1. ¿Ndáaña kéʼéyó ña̱ va̱ʼa kutáʼanyó xíʼin Jehová?

 NDIʼIVAYÓ kútóoyó taváyó tiempo ña̱ va̱ʼa koo si̱íyó xíʼin na̱ kúʼvi̱ní-iniyó xíniyó. Tá kúú, na̱ xa̱a̱ ti̱ndaʼa̱ kúsi̱íní-inina tá távána tiempo ña̱ kundoo si̱ína xíʼin táʼanna. Saátu na̱ va̱lí kúa̱an, kúsi̱íní-inina tá távána tiempo ña̱ kutáʼanna xíʼin na̱ migona. Ta ndiʼiyó kúsi̱íní-iniyó tá táváyó tiempo ña̱ kundoo si̱íyó xíʼin na̱ hermanoyó. Soo ña̱ kútóokayó kúú ña̱ taváyó tiempo ña̱ kutáʼanyó xíʼin Ndióxi̱. ¿Ndáa ki̱ʼva kéʼéyóña? Tá kúú, tá káʼa̱nyó xíʼinra, tá ndákanixi̱níyó xa̱ʼa̱ ña̱ káʼa̱nra keʼéra chí nu̱únínu, ta saátu tá ndákanixi̱níyó xa̱ʼa̱ ña̱ va̱ʼa ña̱ kúúmiíra. Ña̱ kéʼéyó xa̱ʼa̱ ña̱ kúni̱yó kutáʼanyó xíʼin Jehová ndáyáʼviníña nu̱úyó (Sal. 139:17).

2. ¿Nda̱chun íxayo̱ʼvi̱ña xíʼinyó taváyó tiempo ña̱ kutáʼanyó xíʼin Jehová?

² Ni kútóovayó taváyó tiempo ña̱ kutáʼanyó xíʼin Jehová, soo sava yichi̱ íxayo̱ʼvi̱vaña xíʼinyó. Xa̱ʼa̱ ña̱ íyoní chiñu nu̱úyó íxayo̱ʼvi̱ña xíʼinyó taváyó tiempo ña̱ keʼéyó chiñu nu̱úra. Saáchi xíniñúʼu ku̱ʼu̱nyó kachíñuyó, kundaayó na̱ veʼeyó á saátu xíniñúʼu keʼéyó inkaka chiñu, ta túviyó ña̱ kǒoka tiempo nu̱úyó ña̱ ka̱ʼa̱nyó xíʼin Ndióxi̱, ña̱ kaʼviyó tu̱ʼunra ta ndakanixi̱níyó xa̱ʼa̱ña.

3. ¿Ndáaña xíniñúʼu kiʼinyó kuenta xíʼin?

 ³ Soo íyo iin ña̱ xíniñúʼu kiʼinníyó kuenta xíʼin, saáchi kivi kindaaña tiempo nu̱úyó ña̱ kutáʼanyó xíʼin Jehová. Ndiʼivayó xíniñúʼu taváyó tiempo ña̱ ndakindee̱yó ta koo si̱íyó. Soo tá ná va̱ása kiʼinyó kuenta xíʼin ña̱yóʼo, kivi kindaaña tiempo nu̱úyó ña̱ keʼéyó chiñu nu̱ú Ndióxi̱. Soo ná ndakaʼányó chi su̱ví ña̱ koo si̱íyó kúú ña̱ ndáyáʼvi va̱ʼaka, chi íyo inka ña̱ ndáyáʼvi va̱ʼaka nu̱ú ña̱yóʼo (Prov. 25:27; 1 Tim. 4:8).

4. ¿Ndáaña ka̱ʼa̱nyó xa̱ʼa̱ nu̱ú artículo yóʼo?

⁴ Nu̱ú artículo yóʼo kotoyó ndáa ña̱ʼa kúú ña̱ xíniñúʼu kundi̱ʼi̱ka-iniyó xa̱ʼa̱. Ta saátu sakúaʼayó ndáa ki̱ʼva viíka kuniñúʼuyó tiempoyó ña̱ va̱ʼa kutáʼanyó xíʼin Jehová, ta ndáaña va̱ʼa ndakiʼinyó tá ná keʼéyó ña̱yóʼo.

