1, 2. ¿Nda̱chun kǒo xíniñúʼu yi̱ʼví na̱ íyo se̱ʼe tá ndáka̱tu̱ʼun na̱ va̱lí se̱ʼenana xa̱ʼa̱ ña̱ va̱xi nu̱ú Biblia?

 KU̱A̱ʼÁNÍ na̱ íyo se̱ʼe káʼa̱nna, ña̱ ku̱a̱ʼání chiñu kúú ña̱ sakúaʼnuna na̱ va̱lí se̱ʼena. Ña̱kán tá íyo na̱ va̱lí se̱ʼún ta chíka̱ún ndee̱ ña̱ sanáʼúnna xa̱ʼa̱ Ndióxi̱, va̱ʼaníva chiñu kéʼún (Deut. 6:​6, 7). Soo tá xáʼnuna, kíxáʼana ndáka̱tu̱ʼunna xa̱ʼa̱ ña̱ sákuaʼayó nu̱ú Biblia ta saátu ndáka̱tu̱ʼunna ndáaña kúú ña̱ va̱ʼa keʼéyó ta ndáaña kúú ña̱ va̱ása va̱ʼa keʼéyó.

² Tá kíxáʼa na̱ va̱lí se̱ʼendó ndáka̱tu̱ʼunna ndóʼó, sana kíxáʼa ndíʼi̱-inindó saáchi ndákanixi̱níndó ña̱ va̱ása kándíxakana ña̱ káʼa̱n Ndióxi̱. Soo ndiʼiva na̱ va̱lí xíniñúʼu nda̱ka̱tu̱ʼunna ña̱ va̱ʼa sakúaʼana ku̱a̱ʼání ña̱ʼa (1 Cor. 13:11). Ña̱kán kǒo xíniñúʼu yi̱ʼvíndó tá ndáka̱tu̱ʼunna ndóʼó xa̱ʼa̱ ña̱ va̱xi nu̱ú Biblia, chi tá ndáka̱tu̱ʼunna ndóʼó saá kúú ña̱ kivi chindeétáʼanndó xíʼinna ña̱ va̱ʼa kunda̱a̱ka-inina xa̱ʼa̱ Ndióxi̱.

3. ¿Ndáaña sakúaʼayó nu̱ú artículo yóʼo?

³ Nu̱ú artículo yóʼo ka̱ʼa̱nyó xa̱ʼa̱ ña̱ xíniñúʼu keʼé na̱ íyo se̱ʼe ña̱ va̱ʼa chindeétáʼanna xíʼin na̱ va̱lí se̱ʼena ña̱ kandíxakana Ndióxi̱ xíʼin ña̱ va̱xi nu̱ú Biblia. Ta saátu ña̱ kunda̱a̱-inina nda̱chun ndáyáʼviní keʼéna ña̱ káʼa̱n Biblia ta ndakunina ndáaña kúú ña̱ va̱ʼa ta ndáaña kúú ña̱ va̱ása va̱ʼa, ta sakúaʼana ka̱ʼa̱nna xíʼin inkana xa̱ʼa̱ ña̱ kándíxana. Saátu sakúaʼayó nda̱chun iin ña̱ va̱ʼaní kúú ña̱ ndáka̱tu̱ʼun na̱ va̱lí se̱ʼendó ndóʼó. Ta ka̱ʼa̱ntuyó xa̱ʼa̱ sava ña̱ʼa ña̱ kivi keʼéndó ña̱ va̱’a ka̱ʼa̱nndó xíʼin na̱ va̱lí se̱ʼendó xa̱ʼa̱ ña̱ kándíxayó Ndióxi̱.

CHINDEÉTÁʼANNDÓ XÍʼIN SE̱ʼENDÓ ÑA̱ KANDÍXANA NDIÓXI̱

4. ¿Ndáaña kivi nda̱ka̱tu̱ʼun na̱ va̱lí se̱ʼendó ta nda̱chun?

⁴ Su̱ví xa̱ʼa̱ ña̱ kándíxaún Ndióxi̱ kúni̱ kachiña ña̱ saátu na̱ va̱lí se̱ʼún kándíxanara. Xa̱ʼa̱ ña̱kán iin ña̱ va̱ʼava kúúña tá kíxáʼa na̱ va̱lí se̱ʼún ndáka̱tu̱ʼunna táʼan pregunta yóʼo: “¿Nda̱chun va̱ʼa xíni̱i̱  ña̱ ndixa íyo Ndióxi̱? ¿Á kivi kandíxai̱ ña̱ káʼa̱n Biblia?”. Ña̱ Biblia káʼa̱nña xíʼinyó ña̱ ná nandukúyó xa̱ʼa̱ ndiʼi ña̱ʼa tasaá kunda̱a̱-iniyó ndáaña kúú ña̱ nda̱a̱ (Rom. 12:1; 1 Tes. 5:21). Soo, ¿ndáa ki̱ʼva chindeétáʼanndó xíʼin na̱ va̱lí se̱ʼendó ña̱ va̱ʼa kandíxakana Ndióxi̱?

