¿NDÁAÑA ndóʼún tá chíndaʼá iin na̱ migoún iin carta nu̱ún ña̱ chíka̱a̱ní ndee̱ xíʼún? Saá íyo carta ña̱ chi̱ndaʼá ta̱ Pablo ku̱a̱ʼa̱n ndaʼa̱ ta̱ Timoteo, carta yóʼo va̱xiña nu̱ú Biblia, ta ña̱yóʼo kúú 2 Timoteo. Sana xi̱kuni̱ ta̱ Timoteo ku̱ʼu̱nra iin lugar nu̱ú táxi̱n íyo ña̱ va̱ʼa kaʼvira carta yóʼo, ta kunda̱a̱-inira ndáaña natúʼun migora xíʼinra. Sana ña̱yóʼo nda̱kanixi̱ní ta̱ Timoteo: “¿Á íyo va̱ʼa ta̱ Pablo? ¿Á íyo iin consejo taxira ndaʼíi̱ ña̱ va̱ʼa viíka keʼíi̱ chiñu ña̱ kúúmiíi̱? ¿Á chindeétáʼan carta yóʼo xíʼi̱n ña̱ viíka sánáʼi̱ na̱ yiví ta saátu ña̱ chindeétáʼi̱n xíʼin inkana?”. Nu̱ú carta yóʼo ku̱nda̱a̱-ini ta̱ Timoteo xa̱ʼa̱ ña̱yóʼo xíʼin inkaka ña̱ʼa. Ná ka̱ʼa̱nyó xa̱ʼa̱ sava consejo ña̱ va̱xi nu̱ú ña̱yóʼo, ña̱ kivi chindeétáʼan xíʼinyó.

Tá ki̱xáʼa ta̱ Timoteo káʼvira carta yóʼo, ndi̱ku̱n ku̱nda̱a̱-inira ña̱ ndáyáʼviníra nu̱ú ta̱ apóstol Pablo. Chi viíní ni̱ka̱ʼa̱n ta̱ apóstol yóʼo xíʼinra ña̱ kúúra se̱ʼera ta̱ kúʼvi̱ní-inira xínira (2 Tim. 1:2). Tá ku̱i̱ya̱ 65 kúú ña̱ nda̱kiʼin ta̱ Timoteo carta yóʼo ta xa̱a̱ yáʼaka 30 ku̱i̱ya̱ kúúmiíra saá, ta xa̱a̱ ku̱a̱ʼá ku̱i̱ya̱ kúúra anciano. Ku̱a̱ʼání ña̱ sa̱kuaʼara xíʼin ña̱ xi̱keʼé ta̱ Pablo chi yáʼaka u̱xu̱ ku̱i̱ya̱ ka̱chíñura xíʼin ta̱yóʼo.

Tá ku̱nda̱a̱-ini ta̱ Timoteo ña̱ kúndeé-ini ta̱ Pablo nu̱ú tu̱ndóʼo ña̱ ndíka̱a̱ra, chi̱ka̱a̱ní ña̱yóʼo ndee̱ xíʼinra. Saáchi ta̱ Pablo ndíka̱a̱ra veʼeka̱a chí ñuu Roma ta si̱lóʼo kúma̱ní kaʼnínara (2 Tim. 1:15, 16; 4:6-8). Ta̱ Timoteo ku̱nda̱a̱-inira ña̱ ndakúní íyo ini ta̱ Pablo chi ka̱ʼyíra ña̱yóʼo: “Kúndeé-inii̱ nu̱ú ndiʼi ña̱ʼa” (2 Tim. 2:8-13). Xa̱ʼa̱ ña̱ ni̱na̱ʼa̱ ta̱ Pablo ña̱ kúndeé-inira nu̱ú tu̱ndóʼo, chi̱ka̱a̱níña ndee̱ xíʼin ta̱ Timoteo ta saátu kivi chika̱a̱ña ndee̱ xíʼin miíyó.