5. ¿Ndáa ki̱ʼva chindeétáʼan Efesios 5:15-17 xíʼin na̱ va̱lí ña̱ vií koo ña̱ ndaka̱xinna keʼéna?

⁵ Vií ná koo ña̱ ndaka̱xinyó keʼéyó. Ña̱yóʼo kúú ña̱ sándi̱ʼi̱ní-ini na̱ va̱lí. Saáchi na̱ maestrona á na̱ veʼena na̱ va̱ása kúú testigo Jehová, káʼa̱nna xíʼinna ña̱ ná kaʼvi va̱ʼava tasaá kuumiína iin chiñu va̱ʼa ta koo xu̱ʼúnna. Ta ña̱yóʼo kivi kindaaña ku̱a̱ʼání tiempona. Ta sana na̱ yivána ta saátu na̱ hermano, káʼa̱nna xíʼinna ña̱ ná kachíñuna nu̱ú Jehová. ¿Ndáaña chindeétáʼan xíʼinna ña̱ vií koo ña̱ ndaka̱xinna keʼéna? Kivi kaʼvina Efesios 5:15-17 ta ndakanixi̱nína xa̱ʼa̱ ña̱ káʼa̱nña (kaʼviña). Saátu kivi ndakanixi̱nína xa̱ʼa̱ ña̱yóʼo: “¿Ndáaña kúni̱ Jehová ná keʼíi̱? Tá ná ndaka̱xii̱n keʼíi̱ iin ña̱ʼa, ¿ndáaña kutóokara? ¿Ndáaña xíniñúʼu ndaka̱xii̱n keʼíi̱ ña̱ va̱ʼa viíka kuniñúʼi̱ tiempoi̱?”. Ná ndakaʼányó “chi su̱ví tiempo va̱ʼaka kúú ña̱ ndóoyó”, ta ndáa si̱lóʼo kúma̱ní ta ndiʼi-xa̱ʼa̱ ñuyǐví ta̱ Ndi̱va̱ʼa yóʼo. Soo tá ná chika̱a̱-iniyó ña̱ sakúsi̱íyó-ini Jehová ndiʼi tiempo, saá kúú ña̱ na̱ʼa̱yó ña̱ ndíchi íyo ña̱ ndákanixi̱níyó.

6. ¿Ndáaña ke̱ʼé ñá María, ta nda̱chun va̱ʼaní ña̱ nda̱kaxinñá ke̱ʼéñá?

⁶ Ná kundi̱ʼi̱-iniyó xa̱ʼa̱ ña̱ ndáyáʼvika. Sava yichi̱ kúni̱yó keʼéyó u̱vi̱ ña̱ʼa, ta ña̱ va̱ʼa kúú u̱vi̱ saávaña, soo xíniñúʼu ndaka̱xinyó keʼéyó iin kuitíña. Ta ña̱yóʼo kúú ña̱ ku̱u tá ni̱xa̱ʼa̱n ta̱ Jesús xi̱tora ñá María xíʼin ñá Marta. Xa̱ʼa̱ ña̱ va̱ʼaní-ini ñá Marta ta saátu xa̱ʼa̱ ña̱ kúsi̱íní-iniñá ña̱ ni̱xa̱a̱ ta̱ Jesús veʼeñá, ki̱xáʼañá íxava̱ʼañá ku̱a̱ʼání ña̱ kuxuna. Soo ku̱ʼvi̱ñá ñá María xi̱kooñá yatin xa̱ʼa̱ ta̱ Jesús ña̱ va̱ʼa kuniso̱ʼoñá ña̱ sánáʼa̱ra. Su̱ví ña̱ va̱ása va̱ʼaví kúú ña̱ ke̱ʼé ñá Marta, soo ta̱ Jesús ni̱ka̱ʼa̱nra xa̱ʼa̱ ñá María ña̱ “nda̱kaxinñá ña̱ ndáyáʼvi va̱ʼaka” (Luc. 10:38-42). Sana tá ni̱ya̱ʼa tiempo na̱ndósóva-ini ñá María xa̱ʼa̱ ña̱ xi̱xiñá, soo va̱ása nínandósó-iniñá xa̱ʼa̱ ña̱ sa̱náʼa̱ ta̱ Jesús ki̱vi̱ kán. Xíʼin ña̱yóʼo kúnda̱a̱-iniyó ña̱ xi̱ndayáʼviní nu̱ú ñá María kúú ña̱ kutáʼanñá xíʼin ta̱ Jesús. Saátu miíyó ña̱ xíniñúʼu kundayáʼviní nu̱úyó kúú ña̱ kutáʼanyó xíʼin Jehová. ¿Ndáaña xíniñúʼu keʼéyó ña̱ viíka kuniñúʼuyó tiempoyó?

