1. ¿Ndáaña xi̱ndoʼo ta̱ David xa̱ʼa̱ Jehová, ta ndáaña ke̱ʼéra xa̱ʼa̱ ña̱yóʼo?

TA̱ REY David ni̱ka̱ʼa̱nra: “Jehová, ta̱ káʼnu kúúra ta xíniñúʼu ndasakáʼnuyóra” (Sal. 145:3). Ta̱kán xi̱kuʼvi̱-inira xi̱xinira Jehová ta xa̱ʼa̱ ña̱yóʼo nda̱sakáʼnurara “ti̱xin congregación” (Sal. 22:22; 40:5). Saátu miíyó kúʼvi̱-iniyó xíniyó Jehová ta inkáchi ndákanixi̱níyó xíʼin ña̱ ni̱ka̱ʼa̱n ta̱ David: “Ná ndukáʼnún, Jehová Ndióxi̱ na̱ ñuu Israel, yivándi̱ ta̱ íyo ndiʼi tiempo” (1 Crón. 29: 10-13).

2. a) ¿Ndáaña kivi keʼéyó ña̱ va̱ʼa ndasakáʼnuyó Jehová? b) ¿Nda̱chun va̱ása táxi sava na̱ hermano comentario, ta ndáaña ka̱ʼa̱nyó xa̱ʼa̱?

² Iin ña̱ kivi keʼéyó ña̱ va̱ʼa ndasakáʼnuyó Jehová kúú ña̱ taxiyó comentario ti̱xin reunión. Soo íxayo̱ʼvi̱vaña xíʼin sava na̱ hermano. Kúni̱na keʼénaña soo yíʼvina. ¿Ndáaña kivi keʼéna ña̱ va̱ása yi̱ʼvína? ¿Ndáaña kivi chindeétáʼan xíʼinyó ña̱ va̱ʼa taxiyó comentario ña̱ kivi chindeétáʼan xíʼin inkana? Siʼna ná ka̱ʼa̱nyó xa̱ʼa̱ ku̱mí ña̱ʼa, xa̱ʼa̱ ña̱ ndáyáʼviní taxiyó comentario ti̱xin reunión.

3-5. a) Nda̱a̱ táki̱ʼva káchi Hebreos 13:15, ¿nda̱chun táxiyó comentario ti̱xin reunión? b) ¿Nda̱chun va̱ʼa xíni̱yó ña̱ va̱ása ndúku Jehová nu̱úyó ña̱ inkáchi koo comentario ña̱ taxi ndiʼiyó?

³ Jehová kúú ta̱ táxi iin ña̱ ndáyáʼviní ndaʼa̱yó, ña̱ va̱ʼa ndasakáʼnuyóra (Sal. 119:108). Xíʼin comentario ña̱ táxiyó ti̱xin reunión ndásakáʼnuyó Jehová, ta va̱ása kívi keʼé inkana ña̱yóʼo xa̱ʼa̱yó (kaʼvi Hebreos 13:15). * ¿Á kúni̱  Jehová ña̱ inkáchi xíniñúʼu taxi ndiʼiyó comentario? Va̱ása kúni̱ra ña̱yóʼo.

⁴ Xíni̱va Jehová ña̱ su̱ví inkáchi íyo ndiʼiyó ta xa̱ʼa̱ ña̱yóʼo ndáyáʼviní ña̱ kéʼéyó nu̱úra. Ná ndakanixi̱níyó xa̱ʼa̱ sacrificio ña̱ xi̱taxi na̱ israelita. Na̱ xi̱kuumií xu̱ʼún xi̱taxina iin ti̱xúʼu. Na̱ ndáʼvi xi̱taxina u̱vi̱ saa válí. Soo tá iinna kǒo xu̱ʼúnna ña̱ kiʼinna saa válí taxina ndaʼa̱ Jehová, kivi taxina loʼo ña̱ harina (Lev. 5:7, 11). Ni va̱ása yaʼvi ña̱ harina yóʼo soo xi̱ndayáʼvivaña nu̱ú Jehová tá xi̱taxinaña ndaʼa̱ra, soo xi̱niñúʼu kooña mií ña̱ harina ña̱ va̱ʼaní.

