1, 2. ¿Nda̱chun xíniñúʼu kiʼinníyó kuenta xíʼin ña̱ tiempo tákuyó vitin? (Koto na̱ʼná ña̱ va̱xi chí xa̱ʼa).

KU̱A̱ʼÁNÍ na̱ doctor chíndeé táʼanna xíʼin sava na̱ yiví na̱ kúúmií kue̱ʼe̱ ña̱ xíkun. Kéʼéna ña̱yóʼo xa̱ʼa ña̱ kúni̱na chindeé táʼanna xíʼinna. Soo tá kǒo kúni̱na kiʼin ña̱ kue̱ʼe̱ yóʼo miína, xíniñúʼu kiʼinna kuenta. Saá íyo miíyó na̱ ndásakáʼnu Ndióxi̱ tiempo vitin, chi káchíñuyó á íyoyó xíʼin na̱ yiví na̱ kǒo kéʼé ña̱ kúni̱ Ndióxi̱. Tá kǒo kíʼinyó kuenta sana nda̱a̱ xa̱a̱yó keʼéyó táʼan ña̱ kéʼé na̱ yiví na̱ kǒo ndásakáʼnu Ndióxi̱.

² Tiempo vitin na̱ yiví kǒo íxato̱ʼóna ña̱ káʼa̱n Ndióxi̱. Nu̱ú ña̱ u̱vi̱ tutu ka̱ʼyí ta̱ apóstol Pablo ku̱a̱ʼa̱n ndaʼa̱ ta̱ Timoteo ni̱ka̱ʼa̱nra nda̱saa koo na̱ yiví na̱ kǒo ndásakáʼnu Ndióxi̱. Ta ku̱a̱ʼáka ña̱ kini keʼéna tá xa̱a̱ ná kuyatin ndiʼi-xa̱ʼa ñuyǐví yóʼo (kaʼvi 2 Timoteo 3:2-5). * Ni va̱ása kútóoyó ña̱ kéʼéna sana loʼo tá loʼo kixaʼáyó  ndakanixi̱níyó, ka̱ʼa̱nyó á nda̱a̱ keʼéyó táki̱ʼva kéʼé na̱ yiví na̱ kǒo ndásakáʼnu Ndióxi̱ (Prov. 13:20). Xa̱ʼa ña̱yóʼo ti̱xin ña̱ kaʼviyó yóʼo sakuaʼayó ndáa ki̱ʼva íyo na̱ yiví na̱ kǒo ndásakáʼnu Ndióxi̱ ta ndáa ki̱ʼva íyo na̱ ndásakáʼnu Ndióxi̱. Ta sakuaʼayó ndáaña kivi chindeé miíyó ña̱ kǒo keʼéyó táki̱ʼva kéʼé na̱ yiví, ni tá chíndeéyóna ña̱ sákuaʼana xa̱ʼa Ndióxi̱.

3. ¿Ndáana kéʼé ña̱ káʼa̱n 2 Timoteo 3:2-5?

³ Ta̱ apóstol Pablo ni̱ka̱ʼa̱nra xa̱ʼa ña̱ tiempo tákuyó vitin ña̱ “koo ku̱a̱ʼá tu̱ndóʼo”. Ni̱ka̱ʼa̱ntura xa̱ʼa inka 19 ña̱ʼa ña̱ kéʼé na̱ yiví na̱ íyo tiempo vitin. Nu̱ú tutu Romanos 1:29-31 va̱xi inka ña̱ kítáʼan xíʼin ña̱ ni̱ka̱ʼa̱n ta̱ Pablo, soo nu̱ú ña̱ tutu ña̱ ku̱a̱ʼa̱n ndaʼa̱ ta̱ Timoteo ku̱a̱ʼáka ña̱ va̱xi nu̱ú ña̱yóʼo ta káʼa̱nña xa̱ʼa ña̱ʼa ña̱ kǒo va̱xi nu̱ú inka tutu ña̱ va̱xi nu̱ú Escrituras Griegas Cristianas. Ta̱ Pablo ni̱ka̱ʼa̱nra ña̱ koo na̱ yiví na̱ keʼé ña̱ va̱ása kútóo Ndióxi̱. Soo na̱ ndásakáʼnu Ndióxi̱ va̱ása kéʼéna saá (kaʼvi Malaquías 3:18). *

4. ¿Nda̱saa íyo na̱ yiví na̱ kúta̱a-ini nu̱ú inkana?

