1. Nda̱a̱ táki̱ʼva ndo̱ʼo ta̱ rey David, ¿ndáaña kúú ña̱ kivi nda̱ka̱tu̱ʼun sava na̱ hermano?

NDIʼIYÓ kúni̱yó táxi̱n kooyó ta va̱ása koo tu̱ndóʼo nu̱úyó. Soo ni saá ndiʼiyó yáʼayó nu̱ú tu̱ndóʼo. Ta sava na̱ hermano kivi ndoʼona nda̱a̱ táki̱ʼva ndo̱ʼo ta̱ rey David, chi ña̱yóʼo ni̱nda̱ka̱tu̱ʼunra Jehová: “¿Ama ndiʼi ña̱ ndíʼi̱-inii̱, ta saátu ña̱ kúsuchí-inii̱ ki̱vi̱ tá ki̱vi̱?” (Sal. 13:2).

2. ¿Ndáaña ka̱ʼa̱nyó xa̱ʼa̱ nu̱ú artículo yóʼo?

² Sava yichi̱ ndiʼivayó ndíʼi̱-iniyó, soo íyo ña̱ʼa ña̱ kivi keʼéyó ña̱ va̱ása ndi̱ʼi̱ní-iniyó. Nu̱ú artículo yóʼo kixáʼayó ka̱ʼa̱nyó xa̱ʼa̱ sava ña̱ʼa ña̱ kivi sandíʼi̱ní-iniyó. Tándi̱ʼi, ka̱ʼa̱nyó xa̱ʼa̱ i̱ñu̱ consejo ña̱ kivi chindeétáʼan xíʼinyó ña̱ táxi̱n koo iniyó tá yáʼayó nu̱ú tu̱ndóʼo.

3. ¿Ndáaña yáʼayó nu̱ú, ta á kivi kasiyóña?

³ Íyo sava ña̱ʼa ña̱ kivi sandíʼi̱-iniyó ta va̱ása kívi kasiyó ña̱ kuuña. Tá kúú, va̱ása kívi kasiyó ña̱ ku̱i̱ya̱ tá ku̱i̱ya̱ ndáa ya̱ʼvi ña̱ʼa ña̱ xíxiyó, ti̱ko̱to̱ á ña̱ cháʼviyó xa̱ʼa̱ veʼe nu̱ú ndóoyó. Ta va̱ása kívi kasiyó nu̱ú na̱ káchíñu xíʼinyó á na̱ káʼvi xíʼinyó ña̱ ka̱ʼa̱nna xíʼinyó keʼéyó ña̱ kini, á ña̱ ka̱ʼa̱nyó ña̱ vatá. Ta saátu, va̱ása kúchiñuyó sandíʼi-xa̱ʼa̱yó ku̱a̱chi ña̱ íyo nu̱ú ndóoyó. Ndiʼi ña̱yóʼo kúuña, saáchi va̱ása ndíku̱n na̱ yiví ña̱ káʼa̱n Biblia. Ta̱ Ndi̱va̱ʼa, ta̱ kúú ndióxi̱ nu̱ú na̱ ñuyǐví yóʼo, kúnda̱a̱-inira ña̱ sava na̱ yiví kundi̱ʼi̱ka-inina xa̱ʼa̱ ña̱ʼa ña̱ íyo nu̱ú ñuʼú yóʼo, ta ña̱yóʼo kasiña nu̱úna ña̱ kachíñuna nu̱ú Jehová (Mat. 13:22; 1 Juan 5:19). Ta xa̱ʼa̱ ña̱yóʼo kúú ña̱ íyoní tu̱ndóʼo nu̱ú ñuʼú yóʼo ta sándi̱ʼi̱níña-ini na̱ yiví.

4. ¿Ndáaña kivi ndoʼoyó tá íyoní tu̱ndóʼo nu̱úyó?

