ARTÍCULO ÑA̱ KAʼVIYÓ 50
Jehová chíndeétáʼanra xíʼinyó ña̱ va̱ʼa sa̱ñáyó
“Ta xíniñúʼu [...] ka̱ʼa̱nndó xíʼin ndiʼi na̱ íyo nu̱ú ñuʼú xa̱ʼa̱ ña̱ sa̱ñána” (LEV. 25:10).
YAA 22 Ná kaʼndachíñu Reino Ndióxi̱
ÑA̱ KA̱ʼA̱NYÓ XA̱ʼA̱ *
1, 2. a) ¿Ndáaña kúú ña̱ jubileo? (Koto recuadro “ ¿Ndáaña xi̱kuu ña̱ Jubileo?”). b) ¿Ndáaña ni̱ka̱ʼa̱n ta̱ Jesús xa̱ʼa̱ nu̱ú Lucas 4:16-18?
SAVA país, kéʼéna vikó xa̱ʼa̱ ña̱ xínu 50 ku̱i̱ya̱ ña̱ xáʼndachíñu iin rey. Ta ña̱ vikó yóʼo káʼa̱nna xíʼinña jubileo. Ña̱ vikó yóʼo xíyoña iin ki̱vi̱, iin semana á nda̱a̱ ku̱a̱ʼáka tiempo. Soo tá ndíʼiña, na̱ yiví kama nándósóna xa̱ʼa̱ vikó yóʼo.
2 Nu̱ú ña̱ artículo yóʼo, ka̱ʼa̱nyó xa̱ʼa̱ iin jubileo ña̱ va̱ʼaníka. Ña̱yóʼo va̱ʼaníkaña nu̱ú Jubileo ña̱ xi̱keʼé na̱ ñuu Israel tá xínu 50 ku̱i̱ya̱. Ta ña̱ vikó yóʼo iníí ku̱i̱ya̱ xi̱keʼénaña, tasaá kúú ña̱ xi̱sañána na̱ ñuu. ¿Nda̱chun ndáyáʼviña nu̱úyó tiempo vitin? Saáchi sándakaʼánña miíyó xa̱ʼa̱ ña̱ ke̱ʼé Jehová ña̱ va̱ʼa sa̱ñáyó ndiʼi tiempo. Ta̱ Jesús ni̱ka̱ʼa̱nra xa̱ʼa̱ ña̱yóʼo, ta xa̱a̱ kivi ndakiʼinyó ña̱ va̱ʼa xa̱ʼa̱ña (kaʼvi Lucas 4:16-18). *
Iin ña̱ si̱í-ini xi̱kuu ña̱ Jubileo nu̱ú na̱ ñuu Israel, chi na̱ xi̱kuu esclavo xi̱ndandikóna ñuuna xíʼin nu̱ú na̱ veʼena. (Koto párrafo 3). *
