1, 2. a) ¿Ndáaña xíni Jehová tá ku̱a̱ʼá na̱ yiví xáʼa̱n ña̱ conmemoración? (Koto na̱ʼná ña̱ va̱xi chí nu̱ú kíxáʼaña). b) ¿Ndáaña sakuaʼayó nu̱ú artículo yóʼo?

¿NDÁAÑA xíni Jehová tá ku̱a̱ʼá na̱ yiví ndátaka ña̱ conmemoración? Su̱ví kuití xínira nda̱saa kúú na̱ yiví na̱ xáʼa̱n kán; chi xítora nda̱saa íyo iin iin na̱ xáʼa̱n. Xítora ndiʼi na̱ xáʼa̱n ku̱i̱ya̱ tá ku̱i̱ya̱. Sana savana xáʼa̱nna ni íyo tu̱ndóʼo nu̱úna. Inkana va̱ása xáʼa̱nna semana tá semana reunión ña̱ congregación, soo ndákanixi̱nína ña̱ xíniñúʼu ku̱ʼu̱nna ña̱ conmemoración. Saátu xíto Jehová na̱ xáʼa̱n ña̱ yichi̱ nu̱ú, chi sana kúni̱na kunda̱a̱-inina xa̱ʼa̱ ña̱ kéʼéyó.

² Kúsi̱íva-ini Jehová ña̱ xítora ku̱a̱ʼá na̱ yiví xáʼa̱n conmemoración (Luc. 22:19). Soo ña̱ kútóokara kúú ña̱ kúnda̱a̱-inira nda̱chun xáʼa̱nna. Nu̱ú artículo yóʼo sakuaʼayó xa̱ʼa̱ iin ña̱ʼa ña̱ ndáyáʼviní: ¿Nda̱chun su̱ví kuití ña̱ conmemoración xáʼa̱nyó chi saátu xáʼa̱nyó ndiʼi reunión ña̱ táxi Jehová ndaʼa̱yó? Ná kotoyó ndáaña chindeétáʼan xíʼinyó ña̱ va̱ʼa ku̱ʼu̱nyó ndiʼi reunión.

3, 4. a) ¿Nda̱chun kúú ña̱ xáʼa̱nyó reunión? b) ¿Ndáaña náʼa̱yó tá xáʼa̱nyó reunión? c) Nda̱a̱ táki̱ʼva káchi 1 Corintios 11:23-26, ¿nda̱chun va̱ása xíniñúʼu sandákooyó ña̱ ku̱ʼu̱nyó conmemoración?

³ Xáʼa̱nyó reunión chi saá ndásakáʼnuyó Ndióxi̱. Ta saátu xáʼa̱nyó chi kán kúú nu̱ú sánáʼa̱ Jehová miíyó. Na̱ yiví na̱ ni̱nuní kúni va̱ása kándíxana ña̱ sanáʼa̱ inkanana (3 Juan 9). Soo miíyó kúni̱yó ña̱ ná sanáʼa̱ Jehová xíʼin na̱ ñuura miíyó (Is. 30:20; Juan 6:45).

⁴ Ki̱vi̱ xáʼa̱nyó reunión, náʼa̱yó ña̱ kúúyó na̱ vitá-ini  ta kúni̱yó ña̱ ná sanáʼa̱ Ndióxi̱ miíyó. Xáʼa̱nyó conmemoración ña̱ ndakaʼányó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó, ta su̱ví xíʼin ña̱ ndúxa kéʼéyó ña̱yóʼo, chi kúúyó na̱ vitá-ini ta ndíku̱nyó yichi̱ ña̱ sa̱ndákoo ta̱ Jesús tá ni̱ka̱ʼa̱nra: “Keʼékandó ña̱yóʼo ta ndakaʼánndó xa̱ʼíi̱” (kaʼvi 1 Corintios 11:23-26). * Ña̱ reunión yóʼo ndásandakúníña-iniyó ta saátu sándákaʼánña miíyó ña̱ kúʼvi̱ní-ini Jehová xínira miíyó. Ta̱kán xíni̱ra ña̱ su̱ví iin yichi̱ nu̱ú ku̱i̱ya̱ xíniñúʼu ndasandakúra-iniyó. Xa̱ʼa̱ ña̱yóʼo táxira ña̱ íyo reunión ndiʼi semana ña̱ va̱ʼa sakuaʼakayó, ta káʼa̱nra xíʼinyó ña̱ ná ku̱ʼu̱nyó. Ña̱ vitá iniyó chindeétáʼanña xíʼinyó ña̱ kuniso̱ʼoyóra, tasaá taváyó ku̱a̱ʼá tiempo ña̱ kaʼvi kúeeyó ña̱ va̱ʼa ku̱ʼu̱nyó reunión.

