1, 2. ¿Nda̱chun ku̱a̱ʼání na̱ yiví ndataka ña̱ ku̱i̱ya̱ 2018, ta nda̱chun ndáyáʼviní ña̱yóʼo? (Koto na̱ʼná ña̱ va̱xi chí xa̱ʼa).

ÑA̱ 31 TÍ MARZO ÑA̱ KU̱I̱YA̱ 2018, tá ná ki̱ta ñu̱ʼu ku̱a̱ʼání na̱ ndásakáʼnu Ndióxi̱ xíʼin inka na̱ yiví ndataka ña̱ ndakaʼánna xa̱ʼa ña̱ ni̱xi̱ʼi̱ ta̱ Jesús. Iin yichi̱ nu̱ú ku̱i̱ya̱ ndákaʼányó xa̱ʼa ña̱ ni̱xi̱ʼi̱ra, ku̱a̱ʼání na̱ yiví ndátaka ña̱ ndákaʼánna xa̱ʼara ña̱ iníísaá ñuyǐví ni xa̱a̱ síín ñuu ndóo iin iinna.

² Jehová xíʼin ta̱ Jesús kúsi̱íní-inina tá xítona ña̱ ndátaka na̱ yiví ña̱ iníísaá ñuyǐví ña̱ ndákaʼánna xa̱ʼa ña̱ ni̱xi̱ʼi̱ ta̱ Jesús. Ña̱ Biblia ni̱ka̱ʼa̱nña ku̱a̱ʼání na̱ yiví na̱ ke̱e ndiʼi ñuu, ñuu válí, ñuu náʼnu ta saátu na̱ káʼa̱n inka tu̱ʼun, ta ka̱ʼa̱nna ña̱yóʼo: “Ndióxi̱ ta̱ íyo chí ndiví xíʼin se̱ʼera kúú ta̱ sáka̱ku miíyó” (Rev. 7:9, 10). Kúsi̱íní-iniyó chi xítoyó ku̱a̱ʼání kúú na̱ yiví na̱ ndásakáʼnu Jehová xíʼin ta̱ Jesús tá ndákaʼánna xa̱ʼa ña̱ ni̱xi̱ʼi̱ ta̱ Jesús.

3. ¿Ndáaña ndakuiinyó ti̱xin ña̱ kaʼviyó yóʼo?

³ Nu̱ú ña̱ kaʼviyó yóʼo ndakuiinyó ku̱mí ña̱ ndáka̱tu̱ʼun. Ña̱  nu̱ú, ¿ndáaña kivi keʼéyó ña̱ va̱ʼa ku̱ʼu̱nyó conmemoración tasaá ndakiʼinyó ña̱ va̱ʼa? Ña̱ u̱vi̱, ¿nda̱chun chíndeé táʼan ña̱ conmemoración xíʼinyó ña̱ va̱ʼa kutáʼanyó xíʼin ndiʼina? Ña̱ u̱ni̱, ¿ndáaña kivi keʼéyó ña̱ va̱ʼa inkáchi kutáʼanyó xíʼin ndiʼina? Ña̱ ku̱mí, ¿ama kúú ña̱ kǒo keʼékayó conmemoración?

4. ¿Nda̱chun xíniñúʼu chika̱a̱yó ndée ña̱ ku̱ʼu̱nyó conmemoración?

⁴ ¿Nda̱chun ndáyáʼviní ña̱ ku̱ʼu̱nyó conmemoración? Tá xáʼa̱nyó reunión kán kúú nu̱ú ndásakáʼnuyó Ndióxi̱. Jehová xíʼin ta̱ Jesús kúnda̱a̱va-inina ña̱ chíka̱a̱yó ndée ña̱ ku̱a̱ʼa̱nyó conmemoración ku̱i̱ya̱ tá ku̱i̱ya̱. Soo tá yáʼayó nu̱ú iin tu̱ndóʼo káʼnu sana nda̱a̱ kǒo kivi ku̱ʼu̱nyó ta Jehová kúnda̱a̱-inira ña̱yóʼo. Xíʼin ña̱ kéʼéyó náʼa̱yó ña̱ ndáyáʼviní ña̱ ku̱ʼu̱nyó reunión, ta kúsi̱íní-ini Jehová xíʼinyó ta kaʼyíra ki̱vi̱yó nu̱ú libro ña̱ ndakaʼánra xa̱ʼayó. Nu̱ú ña̱yóʼo va̱xi ki̱vi̱ na̱ kutaku ndiʼi tiempo (Mal. 3:16; Rev. 20:15).