⁴ Tá xa̱a̱ ni̱ka̱ʼa̱n ta̱ Pablo xa̱ʼa na̱ yiví na̱ kuʼvi̱-ini kuni mií xíʼin na̱ kuʼvi̱-ini kuni xu̱ʼún, ni̱ka̱ʼa̱nra ña̱ koo na̱ koolando, ta koo na̱ kuta̱a-ini nu̱ú inkana. Na̱ yiví na̱ kéʼé táʼan ña̱yóʼo ni̱nuní kúnina xa̱ʼa ña̱ xínina keʼéna iin ña̱ʼa, xa̱ʼa ña̱ va̱ʼa náʼa̱na, xa̱ʼa ña̱ íyo xu̱ʼúnna á xa̱ʼa ña̱ kúúmiína iin chiñu káʼnu, ta kuni̱na ndiʼi na̱ yiví ná ka̱ʼa̱n va̱ʼa xa̱ʼana á nda̱a̱ ndasakáʼnunana. Iin ta̱ káʼvi va̱ʼa xa̱ʼa ña̱yóʼo ni̱ka̱ʼa̱nra xa̱ʼa na̱ yiví na̱ ni̱nuní kúni, káchira: “Ini níma̱na íyo iin nu̱ú ndásakáʼnu xíʼin miína”. Ña̱yóʼo kúni̱ kachiña ña̱ kútóokana ndasakáʼnu xíʼin miína nu̱úka ña̱ ndasakáʼnuna Ndióxi̱. Na̱ ni̱nu kúni kǒo xíinna kunina inka na̱ yiví na̱ ni̱nu kúni táki̱ʼva íyo miína.

5. ¿Ndáaña ndo̱ʼo sava na̱ xi̱ndasakáʼnu Ndióxi̱ tá xi̱naʼá?

⁵ Jehová kǒo kútóora xínira na̱ yiví na̱ ni̱nu kúni. Ña̱ Biblia káʼa̱nna ña̱ kǒo kútóo Ndióxi̱ xínira “na̱ kúta̱aka-ini” (Prov. 6:16, 17). Tá ni̱nuní kúniyó nu̱ú inkana va̱ása kivi kuyatinyó nu̱ú Ndióxi̱ (Sal. 10:4). Chi táʼan ña̱ kéʼé ta̱ Ndi̱va̱ʼa kúú ña̱yóʼo (1 Tim. 3:6). Soo sava na̱ ndásakáʼnu Ndióxi̱ loʼo tá loʼo kíxaʼána ni̱nuka kúnina nu̱ú inkana. Saá ke̱ʼé ta̱ Uzías. Iin rey na̱ ñuu Judá ni̱xi̱yora ta ku̱a̱ʼání ku̱i̱ya̱ nda̱kú ni̱xi̱yo inira xíʼin Ndióxi̱, ña̱ Biblia káchiña: “Soo tá nda̱kiʼinkara ku̱a̱ʼá chiñu, ku̱ta̱a-inira ta nda̱a̱ kǒo ní ixato̱ʼókara Jehová ta ni̱ki̱ʼvira ini templo ta ki̱xaʼára chi̱ʼmára nu̱ú ña̱ altar”. Ni̱ya̱ʼa ku̱i̱ya̱ saátu ke̱ʼé ta̱ rey Ezequías soo loʼova tiempo ke̱ʼéraña (2 Crón. 26:16; 32:25, 26).

6. a) ¿Ndáaña xi̱kuumií ta̱ David soo ni saá kǒo níxa̱a̱ra ni̱nu kunira? b) ¿Nda̱chun va̱ʼaní vitá ni̱xi̱yo inira?