3. Nda̱a̱ táki̱ʼva káchi Levítico 25:8-12, ¿ndáaña va̱ʼa xi̱ndakiʼin na̱ ñuu Israel xa̱ʼa̱ ña̱ Jubileo?
3 Kivi kunda̱a̱ka-iniyó xa̱ʼa̱ ña̱ xi̱kuni̱ kachi ta̱ Jesús tá ni̱ka̱ʼa̱nra xa̱ʼa̱ ña̱ sa̱ñáyó, tá ná kotoyó ña̱ ni̱ka̱ʼa̱n Ndióxi̱ xíʼin na̱ ñuu Israel keʼéna ti̱xin ña̱ Jubileo. Ka̱chira: “Ta xíniñúʼu ndasayi̱i̱ndó ña̱ ku̱i̱ya̱ 50 ta ka̱ʼa̱nndó xíʼin ndiʼi na̱ íyo nu̱ú ñuʼú xa̱ʼa̱ ña̱ sa̱ñána. Ta ña̱ ku̱i̱ya̱ yóʼo kooña ña̱ Jubileo nu̱ú ndóʼó, ta iin iin ndóʼó ndakiʼinndó ñuʼúndó ta iin iin ndóʼó ndikóndó nu̱ú na̱ veʼendó” (kaʼvi Levítico 25:8-12). * Nu̱ú artículo ña̱ ni̱ya̱ʼa, ku̱ndaa̱-iniyó ndáaña va̱ʼa xi̱ndakiʼin na̱ ñuu Israel, xa̱ʼa̱ ña̱ va̱ása níxikachíñuna ña̱ ki̱vi̱ sábado. Vitin, kunda̱a̱-iniyó ndáaña va̱ʼa xi̱ndakiʼinna xa̱ʼa̱ ña̱ xi̱sañána. Ná kachiyó, ña̱ iin ta̱ ñuu Israel níkáníra ta xa̱ʼa̱ ña̱yóʼo ni̱xi̱kóra ñuʼúra ña̱ va̱ʼa chaʼvira ña̱ níkára. Ta tá ku̱i̱ya̱ ña̱ sáña̱na xi̱sandándikóna ñuʼúra. Xa̱ʼa̱ ña̱yóʼo, ta̱ ta̱a yóʼo xi̱ndakiʼinra ñuʼúra ta va̱ása níxindiʼi-xa̱ʼa̱ herencia ña̱ ndakiʼin se̱ʼera. Saátu, ná ndakanixi̱níyó xa̱ʼa̱ iin ta̱ ñuu Israel ta̱ kǒo xu̱ʼún á ña̱ kuxura, ta ña̱ va̱ʼa chaʼvira ña̱ níkára, nda̱a̱ íxi̱kóra se̱ʼera ña̱ koona esclavo, á nda̱a̱ íxi̱kóra miíra. Ta ku̱i̱ya̱ ña̱ sáña̱na, na̱ esclavo yóʼo ndándikóna nu̱ú na̱ veʼena. Xa̱ʼa̱ ña̱yóʼo, na̱ esclavo xi̱kunda̱a̱-inina ña̱ kixaa̱ iin ki̱vi̱ ña̱ sa̱ñána. ¿Á su̱ví ña̱ nda̱a̱ kúú ña̱ ndíʼi̱ní-ini Jehová xa̱ʼa̱ na̱ ndásakáʼnu-ñaʼá?
4, 5. ¿Nda̱chun ndáyáʼvi ña̱ Jubileo ña̱ xi̱keʼé na̱ ñuu Israel nu̱úyó?
4 ¿Ndáa inka ña̱ va̱ʼa xi̱ndakiʼinna xa̱ʼa̱ ña̱ Jubileo? Jehová ni̱ka̱ʼa̱nra: “Nda̱a̱ ni iin ndóʼó va̱ása xíniñúʼu xa̱a̱ndó koondó na̱ ndáʼvi, saáchi Jehová mií ña̱ nda̱a̱ taxira bendición ndaʼa̱ndó, nu̱ú ñuʼú ña̱ ni̱ka̱ʼa̱n Jehová Ndióxi̱ taxira ndaʼa̱ndó” (Deut. 15:4). Soo síínní íyo tiempo ña̱ ndóoyó vitin, chi na̱ ku̱i̱ká ndeéka ndúkuikána ta na̱ ndáʼvi ndeéka ndúndáʼvina.
5 Miíyó na̱ cristiano va̱ása ndíku̱nkayó ley ta̱ Moisés. Ña̱yóʼo kúni̱ kachiña ña̱ va̱ása kéʼékayó ña̱ káʼa̱nña, ta kúú ña̱ sañána na̱ esclavo, ña̱ ixakáʼnu-inina xa̱ʼa̱ ña̱ níkána á ña̱ sandándikóna ñuʼú na̱ veʼena (Rom. 7:4; 10:4; Efes. 2:15). Soo, ndáyáʼviní ña̱ Jubileo nu̱úyó. ¿Nda̱chun? Saáchi chí nu̱únínu kivi xa̱a̱yó sa̱ñáyó, ta ña̱yóʼo sándakaʼánña miíyó xa̱ʼa̱ ña̱ Jubileo ña̱ xi̱keʼé na̱ ñuu Israel.
