ARTÍCULO ÑA̱ KAʼVIYÓ 3
YAA 124 Ndiʼi ki̱vi̱ nda̱kú ná koo iniyó
Tá yáʼún nu̱ú tu̱ndóʼo Jehová chindeétáʼan xíʼún
“[Jehová] kúú ta̱ va̱ʼaní chíndeétáʼan xíʼún” (IS. 33:6).
TEMA
¿Ndáaña xíniñúʼu keʼéyó ña̱ va̱ʼa taxiyó ña̱ chindeétáʼan Jehová xíʼinyó tá yáʼayó nu̱ú tu̱ndóʼo ña̱ yo̱ʼvi̱ní?
1, 2. Ndi’iyó na̱ ndásakáʼnu Jehová, ¿ndáa tu̱ndóʼo yáʼayó nu̱ú?
SANA iin kama ndakava iin tu̱ndóʼo nu̱úyó ta nasa̱ma ki̱ʼva ña̱ íyoyó. Ná kotoyó sava ejemplo. Iin ki̱vi̱ ta̱ doctor ni̱ka̱ʼa̱nra xíʼin iin ta̱ hermano ta̱ naní Luis a ña̱ kúúmiíra cáncer ta ni̱ka̱ʼa̱nra xíʼinra ña̱ si̱lóʼoní yo̱o̱ kutakura. Yii̱ ñá Monika iin anciano xi̱kuura ta u̱vi̱ saána va̱ʼaní xi̱kachíñuna nu̱ú Jehová, soo iin ki̱vi̱ na̱kunda̱a̱-iniñá ña̱ xa̱a̱ ku̱a̱ʼání ku̱i̱ya̱ xíkara xíʼin inka ñaʼá. Iin ñá hermana kúa̱an ñá naní Olivia xi̱nuñá ku̱a̱ʼa̱nñá inka ñuu saáchi ni̱ka̱ʼa̱nna ña̱ koo iin huracán ñuu nu̱ú ni̱xi̱yoñá, tá ndi̱kóñá xi̱niñá ña̱ ndi̱ʼi-xa̱ʼa̱ ndiʼi veʼeñá. Ndiʼi na̱ ni̱ka̱ʼa̱nyó xa̱ʼa̱ yóʼo iin kama kuití ni̱ya̱ʼana nu̱ú tu̱ndóʼo ta na̱sama ki̱ʼva ña̱ íyona. Ta miíún, ¿á xa̱a̱ yáʼún nu̱ú tu̱ndóʼo táʼan ña̱ ni̱ya̱ʼa na̱yóʼo?
2 Ni ndásakáʼnuyó Jehová soo ndóʼoyó nda̱a̱ táki̱ʼva ndóʼo ndiʼi na̱ yiví chi kíʼin kue̱ʼe̱ miíyó ta yá’ayó nu̱ú ku̱a̱ʼání tu̱ndóʼo. Xa̱ʼa̱ ña̱ ndásakáʼnuyó Jehová íyo sava na̱ sáa̱-ini xíni miíyó ta íxandi̱va̱ʼana xíʼinyó, soo kǒo sándakoo ndaʼa̱ví Jehová miíyó tá yáʼayó nu̱ú tu̱ndóʼo chi káʼa̱nra chindeétáʼanra xíʼinyó (Is. 41:10). Xa̱ʼa̱ ña̱kán ná kusi̱í-iniyó chi mií Jehová chíndeétáʼan xíʼinyó ña̱ ndaka̱xin viíyó ña̱ keʼéyó. Nda̱kú ná koo iniyó xíʼinra chi taxivara ndee̱ ndaʼa̱yó ña̱ ya̱ʼayó nu̱ú tu̱ndóʼo. Nu̱ú artículo yóʼo sakúaʼayó ku̱mí ña̱ʼa ña̱ kéʼé Jehová ña̱ va̱ʼa chindeétáʼanra xíʼinyó tá yáʼayó nu̱ú tu̱ndóʼo. Ta saátu sakúaʼayó ndáaña kivi keʼéyó ña̱ va̱ʼa chindeéra miíyó.