⁶ Savana ni̱nu kúnina xa̱ʼa ña̱ va̱ʼa náʼa̱na á xa̱ʼa ña̱ ku̱a̱ʼá na̱ yiví xíni̱na á xa̱ʼa ña̱ xíni̱na keʼéna iin ña̱ʼa á xa̱ʼa ña̱ káʼa̱n va̱ʼa na̱ yiví xa̱ʼana. Ta̱ David xi̱kuumiíra ndiʼi ña̱yóʼo soo vitání ni̱xi̱yo inira. Ná káʼa̱nyó xa̱ʼa iinña, tá xa̱ʼníra ta̱ Goliat, ta̱ rey Saúl ni̱ka̱ʼa̱nra xíʼinra ña̱ ná tindaʼa̱ra xíʼin ñá se̱ʼera. Soo ta̱ David nda̱kuiinra: “¿Ndáa ta̱ kúú yi̱ʼi̱ ta ndáana kúú na̱ veʼi̱ ña̱ va̱ʼa tindaʼíi̱ xíʼin ñá se̱ʼe ta̱ kúú iin rey?” (1 Sam. 18:18). ¿Ndáaña chi̱ndeé táʼan xíʼin ta̱ David ña̱ vitá ni̱xi̱yo inira? Saáchi na̱kunda̱a̱-inira xa̱ʼa ña̱ vitá-ini Jehová chi̱ndeé táʼan xíʼinra ña̱ ke̱ʼéra ndiʼi ña̱ʼa ta saátu ta̱xira ña̱ xi̱kuumiíra sava chiñu (Sal. 113:5-8). Na̱kunda̱a̱-inira Jehová kúú ta̱ ta̱xi ndiʼi ña̱ va̱ʼa ndaʼa̱ra (chitáʼanña xíʼin 1 Corintios 4:7).

7. ¿Ndáaña kivi chindeé táʼan xíʼinyó ña̱ vitá koo iniyó?

 ⁷ Tiempo vitin miíyó na̱ ndásakáʼnu Jehová chíka̱a̱yó ndeé ña̱ vitá koo iniyó nda̱a̱ táki̱ʼva ni̱xi̱yo ta̱ David. Ndákanda̱ní-iniyó chi Jehová vitání-inira ni kúúra rey ña̱ iníísaá ñuyǐví (Sal. 18:35). Chi kándíxaníyó ña̱ káʼa̱n ña̱yóʼo: “Kuʼvi̱-inindó kuni táʼanndó, va̱ʼa koo inindó xíʼin inkana, vitá koo inindó, ta kǒo sa̱a̱ kamandó” (Col. 3:12). Kúnda̱a̱-iniyó xa̱ʼa ña̱yóʼo chi ña̱ kúʼvi̱-iniyó xíniyó na̱ yiví “va̱ása ndúkáʼnuña, kǒo kúta̱a iniña” (1 Cor. 13:4). Ná ndakaʼányó xa̱ʼa ta̱ íyo ñá síʼí ña̱ kiviva xa̱a̱ra sakuaʼara xa̱ʼa Ndióxi̱ xa̱ʼa ña̱ to̱ʼó iniñá xíʼinra, tasaá keʼé na̱ yiví, kutóona sakuaʼana xa̱ʼa Ndióxi̱ ña̱ xítona vitá íyo iniyó (1 Ped. 3:1).

8. a) ¿Nda̱chun kǒo kándíxa na̱ yiví ña̱ káʼa̱n yivána? b) ¿Ndáaña káʼa̱n Biblia xíʼin na̱ va̱lí?

⁸ Ta̱ Pablo ni̱ka̱ʼa̱nra nda̱saa koo na̱ yiví na̱ kutaku ña̱ tiempo nu̱ú ndíʼi. Ni̱ka̱ʼa̱nra ña̱ koo na̱ kǒo kandíxa ña̱ ka̱ʼa̱n yivána. Tiempo vitin nu̱ú libro, película xíʼin ña̱ yáʼa nu̱ú televisión nina ña̱yóʼo káʼa̱nna xa̱ʼa ta su̱ví ña̱ kini kúúña nu̱ú miína. Soo mií ña̱ ndixa tá kǒo kándíxayó ña̱ káʼa̱n yiváyó íyoka ku̱a̱chi ti̱xin veʼeyó ta kǒo kivi inkáchi kutáʼanyó. Xa̱a̱ tá ya̱chi̱ví kúnda̱a̱-iniyó xa̱ʼa ña̱yóʼo. Ña̱ chí ñuu Grecia, tá iin ta̱a xi̱kanira yivára va̱ása níxikuchíñuka keʼéra ni iin ña̱ʼa ti̱xin ñuura. Ña̱ ley romana xi̱ka̱ʼa̱nña ña̱ kanina yivána táki̱ʼva íyo ña̱ xáʼnína iin na̱ yiví saá íyoña. Ña̱ Escrituras Hebreas xíʼin ña̱ Escrituras Griegas Cristianas káʼa̱nña xíʼin na̱ va̱lí ña̱ ná ixato̱ʼóna yivána (Éx. 20:12; Efes. 6:1-3).