5. Tá kúma̱níka koo conmemoración, ¿ndáaña kivi keʼéyó ña̱ va̱ʼa kunda̱a̱-iniyó á ndixa kándíxayó Ndióxi̱?

⁵ Tá kúma̱níka koo conmemoración, xíniñúʼu ka̱ʼa̱nyó xíʼin Jehová ta ndakanixi̱níyó xa̱ʼa ña̱ kúúyó migora (kaʼvi 2 Corintios 13:5). * ¿Ndáaña kivi keʼéyó? Ta̱ Pablo ni̱ka̱ʼa̱nra xíniñúʼu kotondosóyó miíyó á ndixa kándíxayó Ndióxi̱. Xa̱ʼa ña̱yóʼo xíniñúʼu nda̱ka̱tu̱ʼunyó miíyó: “¿Á kándíxai̱ ña̱ ndixa kítáʼi̱n xíʼin na̱ kéʼé ña̱ kúni̱ Jehová? ¿Á chíka̱i̱ ndée ña̱ ku̱ʼi̱n sanáʼi̱ na̱ yiví xa̱ʼa Reino Ndióxi̱? ¿Á ndixa kándíxai̱ ña̱ íyoyó tiempo nu̱ú ndíʼi ta si̱lóʼo kúma̱ní ña̱ ndiʼi-xa̱ʼa ñuyǐví ta̱ Ndi̱va̱ʼa? ¿Á kándíxai̱ Jehová xíʼin ta̱ Jesús táki̱ʼva xi̱kandíxai̱na tá nda̱kuchii̱?” (Mat. 24:14; 2 Tim. 3:1; Heb. 3:14). Ña̱ ndakanixi̱níyó xa̱ʼa ña̱yóʼo chindeéña miíyó ña̱ na̱ʼa̱yó ndáaña ndáyáʼvika nu̱úyó.

6. a) ¿Ndáaña xíniñúʼu keʼéyó ña̱ va̱ʼa xa̱a̱yó kutakuyó ndiʼi tiempo? b) ¿Ndáaña kéʼé iin ta̱ anciano ndiʼi ku̱i̱ya̱ ña̱ va̱ʼa kúsi̱í-inira tá íyo conmemoración? c) ¿Ndáaña xíniñúʼu keʼéyó ña̱ va̱ʼa kundiku̱nyó yichi̱ ta̱ hermano yóʼo?

⁶ Iin ña̱ kivi keʼéyó kúú ña̱ kaʼviyó sava ña̱ va̱xi nu̱ú tutu ña̱ káʼa̱n xa̱ʼa conmemoración ta ndakanixi̱níyó xa̱ʼaña (kaʼvi Juan 3:16; * 17:3). * Ña̱ va̱ʼa xa̱a̱yó kutakuyó ndiʼi tiempo xíniñúʼu sakuaʼayó xa̱ʼa Jehová ta kándíxayó ta̱ Jesús. Ña̱ va̱ʼa koo tu̱ʼvayó tá ná kixaʼá conmemoración, xíniñúʼu kaʼviyó xa̱ʼa ña̱yóʼo, ta ña̱yóʼo chindeé miíyó ña̱ kándíxakayó Jehová xíʼin ta̱ Jesús. Ná kotoyó ndáaña kéʼé iin ta̱ xa̱a̱ ku̱a̱ʼání ku̱i̱ya̱ kúú anciano. Xa̱a̱ ku̱a̱ʼá ku̱i̱ya̱, táan va̱ʼara artículo ña̱ va̱xi nu̱ú tutu La Atalaya ña̱ káʼa̱n xa̱ʼa conmemoración xíʼin xa̱ʼa ña̱ kúʼvi̱-ini Jehová xíʼin ta̱ Jesús xínina miíyó. Ndiʼi ku̱i̱ya̱, tá kúma̱níka koo conmemoración, káʼvira tutu yóʼo. Sava táan va̱ʼara iin a u̱vi̱ artículo ña̱ káʼa̱n xa̱ʼa ña̱yóʼo. Kúnda̱a̱-inira tá kaʼvira tutu á káʼvira Biblia tá kíxaʼá ña̱ conmemoración ta ndákanixi̱níra xa̱ʼa ña̱yóʼo ku̱a̱ʼáníka ña̱ʼa xa̱á sákuaʼara. Soo ña̱ ndáyáʼvika kúú ña̱ kúʼvi̱ka-inira xínira Jehová xíʼin ta̱ Jesús. Tá ná kaʼviyó táki̱ʼva káʼvi ta̱ hermano yóʼo, xa̱a̱yó kuʼvi̱ka-iniyó kuniyó Jehová xíʼin ta̱ Jesús. Tasaá xa̱a̱na kundayáʼvikana nu̱úyó, ta ña̱yóʼo taxikaña ña̱ si̱í koo iniyó tá ku̱a̱ʼa̱nyó conmemoración.

