̱ʼvi̱ní ni̱xi̱yoña nu̱úra xíʼin ñá síʼíra ña̱ nda̱koona chiñu yóʼo, chi na̱yóʼo xi̱kuni̱na kuniso̱ʼona ña̱ káʼa̱n Jehová ta keʼéna ña̱ kúni̱ra ta va̱ása ndándikó-inina xa̱ʼa ña̱yóʼo.
Ku̱a̱ʼání na̱ cristiano káʼa̱nna ña̱ tu̱ʼun va̱xi nu̱ú Salmo 64:10 ña̱ nda̱a̱ kúúña. Ná kotoyó ña̱ ndo̱ʼo iin na̱ matrimonio na̱ ka̱chíñu ya̱ʼaka 30 ku̱i̱ya̱ ti̱xin Betel ña̱ Estados Unidos, na̱yóʼo nda̱kiʼinna inka chiñu ña̱ koona precursor especial. Na̱yóʼo káʼa̱nna: “Ki̱vi̱ sándákoún iin chiñu ña̱ kútóoníún, kúsuchíva-iniún. Soo su̱ví ndiʼi tiempo ndóʼún saá”. Na̱yóʼo ndi̱ku̱n chi̱ka̱a̱na ndeé ña̱ keena natúʼunna xíʼin na̱ congregación nu̱ú íyona. Saátu káʼa̱nkana: “Xi̱keʼéníndi̱ oración nu̱ú Jehová. Ku̱si̱íní-inindi̱ tá ki̱ʼindi̱ kuenta ña̱ nda̱kuiinra oración ña̱ ke̱ʼéndi̱. Tá ni̱xa̱a̱ndi̱ ña̱ congregación yóʼo, savaka na̱ hermano ni̱xa̱a̱na ku̱una precursor. Ta xi̱kaʼvindi̱ xíʼin u̱vi̱ na̱ yiví ta na̱yóʼo va̱ʼaní xi̱chika̱a̱na ndeé ña̱ xi̱kaʼvina”.
NDIʼI TIEMPO KUSI̱Í-INIYÓ
Sava íxayo̱ʼvi̱ña xíʼinyó ña̱ koo si̱í iniyó. Koova sava ña̱ʼa ña̱ sakusuchí-iniyó. Soo Jehová sándi̱kora-iniyó xíʼin tu̱ʼun ña̱ va̱xi nu̱ú Salmo 64:10. Ni ndákava-iniyó, soo ná kandíxayó chi “na̱ va̱ʼa ini kándíxana Jehová ta kúsi̱íní-inina”. Ni nda̱a̱ ndáaka ña̱ʼa ná ndoʼoyó, kusi̱íva-iniyó chi kándíxayó Jehová. Saátu ndátuyó ña̱ ná kixa̱a̱ ki̱vi̱ ña̱ saxínura ña̱ káʼa̱nra xa̱ʼa “iin ndiví xa̱á xíʼin iin ñuʼú xa̱á”. Saá ndiʼi na̱ ndásakáʼnu Ndióxi̱ kǒoka ku̱a̱chi kúúmiína ta si̱íní koona ndiʼi tiempo xa̱ʼa ña̱ keʼé Jehová (Is. 65:17, 18).
Ná ndakanixi̱níyó xa̱ʼa ndiʼi ña̱ va̱ʼa ndakiʼinyó: va̱ása kúúmiíkayó kue̱ʼe̱ ta ndiʼi ki̱vi̱ si̱í kuniyó. Va̱ása ndakaʼánkayó xa̱ʼa ndiʼi ña̱ sa̱xóʼvi̱-iniyó. Jehová káʼa̱nra xíʼinyó, “ña̱ʼa ña̱ ni̱xi̱yo tá ya̱chi̱ va̱ása ndakaʼánka-inindó xa̱ʼaña”. Tá ná ndataku na̱ ni̱xi̱ʼi̱, koo tukuyó xíʼin na̱ veʼeyó na̱ xa̱a̱ ni̱xi̱ʼi̱. Ku̱a̱ʼání na̱ yiví kusi̱íní-inina xíʼin ña̱yóʼo, nda̱a̱ táki̱ʼva ku̱si̱í-ini na̱ yivá ñá loʼo ñá 12 ku̱i̱ya̱ ñá sa̱ndátaku ta̱ Jesús (Mar. 5:42). Tá ná kundoo ndiʼi na̱ yiví va̱ʼa nu̱ú ñuʼú yóʼo nina ña̱ va̱ʼa keʼé ndiʼina ta kusi̱íní-inina xíʼin Jehová ndiʼi tiempo.