Va̱ása. Chi ta̱ Ndi̱va̱ʼa va̱ása ni̱ka̱ʼa̱nra ña̱ kuvi ku̱ñuñá ta níma̱ñá kutakuña chí inka xiyo, nda̱a̱ táki̱ʼva ndákanixi̱ní ku̱a̱ʼání na̱ yiví tiempo vitin. Ta̱ Ndi̱va̱ʼa xi̱niñúʼura iin ko̱o̱, ña̱ ni̱ka̱ʼa̱nra xíʼin ñá Eva ña̱ va̱ása kuviñá. Ni̱ka̱ʼa̱nra xíʼinñá ña̱ kutakuvañá, ta ku̱a̱ʼání ña̱ kivi keʼéñá nu̱ú ñuʼú yóʼo, ta va̱ása ka̱ʼa̱nka Ndióxi̱ xíʼinñá ndáaña keʼéñá (Gén. 2:17; 3:3-5).

Ña̱kán, tá ña̱ vatá ña̱ káʼa̱nna xa̱ʼa̱ ña̱ va̱ása xíʼi̱ na̱ yiví va̱ása níkanaña nu̱ú ña̱ Edén, ¿ama ki̱xáʼaña? Va̱ása kivi ka̱ʼa̱n káxiyó xa̱ʼa̱ña. Kúnda̱a̱-iniyó ña̱ ndiʼi na̱ veʼe-ñu̱ʼu vatá ni̱xi̱ʼi̱na, tá ko̱on sa̱vi̱ kini tá tiempo ña̱ ni̱xi̱yo ta̱ Noé. Ta na̱ ni̱ka̱ku kúú ta̱ Noé xíʼin na̱ veʼera na̱ xi̱ndasakáʼnu Ndióxi̱, ta ndiʼi na̱ veʼe-ñu̱ʼu vatá ndi̱ʼi-xa̱ʼa̱na.

Ña̱kán, ña̱ vatá ña̱ káʼa̱nna xa̱ʼa̱ ña̱ va̱ása kivi kuviyó, ki̱xáʼaña tándi̱ʼi ko̱on sa̱vi̱ kini. Tá na̱sama Ndióxi̱ tu̱ʼun na̱ yiví chí Babel ku̱a̱ʼánína nda̱kiʼinna ku̱a̱ʼa̱nna iníísaá nu̱ú ñuʼú, ta xa̱a̱ xi̱kandíxana ña̱ va̱ása kivi kuvi na̱ yiví (Gén. 11:8, 9). Xa̱ʼa̱ ña̱yóʼo, va̱ása xíni̱yó ama kúú ña̱ ki̱xáʼa xa̱ʼa̱ ña̱ vatá yóʼo. Soo, ña̱ kúnda̱a̱-iniyó kúú ña̱ yivá ndiʼi na̱ káʼa̱n tu̱ʼun vatá kúú ta̱ Ndi̱va̱ʼa, chi ta̱yóʼo kúú ta̱ kúúmií ku̱a̱chi xa̱ʼa̱ ña̱ iníísaá nu̱ú ñuʼú íyo ña̱ vatá yóʼo, ta kúsi̱íní-inira xa̱ʼa̱ ña̱yóʼo (Juan 8:44).