 ⁴ Ki̱vi̱ ndíʼi̱ní-iniyó xa̱ʼa̱ tu̱ndóʼo ña̱ yáʼayó nu̱ú, sana túviyó ña̱ kǒo inkaka ña̱ kivi keʼéyó. Tá kúú, kivi kundi̱ʼi̱-iniyó xa̱ʼa̱ ña̱ loʼo xu̱ʼún kíʼinyó ta kǒo kívi satáyó ña̱ʼa ña̱ xíniñúʼuyó. Á kundi̱ʼi̱-iniyó xa̱ʼa̱ ña̱ kivi kiʼin iin kue̱ʼe̱ miíyó ta va̱ása kivika kachíñuyó, á nda̱a̱ tavána miíyó nu̱ú káchíñuyó. Inka ña̱ kivi sandíʼi̱ní-iniyó kúú ña̱ ndakaniníxi̱níyó xa̱ʼa̱ ña̱ va̱ása kuchiñuyó nda̱kú koo iniyó xíʼin Ndióxi̱. Ta saátu kivi kundi̱ʼi̱-iniyó xa̱ʼa̱ ña̱ keʼéyó, tá ná chika̱a̱ ta̱ Ndi̱va̱ʼa ini na̱ yiví ña̱ kixáʼana ixandi̱va̱ʼana xíʼin miíyó na̱ ñuu Ndióxi̱. Ta nda̱a̱ kivi ndakanixi̱níyó: “Sana va̱ása va̱ʼa ña̱ kéʼíi̱ saáchi ndíʼi̱ní-inii̱ xa̱ʼa̱ ña̱yóʼo”.

5. ¿Ndáaña xi̱kuni̱ kachi ta̱ Jesús tá ni̱ka̱ʼa̱nra: “Kǒo kundi̱ʼi̱-inindó”?

⁵ Ta̱ Jesús ni̱ka̱ʼa̱nra xíʼin na̱ discípulora: “Kǒo kundi̱ʼi̱-inindó” (Mat. 6:25). ¿Á xi̱kuni̱ kachi ta̱ Jesús ña̱ nda̱a̱ ni loʼoví va̱ása xíniñúʼu kundi̱ʼi̱-iniyó? Va̱ása, saáchi nda̱a̱ sava na̱ xi̱kachíñu nu̱ú Jehová tiempo xi̱naʼá ni̱ndi̱ʼi̱-inina, soo ni saá xi̱kusi̱íkava-ini Jehová xíʼin ña̱ xi̱keʼéna (1 Rey. 19:4; Sal. 6:3). * Xíʼin ña̱ ni̱ka̱ʼa̱n ta̱ Jesús xi̱kuni̱ra sandíkora-iniyó. Va̱ása níkuni̱ra ña̱ ná kundi̱ʼi̱ní-iniyó xa̱ʼa̱ tu̱ndóʼo ña̱ yáʼayó nu̱ú, chi ña̱yóʼo kivi kasiña nu̱úyó ña̱ kachíñuyó nu̱ú Jehová. Ña̱kán, ¿ndáaña kivi keʼéyó tá ndíʼi̱ní-iniyó? (Koto recuadro “ ¿Ndáa ki̱ʼva keʼúnña?”).

6. Nda̱a̱ táki̱ʼva káchi Filipenses 4:6, 7, ¿ndáaña kivi chindeétáʼan xíʼinyó ña̱ táxi̱n koo iniyó tá ndíʼi̱ní-iniyó?

⁶ 1) Ka̱ʼa̱n ni̱ʼún xíʼin Ndióxi̱. Tá ndíʼi̱ní-iniún xa̱ʼa̱ tu̱ndóʼo ña̱ yáʼún nu̱ú, va̱ʼaníka kuniún tá ná ka̱ʼún xíʼin Jehová (1 Ped. 5:7). Tasaá ndakuiinra ña̱ káʼún xíʼinra, chi taxira “ña̱ táxi̱n koo iniún ña̱ kǒo kúnda̱a̱-ini na̱ yiví xíʼin” (kaʼvi Filipenses 4:6, 7). * Jehová xíniñúʼura espíritu santora ña̱ va̱ʼa sandíkora-iniyó tá ndíʼi̱ní-iniyó (Gál. 5:22).

7. ¿Ndáa ki̱ʼva xíniñúʼu koo oración ña̱ káʼa̱nyó xíʼin Jehová?