⁵ Saátu ndákanixi̱ní Ndióxi̱ tiempo vitin, tá táxiyó comentario, kúnda̱a̱-inira ña̱ va̱ása kivi ka̱ʼa̱nyó nda̱a̱ táki̱ʼva xi̱keʼé ta̱ Apolos á ta̱ apóstol Pablo chi na̱kán va̱ʼaní xi̱ka̱ʼa̱nna (Hech. 18:24; 26:28). Ña̱ kúni̱ra kúú ña̱ ná chika̱a̱yó ndee̱ ña̱ ndasakáʼnuyóra. Ná ndakaʼányó chi tá ta̱xi ñá naná ñá kǒo yií u̱vi̱ xu̱ʼún válí, ku̱si̱íníva-ini Jehová xíʼinña chi ta̱xiñá ndiʼi ña̱ xi̱kuumiíñá ndaʼa̱ra (Luc. 21:1-4).

6. a) Nda̱a̱ táki̱ʼva káchi Hebreos 10:24, 25, ¿nda̱saa ndóʼoyó xíʼin comentario ña̱ xíniso̱ʼoyó ti̱xin reunión? b) ¿Nda̱saa kivi na̱ʼún ña̱ ndáyáʼvi comentario ña̱ táxi inkana?

⁶ Tá táxiyó comentario táxiyó ndee̱ ndaʼa̱ táʼanyó (kaʼvi Hebreos 10:24, 25). * Ndiʼiyó kútóoyó kuniso̱ʼoyó comentario ña̱ táxi inkana ti̱xin reunión. Kúsi̱í-iniyó tá xíniso̱ʼoyó comentario ña̱ táxi na̱ va̱lí. Kúsi̱íní-iniyó tá xíniso̱ʼoyó ña̱ táxi inkana iin comentario xa̱ʼa̱ iin ña̱ xa̱á ña̱ sa̱kuaʼana xa̱ʼa̱ Ndióxi̱. Saátu ndáyáʼviní nu̱úyó tá táxi iin na̱ kúkaʼanní nu̱ú iin comentario á iin na̱ sa̱kán ki̱xáʼa sákuaʼa tu̱ʼun ña̱ káʼa̱nyó (1 Tes. 2:2). ¿Nda̱saa kivi na̱ʼa̱yó ña̱ ndáyáʼviní comentario ña̱ táxi inkana nu̱úyó? Iin ña̱ kivi keʼéyó kúú ña̱ taxiyó tíxa̱ʼvi ndaʼa̱na tá ndíʼi reunión, ta saátu ka̱ʼa̱nyó xíʼinna ña̱ chi̱ndeétáʼanní comentariona xíʼinyó. Inka ña̱ kivi keʼéyó kúú ña̱ taxitu miíyó comentario. Saá su̱ví kuití miíyó ndakiʼin ndee̱ chi taxituyó ndee̱ ndaʼa̱ inkana (Rom. 1:11, 12).

7. ¿Ndáaña va̱ʼa ndákiʼinyó tá táxiyó comentario?

⁷ Ña̱ va̱ʼa miíyó kúú ña̱ táxiyó comentario (Is. 48:17). ¿Nda̱saa chíndeétáʼanña xíʼinyó? Ña̱ nu̱ú, tá kúni̱yó taxiyó  comentario, va̱ʼaníka kaʼviyó ña̱ xíniñúʼuyó ti̱xin reunión, ta va̱ʼaníka kunda̱a̱-iniyó xíʼin tu̱ʼun Ndióxi̱ tasaá xa̱a̱yó keʼéyó ña̱ va̱ʼa. Ña̱ u̱vi̱, va̱ʼaníka kusi̱í-iniyó ti̱xin reunión chi kunda̱a̱-iniyó xíʼinña. Ta ña̱ u̱ni̱, xa̱ʼa̱ ña̱ íxayo̱ʼvi̱ loʼoña xíʼinyó ña̱ taxiyó comentario, tá ná taxiyóña va̱ása nandósóyó xa̱ʼa̱ ña̱ sa̱kuaʼayó.

8, 9. a) Nda̱a̱ táki̱ʼva káchi Malaquías 3:16, ¿nda̱saa kúni Jehová tá chíka̱a̱yó ndee̱ ña̱ táxiyó comentario ti̱xin reunión? b) ¿Nda̱saa ndóʼo inkana tá kúni̱na taxina comentario?

