ARTÍCULO ÑA̱ KAʼVIYÓ 4
¿Nda̱chun xáʼa̱nyó Conmemoración?
“Kǒo sandákoondó keʼéndó ña̱yóʼo” (LUC. 22:19).
YAA 20 Se̱ʼún ta̱ kúni̱níún xíniún ta̱xiún
ÑA̱ KA̱ʼA̱NYÓ XA̱ʼA̱ *
1, 2. a) ¿Ama kúú ña̱ ndákaʼánníkayó xa̱ʼa̱ na̱ táʼanyó na̱ ni̱xi̱ʼi̱? b) ¿Ndáa chiñu xa̱ʼnda ta̱ Jesús nu̱ú na̱ discípulora ñuú tá kúma̱ní kuvira?
NI XA̱A̱ ni̱ya̱ʼa ku̱a̱ʼání ku̱i̱ya̱ ni̱xi̱ʼi̱ iin na̱ veʼeyó, soo ndákaʼánkavayó xa̱ʼa̱na. Ta ndákaʼánníkayó xa̱ʼa̱na tá xínu ku̱i̱ya̱ ña̱ ni̱xi̱ʼi̱na.
2 Ku̱a̱ʼání miíyó na̱ ndásakáʼnu Jehová, ndiʼi ku̱i̱ya̱ ndákutáʼanyó ña̱ va̱ʼa ndakaʼányó xa̱ʼa̱ ña̱ ni̱xi̱ʼi̱ ta̱ Jesús (1 Ped. 1:8). Ta ndákaʼányó xa̱ʼa̱ra saáchi nda̱tavára miíyó ndaʼa̱ ku̱a̱chi, ta kivi kutakuyó ndiʼi tiempo (Mat. 20:28). Ta̱ Jesús xi̱kuni̱ra ña̱ ná ndakaʼán na̱ discípulora xa̱ʼa̱ra tá ná kuvira. Ña̱kán, ñuú tá kúma̱ní kuvira, xi̱xira xíʼinna ta xa̱ʼndara chiñu yóʼo nu̱úna: “Kǒo sandákoondó keʼéndó ña̱yóʼo” (Luc. 22:19).
3. ¿Ndáaña sakúaʼayó nu̱ú artículo yóʼo?
3 Ku̱a̱ʼání kúú na̱ yiví na̱ xáʼa̱n Conmemoración. Ta ku̱a̱ʼání na̱yóʼo na̱ ndátu koo nu̱ú ñuʼú yóʼova kúúna, soo na̱ ku̱ʼu̱n chí ndiví loʼova kúúna xáʼa̱n. Nu̱ú artículo yóʼo sakúaʼayó nda̱chun xáʼa̱n u̱vi̱ saá tiʼvi na̱ yiví yóʼo Conmemoración ku̱i̱ya̱ tá ku̱i̱ya̱. Ta saátu sakúaʼayó ndáaña va̱ʼa ndákiʼinyó tá xáʼa̱nyó. Siʼna ná ka̱ʼa̱nyó nda̱chun xáʼa̱n na̱ ku̱ʼu̱n chí ndiví.
¿NDA̱CHUN XÁʼA̱N NA̱ KU̱ʼU̱N CHÍ NDIVÍ CONMEMORACIÓN?
4. ¿Nda̱chun va̱ʼa xíxi na̱ ku̱ʼu̱n chí ndiví si̱táva̱ʼa ta xíʼina tá vino tá xíyo Conmemoración?