5. ¿Ndáa ki̱ʼva chindeétáʼún xíʼin se̱ʼún ña̱ va̱ʼa kandíxana ña̱ káʼa̱n Biblia? (Romanos 12:2).

⁵ Ka̱ʼa̱nndó xíʼinna ña̱ ná nandukúna xa̱ʼa̱ ña̱ sákuaʼayó xa̱ʼa̱ Ndióxi̱, tasaá kotona ña̱ nda̱a̱ kúúña (kaʼvi Romanos 12:2). Tá ndáka̱tu̱ʼun na̱ va̱lí se̱ʼendó ndóʼó, sanáʼa̱ndóna ña̱ nandukúna nu̱ú tutu ña̱ tává na̱ ñuu Ndióxi̱ xa̱ʼa̱ ña̱ kúni̱na kunda̱a̱-inina xa̱ʼa̱. Ta ña̱yóʼo kúú Índice de las publicaciones Watch Tower ta nu̱ú ña̱ Guía de estudio para los testigos de Jehová kivi ki̱ʼvina nu̱ú káʼa̱nña “La Biblia” ta nandukúna ña̱ káʼa̱n “Inspirada por Dios”, ta yóʼo ndani̱ʼína ña̱ káʼa̱n nda̱chun su̱ví ña̱ ndákanixi̱ní na̱ yiví kúú ña̱ níka̱ʼyi̱ nu̱ú Biblia chi ña̱ ndákanixi̱ní Ndióxi̱va kúúña (1 Tes. 2:13). Tá kúú, kivi nandukúna ña̱ káʼa̱n xa̱ʼa̱ ñuu Nínive ña̱ ni̱xi̱yo xi̱naʼá. Tá ya̱chi̱ sava na̱ nándukú va̱ʼa xa̱ʼa̱ Biblia xi̱kaʼa̱nna ña̱ kǒoví ñuu yóʼo níxi̱yo, soo ku̱i̱ya̱ 1850 nda̱ni̱ʼína ndo̱ʼo xa̱ʼa̱ veʼe ña̱ ni̱xi̱yo ñuu Nínive ta ña̱yóʼo náʼa̱ña ña̱ ndixava ni̱xi̱yo ñuu yóʼo. Ta xíʼin ña̱yóʼo kúnda̱a̱-iniyó ña̱ ndixava kúú ña̱ káʼa̱n Biblia (Sof. 2:​13-15). Ta saátu kivi kaʼvina profecía ña̱ káʼa̱n xa̱ʼa̱ ña̱ ndi̱ʼi-xa̱ʼa̱ ñuu Nínive nu̱ú táʼví ña̱ naní “¿Á xa̱a̱ xíni̱ún xa̱ʼa̱ ña̱yóʼo?”, ña̱ ka̱na nu̱ú Tutu Ña̱ Natúʼun xíʼinyó noviembre ku̱i̱ya̱ 2021. Ka̱ʼa̱n xíʼin se̱ʼún ña̱ ná nandukúna ña̱ kúni̱na kunda̱a̱-inina xa̱ʼa̱ nu̱ú tutu ña̱ tává na̱ ñuu Ndióxi̱ ta ná chitáʼannaña xíʼin inkaka tutu ña̱ tává na̱ yiví na̱ káʼvi va̱ʼa, tasaá kiʼinna kuenta ña̱ ndixa kúú ña̱ káʼa̱n Biblia.

6. ¿Ndáaña kivi keʼún ña̱ va̱ʼa chindeétáʼún xíʼin se̱ʼún ña̱ kunda̱a̱-inina ña̱ ndixa kúú ña̱ káʼa̱n Biblia? Ka̱ʼa̱n xa̱ʼa̱ iin ejemplo. (Koto na̱ʼná).