7. a) ¿Ndáaña ni̱ka̱ʼa̱n ta Jesús xíʼin Jehová tá xi̱xira xíʼin na̱ discípulora? b) ¿Nda̱chun kúnda̱a̱-iniyó ña̱ nda̱kuiin Jehová ña̱ ni̱ka̱ʼa̱n ta̱ Jesús?

⁷ Mií ñu̱ú ña̱ ni̱xi̱yo cena ta̱ Jesús, ta̱ Jesús ni̱ka̱ʼa̱nra xíʼin Jehová ña̱ ná taxira ña̱ inkáchi kutáʼan na̱ discípulora táki̱ʼva íyo miíra xíʼin yivára (kaʼvi Juan 17:20, 21). * Nda̱kuiinva Jehová ña̱ ni̱ka̱ʼa̱n se̱ʼera. Kǒo inkaka reunión nu̱ú ndákutáʼan ku̱a̱ʼána. Tá íyo conmemoración saá kúú ña̱ xíni ndiʼi na̱ yiví ña̱ inkáchi kítáʼan ndiʼiyó na̱ kúú testigo Jehová. Millón na̱ yiví ña̱ iníísaá ñuyǐví ndákutáʼanna ni xa̱a̱ síín tu̱ʼun káʼa̱n iin iinna ta náʼa̱na ña̱ kándíxana Jehová kúú ta̱ chi̱ndaʼá ta̱ Jesús nu̱ú ñuʼú yóʼo. Soo íyo sava ñuu nu̱ú kǒo kútóona keʼéna ña̱ conmemoración chi va̱ása va̱ʼaña túvina. Soo Jehová xíʼin ta̱ Jesús kúsi̱íva-inina ña̱ xítona inkáchi ndákutáʼanyó ña̱ ndákaʼányó xa̱ʼana.

8. ¿Ndáaña ni̱ka̱ʼa̱n Jehová xíʼin ta̱ Ezequiel xa̱ʼa ña̱ ñuura?

⁸ Miíyó na̱ ndásakáʼnu Jehová kǒo ndákanda̱-iniyó xa̱ʼa ña̱ inkáchi kítáʼanyó. Jehová ni̱ka̱ʼa̱nra xíʼin ta̱ profeta Ezequiel xa̱ʼa ña̱ va̱ʼaní kutáʼanyó tiempo vitin. Ni̱ka̱ʼa̱nra xa̱ʼa u̱vi̱ yitu̱n, iin yitu̱n tú kuenta ta̱ Judá xíʼin inka yitu̱n tú kuenta ta̱ José xa̱a̱nú nduunú iinlá yitu̱n (kaʼvi Ezequiel 37:15-17). * Nu̱ú sección “Preguntas de los lectores”, nu̱ú La Atalaya ña̱ ka̱na yo̱o̱ julio tá ku̱i̱ya̱ 2016 ni̱ka̱ʼa̱nña: “Jehová ni̱ka̱ʼa̱nra xíʼin ta̱ Ezequiel iin tu̱ʼun va̱ʼa: ni̱ka̱ʼa̱nra ña̱ inkáchi kutáʼan na̱ ñuu Israel tá ná ndikóna nu̱ú ñúʼu ña̱ ni̱ka̱ʼa̱nra xíʼinna kundoona. Xíʼin ña̱yóʼo ni̱na̱ʼa̱ra ndáaña kuu tiempo vitin ña̱ inkáchi kutáʼan ndiʼiyó”.