4 Na̱ ku̱ʼu̱n chí ndiví xáʼa̱nna Conmemoración ku̱i̱ya̱ tá ku̱i̱ya̱ ña̱ va̱ʼa kuxuna si̱táva̱ʼa ta koʼona tá vino. ¿Nda̱chun va̱ʼa kéʼéna ña̱yóʼo? Ña̱ va̱ʼa kunda̱a̱-iniyó xa̱ʼa̱ña, ná ndakaʼányó xa̱ʼa̱ ña̱ ke̱ʼé ta̱ Jesús ñuú tá kúma̱ní kuvira tá ke̱ʼéra ña̱ Pascua. Sa̱yáʼara si̱táva̱ʼa xíʼin tá vino ndaʼa̱ na̱ u̱xu̱ iin apóstolra, ta ni̱ka̱ʼa̱nra xíʼinna ña̱ ná kuxunaña ta koʼona tá vino. Ta saátu ni̱ka̱ʼa̱nra xíʼinna ña̱ ná kǒo sandákoona keʼéna ña̱yóʼo. Ta ni̱ka̱ʼa̱nra xa̱ʼa̱ u̱vi̱ trato xíʼinna: iinña kúú trato xa̱á, ta inkaña kúú trato xa̱ʼa̱ Reino Ndióxi̱ (Luc. 22:19, 20, 28-30). * Ta xa̱ʼa̱ ña̱ ke̱ʼéra trato yóʼo xíʼinna, miína xíʼin inkaka na̱ cristiano va̱ʼa ni̱xa̱a̱na ku̱una rey xíʼinra chí ndiví, ta ku̱utuna su̱tu̱ (Apoc. 5:10; 14:1). Ta saátu na̱ nda̱kaxin Ndióxi̱ na̱ ndóo tiempo vitin ke̱ʼéra trato yóʼo xíʼinna, ña̱kán va̱ʼa xíxina si̱táva̱ʼa ta xíʼina tá vino tá xáʼa̱nna Conmemoración.
5. ¿Ndáaña kúnda̱a̱-ini na̱ ku̱ʼu̱n chí ndiví xa̱ʼa̱ ña̱ ndakiʼinna?
5 Ta saátu xáʼa̱nna Conmemoración saáchi ña̱yóʼo chíndeétáʼanña xíʼinna ña̱ ndakanixi̱nína xa̱ʼa̱ ña̱ ndátuna ndakiʼinna chí nu̱únínu. Liviní ña̱ taxi Jehová ndaʼa̱na: na̱yóʼo va̱ása kuvikana ta koona chí ndiví, ta saátu inkáchi kachíñuna xíʼin ta̱ Jesucristo ta saátu xíʼin inkaka na̱ 144,000. Ta mií ña̱ ndáyáʼvi va̱ʼaka kúú ña̱ koona yatin xíʼin Jehová (1 Cor. 15:51-53; 1 Juan 3:2). Kúnda̱a̱-inina ña̱ va̱ʼaní ña̱ taxi Jehová ndaʼa̱na. Soo ña̱ va̱ʼa ndakiʼinna ña̱yóʼo, xíniñúʼu nda̱kú koo inina xíʼinra nda̱a̱ ná kuvina (2 Tim. 4:7, 8). Ta saátu kúsi̱íní-inina tá ndákanixi̱nína xa̱ʼa̱ ña̱ ndátuna ndakiʼinna (Tito 2:13). Soo na̱ ndátu koo nu̱ú ñuʼú yóʼo, ¿nda̱chun xáʼa̱nna Conmemoración? Ná kotoyó nda̱chun xáʼa̱nna (Juan 10:16).
¿NDA̱CHUN XÁʼA̱N NA̱ NDÁTU KOO NU̱Ú ÑUʼÚ YÓʼO CONMEMORACIÓN?
6. ¿Nda̱chun ndiʼi ku̱i̱ya̱ xáʼa̱n na̱ ndátu koo nu̱ú ñuʼú yóʼo Conmemoración?
6 Tá xáʼa̱n na̱ ndátu kundoo nu̱ú ñuʼú yóʼo Conmemoración, va̱ása xíxina si̱táva̱ʼa ta ni va̱ása xíʼinna tá vino, saáchi na̱ xáʼa̱n xíto kuitíva kúúna. Tá ku̱i̱ya̱ 1938 saá kúú ña̱ ki̱xáʼa na̱ ndátu koo nu̱ú ñuʼú yóʼo xáʼa̱nna Conmemoración. Tutu La Torre del Vigía, ña̱ ka̱na tá abril ña̱ ku̱i̱ya̱ 1938, ni̱ka̱ʼa̱nña ña̱ “xíniñúʼu ku̱ʼu̱nvana Conmemoración ña̱ va̱ʼa kotona ña̱ kúu”. Ta ni̱ka̱ʼa̱nkaña: “Iin ki̱vi̱ ña̱ si̱íní xíniñúʼu kootuña nu̱ú na̱yóʼova”. Ta nda̱a̱ táki̱ʼva kéʼé iin na̱ ku̱a̱ʼa̱n vikó tíndaʼa̱, kúsi̱í-inina ku̱a̱ʼa̱nna kotonde̱ʼéna, saátu na̱ ndátu koo nu̱ú ñuʼú yóʼo, kúsi̱í-inina ku̱a̱ʼa̱nna kotona ña̱ koo ti̱xin Conmemoración.