Ta̱ Pablo ni̱ka̱ʼa̱nra xíʼin ta̱ Timoteo ña̱ ná kundayáʼviní chiñu Ndióxi̱ nu̱úra. Ña̱yóʼo ni̱ka̱ʼa̱n ta̱ Pablo xíʼinra: “Sándakaʼíi̱n yóʼó ña̱ nda̱a̱ táki̱ʼva kéʼún xíʼin ñuʼu̱ ña̱ va̱ása táxiún nda̱ʼva̱, saá keʼún xíʼin ña̱ ta̱xi Ndióxi̱ ndaʼún” (2 Tim. 1:6). Ta̱ Pablo xi̱niñúʼura tu̱ʼun griego khárisma ña̱ va̱ʼa ka̱ʼa̱nra xa̱ʼa̱ “ña̱ ta̱xi Ndióxi̱” ndaʼa̱ ta̱ Timoteo. Ña̱ tu̱ʼun yóʼo káʼa̱nña xa̱ʼa̱ ña̱ ndakiʼinyó iin ña̱ʼa ña̱ va̱ása níchaʼviyó xa̱ʼa̱, ña̱ kǒo xíniñúʼu ndakiʼinyó á ña̱ va̱ása níkachíñuyó xa̱ʼa̱. Ta̱ Timoteo nda̱kiʼinra ña̱yóʼo tá nda̱kaxin Ndióxi̱ miíra ña̱ kuumiíra iin chiñu ña̱ ndáyáʼvi ti̱xin congregación (1 Tim. 4:14).

¿Ndáaña xi̱niñúʼu keʼé ta̱ Timoteo xíʼin ña̱ ta̱xi Ndióxi̱ ndaʼa̱ra? Tá ka̱ʼvira tu̱ʼun yóʼo:  “Sándakaʼíi̱n yóʼó ña̱ nda̱a̱ táki̱ʼva kéʼún xíʼin ñuʼu̱ ña̱ va̱ása táxiún ndaʼva̱”. Sana nda̱kanixi̱níra xa̱ʼa̱ ñuʼu̱ ña̱ xi̱xaʼmi na̱ yiví ti̱xin veʼena, ña̱ loʼo tá loʼo kíxáʼa ndáʼva̱ ta ndúuña ti̱ka̱yi̱. Ta xíniñúʼu sákanda̱naña ña̱ va̱ʼa ndakokoña ta niʼníka koo. Iin diccionario káʼa̱nña xa̱ʼa̱ tu̱ʼun griego ña̱ xi̱niñúʼu ta̱ Pablo (anazōpyréō) ña̱ kúni̱ kachiña “ndakaʼmi tukuna”. Ña̱ xi̱kuni̱ kachi ta̱ Pablo xíʼin ta̱ Timoteo kúú ña̱ ná chika̱a̱níra ndee̱ kachíñura á xíʼin ña̱ si̱í-ini ná keʼéraña. Ña̱ xi̱kuni̱ kachira kúú ña̱yóʼo: “Xíʼin ndiʼi níma̱ún keʼún chiñu ña̱ kúúmiíún”. Ta saátu xíniñúʼu keʼé miíyó tiempo vitin: ná kachíñuyó nu̱ú Jehová xíʼin ña̱ si̱í-ini.

Tá káʼvika ta̱ Timoteo carta yóʼo, nda̱ni̱ʼíra iin consejo ña̱ chindeétáʼan xíʼinra ña̱ va̱ʼa vií keʼéra chiñura. Ta̱ Pablo ka̱ʼyíra ña̱yóʼo: “Ta espíritu santo ña̱ xa̱a̱ kúúmiíyó, ná chindeétáʼan xíʼún ña̱ kundaún ña̱ ndáyáʼviní ta̱xi Ndióxi̱ ndaʼún” (2 Tim. 1:14). ¿Ndáaña kúú ña̱ ndáyáʼviní nda̱kiʼin ta̱ Timoteo? Nu̱ú versículo ña̱ va̱xi chí sa̱tá, ta̱ Pablo ni̱ka̱ʼa̱nra xa̱ʼa̱ “tu̱ʼun va̱ʼa”, ña̱yóʼo kúú ña̱ nda̱a̱ ña̱ va̱xi nu̱ú tu̱ʼun Ndióxi̱ (2 Tim. 1:13). Xa̱ʼa̱ ña̱ xi̱kuumií ta̱ Timoteo iin chiñu ti̱xin congregación xi̱niñúʼu sanáʼa̱ra na̱ hermano xíʼin inkaka na̱ yiví xa̱ʼa̱ ña̱ nda̱a̱ (2 Tim. 4:1-5). Ta saátu, xa̱ʼa̱ ña̱ xi̱kuura anciano xi̱niñúʼu kiʼinra kuenta xíʼin na̱ hermano, na̱ íyo nda̱a̱ táki̱ʼva íyo ndikachi sa̱na̱ Ndióxi̱ (1 Ped. 5:2). ¿Ndáaña chindeétáʼan xíʼinra ña̱ va̱ʼa kundaara ña̱ ndáyáʼviní nda̱kiʼinra á ña̱ nda̱a̱ ña̱ xi̱niñúʼu sanáʼa̱ra? Espíritu santo Jehová xíʼin tu̱ʼunra kúú ña̱ chi̱ndeétáʼan xíʼinra (2 Tim. 3:14-17).