JEHOVÁ KUNDAARA MIÍYÓ
3. ¿Ndáaña kivi ixayo̱ʼvi̱ xíʼinyó keʼéyó tá yáʼayó nu̱ú iin tu̱ndóʼo ña̱ ndeéní?
3 Tá yáʼayó nu̱ú iin tu̱ndóʼo ña̱ yo̱ʼvi̱ní sana va̱ása vií íyo ña̱ ndákanixi̱níyó, ta kǒo ndáka̱xin viíyó ña̱ keʼéyó. ¿Nda̱chun? Saáchi sana kúsuchíní-iniyó xa̱ʼa̱ ndiʼi tu̱ndóʼo ña̱ kúúmiíyó ta kǒo xíni̱yó ndáaña keʼéyó. Ña̱yóʼo kúú ña̱ ndo̱ʼo u̱vi̱ ná hermana ná ni̱ka̱ʼa̱nyó xa̱ʼa̱ nu̱ú kíxáʼa artículo yóʼo. Ñá Olivia káchiñá: “Kǒo níxi̱kunda̱a̱-inii̱ ndáaña keʼíi̱ saáchi tá huracán sa̱ndíʼi-xa̱ʼa̱ ndiʼira veʼi̱”. Ñá Monika káʼa̱nñá xa̱ʼa̱ ña̱ ke̱ʼé yii̱ñá: “Ni kǒo níʼii̱ tu̱ʼun ña̱ ka̱ʼi̱n xa̱ʼa̱ ña̱ ndo̱ʼi̱, nda̱kanixi̱níi̱ ña̱ nda̱a̱ táki̱ʼva íyo ta̱ sa̱túkue̱ʼe̱ níma̱i̱ saá ni̱xi̱yora. Xa̱ʼa̱ ña̱kán, kǒo níxi̱kuni̱i̱ keʼíi̱ nda̱a̱ ni iin ña̱ʼa. Kǒo níndakanixi̱níi̱ ya̱ʼi̱ nu̱ú tu̱ndóʼo táʼan ña̱yóʼo”. Tá túviyó ña̱ kǒo kúchiñukayó xíʼin iin tu̱ndóʼo. ¿Ndáaña káʼa̱n Jehová keʼéra xa̱ʼa̱yó?
4. ¿Ndáaña káʼa̱n Jehová xíʼinyó nu̱ú Filipenses 4:6, 7?
4 Ña̱ kéʼé Jehová. Nu̱ú Biblia káʼa̱nña ña̱ kivi sandíko Jehová iniyó (kaʼvi Filipenses 4:6, 7). Tá viíní kítáʼanyó xíʼin Jehová saá kúú ña̱ va̱ʼaní sándi̱kora-iniyó ta nda̱a̱ ni iin na̱ yiví kǒo kívi kúnda̱a̱-ini ndáa ki̱ʼva kéʼéraña. ¿Á xa̱a̱ xákundáʼviún nu̱ú Jehová ña̱ chindeétáʼanra xíʼún ta tándi̱ʼi kíʼún kuenta ña̱ va̱ʼaní sándi̱kora-iniún? Tá xa̱a̱ ndóʼún ña̱yóʼo mií Ndióxi̱ kúú ta̱ sa̱ndíko-iniún.
5. ¿Ndáa ki̱ʼva ndáa Jehová níma̱yó xíʼin ña̱ ndákanixi̱níyó?