5. ¿Nda̱chun va̱ʼa xáʼa̱n na̱ yiví na̱ vitá-ini reunión xíʼin conmemoración?

⁵ Ndiʼi ku̱i̱ya̱, ku̱a̱ʼání na̱ yiví na̱ vitá-ini xíniso̱ʼona xa̱ʼa̱ Jehová ta kíxáʼana sákuaʼana xa̱ʼa̱ra (Is. 50:4). Savana siʼna xáʼa̱nna conmemoración, saá kíxáʼana xáʼa̱nna ndiʼi reunión (Zac. 8:20-23). Tá kúu miíyó xíʼin na̱ sa̱kán kíxáʼa xáʼa̱n reunión kúsi̱íní-iniyó ndákiʼinyó consejo ña̱ táxi Ndióxi̱, chi ta̱yóʼo kúú ta̱ chíndeétáʼan xíʼinyó ta saátu sáka̱kura miíyó (Sal. 40:17). Xa̱ʼa̱ ña̱yóʼo kǒo inka ña̱ ndáyáʼvika nu̱úyó nu̱úka ña̱ ku̱ʼu̱nyó reunión, ña̱ va̱ʼa sanáʼa̱ Jehová xíʼin se̱ʼera ta̱ Jesús miíyó, ta̱ kúʼvi̱ní-inira xínira (Mat. 17:5; 18:20; 28:20).

6. ¿Nda̱saa chi̱ndeétáʼan ña̱ vitá-ini xíʼin iin ta̱ ta̱a ña̱ ni̱xa̱ʼa̱nra conmemoración?

⁶ Ku̱i̱ya̱ tá ku̱i̱ya̱, chíka̱a̱yó ndee̱ ña̱ va̱ʼa kanayó na̱ yiví ña̱ ku̱ʼu̱nna conmemoración ña̱ ndakaʼánna xa̱ʼa̱ ña̱ ni̱xi̱ʼi̱ ta̱ Jesús. Ku̱a̱ʼání na̱ yiví na̱ vitá-ini ndákiʼinna ña̱ va̱ʼa xa̱ʼa̱ ña̱ kéʼéna ña̱yóʼo. Ná kotoyó iin ejemplo. Xa̱a̱ íyo ku̱a̱ʼání ku̱i̱ya̱ ku̱u ña̱yóʼo, iin ta̱ hermano ta̱xira iin invitación ndaʼa̱ iin ta̱ ta̱a, soo ta̱yóʼo ni̱ka̱ʼa̱nra ña̱ va̱ása kivi ku̱ʼu̱nra. Tá ñuú ña̱ koo conmemoración nda̱kanda̱-ini ta̱ hermano yóʼo tá xi̱nira ña̱ ki̱xa̱a̱ ta̱ ta̱a yóʼo. Saátu ta̱ ta̱a yóʼo nda̱kanda̱-inira xa̱ʼa̱ ña̱ va̱ʼaní nda̱kiʼinnara, ta ki̱xáʼara xáʼa̱nra ndiʼi reunión. Ti̱xin ña̱ iin ku̱i̱ya̱ u̱ni̱ reunión kuití kúú ña̱ va̱ása níxa̱ʼa̱nra. ¿Ndáaña chi̱ndeétáʼan xíʼinra ña̱ va̱ʼa na̱samara ña̱ ndákanixi̱níra? Ta̱ hermano ta̱ ta̱xi invitación ndaʼa̱ra, tá ni̱ya̱ʼa loʼo tiempo, ka̱chira: “Iin ta̱ vitání-ini kúúra”. Kúnda̱a̱-iniyó ña̱ mií Jehová kúú ta̱ ka̱nañaʼá ña̱ va̱ʼa ndasakáʼnurara. Tiempo vitin testigo Jehová kúúra (2 Sam. 22:28; Juan 6:44).