⁸ Kúsi̱íní-ini Jehová ña̱ táxiyó comentario xa̱ʼa̱ ña̱ kándíxayó. Ná kandíxaníyó ña̱ xíniso̱ʼova Jehová comentario ña̱ táxiyó, ta saátu ña̱ ndáyáʼviní ña̱yóʼo nu̱úra (kaʼvi Malaquías 3:16). * Náʼa̱ra ña̱ ndáyáʼvi ña̱ kéʼéyó nu̱úra chi táxira ku̱a̱ʼání ña̱ va̱ʼa ndaʼa̱yó (Mal. 3:10).

⁹ Íyo ku̱a̱ʼá xa̱ʼa̱ ña̱ kivi taxiyó comentario ti̱xin reunión. Soo sana íxayo̱ʼvi̱kaña nu̱ú inkana ña̱ taxina comentario. Tá saá ndóʼún va̱ása ndakava-iniún. Ná kotoyó ña̱ káʼa̱n Biblia xa̱ʼa̱ ña̱yóʼo, xa̱ʼa̱ na̱ nda̱sakáʼnu Ndióxi̱ tiempo xi̱naʼá, ta saátu sakuaʼayó xa̱ʼa̱ ña̱ kivi chindeétáʼan xíʼinyó ña̱ taxikayó comentario ti̱xin reunión.

10. a) ¿Ndáaña ndóʼo savayó? b) ¿Nda̱chun va̱ʼava tá yíʼviyó taxiyó comentario ti̱xin reunión?

¹⁰ ¿Á yíʼviní-iniún tá ndákanixi̱níún ña̱ ndaniʼún ndaʼún ta taxiún iin comentario? Tá saá ndóʼún, su̱ví iinlá kuití yóʼó ndóʼo saá. Ndiʼivayó yíʼvi tá táxiyó iin comentario ti̱xin reunión. Soo tá va̱ása táxi ña̱yóʼo ña̱ taxiún comentario xíniñúʼu kunda̱a̱-iniún nda̱chun ndóʼún saá. ¿Á xa̱ʼa̱ ña̱ yíviʼún nandósóʼún xa̱ʼa̱ ña̱ ka̱ʼún kúúña, á ña̱ yíʼviún va̱ása va̱ʼa ka̱ʼún? ¿Á ndákanixi̱níún ña̱ va̱ʼaníka táxi inkana comentario nu̱ún? Va̱ʼava tá ndákanixi̱níún xa̱ʼa̱ ña̱yóʼo, chi náʼa̱ña ña̱ vitá íyo iniún ta ndákanixi̱níún  ña̱ ndáyáʼvika inkana nu̱ún. Kúsi̱íníva-ini Jehová xíʼin na̱ vitá íyo ini (Sal. 138:6; Filip. 2:3). Soo saátu kúni̱ra ná ndasakáʼnúnra ta chindeétáʼún xíʼin na̱ hermano ti̱xin reunión (1 Tes. 5:11). Kúʼvi̱-inira xínira yóʼó ta taxira ndee̱ ña̱ xíniñúʼún.

11. ¿Ndáaña va̱xi nu̱ú Biblia kivi chindeétáʼan xíʼinyó?

¹¹ Ná kotoyó sava ña̱ va̱xi nu̱ú Biblia. Tu̱ʼun Ndióxi̱ sándakáʼanña miíyó ña̱ sana kivi ka̱ʼa̱nyó ña̱ va̱ása va̱ʼa (Sant. 3:2). Jehová va̱ása ndátura ña̱ ni iin yichi̱ kǒo keʼéyó ña̱ va̱ása va̱ʼa ta saátu va̱ása ndátu na̱ hermanoyó keʼéyó ña̱yóʼo (Sal. 103:12-14). Táki̱ʼva íyo na̱ veʼeyó saá íyona ta kúni̱nína miíyó (Mar. 10:29, 30; Juan 13:35). Kúnda̱a̱-inina ña̱ sava yichi̱ va̱ása kivi taxiyó comentario nda̱a̱ táki̱ʼva kúni̱yó taxiyóña.

12, 13. ¿Ndáaña sákuaʼayó xíʼin ña̱ ndo̱ʼo ta̱ Nehemías xíʼin ta̱ Jonás?