5 Ndióxi̱ va̱ása sándi̱ko kuitíra iniyó chi Filipenses 4:7 káʼa̱nña ña̱ saátu ndáara níma̱yó xíʼin ña̱ ndákanixi̱níyó. Ña̱ tu̱ʼun “ndáara” xi̱xiniñúʼunaña ña̱ ka̱ʼa̱nna xa̱ʼa̱ na̱ soldado na̱ xi̱ndaa iin ñuu tasaá kǒo ki̱ʼvi na̱ yiví ña̱ ixandi̱va̱ʼana xíʼinna, ta na̱ ni̱xi̱yo ñuu kán kǒo níxi̱ndiʼi̱-inina saáchi xi̱kunda̱a̱-inina ña̱ chí yéʼé ñuu kán ndíta na̱ soldado ndáanana. Ta saátu kéʼé Jehová xíʼin miíyó chi ndáara níma̱yó xíʼin ña̱ ndákanixi̱níyó tasaá va̱ʼaní kúniyó ta̱ kǒo ña̱ sándi̱ʼi̱-iniyó (Sal. 4:8). Sana va̱ása ndiʼiví tu̱ndóʼo ña̱ yáʼayó nu̱ú, soo kivi sandíko Jehová iniyó nda̱a̱ táki̱ʼva ke̱ʼéra xíʼin ñá Ana (1 Sam. 1:16-18). Tasaá viíka koo ña̱ ndakanixi̱níyó ta̱ viíka koo ña̱ ndaka̱xinyó keʼéyó.
Ka̱ʼa̱n xíʼin Jehová nda̱a̱ ná ndi̱ko-iniún tasaá kunda̱a̱-iniún ña̱ ndáara níma̱ún xíʼin ña̱ ndákanixi̱níún. (Koto párrafo 4 nda̱a̱ 6).
6. ¿Ndáaña xíniñúʼu keʼéyó ña̱ va̱ʼa sándi̱ko Jehová iniyó? (Koto na̱ʼná).
6 Ña̱ xíniñúʼu keʼéyó. Nda̱a̱ táki̱ʼva íyo na̱ yiví na̱ ndóo iin ñuu kivi ka̱ʼa̱nna xíʼin na̱ soldado ña̱ kundaanana, saátu miíyó kivi ka̱ʼa̱nyó xíʼin Jehová ña̱ kundaara miíyó. Ná ka̱ʼa̱n ni̱ʼiyó xíʼinra nda̱a̱ ná sandíkora-iniyó (Luc. 11:9; ). Ña̱yóʼo kúú ña̱ ke̱ʼé ta̱ Luis xíʼin ñá Ana tá ni̱ka̱ʼa̱nna xíʼinra ña̱ si̱lóʼo yo̱o̱ kutakura. Ta̱yóʼo ni̱ka̱ʼa̱nra: “Tá ndo̱ʼi̱ ña̱yóʼo i̱xayo̱ʼvi̱níña xíʼi̱n ña̱ ndaka̱xii̱n ndáa ta̱tán kúú ña̱ kivi kuniñúʼi̱, soo ña̱ ni̱ka̱ʼa̱nndi̱ xíʼin Jehová kúú ña̱ chi̱ndeétáʼan xíʼinndi̱ ña̱ va̱ʼa kǒo ndi̱ʼi̱-inindi̱”. Na̱yóʼo ni̱ka̱ʼa̱nna ña̱ u̱vi̱ saána xi̱ka̱ʼa̱n xíʼin Jehová ña̱ sándi̱kora inina, ña̱ kundaara níma̱na ta saátu ña̱ taxira ña̱ ndíchi ndaʼa̱na ña̱ ndaka̱xin viína ña̱ keʼéna, ta ki̱ʼinna kuenta ña̱ xi̱niso̱ʼova Jehová ña̱ ni̱ka̱ʼa̱nna. Tá yáʼún nu̱ú iin tu̱ndóʼo ña̱ yo̱ʼvi̱ní, kǒo sandákoún ña̱ ka̱ʼún xíʼin Jehová tasaá kotoún ña̱ sándi̱kora-iniún ta kundaara níma̱ún xíʼin ña̱ ndákanixi̱níún ( 1 Tes. 5:17Rom. 12:12).