7. ¿Nda̱chun ndáyáʼviní ka̱ʼa̱nyó xíʼin Ndióxi̱, kaʼviyó tu̱ʼunra ta ndakanixi̱níyó xa̱ʼa̱ña?

⁷ Ná ndakaʼányó chi tá káʼa̱nyó xíʼin Jehová, tá káʼviyó tu̱ʼunra ta ndákanixi̱níyó xa̱ʼa̱ña, iin ki̱ʼva ña̱ ndásakáʼnuyóra kúú ña̱yóʼo. Tá kéʼéyó oración: saá kúú ña̱ nátúʼunyó xíʼin yiváyó Jehová ta̱ kúʼvi̱ní-ini xíni miíyó (Sal. 5:7). Tá káʼviyó Biblia: saá kúú ña̱ sákuaʼakayó xa̱ʼa̱ Jehová, ta̱ ndíchiníka nu̱ú ndiʼina (Prov. 2:1-5). Ta tá ndákanixi̱níyó xa̱ʼa̱ ña̱ káʼviyó: saá kúnda̱a̱ka-iniyó xa̱ʼa̱ ña̱ va̱ʼa ña̱ kúúmií Jehová, xíʼin ña̱ káʼa̱nra keʼéra chí nu̱únínu.  Ña̱yóʼo kúú iin ki̱ʼva ña̱ viíníka kuniñúʼuyó tiempoyó, soo loʼova tiempo kúúmiíyó. Ña̱kán, ¿ndáaña chindeétáʼan xíʼinyó ña̱ vií kuniñúʼuyóña?

8. ¿Ndáaña sákuaʼayó xíʼin ña̱ ke̱ʼé ta̱ Jesús tá ni̱xa̱ʼa̱nra chí nu̱ú ñuʼú yi̱chí?

⁸ Ná ndukúyó iin lugar ña̱ táxi̱n. Ná kotoyó ndáa ki̱ʼva ke̱ʼé ta̱ Jesús ña̱yóʼo. Tá ki̱xáʼara nátúʼunra xíʼin na̱ yiví xa̱ʼa̱ Ndióxi̱, siʼna ni̱xa̱ʼa̱nra 40 ki̱vi̱ chí nu̱ú ñuʼú yi̱chí (Luc. 4:1, 2). Ta kán ni̱xi̱yo tiempo nu̱úra ña̱ ni̱ka̱ʼa̱nra xíʼin yivára, ta saátu nda̱kanixi̱níra xa̱ʼa̱ ña̱ kúni̱ yivára ná keʼéra. Ña̱yóʼo chi̱ndeétáʼan xíʼinra ni̱ya̱ʼara nu̱ú tu̱ndóʼo ña̱ ki̱xi nu̱úra. ¿Ndáaña sákuaʼayó xíʼin ña̱ ke̱ʼéra? Sana ku̱a̱ʼáva kúúyó ti̱xin veʼeyó ta íxayo̱ʼvi̱ña xíʼinyó ndani̱ʼíyó iin lugar ña̱ táxi̱n nu̱ú kivi kaʼviyó. Tá saá ndóʼoyó, ¿á kivi ndukúyó iin lugar nu̱ú kivi kaʼviyó? Ña̱yóʼo kúú ña̱ kéʼé ñá Julie tá kúni̱ñá ka̱ʼa̱nñá xíʼin Jehová. Ñáyóʼo íyoñá chí Francia xíʼin yiíñá ta ndóona iin cuarto ña̱ loʼoní, ña̱kán va̱ása kívi koo mitúʼunñá ta ka̱ʼa̱nñá xíʼin Jehová. Ñáyóʼo káchiñá: “Ndiʼi ki̱vi̱ xáʼa̱n iinlá miíi̱ chí parque, chi kán kúú nu̱ú va̱ʼaníka káʼi̱n xíʼin Jehová”.

