1, 2. ¿Ndáaña ku̱u tá ki̱vi̱ ña̱ Pentecostés ña̱ ku̱i̱ya̱ 33?

TÁ KI̱VI̱ ña̱ Pentecostés ña̱ ku̱i̱ya̱ 33. Tá xi̱ta̱an domingo, chí Jerusalén nda̱kutáʼan ki̱ʼva 120 na̱ discípulo ini iin cuarto ña̱ kánuu chí xi̱ní veʼe (Hech. 1:13-15; 2:1). Sava ki̱vi̱ chí sa̱tá, ta̱ Jesús ni̱ka̱ʼa̱nra xíʼinna ña̱ ná kindo̱ona ña̱ ñuu kán chi íyo iin ña̱ ndáyáʼviní ndakiʼinna (Hech. 1:4, 5). ¿Ndáaña ku̱u?

² “Ta iin kama ndeéní ni̱ni̱ʼi chí ndiví nda̱a̱ táki̱ʼva íyo ña̱ ndeéní xíka ta̱chí saá i̱xaaña, ta iin chu̱tú ini veʼe”. Tasaá, na̱ discípulo xi̱nina “yáa̱ ña̱ íyo táki̱ʼva íyo ñuʼu̱” nda̱kunúuña xi̱nína, ta ndiʼina “nda̱kiʼinna espíritu santo” (Hech. 2:2-4). Iin ña̱ ndákanda̱-iniyó xíʼin kúú ña̱ ke̱ʼé Jehová, tá ta̱xira espíritu santora ndaʼa̱ na̱ discípulo kán (Hech. 1:8). Na̱yóʼo kúú na̱ nu̱ú nda̱kaxin Ndióxi̱ xíʼin espíritu santora, * ta saátu nda̱kiʼinna ña̱ ku̱ʼu̱nna kaʼndachíñuna xíʼin ta̱ Jesús chí ndiví.

3. ¿Nda̱chun xi̱kandíxa na̱ cristiano kán ña̱ nda̱kaxin Ndióxi̱ miína xíʼin espíritu santo?

³ Tá yóʼó níxi̱yo táʼan na̱ discípulo kán, va̱ása nandósóún xa̱ʼa̱ ña̱ ku̱u ki̱vi̱ kán. Ta iin yáa̱ ña̱ íyo táki̱ʼva íyo ñuʼu̱ nda̱kunúuña xi̱níún, ta ki̱xáʼún káʼún inka tu̱ʼun (Hech. 2:5-12). Ta ni va̱ása xíka-iniún ña̱ nda̱kaxin Ndióxi̱ yóʼó xíʼin espíritu santora. Soo, ¿á iin ki̱ʼva ndáka̱xin Ndióxi̱ na̱ ku̱ʼu̱n chí ndiví ta á inkáchi ki̱vi̱ kéʼéraña? Va̱ása. ¿Nda̱chun káʼa̱nyó ña̱yóʼo? Ná kotoyó nda̱chun.

4. Tá siglo nu̱ú, ¿á inkáchi nda̱kaxin Ndióxi̱ ndiʼi na̱ ka̱nara ku̱ʼu̱n chí ndiví? Ka̱ʼa̱n xa̱ʼa̱ña.

 ⁴ Ná ka̱ʼa̱nyó xa̱ʼa̱ ama kúú ña̱ ndáka̱xin Ndióxi̱ na̱ ku̱ʼu̱n chí ndiví xíʼin espíritu santora. Su̱ví nda̱saa na̱ 120 cristiano kúú na̱ níndaka̱xin Ndióxi̱ xíʼin espíritu santora tá Pentecostés ña̱ ku̱i̱ya̱ 33, chi saátu mií ki̱vi̱ kán nda̱kiʼin inka 3,000 na̱ yiví espíritu santo ña̱ ni̱ka̱ʼa̱n ta̱ Jesús xa̱ʼa̱. Ta na̱yóʼo nda̱kaxinrana tá nda̱kuchina (Hech. 2:37, 38, 41). Soo tá ni̱ya̱ʼaka ku̱i̱ya̱, su̱ví ndiʼi na̱ nda̱kaxinra níkanara ku̱ʼu̱n chí ndiví tá ki̱vi̱ nda̱kuchina. Chi tá kúú, na̱ ñuu Samaria tá ni̱ya̱ʼa loʼo tiempo ña̱ nda̱kuchina, saáví kúú ña̱ nda̱kaxinrana (Hech. 8:14-17). Ta ta̱ Cornelio xíʼin na̱ veʼera, Ndióxi̱ nda̱kaxinrana tá kúma̱níka ndakuchina, ta ña̱yóʼo iin yichi̱ kuití ku̱uña (Hech. 10:44-48).