TA̱ JESÚS NI̱KA̱ʼA̱NRA XA̱ʼA̱ ÑA̱ SA̱ÑÁYÓ
6. ¿Ndáaña xíniñúʼu sa̱ñá miíyó na̱ yiví nu̱ú?
6 Ndiʼiyó xíniñúʼu sa̱ñáyó, saáchi kúúyó na̱ yiví ku̱a̱chi. Xa̱ʼa̱ ña̱yóʼo, kúchéeyó, kíʼin kue̱ʼe̱ miíyó ta xíʼi̱yó. Kíʼinyó kuenta ña̱ kúúyó na̱ yiví ku̱a̱chi, tá xítoyó miíyó nu̱ú iin espejo, á xa̱ʼa̱ ña̱ xíniñúʼu ku̱ʼu̱nyó nu̱ú doctor xa̱ʼa̱ ña̱ ndeé ndóʼoyó. Saátu, ndákava-iniyó tá kíʼviyó ku̱a̱chi. Ta̱ apóstol Pablo nda̱kunira ña̱ kúúra ta̱ ku̱a̱chi. Ka̱chira: “Ndáʼvinívai̱. ¿Ndáana chindeétáʼan xíʼi̱n ña̱ va̱ása kuvii̱?” (Rom. 7:23, 24).
7. ¿Ndáaña ni̱ka̱ʼa̱n ta̱ Isaías xa̱ʼa̱ ña̱ sa̱ñáyó?
7 Xíʼin ña̱ si̱í-ini Jehová ndu̱kúra ndáa ki̱ʼva sakǎkura miíyó nu̱ú ku̱a̱chi. Ta ta̱ Jesús kúú ta̱ kivi sakǎku miíyó nu̱ú ña̱yóʼo. Tá siglo u̱na̱ ña̱ tiempo xi̱naʼá, ta̱ profeta Isaías ni̱ka̱ʼa̱nra xa̱ʼa̱ ña̱ sa̱ñáyó chí nu̱únínu, ta ña̱yóʼo va̱ʼaníka kooña nu̱ú ña̱ Jubileo. Ka̱ʼyíra: “Mií espíritu táta Jehová íyoña xíʼi̱n, saáchi mií Jehová nda̱ka̱xin yi̱ʼi̱ ña̱ ka̱ʼi̱n xa̱ʼa̱ tu̱ʼun va̱ʼa xíʼin na̱ yiví na̱ vitá-ini. Chi̱ndaʼára yi̱ʼi̱ ña̱ ku̱ʼi̱n chindeétáʼi̱n xíʼin na̱ kúsuchí-ini, ña̱ ka̱ʼi̱n xa̱ʼa̱ ña̱ tavána na̱ ndási” (Is. 61:1). Ná kotoyó ndáana káʼa̱n ña̱ profecía yóʼo xa̱ʼa̱.
8. ¿Ndáana káʼa̱n ña̱ profecía ta̱ Isaías xa̱ʼa̱?
8 Ña̱ profecía ña̱ ndáyáʼviní yóʼo, ki̱xáʼaña xínuña tá ki̱xáʼa ta̱ Jesús na̱túʼunra xa̱ʼa̱ Ndióxi̱. Tá ni̱xa̱ʼa̱nra sinagoga ña̱ ñuu Nazaret nu̱ú xa̱ʼnura, ta ka̱ʼvira profecía ta̱ Isaías nu̱ú na̱ judío na̱ nda̱kutáʼan kán. Ta ni̱ka̱ʼa̱nra xa̱ʼa̱ miíra, tá ni̱ka̱ʼa̱nra ña̱ tu̱ʼun yóʼo: “Mií espíritu táta Jehová íyoña xíʼi̱n, saáchi miíra nda̱ka̱xin yi̱ʼi̱ ña̱ ka̱ʼi̱n xa̱ʼa̱ tu̱ʼun va̱ʼa xíʼin na̱ yiví na̱ ndáʼvi. Chi̱ndaʼára yi̱ʼi̱ ña̱ ka̱ʼi̱n xa̱ʼa̱ ña̱ sa̱ñá na̱ ndási, ña̱ sándaʼi̱ na̱ va̱ása túvi nu̱ú, ta chindeétáʼi̱n xíʼin na̱ kúsuchí-ini ta sakǎkui̱na, ta natúʼi̱n xa̱ʼa̱ tiempo ña̱ keʼé Jehová ña̱ va̱ʼa” (Luc. 4:16-19). ¿Ndáa ki̱ʼva sa̱xínu ta̱ Jesús ña̱ profecía yóʼo?