KǑO TAXI JEHOVÁ ÑA̱ KUNDI̱ʼI̱NÍ-INIÚN
7. ¿Ndáaña kivi kundoʼoyó tá yáʼayó nu̱ú iin tu̱ndóʼo?
7 Tá yáʼayó nu̱ú iin tu̱ndóʼo ña̱ yo̱ʼvi̱ní, sana kǒo xíni̱yó ndáaña keʼéyó ta kǒo ndáka̱xin viíyó ña̱ keʼéyó. Túviyó ña̱ kǒo kúndeéka-iniyó xíʼin iin tu̱ndóʼo ña̱ yáʼayó nu̱ú, chi tuku ta tukuña va̱xi nu̱úyó. Ña̱yóʼo kúú ña̱ ndo̱ʼo ñá síʼí ta̱ Luis tá ni̱xi̱ʼi̱ra. Ñáyóʼo káchiñá: “Sava yichi̱ xi̱kusuchíní-inii̱ ta xi̱ndakanixi̱níi̱ ña̱ kǒo ndáyáʼvii̱, soo saátu xi̱saa̱níi̱ saáchi kǒoka ta̱ Luis níxi̱yo xíʼi̱n”. Saátu káʼa̱nñá ña̱ ni̱xi̱yo sava ki̱vi̱ ña̱ xi̱kuni mitúʼunníñá ta xi̱ndi̱ʼi̱ní-iniñá saáchi xi̱niñúʼu ndaka̱xinñá ndáaña keʼéñá. Chi tá xi̱taku ta̱ Luis ta̱kánva xi̱keʼé ndiʼi ña̱yóʼo. Xa̱ʼa̱ ña̱kán, ¿ndáa ki̱ʼva chíndeétáʼan Jehová xíʼinyó tá túvi̱yó ña̱ kǒo kúndeéka-iniyó xíʼin tu̱ndóʼo ña̱ yáʼayó nu̱ú?
8. ¿Ndáaña káʼa̱n Jehová xíʼinyó nu̱ú 1 Pedro 5:10?
8 Ña̱ kéʼé Jehová. Jehová káʼa̱nra xíʼinyó ña̱ ndakú koo iniyó (kaʼvi 1 Pedro 5:10). Ndakanixi̱ní xa̱ʼa̱ iin barco tú ndíka̱a̱-ini mar tasaá kíxáʼa ndeéní kúun sa̱vi̱ ta túyóʼo ndeéní kíxáʼa kánda̱nú. Ku̱a̱ʼání barco kúúmiínú ka̱a chí síi̱nnú ta ña̱yóʼo kíʼviña ini ti̱kui̱í tasaá chíndeétáʼanña xíʼinnú ña̱ kǒo ka̱nda̱nínú, tasaá kǒo ndíʼi̱-ini na̱ yiví na̱ ku̱a̱ʼa̱n ininú. Soo va̱ʼaníka chíndeétáʼan ka̱a yóʼo xíʼin tú barco tá kánda̱nú, saátu miíyó tá kúni̱yó ña̱ chindeétáʼan Jehová xíʼinyó tá yáʼayó nu̱ú iin tu̱ndóʼo, kǒo xíniñúʼu sandákooyó ña̱ ndasakáʼnuyóra chi ña̱ xíniñúʼu keʼéyó kúú ña̱ chika̱a̱yó ndee̱ ña̱ nda̱kú koo iniyó xíʼinra.
Tutu ña̱ tává na̱ ñuu Ndióxi̱ kivi chindeétáʼan xíʼún ña̱ kǒo ndakava-iniún. (Koto párrafo 8 xíʼin 9).
9. ¿Ndáa ki̱ʼva chíndeétáʼan ña̱ tává na̱ ñuu Ndióxi̱ xíʼinyó? (Koto na̱ʼná).