9. ¿Ndáaña kivi chindeé táʼan xíʼin na̱ va̱lí ña̱ kandíxana ndiʼi ña̱ káʼa̱n yivána?

⁹ ¿Ndáaña kivi keʼé na̱ va̱lí ña̱ kǒo keʼéna táʼan ña̱ kéʼé na̱ yiví na̱ kǒo ndásakáʼnu Ndióxi̱? Ña̱ ndakanixi̱nína xa̱ʼa ña̱ kéʼé na̱ yivána xa̱ʼana. Ta saátu tá kúnda̱a̱-inina ña̱ saá kúni̱ Ndióxi̱ keʼéyó, va̱ʼaka kandíxana ña̱ káʼa̱n na̱ yivána ta taxina tixaʼvi ndaʼa̱na. Ta iin na̱ va̱lí káʼa̱n ña̱ va̱ʼa xa̱ʼa na̱ yivána chindeé táʼanna xíʼin inka na̱ va̱lí ña̱ ixato̱ʼókana na̱ yivána. Soo tá va̱ása kúʼvi̱-inina xínina se̱ʼena ixayo̱ʼvi̱kaña xíʼin na̱ va̱lí se̱ʼena ña̱ kandíxana ña̱ káʼa̱nna. Soo tá kíʼin na̱ va̱lí kuenta ña̱ kúʼvi̱-ini na̱ yivána xíniñaʼána kǒo ixayo̱ʼvi̱ña xíʼinna ña̱ kandíxana ña̱ káʼa̱nna. Iin ta̱ loʼo ta̱ naní Austin káchira: “Sava xi̱kuni̱i̱ keʼíi̱ ña̱ va̱ása va̱ʼa, soo na̱ yivái̱ xi̱chindeé táʼanna xíʼi̱n ña̱ va̱ʼa kunda̱a̱-inii̱ nda̱chun kúú ña̱ kǒo kúni̱na keʼíi̱ iin ña̱ʼa, ta saátu va̱ʼaní xi̱ka̱ʼa̱nna xíʼi̱n. Ndiʼi ña̱yóʼo chíndeéña yi̱ʼi̱ ña̱ va̱ʼa kandíxai̱ ndiʼi ña̱ káʼa̱nna. Ta xi̱kiʼi̱n kuenta ña̱ xi̱ndiʼi̱ní-inina xa̱ʼíi̱ ta xa̱ʼa ña̱yóʼo xi̱kusi̱íní-inii̱ ña̱ keʼíi̱ ndiʼi ña̱ káʼa̱nna”.

10, 11. a) ¿Ndáaña kéʼé na̱ yiví na̱ kǒo kúʼvi̱-ini xínitáʼan? b) ¿Á kúʼvi̱-ini na̱ ndásakáʼnu Ndióxi̱ xínina inka na̱ yiví?

¹⁰ Ta̱ Pablo ni̱ka̱ʼa̱nra ndáaña keʼé na̱ yiví na̱ kǒo kúʼvi̱-ini xíni inkana. Tá xa̱a̱ ni̱ka̱ʼa̱nra ña̱ “koo na̱ kǒo kandíxa ña̱ ka̱ʼa̱n yivána”, ni̱ka̱ʼa̱nra ña̱ koo na̱ kǒo kuumií ña̱ to̱ʼó, chi saá kéʼé na̱ yiví kǒo táxina tixaʼvi xa̱ʼa ña̱ kéʼé inkana xa̱ʼana. Ku̱a̱ʼání na̱ yiví va̱ása nda̱kú koo ini ta saátu kǒo kandíxa táʼanna, ña̱yóʼo kúni̱ kachiña ña̱ kútóonína kanitáʼanna xíʼin inkana. Ta saátu koo na̱ ka̱ʼa̱n ndi̱va̱ʼa ta koo na̱ sandáʼvi táʼan, na̱ yiví na̱ íyo tiempo vitin káʼa̱nna tu̱ʼun kini xíʼin táʼanna ta nda̱a̱ xíʼin Ndióxi̱ káʼa̱nna tu̱ʼun kini. Ta saátu koo na̱ chika̱a̱ ku̱a̱chi táʼan saáchi káʼa̱nna ña̱ vatá xa̱ʼa inka na̱ yiví. *