NA̱ NU̱Ú NI̱SA̱ÑÁ
Ta̱ Jesús káʼa̱nra xa̱ʼa̱ ña̱ sa̱ñá na̱ yiví ti̱xin sinagoga ña̱ ñuu Nazaret. (Koto párrafo 8 xíʼin 9).
9. ¿Ndáaña xi̱kuni̱ na̱ yiví na̱ ni̱xi̱yo tá tiempo ta̱ Jesús sa̱ñána nu̱ú?
9 Tá siglo nu̱ú, na̱ yiví ki̱xáʼana sáña̱na nda̱a̱ táki̱ʼva ni̱ka̱ʼa̱n ta̱ Isaías nu̱ú ña̱ ka̱ʼvi ta̱ Jesús. Saá ni̱ka̱ʼa̱n miíra: “Vitin kúú ña̱ xínu ña̱ káʼa̱n tu̱ʼun Ndióxi̱ ña̱ xi̱niso̱ʼondó” (Luc. 4:21). Ku̱a̱ʼání na̱ xi̱niso̱ʼo ña̱ ni̱ka̱ʼa̱n ta̱ Jesús, xi̱kuni̱na sa̱ñána nu̱ú na̱ chíñu ña̱ ñuu Roma. Sana inkáchi xi̱ndakanixi̱nína xíʼin u̱vi̱ na̱ ta̱a na̱ ni̱ka̱ʼa̱n: “Ndi̱ʼi̱ xi̱ndatundi̱ ña̱ sakǎku ta̱yóʼo na̱ ñuu Israel” (Luc. 24:13, 21). Soo, kúnda̱a̱-iniyó ña̱ va̱ása ni̱ka̱ʼa̱n ta̱ Jesús xíʼin na̱ xi̱ndiku̱nñaʼá, ña̱ va̱ása kandíxana na̱ ñuu Roma. Chi ni̱ka̱ʼa̱nra xíʼinna “chaʼvindó ña̱ʼa ta̱ César ndaʼa̱ra” (Mat. 22:21). Tá saá, ¿ndáa ki̱ʼva sa̱kǎku ta̱ Jesús na̱ yiví na̱ xi̱ndoo tá tiempo ña̱ ni̱xi̱yora?
10. ¿Ndáaña ni̱sa̱ñá na̱ yiví nu̱ú i̱xaa ta̱ Jesús?
10 Se̱ʼe Ndióxi̱ ki̱xira ña̱ chindeétáʼanra xíʼin na̱ yiví ña̱ va̱ʼa sa̱ñána nu̱ú u̱vi̱ ña̱ʼa. Ña̱ nu̱ú, chi̱ndeétáʼanra xíʼinna ña̱ sa̱ñána nu̱ú ña̱ vatá ña̱ sánáʼa̱ na̱ veʼe-ñu̱ʼu. Ku̱a̱ʼání na̱ judío xi̱kandíxana costumbre ña̱ va̱ása va̱ʼa (Mat. 5:31-37; 15:1-11). Na̱ yiví na̱ xi̱ndakanixi̱ní ña̱ chíndeétáʼanna xíʼin inkana, va̱ása ndixa ndásakáʼnuna Ndióxi̱, ña̱kán táki̱ʼva íyo na̱ va̱ása túvi nu̱ú saá íyona. Xa̱ʼa̱ ña̱ va̱ása níkandíxana ta̱ Mesías, va̱ása ni̱xa̱a̱na kunda̱a̱-inina xa̱ʼa̱ Ndióxi̱, ña̱kán kúúna esclavo nu̱ú ku̱a̱chi (Juan 9:1, 14-16, 35-41). Ta̱ Jesús sa̱náʼa̱ra na̱ yiví na̱ vitá-ini ndáa ki̱ʼva sa̱ñána nu̱ú ña̱ vatá, tá sa̱náʼa̱rana ña̱ nda̱a̱ ta chi̱núura iin yichi̱ va̱ʼa nu̱úna (Mar. 1:22; 2:23–3:5).