9 Ña̱ xíniñúʼu keʼéyó. Tá yáʼayó nu̱ú ku̱a̱ʼání tu̱ndóʼo ná chika̱a̱níyó ndee̱ ña̱ vií kutáʼanyó xíʼin Ndióxi̱, sana kǒo kívi keʼéyó nda̱a̱ táki̱ʼva xi̱keʼéyó tá ya̱chi̱. Soo, ná kǒo nandósó-iniyó ña̱ kúnda̱a̱va-ini Jehová xíʼin ña̱ ndóʼoyó (chitáʼanña xíʼin Lucas 21:1-4). Tavá tiempo ña̱ kaʼviún tu̱ʼun Ndióxi̱ ta ndakanixi̱níún xa̱ʼa̱ña. Na̱ ñuu Jehová távána ku̱a̱ʼání tutu xíʼin video ña̱ kivi chindeétáʼan xíʼinyó ña̱ ndakani vií xi̱níyó. Ña̱ va̱ʼa ndani̱ʼún ña̱ kaʼviún kivi kuniñúʼún ña̱ aplicación JW Library®, xíʼin ña̱ Índice de las publicaciones Watch Tower ta saátu ña̱ Guía de estudio para los testigos de Jehová. Ñá Monika ñá xa̱a̱ ni̱ka̱ʼa̱nyó xa̱ʼa̱ ni̱ka̱ʼa̱nñá ña̱ xíniñúʼuñá tutu ña̱ tává na̱ ñuu Ndióxi̱ tá kíxáʼa ndákanixi̱níña xa̱ʼa̱ ña̱ ndo̱ʼoñá tá ya̱chi̱. Sava xi̱nandukúñá tu̱ʼun ira, traición á lealtad, ta xi̱kaʼviñá xa̱ʼa̱ ña̱yóʼo. Ñá Monika káchiñá: “Ni xi̱kusuchíní-inii̱ soo xi̱nandúkuvai̱ ña̱ xi̱kunii̱ kunda̱a̱-inii̱ xa̱ʼa̱, ta saá va̱ʼaní xi̱kunii̱, xi̱ndakanixi̱níi̱ ña̱ xi̱numi Jehová yi̱ʼi̱. Nani xi̱kaʼvii̱ xi̱kiʼi̱n kuenta ña̱ xi̱kunda̱a̱va-ini Jehová xíʼin ña̱ xi̱ndoʼi̱ ta xi̱chindeétáʼanra xíʼi̱n”. Saátu kivi keʼé Jehová xíʼún, kivi chindeétáʼanra xíʼún ña̱ kǒo ndi̱ʼiní-iniún ta sandíkora-iniún (Sal. 119:143, 144).
JEHOVÁ KÍʼINRA KÚENTA XÍʼÚN
10. ¿Ndáa ki̱ʼva kúniyó tá ku̱a̱yaʼayó nu̱ú iin tu̱ndóʼo?
10 Tá yáʼayó nu̱ú iin tu̱ndóʼo koo ki̱vi̱ ña̱ ni loʼo kǒo kuni̱yó keʼéyó ni iin ña̱ʼa. Kivi kundoʼoyó nda̱a̱ táki̱ʼva ndóʼo iin ta̱ xínu soo nda̱kavara ta ki̱xáʼa xíka lenkora. Sana íxayo̱ʼvi̱níña xíʼinyó keʼéyó ña̱ xi̱kutóoníyó keʼéyó tá ya̱chi̱ nda̱a̱ táki̱ʼva ndo̱ʼo ta̱ Elías, ta ña̱ kúni̱ kuitíyó keʼéyó kúú ña̱ ku̱su̱nyó ta kǒo ndako̱oyó (1 Rey. 19:5-7). ¿Ndáaña káʼa̱n Jehová keʼéra xa̱ʼa̱yó tá vitá kúniyó?
11. ¿Ndáaka ña̱ kéʼé Jehová ña̱ va̱ʼa chindeétáʼanra xíʼinyó? (Salmo 94:18).