9. Ta̱ Ezequiel ni̱ka̱ʼa̱nra ña̱ inkáchi kutáʼan ndiʼiyó, ¿nda̱saa xínu ña̱yóʼo tá íyo conmemoración?

⁹ Tá ki̱xaʼá ku̱i̱ya̱ 1919, Jehová sa̱ndátakara na̱ ku̱ʼu̱n chí ndiví ta chi̱ndeé táʼanra xíʼinna ña̱ viíka keʼéna chiñu nu̱úra, na̱yóʼo íyona táki̱ʼva íyo iin yitu̱n tú kuenta ta̱ Judá. Tándi̱ʼi ku̱a̱ʼáníka na̱ yiví ki̱xaʼána inkáchi ndákutáʼanna xíʼin na̱ kundoo nu̱ú ñuʼú yóʼo ta íyona táki̱ʼva íyo yitu̱n tú kuenta ta̱ José. Jehová ni̱ka̱ʼa̱nra ña̱ xa̱a̱ u̱vi̱ saána inkáchi koona nu̱úra (Ezeq. 37:19). Miíra ta̱xi ña̱ inkáchi kítáʼan na̱ ku̱ʼu̱n chí ndiví xíʼin na̱ kundoo nu̱ú ñuʼú yóʼo ta vitin kúúna iinlá ñuu (Juan 10:16; Zac. 8:23). Tiempo vitin u̱vi̱ saá na̱yóʼo káchíñuna nu̱ú ta̱ rey Jesucristo, nu̱ú ña̱ ka̱ʼyí ta̱ Ezequiel, Jehová ni̱ka̱ʼa̱nra xa̱ʼa ta̱ Jesús ña̱ íyora táki̱ʼva ni̱xi̱yo ta̱ David (Ezeq. 37:24, 25). Ndiʼi ku̱i̱ya̱ xítoyó ña̱ liviní xínu ña̱ ni̱ka̱ʼa̱n ta̱ Ezequiel xa̱ʼa ña̱ inkáchi kítáʼanyó xíʼin na̱ ku̱ʼu̱n chí ndiví ña̱ ndákaʼányó xa̱ʼa ña̱ ni̱xi̱ʼi̱ ta̱ Jesús. Soo vitin, ¿ndáaña kivi keʼéyó ña̱ va̱ʼa inkáchi kutáʼan ndiʼiyó?

10. ¿Ndáaña kivi keʼéyó tasaá inkáchi kutáʼanyó xíʼin na̱ ñuu Ndióxi̱?

¹⁰ Iin ña̱ kivi keʼéyó ña̱ va̱ʼa inkáchi kutáʼanyó kúú ña̱ vitá koo iniyó. Tá ni̱xi̱yo ta̱ Jesús nu̱ú ñuʼú yóʼo ni̱ka̱ʼa̱nra xíʼin na̱ discípulora ña̱ vitá ná koo inina (Mat. 23:12). Na̱ yiví íyo ñuyǐví yóʼo ndákanixi̱nína ña̱ ndáyáʼvikana nu̱ú inkana. Soo tá vitá íyo iniyó íxato̱ʼóyó na̱ anciano. Tá kúni̱yó inkáchi kutáʼanyó xíʼin ndiʼina xíniñúʼu kuniso̱ʼoyó ña̱ káʼa̱nna xíʼinyó. Tá vitá ná koo iniyó kusi̱í-ini Jehová xíʼinyó  chi ta̱yóʼo kǒo kútóora na̱ ni̱nu kúni, soo chíndeé táʼanra xíʼin na̱ vitá-ini (1 Ped. 5:5).

