¿Á kivi ndakuiún pregunta yóʼo, ña̱ káʼa̱n xa̱ʼa̱ ña̱ ka̱na nu̱ú Tutu Ña̱ Nátúʼun xíʼinyó ña̱ ku̱i̱ya̱ 2019?

¿Ndáaña kúni̱ kachi ña̱ ni̱ka̱ʼa̱n Ndióxi̱ ña̱yóʼo: “Nda̱a̱ ndáakaña ná kuni̱na keʼéna xíʼún kǒo kuchiñuna xíʼún”? (Is. 54:17).

Kivi kandíxayó ña̱ kundaava Ndióxi̱ miíyó, nu̱ú nda̱a̱ ndáaka na̱ kúni̱ keʼé ña̱ va̱ása xíʼinyó (Is. 25:4, 5). Ni ná keʼé na̱ sáa̱-ini xíni miíyó ña̱ va̱ása va̱ʼa xíʼinyó, su̱ví ndiʼi tiempo saxo̱ʼvi̱ña miíyó (w19.01, página 6 xíʼin 7).

¿Ndáa ki̱ʼva ni̱na̱ʼa̱ Ndióxi̱, ña̱ nda̱kú íyo inira xíʼin ña̱ ke̱ʼéra xíʼin na̱ cananeo ta saátu xíʼin na̱ israelita, na̱ xi̱keʼé ña̱ va̱ása va̱ʼa?

Jehová ta̱xira castigo ndaʼa̱ na̱ xi̱keʼé ku̱a̱ʼání ña̱ kini, ta saátu ni̱ka̱ʼa̱nra xíʼin na̱ xi̱ ixandi̱va̱ʼa xíʼin ná ñaʼá á na̱ va̱lí. Soo, ta̱xira ku̱a̱ʼání ña̱ va̱ʼa ndaʼa̱ na̱ xi̱niso̱ʼo ta ke̱ʼéna ña̱ va̱ʼa xíʼin táʼanna (w19.02, página 22 xíʼin 23).

¿Ndáaña keʼéyó tá iin na̱ va̱ása kúú testigo Jehová kéʼéna oración nu̱úyó?

Kivi táxinva kooyó, ta to̱ʼó koo iniyó xíʼinna, soo va̱ása ka̱ʼa̱nyó “saá ná koo” ni va̱ása tiinyó ndaʼa̱na. Kiviva kúee ka̱ʼa̱n miíyó xíʼin Jehová (w19.03, página 31).

¿Nda̱chun iin ku̱a̱chi ndeé kúú ña̱ kini ña̱ kéʼéna xíʼin na̱ va̱lí?

Ña̱ kéʼéna ña̱ kini xíʼin na̱ va̱lí, iin ku̱a̱chi káʼnu kúúña nu̱ú na̱ congregación, na̱ chíñu ta saátu nu̱ú Ndióxi̱. Ñuu nu̱ú íyo ley ña̱ káʼa̱n ña̱ kiviva natúʼunna xíʼin na̱ chíñu, xa̱ʼa̱ na̱ ke̱ʼé ña̱ kini xíʼin na̱ va̱lí, na̱ anciano ndíku̱nvana ña̱yóʼo (w19.05, página 9 xíʼin 10).

¿Ndáaña kivi keʼéyó ña̱ va̱ʼa nasamayó ña̱ ndákanixi̱níyó?

Xíniñúʼu keʼéyó u̱ni̱ ña̱ʼa ña̱ ndáyáʼviní: ka̱ʼa̱nyó xíʼin Jehová, ta ndákanixi̱níyó ndáa ki̱ʼva íyoyó, ta vií ndaka̱xinyó na̱ koo migoyó (w19.06, página 11).

¿Ndáaña xíniñúʼu keʼéyó vitin ña̱ va̱ʼa koo tu̱ʼvayó nu̱ú tu̱ndóʼo ña̱ va̱xi?