9. Ni ni̱xi̱yoní chiñu nu̱ú ta̱ Jesús, ¿ndáaña ke̱ʼéra?

⁹ Ni̱xi̱yoníva chiñu nu̱ú ta̱ Jesús. Chi nda̱a̱ ndáaka nu̱ú xi̱xa̱ʼa̱nra kán xi̱ndiku̱n na̱ yiví sa̱tára xa̱ʼa̱ ña̱ xi̱kuni̱na ná natúʼunra xíʼinna ta chindeétáʼanra xíʼinna. Tu̱ʼun Ndióxi̱ káʼa̱nña, ña̱ iin yichi̱ ni̱xa̱ʼa̱n ku̱a̱ʼání na̱ yiví na̱ndukúnara veʼe nu̱ú íyora. Soo ni saá, ta̱vávara tiempo ña̱ natúʼunra xíʼin Jehová. Saáchi tá kúma̱níka tu̱vi, nda̱kiʼinra ku̱a̱ʼa̱nra iin lugar nu̱ú kǒo na̱ yiví ndóo ña̱ va̱ʼa ka̱ʼa̱nra xíʼin yivára (Mar. 1:32-35).

10, 11. Nda̱a̱ táki̱ʼva káchi Mateo 26:40, 41, ¿ndáaña ni̱ka̱ʼa̱n ta̱ Jesús xíʼin na̱ discípulora, soo ndáaña ke̱ʼéna?

¹⁰ Ñuú tá kúma̱ní kuvi ta̱ Jesús, na̱ndukúra iin lugar nu̱ú kǒo na̱ yiví íyo ña̱ va̱ʼa ka̱ʼa̱nra xíʼin Jehová ta ndakanixi̱níra, ña̱kán ni̱xa̱ʼa̱nra jardín ña̱ Getsemaní ña̱ va̱ʼa ka̱ʼa̱nra xíʼinra (Mat. 26:36). Ta kán sa̱náʼa̱ra na̱ apóstolra ña̱ ndáyáʼviní ka̱ʼa̱nna xíʼin Jehová.

¹¹ Ná kotoyó ndáaña ku̱u. Tá xa̱a̱ ni̱xa̱a̱na jardín ña̱ Getsemaní sana xa̱a̱ yáʼaka sava ñuú kúúña, ta ni̱ka̱ʼa̱n ta̱ Jesús xíʼinna ña̱ ná kunditona, tasaá nda̱kiʼinra ku̱a̱ʼa̱nra ka̱ʼa̱nra xíʼin yivára (Mat. 26:37-39). Soo tá nda̱ndikóra na̱ kísi̱va kúúna, ña̱kán tuku ni̱ka̱ʼa̱nra ña̱yóʼo xíʼinna: “Kundito va̱ʼa nu̱úndó ta ka̱ʼa̱nníndó xíʼin Ndióxi̱” (kaʼvi Mateo 26:40, 41). Ta̱kán xi̱kunda̱a̱-inira ña̱ xi̱ndi̱ʼi̱ní-inina ta ku̱naánína. Ña̱kán ku̱ndáʼviní-inira xi̱nirana ta ni̱ka̱ʼa̱nra ña̱yóʼo xíʼinna: “Na̱ yiví kúni̱vana keʼéna ña̱ va̱ʼa, soo vitánína”. Ta u̱vi̱ka yichi̱ ni̱xa̱ʼa̱nra ni̱ka̱ʼa̱nra xíʼin Ndióxi̱, ta tá nda̱ndikóra su̱ví xíʼin Ndióxi̱ káʼa̱nna chi na̱ kísi̱va kúúna (Mat. 26:42-45).