5. Nda̱a̱ táki̱ʼva káchi 2 Corintios 1:21, 22, ¿ndáaña kúu tá ndáka̱xin Ndióxi̱ na̱ ku̱ʼu̱n chí ndiví xíʼin espíritu santo?

⁵ Ta vitin ná ka̱ʼa̱nyó xa̱ʼa̱ ndáaña kúu tá ndáka̱xin Ndióxi̱ iin na̱ ku̱ʼu̱n chí ndiví xíʼin espíritu santora. Tá sa̱kán nda̱kaxin Ndióxi̱ na̱ ku̱ʼu̱n chí ndiví, savana kivi ixayo̱ʼvi̱ña xíʼinna ña̱ kandíxana ña̱ nda̱kaxinrana, ta kivi nda̱ka̱tu̱ʼun xíʼin miína nda̱chun nda̱kaxinrana, soo inka na̱ ndáka̱xinra va̱ása íxayo̱ʼvi̱ña xíʼinna. Soo nda̱a̱ ndáaka ña̱ ndóʼona, ta̱ apóstol Pablo káʼa̱nra xa̱ʼa̱ ña̱ ndóʼo ndiʼina: “Tándi̱ʼi ka̱ndíxandó ña̱yóʼo, nda̱kiʼinndó sello * xa̱ʼa̱ ta̱kán i̱xaa espíritu santo ña̱ ni̱ka̱ʼa̱nra xa̱ʼa̱, ña̱yóʼo kúú ña̱ náʼa̱ ña̱ ndixa ndakiʼinyó iin herencia” (Efes. 1:13, 14; nota). Ña̱kán Jehová xíniñúʼura espíritu santora, ña̱ chindeétáʼanra xíʼinna ña̱ kunda̱a̱-inina ña̱ ndixa nda̱kaxinrana. Ta ña̱ espíritu santo kúú ña̱ náʼa̱ nu̱úna, ña̱ chí nu̱únínu ndixa kutakuna ndiʼi tiempo chí ndiví, ta su̱ví nu̱ú ñuʼú yóʼo (kaʼvi 2 Corintios 1:21, 22). *

6. ¿Ndáaña xíniñúʼu keʼé iin na̱ nda̱kaxin Ndióxi̱ ña̱ va̱ʼa ku̱ʼu̱nna chí ndiví?

⁶ Tá ndáka̱xin Ndióxi̱ iin na̱ cristiano ña̱ ku̱ʼu̱nna chí ndiví xíʼin espíritu santora, ¿á kúni̱ kachi ña̱yóʼo ña̱ ndixa ku̱ʼu̱nna chí ndiví?  Va̱ása, chi na̱ nda̱kaxin kuitívara kúúna. Soo xíniñúʼu ndakaʼánna ña̱yóʼo: “Ndakundeéndó chika̱a̱níndó ndee̱ ña̱ va̱ʼa ndakiʼinndó ña̱ ka̱nara ndóʼó á ña̱ nda̱kaxinra ndóʼó, chi tá ná ndakundeéndó keʼéndó ña̱yóʼo, kuchiñuvandó” (2 Ped. 1:10). Ña̱kán, ni xa̱a̱ nda̱kaxinva Ndióxi̱ á ka̱nara iin na̱ cristiano ña̱ ku̱ʼu̱nna chí ndiví, soo tá va̱ása nda̱kú íyo inina va̱ása ku̱ʼu̱nvína (Filip. 3:12-14; Heb. 3:1; Apoc. 2:10).

7. ¿Ndáa ki̱ʼva kúnda̱a̱-ini na̱ nda̱kaxin Ndióxi̱ ña̱ ka̱narana ña̱ ku̱ʼu̱nna chí ndiví?