⁷ Natúʼun xíʼin Jehová xa̱ʼa̱ ndiʼi ña̱ ndóʼún. Ka̱ʼa̱n xíʼinra xa̱ʼa̱ tu̱ndóʼo ña̱ yáʼún nu̱ú ta ndáaña ndóʼún xa̱ʼa̱ ña̱yóʼo. Ka̱ʼa̱n xíʼin Jehová ná taxira ña̱ ndíchi ndaʼún ña̱ va̱ʼa kunda̱a̱-iniún ndáaña keʼún ña̱ va̱ʼa ndasaviúnña, ta ndukú ndee̱ nu̱úra ña̱ va̱ʼa keʼúnña. Soo tá kǒo ña̱ kívi keʼún ña̱ va̱ʼa ndasaviúnña, ka̱ʼa̱n xíʼin Jehová ná chindeétáʼanra xíʼún ña̱ va̱ása kundi̱ʼi̱ní-iniún xa̱ʼa̱ña. Tá káxi íyo ña̱ káʼún xíʼin Jehová, tá ná ya̱ʼa tiempo va̱ʼaníka kiʼún kuenta ndáa ki̱ʼva nda̱kuiinra oración ña̱ ke̱ʼún nu̱úra. Tá va̱ása kama ndákuiinra ña̱ káʼún xíʼinra kǒo sandákoún ña̱ ka̱ʼún xíʼinra. Jehová kúni̱ra ña̱ káxi ná koo ña̱ ka̱ʼún xíʼinra, ta saátu kúni̱ra ña̱ ná ka̱ʼa̱n ni̱ʼún xíʼinra (Luc. 11:8-10).

8. ¿Ndáa inka ña̱ kivi ka̱ʼa̱nyó xíʼin Jehová ti̱xin oración?

⁸ Tá ná ka̱ʼún xíʼin Jehová xa̱ʼa̱ ña̱ sándi̱ʼi̱-iniún, xíniñúʼu ndakanixi̱níún xa̱ʼa̱ ña̱ va̱ʼa ña̱ kúúmiíún ni íyoní tu̱ndóʼo nu̱ún, ta taxiún tíxa̱ʼvi ndaʼa̱ra xa̱ʼa̱ ña̱yóʼo. Sava yichi̱ ixayo̱ʼvi̱ña xíʼún ña̱ ndani̱ʼún tu̱ʼun ña̱ ka̱ʼún xíʼinra xa̱ʼa̱ ña̱ ndóʼún. Soo ndakaʼún ña̱ ndakuiinva Jehová oración ña̱ kéʼún nu̱úra, ni ña̱yóʼo kuití ná ka̱ʼún: “Ixaún ña̱ ma̱ní, chindeétáʼún xíʼi̱n” (2 Crón. 18:31; Rom. 8:26).

9. ¿Ndáaña xíniñúʼu keʼéyó tá yíʼviyó?

⁹ 2) Kandíxa Jehová ta va̱ása kandíxaún miíún. Tá tiempo ña̱ ni̱xi̱yo ta̱ Profeta Isaías,  na̱ ñuu Judá xi̱yiʼvínína ña̱ kanitáʼan na̱ ñuu Asiria xíʼinna tasaá xa̱a̱na kachíñu ndáʼvina nu̱úna, ña̱kán ni̱ka̱ʼa̱nna xíʼin na̱ ñuu Egipto ña̱ ná chindeétáʼanna xíʼinna (Is. 30:1, 2). Soo, Jehová ni̱ka̱ʼa̱nra xíʼinna ña̱ tá ná keʼéna ña̱yóʼo ndiʼi-xa̱ʼa̱na (Is. 30:7, 12, 13). Jehová xi̱niñúʼura ta̱ Isaías ña̱ va̱ʼa ka̱ʼa̱nra xíʼin na̱ ñuura ndáaña xi̱niñúʼu keʼéna ña̱ va̱ʼa ka̱kuna. Ta̱ Isaías ni̱ka̱ʼa̱nra ña̱yóʼo: “Xa̱a̱ndó ndakú koo inindó tá kándíxandó yi̱ʼi̱ ta táxi̱n íyo inindó” (Is. 30:15b).