7. ¿Nda̱chun kúsi̱íní-ini na̱ ndátu koo nu̱ú ñuʼú yóʼo tá xíniso̱ʼona discurso ña̱ táxina ti̱xin Conmemoración?
7 Saátu na̱ ndátu koo nu̱ú ñuʼú yóʼo ndákanixi̱nína xa̱ʼa̱ ña̱ ndátuna ndakiʼinna chí nu̱únínu. Ta saátu kúsi̱íní-inina tá xíniso̱ʼona discurso ña̱ táxina ti̱xin Conmemoración, saáchi ña̱ discurso yóʼo káʼa̱nña xa̱ʼa̱ ña̱ keʼé ta̱ Cristo ta saátu na̱ 144,000 xa̱ʼa̱ na̱ yiví tá ná kaʼndachíñuna ti̱xin ña̱ mil ku̱i̱ya̱. Ta̱ Jesús kúú ta̱ kuniʼi yichi̱ nu̱ú na̱ 144,000 ña̱ va̱ʼa ndasalivina nu̱ú ñuʼú yóʼo, ta saátu ña̱ va̱ʼa chindeétáʼanna xíʼin na̱ yiví ña̱ va̱ása kuumiíkana ku̱a̱chi. Na̱ ndátu koo nu̱ú ñuʼú yóʼo kúsi̱íní-inina tá ndákanixi̱nína xa̱ʼa̱ ki̱vi̱ ña̱ xi̱nu profecía ña̱ va̱xi nu̱ú Isaías 35:5, 6; 65:21-23 xíʼin Apocalipsis 21:3, 4. Tá ndákanixi̱nína ña̱ xa̱a̱ ndóona nu̱ú ñuʼú livi xíʼin na̱ veʼena, saá kúú ña̱ kándíxaníkana ña̱ saxínu Jehová ña̱ káʼa̱nra keʼéra xa̱ʼa̱na, ta saátu chíka̱a̱-inina ña̱ ndakundeéna kachíñuna nu̱úra (Mat. 24:13; Gál. 6:9).
8. ¿Nda̱chun xáʼa̱n na̱ ndátu koo nu̱ú ñúʼu yóʼo Conmemoración?
8 Na̱ ndátu koo nu̱ú ñuʼú yóʼo xáʼa̱nna Conmemoración saáchi kúʼvi̱-inina xínina na̱ ku̱ʼu̱n chí ndiví, ta saátu kúni̱na chindeétáʼanna xíʼinna. Tu̱ʼun Ndióxi̱ ni̱ka̱ʼa̱nña ña̱ na̱ ku̱ʼu̱n chí ndiví ta saátu na̱ kundoo nu̱ú ñúʼu yóʼo viíní kutáʼanna. Ná ka̱ʼa̱nyó xa̱ʼa̱ sava profecía ña̱ káʼa̱n xa̱ʼa̱ ña̱yóʼo.