Xíniñúʼu ndasandakúyó ña̱ kítáʼanyó xíʼin Jehová, ta kandíxayó ña̱ kúʼvi̱ní-inira xínira miíyó, ta va̱ása sandákoo ndaʼa̱ra miíyó, kaʼviyó Biblia ndiʼi ki̱vi̱ ta ka̱ʼa̱n ni̱ʼiyó xíʼinra. Ta kandíxayó ña̱ sáxi̱nu Ndióxi̱ ndiʼi ña̱ ni̱ka̱ʼa̱nra, ta xíniñúʼu sakuaʼa xíʼin xi̱níyó texto ña̱ va̱xi nu̱ú Biblia ña̱ kútóoyó, xíʼin yaa ña̱ xítayó nu̱ú Jehová (w19.07, página 2 nda̱a̱ 4).

¿Ndáaña kivi keʼéyó ña̱ chindeétáʼanyó xíʼin na̱ veʼeyó ña̱ va̱ʼa ka̱kuna?

Ndáyáʼviní ña̱ ná na̱ʼa̱yó ña̱ ndíʼi̱-iniyó xa̱ʼa̱na, ta ná kunina ña̱ va̱ʼa íyo ña̱ kéʼéyó, ta saátu to̱ʼó ná kooyó ta kúee ná koo iniyó (w19.08, página 15 nda̱a̱ 17).

Nda̱a̱ táki̱ʼva káchi Mateo 11:28, ¿ndáa ki̱ʼva sándi̱ko ta̱ Jesús iniyó?

Kúúmiíyó na̱ superintendente na̱ kúʼvi̱ní-ini xíni miíyó, xíʼin na̱ va̱ʼaní kítáʼan xíʼinyó, xíʼin iin chiñu va̱ʼaní ña̱ kéʼéyó (w19.09, página 23).

¿Ndáa ki̱ʼva táxi Ndióxi̱ ndee̱ ndaʼa̱yó ña̱ kuni̱yó keʼéyó ña̱ kúni̱ra? (Filip. 2:13).

Ki̱vi̱ káʼviyó Biblia ta ndákanixi̱níyó xa̱ʼa̱ña, Ndióxi̱ táxira ndee̱ ndaʼa̱yó ña̱ kuni̱yó keʼéyó chiñura. Xíʼin espíritu santora kivi chindeétáʼanra xíʼinyó ña̱ ku̱a̱ʼáka ña̱ʼa kuxini̱yó keʼéyó (w19.10, página 21).

¿Ndáaña xíniñúʼu keʼéyó tá kúma̱níka ndaka̱xinyó ña̱ keʼéyó?

U̱ʼu̱n kúú ña̱ xíniñúʼu keʼéyó: ná nandukú va̱ʼayó xa̱ʼa̱ ña̱ kúni̱yó keʼéyó, ná ndukúyó ña̱ ndíchi nu̱ú Jehová, ná kotoyó ndáa xa̱ʼa̱ kúni̱yó keʼéyóña, ná kunda̱a̱ va̱ʼa iniyó ndáaña kúni̱yó keʼéyó, ta viíní ná kotoyó ndáaña kivi keʼéyó (w19.11, página 27 nda̱a̱ 29).

Tá ni̱ka̱ʼa̱n ta̱ Ndi̱va̱ʼa xíʼin ñá Eva ¿á ni̱ka̱ʼa̱nra ña̱ tá xíʼi̱ iin na̱ yiví ndóo níma̱na?

Va̱ása. Ta̱ Ndi̱va̱ʼa va̱ása ni̱ka̱ʼa̱nra xíʼin ñá Eva ña̱ kuvi kuití ku̱ñuñá ta ndo̱o níma̱ñá. Chi ña̱ ni̱ka̱ʼa̱nra xíʼinñá kúú ña̱ va̱ása kuviñá. Ña̱ vatá ña̱ káʼa̱n na̱ veʼe-ñu̱ʼu ndi̱ʼi-xa̱ʼa̱ña tá ko̱on sa̱vi̱ kini. Tá kúma̱níka nasama Ndióxi̱ tu̱ʼun na̱ yiví na̱ i̱xava̱ʼa torre ña̱ Babel, xa̱a̱ xi̱kandíxavana ña̱ vatá ña̱ káʼa̱nna xa̱ʼa̱ ña̱ va̱ása kivi kuvi na̱ yiví (w19.12, página 15).