10. Ka̱ʼa̱n ama kúú ña̱ kivi na̱ʼún ña̱ kándíxaún Jehová.

¹⁰ ¿Ama kúú ña̱ kivi na̱ʼún ña̱ kándíxaún Jehová? Ndakanixi̱ní ña̱ ta̱xina iin chiñu ndaʼún nu̱ú kivi kiʼún ku̱a̱ʼání xu̱ʼún, soo xíniñúʼu kachíñún ku̱a̱ʼání hora, ta xa̱ʼa̱ ña̱yóʼo va̱ása kivika kachíñún nu̱ú Jehová nda̱a̱ táki̱ʼva kéʼún vitin. Á sana iin na̱ káchíñu xíʼún káʼa̱nna ña̱ kútóona yóʼó, soo va̱ása kúúna testigo Jehová. Á iin na̱ veʼún káʼa̱nna xíʼún ña̱ va̱ása kutáʼankana xíʼún tá ná ndakundeún ndasakáʼnún Jehová. Tá ná ya̱ʼún nu̱ú ña̱yóʼo, sana ixayo̱ʼvi̱ña xíʼún ña̱ vií ndaka̱xiún ndáaña keʼún, soo chindeétáʼanva Jehová xíʼún ña̱ va̱ʼa kunda̱a̱-iniún ndáaña keʼún (Mat. 6:33; 10:37; 1 Cor. 7:39). Soo, ¿á na̱ʼún ña̱ kándíxaún Jehová ta keʼún ña̱ káʼa̱nra?

11. ¿Ndáana kivi kaʼviyó xa̱ʼa̱ tasaá táxi̱n koo iniyó tá sásina nu̱úyó ña̱ ndasakáʼnuyó Jehová?

¹¹ 3) Sakuaʼa xíʼin ña̱ ke̱ʼé na̱ ni̱xi̱yo tiempo xi̱naʼá. Tu̱ʼun Ndióxi̱ káʼa̱nña xa̱ʼa̱ ku̱a̱ʼání na̱ nda̱kaxin ke̱ʼé ña̱ va̱ʼa ta saátu na̱ ke̱ʼé ña̱ va̱ása va̱ʼa, ta ña̱yóʼo náʼa̱ña ña̱ ndáyáʼviní táxi̱n koo iniyó ta na̱ʼa̱yó ña̱ kándíxayó Jehová. Tá ná kaʼviún xa̱ʼa̱ na̱ ke̱ʼé ña̱ va̱ʼa, koto ndáaña kúú ña̱ chi̱ndeétáʼan xíʼinna ña̱ va̱ʼa táxi̱n ni̱xi̱yo inina tá xi̱sasina nu̱úna ña̱ ndasakáʼnuna Jehová. Tá kúú, tá ni̱ka̱ʼa̱n na̱ chíñu xíʼin na̱ apóstol ña̱ va̱ása natúʼunkana xíʼin na̱ yiví xa̱ʼa̱ Ndióxi̱, va̱ása níyi̱ʼvína kunina na̱yóʼo. Nu̱úka ña̱ keʼéna ña̱yóʼo ndakú ni̱xi̱yo inina ta̱ ni̱ka̱ʼa̱nna: “Xíniñúʼu kuniso̱ʼondi̱ ña̱ káʼa̱n Ndióxi̱ chi ta̱yóʼo kúú ta̱ xáʼndachíñu nu̱úndi̱ nu̱úka ña̱ kuniso̱ʼondi̱ ña̱ káʼa̱n na̱ yiví” (Hech. 5:29). Ni ka̱ninana va̱ása níyi̱ʼvína. ¿Nda̱chun? Saáchi xi̱kunda̱a̱-inina ña̱ xi̱kusi̱í-ini Jehová xíʼin ña̱ xi̱keʼéna, ta íyora ña̱ chindeétáʼanra xíʼinna. Ña̱kán nda̱kundeéna na̱túʼunna xíʼin na̱ yiví xa̱ʼa̱ Ndióxi̱ (Hech. 5:40-42). Ta saátu íyo ña̱ ke̱ʼé ta̱ discípulo Esteban, ni xi̱kunda̱a̱-inira ña̱ si̱lóʼo kúma̱ní ta kaʼnínara va̱ása nína̱ʼa̱ra ña̱ ndíʼi̱-inira ta táxi̱n ni̱xi̱yo inira, ta nu̱úra “ndu̱uña táki̱ʼva káa nu̱ú iin ángel” (Hech. 6:12-15). ¿Nda̱chun? Saáchi xi̱kunda̱a̱-inira ña̱ xi̱kusi̱í-ini Jehová xíʼin ña̱ xi̱keʼéra.

12. Nda̱a̱ táki̱ʼva káchi 1 Pedro 3:14 xíʼin 4:14, ¿nda̱chun kivi kusi̱í-iniyó ni sásina nu̱úyó ña̱ ndasakáʼnuyó Ndióxi̱?