¹² Ná ka̱ʼa̱nyó xa̱ʼa̱ u̱vi̱ ejemplo ña̱ va̱xi nu̱ú Biblia ña̱ kivi chindeétáʼan xíʼinyó ña̱ va̱ása yi̱ʼvíyó. Ná ka̱ʼa̱nyó xa̱ʼa̱ ta̱ Nehemías, ta̱yóʼo xi̱kachíñura nu̱ú iin ta̱ chíñu káʼnu. Tá xi̱niso̱ʼora ña̱ ndi̱ʼi-xa̱ʼa̱ nama̱ xíʼin yéʼé ña̱ ñuu Jerusalén ku̱suchíní-inira (Neh. 1:1-4). Kivi ndakanixi̱níyó nda̱saa ni̱yi̱ʼví ta̱ Nehemías tá ni̱nda̱ka̱tu̱ʼun ta̱ rey miíra nda̱chun kúsuchí-inira. Tá kúma̱níka ndakuiinra yuʼú ta̱ rey kama ke̱ʼéra iin oración. Tíxa̱ʼvi ña̱yóʼo, chindeétáʼan ta̱ rey xíʼin na̱ ñuu Ndióxi̱ (Neh. 2:1-8). Yichi̱ ña̱ sa̱ndákoo ta̱ Nehemías náʼa̱ña nu̱úyó ña̱ ndáyáʼviní keʼéyó oración tá kúma̱níka ndakuiinyó iin ña̱ʼa. Ná ndakanixi̱níyó xa̱ʼa̱ ta̱ Jonás. Tá ni̱ka̱ʼa̱n Jehová xíʼinra ña̱ ná ku̱ʼu̱nra nu̱ú na̱ ñuu Nínive, ni̱yi̱ʼvíníra ta inka ñuu ni̱xa̱ʼa̱nra (Jon. 1:1-3). Soo Ndióxi̱ chi̱ndeéñaʼá ña̱ va̱ʼa ke̱ʼéra chiñu ña̱ xa̱ʼndara nu̱úra, ta ña̱ ni̱ka̱ʼa̱nra chi̱ndeétáʼanña xíʼin na̱ ñuu kán (Jon. 3:5-10). Ña̱ ndo̱ʼo ta̱ Jonás sánáʼa̱ña miíyó ña̱ kiviva chindeétáʼan Jehová xíʼinyó ña̱ va̱ʼa kachíñuyó nu̱úra ni sava yichi̱ yíʼviyó. Va̱ása xíniñúʼu yi̱ʼvíyó na̱ hermanoyó chi va̱ása íyona nda̱a̱ táki̱ʼva ni̱xi̱yo na̱ ñuu Nínive.

¹³ ¿Ndáaña chindeétáʼan xíʼinyó ña̱ va̱ʼa taxiyó comentario ña̱ kivi ndasandeé-ini na̱ hermanoyó? Ná ka̱ʼa̱nyó xa̱ʼa̱ savaña.

14. a) ¿Nda̱chun xíniñúʼu sakuaʼa va̱ʼayó tá kúma̱níka ku̱ʼu̱nyó reunión? b) ¿Ama kivi sakuaʼa kúeeyó?

¹⁴ Ná sakuaʼa kúeeyó tá kúma̱níka ku̱ʼu̱nyó reunión. Va̱ʼaníka kúniyó ña̱ ndakuiinyó tá ná kuniñúʼu va̱ʼayó tiempoyó ña̱ kaʼvi va̱ʼayó (Prov. 21:5). Su̱ví inkáchi íyo tiempo ña̱ kúúmií ndiʼiyó. Ñá Eloise iin ñá hermana ñá kǒo yií, kúúmiíñá yáʼaka 80 ku̱i̱ya̱, kíxáʼañá káʼviñá Tutu Ña̱ Nátúʼun xíʼinyó tá kíxáʼa semana. Káʼa̱nñá ña̱yóʼo: “Va̱ʼáníka kúni tá siʼna sákuaʼa va̱ʼi̱ tá xáʼi̱n reunión”. Iin ñá hermana ñá naní Joy, ni ku̱a̱ʼá tiempo káchíñuñá soo  káʼviñá Tutu Ña̱ Nátúʼun xíʼinyó tá kúma̱ní iin ki̱vi̱ ña̱ ku̱ʼu̱nñá reunión chi saá va̱ása nándósóñá xa̱ʼa̱ ña̱ káʼviñá. Ta̱ Ike kúúra iin anciano ña̱ congregación ta saátu kúúra precursor, soo ni íyo ku̱a̱ʼá chiñu nu̱úra káchira: “Ña̱ va̱ʼaní kéʼé yi̱ʼi̱ kúú ña̱ káʼvii̱ iin rato loʼo ma̱ʼñú ña̱ semana nu̱úka ña̱ kaʼvi ndiʼiña iin yichi̱”.