7. ¿Nda̱saa chíndeétáʼan ña̱ sákuaʼayó reunión xíʼin ña̱ káʼviyó Biblia ña̱ vitá koo iniyó?

⁷ Ña̱ sákuaʼayó ti̱xin reunión xíʼin ña̱ káʼviyó nu̱ú Biblia chíndeétáʼanña xíʼinyó ña̱ vitá koo iniyó. Tá kúma̱níka koo conmemoración, ti̱xin reunión káʼa̱nna xa̱ʼa̱ yichi̱ ta̱ Jesús ña̱ vitání ni̱xi̱yo inira ta nda̱a̱ ni̱xi̱ʼi̱ra xa̱ʼa̱yó. Tá xa̱a̱ ku̱nu̱mí koo ña̱ conmemoración, káʼa̱nna xíʼinyó ña̱ ná kaʼviyó ña̱ va̱xi nu̱ú Biblia, ña̱ káʼa̱n xa̱ʼa̱ ña̱ ni̱xi̱ʼi̱ ta̱ Jesús xíʼin xa̱ʼa̱ ña̱ nda̱takura. Ndiʼi ña̱yóʼo chíndeétáʼanña xíʼinyó ña̱ kundayáʼvika nu̱úyó ndiʼi ña̱ ke̱ʼéra xa̱ʼa̱yó, ta saátu ña̱ vitá koo iniyó ta keʼéyó ña̱ kúni̱ Ndióxi̱, ni tá íxayo̱ʼvi̱ña xíʼinyó (Luc. 22:41, 42).

8. ¿Nda̱saa ni̱na̱ʼa̱ ta̱ Jesús ña̱ ndakúní ni̱xi̱yo inira?

⁸ Ta̱ Jesús ndakúní ni̱xi̱yo inira ta saátu kúni̱ miíyó keʼéyó. Ná ndakanixi̱níyó nda̱saa ni̱na̱ʼa̱raña tá xa̱a̱ ku̱nu̱mí kuvira. Xa̱a̱ xíni̱va ta̱ Jesús ña̱ si̱lóʼo kúma̱ní kixa̱a̱ na̱ sáa̱-ini xíniñaʼá ña̱ kundi̱va̱ʼana xíʼinra ta kaʼnínara (Mat. 20:17-19). Soo ni saá va̱ása níyi̱ʼvíra ña̱ kuvira. Tá ki̱xa̱a̱ ki̱vi̱ ña̱ kundoʼora ña̱yóʼo, ni̱ka̱ʼa̱nra xíʼin na̱ apóstolra na̱ ndóo xíʼinra jardín ña̱ Getsemaní: “Ndakuitandó, ta ná ku̱ʼu̱nyó chi xa̱a̱ va̱xi ta̱ ni̱xi̱kó yi̱ʼi̱” (Mat. 26:36, 46). Tá ni̱xa̱a̱ na̱ yiví ña̱ tiinnara, ta̱yóʼo ku̱yatinra ta ni̱ka̱ʼa̱nra xíʼinna ña̱ miíra kúú ta̱ nándukúna, ta ni̱ka̱ʼa̱ntura xíʼin na̱ soldado ña̱ ná taxina ná ku̱ʼu̱n na̱ apóstolra (Juan 18:3-8). ¿Á ni̱na̱ʼa̱ra ña̱ ndakúní ni̱xi̱yo inira? Tiempo vitin, tá kúu na̱ ku̱ʼu̱n chí ndiví xíʼin na̱ koo nu̱ú ñuʼú yóʼo chíka̱a̱níyó ndee̱ ña̱ ndakú koo iniyó táki̱ʼva ke̱ʼé ta̱ Jesús. ¿Nda̱saa kivi ndakú koo iniyó?