¹² Na̱ apóstol xi̱kunda̱a̱-inina ña̱ xi̱chindeétáʼan Jehová xíʼinna, saáchi ta̱xira ndee̱ ndaʼa̱na ña̱ va̱ʼa ke̱ʼéna milagro (Hech. 5:12-16; 6:8). Tiempo vitin va̱ása táxika Jehová ndee̱ ndaʼa̱yó ña̱ keʼéyó milagro, soo nu̱ú tu̱ʼunra káʼa̱nra xíʼinyó ña̱ taxira espíritu santora ndaʼa̱yó tá sásina nu̱úyó ña̱ ndasakáʼnuyóra, ta kusi̱í-inira xíʼin ña̱ kéʼéyó (kaʼvi 1 Pedro 3:14; * 4:14). * Ña̱kán, nu̱úka ña̱ ndakaniníxi̱níyó ndáaña keʼéyó chí nu̱únínu tá ná ixandi̱va̱ʼana xíʼinyó, va̱ʼaka ná ndakanixi̱níyó ndáaña kivi keʼéyó vitin ña̱ va̱ʼa kandíxakayó ña̱ chindeétáʼan Jehová xíʼinyó, ta sakǎkura miíyó. Ná keʼéyó nda̱a̱ táki̱ʼva ke̱ʼé na̱ discípulo, ta ná ndakaʼányó xa̱ʼa̱ ña̱ ni̱ka̱ʼa̱n ta̱ Jesús: “Saáchi yi̱ʼi̱ taxi tu̱ʼun ña̱ ka̱ʼa̱nndó ta taxii̱ ña̱ ndíchi ndaʼa̱ndó ta ndiʼi na̱ sáa̱-ini xíni ndóʼó kǒo ni̱ʼína ndáaña ndakuiinna”. Ta saátu ni̱ka̱ʼa̱nra  ña̱yóʼo: “Tá ná kundeé-inindó saá kúú ña̱ ka̱kundó” (Luc. 21:12-19). Ta ná ndakaʼányó, tá xíʼi̱ iin na̱ nda̱kú ni̱xi̱yo ini xíʼin Jehová ndákaʼánra ndáa ki̱ʼva ni̱xi̱yona ta sandátakurana.

13. ¿Ndáaña va̱ʼa ndakiʼinyó tá ná kaʼviyó xa̱ʼa̱ na̱ va̱ása táxi̱n níxi̱yo ini ta va̱ása níkandíxana Jehová?

¹³ Ta saátu kivi sakuaʼayó xíʼin ña̱ va̱ása va̱ʼa ke̱ʼé savana, saáchi va̱ása táxi̱n níxi̱yo inina ta ni va̱ása níkandíxana Jehová. Tá ná kaʼviyó xa̱ʼa̱ na̱yóʼo chindeétáʼanña xíʼinyó ña̱ va̱ása keʼéyó táʼan ña̱ ke̱ʼéna. Tá kúú tá ki̱xáʼa xáʼndachíñu ta̱ rey Asá nu̱ú na̱ ñuu Judá, ka̱ndíxara Jehová tá ka̱nitáʼanna xíʼin ku̱a̱ʼání na̱ soldado, ta xa̱ʼa̱ ña̱yóʼo ta̱xi Jehová bendición ndaʼa̱na ta ku̱chiñuna ka̱nitáʼanna xíʼinna (2 Crón. 14:9-12). Tá ni̱ya̱ʼa tiempo, ta̱ rey Baasá ta̱ xi̱xaʼndachíñu nu̱ú na̱ ñuu Israel, ni̱xa̱a̱ra xíʼin na̱ soldado ña̱ va̱ʼa kanitáʼanra xíʼin ta̱ Asá. Ni loʼoníva xi̱kuu na̱yóʼo, soo va̱ása níka̱ʼa̱n ta̱ Asá xíʼin Jehová ña̱ ná chindeétáʼanra xíʼinra nda̱a̱ táki̱ʼva ke̱ʼéra tá ya̱chi̱, nu̱úka ña̱ keʼéra ña̱yóʼo cha̱ʼvira na̱ ñuu Siria ña̱ va̱ʼa ná chindeétáʼanna xíʼinra (2 Crón. 16:1-3). Ta saátu tá ndeéní ndo̱ʼora ta si̱lóʼo kúma̱ní kuvira, va̱ása níka̱ʼa̱nra xíʼin Jehová ña̱ chindeétáʼanra xíʼinra (2 Crón. 16:12).

14. ¿Ndáaña kivi sakuaʼayó xíʼin ña̱ va̱ása va̱ʼa ke̱ʼé ta̱ Asá?

