1. ¿Ndáaña ndákanixi̱ní ku̱a̱ʼání na̱ yiví?

 KU̱A̱ʼÁNÍ na̱ yiví kíʼinna kuenta xíʼin ña̱ xíxina ta saátu kéʼéna ejercicio chi kǒo kúni̱na kiʼinna kue̱ʼe̱. Soo ni saá, ndákanixi̱nína ña̱ kixaa̱ iin ki̱vi̱ ña̱ kuvina saáchi kǒo ndátuna ña̱ kutakuna ndiʼi tiempo. Soo ta̱ Jesús ni̱ka̱ʼa̱nra nu̱ú Juan 3:16 xíʼin 5:24 ña̱ kiviva xa̱a̱yó kutakuyó ndiʼi tiempo.

2. ¿Ndáaña ni̱ka̱ʼa̱n ta̱ Jesús nu̱ú Juan capítulo 6? (Juan 6:​39, 40).

² Iin ki̱vi̱, ta̱ Jesús ke̱ʼéra iin milagro ta xi̱niñúʼura loʼo kuití si̱ta̱váʼa xíʼin ti̱a̱ká ña̱ sa̱kúxura ku̱a̱ʼání na̱ yiví. a Ndákanda̱ní-iniyó xíʼin ña̱ ke̱ʼéra, soo ña̱ ni̱ka̱ʼa̱nra tá ni̱ya̱ʼa inka ki̱vi̱ kúú ña̱ ndáyáʼviníka. Ta̱ Jesús nda̱kiʼinra ku̱a̱ʼa̱nra ñuu Capernaúm, chí yuʼú tá mar ña̱ Galilea ta ndiʼi na̱ yiví kán xi̱ndiku̱nna ni̱xa̱ʼa̱nna sa̱tára, ta kán ni̱ka̱ʼa̱nra xíʼinna ña̱ kivi ndataku na̱ yiví ta kutakuna ndiʼi tiempo (kaʼvi Juan 6:​39, 40). Ndakanixi̱ní xa̱ʼa̱ na̱ veʼún xíʼin na̱ migoún na̱ xa̱a̱ ni̱xi̱ʼi̱. Ña̱ ni̱ka̱ʼa̱n ta̱ Jesús sánáʼa̱ña miíyó ña̱ ku̱a̱ʼání na̱ yiví na̱ xa̱a̱ ni̱xi̱ʼi̱ ndatakuna, ta miíún xíʼin na̱ veʼún á na̱ táʼún kivi kutakundó ndiʼi saá tiempo. Soo íyo inka ña̱ ni̱ka̱ʼa̱n ta̱ Jesús nu̱ú Juan capítulo 6, ta ku̱a̱ʼání na̱ yiví íxayo̱ʼvi̱ña xíʼinna kunda̱a̱-inina xíʼinña. Ná ka̱ʼa̱nyó xa̱ʼa̱ña.

3. ¿Ndáaña ni̱ka̱ʼa̱n ta̱ Jesús xa̱ʼa̱ miíra nu̱ú Juan 6:51?