⁶ Chindeétáʼanndó xíʼin na̱ va̱lí se̱ʼendó ña̱ ndani̱ʼína prueba ña̱ náʼa̱ ña̱ ndixa kúú ña̱ káʼa̱n Biblia. Ndóʼó na̱ íyo se̱ʼe kiviva ka̱ʼa̱nndó xíʼin na̱ va̱lí se̱ʼendó xa̱ʼa̱ ña̱ káʼa̱n Biblia ta saátu xa̱ʼa̱ ña̱ kándíxayó Ndióxi̱, ta kivi ku̱ʼu̱nndó ku̱a̱ʼání lugar xíʼinna ña̱ va̱ʼa ka̱ʼa̱nndó xa̱ʼa̱ ña̱yóʼo. Kivi sanáʼa̱ndó nu̱ú na̱ va̱lí se̱ʼendó ña̱ʼa ña̱ i̱xava̱ʼa Ndióxi̱, tá kúú kití, yitu̱n á inkaka ña̱ʼa. Saátu kivi ka̱ʼa̱nndó xíʼinna xa̱ʼa̱ ña̱ ku̱u tá ya̱chi̱, ña̱ va̱xi nu̱ú libro á ña̱ va̱xi nu̱ú video. Ta kivi ka̱ʼa̱nndó xíʼinna ndáa ki̱ʼva kítáʼan ña̱ káʼa̱n ña̱yóʼo xíʼin ña̱ káʼa̱n Biblia, ña̱yóʼo chindeétáʼan xíʼinna ña̱ kandíxana ña̱ nda̱a̱ kúú ña̱ káʼa̱n Biblia. Tá kúú, ¿á xíni̱ na̱ va̱lí se̱ʼendó ña̱ íyo iin nama̱ ña̱ ku̱vaʼa 3,000 ku̱i̱ya̱ chí sa̱tá ta ña̱yóʼo naníña piedra moabita ta va̱xi ki̱vi̱ Ndióxi̱ nu̱úña? Yu̱u̱ ña̱ nda̱ni̱ʼína yóʼo ndíkaa̱ña Museo ña̱ Louvre, ñuu París (Francia). Soo saátu Betel ña̱ kúúmiíyó na̱ testigo Jehová ñuu Warwick  (Nueva York) ndíkaa̱ iin copia yu̱u̱ yóʼo, ta ña̱yóʼo ndíkaa̱ña nu̱ú exposición ña̱ naní “Ña̱ Biblia xíʼin ki̱vi̱ Ndióxi̱”. Ña̱ piedra moabita káʼa̱nña, ta̱ rey Mesá ta̱ ñuu Moab kǒo níxiinkara saxínura ña̱ ki̱ndoora xíʼin na̱ ñuu Israel ta ña̱yóʼo kítáʼanña xíʼin ña̱ káʼa̱n Biblia (2 Rey. 3:​4, 5). Va̱ʼaníva xa̱a̱ na̱ va̱lí se̱ʼendó kandíxana ña̱ káʼa̱n Biblia tá ná kotona ña̱ kítáʼan ña̱ káʼa̱n ña̱yóʼo xíʼin ña̱ káʼa̱n inka tutu (kivitu nandukún ña̱ káʼa̱n 2 Crónicas 9:6).

7, 8. a) ¿Ndáana i̱xava̱ʼa ndiʼi ña̱ xítoyó ta ndáaña sánáʼa̱ña miíyó? Ka̱ʼa̱n xa̱ʼa̱ iin ejemplo. (Koto na̱ʼná). b) ¿Ndáaña kivi nda̱ka̱tu̱ʼun na̱ va̱lí se̱ʼún ta ndáa ki̱ʼva chindeétáʼanña xíʼinna ña̱ kandíxana ña̱ íyo iin ta̱ i̱xava̱ʼa ndiʼi ña̱ʼa?

⁷ Ka̱ʼa̱nndó xíʼin se̱ʼendó ña̱ ná kotona ña̱ liviní ña̱ i̱xava̱ʼa Jehová. Tá xíkandó chí yuku̱ á tá chíʼindó xíʼin na̱ va̱lí se̱ʼéndó, ka̱ʼa̱nndó xíʼinna ña̱ liviní ku̱vaʼa ndiʼi ña̱ʼa nu̱ú ñuʼú yóʼo ta inkáchi kúni̱ kitáʼan ndiʼi ki̱ʼva ña̱ ku̱vaʼaña ta ña̱yóʼo náʼa̱ña nu̱úyó ña̱ íyo iin ta̱ ndíchiní i̱xava̱ʼaña. Ku̱a̱ʼání ña̱ʼa ña̱ íyo nu̱ú ñuʼú yóʼo inkáchi kúni̱ kitáʼan ki̱ʼva ña̱ ku̱vaʼaña chi tá ki̱ʼva íyo ña̱ káva̱ saá íyoña, tá kúú ña̱ galaxia, te̱ʼe̱ sa̱tá kití loʼo tí naní nautilo, yuku̱ ndaʼa̱ sava yitu̱n xíʼin yita ña̱ girasol. a Ta iin ta̱ científico ta̱ naní Nicola Fameli káʼa̱nra ña̱ tá ná ndakaʼvina número ña̱ kúúmií ña̱yóʼo inkáchi número kúúmiíña ta va̱ʼaní kítáʼanña, ta ña̱yóʼo naníña tu̱ʼun sáʼán la sucesión de Fibonacci. Ña̱kán xa̱a̱ ku̱a̱ʼání ku̱i̱ya̱ ndákaʼvi na̱ científico xíʼin ña̱yóʼo saáchi ndíchiní ku̱vaʼaña.