9. a) ¿Nda̱chun kúú ña̱ xíniñúʼu ndakú koo iniyó ña̱ va̱ʼa ku̱ʼu̱nyó ndiʼi reunión? b) ¿Nda̱saa chíndeétáʼan ña̱ kéʼéyó xíʼin na̱ hermano na̱ ñúʼu veʼeka̱a?

⁹ Sana íyo ña̱ íxayo̱ʼvi̱ xíʼinyó ña̱ ku̱ʼu̱nyó ndiʼi reunión. Tá ña̱yóʼo kúú ña̱ ndóʼoyó, xíniñúʼu ndakú koo iniyó. Sava na̱ hermano kúúmiína tu̱ndóʼo xa̱ʼa̱ ña̱ ndée ndoʼona, ña̱ kúsuchí-inina á xa̱ʼa̱ ña̱ ndákava-inina. Inkatuna kúndeéní-inina xa̱ʼa̱ ña̱ kéʼé na̱ veʼena xíʼinna á ña̱ kéʼé na̱ chíñu xíʼinna. Ná ndakanixi̱níyó xa̱ʼa̱ na̱ hermano na̱ ñúʼu veʼeka̱a xa̱ʼa̱ ña̱ kándíxana Ndióxi̱. ¿Á xa̱a̱ ndákanixi̱níyó ña̱ kivi chindeétáʼan ña̱ kéʼéyó xíʼinna? (Heb. 13:3). Tá xíniso̱ʼona ña̱ chíka̱a̱yó ndee̱ ña̱ ndásakáʼnuyó Jehová ni íyo tu̱ndóʼo nu̱úyó chíndeétáʼanníña xíʼinna ña̱ ndakúka koo inina ta kandíxakanara. Ña̱yóʼo kúú ña̱ ndo̱ʼo ta̱ apóstol Pablo. Tá xi̱ndika̱a̱ra veʼeka̱a ña̱ ñuu Roma, xi̱kusi̱íní-inira tá xi̱xiniso̱ʼora ña̱ chíka̱a̱ní na̱ hermano ndee̱ ña̱ ndásakáʼnuna Ndióxi̱ (Filip. 1:3-5, 12-14). Sana tá si̱lóʼo kúma̱ní ña̱ kitara veʼeka̱a ka̱ʼyíra carta ña̱ Hebreos. Nu̱ú ña̱yóʼo ni̱ka̱ʼa̱nra xíʼin na̱ hermano ña̱ va̱ása xíniñúʼu sandákoona ña̱ ku̱ʼu̱nna reunión, ta ka̱chira: “Va̱ása sandákoondó ña̱ kuʼvi̱-inindó kuni táʼanndó” (Heb. 10:24, 25; 13:1).

10, 11. a) ¿Ndáana xíniñúʼu ka̱ʼa̱nyó xíʼin ña̱ ku̱ʼu̱nna conmemoración? b) ¿Nda̱saa chíndeétáʼan Efesios 1:7 xíʼinyó ña̱ keʼéyó ña̱yóʼo?

¹⁰ Saátu náʼa̱yó ña̱ ndakú íyo iniyó tá káʼa̱nyó xíʼin na̱ veʼeyó, na̱ káchíñu xíʼinyó, na̱ káʼvi xíʼinyó á na̱ ndóo yatin xíʼinyó ña̱ ná ku̱ʼu̱nna conmemoración. ¿Nda̱chun kéʼéyó ña̱yóʼo? Saáchi táxiyó tíxa̱ʼvi xa̱ʼa̱ ña̱ ke̱ʼé Jehová xíʼin ta̱ Jesús xa̱ʼa̱yó. Ta saátu kúni̱yó ña̱ ná sakuaʼana ndáaña va̱ʼa ndakiʼinna xa̱ʼa̱ ña̱ va̱ʼaní-ini Jehová, chi ta̱xira se̱ʼera ña̱ ni̱xi̱ʼi̱ra xa̱ʼa̱yó (kaʼvi Efesios 1:7; * Rev. 22:17).