9. Nda̱a̱ táki̱ʼva káchi Zacarías 8:23, ¿ndáa ki̱ʼva kítáʼan na̱ ndátu koo nu̱ú ñuʼú yóʼo xíʼin na̱ ku̱ʼu̱n chí ndiví?
9 (Kaʼvi Zacarías 8:23). Profecía yóʼo káʼa̱nña ña̱ viíní kutáʼan na̱ ndátu koo nu̱ú ñuʼú yóʼo xíʼin na̱ ku̱ʼu̱n chí ndiví. Tá káʼa̱nña xa̱ʼa̱ “iin ta̱ judío” ta saátu tá káʼa̱nña “kúni̱ndi̱ ku̱ʼu̱nndi̱ xíʼinndó”, xa̱ʼa̱ na̱ ku̱ʼu̱n chí ndiví na̱ kíndo̱oka nu̱ú ñuʼú yóʼo káʼa̱nña (Rom. 2:28, 29). Tá káʼa̱nña xa̱ʼa̱ “u̱xu̱ na̱ ta̱a na̱ káʼa̱n xa̱a̱ síín síín tu̱ʼun”, xa̱ʼa̱ na̱ ndátu koo nu̱ú ñuʼú yóʼo káʼa̱nña. Ta na̱yóʼo kútu̱ní tíinna ti̱ko̱to̱ na̱ ku̱ʼu̱n chí ndiví, ña̱yóʼo kúni̱ kachiña ña̱ nda̱kúní-inina xíʼinna, ta inkáchi ndásakáʼnuna Jehová xíʼinna. Ña̱kán, tá xáʼa̱n na̱ ndátu koo nu̱ú ñuʼú yóʼo Conmemoración, saá náʼa̱na ña̱ viíní kítáʼanna xíʼin na̱ ku̱ʼu̱n chí ndiví.
10. ¿Ndáaña xa̱a̱ kéʼé Jehová ña̱ va̱ʼa xi̱nu profecía ña̱ va̱xi nu̱ú Ezequiel 37:15-19, 24, 25?
10 (Kaʼvi Ezequiel 37:15-19, * 24, 25). * Xa̱a̱ sáxi̱nu Jehová profecía yóʼo, saáchi chíndeétáʼanra xíʼin na̱ ku̱ʼu̱n chí ndiví ña̱ inkáchi kachíñuna xíʼin na̱ ndátu koo nu̱ú ñuʼú yóʼo. Profecía yóʼo káʼa̱nña xa̱ʼa̱ u̱vi̱ yitu̱n. Na̱ ku̱ʼu̱n chí ndiví íyona nda̱a̱ táki̱ʼva íyo yitu̱n tú “kuenta ta̱ Judá”, (ti̱xin tribu yóʼo xi̱ndaka̱xinna na̱ xi̱kuu rey ti̱xin ñuu Israel). Ta na̱ ndátu koo nu̱ú ñuʼú yóʼo, íyona nda̱a̱ táki̱ʼva íyo yitu̱n tú “kuenta ta̱ Efraín”. * Mií Jehová ndachitáʼan u̱vi̱ saá na̱yóʼo ña̱ va̱ʼa xa̱a̱na nduuna “iinlá yitu̱n”. Ña̱yóʼo kúni̱ kachiña, ña̱ inkáchi kachíñuna nu̱ú ta̱ Cristo Jesús ta kúú rey nu̱úna. Ña̱kán, na̱ ku̱ʼu̱n chí ndiví ta saátu na̱ ndátu koo nu̱ú ñuʼú yóʼo, inkáchi xáʼa̱nna Conmemoración ku̱i̱ya̱ tá ku̱i̱ya̱, nda̱a̱ táki̱ʼva káchi Juan 10:16: “Iin ndakutáʼan ndiʼirí ta iinlá nduu pastor tíyóʼo”.
11. ¿Ndáa ki̱ʼva chíndeétáʼan na̱ kúú “ndikachi” xíʼin na̱ ku̱ʼu̱n chí ndiví? (Mateo 25:31-36, 40).
11 (Kaʼvi Mateo 25:31-36, 40). Tí “ndikachi” tí káʼa̱n parábola yóʼo xa̱ʼa̱ kúú na̱ yiví na̱ va̱ʼa-ini na̱ ndóo tiempo vitin, ta ndátuna kutakuna ndiʼi tiempo nu̱ú ñuʼú yóʼo, ta na̱yóʼo kúútu na̱ inkaka ndikachi. Ta nda̱kúní-inina xíʼin na̱ ku̱ʼu̱n chí ndiví, saáchi chíndeétáʼanna xíʼinna ña̱ natúʼunna xíʼin na̱ yiví iníísaá nu̱ú ñuʼú ta sánáʼa̱nana xa̱ʼa̱ Ndióxi̱ (Mat. 24:14; 28:19, 20).