⁸ Ti̱xin escuela kivi sanáʼa̱na na̱ va̱lí se̱ʼendó xa̱ʼa̱ iin ki̱ʼva ña̱ ku̱vaʼa sava ña̱ʼa. Tá kúú, ku̱a̱ʼání yitu̱n kána ndaʼa̱nú ta nu̱ú ndaʼa̱nú kán kána inka ndaʼa̱nú ta nu̱ú ña̱kán kána inka ña̱ válíka ta ki̱ʼva ña̱ xáʼnu túyóʼo tu̱ʼun sáʼán naníña fractales. Soo su̱ví iinlá yitu̱n kúú tú xáʼnu saá, saáchi íyo inkaka ña̱ʼa ña̱ xáʼnu saá. Ña̱kán tá kíxáʼa na̱ va̱lí se̱ʼéndó ndáka̱tu̱ʼunna: “¿Ndáana i̱xava̱ʼa ndiʼi ña̱yóʼo chi liviní ku̱vaʼaña?”. Saá kunda̱a̱-inina ña̱ mií Ndióxi̱ kúú ta̱ i̱xava̱ʼa ndiʼi ña̱ʼa yóʼo (Heb. 3:4). Ta tá xa̱a̱ xa̱ʼnu loʼona, saá kivi ka̱ʼa̱nndó xíʼinna ña̱ mií Ndióxi̱ kúú ta̱ i̱xava̱ʼa miíyó xa̱ʼa̱ ña̱kán káʼa̱nra xíʼinyó ndáaña keʼéyó ña̱ va̱ʼa si̱í kooyó. Ta saátu kivi ka̱ʼa̱nndó xíʼinna ña̱ ndiʼi ña̱ káʼa̱n Ndióxi̱ xíʼinyó va̱xiña nu̱ú Biblia.

SANÁʼA̱NA ÑA̱ NÁ KEʼÉNA ÑA̱ VA̱ʼA TA KǑO KEʼÉNA ÑA̱ KINI

9. ¿Nda̱chun ndáka̱tu̱ʼun na̱ va̱lí se̱ʼendó miíndó sava yichi̱ xa̱ʼa̱ ña̱ va̱xi nu̱ú Biblia?

⁹ Sava yichi̱ na̱ va̱lí se̱ʼendó ndáka̱tu̱ʼunna ndóʼó á xíniñúʼu keʼévína ndiʼi ña̱ káʼa̱n Biblia, kotondó nda̱chun ndáka̱tu̱ʼunna ña̱yóʼo ndóʼó. ¿Á ndáka̱tu̱ʼunna ndóʼó xa̱ʼa̱ ña̱ kǒo kúni̱na keʼéna ña̱ káʼa̱n Biblia? ¿Á sana ndáka̱tu̱ʼunna ndóʼó xa̱ʼa̱ ña̱ kǒo xíni̱na ndáa ki̱ʼva ka̱ʼa̱nna xíʼin inkana xa̱ʼa̱ ña̱ kándíxana? Tá saá íyoña,  iin ña̱ kivi chindeétáʼan xíʼinna ña̱ va̱ʼa kunda̱a̱-inina nda̱chun ndáyáʼviní kuniso̱ʼona ña̱ káʼa̱n Biblia kúú ña̱ kaʼvina libro ña̱ naní Kivi koo si̱íún vitin ta saátu chí nu̱únínu. b

10. ¿Ndáa ki̱ʼva kivi chindeétáʼún xíʼin na̱ va̱lí se̱ʼún ña̱ kitáʼan viíkana xíʼin Jehová?