⁷ Ña̱kán, ¿ndáa ki̱ʼva kúnda̱a̱-ini iinna ña̱ ka̱na Ndióxi̱ miína ña̱ ku̱ʼu̱nna chí ndiví? Káxiní ni̱ka̱ʼa̱n ta̱ Pablo xa̱ʼa̱ ña̱yóʼo nu̱ú carta ña̱ ka̱ʼyíra ku̱a̱ʼa̱n ndaʼa̱ na̱ ñuu Roma, na̱ ka̱na Ndióxi̱ ña̱ koona na̱ santo. Ni̱ka̱ʼa̱nra xíʼinna: “Ndóʼó va̱ása níndakiʼindó iin espíritu ña̱ esclavo ña̱ ndikó tukundó yi̱ʼvíndó, chi nda̱kiʼinndó iin espíritu ña̱ koondó se̱ʼe Ndióxi̱, ña̱ espíritu yóʼo chíndaʼáña miíyó ña̱ ka̱ʼa̱nyó: ‘Abba, yiváʼ. Ña̱ espíritu nátúʼunña xíʼin espírituyó ña̱ kúúyó se̱ʼe Ndióxi̱” (Rom. 1:7; 8:15, 16). Ña̱kán, Ndióxi̱ xíniñúʼura espíritu santora ña̱ chíndeétáʼanra xíʼin na̱ nda̱kaxinra, ña̱ kunda̱a̱-inina ña̱ ndixa ka̱narana ña̱ ku̱ʼu̱nna chí ndiví (1 Tes. 2:12).

8. Nda̱a̱ táki̱ʼva káchi 1 Juan 2:20, 27, ¿nda̱chun va̱ʼa kúnda̱a̱-iniyó ña̱ va̱ása xíniñúʼu ka̱ʼa̱n inkana xíʼin na̱ nda̱kaxin Ndióxi̱ ña̱ kúúna na̱ ku̱ʼu̱n chí ndiví?

⁸ Jehová kúú ta̱ chíka̱a̱-inina ña̱ va̱ása kaka-inina ña̱ ndixa nda̱kaxinrana ña̱ ku̱ʼu̱nna chí ndiví (kaʼvi 1 Juan 2:20, * 27). * Nda̱a̱ táki̱ʼva íyo ndiʼi na̱ cristiano, na̱ nda̱kaxin Ndióxi̱ xíniñúʼuna ña̱ sanáʼa̱rana ti̱xin ña̱ congregación. Soo, va̱ása xíniñúʼu ka̱ʼa̱n inkana xíʼinna ña̱ kúúna na̱ nda̱kaxin Ndióxi̱. Chi xa̱a̱ xíʼin espíritu santo ni̱na̱ʼa̱ Jehová nu̱úna ña̱ ndixa nda̱kaxinrana.

9. Nda̱a̱ táki̱ʼva káchi Efesios 1:18, ¿ndáaña ndóʼo na̱ ndáka̱xin Ndióxi̱ ku̱ʼu̱n chí ndiví?

⁹ Sana ku̱a̱ʼání na̱ ndásakáʼnu Ndióxi̱ tiempo vitin, íxayo̱ʼvi̱ña xíʼinna ña̱ kunda̱a̱-inina ndáaña ndóʼo iin na̱ ndáka̱xin Ndióxi̱ ku̱ʼu̱n chí ndiví, ta ña̱ nda̱a̱ kúúvaña chi va̱ása níndaka̱xin Ndióxi̱ na̱yóʼo. Ndióxi̱ i̱xava̱ʼara na̱ yiví ña̱ kutakuna ndiʼi tiempo nu̱ú ñuʼú yóʼo, ta su̱ví chí ndiví (Gén. 1:28; Sal. 37:29). Soo nda̱kaxinra savana ña̱ kutakuna chí ndiví. Ña̱kán ki̱vi̱ ndáka̱xinrana, násamara ña̱ ndátuna chí nu̱únínu xíʼin ki̱ʼva ña̱ ndákanixi̱nína, ta kíxáʼana kúni̱na kutakuna chí ndiví (kaʼvi Efesios 1:18). *

10. ¿Ndáaña kúni̱ kachi ña̱ kaku tukuna? (Koto nota).

¹⁰ Tá ndáka̱xin Ndióxi̱ iin na̱ cristiano na̱ ku̱ʼu̱n chí ndiví xíʼin espíritu santora, nda̱a̱ táki̱ʼva íyo na̱ káku tuku saá íyona. * Ta̱ Jesús ni̱ka̱ʼa̱nra ña̱ ixayo̱ʼvi̱ña xíʼin iinna, ña̱ ka̱ʼa̱nna xíʼin na̱ va̱ása níndaka̱xin Ndióxi̱ ndáa ki̱ʼva ndóʼo na̱ káku tuku á na̱ káku xíʼin espíritu (Juan 3:3-8; nota).