¹¹ Ki̱vi̱ xáʼa̱nyó reunión náʼa̱yó inka ña̱ ndáyáʼviní. Ta mií Jehová xíʼin ta̱ Jesús ku̱a̱ʼání yichi̱ náʼa̱na ña̱yóʼo.

12. a) ¿Nda̱chun kúʼvi̱níka-iniyó xíniyó Jehová xíʼin ta̱ Jesús tá xáʼa̱nyó reunión? b) ¿Nda̱saa kivi kundiku̱nyó yichi̱ ta̱ Jesús, táki̱ʼva káchi 2 Corintios 5:14, 15?

¹² Tá xáʼa̱nyó reunión xáʼnuka ña̱ kúʼvi̱-iniyó xíniyó Jehová xíʼin ta̱ Jesús. Ta, ¿nda̱chun? Saáchi tá xáʼa̱nyó reunión sándakaʼánna miíyó xa̱ʼa̱ ndiʼi ña̱ ke̱ʼéna xa̱ʼa̱yó (Rom. 5:8). Ña̱ conmemoración kúú ña̱ sándakaʼán miíyó ña̱ kúʼvi̱ní-ini Jehová xíʼin ta̱ Jesús xínina miíyó, ta saátu ña̱ kúʼvi̱ní-inina xínina na̱ ta̱ʼán sakuaʼa xa̱ʼa̱na. Miíyó táxiníyó tíxa̱ʼvi ndaʼa̱na, ta xa̱ʼa̱ ña̱yóʼo kúni̱yó kundiku̱nyó yichi̱ ta̱ Jesús xíʼin ndiʼi ña̱ kéʼéyó ndiʼi ki̱vi̱ (kaʼvi 2 Corintios 5:14, 15). * Saátu xíʼin ndiʼi níma̱yó ndásakáʼnuyó Jehová xa̱ʼa̱ ña̱ ta̱xira se̱ʼera ta̱ Jesús ña̱ ni̱xi̱ʼi̱ra xa̱ʼa̱yó. Ta xa̱ʼa̱ ña̱yóʼo ña̱ kivi keʼéyó kúú ña̱ taxiyó comentario ti̱xin reunión xíʼin ndiʼi níma̱yó.

13. Ka̱ʼa̱n nda̱saa kivi na̱ʼa̱yó ña̱ kúʼvi̱ní-iniyó xíniyó Jehová xíʼin se̱ʼera.

¹³ Náʼa̱yó ña̱ kúʼvi̱ní-iniyó xíniyó Jehová xíʼin se̱ʼera tá chíka̱a̱yó ndee̱ ña̱ keʼéyó ña̱ kúni̱na. Ña̱ va̱ʼa ku̱ʼu̱nyó reunión xíniñúʼu keʼéyó ku̱a̱ʼání ña̱ʼa. Tá kúu ku̱a̱ʼá congregación kúúmiína reunión ña̱ xíyo ma̱ʼñú semana tá xa̱a̱ ndíʼi káchíñuyó tá kúnaaníyó. Ta inka reunión xíyoña tá ndíʼi semana, ki̱vi̱ tá ndákiʼinndee̱ na̱ yiví. ¿Á kíʼin Jehová kuenta xa̱ʼa̱ ña̱ xáʼa̱nyó reunión ni na̱ ku̱naa kúúyó? Kíʼinvara kuenta. Soo tá chíka̱a̱yó ndee̱ ña̱ keʼéyó ndiʼi ña̱yóʼo, saá kúsi̱íníka-ini Jehová xíʼin ña̱ kéʼéyó (Mar. 12:41-44).

14. ¿Ndáa yichi̱ ña̱ va̱ʼaní sa̱ndákoo ta̱ Jesús nu̱úyó?