Ta saátu miíyó, Ndióxi̱ ta̱xira iin ña̱ ndáyáʼviní ndaʼa̱yó: ña̱yóʼo kúú ña̱ nda̱a̱ ña̱ sánáʼa̱yó inka na̱ yiví (Mat. 28:19, 20). Ná va̱ása nandósó-iniyó ña̱ ndáyáʼviní ña̱ nda̱a̱ ña̱ sánáʼa̱yó inka na̱ yiví. Ña̱kán xíniñúʼu ka̱ʼa̱n ni̱ʼiyó xíʼin Ndióxi̱ ta kaʼviyó tu̱ʼunra ndiʼi ki̱vi̱ (Rom. 12:11, 12; 1 Tim. 4:13, 15, 16). Sana kúún anciano ti̱xin congregación á ku̱a̱ʼá tiempo káchíñún nu̱ú Ndióxi̱. Tá kúúmiíyó chiñu ña̱ ndáyáʼviní yóʼo, ña̱yóʼo kivi chindeétáʼan xíʼinyó ña̱ vitá koo iniyó ta kandíxakayó Ndióxi̱. Kuchiñuyó kundaayó ña̱ ndáyáʼviní ta̱xi Ndióxi̱ ndaʼa̱yó tá ná kundayáʼviña nu̱úyó, ta saátu tá ná taxiyó ña̱ chindeétáʼanra xíʼinyó.

Iin chiñu ña̱ xi̱niñúʼu keʼé ta̱ Timoteo kúú ña̱ sanáʼa̱ra inkana. Ña̱kán ni̱ka̱ʼa̱n ta̱ Pablo ña̱yóʼo xíʼinra: “Ta ña̱ʼa ña̱ sa̱náʼi̱ yóʼó [...], ña̱yóʼo sanáʼún na̱ ta̱a na̱ nda̱kú íyo ini xíʼin Ndióxi̱ tasaá koo tu̱ʼvana sanáʼa̱na inkakana” (2 Tim. 2:2). Ta̱ Pablo sa̱ndákaʼánra ta̱ Timoteo ña̱ xíniñúʼu sanáʼa̱ra inkana xa̱ʼa̱ ña̱ʼa ña̱ xa̱a̱ sa̱kuaʼara. Tiempo vitin ndáyáʼviní ña̱ ná chika̱a̱ na̱ anciano ndee̱ ña̱ keʼéna ña̱yóʼo ti̱xin congregación. Iin ta̱ va̱ʼaní kúu superintendente sánáʼa̱ra inkana ndáa ki̱ʼva keʼéna iin chiñu. Va̱ása ndákanixi̱níra ña̱ tá ná sanáʼa̱ra inka na̱ hermano keʼéna iin chiñu, sana viíka keʼé na̱yóʼo chiñu yóʼo. Ña̱kán sánáʼa̱rana xa̱ʼa̱ ndiʼi ña̱ xa̱a̱ xíni̱ra. Chi ña̱ kúni̱ra kúú ña̱ ndíchi ná koona ta viíní keʼéna chiñuna. Tasaá, na̱ ta̱a na̱ nda̱kú íyo ini, viíka chindeétáʼanna xíʼin na̱ congregación.

Ta̱ Timoteo chi̱ndayáʼviníra carta ña̱ chi̱ndaʼá ta̱ Pablo ndaʼa̱ra. ¿Á ndákanixi̱níyó ña̱ tuku ta tuku káʼvira consejo ña̱ ta̱xi ta̱ migora ndaʼa̱ra, ta ndákanixi̱níra ndáa ki̱ʼva keʼéraña?

Ta miíyó, ¿ndáa ki̱ʼva kundiku̱nyó consejo yóʼo? Ná chika̱a̱yó ndee̱ ña̱ keʼéyó chiñu ña̱ ta̱xi Ndióxi̱ ndaʼa̱yó xíʼin ndiʼi níma̱yó, ná kundaayó ña̱ ta̱xira ndaʼa̱yó ta ndiʼi ña̱ xa̱a̱ sa̱kuaʼayó ná sanáʼa̱yóña inkana. Ta nda̱a̱ táki̱ʼva ni̱ka̱ʼa̱n ta̱ Pablo xíʼin ta̱ Timoteo, tá ná keʼéyó ndiʼi ña̱yóʼo kuchiyó saxínuyó chiñu ña̱ ta̱xi Ndióxi̱ ndaʼa̱yó (2 Tim. 4:5).