11 Ña̱ kéʼé Jehová. Jehová káʼa̱nra ña̱ kundaara miíyó (kaʼvi Salmo 94:18). b Nda̱a̱ táki̱ʼva ndóʼo iin ta̱ xínu tá túkueʼe̱ra xíniñúʼura ña̱ chindeétáʼanna xíʼinra, saátu miíyó tá ndákava-iniyó á xóʼvi̱yó, xíniñúʼuyó ña̱ chindeétáʼan Jehová xíʼinyó ña̱ va̱ʼa ndasakáʼnuyóra. Mií Jehová káʼa̱n ña̱yóʼo xíʼinyó: “Yi̱ʼi̱ Jehová Ndióxi̱ún tíi̱n ndaʼa̱ kúaʼún, yi̱ʼi̱ kúú ta̱ káʼa̱n ña̱yóʼo xíʼún: ‘Va̱ása yi̱ʼvíún yi̱ʼi̱ kúú ta̱ chindeétáʼan xíʼún’” (Is. 41:13). Tá ni̱ya̱ʼa ta̱ rey David nu̱ú ku̱a̱ʼá tu̱ndóʼo ta xi̱saa̱-inina xi̱xininara, ki̱ʼinra kuenta ña̱ ni̱xi̱yo Jehová xíʼinra, xa̱ʼa̱ ña̱kán ni̱ka̱ʼa̱nra: “Ndaʼa̱ kúaʼún tíinña yi̱ʼi̱” (Sal. 18:35). Soo, ¿ndáa ki̱ʼva chíndeétáʼan Jehová xíʼinyó?
Taxi ná chindeétáʼan na̱ veʼún xíʼún, na̱ migoún, xíʼin na̱ anciano. (Koto párrafo 11 nda̱a̱ 13).
12. Tá xóʼvi̱níyó, ¿ndáana kivi kuniñúʼu Jehová ña̱ chindeétáʼanna xíʼinyó?
12 Jehová kivi kuniñúʼura inka na̱ yiví ña̱ va̱ʼa chindeétáʼanra xíʼinyó, tá kúú tá nda̱kavaní-ini ta̱ David ta̱ Jonatán ni̱xa̱ʼa̱nra xi̱torara ta chi̱ka̱a̱níra ndee̱ xíʼinra (1 Sam. 23:16, 17). Saátu tá nda̱kava-ini ta̱ Elías, Jehová xi̱niñúʼura ta̱ Eliseo ña̱ va̱ʼa chindeétáʼanra xíʼinra (1 Rey. 19:16, 21; 2 Rey. 2: 2). Ta saátu miíyó, Jehová kivi kuniñúʼura na̱ veʼeyó, na̱ migoyó á na̱ anciano ña̱ va̱ʼa chindeétáʼanna xíʼinyó. Soo, tá ndákava-iniyó á tá kúni mitúʼunyó kǒo kúni̱yó kitáʼanyó xíʼin nda̱a̱ ni iin na̱ yiví, ta kúnda̱a̱va-ini Jehová xíʼin ña̱ ndóʼoyó. Soo, ¿ndáaña xíniñúʼu keʼéyó ña̱ va̱ʼa chindeétáʼanra xíʼinyó?
13. ¿Ndáaña xíniñúʼu keʼéyó ña̱ va̱ʼa chindeétáʼan Jehová xíʼinyó? (Koto na̱ʼná).