¹⁴ Ta̱ Jesús ta̱xira yichi̱ nu̱úyó xa̱ʼa̱ ndáaña keʼéyó xa̱ʼa̱ inkana tá ndixa kúʼvi̱-iniyó xíniyóna. Soo su̱ví xa̱ʼa̱ ña̱ ni̱xi̱ʼi̱ra xa̱ʼa̱ na̱ xi̱ndiku̱nñaʼá kuití kúúña, chi ndiʼi ki̱vi̱ xi̱ndiʼi-inira xa̱ʼa̱na nu̱úka ña̱ keʼéra ña̱ kúni̱ miíra. Saátu xi̱ndakutaʼanra xíʼinna ni xa̱a̱ ku̱naaníra (Luc. 22:39-46). Ta saátu xi̱chindeétáʼanra xíʼin inkana (Mat. 20:28). Tá ndixa kúʼvi̱-iniyó xíniyó Jehová xíʼin na̱ hermanoyó, ku̱ʼu̱nyó conmemoración xíʼin ndiʼi reunión.

15. ¿Ndáana kúni̱kayó chindeétáʼanyó xíʼin?

 ¹⁵ Ndiʼiyó na̱ ñuu Ndióxi̱ inkáchi ndásakáʼnuyó Jehová, ta kúsi̱íní-iniyó ña̱ xíniñúʼuyó tiempoyó xíʼin ndee̱yó ña̱ va̱ʼa kánayó na̱ yiví ña̱ va̱ʼa ná ndasakáʼnunara. Soo ña̱ kúni̱kayó kúú ña̱ chindeétáʼanyó xíʼin na̱ sándákoo ña̱ ndasakáʼnuna Ndióxi̱ loʼo tiempo (Gál. 6:10). Náʼa̱yó ña̱ kúʼvi̱-iniyó xíniyóna tá káʼa̱nyó xíʼinna ña̱ ná ku̱ʼu̱nna ndiʼi reunión, ta saátu ña̱ ná ku̱ʼu̱nna conmemoración. Táki̱ʼva kéʼé Jehová xíʼin ta̱ Jesús, kúsi̱íní-iniyó ña̱ ndándikó tuku na̱ sa̱ndákoo ña̱ ndásakáʼnuna Ndióxi̱ loʼo tiempo (Mat. 18:14).

16. a) ¿Nda̱saa kivi ndasandeéyó-ini táʼanyó, ta nda̱saa chíndeétáʼan reunión xíʼinyó? b) ¿Nda̱chun kúú ña̱ xíniñúʼu ndakaʼányó ndiʼi ku̱i̱ya̱ xa̱ʼa̱ tu̱ʼun ña̱ ni̱ka̱ʼa̱n ta̱ Jesús nu̱ú Juan 3:16?

¹⁶ Semana ña̱ va̱xi xíniñúʼu ku̱ʼu̱nyó taxiyó invitación ndaʼa̱ ndiʼi na̱ yiví ña̱ va̱ʼa ná ku̱ʼu̱nna conmemoración xíʼinyó ñuú ña̱ ki̱vi̱ viernes 19 tí abril ña̱ ku̱i̱ya̱ 2019 (koto recuadro “ ¿Á kanayó inkaka na̱ yiví?”). Ndiʼi tiempo xíniñúʼu ndasandeéyó-ini táʼanyó tá ku̱a̱ʼa̱nyó reunión, chi xa̱a̱ ku̱yatinní ndiʼi-xa̱ʼa̱ ñuyǐví yóʼo. Xa̱ʼa̱ ña̱yóʼo xíniñúʼu ku̱ʼu̱nyó ndiʼi reunión ta ña̱yóʼo chindeétáʼan xíʼinyó ña̱ va̱ʼa na̱ʼa̱yó ña̱ vitá íyo iniyó, ña̱ ndakú íyo iniyó ta saátu ña̱ kúʼvi̱-iniyó xíni táʼanyó (1 Tes. 5:8-11). Ná na̱ʼa̱yó nu̱ú Jehová ña̱ táxiyó tíxa̱ʼvi ndaʼa̱ra xa̱ʼa̱ ña̱ kúʼvi̱-ini miíra xíʼin se̱ʼera xínina miíyó (kaʼvi Juan 3:16). *