11. ¿Nda̱chun chíndeé táʼanña xíʼinyó ña̱ ndakanixi̱níyó xa̱ʼa vino xíʼin si̱táva̱ʼa ña̱ xíniñúʼuna tá íyo conmemoración?

¹¹ Inka ña̱ kivi keʼéyó ña̱ va̱ʼa inkáchi kutáʼanyó xíʼin ndiʼina kúú, ña̱ ndakanixi̱níyó xa̱ʼa vino xíʼin si̱táva̱ʼa ña̱ xíniñúʼuna tá íyo conmemoración. Xíniñúʼu ndakanixi̱níún xa̱ʼa ña̱yóʼo tá kúma̱níka koo ña̱ conmemoración xíʼin mií ñu̱ú ña̱ íyoña (1 Cor. 11:23-25). Si̱táva̱ʼa ña̱ kǒo níxiyá ndákiʼinña nu̱ú ku̱ñu ta̱ Jesús ña̱ ni̱xi̱ʼi̱ra xa̱ʼayó tá vino ndákiʼinrá nu̱ú ni̱i̱ra. Soo su̱ví iinlá ña̱yóʼo xíniñúʼu kunda̱a̱-iniyó xa̱ʼa. Ná ndakaʼányó chi ña̱ ni̱xi̱ʼi̱ ta̱ Jesús xa̱ʼayó ni̱na̱ʼa̱ña u̱vi̱ nu̱ú ña̱ʼa: ña̱ nu̱ú, Jehová kúʼvi̱ní-inira xínira miíyó chi ta̱xira se̱ʼera ni̱xi̱ʼi̱ xa̱ʼayó tasaá sa̱kákura miíyó. Ña̱ u̱vi̱, kúʼvi̱ní-ini ta̱ Jesús xínira miíyó chi ni̱xi̱ʼi̱ra xa̱ʼayó. Ña̱ ndakani vií xi̱níyó xa̱ʼa ña̱yóʼo chindeéña miíyó ña̱ kuʼvi̱-iniyó kuni táʼanyó. Ta ña̱ kúʼvi̱-iniyó xíniyó Jehová xíʼin na̱ hermano ña̱yóʼo kúú ña̱ táxi ña̱ inkáchi kutáʼanyó xíʼin ndiʼina.

12. ¿Ndáaña sakuaʼayó nu̱ú ña̱ káʼa̱n Mateo 18:35 xa̱ʼa Jehová?

¹² Inka ña̱ kivi keʼéyó ña̱ va̱ʼa inkáchi kutáʼanyó kúú, ña̱ káʼnu koo iniyó xa̱ʼa inkana. Tá iinna kéʼé ña̱ va̱ása kútóoyó ña̱ íyoyó ña̱ káʼnu-ini xa̱ʼana náʼa̱yó ña̱ táxiyó tixaʼvi ndaʼa̱ Jehová chi miíra íyora ña̱ káʼnu-ini xa̱ʼayó chi ni̱xi̱ʼi̱ se̱ʼera xa̱ʼayó. Ná ndakanixi̱níyó xa̱ʼa yichi̱ sa̱ndákoo ta̱ Jesús nu̱úyó ña̱ va̱xi nu̱ú Mateo 18:23-34. Ná nda̱ka̱tu̱ʼunyó miíyó: “¿Á chíndeé ña̱yóʼo yi̱ʼi̱ ña̱ keʼíi̱ táki̱ʼva ke̱ʼé ta̱ Jesús? ¿Á íyoi̱ ña̱ káʼnu-ini xa̱ʼa na̱ kéʼé ña̱ va̱ása kútói̱?”. Ndixava sava ña̱ kéʼéna xíʼinyó iin ku̱a̱chi ndeéní kúúña. Savatu, xa̱ʼa ña̱ kúúyó na̱ yiví ku̱a̱chi íxayo̱ʼvi̱ña xíʼinyó ña̱ kooyó ña̱ káʼnu-ini xa̱ʼa inkana. Soo xíʼin ña̱ ni̱ka̱ʼa̱n ta̱ Jesús kúnda̱a̱-iniyó ndáaña kúni̱ Jehová keʼéyó (kaʼvi Mateo 18:35). * Ta̱ Jesús ni̱ka̱ʼa̱nra va̱ása koo Jehová ña̱ káʼnu-ini xa̱ʼayó tá kǒo íyoyó ña̱ káʼnu-ini xa̱ʼa inkana tá su̱ví iin ku̱a̱chi káʼnu níkeʼéna xíʼinyó. Xíniñúʼu ndakanixi̱níyó xa̱ʼa ña̱yóʼo. Tá xíniso̱ʼoyó ña̱ ni̱ka̱ʼa̱n ta̱ Jesús ta  íyoyó ña̱ káʼnu-ini xa̱ʼa inkana, saá náʼa̱yó ña̱ kúni̱yó inkáchi kutáʼanyó xíʼin ndiʼina.