13 Ña̱ xíniñúʼu keʼéyó. Ná kǒo kuxíkáyó nu̱ú nda̱a̱ ni iinna saáchi tá kǒo xíínyó kutáʼanyó xíʼin inkana saá ndákaniníkaxi̱níyó xa̱ʼa̱ tu̱ndóʼo ña̱ kúúmiíyó ta xa̱ʼa̱ ña̱yóʼo kǒo ndaka̱xin viíyó ña̱ keʼéyó (Prov. 18:1). Ndiʼiyó tá yáʼayó nu̱ú iin tu̱ndóʼo kúni̱yó koo mitúʼunyó ta ña̱ va̱ʼava kúú ña̱yóʼo, soo tá xa̱a̱ ku̱a̱ʼání tiempo kéʼéyó ña̱yóʼo saá kǒo táxiyó ña̱ chindeétáʼan Jehová xíʼinyó á ña̱ taxira ndee̱ ndaʼa̱yó. Ña̱kán, ni yáʼayó nu̱ú iin tu̱ndóʼo ña̱ yo̱ʼvi̱ní ná taxiyó ña̱ chindeétáʼan na̱ veʼeyó xíʼinyó, na̱ migoyó ta saátu na̱ anciano, saáchi mií Jehová xíniñúʼu na̱yóʼo ña̱ chindeétáʼanna xíʼinyó (Prov. 17:17; Is. 32:1, 2).
JEHOVÁ SANDÍKORA-INIÚN
14. ¿Ndáaña kivi sayíʼvi miíyó?
14 Sana tá yáʼayó nu̱ú iin tu̱ndóʼo kíxáʼa yíʼviníyó. Biblia káʼa̱nña xa̱ʼa̱ ku̱a̱ʼání na̱ xi̱ndasakáʼnu Ndióxi̱ tiempo tá ya̱chi̱ na̱ ni̱ka̱ʼa̱n ña̱ xi̱yiʼvínína xa̱ʼa̱ tu̱ndóʼo ña̱ xi̱yaʼana nu̱ú saáchi na̱ xi̱saa̱-ini xi̱xinina xi̱kuni̱na kaʼnínana ta saátu xi̱yaʼana nu̱ú inkaka tu̱ndóʼo (Sal. 18:4; 55:1, 5). Ta miíyó, ¿á íyo na̱ íxandi̱va̱ʼa xíʼinyó? Tá kúú na̱ káchíñu xíʼinyó, na̱ káʼvi xíʼinyó escuela, na̱ veʼeyó á na̱ chíñu. Ta, ¿á ni̱ka̱ʼa̱n na̱ doctor xíʼinyó ña̱ si̱lóʼo tiempo kutakuyó chi kǒoka ta̱tán kue̱ʼe̱ ña̱ ndóʼoyó? Tá yáʼayó nu̱ú tu̱ndóʼo táʼan ña̱yóʼo kivi kundoʼoyó nda̱a̱ táki̱ʼva ndóʼo iin ta̱ loʼo ta̱ yíʼvíní ta̱ xíniñúʼu ña̱ chindeétáʼanna xíʼin. ¿Ndáaña kéʼé Jehová ña̱ va̱ʼa chindeétáʼanra xíʼinyó?
15. Nda̱a̱ táki̱ʼva káchi Salmo 94:19, ¿ndáaña káʼa̱n Jehová keʼéra xa̱ʼa̱yó?
15 Ña̱ kéʼé Jehová. Va̱ʼaní sándi̱ko Jehová iniyó (kaʼvi Salmo 94:19). c Ná ndakanixi̱níyó xa̱ʼa̱ iin ñá loʼo ñá yíʼviní ta kǒo kívi ku̱su̱nñá saáchi ndeéní ki̱xáʼa kúun sa̱vi̱ ta kóyo taxa, tasaá yiváñá ku̱a̱ʼa̱nra nu̱úñá ta númirañá ta viíkaví káʼa̱nra xíʼinñá ña̱ va̱ʼa ku̱su̱nñá, ndeéní kúun sa̱vi̱ soo ñá loʼo yóʼo kǒo yíʼvikañá chi xa̱a̱ íyo yiváñá xíʼinñá. Ki̱ʼva saátu ndóʼo miíyó, tá ná kixáʼa yi̱ʼviníyó Jehová káʼa̱nra ña̱ chindeétáʼanra xíʼinyó nda̱a̱ táki̱ʼva kéʼé iin ta̱a xíʼin se̱ʼera. ¿Ndáaña xíniñúʼu keʼéyó ña̱ va̱ʼa sandíko Jehová iniyó?