12, 13. ¿Ndáa ki̱ʼva chíndeétáʼan na̱ kundoo nu̱ú ñuʼú yóʼo xíʼin na̱ ku̱ʼu̱n chí ndiví?
12 Ndiʼi ku̱i̱ya̱ tá kúma̱ní koo Conmemoración, na̱ ndátu koo nu̱ú yóʼo chíndeétáʼanna xíʼin na̱ ku̱ʼu̱n chí ndiví. ¿Ndáa ki̱ʼva kéʼéna ña̱yóʼo? Kéʼéna iin campaña ña̱ va̱ʼa kanana na̱ yiví ña̱ ku̱ʼu̱nna Conmemoración (koto recuadro ña̱ naní “ ¿Ndáaña xíniñúʼu keʼún ña̱ va̱ʼa koo tu̱ʼvaún tá ná kixaa̱ Conmemoración?”). Ndiʼi congregación ña̱ íyo iníísaá nu̱ú ñuʼú, kéʼéna Conmemoración ndiʼi ku̱i̱ya̱ ni kǒoví na̱ ku̱ʼu̱n chí ndiví íyo ti̱xin congregaciónna. Na̱ ndátu koo nu̱ú ñuʼú yóʼo kúsi̱íní-inina xa̱ʼa̱ ña̱ chíndeétáʼanna xíʼin na̱ ku̱ʼu̱n chí ndiví. Ta kúnda̱a̱-inina ña̱ tá chíndeétáʼanna xíʼin na̱yóʼo, táki̱ʼva íyo na̱ chíndeétáʼan xíʼin ta̱ Jesús saá íyona (Mat. 25:37-40).
13 ¿Nda̱chun ndiʼiyó xíniñúʼu ku̱ʼu̱n Conmemoración, ni kúúyó na̱ kundoo nu̱ú ñuʼú yóʼo á na̱ kundoo chí ndiví?
¿NDA̱CHUN NDIʼIYÓ XÁʼA̱N CONMEMORACIÓN?
14. ¿Ndáa ki̱ʼva ni̱na̱ʼa̱ Jehová xíʼin ta̱ Jesús ña̱ kúʼvi̱-inina xínina miíyó?
14 Chi saá náʼa̱yó ña̱ táxiníyó tíxa̱ʼvi ndaʼa̱ Jehová xíʼin ta̱ Jesús xa̱ʼa̱ ña̱ kúʼvi̱-inina xínina miíyó. Xa̱a̱ ku̱a̱ʼání ki̱ʼva náʼa̱ Jehová ña̱ kúʼvi̱-inira xínira miíyó. Soo tá chi̱ndaʼára se̱ʼera ña̱ ki̱xira ni̱xo̱ʼvi̱ra xa̱ʼa̱yó ta ni̱xi̱ʼi̱ra, saá kúú ña̱ ni̱na̱ʼa̱ra ña̱ ndixaní kúʼvi̱-inira xínira miíyó (Juan 3:16). Ta saátu ta̱ Jesús ni̱na̱ʼa̱ra ña̱ kúʼvi̱-inira xínira miíyó saáchi ni̱xi̱ʼi̱ra xa̱ʼa̱yó (Juan 15:13). Ña̱ nda̱a̱ kúúña va̱ása kuchiñuvíyó chaʼviyó Jehová xíʼin ta̱ Jesús xa̱ʼa̱ ndiʼi ña̱ xa̱a̱ kéʼéna xa̱ʼa̱yó, soo kiviva na̱ʼa̱yó ña̱ táxiyó tíxa̱ʼvi ndaʼa̱na tá ná chika̱a̱yó ndee̱ ña̱ vií koo ndiʼi ña̱ kéʼéyó (Col. 3:15). Tá xáʼa̱nyó Conmemoración, saá kúú ña̱ náʼa̱yó ña̱ táxiyó tíxa̱ʼvi ndaʼa̱na xa̱ʼa̱ ña̱ kúʼvi̱-inina xínina miíyó, ta saátu náʼa̱yó nu̱úna ña̱ kúʼvi̱-iniyó xíniyóna.