11. ¿Ndáa inka ki̱ʼva sa̱kǎku ta̱ Jesús na̱ yiví?
11 Ña̱ u̱vi̱, ta̱ Jesús ku̱chiñura sa̱kákura ndiʼiyó nu̱ú ku̱a̱chi. Tíxa̱ʼvi ña̱ ni̱xi̱ʼi̱ra, Ndióxi̱ kivi ixakáʼnu-inira xa̱ʼa̱ ku̱a̱chi na̱ kándíxa ña̱ ni̱xi̱ʼi̱ ta̱ Jesús xa̱ʼa̱na, ta náʼa̱naña xíʼin ña̱ kéʼéna (Heb. 10:12-18). Ta̱ Jesús ni̱ka̱ʼa̱nra: “Tá ná sakǎku se̱ʼe Ndióxi̱ miíndó, ña̱ ndixa kúú ña̱ sa̱ñávandó” (Juan 8:36). Ta ña̱yóʼo va̱ʼaníkaña nu̱ú ña̱ xi̱sañá ña̱ ñuu Israel ña̱ ku̱i̱ya̱ ña̱ Jubileo. Tá kúú, tá iin na̱ yiví xi̱sañána ti̱xin ña̱ Jubileo kivi tuku ndikóna koona esclavo, ta nda̱a̱ kivi kuvina.
12. ¿Ndáana kúú na̱ nu̱ú na̱ nda̱kiʼin ña̱ va̱ʼa xa̱ʼa̱ ña̱ ni̱ka̱ʼa̱n ta̱ Jesús?
12 Tá ki̱vi̱ ña̱ Pentecostés ña̱ ku̱i̱ya̱ 33, Jehová nda̱ka̱xinra na̱ apóstol xíʼin espíritu santo, ta saátu inka na̱ yiví na̱ nda̱kú íyo ini. Ta táki̱ʼva íyo se̱ʼera saá íyona, xa̱ʼa̱ ña̱yóʼo tá ná ya̱ʼa tiempo sandátakurana ña̱ kaʼndachíñuna xíʼin ta̱ Jesús chí ndiví (Rom. 8:2, 15-17). Na̱yóʼo kúú na̱ nu̱ú na̱ nda̱kiʼin ña̱ va̱ʼa, xa̱ʼa̱ ña̱ ni̱ka̱ʼa̱n ta̱ Jesús ti̱xin ña̱ sinagoga ña̱ ñuu Nazaret. Va̱ása níxikuukana esclavo nu̱ú ña̱ vatá ña̱ sánáʼa̱ na̱ veʼe-ñu̱ʼu, ni nu̱ú costumbre ña̱ ndíku̱nna ña̱ va̱ása kítáʼan xíʼin ña̱ káʼa̱n tu̱ʼun Ndióxi̱. Ta saátu nu̱ú Ndióxi̱ su̱víka na̱ yiví ku̱a̱chi kúúna. Ta ña̱ Jubileo ña̱ ki̱xáʼa tá nda̱ka̱xinna na̱ ndíku̱n ta̱ Cristo tá ku̱i̱ya̱ 33, ndiʼiña tá ná ndiʼi ña̱ mil ku̱i̱ya̱ ña̱ kaʼndachíñu ta̱ Jesús. ¿Ndáaña kuchiñuna keʼéna?
KU̱A̱ʼÁNÍKA NA̱ YIVÍ SA̱ÑÁNA
13, 14. Xa̱ʼa̱ ña̱ xa̱a̱ ni̱sa̱ñá na̱ ku̱ʼu̱n chí ndiví, ¿ndáa inkaka na̱ yiví kivi sa̱ñá nda̱a̱ táki̱ʼva ni̱ka̱ʼa̱n ta̱ Jesús?