11. ¿Nda̱chun nása̱ma ña̱ ndákanixi̱ní na̱ cristiano na̱ nda̱kaxin Ndióxi̱ ku̱ʼu̱n chí ndiví?

¹¹ ¿Nda̱chun nása̱ma ña̱ ndákanixi̱ní na̱ cristiano na̱ nda̱kaxin Ndióxi̱ ku̱ʼu̱n chí ndiví? Tá ya̱chi̱ xíʼin ndiʼi níma̱na xi̱chindayáʼvina ña̱ kutakuna ndiʼi tiempo nu̱ú ñuʼú yóʼo. Saátu xi̱ndatuna ña̱ ná kixaa̱ ki̱vi̱ ña̱ sandiʼi-xa̱ʼa̱ Jehová ndiʼi tu̱ndóʼo ta ndasalivira nu̱ú ñuʼú yóʼo. Sana xi̱ndakanixi̱nína ña̱ ndakiʼinna na̱ veʼena á na̱ migona na̱ ndataku. Soo tá nda̱kaxin Ndióxi̱ miína ña̱ ku̱ʼu̱nna chí ndiví, na̱sama ña̱ ndákanixi̱nína.  ¿Nda̱chun? Su̱ví xa̱ʼa̱ ña̱ va̱ása kútóokana koona nu̱ú ñuʼú yóʼo kúúña. Ta ni su̱ví xa̱ʼa̱ ña̱ ndíʼi̱ní-inina á íyoní tu̱ndóʼo nu̱úna kúúña, ta ni su̱ví xa̱ʼa̱ ña̱ ndákanixi̱nína ña̱ va̱ása livi kutakuna ndiʼi tiempo nu̱ú ñuʼú yóʼo kúúña. Saáchi Jehová kúú ta̱ xi̱niñúʼu espíritu santora ña̱ na̱samara ña̱ ndákanixi̱nína, ta na̱samara ña̱ ndátuna ndakiʼinna chí nu̱únínu.

12. Nda̱a̱ táki̱ʼva káchi 1 Pedro 1:3, 4, ¿ndáaña ndóʼo na̱ cristiano na̱ nda̱kaxin Ndióxi̱ ku̱ʼu̱n chí ndiví tá ndákanixi̱nína xa̱ʼa̱ ña̱ ndakiʼinna?

¹² Na̱ cristiano na̱ nda̱kaxin Ndióxi̱ ku̱ʼu̱n chí ndiví, sana ndákanixi̱nína ña̱ va̱ása xíniñúʼu ndakiʼinna ña̱ ndáyáʼviní yóʼo, soo va̱ása xíka-inina ña̱ mií Jehová kúú ta̱ nda̱kaxinñaʼá. Saáchi tá ndákanixi̱nína xa̱ʼa̱ ña̱ ndakiʼinna, kúsi̱íní-inina ta táxina tíxa̱ʼvi xa̱ʼa̱ ña̱yóʼo (kaʼvi 1 Pedro 1:3, 4). *

13. ¿Ndáaña ndákanixi̱ní na̱ nda̱kaxin Ndióxi̱ ku̱ʼu̱n chí ndiví xa̱ʼa̱ ña̱ tákuna nu̱ú ñuʼú yóʼo?

¹³ ¿Á kúni̱ kachi ña̱yóʼo ña̱ na̱ ku̱ʼu̱n chí ndiví xa̱a̱ kúni̱na kuvina? Ta̱ apóstol Pablo kúú ta̱ ndákuiin ña̱ pregunta yóʼo. Tá chi̱táʼanra ku̱ñu na̱ nda̱kaxin Ndióxi̱ ku̱ʼu̱n chí ndiví xíʼin veʼe válí ña̱ manta, ni̱ka̱ʼa̱nra ña̱yóʼo: “Ta miíyó na̱ íyo ini ña̱ veʼe válí ña̱ manta yóʼo ndándikó-iniyó ta ndíʼi̱-iniyó, ta su̱ví xa̱ʼa̱ ña̱ kúni̱yó tavayó ña̱ veʼe yóʼo sa̱táyó kúúña, chi ña̱ kúni̱yó kúú ña̱ ndaku̱ndixiyó ña̱ inka, ña̱ va̱ʼa ná kokó ña̱ táku ña̱ xíʼi̱” (2 Cor. 5:4). Ña̱kán su̱ví xa̱ʼa̱ ña̱ va̱ása kúni̱ka na̱ nda̱kaxin Ndióxi̱ ku̱ʼu̱n chí ndiví kutakuna nu̱ú ñuʼú yóʼo kúúña, ta ni su̱ví xa̱ʼa̱ ña̱ xa̱a̱ kúni̱na kuvina kúúña. Chi kúsi̱íní-inina íyona nu̱ú ñuʼú yóʼo, ta chíka̱a̱na ndee̱ ña̱ ndasakáʼnuna Jehová ndiʼi ki̱vi̱, xíʼin na̱ veʼena ta saátu xíʼin na̱ migona. Soo ni nda̱a̱ ndáaka ña̱ kéʼéna, va̱ása nándósóna xa̱ʼa̱ ña̱ ndátuna ndakiʼinna (1 Cor. 15:53; 2 Ped. 1:4; 1 Juan 3:2, 3; Apoc. 20:6).