15. Na̱ ndátu koo nu̱ú ñuʼú yóʼo xíʼin na̱ ku̱ʼu̱n chí ndiví, ¿nda̱chun táxinína tíxa̱ʼvi ndaʼa̱ Jehová xa̱ʼa̱ ña̱ nda̱chaʼvira xa̱ʼa̱na?
15 Saáchi táxiníyó tíxa̱ʼvi xa̱ʼa̱ ña̱ nda̱chaʼvi Jehová xa̱ʼa̱yó (Mat. 20:28). Na̱ ku̱ʼu̱n chí ndiví, chíndayáʼvinína ña̱ nda̱chaʼvi Jehová xa̱ʼa̱na saáchi xa̱ʼa̱ ña̱yóʼo kivi ku̱ʼu̱nna koona chí ndiví. Ta saátu xa̱ʼa̱ ña̱ kándíxana ña̱ ni̱xi̱ʼi̱ ta̱ Cristo, ni̱xa̱a̱na ndu̱una na̱ yiví na̱ nda̱kú-ini nu̱ú Ndióxi̱ ta ndu̱una se̱ʼera (Rom. 5:1; 8:15-17, 23). Ta saátu na̱ ndátu koo nu̱ú ñuʼú yóʼo chíndayáʼvinína ña̱ nda̱chaʼvi Jehová xa̱ʼa̱na, saáchi tíxa̱ʼvi ña̱ ni̱xa̱a̱na ka̱ndíxana ña̱ ni̱xi̱ʼi̱ ta̱ Cristo xa̱ʼa̱na, kíndo̱o-ini Jehová xíʼin ña̱ kéʼéna, va̱ʼa káchíñuna nu̱úra ta saátu kivi ka̱kuna ti̱xin ña̱ gran tribulación (Apoc. 7:13-15). Tá xáʼa̱n na̱ ku̱ʼu̱n chí ndiví xíʼin na̱ ndátu koo nu̱ú ñuʼú yóʼo Conmemoración, saá náʼa̱na ña̱ táxina tíxa̱ʼvi xa̱ʼa̱ ña̱ nda̱chaʼvi Jehová xa̱ʼa̱na.
16. ¿Nda̱chun xáʼa̱nyó Conmemoración?
16 Saáchi kúni̱yó kuniso̱ʼoyó ña̱ ni̱ka̱ʼa̱n ta̱ Jesús. Ni kúúyó na̱ ku̱ʼu̱n chí ndiví á na̱ kundoo nu̱ú ñuʼú yóʼo, ndiʼiyó kúni̱yó keʼéyó ña̱ ni̱ka̱ʼa̱n ta̱ Jesús xíʼin na̱ apóstolra ñuú tá kúma̱ní kuvira, tá ka̱chira: “Kǒo sandákoondó keʼéndó ña̱yóʼo” (1 Cor. 11:23, 24).
¿NDÁAÑA VA̱ʼA NDÁKIʼIN NDIʼIYÓ TÁ XÁʼA̱NYÓ CONMEMORACIÓN?
17. ¿Nda̱chun kúyatinkayó nu̱ú Jehová tá xáʼa̱nyó Conmemoración?
17 Kúyatinkayó nu̱ú Jehová (Sant. 4:8). Nda̱a̱ táki̱ʼva xa̱a̱ ni̱ka̱ʼa̱nyó, ña̱ ku̱ʼu̱nyó Conmemoración chíndeétáʼanña xíʼinyó ndakanixi̱níyó xa̱ʼa̱ ña̱ káʼa̱n Jehová taxira ndaʼa̱yó chí nu̱únínu, ta saátu ña̱ ndakanixi̱níyó xa̱ʼa̱ ña̱ kúʼvi̱ní-inira xínira miíyó (Jer. 29:11; 1 Juan 4:8-10). Kándíxaníyó ña̱ saxínura ña̱ káʼa̱nra keʼéra ta saátu ña̱ ndiʼi tiempo kuʼvi̱-inira kunira miíyó. Tá ndákanixi̱níyó xa̱ʼa̱ ña̱yóʼo, saá kúú ña̱ kúʼvi̱níka-iniyó xíniyóra ta viíníka kítáʼanyó xíʼinra (Rom. 8:38, 39).