¹⁰ Chindeétáʼanndó xíʼinna ña̱ kutáʼan viíkana xíʼin Jehová. Tá káʼvindó Biblia xíʼin na̱ va̱lí se̱ʼéndó, kuniñúʼundó pregunta xíʼin ejemplo ña̱ va̱xi nu̱ú libro ña̱ naní Kivi koo si̱íún vitin ta saátu chí nu̱únínu ña̱ va̱ʼa ka̱ʼa̱nna xa̱ʼa̱ ña̱ ndákanixi̱nína (Prov. 20:5). Tá kúú, ña̱ lección 8 káʼa̱nña ña̱ mií Jehová íyora nda̱a̱ táki̱ʼva íyo iin migoyó ta̱ sándakaʼán miíyó xa̱ʼa̱ ña̱ xíniñúʼu keʼéyó tasaá vií kana ndiʼi ña̱ kúni̱yó keʼéyó, ña̱ va̱ʼa kǒo kundoʼoyó nda̱a̱ ni iin ña̱ va̱ása va̱ʼa. Tándi̱ʼi ka̱ʼvindó 1 Juan 5:​3, kivi nda̱ka̱tu̱ʼunndó na̱ va̱lí se̱ʼéndó: “Xa̱ʼa̱ ña̱ va̱ʼaní-ini Jehová xíʼinyó ta kúúra migoyó, ¿nda̱chun káʼa̱nra xíʼinyó ña̱ kuniso̱ʼoyó ña̱ káʼa̱nra? ¿Á xíniñúʼu sa̱a̱yó xíʼin ña̱ káʼa̱nra xíʼinyó keʼéyó?”. Sana pregunta yóʼo chindeétáʼanña xíʼin na̱ va̱lí se̱ʼún ña̱ va̱ʼa kotona ña̱ kúni̱ní Jehová xínira miíyó, ña̱kán káʼa̱nra xíʼinyó xa̱ʼa̱ ña̱ kǒo xíniñúʼu keʼéyó (Is. 48:​17, 18).

11. ¿Ndáaña kivi keʼéndó ña̱ va̱ʼa chindeétáʼanndó xíʼin se̱ʼendó ña̱ kuniso̱ʼona ña̱ káʼa̱n Biblia? (Proverbios 2:​10, 11).

¹¹ Ka̱ʼa̱nndó xa̱ʼa̱ ña̱ va̱ʼa ña̱ ndákiʼinyó tá kéʼéyó ña̱ káʼa̱n Ndióxi̱. Tá káʼvindó Biblia á tá káʼvindó texto diario ka̱ʼa̱nndó ndáa ki̱ʼva xa̱a̱ chíndeétáʼanña xíʼinndó. Tá kúú, ¿á xa̱a̱ xíni̱ na̱ va̱lí se̱ʼún ña̱ xíniñúʼu sakúaʼana kachíñuna ta saátu ña̱ va̱ása ixakuíʼnána? (Heb. 13:18). Saátu kivi ka̱ʼún xíʼinna ña̱ tá xíniso̱ʼoyó ña̱ káʼa̱n Biblia saá kúú ña̱ va̱ʼa koo si̱íyó (Prov. 14:​29, 30). Tá kúnda̱a̱-ini na̱ va̱lí se̱ʼendó ña̱ ndáyáʼviní kuniso̱ʼona ña̱ káʼa̱n Biblia, saá kúú ña̱ kuni̱na keʼéna ña̱ káʼa̱nña (kaʼvi Proverbios 2:​10, 11). c

12. ¿Ndáaña kéʼé iin na̱ matrimonio ña̱ va̱ʼa chindeétáʼanna xíʼin ta̱ loʼo se̱ʼena ña̱ kuniso̱ʼora ña̱ káʼa̱n Ndióxi̱?

¹² Ta̱ Steve xíʼin ñá síʼira kúúna na̱ ñuu Francia, ta káʼa̱nna ndáa ki̱ʼva chíndeétáʼanna xíʼin se̱ʼena ta̱ Ethan ña̱ kiʼinra kuenta ña̱ xa̱ʼa̱ ña̱ kúʼvi̱ní-ini Jehová xínira miíyó kúú ña̱ táxira leyra ndaʼa̱yó. Na̱yóʼo káʼa̱nna, “ña̱ va̱ʼa chindeétáʼanndi̱ xíʼinra ndáka̱tu̱ʼunndi̱ra ña̱yóʼo: ‘¿Nda̱chun káʼa̱n Jehová xíʼinyó ña̱ kuniso̱ʼoyó ña̱ káʼa̱nra xíʼinyó nu̱ú tu̱ʼunra? ¿Ndáa ki̱ʼva náʼa̱ ña̱yóʼo nu̱úyó ña̱ kúʼvi̱-inira xínira miíyó? ¿Ta ndáaña kivi kundoʼún tá ná kǒo kuniso̱ʼún consejo ña̱ táxi Ndióxi̱?’”. Xa̱ʼa̱ ña̱ kéʼéndi̱ ña̱yóʼo, va̱ʼaní chíndeétáʼanña xíʼin ta̱ Ethan ña̱ kuni̱ra kuniso̱ʼora ña̱ káʼa̱n Jehová. Ta̱ Steve káchikara: “Ña̱ kúni̱ndi̱ kúú ña̱ ná kunda̱a̱-ini ta̱ loʼo se̱ʼendi̱ ña̱ va̱ʼaníka consejo ña̱ va̱xi nu̱ú Biblia nu̱úka ña̱ káʼa̱n na̱ ñuyǐví yóʼo”.

