Ña̱ káʼa̱n Deuteronomio 22:25-27 va̱ása xíniñúʼu na̱ʼa̱ káxiña ña̱ ta̱ ta̱a yóʼo kúúmiíra ku̱a̱chi, chi xa̱a̱ kúnda̱a̱va-iniyó ña̱ kúúmiíra ku̱a̱chi. Ña̱ ley yóʼo xi̱ka̱ʼa̱nña xa̱ʼa̱ ñá ñaʼá chi kǒo ku̱a̱chi kúúmiíñá. Ná kotoyó ña̱ káʼa̱nkaña.

Ña̱ versículo ña̱ va̱xi chí sa̱táka káʼa̱nña, xa̱ʼa̱ ta̱a ta̱ ke̱ʼé ña̱ kini chí ñuu, xíʼin iin ñá loʼo ñá xa̱a̱ íyo tu̱ʼun xa̱ʼa̱ ña̱ tindaʼa̱ñá. Chi ñá ñaʼá ñá xa̱a̱ íyo tu̱ʼun xa̱ʼa̱ ña̱ tindaʼa̱ñá, nda̱a̱ táki̱ʼva íyo ñá xa̱a̱ íyo yií saá íyoñá, ta ta̱yóʼo ni̱ki̱ʼvira ku̱a̱chi xíʼinñá. ¿Ndáaña ke̱ʼé ñá ñaʼá yóʼo? Va̱ása níkana kóʼóñá ña̱ chindeétáʼanna xíʼinñá. Tá níkeʼéñá ña̱yóʼo, kuniso̱ʼova inka na̱ yiví ta chindeétáʼanna xíʼinñá. Soo, xa̱ʼa̱ ña̱ va̱ása níkanañá, saátu ñáyóʼo ni̱ki̱ʼviñá ku̱a̱chi. Xa̱ʼa̱ ña̱yóʼo u̱vi̱ saána kúúmií ku̱a̱chi (Deut. 22:23, 24).

Ta saátu ña̱ ley káʼa̱nña xa̱ʼa̱ inka ña̱ kítáʼan xíʼin ña̱yóʼo: “Soo, tá chi yuku̱ kúú nu̱ú xi̱ni iin ta̱a iin ñá loʼo ñá xa̱a̱ íyo tu̱ʼun xa̱ʼa̱ ña̱ tindaʼa̱ñá, ta ta̱yóʼo i̱xandúxara xíʼinñá ta ni̱ki̱si̱ra xíʼinñá, ta̱ ta̱a yóʼo xíniñúʼu kuvira xa̱ʼa̱ ña̱ ke̱ʼéra, ta ñá loʼo yóʼo, nda̱a̱ ni iin ña̱ʼa va̱ása xíniñúʼu keʼéndó xíʼinñá. Soo, ñáyóʼo va̱ása níki̱ʼviñá ku̱a̱chi ña̱ xíniñúʼu kuviñá xa̱ʼa̱. Ña̱yóʼo, nda̱a̱ táki̱ʼva íyo ña̱ kéʼé iin ta̱a ta̱ xáʼní ñanitáʼan saá íyoña. Saáchi ta̱ ta̱a yóʼo nda̱ni̱ʼírañá chí yuku̱ ta ñáyóʼo ka̱na kóʼóñá, soo nda̱a̱ ni iin na̱ yiví kǒo ña̱ chindeétáʼan xíʼinñá” (Deut. 22:25-27).

Soo tá xi̱kuu ña̱yóʼo, na̱ juez xi̱xiniñúʼu kuniso̱ʼona ña̱ káʼa̱n ñá ñaʼá yóʼo. Xi̱ka̱ʼa̱nna ña̱ ka̱na kóʼóñá, soo kǒo na̱ níchindeétáʼan xíʼinñá. Xa̱ʼa̱ ña̱yóʼo, ñá ñaʼá yóʼo va̱ása níkiʼviñá ku̱a̱chi. Soo, ta̱ ta̱a yóʼo, kúúmiívara ku̱a̱chi xa̱ʼa̱ ña̱ ke̱ʼéra ña̱ kini xíʼinñá, saáchi i̱xandúxara xíʼinñá ta ni̱ki̱si̱ra xíʼinñá.

Xa̱ʼa̱ ña̱yóʼo, ni ña̱ ley xi̱ka̱ʼa̱nña xa̱ʼa̱ ñá ñaʼá ñá kǒo ku̱a̱chi kúúmií, ña̱ relato káchiña ta̱ ta̱a kúú ta̱ kúúmií ku̱a̱chi xa̱ʼa̱ ña̱ kini ña̱ ke̱ʼéra. Kivi kandíxayó, ña̱ na̱ juez xi̱nandukú va̱ʼana xa̱ʼa̱ ña̱ ku̱u ta xi̱xitona ndáaña xíniñúʼu keʼéna, ta ña̱yóʼo xíniñúʼu kitáʼanña xíʼin ña̱ xa̱a̱ ni̱ka̱ʼa̱n Ndióxi̱ xíʼinna ku̱a̱ʼá yichi̱ (Éx. 20:14; Deut. 13:14; 17:4).