¹¹ Na̱ yiví kǒo kúʼvi̱-inina xínitáʼanna, soo miíyó na̱ ndásakáʼnu Jehová kúʼvi̱va-iniyó xíniyó na̱ yiví. Ta̱ Jesús ni̱ka̱ʼa̱nra xa̱ʼa u̱vi̱ ley  ña̱ ndáyáʼviní, ña̱ nu̱ú xíniñúʼu kuʼvi̱-iniyó kuniyó Ndióxi̱, ta ña̱ u̱vi̱ xíniñúʼu kuʼvi̱-iniyó kuniyó na̱ yiví (Mat. 22:38, 39). Saátu ni̱ka̱ʼa̱nra xa̱ʼa na̱ ndixa ndásakáʼnu Ndióxi̱ ta kunda̱a̱-ini na̱ yiví xa̱ʼana, xa̱ʼa ña̱ kúʼvi̱ní-inina xínitáʼanna (kaʼvi Juan 13:34, 35). * Ta nda̱a̱ kúʼvi̱-inina xínina na̱ sáa̱-ini xíniñaʼá (Mat. 5:43, 44).

12. ¿Ndáaña ke̱ʼé ta Jesús ña̱ ni̱na̱ʼa̱ra ña̱ kúʼvi̱ní-inira xínira miíyó?

¹² Ta̱ Jesús va̱ʼaní ni̱na̱ʼa̱ra ña̱ kúʼvi̱-inira xínira na̱ yiví. Ñuu tá ñuu ni̱xi̱kara na̱túʼunra xa̱ʼa Reino Ndióxi̱ xíʼin na̱ yiví. Sa̱ndáʼara na̱ yiví, na̱ kǒo kivi kaka, na̱ kúúmií lepra, na̱ kǒo kívi kuniso̱ʼo, ta nda̱a̱ sandátakura na̱ ni̱xi̱ʼi̱ (Luc. 7:22). Ta nda̱a̱ ni̱xi̱ʼi̱ra xa̱ʼa ndiʼi na̱ yiví ni sáa̱-inina xíninara. Saá ni̱na̱ʼa̱ra ña̱ kúʼvi̱ní-ini Jehová xínira miíyó. Vitin na̱ testigo Jehová kéʼéna táki̱ʼva ke̱ʼé ta̱ Jesús, chi kúʼvi̱-inina xínina inka na̱ yiví.

13. ¿Ndáaña kuu tá ná kuʼvi̱-iniyó kuniyó na̱ yiví?

¹³ Xa̱ʼa ña̱ kúʼvi̱-iniyó xíniyó na̱ yiví, kúni̱na sakuaʼana xa̱ʼa Jehová. Ná káʼa̱nyó xa̱ʼa iin ta̱a ta̱ ñuu Tailandia tá ni̱xa̱ʼa̱nra iin asamblea regional ku̱si̱íní-inira tá xi̱nira ña̱ kúʼvi̱ní-ini na̱ yiví xínitáʼanna. Tá ndi̱kóra veʼera ni̱ka̱ʼa̱nra xíʼin na̱ testigo ña̱ ná sanáʼa̱nara xa̱ʼa Ndióxi̱ ki̱ʼva u̱vi̱ ki̱vi̱ ña̱ iin semana. Na̱túʼunra xa̱ʼa Ndióxi̱ xíʼin na̱ veʼera, tá xa̱a̱ ni̱ya̱ʼa i̱ñu̱ yo̱o̱ ni̱ya̱ʼara ka̱ʼvira tu̱ʼun Ndióxi̱ ini veʼe nu̱ú ndákutáʼanyó. Tá kúni̱yó kunda̱a̱-iniyó á ndixa kúʼvi̱-iniyó xínitáʼanyó kivi nda̱ka̱tu̱ʼun xíʼin miíyó ña̱yóʼo: “¿Á chíndeé táʼi̱n xíʼin na̱ veʼi̱, xíʼin na̱ congregación, ta kítai̱ nátúʼi̱n xa̱ʼa Ndióxi̱? ¿Á nda̱a̱ táki̱ʼva xíto Jehová na̱ yiví saá xítoi̱na?”.