13. ¿Ndáa ki̱ʼva sanáʼa̱ndó na̱ va̱lí se̱ʼendó ña̱ keʼéna ña̱ káʼa̱n Biblia? Ka̱ʼa̱nndó xa̱ʼa̱ iin ejemplo.

¹³ Sanáʼa̱ndó na̱ va̱lí se̱ʼendó ña̱ ná keʼéna ña̱ káʼa̱n Biblia. Kivi keʼéndó ña̱yóʼo tá káʼa̱n na̱ maestro xíʼin na̱ va̱lí se̱ʼendó ña̱ ná kaʼvina iin libro ña̱ ni̱ka̱ʼa̱nna xíʼinna escuela, sana nu̱ú libro yóʼo káʼa̱nña xa̱ʼa̱ na̱ yiví na̱ kísi̱ xíʼin táʼan á na̱ ndi̱va̱ʼaní-ini. Nu̱ú na̱ yiví su̱ví ña̱ kiniví kúú ña̱yóʼo, ta na̱ káʼvi libro yóʼo nda̱a̱ kivi xa̱a̱na ndakanixi̱nína ña̱ kiviva keʼéna ña̱yóʼo. Ka̱ʼa̱nndó xíʼin na̱ va̱lí se̱ʼendó ña̱ ná ndakanixi̱nína ndáa ki̱ʼva kúni Jehová xíʼin ña̱ kéʼé na̱ yiví yóʼo á xíʼin ña̱ káʼa̱nna (Prov. 22:​24, 25; 1 Cor. 15:33; Filip. 4:8). Ña̱yóʼo kivi chindeétáʼanña xíʼin na̱ va̱lí se̱ʼendó ña̱ kunda̱a̱-inina ña̱ va̱ʼaníva ña̱ kuniso̱ʼona ña̱ káʼa̱n Jehová. Ta tá ndáka̱tu̱ʼun na̱ maestro á inkaka na̱ va̱lí escuela miína ndáaña ndákanixi̱nína xa̱ʼa̱ ña̱  ka̱ʼvina nu̱ú libro yóʼo, saá kivi ka̱ʼa̱nna xíʼinna xa̱ʼa̱ ña̱ ndákanixi̱ní Ndióxi̱ xa̱ʼa̱ ña̱yóʼo.

SANÁʼA̱NDÓNA NÁ KA̱ʼA̱NNA XA̱ʼA̱ ÑA̱ KÁNDÍXANA NDIÓXI̱

14. ¿Ndáaña yíʼvi sava na̱ va̱lí ka̱ʼa̱nna xa̱ʼa̱ ta nda̱chun?

¹⁴ Sava na̱ va̱lí na̱ ndásakáʼnu Ndióxi̱ sava yichi̱ kivi yíʼvina á kúkaʼan nu̱úna ka̱ʼa̱nna xa̱ʼa̱ ña̱ ndásakáʼnuna Ndióxi̱. Sana yíʼvina tá kíxáʼana káʼa̱nna xa̱ʼa̱ ña̱ evolución ti̱xin escuela. Na̱ maestrona kivi ka̱ʼa̱nna xíʼinna ña̱ ndixava kúú ña̱ evolución ta su̱ví iin cuento kúúña. ¿Ndáaña kivi keʼéndó ña̱ va̱ʼa chindeétáʼanndó xíʼin na̱ va̱lí se̱ʼendó ña̱ kǒo yi̱ʼvína ka̱ʼa̱nna xa̱ʼa̱ ña̱ kándíxana?

15. ¿Ndáaña kivi chindeétáʼan xíʼin se̱ʼendó ña̱ va̱ʼa kǒo kaka-inina xa̱ʼa̱ ña̱ kándíxana Ndióxi̱?