13. ¿Ndáaña kivi keʼéyó ña̱ va̱ʼa inkáchi kutáʼanyó xíʼin ndiʼina?

¹³ Ña̱ íyoyó ña̱ káʼnu-ini xa̱ʼa na̱ hermano, va̱ʼaní inkáchi kítáʼanyó xíʼinna. Ná ndakaʼányó chi ta̱ apóstol Pablo ni̱ka̱ʼa̱nra ña̱ xíniñúʼu chika̱a̱níyó ndée xíʼin ndiʼi níma̱yó ña̱ va̱ʼa inkáchi kutáʼanyó xíʼin ndiʼina chi espíritu santo chindeé táʼan xíʼinyó ña̱ keʼéyó ña̱yóʼo (Efes. 4:3). Tá ná kixaʼá ña̱ conmemoración, mií ñu̱ú saá kúú ña̱ xíniñúʼu ndakanixi̱níyó xa̱ʼa ña̱ kéʼéyó xíʼin inkana. Ná nda̱ka̱tu̱ʼunyó miíyó: “¿Á náʼi̱ xíʼin ña̱ kéʼíi̱ ña̱ kǒo sáa̱–inii̱ xínii̱ inkana? ¿Á kúnda̱a̱-ini inkana ña̱ chíka̱i̱ ndée ña̱ va̱ʼa kutáʼi̱n xíʼinna?”. Tá ná koo conmemoración, saá kúú ña̱ xíniñúʼu nda̱ka̱tu̱ʼun xíʼin miíyó ña̱yóʼo.

14. ¿Ndáaña keʼéyó ña̱ va̱ʼa kooyó ña̱ káʼnu-ini xa̱ʼa táʼanyó?

¹⁴ Inka ña̱ xíniñúʼu keʼéyó ña̱ va̱ʼa inkáchi kutáʼanyó xíʼin ndiʼina kúú ña̱ na̱ʼa̱yó ña̱ kúʼvi̱-iniyó xíniyó Jehová, chi kúúra iin Ndióxi̱ tá kúʼvi̱-ini xíni miíyó (1 Juan 4:8). Va̱ása xíniñúʼu ka̱ʼa̱nyó táʼan ña̱yóʼo: “Xíniñúʼu kuʼvi̱-inii̱ kunii̱ na̱ hermano soo mií ña̱ nda̱a̱ va̱ása kútói̱ keʼíi̱ña”. Tá ná ndakanixi̱níyó ña̱yóʼo na̱ʼa̱yó ña̱ kǒo kúni̱yó keʼéyó ña̱ ni̱ka̱ʼa̱n ta̱ Pablo ña̱ kooyó ña̱ káʼnu-ini xa̱ʼa inkana (Efes. 4:2). Ni̱ka̱ʼa̱nra ña̱ kuʼvi̱ní-iniyó kuni táʼanyó su̱ví nda̱saa kooyó ña̱ káʼnu–ini xa̱ʼana. Xíʼin ña̱yóʼo na̱kunda̱a̱-iniyó ña̱ xíniñúʼu keʼéyó u̱vi̱ saá ña̱yóʼo. Jehová kánara ndiʼi na̱ yiví ña̱ ndasakáʼnunara ni nda̱a̱ ndáaka ñuu ke̱ena á nda̱a̱ ndáaka tu̱ʼun káʼa̱nna (Juan 6:44). Mií Jehová xítora ña̱ va̱ʼa kúúmií na̱yóʼo ta kúʼvi̱-inira xínirana. Xa̱ʼa ña̱yóʼo va̱ása xíniñúʼu sa̱a̱-iniyó kuniyó ni iin na̱ hermano. Mií Jehová káʼa̱n xíʼinyó ña̱ kuʼvi̱-iniyó kuni táʼanyó (1 Juan 4:20, 21).