14, 15. a) ¿Nda̱chun káʼa̱nyó ña̱ kéʼé sava na̱ yiví táki̱ʼva kéʼé kití? b) ¿Ndáaña kǒo kéʼéka sava na̱ yiví ta vitin kúúna na̱ yiví va̱ʼa?

¹⁴ Ña̱ tiempo nu̱ú ndíʼi íyoka ña̱ kini kéʼé na̱ yiví, xa̱ʼa ña̱yóʼo kǒo xíniñúʼu kutáʼanyó xíʼinna. Sava na̱ kǒo ndásakáʼnu Ndióxi̱ kúndasína  ña̱ va̱ʼa. Ta “kǒo kútóona ña̱ va̱ʼa”, ta saátu íyo na̱ kǒo tává ki̱ʼva xíʼin mií, na̱ ndi̱va̱ʼa-ini. Xíʼin inka na̱ kǒo ndákiʼin xi̱ní, ña̱ tu̱ʼun griego káʼa̱nña ña̱ kúni̱ kachiña kéʼéna táki̱ʼva ña̱ ndákanixi̱nína ta kǒo xa̱ʼa inka na̱ yiví nu̱úna.

¹⁵ Vitin xínu iin profecía ña̱ káʼa̱n ña̱ ndiʼi na̱ yiví na̱ íyo táki̱ʼva íyo kití nása̱mana ta kǒo kéʼékana ña̱ kini (kaʼvi Isaías 11:6, 7). * Ña̱ profecía yóʼo káʼa̱nña xa̱ʼa tí lobo xíʼin tí ndikaʼa inkáchi kutáʼanrí xíʼin tí ndikachi xíʼin tí si̱ndi̱ki̱. Ta iníísaá nu̱ú ñuʼú kǒoka ku̱a̱chi koo, “ta ndiʼi na̱ yiví kunda̱a̱-inina xa̱ʼa Ndióxi̱” (Is. 11:9). Tí kití va̱ása kívi sákuaʼarí xa̱ʼa Jehová, xíʼin ña̱yóʼo kúnda̱a̱-iniyó xa̱ʼa na̱ yiví káʼa̱nña ña̱ nasamana ndiʼi ña̱ kéʼéna.

16. ¿Nda̱saa chíndeé táʼan ña̱ tu̱ʼun Ndióxi̱ xíʼinyó ña̱ nasamayó ña̱ kéʼéyó?

¹⁶ Ku̱a̱ʼání na̱ yiví ni̱xi̱yona táki̱ʼva íyo tí lobo, soo vitin ni iin na̱ yiví kǒo kánitáʼanna xíʼin. Kivi kaʼviyó xa̱ʼa na̱yóʼo nu̱ú ña̱ sección “La Biblia les cambió la vida”, ña̱ va̱xi nu̱ú jw.org. Na̱ ndásakáʼnu Jehová va̱ása íyona táki̱ʼva íyo na̱ ka̱ʼa̱n ña̱ ndásakáʼnunara, soo su̱ví ña̱ nda̱a̱ kúú ña̱yóʼo. Na̱yóʼo káʼa̱nna ña̱ ndásakáʼnuna Ndióxi̱ soo xíʼin ña̱ kéʼéna náʼa̱na ña̱ kǒo ndásakáʼnunara. Sava na̱ ndásakáʼnu Ndióxi̱ xi̱keʼéna ña̱ kini á ndi̱va̱ʼa ni̱xi̱yo inina soo vitin na̱samana miína ta ki̱xaʼána kéʼéna táki̱ʼva kúni̱ miíra (Efes. 4:23, 24). Tá sákuaʼa na̱ yiví xa̱ʼa Ndióxi̱ kúnda̱a̱-inina ña̱ xíniñúʼu kándíxana ña̱ káʼa̱nra. Ña̱yóʼo chindeé táʼan xíʼinna ña̱ nasamana ña̱ kándíxana, ña̱ ndákanixi̱nína xíʼin ña̱ kéʼéna. Yo̱ʼvi̱va íxaaña xíʼinna ña̱ kéʼéna ña̱yóʼo soo Ndióxi̱ táxira ña̱ espíritu santo ndaʼa̱ na̱ kúni̱ keʼé ña̱ kúni̱ miíra xíʼin ndiʼi níma̱na.