³ Tá xa̱a̱ ndi̱ʼi ña̱ ta̱xi ta̱ Jesús xi̱xi na̱ yiví kán, nda̱kaʼánna  xa̱ʼa̱ maná ña̱ xi̱taxi Jehová xi̱xixi na̱ israelita tá xi̱ñuʼuna nu̱ú ñuʼú yi̱chí. Biblia káʼa̱nña xa̱ʼa̱ maná ña̱ xi̱kuuña si̱ta̱váʼa ña̱ ke̱e chí ndiví (Sal. 105:40; Juan 6:31). Ña̱kán ta̱ Jesús ni̱ka̱ʼa̱nra xíʼinna xa̱ʼa̱ sava ña̱ʼa ña̱ xa̱a̱ xi̱xini̱na xa̱ʼa̱ ña̱ maná, ña̱ va̱ʼa sanáʼa̱rana iin ña̱ ndáyáʼviní. Ni ta̱xiva Jehová maná ña̱ xi̱xi na̱ ñuu Israel, soo ni saá ni̱xi̱ʼi̱vana (Juan 6:49). Soo ta̱ Jesús ni̱ka̱ʼa̱nra xa̱ʼa̱ miíra ña̱ kúúra “si̱ta̱váʼa mií ña̱ ndixa ña̱ ke̱e chí ndiví”, ni̱ka̱ʼa̱ntura ña̱ kúúra “si̱ta̱váʼa Ndióxi̱” ta saátu ni̱ka̱ʼa̱nra ña̱ kúúra “si̱ta̱váʼa ña̱ táxi ña̱ táku” (Juan 6:​32, 33, 35). Tá ni̱ya̱ʼa loʼo, ta̱ Jesús ni̱ka̱ʼa̱nra ña̱ su̱ví inkáchi íyora xíʼin si̱ta̱váʼa ña̱ ta̱xi Ndióxi̱ ndaʼa̱ na̱ ñuu Israel. Mií ta̱ Jesús ni̱ka̱ʼa̱n ña̱yóʼo: “Yi̱ʼi̱ kúú si̱ta̱váʼa ña̱ táxi ña̱ táku ña̱ ke̱e chí ndiví. Tá iinna ná kuxu si̱ta̱váʼa yóʼo, kutakuna ndiʼi tiempo” (kaʼvi Juan 6:51). Soo na̱ judío kǒo níkunda̱a̱ káxi inina xíʼin ña̱ ni̱ka̱ʼa̱n ta̱ Jesús, saáchi ni̱ka̱ʼa̱nra ña̱ ke̱era chí ndiví ta saátu ni̱ka̱ʼa̱nra ña̱ xi̱kuura si̱ta̱váʼa ña̱ ndáyáʼvika nu̱ú maná ña̱ ta̱xi Ndióxi̱ ndaʼa̱ na̱ ñuu Israel. Soo saá ni̱ka̱ʼa̱nra inka ña̱ʼa xíʼinna, ña̱ chi̱ndeétáʼan xíʼinna kunda̱a̱-inina. Ni̱ka̱ʼa̱nra: “Si̱ta̱váʼa ña̱ taxii̱ [...] kúú ku̱ñui̱”. ¿Ndáaña xi̱kuni̱ kachi ta̱ Jesús xíʼin tu̱ʼun yóʼo? Ndáyáʼviní ña̱ kunda̱a̱-iniyó xíʼin ña̱ ni̱ka̱ʼa̱nra, saáchi saá kunda̱a̱-iniyó ndáaña ke̱ʼéra ña̱ va̱ʼa taxira ña̱ kutakuyó ndiʼi saá tiempo. Ná kotoyó ndáaña xi̱kuni̱ kachi ta̱ Jesús.

¿NDÁAÑA XI̱KUNI̱ KACHI TA̱ JESÚS?

4. ¿Nda̱chun ni̱sa̱a̱ savana tá xi̱niso̱ʼona ña̱ ni̱ka̱ʼa̱n ta̱ Jesús?

⁴ Sava na̱ xi̱niso̱ʼo ña̱ ni̱ka̱ʼa̱n ta̱ Jesús ni̱sa̱a̱na tá xi̱niso̱ʼona ña̱ ni̱ka̱ʼa̱nra ña̱ taxira ku̱ñura ña̱ va̱ʼa kutaku na̱ yiví. Saáchi nda̱kanixi̱nína ña̱ ni̱ka̱ʼa̱nra xíʼinna ña̱ kixáʼana kuxuna ku̱ñura (Juan 6:52). Soo saá ni̱ka̱ʼa̱n ta̱ Jesús inka ña̱ʼa ña̱ nda̱kanda̱ní-inina xíʼin á iin ku̱a̱ʼa̱n va̱ʼa inina tá xi̱niso̱ʼona ña̱ ni̱ka̱ʼa̱nra: “Ña̱ nda̱a̱ káʼi̱n xíʼinndó, tá kǒo xíxindó ku̱ñu ta̱ kúú se̱ʼe ta̱a ta ni kǒo xíʼindó ni̱i̱ra va̱ása kutakundó” (Juan 6:53).

5. ¿Nda̱chun va̱ʼa kúnda̱a̱-iniyó ña̱ kǒo níka̱ʼa̱n ta̱ Jesús xíʼin na̱ judío ña̱ koʼona ni̱i̱ra?