12. ¿Ndáaña kivi keʼéyó tá kúnaáníyó ta túviyó ña̱ va̱ása íyoka ndee̱yó ka̱ʼa̱nyó xíʼin Ndióxi̱?

 ¹² Ná kotoyó ndáa hora kúú ña̱ va̱ʼaka ka̱ʼa̱nyó xíʼin Ndióxi̱. Sava yichi̱ kúnaáníyó ta túviyó ña̱ va̱ása íyoka ndee̱yó ka̱ʼa̱nyó xíʼin Ndióxi̱, soo su̱ví iin miíyó kúú na̱ ndóʼo ña̱yóʼo. ¿Ndáaña kivi keʼéyó tá saá ndóʼoyó? Sava na̱ hermano xi̱ka̱ʼa̱nna xíʼin Ndióxi̱ tá xa̱a̱ ñuú, soo ki̱ʼinna kuenta ña̱ va̱ʼaníka tá ya̱chi̱ loʼoka káʼa̱nna xíʼinra, chi saá kúú ña̱ va̱ása kúni̱ ku̱su̱nnína, ta inkana kíʼinna kuenta ña̱ va̱ʼaníka káʼa̱nna xíʼin Ndióxi̱ tá ndóona á tá níxítína. ¿Soo ndáaña keʼéyó tá ndíʼi̱ní-iniyó á tá kúsuchíní-iniyó ta va̱ása kúni̱yó ka̱ʼa̱nyó xíʼin Ndióxi̱? Ná ka̱ʼa̱nyó xíʼin Jehová xa̱ʼa̱ ña̱yóʼo chi ta̱kán kúndáʼviva-inira xínira miíyó, ta kúnda̱a̱-inira xíʼin ña̱ ndóʼoyó (Sal. 139:4).

13. ¿Ndáaña kivi kundoʼoyó xíʼin celular á inkaka ña̱ʼa?

¹³ Ná va̱ása taxiyó kasi nda̱a̱ ni iin ña̱ʼa nu̱úyó tá káʼviyó. Inka ña̱ chindeétáʼan xíʼinyó ña̱ kutáʼanyó xíʼin Ndióxi̱ kúú ña̱ kaʼviyó tu̱ʼunra ta ku̱ʼu̱nyó reunión. Ña̱kán viíní ná kuniñúʼuyó tiempoyó tá ku̱a̱ʼa̱nyó reunión á tá káʼviyó. Ná ndakanixi̱níyó xa̱ʼa̱ ña̱yóʼo: “¿Ndáaña sási nu̱úi̱ tá káʼvii̱? ¿Á ndáaña sási nu̱úi̱ ña̱ viíka kuniso̱ʼi̱ tá ku̱a̱ʼi̱n reunión?”. ¿Á ña̱ sási nu̱úyó kúú llamada, correo, mensaje ña̱ kíxaa̱ nu̱ú teléfono á inkaka ña̱ʼa? Chíndeétáʼanníva ña̱yóʼo xíʼinyó, ta ku̱a̱ʼání na̱ yiví xíniñúʼuña. Soo sava na̱ xíni̱ va̱ʼa xa̱ʼa̱ ña̱yóʼo káʼa̱nna ña̱ tá yatin níndúʼu iin celular nu̱ú iin na̱ yiví, ña̱yóʼo kivi kasiña nu̱úna ña̱ kundi̱ʼi̱-inina xa̱ʼa̱ chiñu ña̱ kéʼéna. Iin ta̱ káʼvi xa̱ʼa̱ ña̱ ndóʼo na̱ yiví káchira: “Va̱ása kívi kundi̱ʼi̱-iniún xa̱ʼa̱ iin kuití ña̱ kéʼún, chi inkava ña̱ʼa ndákanixi̱níún xa̱ʼa̱”. Tá ku̱a̱ʼa̱nyó asamblea káʼa̱nna xíʼinyó ña̱ ná sanúuyó volumen celularyó, ña̱ va̱ʼa ná va̱ása kasiña nu̱ú na̱ hermano ña̱ vií kuniso̱ʼona. Ta saátu xíniñúʼu keʼéyó tá káʼa̱nyó xíʼin Jehová, tá káʼviyó á tá ku̱a̱ʼa̱nyó reunión, ná va̱ása taxiyó kasi celular nu̱úyó á inkaka ña̱ʼa.