15. ¿Nda̱chun xíni̱yó ña̱ su̱ví ndiʼi tiempo koo ña̱ conmemoración?

¹⁵ Kixa̱a̱ iin ki̱vi̱ ta va̱ása keʼékayó ña̱ conmemoración. ¿Nda̱chun xíni̱yó ña̱yóʼo? Ta̱ Pablo ni̱ka̱ʼa̱nra xíʼin na̱ ku̱ʼu̱n chí ndiví ña̱ ndakaʼánna xa̱ʼa ña̱ ni̱xi̱ʼi̱ ta̱ Jesús “ndakaʼánndó xa̱ʼa ña̱ ni̱xi̱ʼi̱ ta̱ Jesús, nda̱a̱ ná ndikóra” (1 Cor. 11:26). Nu̱ú profecía ña̱ ni̱ka̱ʼyi̱ xa̱ʼa tiempo vitin, ta̱ Jesús ni̱ka̱ʼa̱nra xa̱ʼa ña̱ ndikóra. Ni̱ka̱ʼa̱nra ña̱yóʼo xa̱ʼa ña̱ gran tribulación: “Ta chí ndiví kunindó se̱ʼe ta̱a, ta ndiʼi na̱ ñuu yi̱ʼvínína ta kuakuna, tasaá kunina se̱ʼe ta̱a ña̱ kixira sa̱tá vi̱kó xíʼin ku̱a̱ʼání ndée. Ta ndeé va̱ʼa ka̱ʼa̱nra xíʼin na̱ angel, tasaá ku̱ʼu̱nna ndakayana ndiʼi na̱ nda̱ka̱xinra iníísaá ñuyǐví” (Mat. 24:29-31). Mií ta̱ Jesús ndakaya na̱ nda̱ka̱xinra ku̱ʼu̱n chí ndiví kaʼndachíñu xíʼinra tá íyokana nu̱ú ñuʼú yóʼo. Keʼéra ña̱yóʼo tá xa̱a̱ ná kixaʼá ña̱ gran tribulación, ta saáví kixaʼá ña̱ Armagedón. Ti̱xin guerra kán, ta̱ Jesús xíʼin ná 144,000 sandiʼi-xa̱ʼana na̱ chíñu íyo nu̱ú ñuʼú yóʼo (Rev. 17:12-14). Tá kúma̱níka kixi ta̱ Jesús ña̱ ndakiʼinra na̱ ku̱ʼu̱n xíʼinra chí ndiví saá kúú ña̱ koo ña̱ so̱ndiʼi conmemoración.

16. ¿Nda̱chun ndáyáʼviní ña̱ ku̱ʼu̱nyó conmemoración ña̱ koo ku̱i̱ya̱ vitin?

¹⁶ Ná chika̱a̱níyó ndée ña̱ ku̱ʼu̱nyó conmemoración ña̱ koo 31 tí marzo ña̱ ku̱i̱ya̱ 2018. Ná ka̱ʼa̱nyó xíʼin Jehová ña̱ ná chindeéra miíyó ña̱ va̱ʼa inkáchi kutáʼanyó xíʼin ndiʼina (kaʼvi Salmo 133:1). * Kǒo nandósóyó chi kixa̱a̱ iin ki̱vi̱ ña̱ va̱ása kooka conmemoración. Vitin ná na̱ʼa̱yó ña̱ ndáyáʼviní ña̱ inkáchi kutáʼanyó xíʼin ndiʼina tá xáʼa̱nyó conmemoración.