⁵ Nda̱a̱ tá tiempo ña̱ ni̱xi̱yo ta̱ Noé, Ndióxi̱ ni̱ka̱ʼa̱nra xíʼin na̱ yiví ña̱ kǒo xíniñúʼu kuxuna ni̱i̱ (Gén. 9:​3, 4). Ta tá ni̱ya̱ʼa tiempo, ta̱xira Ley ndaʼa̱ na̱ ñuu Israel nu̱ú ni̱ka̱ʼa̱nra xíʼinna ña̱ va̱ása xíniñúʼu kuxuna ni̱i̱. Ta ndiʼi na̱ xi̱yaʼandoso Ley yóʼo ta xi̱xixina ni̱i̱, xi̱xiniñúʼu kuvina (Lev. 7:27). Ta̱ Jesús ni̱ka̱ʼa̱nra xíʼin na̱ judío ña̱ ná ixato̱ʼóna Ley ña̱ ta̱xi Jehová ndaʼa̱ ta̱ Moisés (Mat. 5:​17-19). Ña̱kán kǒo níka̱ʼa̱nví ta̱ Jesús xíʼin na̱ yiví ña̱ kuxuna ku̱ñura á ña̱ koʼona ni̱i̱ra. Chi ña̱ xi̱kuni̱ ta̱ Jesús kúú ña̱ sanáʼa̱rana ña̱ va̱ʼa kunda̱a̱-inina ndáaña xi̱xiniñúʼu keʼéna ña̱ va̱ʼa kutakuna ndiʼi tiempo (Juan 6:54).

6. ¿Ndáaña chíndeétáʼan xíʼinyó kunda̱a̱-iniyó ña̱ kǒo níka̱ʼa̱n ta̱ Jesús xíʼinna ña̱ kuxuna ku̱ñura ta koʼona ni̱i̱ra?

⁶ Ta̱ Jesús kǒo níxikuni̱ kachira xíʼin na̱ yiví na̱ xi̱niso̱ʼo ña̱ ni̱ka̱ʼa̱nra chí Capernaúm, ña̱ tá níxixina ku̱ñura á koʼona ni̱i̱ra ni̱ʼína ña̱ kutakuna ndiʼi tiempo. Chi saá xi̱keʼéva ta̱ Jesús chi xi̱xiniñúʼura ejemplo tá xi̱sanáʼa̱ra na̱ yiví. Ná ndakaʼányó xa̱ʼa̱ ña̱ ni̱ka̱ʼa̱nra xíʼin ñá samaritana ñá ni̱xa̱ʼa̱n ta̱vá ti̱kui̱í ini pozo, tá ni̱ka̱ʼa̱nra: “Na̱ ná koʼo ti̱kui̱í tá táxii̱ va̱ása yi̱chi̱ka-inina. Ti̱kui̱í tá taxii̱ ndaʼa̱na táki̱ʼva íyo ti̱kui̱í tá kána ini iin pozo saá xa̱a̱rá koorá inina ta taxirá kutakuna ndiʼi tiempo” (Juan 4:​7, 14). b  Ta̱ Jesús kǒo níkuni̱ kachira ña̱ tá ná koʼo ñá ñaʼá kán ti̱kui̱í ini iin pozo xa̱a̱ñá kutakuñá ndiʼi tiempo. Ta saátu tá ni̱ka̱ʼa̱nra xíʼin na̱ yiví na̱ ñuu Capernaúm xa̱ʼa̱ ku̱ñura xíʼin ni̱i̱ra kǒo níkuni̱ kachira ña̱ kuxuna ña̱yóʼo ña̱ va̱ʼa ni̱ʼína ña̱ kutakuna ndiʼi tiempo.

ÑA̱ KU̱U KU̱I̱YA̱ 32 XÍʼIN ÑA̱ KU̱U KU̱I̱YA̱ 33

7. ¿Ndáaña káʼa̱n savana xa̱ʼa̱ ña̱ ni̱ka̱ʼa̱n ta̱ Jesús nu̱ú Juan 6:53?