14. Nda̱a̱ táki̱ʼva káchi Filipenses 4:6, 7, ¿ndáa ki̱ʼva chíndeétáʼan Jehová xíʼinyó tá káʼviyó á tá ku̱a̱ʼa̱nyó reunión?

¹⁴ Ná ka̱ʼa̱nyó xíʼin Jehová ña̱ chindeétáʼanra xíʼinyó kundi̱ʼi̱-iniyó xa̱ʼa̱ iin kuití ña̱ʼa. Tá na̱ káʼvi kúúyó á na̱ ndóo iin reunión kúúyó, ta kíʼinyó kuenta ña̱ kíxáʼayó ndákanixi̱níyó xa̱ʼa̱ inka ña̱ʼa, ná ka̱ʼa̱nyó xíʼin Jehová ña̱ chindeétáʼanra xíʼinyó. Tá íyo iin ña̱ sándi̱ʼi̱-iniyó, ña̱yóʼo kivi kasiña nu̱úyó tá káʼviyó á kivi kasituña nu̱úyó ña̱ viíka kuniso̱ʼoyó tá íyoyó reunión, soo ná va̱ása taxiyó kasiña nu̱úyó. Ná  ka̱ʼa̱nyó xíʼin Jehová ña̱ chindeétáʼanra xíʼinyó ña̱ va̱ása kundi̱ʼi̱ní-iniyó, ta saátu ná kundaara níma̱yó xíʼin ña̱ ndákanixi̱níyó (kaʼvi Filipenses 4:6, 7).

15. ¿Ndáaña va̱ʼa ndakiʼinyó tá ná taváyó tiempo ña̱ kutáʼanyó xíʼin Jehová?

¹⁵ Ku̱a̱ʼání ña̱ va̱ʼa ndakiʼinyó tá táváyó tiempo ña̱ natúʼunyó xíʼin Jehová, ña̱ kuniso̱ʼoyó ña̱ káʼa̱nra ta ndakanixi̱níyó xa̱ʼa̱ra. ¿Ndáaña? Ña̱ nu̱ú, viíní koo ña̱ ndaka̱xinyó keʼéyó. Nda̱a̱ táki̱ʼva káchi Biblia: “Na̱ kítáʼan xíʼin na̱ ndíchi, ndíchi koona” (Prov. 13:20). Ña̱kán, tá ku̱a̱ʼá tiempo nátúʼunyó xíʼin Jehová ta saátu tá káʼviyó tu̱ʼunra, saá kúú ña̱ ndíchiní xa̱a̱yó kooyó saáchi ndíchiníra. Tasaá kúú ña̱ kunda̱a̱-iniyó ndáaña kúú ña̱ kivi keʼéyó ña̱ va̱ʼa sakúsi̱íyó-inira ta va̱ása keʼéyó ña̱ʼa ña̱ sákusuchí-inira.

16. ¿Nda̱chun va̱ʼaníka sanáʼa̱yó na̱ yiví tá ná taváyó tiempo ña̱ kutáʼanyó xíʼin Jehová?