15. ¿Ndáaña kivi keʼéyó ña̱ va̱ʼa sakuaʼa kúeeyó tá kúma̱níka ku̱ʼu̱nyó reunión?

¹⁵ ¿Ndáaña kivi keʼéyó ña̱ va̱ʼa sakuaʼa kúeeyó tá kúma̱níka ku̱ʼu̱nyó reunión? Siʼna ná ndukúyó nu̱ú Jehová espíritu yi̱ira (Luc. 11:13; 1 Juan 5:14). Tándi̱ʼi ná kuniñúʼuyó sava minuto ña̱ kotoyó ndáaña sakuaʼayó nu̱ú ña̱ kaʼviyó. Ná kotoyó título, subtítulo, na̱ʼná xíʼin recuadro. Saá ná kixáʼayó kaʼviyó iin iin párrafo ta saátu ná kaʼviyó ndiʼi texto ña̱ va̱xi nu̱úña. Ná ndakanixi̱níyó xa̱ʼa̱ ña̱ káʼviyó ta saátu ná ndakanixi̱níyó xa̱ʼa̱ ña̱ ndakuiinyó ti̱xin reunión. Tá va̱ʼaní ná sakuaʼayó ña̱ ku̱ʼu̱nyó reunión, kusi̱íníka-iniyó ta va̱ása ixayo̱ʼvi̱kaña xíʼinyó ña̱ taxiyó comentario (2 Cor. 9:6).

16. ¿Ndáaña kivi kuniñúʼún ña̱ va̱ʼa kaʼviún, ta nda̱saa xíniñúʼúnña?

¹⁶ Ná kuniñúʼuyó ña̱ va̱xi nu̱ú Internet. Jehová táxira ku̱a̱ʼání ña̱ kivi kuniñúʼuyó nu̱ú Internet ña̱ va̱ʼa sakuaʼa va̱ʼayó. Ña̱ aplicación JW Library^® chíndeétáʼanña xíʼinyó ña̱ va̱ʼa taváyó publicación ña̱ kaʼviyó nu̱ú teléfono á tableta. Saá kivi kaʼviyó ña̱yóʼo á kuniso̱ʼoyóña nda̱a̱ ndáaka nu̱ú ku̱a̱ʼa̱nyó ta mií tiempo ña̱ kúni̱ miíyó. Savana xíniñúʼuna ña̱ aplicación yóʼo ña̱ va̱ʼa kaʼvina tá íyo loʼo tiempona nu̱ú káchíñuna, ti̱xin escuela nu̱ú káʼvina á tá ku̱a̱ʼa̱nna xíʼin tú carro. Saátu tá ná kuniñúʼuyó programa ña̱ Watchtower Library xíʼin ña̱ BIBLIOTECA NU̱Ú INTERNET Watchtower^™, va̱ása ixayo̱ʼvi̱ña xíʼinyó ña̱ kaʼvi va̱ʼayó.

17. a) ¿Nda̱chun ña̱ va̱ʼaní kúúña tá ná taváyó ku̱a̱ʼá comentario? b) ¿Ndáaña sa̱kuaʼún xíʼin video Hazte amigo de Jehová: Prepara bien tu comentario?

¹⁷ Kivi taváyó ku̱a̱ʼá comentario ti̱xin iin artículo. ¿Nda̱chun? Saáchi tá ndániʼiyó ndaʼa̱yó ña̱ taxiyó iin comentario sana va̱ása taxinaña ndaʼa̱yó. Sana ta̱ sáyaʼa reunión va̱ása kivi taxira comentario ndaʼa̱ ndiʼina, chi loʼo tiempo kúúmiíra. Ña̱kán ná kǒo sa̱a̱yó ni ná kǒo ndakava-iniyó tá va̱ása kivi taxiyó iin comentario tá kíxáʼana káʼvina párrafo ña̱ nu̱ú. Tá ná taváyó ku̱a̱ʼá comentario kivi ndaniʼiyó ndaʼa̱yó ku̱a̱ʼá yichi̱. Inka ña̱ kivi keʼéyó kúú ña̱ ndaniʼiyó ndaʼa̱yó ña̱ kaʼviyó texto ña̱ va̱xi ti̱xin artículo. Soo tá kívi keʼéyóña ná taváyó iin comentario xíʼin tu̱ʼun miíyó. *

18. ¿Nda̱chun loʼova xíniñúʼu ka̱ʼa̱nyó tá táxiyó iin comentario?