14. ¿Ndáaña kúú ña̱ náʼa̱ ña̱ va̱ása níndaka̱xin Ndióxi̱ iinna xíʼin espíritu santora ña̱ ku̱ʼu̱nna chí ndiví?

¹⁴ Sana ndáka̱tu̱ʼun xíʼin miíún á nda̱kaxin Jehová yóʼó xíʼin espíritu santora ña̱ ku̱ʼu̱n chí ndiví. Tá saá íyoña, xíniñúʼu nda̱ka̱tu̱ʼun xíʼin miíún ña̱yóʼo: ¿á ndíʼi̱ní-iniún ña̱ keʼún chiñu Ndióxi̱?, ¿á xíʼin ña̱ si̱í-ini nátúʼún xa̱ʼa̱ Ndióxi̱?, ¿á kútóún kaʼviún Biblia ta sakuaʼakaún xa̱ʼa̱ Ndióxi̱?, ¿á túviún ña̱ táxi Jehová bendición ndaʼún xa̱ʼa̱ ña̱ chíka̱ún ndee̱ ña̱ natúʼún xa̱ʼa̱ra?, ¿á túviún ña̱ xíniñúʼu chindeétáʼún xíʼin inkana ña̱ viíka kutáʼanna xíʼin Ndióxi̱?, ¿á xítoún ña̱ chíndeétáʼan Jehová xíʼún tá íyo ña̱ ndóʼún? (1 Cor. 2:10). Tá vií nda̱kuiún ndiʼi pregunta yóʼo, ¿á kúni̱ kachiña ña̱ ka̱na Ndióxi̱ yóʼó ña̱ ku̱ʼu̱n chí ndiví? Va̱ása, saáchi ndiʼi na̱ ndásakáʼnu Jehová kúúna na̱ ku̱ʼu̱n chí ndiví á va̱ása, kivi ndoʼona nda̱a̱ táki̱ʼva ndóʼún. Ta saátu, xíʼin espíritu santo Jehová kivi taxira ndee̱ ndaʼa̱ nda̱a̱ ndáaka na̱ ndásakáʼnu-ñaʼá, ni nda̱a̱ ndáaka ña̱ ndátuna ndakiʼinna. Soo tá xíka-iniún xa̱ʼa̱ á nda̱kaxin Ndióxi̱ yóʼó xíʼin espíritu santora á va̱ása, ña̱yóʼo kúni̱ kachiña ña̱ va̱ása níndaka̱xinra yóʼó. Na̱ ka̱na Ndióxi̱ ña̱ ku̱ʼu̱nna chí ndiví va̱ása xíka-inina xa̱ʼa̱ ña̱ nda̱kaxinrana; chi kúnda̱a̱ káxi-inina ña̱ ka̱navarana.

15. ¿Nda̱chun va̱ʼa kúnda̱a̱-iniyó ña̱ su̱ví ndiʼi na̱ ndákiʼin espíritu santo, kúú na̱ ndákaxin Ndióxi̱ ña̱ ku̱ʼu̱nna chí ndiví?