¹⁶ Ña̱ u̱vi̱, va̱ʼaníka sanáʼa̱yó na̱ yiví. Tá káʼviyó xíʼin na̱ yiví ña̱ kúni̱yó kúú ña̱ chindeétáʼanyó xíʼinna kuyatinna nu̱ú Jehová. Tá ná ka̱ʼa̱n ni̱ʼiyó xíʼin Jehová saá kúú ña̱ xa̱a̱yó kuʼvi̱níka-iniyó kuniyóra, tasaá va̱ʼaníka sanáʼa̱yó na̱ káʼviyó xíʼin ña̱ xa̱a̱na kuʼvi̱-inina kuninara. Saá ke̱ʼé ta̱ Jesús chi tá xi̱ka̱ʼa̱nra xa̱ʼa̱ yivára xi̱na̱ʼa̱ra ña̱ xi̱kuʼvi̱ní-inira xi̱xinirara, ña̱kán nda̱a̱ na̱ discípulora ki̱xáʼana ni̱kuʼvi̱-inina xi̱nina Jehová (Juan 17:25, 26).

17. ¿Nda̱chun va̱ʼaníka kandíxayó Ndióxi̱ tá ná ka̱ʼa̱nyó xíʼinra á tá ná kaʼviyó tu̱ʼunra?

¹⁷ Ña̱ u̱ni̱, kandíxaníkayó Jehová. Ná ndakanixi̱níyó ndáaña kúu tá káʼa̱nyó xíʼin Jehová ña̱ ná kuniʼira yichi̱ nu̱úyó, ña̱ ná sandíkora-iniyó á ña̱ ná chindeétáʼanra xíʼinyó. Tá xítoyó ndáa ki̱ʼva ndákuiinra yuʼúyó saá kúú ña̱ kándíxaníkayóra (1 Juan 5:15). Ta inka ña̱ chindeétáʼan xíʼinyó ña̱ kandíxakayóra kúú ña̱ kaʼviyó tu̱ʼunra. Saáchi Biblia káchiña: “Iin na̱ yiví xáa̱na kándíxana tá xa̱a̱ xíniso̱ʼona tu̱ʼun Ndióxi̱” (Rom. 10:17). Soo tá kúni̱yó kandíxakayó Ndióxi̱ va̱ása xíniñúʼu kaʼvi kuitíyó tu̱ʼunra, saáchi íyo inkaka ña̱ xíniñúʼu keʼéyó. ¿Ndáaña kúúña?

18. ¿Ndáaña va̱ʼa ndákiʼinyó tá ndákanixi̱níyó? Ka̱ʼa̱n xa̱ʼa̱ iin ejemplo.

¹⁸ Xíniñúʼu ndakanixi̱níyó xa̱ʼa̱ ña̱ sákuaʼayó. Ná ka̱ʼa̱nyó xa̱ʼa̱ ña̱ ndo̱ʼo ta̱ ka̱ʼyí Salmo 77. Ta̱yóʼo xi̱ndi̱ʼi̱ní-inira saáchi xi̱ndakanixi̱níra ña̱ va̱ása kúsi̱íka-ini Jehová xíʼin ña̱ xi̱keʼéra ni xíʼin ña̱ xi̱keʼé inkaka na̱ ñuu Israel. Ta xa̱ʼa̱ ña̱ xi̱ndi̱ʼi̱ní-inira va̱ása níxikisi̱ra tá ñuú (versículo 2-8). ¿Ndáaña ke̱ʼéra? Ña̱yóʼo ni̱ka̱ʼa̱nra xíʼin Jehová: “Ndakanixi̱níi̱ xa̱ʼa̱ ndiʼi ña̱ kéʼún, ta saátu ndakanixi̱níi̱ xa̱ʼa̱ ki̱ʼva ña̱ kéʼúnña” (versículo 12). Ta̱yóʼo xi̱kunda̱a̱-inira xa̱ʼa̱ ndiʼi ña̱ ke̱ʼé Jehová xa̱ʼa̱ na̱ ñuura tá ya̱chi̱. Soo ni  saá xi̱ndakanixi̱níra ña̱yóʼo: “¿Á na̱ndósó-ini Ndióxi̱ ña̱ na̱ʼa̱ra ña̱ va̱ʼa-inira xíʼinyó? ¿Á xa̱ʼa̱ ña̱ sáa̱nívara va̱ása xíínra kundáʼvi-inira kunira miíyó?” (versículo 9). Ta̱ ka̱ʼyí salmo yóʼo nda̱kanixi̱níra xa̱ʼa̱ ndiʼi ña̱ ke̱ʼé Jehová xa̱ʼa̱ na̱ ñuura tá ya̱chi̱, ta saátu ndáa ki̱ʼva ku̱ndáʼvi-inira xi̱nirana (versículo 11). Ta ña̱yóʼo chi̱ndeétáʼan xíʼinra ku̱nda̱a̱-inira ña̱ va̱ása sandákoondaʼa̱ Jehová na̱ ñuura (versículo 15). Ta saátu kivi kundoʼo miíyó, kandíxaníkayó Ndióxi̱ tá ná ndakanixi̱níyó xa̱ʼa̱ ndiʼi ña̱ xa̱a̱ kéʼéra xa̱ʼa̱ na̱ ñuura xíʼin ña̱ xa̱a̱ kéʼéra xa̱ʼa̱ miíyó.