13 Tiempo vitin, íyo ku̱a̱ʼáníka na̱ yiví na̱ kúú na̱ inka ndikachi (Juan 10:16). Jehová va̱ása níndaka̱xinrana ña̱ ku̱ʼu̱nna kaʼndachíñuna xíʼin ta̱ Jesús chí ndiví, chi nda̱a̱ táki̱ʼva káchi Biblia ndátuna kutakuna nu̱ú ñuʼú yóʼo ndiʼi tiempo. ¿Á ña̱yóʼo kúú ña̱ ndátu miíyó?
14 Miíyó xa̱a̱ ndákiʼinyó sava ña̱ va̱ʼa ña̱ ndákiʼin na̱ kaʼndachíñu xíʼin ta̱ Jesús chí ndiví. Tá kúú, kivi kukáʼnu-ini Ndióxi̱ xa̱ʼa̱ ku̱a̱chiyó tíxa̱ʼvi ña̱ kándíxayó ña̱ ni̱xi̱ʼi̱ ta̱ Jesús xa̱ʼa̱yó. Xa̱ʼa̱ ña̱yóʼo, va̱ʼa íyoyó nu̱ú Jehová ta saátu vií íyo ña̱ xínitúni̱yó (Efes. 1:7; Apoc. 7:14, 15). Saátu ná ndakanixi̱níyó xa̱ʼa̱ ña̱ va̱ʼa ña̱ nda̱kiʼinyó, xa̱ʼa̱ ña̱ ni̱sa̱ñáyó nu̱ú ña̱ vatá ña̱ sánáʼa̱ na̱ veʼe-ñu̱ʼu. Ta̱ Jesús ni̱ka̱ʼa̱nra: “Ta kunda̱a̱-inindó xa̱ʼa̱ ña̱ nda̱a̱ ta ña̱yóʼo sañá ndóʼó” (Juan 8:32). Kúsi̱íní-iniyó xa̱ʼa̱ ña̱ ni̱sa̱ñáyó.
15. ¿Ndáaña sa̱ñáyó nu̱ú chí nu̱únínu, ta ndáa bendición ndakiʼinyó?
15 Kivi ndakiʼinyó ku̱a̱ʼáníka ña̱ va̱ʼa xa̱ʼa̱ ña̱ sa̱ñáyó chí nu̱únínu. Si̱lóʼo kúma̱ní, ta ta̱ Jesús sandiʼi-xa̱ʼa̱ra ndiʼi na̱ veʼe-ñu̱ʼu vatá, ta saátu ndiʼi na̱ chíñu na̱ va̱ása vií xáʼndachíñu na̱ íyo nu̱ú ñuʼú yóʼo. Ta Ndióxi̱ kundaara na̱ gran muchedumbre na̱ nda̱kúní íyo ini, ta taxira ku̱a̱ʼání bendición ndaʼa̱na nu̱ú ñuʼú livi (Apoc. 7:9, 14). Ta saátu sandátakura ku̱a̱ʼání na̱ yiví, ta na̱yóʼo va̱ása kuumiíkana ku̱a̱chi ña̱ xi̱kuumií ta̱ Adán (Hech. 24:15).
16. ¿Ndáaña sa̱ñá ndiʼi na̱ yiví nu̱ú?
16 Ti̱xin ña̱ mil ku̱i̱ya̱ ña̱ kaʼndachíñu ta̱ Jesús, miíra xíʼin na̱ kaʼndachíñu xíʼinra chindeétáʼanna xíʼin na̱ yiví, ña̱ vií koona ta va̱ása kiʼinka kue̱ʼe̱na, ta saátu ña̱ va̱ʼaní kutáʼanna xíʼin Jehová. Ta ña̱ sa̱ñáyó yóʼo, kooña nda̱a̱ táki̱ʼva ni̱xi̱yo ña̱ Jubileo ña̱ ñuu Israel. Ta ndiʼi na̱ nda̱kú íyo ini xíʼin Jehová, va̱ása kookana na̱ yiví ku̱a̱chi, saá kúú ña̱ sa̱ñána nu̱ú ku̱a̱chi.
