“¿Á KÚI̱ iin na̱ yiví na̱ táxi tíxa̱ʼvi?”. Ndiʼiyó xíniñúʼu nda̱ka̱tu̱ʼun xíʼin miíyó ña̱yóʼo. Ña̱ Biblia ni̱ka̱ʼa̱nña, ña̱ tiempo ndóoyó vitin, kooní na̱ yiví na̱ va̱ása taxi tíxa̱ʼvi (2 Tim. 3:2). Sana xíni̱yó na̱ yiví na̱ ndákanixi̱ní ña̱ xíniñúʼu taxi inkana ña̱ʼa ndaʼa̱na, soo va̱ása xíniñúʼu taxina tíxa̱ʼvi xa̱ʼa̱ ña̱yóʼo. Nda̱a̱ ni iinyó va̱ása kútóoyó kutáʼanyó xíʼin na̱ yiví yóʼo.

Soo Jehová káʼa̱nra xíʼin na̱ ndásakáʼnu-ñaʼá, ña̱ xíniñúʼu taxina tíxa̱ʼvi xa̱ʼa̱ ndiʼi ña̱ʼa (Col. 3:15; 1 Tes. 5:18). Ku̱a̱ʼání ña̱ va̱ʼa ndakiʼinyó tá ná taxiyó tíxa̱ʼvi. ¿Nda̱chun? Ná kotoyó nda̱chun.

Ndáyáʼviní taxiyó tíxa̱ʼvi, saáchi saá va̱ʼa kúniyó xíʼin miíyó. Ta saátu va̱ʼa kúni na̱ yiví na̱ táxiyó tíxa̱ʼvi ndaʼa̱. ¿Nda̱chun va̱ʼa kúniyó? Ná ndakanixi̱níyó xa̱ʼa̱ ña̱yóʼo. Iin na̱ yiví kúni̱na keʼéna iin ña̱ʼa xa̱ʼa̱yó, chi ndáyáʼviyó nu̱úna ta túvina ña̱ xíniñúʼu taxina iin ña̱ʼa ndaʼa̱yó. Ta xa̱ʼa̱ ña̱yóʼo va̱ʼaní kúniyó. Sana saá ndo̱ʼo ñá Rut, tá va̱ʼaní ni̱xi̱yo ini ta̱ Boaz xíʼinñá, sana ni̱kusi̱íní-iniñá tá xi̱niñá ña̱ íyo na̱ ndíʼi̱-ini xa̱ʼa̱ñá (Rut 2:10-13).

Saátu ndáyáʼviní taxiyó tíxa̱ʼvi ndaʼa̱ Ndióxi̱. Sana, xa̱a̱ ndákanixi̱níyó xa̱ʼa̱ ndiʼi regalo ña̱ táxira ndaʼa̱yó, xíʼin xa̱ʼa̱ ña̱ ndákundeékara táxira ndaʼa̱yó (Deut. 8:17, 18; Hech. 14:17). Soo ná taváyó ku̱a̱ʼá tiempo, ña̱ ndakanixi̱níyó xa̱ʼa̱ ndiʼi ña̱ʼa ña̱ táxira ndaʼa̱ miíyó xíʼin na̱ veʼeyó. Tasaá kuni̱kayó taxiyó tíxa̱ʼvi ndaʼa̱ra, ta kandíxayó ña̱ kúni̱níra xínira miíyó ta ndáyáʼviyó nu̱úra (1 Juan 4:9).

Ta su̱ví kuití ndakanixi̱níyó xa̱ʼa̱ ndiʼi bendición ña̱ táxi Jehová ndaʼa̱yó, chi xíniñúʼu taxiyó tíxa̱ʼvi ndaʼa̱ra xa̱ʼa̱ ña̱ va̱ʼaní-inira (Sal. 100:4, 5). Savana káʼa̱nna “ña̱ tá táxiyó tíxa̱ʼvi sákusi̱íña-iniyó”.