17. ¿Ndáaña chindeé táʼan xíʼinyó ña̱ kǒo keʼéyó táki̱ʼva kéʼé na̱ yiví?

¹⁷ Vitin va̱ʼaníka kúnda̱a̱-iniyó ndáana kúú na̱ ndásakáʼnu Ndióxi̱ ta ndáana kúú na̱ kǒo ndásakáʼnu-ñaʼá. Miíyó na̱ ndásakáʼnu Ndióxi̱ xíniñúʼu kiʼinyó kuenta chi sana xa̱a̱yó keʼéyó táki̱ʼva kéʼé na̱ yiví na̱ kǒo ndásakáʼnu-ñaʼá. Chi miíyó kúni̱yó kuniso̱ʼoyó ña̱ káʼa̱n Jehová ta̱ kǒo kúni̱yó keʼéyó táʼan ña̱ kéʼé na̱ káʼa̱n 2 Timoteo 3:2-5 xa̱ʼa. Kǒo kívi sandákooyó ña̱ ka̱ʼa̱nyó xíʼin ndiʼi na̱ yiví, sana káchíñuyó xíʼinna á inkáchi escuela xáʼa̱nyó xíʼinna á inkáchi nu̱ú íyoyó xíʼinna. Va̱ása xíniñúʼu ndakanixi̱níyó táki̱ʼva ndákanixi̱ní na̱yóʼo, ni kǒo keʼéyó ña̱ kéʼéna. ¿Ndáaña chindeé táʼan xíʼinyó? Xíniñúʼu chika̱a̱yó ndeé ña̱ kooyó migo Ndióxi̱, kaʼviyó tu̱ʼunra ta vií ndaka̱xinyó na̱ koo migoyó.

18. ¿Nda̱saa kivi chindeé táʼan ña̱ kéʼéyó xíʼin ña̱ káʼa̱nyó xíʼin inka na̱ yiví ña̱ sakuaʼana xa̱ʼa Ndióxi̱?

¹⁸ Saátu xíniñúʼu chika̱a̱yó ndée ña̱ chindeé táʼanyó xíʼin na̱ yiví ña̱ sakuaʼana xa̱ʼa Ndióxi̱. Ná chika̱a̱yó ndée ña̱ natúʼunyó xa̱ʼa Ndióxi̱ ta ná ka̱ʼa̱nyó xíʼinra ña̱ chindeéra miíyó ña̱ ka̱ʼa̱nyó nina tu̱ʼun va̱ʼa. Ná ka̱ʼa̱nyó xíʼin na̱ yiví ña̱ kúúyó testigo Jehová. Ta xíʼin ña̱ va̱ʼa kéʼéyó nda̱a̱ xa̱a̱na ndasakáʼnuna Ndióxi̱. Xa̱a̱ sa̱kuaʼayó “ña̱ sandákooyó keʼéyó ña̱ kini xíʼin ña̱ kúni̱yó keʼéyó ña̱ íyo ñuyǐví yóʼo, sa̱náʼa̱tura miíyó ña̱ vií ndakanixi̱níyó xa̱ʼa ña̱ keʼéyó” (Tito 2:11-14). Tá ná keʼéyó táʼan ña̱ kéʼé Jehová ta kándíxayó ña̱ káʼa̱nra, na̱ yiví kunina ña̱ kéʼéyó ta ka̱ʼa̱nna: “Kúni̱ndi̱ ku̱ʼu̱nndi̱ xíʼinndó chi xi̱niso̱ʼondi̱ ña̱ íyo Ndióxi̱ xíʼinndó” (Zac. 8:23).