⁷ Sava na̱ yiví na̱ xáʼa̱n veʼe-ñu̱ʼu káʼa̱nna ña̱ inkáchi kítáʼan ña̱ ni̱ka̱ʼa̱n ta̱ Jesús nu̱ú Juan 6:53 xíʼin ña̱ ni̱ka̱ʼa̱nra nu̱ú Mateo 26:​26-28. Chi nu̱ú Mateo kúú nu̱ú ni̱ka̱ʼa̱nra ndáa ki̱ʼva xíniñúʼu ndakaʼánna xa̱ʼa̱ra tá ná kuvira. Na̱ yiví káʼa̱nna ña̱ ndiʼi na̱ xáʼa̱n ki̱vi̱ tá ndákaʼánna xa̱ʼa̱ ña̱ ni̱xi̱ʼi̱ ta̱ Jesús xíniñúʼu kuxuna si̱ta̱váʼa ta saátu xíniñúʼu koʼona vino tá yáʼa kán. Soo, ¿á ña̱ ndixa kúú ña̱ káʼa̱nna? Ndáyáʼviní kunda̱a̱-iniyó xa̱ʼa̱ ña̱yóʼo, saáchi ndiʼi ku̱i̱ya̱ ku̱a̱ʼání na̱ yiví xáʼa̱n xíʼinyó tá ndákaʼányó xa̱ʼa̱ ki̱vi̱ ña̱ ni̱xi̱ʼi̱ ta̱ Jesús. Soo ña̱ ni̱ka̱ʼa̱n ta̱ Jesús nu̱ú Juan 6:53 su̱ví inkáchi íyoña xíʼin ña̱ ni̱ka̱ʼa̱nra nu̱ú Mateo 26:​26-28.

8. ¿Ndáaña ku̱u ku̱i̱ya̱ 32 ta ndáaña ku̱u ku̱i̱ya̱ 33? (Koto na̱ʼná).

⁸ Vitin ná kotoyó u̱vi̱ ña̱ʼa ña̱ ni̱ka̱ʼa̱n ta̱ Jesús xa̱ʼa̱. Ña̱ nu̱ú, ¿ama ni̱ka̱ʼa̱n ta̱ Jesús tu̱ʼun ña̱ va̱xi nu̱ú Juan 6:​53-56 ta ndáa míí ndíkaa̱ra tá ni̱ka̱ʼa̱nraña? Ta̱ Jesús ni̱ka̱ʼa̱nra tu̱ʼun yóʼo xíʼin ku̱a̱ʼání na̱ judío na̱ ni̱xi̱yo ñuu  Galilea ku̱i̱ya̱ 32 tiempo vitin. Ña̱ u̱vi̱, ¿ndáana ni̱ka̱ʼa̱n ta̱ Jesús xíʼin? Na̱ ni̱ka̱ʼa̱nra xíʼin xi̱kuu na̱ ñuu Galilea ta ku̱a̱ʼání na̱yóʼo ña̱ ni̱ndi̱ʼi̱ka-inina xa̱ʼa̱ ña̱ kuxuna nu̱úka ña̱ sakúaʼana xa̱ʼa̱ Ndióxi̱ (Juan 6:26). Ta tá ni̱ka̱ʼa̱n ta̱ Jesús iin ña̱ʼa ña̱ kǒo níkunda̱a̱-inina xíʼin, va̱ása níkandíxakanara ta nda̱a̱ sava na̱ discípulora ku̱xíkána nu̱úra (Juan 6:​14, 36, 42, 60, 64, 66). Soo tá ni̱ya̱ʼa iin ku̱i̱ya̱ví saá xi̱xira xíʼin na̱ apóstolra chí ñuu Jerusalén, ta ni̱ka̱ʼa̱nra xíʼinna ndáa ki̱ʼva ndakaʼánna xa̱ʼa̱ra tá ná kuvira. Ña̱kán síínva ni̱xi̱yo ña̱ ni̱ka̱ʼa̱n ta̱ Jesús ku̱i̱ya̱ 32 ta sííntu ni̱xi̱yo ña̱ ni̱ka̱ʼa̱nra ku̱i̱ya̱ 33, saáchi ku̱i̱ya̱ 33 kúú ña̱ xi̱xira xíʼin na̱ apóstolra ta ni̱ka̱ʼa̱nra xíʼinna ndáa ki̱ʼva ndakaʼánna xa̱ʼa̱ra tá xa̱a̱ ná kuvira. Ñuú saá xi̱xi na̱ 11 apóstolra xíʼinra, ta saátu na̱yóʼo kǒo níkunda̱a̱ví-inina xíʼin ndiʼi ña̱ ni̱ka̱ʼa̱nra xíʼinna. Soo su̱ví inkáchi níxi̱yo na̱yóʼo xíʼin na̱ yiví na̱ xi̱niso̱ʼo ña̱ ni̱ka̱ʼa̱n ta̱ Jesús chí ñuu Galilea, saáchi na̱ apóstol yóʼo xi̱kunda̱a̱va-inina ña̱ se̱ʼe Ndióxi̱ xi̱kuu ta̱ Jesús ta̱ ke̱e chí ndiví (Mat. 16:16). Ña̱kán ni̱kusi̱íní-ini ta̱ Jesús xíʼinna ta ni̱ka̱ʼa̱nra xíʼinna: “Ndóʼó kúú na̱ íyo xíʼi̱n ni tá yáʼi̱ nu̱ú tu̱ndóʼo, kǒo sándakoondó yi̱ʼi̱” (Luc. 22:28). U̱vi̱ saá ña̱ ni̱ka̱ʼa̱nyó xa̱ʼa̱ yóʼo chíndeétáʼanña xíʼinyó kunda̱a̱-iniyó ña̱ su̱ví inkáchiví íyo ña̱ ni̱ka̱ʼa̱n ta̱ Jesús nu̱ú Juan 6:53 xíʼin ña̱ ni̱ka̱ʼa̱nra nu̱ú Mateo 26:​26-28. Soo íyoka ña̱ chindeétáʼan xíʼinyó kunda̱a̱-iniyó xíʼin ña̱yóʼo.