Nu̱ú ñuyǐví xa̱á, kusi̱íní-iniyó ña̱ kachíñuyó ta saátu ña̱ ndakindee̱yó. (Koto párrafo 17).
17. Nda̱a̱ táki̱ʼva káchi Isaías 65:21-23, ¿ndáa ki̱ʼva koo ña̱ kutaku na̱ ndásakáʼnu Ndióxi̱? (Koto na̱ʼná ña̱ va̱xi chí sa̱tá tutu yóʼo).
17 Nu̱ú Isaías 65:21-23 * (kaʼviña) káʼa̱nña xa̱ʼa̱ ndáa ki̱ʼva kutakuyó nu̱ú ñuʼú yóʼo. Ndiʼi na̱ ndásakáʼnu Ndióxi̱ va̱ása kundoo miína. Chi ña̱ Biblia káchiña ña̱ keʼéna ku̱a̱ʼá chiñu ña̱ sákusi̱í-inina. Kivi kandíxayó ña̱ tá ná ndiʼi ña̱yóʼo, saátu ndiʼi na̱ i̱xava̱ʼa Ndióxi̱, sa̱ñána ndaʼa̱ ku̱a̱chi ta koona táki̱ʼva íyo na̱ se̱ʼe Ndióxi̱ (Rom. 8:21).
18. ¿Nda̱chun kándíxayó ña̱ íyo iin ña̱ va̱ʼaní ndátuyó chí nu̱únínu?
18 Jehová ni̱ka̱ʼa̱nra ña̱ na̱ ñuu Israel, koo iin tiempo ña̱ ndakindee̱na ta saátu ña̱ kachíñuna, ta saátu keʼéra xíʼin na̱ ndásakáʼnu-ñaʼá ti̱xin ña̱ mil ku̱i̱ya̱ ña̱ kaʼndachíñu ta̱ Cristo. Ndiʼi na̱yóʼo vií kuniñúʼuna tiempona ña̱ keʼéna ña̱ kúni̱ Jehová. Chi nda̱a̱ táki̱ʼva kéʼéyó vitin, saátu ndasakáʼnuyó Ndióxi̱ nu̱ú ñuyǐví xa̱á, ta tá ná keʼéyó ña̱yóʼo kusi̱íní-iniyó. Ndiʼi miíyó na̱ nda̱kú íyo ini ndásakáʼnu Ndióxi̱ keʼéyó chiñu ña̱ sákusi̱í-iniyó, ta saátu kachíñuyó nu̱ú Jehová.
YAA 142 Ná kǒo nandósóyó xa̱ʼa ña̱ ndátuyó
^ párr. 5 Nu̱ú ley ta̱ Moisés, Jehová ni̱ka̱ʼa̱nra xíʼin na̱ ñuu Israel ña̱ ná keʼéna ña̱ Jubileo, ta ña̱yóʼo xi̱ndayáʼviníña chi saá kúú ña̱ xi̱sañá na̱ ñuu Israel. Miíyó na̱ cristiano va̱ása ndíku̱nkayó ña̱ ley yóʼo, soo ña̱ Jubileo ndáyáʼvivaña nu̱úyó. Nu̱ú ña̱ artículo yóʼo, kunda̱a̱-iniyó ndáa ki̱ʼva kítáʼan ña̱ Jubileo xíʼin iin ña̱ ke̱ʼé Jehová xa̱ʼa̱yó, ta ndáaña va̱ʼa ndakiʼinyó.