 ¹⁸ Loʼova ná ka̱ʼa̱nyó tá táxiyó iin comentario. Tá táxina iin comentario ña̱ loʼo, ña̱yóʼo kúú ña̱ chíndeétáʼan xíʼinyó. Ña̱kán tá táxiyó comentario xíniñúʼu loʼo tiempo ka̱ʼa̱nyó á 30 segundo (Prov. 10:19; 15:23). Na̱ xa̱a̱ ku̱a̱ʼání ku̱i̱ya̱ táxi comentario xíniñúʼu chinúuna yichi̱ nu̱ú inkana. Tá ku̱a̱ʼání tiempo xíniñúʼuna ña̱ táxina iin comentario sana inkana va̱ása taxina comentario, chi ndákanixi̱nína ña̱ va̱ása kivi ndakuiinna táki̱ʼva ndákuiin na̱yóʼo. Soo tá loʼo tiempo xíniñúʼuyó ña̱ táxiyó comentario ku̱a̱ʼáka na̱ hermano kivi taxi comentario. Tá kúúyó na̱ nu̱ú táxi comentario, loʼo tiempo xíniñúʼu ka̱ʼa̱nyó ta ña̱ ndáyáʼvi kuití ná ka̱ʼa̱nyó xa̱ʼa̱. Ña̱kán tá xa̱a̱ sa̱ndíʼiyó ni̱ka̱ʼa̱nyó sana inkana kivi ka̱ʼa̱nna xa̱ʼa̱ inka ña̱ʼa (koto recuadro “ ¿Ndáaña kivi ka̱ʼi̱n xíʼin comentario ña̱ taxii̱?”).

19. ¿Nda̱saa kivi chindeétáʼan ta̱ sáyáʼa reunión xíʼinyó, soo ndáaña xíniñúʼu keʼéyó?

¹⁹ Ná ka̱ʼa̱nyó xíʼin ta̱ sáyáʼa reunión ña̱ kúni̱yó taxiyó iin comentario. Tá kúni̱yó keʼéyó ña̱yóʼo xíniñúʼu ka̱ʼa̱nyó xíʼin ta̱ hermano ta̱ sáyáʼa reunión tá kúma̱níka kixáʼa reunión. Tá xa̱a̱ ku̱a̱ʼa̱nra nu̱ú párrafo ña̱ kúni̱yó taxiyó comentario, kamaní ná ndaniʼiyó ndaʼa̱yó ta su̱kún va̱ʼa ndaniʼiyóña.

20. ¿Nda̱saa kítáʼan ña̱ ndátakayó reunión xíʼin ña̱ xíxiyó xíʼin na̱ migoyó?

²⁰ Reunión ña̱ xíyo ti̱xin congregación iin kítaʼanña xíʼin ña̱ xíxiyó xíʼin na̱ migoyó. Tá iin na̱ hermano káʼa̱nna xíʼinyo ña̱ ná ku̱ʼu̱nyó kuxuyó barbacoa xíʼinna soo kúni̱na ña̱ ná kuniʼiyó iin comida ña̱ va̱ása yo̱ʼvi̱ kúva̱ʼa ku̱ʼu̱nyó, ¿ndáaña keʼéyó? Sana yi̱ʼví loʼoyó, soo keʼévayó iin ña̱ʼa ña̱ kútóo ndiʼina kuxuna. Saá íyo reunión, mií Jehová kúú ta̱ kána miíyó ta nda̱a̱ táki̱ʼva íyo na̱ ku̱a̱ʼa̱n xíxi iin ña̱ va̱ʼaní ini veʼera saá íyoyó (Sal. 23:5; Mat. 24:45). Kúsi̱íní-inira ña̱ táxiyó iin comentario ña̱ va̱ása yo̱ʼvi̱. Ña̱kán ná sakuaʼa va̱ʼayó ta ná taxiyó comentario ti̱xin reunión. Saá tá ná ku̱ʼu̱nyó reunión su̱ví kuití ku̱ʼu̱nyó sakuaʼayó, chi kivitu chindeétáʼanyó xíʼin inkana tá táxiyó comentario ña̱ kivi chindeétáʼan xíʼinna.