ÑA̱ VA̱ʼA ÑA̱ NDÁKIʼINYÓ XA̱ʼA̱ ÑA̱ NI̱XI̱ʼI̱ TA̱ JESÚS XA̱ʼA̱YÓ

9. ¿Ndáana kúú na̱ ni̱ki̱ʼvi ti̱xin trato xa̱á ña̱ ni̱ka̱ʼa̱n ta̱ Jesús xa̱ʼa̱?

⁹ Ñuú tá xi̱xi ta̱ Jesús xíʼin na̱ apóstolra, ta̱xira si̱ta̱váʼa ña̱ kǒo yuxa̱n iyá ndíkaa̱ xíʼin kuxuna ta ni̱ka̱ʼa̱nra xíʼinna ña̱ nda̱a̱ táki̱ʼva íyo ku̱ñura saá íyoña. Tándi̱ʼi, ta̱xira vino xi̱ʼina ta ni̱ka̱ʼa̱nra xíʼinna, ña̱ táyóʼo íyora nda̱a̱ táki̱ʼva íyo ni̱i̱ra ña̱ kíndo̱o Ndióxi̱ iin trato xíʼinna (Mar. 14:​22-25; Luc. 22:20; 1 Cor. 11:24). Ndáyáʼviní ña̱ ni̱ka̱ʼa̱n ta̱ Jesús. Su̱ví xíʼin ndiʼi na̱ yiví níkeʼé Jehová trato xa̱á yóʼo saáchi xíʼin sava kuitívana ke̱ʼéraña. Ta na̱yóʼo kúú ndiʼi na̱ ndáka̱xin mií Jehová ña̱ va̱ʼa kaʼndachíñuna xíʼin ta̱ Cristo ti̱xin Reinora (Heb. 8:​6, 10; 9:15). Ñuú saá, va̱ása níkunda̱a̱ví-ini na̱ apóstol ndáaña xi̱kuni̱ kachi ña̱yóʼo. Soo tá ni̱ya̱ʼa loʼo, nda̱kiʼinna espíritu santo ña̱ va̱ʼa ku̱ʼu̱nna chí ndiví ña̱ kaʼndachíñuna xíʼin ta̱ Jesús (Juan 14:​2, 3).

10. ¿Á inkáchi íyo ña̱ ni̱ka̱ʼa̱n ta̱ Jesús xíʼin na̱ apóstolra xíʼin ña̱ ni̱ka̱ʼa̱nra xíʼin na̱ ñuu Galilea? (Koto na̱ʼná).

¹⁰ Ñuú tá xi̱xi ta̱ Jesús xíʼin na̱ apóstolra, ni̱ka̱ʼa̱nra xa̱ʼa̱ iin grupo loʼo na̱ yiví. Ta ti̱xin grupo yóʼo xi̱ñuʼu na̱ apóstolra na̱ xi̱xi xíʼinra ñuú kán (Luc. 12:32). Ta na̱ apóstolra yóʼo xíʼin inka na̱ yiví na̱ ki̱ʼvi ti̱xin grupo loʼo yóʼo, kiviva kuxuna si̱ta̱váʼa ta saátu kiviva koʼona tá vino. Ndiʼi na̱yóʼo ku̱ʼu̱nna chí ndiví ta kaʼndachíñuna xíʼin ta̱ Jesús. Soo ña̱ ni̱ka̱ʼa̱n ta̱ Jesús ñuú saá xíʼin na̱ apóstolra, síínníva ni̱xi̱yoña nu̱ú ña̱ ni̱ka̱ʼa̱nra xíʼin na̱ yiví na̱ ñuu Galilea. Ña̱kán tu̱ʼun ña̱ ni̱ka̱ʼa̱n ta̱ Jesús xíʼin na̱ ñuu Galilea xíʼin ku̱a̱ʼáníka na̱ yivíva ni̱ka̱ʼa̱nraña.