19. ¿Ndáaña kúú inka ña̱ va̱ʼa ndákiʼinyó tá táváyó tiempo ña̱ kutáʼanyó xíʼin Jehová?

¹⁹ Ña̱ ku̱mí, kuʼvi̱ka-iniyó kuniyó Jehová. Ña̱yóʼo kúú mií ña̱ ndáyáʼvi va̱ʼaka ndákiʼinyó tá táváyó tiempo ña̱ kutáʼanyó xíʼinra. ¿Nda̱chun? Saáchi tá kúʼvi̱-iniyó xíniyó Jehová, va̱ʼaní kuniso̱ʼoyó ndiʼi ña̱ káʼa̱nra, ta keʼéyó nda̱a̱ ndáaka ña̱ʼa ña̱ va̱ʼa sakúsi̱íyó-inira, ta saátu kundeé-iniyó nu̱ú nda̱a̱ ndáaka tu̱ndóʼo (Mat. 22:37-39; 1 Cor. 13:4, 7; 1 Juan 5:3). Ña̱ kutáʼanyó xíʼin Jehová kúú mií ña̱ ndáyáʼvi va̱ʼaka (Sal. 63:1-8).

20. ¿Ndáaña kivi keʼún ña̱ va̱ʼa kooka tiempo nu̱ún ña̱ kutáʼún xíʼin Jehová?

²⁰ Ña̱kán ná ndakaʼán tukuyó: tá káʼa̱nyó xíʼin Jehová, tá káʼviyó tu̱ʼunra ta ndákanixi̱níyó xa̱ʼa̱ña iin ki̱ʼva ña̱ ndásakáʼnuyóra kúúña. Ña̱kán ná keʼéyó nda̱a̱ táki̱ʼva ke̱ʼé ta̱ Jesús ña̱ taváyó tiempo ña̱ ka̱ʼa̱nyó xíʼin Jehová ta kaʼviyó tu̱ʼunra, ta ndukúyó iin lugar ña̱ táxi̱n ña̱ va̱ʼa keʼéyó ña̱yóʼo. Ta ná va̱ása taxiyó kasi inka ña̱ʼa nu̱úyó tá kéʼéyóña. Ta tá káʼviyó á tá ku̱a̱ʼa̱nyó reunión ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ va̱ása kundi̱ʼi̱-iniyó xa̱ʼa̱ inka ña̱ʼa. Tá chíka̱a̱yó ndee̱ ña̱ vií kuniñúʼuyó tiempoyó, Jehová taxira kutakuyó ndiʼi tiempo nu̱ú ñuyǐví xa̱á (Mar. 4:24).