¹⁵ Ña̱ Biblia káʼa̱nña xa̱ʼa̱ na̱ ta̱a na̱ nda̱kú ni̱xi̱yo ini xíʼin Ndióxi̱ ta nda̱kiʼinna espíritu santo, soo va̱ása kúúna na̱ ku̱ʼu̱n chí ndiví. Tá kúú ta̱ David, espíritu santo kúú ña̱ xi̱niʼi yichi̱ nu̱úra (1 Sam. 16:13). Ña̱yóʼo chi̱ndeétáʼan xíʼinra ña̱ ku̱ndaa̱-inira ku̱a̱ʼá ña̱ʼa xa̱ʼa̱ Jehová, ta xi̱niʼiña yichi̱ nu̱úra ña̱ va̱ʼa ka̱ʼyíra sava táʼvi ña̱ Biblia (Mar. 12:36). Soo ni saá, ta̱ apóstol Pedro  ni̱ka̱ʼa̱nra ña̱ ta̱ David va̱ása ku̱a̱ʼa̱nra chí ndiví (Hech. 2:34). Ta saátu ta̱ Juan ta̱ xi̱sandákuchi na̱ yiví, xi̱kuumiíra ku̱a̱ʼání espíritu santo (Luc. 1:13-16). Ta nda̱a̱ mií ta̱ Jesús ni̱ka̱ʼa̱n, ña̱ kǒo ni iin na̱ íyo táki̱ʼva íyo ta̱ Juan ta̱ xi̱sandákuchi na̱ yiví. Soo ni saá, ni̱ka̱ʼa̱nra ña̱ ta̱ Juan va̱ása koora ti̱xin Reino ña̱ íyo chí ndiví (Mat. 11:10, 11). Jehová xi̱niñúʼura espíritu santora, ña̱ ta̱xira ndee̱ ndaʼa̱ na̱ ta̱a yóʼo ña̱ ke̱ʼéna ku̱a̱ʼání ña̱ʼa, soo va̱ása níxiniñúʼuraña ña̱ ndaka̱xinrana ña̱ ku̱ʼu̱nna chí ndiví. ¿Á kúni̱ kachi ña̱yóʼo ña̱ loʼo nda̱kú ni̱xi̱yo inina, nu̱ú na̱ nda̱kaxinra ña̱ kaʼndachíñuna chí ndiví? Va̱ása, chi ña̱ kúni̱ kachiña kúú ña̱ sandátaku Jehová miína, ña̱ koona nu̱ú ñuyǐví xa̱á (Juan 5:28, 29; Hech. 24:15).

16. ¿Ndáa míí kúni̱ ndiʼi na̱ ndásakáʼnu Ndióxi̱ tiempo vitin kutakuna?

¹⁶ Tiempo vitin, ku̱a̱ʼání na̱ ndásakáʼnu Ndióxi̱ na̱ íyo nu̱ú ñuʼú yóʼo, va̱ása ndátuna ku̱ʼu̱nna chí ndiví. Chi ña̱ ndátuna kúú ña̱ kutakuna nu̱ú ñuʼú yóʼo ti̱xin Reino Ndióxi̱, ta ña̱yóʼo kúútu ña̱ ndátu ta̱ Abrahán, ñá Sara, ta̱ David, ta̱ Juan ta̱ xi̱sandákuchi na̱ yiví xíʼin ku̱a̱ʼáníka na̱ ta̱a xíʼin ná ñaʼá, na̱ ni̱xi̱yo tá tiempo xi̱naʼá (Heb. 11:10).

17. ¿Ndáa pregunta kúú ña̱ ka̱ʼa̱nyó xa̱ʼa̱ nu̱ú inka artículo?

¹⁷ Tiempo vitin, íyoka sava na̱ nda̱kaxin Ndióxi̱ ku̱ʼu̱n chí ndiví nu̱ú ñuʼú yóʼo, xa̱ʼa̱ ña̱yóʼo kivi nda̱ka̱tu̱ʼun xíʼin miíyó sava ña̱ʼa (Apoc. 12:17). Tá kúú, ¿ndáa ki̱ʼva xíniñúʼu koto na̱ nda̱kaxin Ndióxi̱ miína? ¿Ndáa ki̱ʼva xíniñúʼu keʼéyó xíʼin iin na̱ ki̱xáʼa xíxi si̱táva̱ʼa, ta xíʼina tá vino ti̱xin congregaciónyó tá xíyo Conmemoración? ¿Á xíniñúʼu kundi̱ʼi̱-iniyó, tá ku̱a̱ʼáka ku̱a̱ʼa̱n ndúu na̱ káʼa̱n ña̱ kúúna na̱ ku̱ʼu̱n chí ndiví ku̱i̱ya̱ tá ku̱i̱ya̱? Nu̱ú ña̱ inka artículo kunda̱a̱-iniyó xa̱ʼa̱ pregunta yóʼo.