11. ¿Ndáana ndakiʼin bendición ña̱ ni̱ka̱ʼa̱n ta̱ Jesús xa̱ʼa̱ chí Galilea?

¹¹ Na̱ yiví na̱ ni̱ka̱ʼa̱n ta̱ Jesús xa̱ʼa̱ tá xi̱ndikaa̱ra ñuu Galilea ku̱i̱ya̱ 32 xi̱kuu na̱ judío na̱ ni̱xa̱a̱ nu̱úra chi xi̱kuni̱na ña̱ taxira ña̱ kuxuna. Soo ta̱ Jesús ni̱ka̱ʼa̱nra xíʼinna xa̱ʼa̱ iin ña̱ʼa ña̱ ndáyáʼviníka nu̱ú ña̱ kuxuna, chi ña̱yóʼo chindeétáʼanña xíʼinna ña̱ ni̱ʼína ña̱  kutakuna ndiʼi tiempo. Ta saátu ni̱ka̱ʼa̱n ta̱ Jesús ña̱ ndiʼi na̱ ná kuvi, ndatakuna nu̱ú ñuyǐví xa̱á ta kivi koona ndiʼi tiempo. Ña̱kán bendición ña̱ ni̱ka̱ʼa̱nra xa̱ʼa̱ yóʼo, ku̱a̱ʼání na̱ yiví kivi ndakiʼinña. Ta̱ Jesús ni̱ka̱ʼa̱nra: “Yi̱ʼi̱ kúú si̱ta̱váʼa ña̱ táxi ña̱ táku ña̱ ke̱e chí ndiví. Tá iinna ná kuxu si̱ta̱váʼa yóʼo, kutakuna ndiʼi tiempo. Ta si̱ta̱váʼa ña̱ taxii̱ ña̱ va̱ʼa ná kutaku na̱ ñuyǐví kúú ku̱ñui̱”. Soo ñuú tá xi̱xira xíʼin na̱ discípulora ni̱ka̱ʼa̱nra xa̱ʼa̱ iin bendición ña̱ ndakiʼin loʼo kuití na̱ yiví (Juan 6:51). c

12. ¿Ndáaña xíniñúʼu keʼéyó ña̱ va̱ʼa kutakuyó ndiʼi tiempo?

¹² ¿Á kúni̱ kachi tu̱ʼun ña̱ ni̱ka̱ʼa̱n ta̱ Jesús xí’in na̱ judío chí Galilea ña̱ ndiʼiví na̱ yiví ndakiʼin bendición ña̱ koona ndiʼi tiempo? Su̱ví saáví íyoña, chi nda̱saa na̱ kándíxa ta̱ Jesús kúú na̱ kutaku ndiʼi tiempo. Ku̱a̱ʼání na̱ yiví na̱ káʼa̱n kúú cristiano, káʼa̱nna ña̱ xíniñúʼu keʼé kuitíyó kúú ña̱ kundikaa̱ ta̱ Jesús níma̱yó tasaá ka̱kuyó (Juan 6:29). Soo na̱ yiví na̱ xi̱niso̱ʼo ña̱ ni̱ka̱ʼa̱n ta̱ Jesús chí ñuu Galilea, iin tiempo ka̱ndíxanara soo tá ndi̱ʼi sa̱ndákoovanara. ¿Nda̱chun ke̱ʼéna ña̱yóʼo?

13. ¿Ndáaña xíniñúʼu keʼé na̱ yiví ña̱ va̱ʼa koona discípulo ta̱ Jesús?