Inka xa̱ʼa̱ ña̱ xíniñúʼu taxiyó tíxa̱ʼvi kúú ña̱ ndásandakúña ña̱ kítáʼanyó xíʼin inkana. Ndiʼiyó kúni̱yó kundayáʼviyó nu̱ú inkana. Tá xíʼin ndiʼi níma̱yó, táxiyó tíxa̱ʼvi ndaʼa̱ inkana xa̱ʼa̱ ña̱ va̱ʼa ña̱ ke̱ʼéna xíʼinyó, va̱ʼaníka kítáʼanyó xíʼinna (Rom. 16:3, 4). Ta saátu, na̱ yiví na̱ táxi tíxa̱ʼvi, kúni̱na chindeétáʼankana xíʼin inkana. Xa̱ʼa̱ ña̱ xítona ña̱ va̱ʼa-ini inkana xíʼin miína, kúni̱na vií koo inina xíʼin inka na̱ yiví. Ta ña̱ chindeétáʼanyó xíʼin inkana sákusi̱íña-iniyó, chi ta̱ Jesús ni̱ka̱ʼa̱nra ña̱ “tá táxiyó ña̱ʼa ndaʼa̱ inkana, ndeéka kúsi̱í-iniyó ta su̱víka ña̱ ndákiʼinyóña” (Hech. 20:35).

Ta̱ Robert Emmons ta̱ káchíñu Universidad ña̱ California, ke̱ʼéra iin estudio xa̱ʼa̱ ña̱ taxiyó tíxa̱ʼvi, ka̱chira: “Ña̱ va̱ʼa taxiyó tíxa̱ʼvi ndaʼa̱ inkana, xíniñúʼu kotoyó ndáa ki̱ʼva kítáʼan ña̱ kéʼé na̱ yiví, sava yichi̱ iin na̱ yiví kéʼéna iin ña̱ʼa xa̱ʼa̱ miíyó, ta sava yichi̱, miíyó kéʼé iin ña̱ʼa xa̱ʼa̱ inkana”. Xa̱ʼa̱ ña̱yóʼo, ña̱ va̱ʼa kutakuyó ta kusi̱í-iniyó xíniñúʼu chindeétáʼan inkana xíʼinyó. Tá kúú, kivi táxina ña̱ kuxuyó xíʼin ña̱ xíniñúʼuyó tá ndeé ndóʼoyó (1 Cor. 12:21). Na̱ táxi tíxa̱ʼvi kíʼinna kuenta xíʼin ña̱ kéʼé inkana xa̱ʼa̱na. Tá saá, ¿á ndiʼi tiempo táxiyó tíxa̱ʼvi?

Inka xa̱ʼa̱ ña̱ taxiyó tíxa̱ʼvi kúú ña̱ chindeétáʼanña xíʼinyó ña̱ vií ndakanixi̱níyó. Xi̱niyó nda̱a̱ táki̱ʼva íyo ña̱ sáxi̱xin ña̱ʼa saá íyoña, chi táxiña yáʼa sava ña̱ʼa, ta savaña va̱ása. Ña̱kán, na̱ yiví na̱ táxi tíxa̱ʼvi, ndákanixi̱nína xa̱ʼa̱ ña̱ va̱ʼa ña̱ ndóʼona, ta va̱ása ndíʼi̱ní-inina xa̱ʼa̱ tu̱ndóʼo ña̱ yáʼana nu̱ú. Tá táxiyó tíxa̱ʼvi, ku̱a̱ʼáníka ña̱ va̱ʼa xítoyó ta xa̱ʼa̱ ña̱yóʼo kúni̱kayó taxiyó tíxa̱ʼvi. Tá ná keʼéyó ña̱yóʼo, chindeétáʼanña xíʼinyó nda̱a̱ táki̱ʼva ni̱ka̱ʼa̱n ta̱ apóstol Pablo: “Kusi̱íní-inindó ndiʼi tiempo xíʼin Jehová” (Filip. 4:4).

Tá ná taxiyó tíxa̱ʼvi, va̱ása ndakanixi̱níyó xa̱ʼa̱ tu̱ndóʼo ña̱ ndóʼoyó. Tá kúsuchí-iniyó á sáa̱yó xíʼin inkana, kivi ixayo̱ʼvi̱ña xíʼinyó ña̱ taxiyó tíxa̱ʼvi. Na̱ yiví na̱ táxi tíxa̱ʼvi, va̱ása kúni̱na koo ku̱a̱ʼání ña̱ʼana, chi kúsi̱í-inina xíʼin ña̱ xa̱a̱ kúúmiína (Filip. 4:12).