¹⁵ Chindeétáʼanndó xíʼin na̱ va̱lí se̱ʼendó ña̱ ná kǒo kaka-inina xa̱ʼa̱ ña̱ kándíxana Ndióxi̱. Na̱ va̱lí se̱ʼendó va̱ása xíniñúʼu kukaʼan nu̱úna xa̱ʼa̱ ña̱ ndásakáʼnuna Ndióxi̱ ta̱ i̱xava̱ʼa ndiʼi ña̱ʼa (2 Tim. 1:8). Ku̱a̱ʼání na̱ científico ndákunina ña̱ su̱ví iin kama níkuva̱ʼa mií ndiʼi ña̱ʼa. Xa̱ʼa̱ ña̱ viíní ku̱vaʼa ndiʼi ña̱ʼa ta ndíchiní ku̱vaʼaña, na̱ científico kúnda̱a̱-inina ña̱ íyo iin na̱ ndíchiní i̱xava̱ʼa ndiʼi ña̱yóʼo, xa̱ʼa̱ ña̱kán va̱ása kándíxana ña̱ evolución ña̱ sánáʼa̱na ti̱xin ku̱a̱ʼání escuela. Iin ña̱ kivi chindeétáʼan xíʼin na̱ va̱lí se̱ʼendó ña̱ kandíxakana Ndióxi̱ kúú ña̱ kunda̱a̱-inina ndáaña chi̱ndeétáʼan xíʼin inkaka na̱ hermano ña̱ ni̱xa̱a̱na ka̱ndíxana ña̱ íyo iin na̱ i̱xava̱ʼa ndiʼi ña̱ʼa. d

16. ¿Ndáa ki̱ʼva kivi chindeétáʼún xíʼin na̱ va̱lí se̱ʼún ña̱ va̱ʼa ka̱ʼa̱nna xa̱ʼa̱ ña̱ kándíxana? (1 Pedro 3:15; koto na̱ʼná).

¹⁶ Chindeétáʼanndó xíʼin na̱ va̱lí se̱ʼendó ña̱ va̱ʼa kuchiñuna ka̱ʼa̱nna xíʼin inkana xa̱ʼa̱ ña̱ kándíxana Ndióxi̱ (kaʼvi 1 Pedro 3:15). Kivi kaʼvindó xíʼin na̱ va̱lí se̱ʼendó artículo ña̱ va̱xi nu̱ú jw.org ña̱ naní “¿Creación o evolución? Primera parte, segunda parte, tercera parte xíʼin cuarta parte” ta kivi ndani̱ʼíndóña nu̱ú táʼví ña̱ naní “Los jóvenes preguntan”. Tándi̱ʼi, nda̱ka̱tu̱ʼunndóna ndáaña kuniñúʼuna ña̱ va̱ʼa ka̱ʼa̱nna xíʼin inkana ña̱ íyova iin ta̱ i̱xava̱ʼa ndiʼi ña̱ʼa, ta ndanundó xíʼinna ña̱ va̱ʼa sakúaʼana ndáa ki̱ʼva ka̱ʼa̱nna xa̱ʼa̱ ña̱yóʼo. Ta sandákaʼánndóna ña̱ va̱ása xíniñúʼu nda̱ʼyi̱na á sa̱a̱na xíʼin na̱ káʼvi xíʼinna, soo tá iinna kúni̱na kunda̱a̱ka-inina xa̱ʼa̱ ña̱yóʼo viíní ná ndakanina nu̱úna ña̱ va̱ʼa kunda̱a̱-inina. Tá kúú, iin na̱ káʼvi xíʼinna kivi ka̱ʼa̱nna xíʼinna: “Yi̱ʼi̱ kándíxa kuitíi̱ ña̱ xítoi̱ soo ta̱ʼán kunivíi̱ Ndióxi̱ ña̱kán kǒo kándíxai̱ra”. Ta na̱ va̱lí na̱  ndásakáʼnu Ndióxi̱ kivi ka̱ʼa̱nna ña̱yóʼo xíʼinna: “Ndakanixi̱ní ña̱ ku̱a̱ʼún iin yuku̱ nu̱ú kǒo nda̱a̱ ni iin na̱ yiví tasaá nda̱ni̱ʼún iin veʼe ña̱ liviní ku̱vaʼa, ¿á su̱ví íyo iin na̱ i̱xava̱ʼaña? Ña̱kán tá íyo iin na̱ i̱xava̱ʼa veʼe yóʼo saátu íyo iin na̱ i̱xava̱ʼa ndiʼi ña̱ʼa”.

17. ¿Ndáaña kivi chindeétáʼan xíʼin na̱ va̱lí se̱ʼún ña̱ va̱ʼa ka̱ʼa̱nna xa̱ʼa̱ Biblia? Ka̱ʼa̱n xa̱ʼa̱ iin ejemplo ña̱ kivi ka̱ʼa̱n se̱ʼendó xíʼin na̱ va̱lí na̱ káʼvi xíʼinna escuela.