¹⁴ Tá xa̱ʼa̱ ta̱ Asá xi̱ka̱ʼa̱nra xíʼin Jehová ña̱ ná chindeétáʼanra xíʼinra tá ni̱xi̱yo tu̱ndóʼo nu̱úra. Soo tá ni̱ya̱ʼa tiempo va̱ása níka̱ʼa̱nkara xíʼin Jehová ña̱ chindeétáʼanra xíʼinra, ta ki̱xáʼara kéʼéra ña̱ kúni̱ miíra. Ta̱ Asá nda̱kanixi̱níra ña̱ iin ña̱ va̱ʼava kúú ña̱ ka̱ʼa̱nra xíʼin na̱ ñuu Siria ña̱ ná chindeétáʼanna xíʼinra ña̱ kanitáʼanra xíʼin na̱ ñuu Israel. Soo va̱ása va̱ʼa níkana ña̱ nda̱kaxinra ke̱ʼéra. Jehová xi̱niñúʼura iin profeta ña̱ va̱ʼa ka̱ʼa̱nra ña̱yóʼo xíʼinra: “Xa̱ʼa̱ ña̱ ka̱ndíxaún ta̱ rey ñuu Siria ta va̱ása níkandíxaún Jehová Ndióxi̱ miíún, va̱ása kivika kanitáʼún xíʼin na̱ soldado ta̱ rey ñuu Siria” (2 Crón. 16:7). Ta saátu miíyó xíniñúʼu kiʼinyó kuenta ña̱ va̱ása ndakanixi̱níyó ña̱ xa̱a̱ xíni̱níyó keʼéyó iin ña̱ʼa, ta xa̱ʼa̱ ña̱yóʼo va̱ása ka̱ʼa̱nyó xíʼin Jehová ña̱ chindeétáʼanra xíʼinyó. Sava yichi̱ tá yáʼayó nu̱ú iin tu̱ndóʼo xíniñúʼu kamaní ndaka̱xinyó ndáaña keʼéyó. Soo ni saá, tá táxi̱n ná koo iniyó ta kandíxayó Jehová, vií kana ña̱ ndaka̱xinyó keʼéyó.

15. ¿Ndáaña kivi keʼéyó tá káʼviyó Biblia?

¹⁵ 4) Sakuaʼa xíʼin xi̱níún versículo ña̱ va̱xi nu̱ú Biblia. Tá káʼviún Biblia ta ndáni̱ʼún versículo ña̱ káʼa̱n xa̱ʼa̱ ña̱ ndáyáʼviní táxi̱n koo iniyó ta kandíxayó Jehová, chika̱a̱ ndee̱ ña̱ sakuaʼa xíʼin xi̱níún versículo yóʼo. Kivi ndeé kaʼviúnña á kaʼyíúnña nu̱ú iin tutu, tasaá kivi ndikóún kaʼviúnña inka ki̱vi̱. Jehová ni̱ka̱ʼa̱nra xíʼin ta̱ Josué ña̱ ná kaʼvira libro ña̱ Ley, ta ñuú xíʼin káʼñu ná ndakanixi̱níra xa̱ʼa̱ña, tasaá ndíchi xa̱a̱ra koora ta vií keʼéra ndiʼi ña̱ʼa. Ta ña̱ xi̱kaʼvira xi̱chindeétáʼanña xíʼinra ña̱ va̱ása yi̱ʼvíra ta ndakú koo inira ña̱ va̱ʼa kuniʼira yichi̱ nu̱ú na̱ ñuu Ndióxi̱ (Jos. 1:8, 9). Nu̱ú tu̱ʼun Ndióxi̱ ndáni̱ʼíyó ku̱a̱ʼání ña̱ kivi chindeétáʼan xíʼinyó ña̱ táxi̱n koo iniyó tá yáʼayó nu̱ú tu̱ndóʼo ña̱ kivi sáyíʼvi miíyó á sándi̱ʼi̱-iniyó (Sal. 27:1-3; Prov. 3:25, 26).

16. ¿Ndáa ki̱ʼva xíniñúʼu Jehová na̱ congregación ña̱ va̱ʼa chindeétáʼanra xíʼinyó ña̱ táxi̱n koo iniyó ta kandíxakayóra?