18. Tá ndákanixi̱níyó xa̱ʼa̱ ña̱ ke̱ʼé ta̱ Jesús, ¿ndáa ki̱ʼva chíndeétáʼanña xíʼinyó?
18 Chíndeétáʼanña xíʼinyó ña̱ kundiku̱nyó yichi̱ ta̱ Jesús (1 Ped. 2:21). Tá kúma̱ní koo Conmemoración saá káʼviyó xa̱ʼa̱ ña̱ ke̱ʼé ta̱ Jesús tá xa̱a̱ ku̱yatin kuvira, ta saátu káʼviyó xa̱ʼa̱ ña̱ ku̱u tá ni̱xi̱ʼi̱ra, xíʼin ña̱ ku̱u tá xa̱a̱ nda̱takura. Ta discurso ña̱ xíyo ti̱xin Conmemoración sándakaʼánña miíyó ña̱ kúʼvi̱ní-ini ta̱ Jesús xínira miíyó (Efes. 5:2; 1 Juan 3:16). Tá káʼviyó xa̱ʼa̱ ña̱ ke̱ʼé ta̱ Jesús ta saátu tá ndákanixi̱níyó xa̱ʼa̱ña, ña̱yóʼo chíndeétáʼanña xíʼinyó ña̱ kuni̱yó keʼéyó táʼan ña̱ ke̱ʼéra (1 Juan 2:6).
19. ¿Ndáaña xíniñúʼu keʼéyó ña̱ va̱ʼa chika̱a̱-iniyó viíka kutáʼanyó xíʼin Jehová?
19 Chíndeétáʼanña xíʼinyó ña̱ chika̱a̱-iniyó viíka kutáʼanyó xíʼin Jehová (Jud. 20, 21). Tá chíka̱a̱yó ndee̱ ña̱ kandíxayó ña̱ káʼa̱nra, ña̱ ndasakáʼnuyó ki̱vi̱ra ta sakúsi̱íyó-inira, saá kúú ña̱ va̱ʼaníka kutáʼanyó xíʼinra (Prov. 27:11; Mat. 6:9; 1 Juan 5:3). Ña̱ ku̱ʼu̱nyó Conmemoración chíndeétáʼanña xíʼinyó ña̱ chika̱a̱-iniyó vií koo ña̱ keʼéyó ndiʼi ki̱vi̱, ta ka̱ʼa̱nyó tu̱ʼun yóʼo xíʼin Jehová: “Kúni̱ vií kutáʼi̱n xíʼún ndiʼi tiempo”.
20. ¿Nda̱chun kúni̱yó ku̱ʼu̱nyó Conmemoración?
20 Ni kúúyó na̱ ku̱ʼu̱n chí ndiví á na̱ ndátu koo nu̱ú ñuʼú yóʼo, ndiʼiyó kúni̱yó ku̱ʼu̱nyó Conmemoración ku̱i̱ya̱ tá ku̱i̱ya̱. Tá ndákutáʼanyó ki̱vi̱ yóʼo, saá ndákaʼányó xa̱ʼa̱ iin na̱ kúni̱níyó: ta̱ Jesucristo. Ta saátu sándakaʼánña miíyó ña̱ ni̱kuʼvi̱ní-ini Jehová xi̱nira miíyó, saáchi ta̱xira se̱ʼera ña̱ va̱ʼa nda̱chaʼvira xa̱ʼa̱yó. Conmemoración ña̱ koo ku̱i̱ya̱ vitin, kooña ki̱vi̱ viernes 15 tí abril. Kúʼvi̱ní-iniyó xíniyó Jehová ta saátu se̱ʼera, xa̱ʼa̱ ña̱kán ná va̱ása taxiyó kasi nda̱a̱ ni iin ña̱ʼa nu̱úyó ña̱ va̱ʼa ku̱ʼu̱nyó ndakaʼányó xa̱ʼa̱ ña̱ ni̱xi̱ʼi̱ ta̱ Jesús.