¹⁷ Ka̱ʼa̱n xíʼin na̱ va̱lí se̱ʼún ná kotona ndáa ki̱ʼva kivi natúʼunna xa̱ʼa̱ Biblia xíʼin na̱ yiví (Rom. 10:10). Ña̱ ka̱ʼa̱nyó xa̱ʼa̱ ña̱ Biblia íyoña nda̱a̱ táki̱ʼva íyo ña̱ kéʼé na̱ va̱lí na̱ sa̱kán sákuaʼa kaka, siʼna sákuaʼana kundichina tá ndi̱ʼi loʼo tá loʼo kíxáʼana xíkana. Tá xa̱ʼa̱ íxayo̱ʼvi̱ña xíʼinna sakúaʼana kakana soo tá yáʼa tiempo va̱ʼaníva kíxáʼana xíkana saátu ndóʼo miíyó tá sa̱kán sákuaʼayó natúʼunyó xa̱ʼa̱ Ndióxi̱, xa̱ʼa̱ ña̱kán nátúʼunyó xa̱ʼa̱ ña̱ va̱ása íxayo̱ʼvi̱ xíʼinyó ka̱ʼa̱nyó xa̱ʼa̱. Tá kúú, iin ta̱ loʼo ta̱ ndásakáʼnu Ndióxi̱ kivi ka̱ʼa̱nra xíʼin iin ta̱ loʼo ta̱ káʼvi xíʼinra escuela: “¿Á xa̱a̱ xíni̱ún ña̱ ku̱a̱ʼání na̱ ingeniero xítona ña̱ʼa ña̱ íyo nu̱ú ñuʼú yóʼo ña̱ va̱ʼa ixava̱ʼana inka ña̱ʼa? Koto video yóʼo chi ndáyáʼviní ña̱ káʼa̱nña”. Tándi̱ʼi, kivi sanáʼa̱na nu̱ú na̱ káʼvi xíʼinna iin video ña̱ va̱xi nu̱ú serie ña̱ naní “¿Lo diseñó alguien?”, tasaá kivi nda̱ka̱tu̱ʼunnana: “Iin na̱ científico xítondaana ña̱ʼa ña̱ íyo nu̱ú ñuʼú yóʼo ña̱ va̱ʼa keʼéna inka ña̱ʼa, soo ni saá káʼa̱n va̱ʼa na̱ yiví xa̱ʼa̱na soo íyova iin na̱ i̱xava̱ʼa ndiʼi ña̱ʼa ña̱ xi̱tondaana. ¿Á su̱ví na̱kán kúú na̱ xíniñúʼu ka̱ʼa̱n va̱ʼakana xa̱ʼa̱?”. Tá ná ka̱ʼa̱nndó saá xíʼinna, sana kuni̱kana kunda̱a̱-inina xa̱ʼa̱ña.

CHINDEÉTÁʼANNDÓ XÍʼIN SE̱ʼENDÓ ÑA̱ VA̱ʼA KANDÍXAKANA NDIÓXI̱

18. ¿Ndáa ki̱ʼva chindeétáʼanndó xíʼin na̱ va̱lí se̱ʼendó ña̱ kandíxakana Ndióxi̱?

¹⁸ Tiempo ña̱ ndóoyó vitin, ku̱a̱ʼání na̱ yiví kǒo kándíxana ña̱ íyo Jehová (2 Ped. 3:3). Ña̱kán tá xa̱a̱ káʼvindó Biblia xíʼin na̱ va̱lí se̱ʼendó, chindeétáʼanndó xíʼinna ña̱ ná xa̱a̱na kunda̱a̱-inina xíʼin ndiʼi ña̱ va̱xi nu̱ú Biblia. Saátu ná kotona ndáa ki̱ʼva chindeétáʼanña xíʼinna ña̱ keʼéna ña̱ va̱ʼa, chindeétáʼanndó xíʼinna ña̱ ná ndakanixi̱nína xa̱ʼa̱ ndiʼi ña̱ i̱xava̱ʼa Jehová ña̱ va̱ʼa xa̱a̱na kandíxakanara ta saátu chindeétáʼanndó xíʼinna ña̱ ná kunda̱a̱-inina xíʼin profecía ña̱ xa̱a̱ ni̱xi̱nu. Ndáyáʼviní ka̱ʼa̱nndó xíʼin Jehová xa̱ʼa̱ na̱ va̱lí se̱ʼendó, ta miíra taxi ku̱a̱ʼá bendición ndaʼa̱ndó xa̱ʼa̱ ña̱ chíndeétáʼanndó xíʼin na̱ va̱lí se̱ʼendó ña̱ sakúaʼakana xa̱ʼa̱ra (2 Crón. 15:7).