¹³ Ku̱a̱ʼání na̱ yiví na̱ xi̱xaʼa̱n xi̱xito ta̱ Jesús, xi̱kuni̱ kuitína ña̱ ná taxira ña̱ kuxuna, ña̱ sandáʼarana ta saátu ña̱ ka̱ʼa̱nra xíʼinna xa̱ʼa̱ nda̱saa ña̱ xi̱kuni̱na kuniso̱ʼona. Soo ta̱ Jesús ni̱ka̱ʼa̱nra xíʼinna ña̱ xíniñúʼu keʼéna inka ña̱ʼa ña̱ va̱ʼa kundiku̱nnara. Saáchi ta̱ Jesús kǒo níkixi kuitíra taxira ña̱ kuxu na̱  yiví á ña̱ sandáʼarana. Chi ña̱ xi̱niñúʼu keʼé na̱ yiví kúú ña̱ kuniso̱ʼona ña̱ káʼa̱n ta̱ Jesús ta keʼéna ndiʼi ña̱ sánáʼa̱rana (Juan 5:40; 6:44).

14. ¿Ndáaña xíniñúʼu keʼéyó ña̱ va̱ʼa kooyó ndiʼi tiempo?

¹⁴ Ta̱ Jesús ni̱ka̱ʼa̱nra xíʼin na̱ judío ña̱ xi̱niñúʼu kandíxana ña̱ kuvira xa̱ʼa̱na, tasaá va̱ʼa ni̱ʼína ña̱ kutakuna ndiʼi saá tiempo. Na̱ judío xi̱xiniñúʼu kandíxana ña̱yóʼo ta saátu miíyó xíniñúʼu kandíxayóña (Juan 6:40). Ña̱ ni̱ka̱ʼa̱n ta̱ Jesús nu̱ú Juan 6:53 kúni̱ kachiña ña̱ xíniñúʼu kandíxayó ña̱ ni̱xi̱ʼi̱ra xa̱ʼa̱yó tasaá va̱ʼa ni̱ʼíyó ña̱ kutakuyó ndiʼi tiempo. Ta ndiʼiva na̱ yiví kivi ni̱ʼí ña̱ kutakuna ndiʼi tiempo tá ná kandíxana ta̱ Jesús (Efes. 1:7).

15, 16. ¿Ndáaña ndáyáʼviní sándakaʼán Juan capítulo 6 miíyó?

¹⁵ Ña̱ káʼa̱n Juan capítulo 6 ndáyáʼviníña nu̱úyó, saáchi tá káʼviyóña kíʼinyó kuenta ña̱ kúni̱ní ta̱ Jesús xínira na̱ yiví. Ñuu Galilea sa̱ndáʼa ta̱ Jesús na̱ xi̱kuumií kue̱ʼe̱, ni̱ka̱ʼa̱nra xíʼinna xa̱ʼa̱ Reino Ndióxi̱ ta saátu ta̱xira ña̱ xi̱xina (Luc. 9:11; Juan 6:​2, 11, 12). Ta saátu ni̱ka̱ʼa̱nra ña̱ miíra kúú si̱ta̱váʼa ña̱ táxi ña̱ kutakuyó (Juan 6:​35, 48).

¹⁶ Na̱ yiví na̱ ni̱ka̱ʼa̱n ta̱ Jesús xa̱ʼa̱ ña̱ kúúna “inka ndikachi”, kǒo xíniñúʼu kuxuna si̱ta̱váʼa ta ni va̱ása kívi koʼona tá vino tá xíyo ña̱ Conmemoración (Juan 10:16). Soo ku̱a̱ʼáníva ña̱ va̱ʼa ndákiʼinna xa̱ʼa̱ ña̱ kándíxana ña̱ ni̱xi̱ʼi̱ ta̱ Jesús xa̱ʼa̱na (Juan 6:53). Soo na̱ xíxi si̱ta̱váʼa ta xíʼina tá vino, náʼa̱na ña̱ ni̱ki̱ʼvina ti̱xin trato xa̱á ña̱ ni̱ka̱ʼa̱n ta̱ Jesús xa̱ʼa̱ ta ku̱ʼu̱nna chí ndiví ña̱ kaʼndachíñuna ti̱xin Reino Ndióxi̱. Ña̱kán ni kúúyó na̱ ku̱ʼu̱n chí ndiví á na̱ kundoo nu̱ú ñuʼú yóʼo, ndáyáʼviní ña̱ káʼa̱n Juan capítulo 6 nu̱úyó. Chi ña̱yóʼo káʼa̱nña ña̱ xíniñúʼu kandíxayó ña̱ ni̱xi̱ʼi̱ ta̱ Jesús xa̱ʼa̱yó ña̱ va̱ʼa ni̱ʼíyó ña̱ kutakuyó ndiʼi tiempo.