^ párr. 2 Lucas 4:16-18: “Ta ni̱xa̱a̱ra ña̱ ñuu Nazaret, nu̱ú xa̱ʼnura, ta nda̱a̱ táki̱ʼva xa̱a̱ kéʼéra ña̱ ki̱vi̱ sábado, ni̱ki̱ʼvira ini ña̱ sinagoga, ta xi̱kundichira ña̱ kaʼvira. 17 Tasaá ta̱xina rollo ta̱ profeta Isaías ndaʼa̱ra. Ta na̱kunáraña ta nda̱ni̱ʼíra nu̱ú ni̱ka̱ʼyi̱: 18 ‘Mií espíritu táta Jehová íyoña xíʼi̱n, saáchi miíra nda̱ka̱xin yi̱ʼi̱ ña̱ ka̱ʼi̱n xa̱ʼa̱ tu̱ʼun va̱ʼa xíʼin na̱ yiví na̱ ndáʼvi. Chi̱ndaʼára yi̱ʼi̱ ña̱ ka̱ʼi̱n xa̱ʼa̱ ña̱ sa̱ñá na̱ ndási, ña̱ sándaʼi̱ na̱ va̱ása túvi nu̱ú, ta chindeétáʼi̱n xíʼin na̱ kúsuchí-ini ta sakǎkui̱naʼ”
^ párr. 3 Levítico 25:8-12: “Ta kaʼviún u̱xa̱ ku̱i̱ya̱ ña̱ sábado, u̱xa̱ yichi̱ kaʼviún u̱xa̱ ku̱i̱ya̱, ta ndiʼi ña̱ u̱xa̱ ku̱i̱ya̱ ña̱ sábado yóʼo xa̱a̱ña kooña 49 ku̱i̱ya̱. 9 Ta xíniñúʼu ndeéní tiviún ndiki̱ ña̱ yo̱o̱ u̱xa̱, ña̱ ki̱vi̱ u̱xu̱ tí yo̱o̱ yóʼo; ña̱ ki̱vi̱ ña̱ expiación ndóʼó xíniñúʼu tivindó ndiki̱ iníí ñuundó. 10 Ta xíniñúʼu ndasayi̱i̱ndó ña̱ ku̱i̱ya̱ 50 ta ka̱ʼa̱nndó xíʼin ndiʼi na̱ íyo nu̱ú ñuʼú xa̱ʼa̱ ña̱ sa̱ñána. Ta ña̱ ku̱i̱ya̱ yóʼo kooña ña̱ Jubileo nu̱ú ndóʼó, ta iin iin ndóʼó ndakiʼinndó ñuʼúndó ta iin iin ndóʼó ndikóndó nu̱ú na̱ veʼendó. 11 Ta ña̱ ku̱i̱ya̱ 50 kooña ña̱ Jubileo nu̱ú ndóʼó. Ta va̱ása xíniñúʼu chiʼindó, ta ni va̱ása xíniñúʼu ndakiʼindó ña̱ ni̱ndu̱ta̱ mií nu̱ú ñuʼú, ta ni va̱ása ndakiʼindó uva tí íyo ndaʼa̱ yitu̱n tú va̱ása níxaʼndana. 12 Chi ku̱i̱ya̱ ña̱ Jubileo kúúña. Ta ña̱yóʼo xíniñúʼu kooña ña̱ yi̱i̱ nu̱úndó. Ndiʼi ña̱ íyo chí yuku̱ kiviva kaxíndóña”.
^ párr. 17 Isaías 65:21-23: “Keʼéna veʼe, ta miína koo iniña; ta chiʼina uva ta miína kaxirí. 22 Kǒo keʼéna veʼe ta inkana koo iniña; va̱ása chiʼina uva ta inkana kaxirí. Chi na̱ ñui̱ ku̱a̱ʼákaví tiempo koona táki̱ʼva xíyo iin yitu̱n, ndiʼi chiñu keʼéna kusi̱í-inina xíʼinña. 23 Va̱ása kachíñuna xa̱ʼa̱ inkana, tá ná kaku se̱ʼena va̱ása kuvi na̱ va̱lí yóʼo; miína xíʼin se̱ʼena ndakiʼinna bendición Jehová, ta saátu se̱ʼe na̱ se̱ʼena”.
^ párr. 64 ÑA̱ KÁʼA̱N XA̱ʼA̱ NA̱ʼNÁ: Tá ku̱i̱ya̱ ña̱ Jubileo, sava na̱ ta̱a na̱ xi̱kuu esclavo ni̱sa̱ñána, ndándikóna ñuuna xíʼin nu̱ú na̱ veʼena.