¹⁶ 5) Tavá tiempo ña̱ kutáʼún xíʼin na̱ hermano. Jehová xíniñúʼura na̱yóʼo ña̱ va̱ʼa chindeétáʼanra xíʼinyó ña̱ táxi̱n koo iniyó ta kandíxakayóra. Ti̱xin reunión ku̱a̱ʼání ña̱ va̱ʼa ndákiʼinyó xíʼin ña̱ sánáʼa̱na nu̱ú plataforma, comentario ña̱ táxi na̱ hermano ta saátu ña̱ nátúʼunyó xíʼinna (Heb. 10:24, 25). Tá ná natúʼunyó xa̱ʼa̱ ña̱ ndóʼoyó xíʼin na̱ migoyó na̱ íyo ti̱xin congregación, kivi chika̱a̱na ndee̱  xíʼinyó. Saáchi, “tu̱ʼun va̱ʼa” ña̱ káʼa̱n na̱ migoyó xíʼinyó chíndeéníña miíyó, tasaá va̱ása ndi̱ʼi̱níka-iniyó (Prov. 12:25).

17. Nda̱a̱ táki̱ʼva káchi Hebreos 6:19, tá ná ndakanixi̱níyó xa̱ʼa̱ ña̱ ndakiʼinyó chí nu̱únínu, ¿ndáa ki̱ʼva chíndeétáʼanña xíʼinyó ni yáʼayó nu̱ú tu̱ndóʼo?

¹⁷ 6) Ndakanixi̱ní xa̱ʼa̱ ña̱ ndakiʼún chí nu̱únínu. Ña̱ taxi Reino Ndióxi̱ ndaʼa̱yó íyoña “nda̱a̱ táki̱ʼva íyo iin ka̱a ña̱ tíin tú barco”, ta ña̱yóʼo chíndeétáʼanña xíʼinyó ña̱ táxi̱n koo iniyó ni íyoní tu̱ndóʼo nu̱úyó á ña̱ sándi̱ʼi̱-iniyó (kaʼvi Hebreos 6:19). * Ndakanixi̱ní xa̱ʼa̱ ña̱ káʼa̱n Jehová taxira ndaʼa̱yó chí nu̱únínu, chi tiempo saá va̱ása ndi̱ʼi̱ka-iniyó xa̱ʼa̱ nda̱a̱ ni iin ña̱ʼa (Is. 65:17). Ndakanixi̱ní ña̱ xa̱a̱ íyoún nu̱ú ñuyǐví xa̱á ta táxi̱n íyo iniún, ta kǒoka ña̱ va̱ása va̱ʼa íyo (Miq. 4:4). Inka ña̱ kivi keʼún kúú ña̱ natúʼún xíʼin inkana xa̱ʼa̱ ña̱ ndátún ndakiʼún chí nu̱únínu, tasaá va̱ása nandósó-iniún xa̱ʼa̱ña. Ña̱kán, chika̱a̱ ndee̱ ña̱ natúʼún xíʼin na̱ yiví xa̱ʼa̱ Ndióxi̱ tasaá xa̱a̱na koona discípulo ta̱ Jesús. Tá ná keʼún ña̱yóʼo va̱ása kaka-iniún ña̱ ndakiʼún ña̱ ndátún (Heb. 6:11).

18. ¿Ndáaña ndátuyó kuu chí nu̱únínu, ta ndáaña chindeétáʼan xíʼinyó ña̱ kundeé-iniyó nu̱ú ña̱yóʼo?

¹⁸ Tá kúyatinka tiempo ña̱ ndiʼi-xa̱ʼa̱ ñuyǐví yóʼo, kooníka tu̱ndóʼo nu̱úyó ta kooníka ña̱ sandíʼi̱-iniyó. Texto ña̱ ku̱i̱ya̱ 2021 sándakaʼánña miíyó ndáaña kúú ña̱ chindeétáʼan xíʼinyó tá yáʼayó nu̱ú tu̱ndóʼo ta táxi̱n koo iniyó, ña̱yóʼo kúú ña̱ kandíxayó Jehová ta su̱ví ndee̱ miíyó. Ku̱i̱ya̱ vitin ndiʼiyó ná na̱ʼa̱yó xíʼin ña̱ kéʼéyó ña̱ kándíxayó ña̱ ni̱ka̱ʼa̱n Jehová: “Xa̱a̱ndó ndakú koo inindó tá kándíxandó yi̱ʼi̱ ta táxi̱n íyo inindó” (Is. 30:15).