Taxi ná sandíkoo yiváún Jehová iniún xíʼin tu̱ʼunra. (Koto párrafo 15 xíʼin 16).
16. Tá kúni̱yó ña̱ sándi̱ko Jehová iniyó, ¿ndáaña xíniñúʼu keʼéyó? (Koto na̱ʼná).
16 Ña̱ xíniñúʼu keʼéyó. Ndáyáʼviní ña̱ tavayó tiempo ña̱ ka̱ʼa̱nyó xíʼin Jehová ta saátu ña̱ kaʼviyó tu̱ʼunra (Sal. 77:1, 12-14). Ña̱kán, tá ná ya̱ʼayó nu̱ú iin tu̱ndóʼo ña̱ yo̱ʼvi̱ ña̱ siʼna xíniñúʼu keʼéyó kúú ña̱ ka̱ʼa̱nyó xíʼin yiváyó Jehová. Ná ka̱ʼa̱nyó xíʼinra xa̱ʼa̱ ndiʼi ña̱ sándi̱ʼi̱-iniyó, ña̱ sáyi̱ʼví miíyó. Ná taxiyó ña̱ ndakuiinra oraciónyó ta ná taxiyó ña̱ sandíkora-iniyó (Sal. 119:28). Íyo sava texto ña̱ va̱xi nu̱ú Biblia ña̱ kivi chindeétáʼan xíʼinyó tá xóʼvi̱yó. Tá kúú ña̱ va̱xi nu̱ú Job, Salmos xíʼin Proverbios. Ta saátu tu̱ʼun ña̱ ni̱ka̱ʼa̱n ta̱ Jesús nu̱ú Mateo capítulo 6. Tá káʼún xíʼin Jehová ta káʼviún tu̱ʼunra, saá kúú ña̱ kotoún ndáa ki̱ʼva sandíkora-iniún.
17. ¿Ndáaña xíniñúʼu ndakaʼányó?
17 Ná ndakaʼányó xa̱ʼa̱ ña̱yóʼo: ndiʼi tiempo ña̱ yáʼayó nu̱ú tu̱ndóʼo chíndeétáʼanva Jehová xíʼinyó. Kǒo taxira ña̱ xo̱ʼvi̱níyó xíʼin iin tu̱ndóʼo ña̱ yáʼayó nu̱ú (Sal. 23:4; 94:14). Ná ndakaʼányó chi Jehová káʼa̱nra ña̱ kundaara miíyó, ña̱ kǒo taxira ña̱ kundi̱ʼi̱ní-iniyó, ña̱ kiʼinra kuenta xíʼinyó ta saátu ña̱ sándi̱kora-iniyó. Ta̱ Isaías ni̱ka̱ʼa̱nra xíʼin Jehová: “Kundaún na̱ ndáa-ini yóʼó, ndiʼi ki̱vi̱ sandíkoún-inina. Saáchi yóʼó kúú ta̱ kándíxana” (Is. 26:3). Ña̱kán, kundaa-ini Jehová ta taxi ña̱ chindeétáʼanra xíʼún. Tá saá kéʼún, kuumiíún ndee̱ ña̱ ya̱ʼún nu̱ú tu̱ndóʼo ña̱ yo̱ʼvi̱ní ña̱ kivi kixi nu̱ún.
¿NDÁAÑA NDAKUIÚN?
-
¿Ama xíniñúʼuníkayó ña̱ chindeétáʼan Jehová xíʼinyó?
-
¿Ndáa ku̱mí ña̱ʼa kéʼé Jehová ña̱ chindeétáʼanra xíʼinyó tá yáʼayó nu̱ú tu̱ndóʼo?
-
¿Ndáaña xíniñúʼu keʼéyó ña̱ va̱ʼa taxiyó chindeétáʼan Jehová xíʼinyó?
YAA 12 Jehová, Ndióxi̱yó ta̱ káʼnu