YAA 16 Ná ndasakáʼnuyó Jehová xa̱ʼa se̱ʼera
^ Ni kúúyó na̱ ku̱ʼu̱n chí ndiví á na̱ kundoo nu̱ú ñuʼú yóʼo, ndiʼi ku̱i̱ya̱ kútóoníyó ku̱ʼu̱nyó Conmemoración. Nu̱ú artículo yóʼo sakúaʼayó nda̱chun xíniñúʼu ku̱ʼu̱nyó, ta ndáaña va̱ʼa ndákiʼinyó tá ku̱a̱ʼa̱nyó.
^ Kivi kunda̱a̱ka-iniún xa̱ʼa̱ trato ña̱ xa̱á ta saátu trato xa̱ʼa̱ Reino Ndióxi̱ tá ná kaʼviún artículo ña̱ naní “Llegarán a ser ‘un reino de sacerdotes’”, ña̱ ka̱na nu̱ú tutu La Atalaya 15 tí octubre ña̱ ku̱i̱ya̱ 2014, página 15 nda̱a̱ 17.
^ Ezequiel 37:15-19: “Ta ni̱ka̱ʼa̱n tuku Jehová xíʼi̱n: 16 ‘Se̱ʼe ta̱a, kiʼin iin yitu̱n ta ña̱yóʼo kaʼyíún sa̱tánú: “Tú kuenta ta̱ Judá xíʼin na̱ ñuu Israel na̱ kítáʼan xíʼinra”. Ta kiʼin inka yitu̱n ta ña̱yóʼo kaʼyíún sa̱tánú: “Tú kuenta ta̱ José á tú kuenta ta̱ Efraín, xíʼin ndiʼika na̱ ñuu Israel na̱ kítáʼan xíʼinra”. 17 Ta ndachitáʼúnnú ini ndaʼún ña̱ va̱ʼa ná xa̱a̱nú nduunú iinlá yitu̱n. 18 Tá ná nda̱ka̱tu̱ʼun na̱ ñuún yóʼó “¿Á va̱ása ka̱ʼún xíʼinndi̱ ndáaña kúni̱ kachi ña̱yóʼo?”, 19 ña̱yóʼo ka̱ʼún xíʼinna “Ña̱yóʼo kúú ña̱ káʼa̱n Jehová ta̱ káʼnu: ‘Kiʼi̱n yitu̱n ta̱ José á tú kuenta ta̱ Efraín, xíʼin ndiʼika na̱ tribu na̱ kítáʼan xíʼinra ta ndachitáʼi̱nnú xíʼin yitu̱n ta̱ Judá. Ta iinlá yitu̱n xa̱a̱nú nduunú. Iin kuití koonú kundika̱a̱nú ndaʼíi̱’””.
^ Ezequiel 37:24, 25: “Ta̱ David ta̱ káchíñu nu̱úi̱ xa̱a̱ koo rey nu̱úna, iin kuití koo ta̱ kundaa ndiʼina. Ta kundiku̱nna ndiʼi ña̱ ndáka̱xii̱n keʼíi̱, ta viíní kuniso̱ʼona ley ña̱ táxii̱. 25 Kundoona nu̱ú ñuʼú ña̱ ta̱xii̱ ndaʼa̱ ta̱ Jacob, nu̱ú xi̱ndoo na̱ táʼanndó. Ta ndiʼi tiempo kundoona nu̱úña, miína xíʼin se̱ʼena ta saátu xíʼin na̱ se̱ʼe ñánina; ta ta̱ David ta̱ káchíñu nu̱úi̱ kuniʼira yichi̱ nu̱úna ndiʼi tiempo”.
^ Kivi kunda̱a̱ka-iniún xa̱ʼa̱ profecía ña̱ káʼa̱n xa̱ʼa̱ u̱vi̱ yitu̱n tú káʼa̱n Ezequiel 37 xa̱ʼa̱ nu̱ú libro ña̱ naní La adoración pura de Jehová: ¡por fin restaurada!, página 130 nda̱a̱ 135, párrafo 3 nda̱a̱ 17.