Ndiʼi miíyó na̱ cristiano kúnda̱a̱-iniyó, ña̱ ta̱ Ndi̱va̱ʼa kúni̱ra ná ndakava-iniyó ta kusuchí-iniyó, xa̱ʼa̱ tu̱ndóʼo ña̱ yáʼayó nu̱ú tiempo vitin. Ta̱yóʼo, kusi̱íní-inira tá ná ndakaniníxi̱níyó xa̱ʼa̱ tu̱ndóʼo ña̱ yáʼayó nu̱ú, ta ka̱ʼa̱n kúáchiníyó xa̱ʼa̱ña. Tá saá ná ndakanixi̱níyó, nda̱a̱ na̱ yiví na̱ nátúʼunyó xíʼin xa̱ʼa̱ Ndióxi̱ va̱ása kuni̱na kuniso̱ʼona ña̱ káʼa̱nyó. Ña̱ taxiyó tíxa̱ʼvi iin kítáʼanña xíʼin ña̱ va̱ʼa ña̱ kúúmií espíritu Ndióxi̱, tá kúú tá kúsi̱í-iniyó xa̱ʼa̱ ndiʼi ña̱ʼa ña̱ táxira ndaʼa̱yó, ta saátu ña̱ kándíxayó ña̱ káʼa̱nra keʼéra chí nu̱únínu (Gál. 5:22, 23).

Miíyó na̱ ndásakáʼnu Ndióxi̱ kándíxayó ndiʼi ña̱ ni̱ka̱ʼa̱n artículo yóʼo, xa̱ʼa̱ ña̱ taxiyó tíxa̱ʼvi. Ta saátu ku̱ndaa̱-iniyó ña̱ kivi ixayo̱ʼvi̱ña xíʼinyó ña̱ taxiyó tíxa̱ʼvi, xíʼin ña̱ kusi̱í-iniyó tá yáʼayó nu̱ú tu̱ndóʼo. Soo ná va̱ása ndakava-iniyó. Kiviva sákuaʼayó taxiyó tíxa̱ʼvi, ta va̱ása sandákooyó keʼéyó ña̱yóʼo. Ña̱kán, ná taváyó tiempo ña̱ ndakanixi̱níyó xa̱ʼa̱ ña̱ʼa ña̱ kivi taxiyó tíxa̱ʼvi xa̱ʼa̱. Tá ná ndakundeéyó keʼéyó ña̱yóʼo, va̱ása ixayo̱ʼvi̱kaña xíʼinyó ña̱ taxiyó tíxa̱ʼvi. Ta kusi̱íníka-iniyó nu̱ú na̱ yiví na̱ ndákaniníxi̱ní xa̱ʼa̱ tu̱ndóʼo ña̱ yáʼana nu̱ú. Ná ndakanixi̱níyó xa̱ʼa̱ ña̱ kéʼé Ndióxi̱ xíʼin inka na̱ yiví ña̱ va̱ʼa chika̱a̱na ndee̱ xíʼinyó, ña̱yóʼo sákusi̱íníña-iniyó. Nda̱a̱ kivi kaʼyíyó nu̱ú iin tutu iin á u̱vi̱ ña̱ʼa ña̱ kúni̱yó taxiyó tíxa̱ʼvi xa̱ʼa̱.

Na̱ científico ku̱ndaa̱-inina ña̱ tá ndiʼi tiempo táxiyó tíxa̱ʼvi, ña̱yóʼo násamaña ki̱ʼva ña̱ ndákanixi̱níyó. Na̱ yiví na̱ táxi tíxa̱ʼvi si̱íníka íyona. Ña̱kán, ná kotoyó ña̱ va̱ʼa ña̱ kúúmiíyó, ná kusi̱í-iniyó xa̱ʼa̱ ña̱ʼa ña̱ ndóʼoyó ta ná taxiyó tíxa̱ʼvi. Ná kǒo taxiyó ya̱ʼa tiempo, va̱ʼaka ná keʼéyó ña̱ káʼa̱n Biblia: “Taxindó tíxa̱ʼvi nda̱ʼa Jehová saáchi va̱ʼaní inira”, taxindó tíxa̱ʼvi xa̱ʼa̱ ndiʼi ña̱ʼa (1 Crón. 16:34; 1 Tes. 5:18).