1. ¿Nda̱chun íxayo̱ʼvi̱ña xíʼinyó ña̱ ndaka̱xinyó ña̱ keʼéyó?

 NDIʼI ki̱vi̱ xíniñúʼu ndaka̱xinyó ndáaña keʼéyó. Íyo sava ña̱ kǒo íxayo̱ʼvi̱ xíʼinyó ndaka̱xinyó keʼéyó, tá kúú ndáaña kuxuyó á ndáa hora ku̱ʼu̱nyó ku̱su̱nyó. Soo íyova sava ña̱ íxayo̱ʼvi̱ní xíʼinyó ndaka̱xinyó keʼéyó. Tá kúú, ndáaña xíniñúʼu keʼéyó ña̱ va̱ʼa kǒo kiʼinyó kue̱ʼe̱, á ña̱ va̱ʼa si̱í koo miíyó ta saátu xíʼin na̱ veʼeyó á ndáaña keʼéyó ña̱ va̱ʼa ndasakáʼnuyó Ndióxi̱. Ta ña̱ kúni̱yó kúú ña̱ ná chindeétáʼan ña̱ ndáka̱xinyó keʼéyó xíʼin miíyó ta saátu xíʼin na̱ veʼeyó, soo ña̱ ndáyáʼviníka nu̱úyó kúú ña̱ ná kusi̱í-ini Jehová xíʼin ña̱ ndáka̱xinyó keʼéyó (Rom. 12:​1, 2).

 2. ¿Ndáaña chindeétáʼan xíʼinyó ña̱ vií ndaka̱xinyó ña̱ keʼéyó?

² Nu̱ú artículo yóʼo sakúaʼayó xa̱ʼa̱ u̱ni̱ ña̱ʼa ña̱ chindeétáʼan xíʼinyó ña̱ vií ndaka̱xinyó ña̱ keʼéyó. Ña̱ nu̱ú, xíniñúʼu kunda̱a̱-iniyó xa̱ʼa̱ ndiʼi ña̱ʼa. Ña̱ u̱vi̱, xíniñúʼu kiʼinyó kuenta ndáaña ndákanixi̱ní Jehová xa̱ʼa̱ ña̱yóʼo. Ña̱ u̱ni̱, xíniñúʼu ndakanixi̱níyó xa̱ʼa̱ iin tá iin ña̱ kivi keʼéyó. Saátu sakúaʼayó ndáaña xíniñúʼu keʼéyó ña̱ va̱ʼa vií ndakanixi̱níyó (Prov. 2:11).

XÍNIÑÚʼU KUNDA̱A̱-INIYÓ XA̱ʼA̱ NDIʼI ÑA̱ʼA

 3. Ka̱ʼa̱n xa̱ʼa̱ iin ejemplo ña̱ náʼa̱ nda̱chun ndáyáʼviní siʼna kunda̱a̱-iniyó xa̱ʼa̱ ndiʼi ña̱ʼa tasaá ndaka̱xinyó ña̱ keʼéyó.

³ Ña̱ va̱ʼa vií koo ña̱ ndaka̱xinyó keʼéyó, siʼna xíniñúʼu kunda̱a̱-iniyó xa̱ʼa̱ ndiʼi ña̱ʼa. ¿Nda̱chun ndáyáʼviní keʼéyó ña̱yóʼo? Ndakanixi̱ní xa̱ʼa̱ iin na̱ yiví ña̱ ku̱a̱ʼa̱nna nu̱ú doctor saáchi ndeéníndóʼona, ¿á xa̱a̱ ndi̱ku̱n taxi ta̱ doctor ta̱tán ndaʼa̱na? ¿Á siʼna kotovarana ta nda̱ka̱tu̱ʼunrana ndáaña ndóʼona? Ki̱ʼva saátu xíniñúʼu  keʼé miíún, siʼna xíniñúʼu kunda̱a̱-iniún xa̱ʼa̱ ndiʼi ña̱ʼa tasaá ndaka̱xiún ña̱ keʼún ña̱ va̱ʼa vií kanaña. ¿Ndáa ki̱ʼva keʼún ña̱yóʼo?

 4. Nda̱a̱ táki̱ʼva káchi Proverbios 18:​13, ¿ndáaña kivi chindeétáʼan xíʼún ña̱ kunda̱a̱-iniún xa̱ʼa̱ ndiʼi ña̱ʼa? (Koto na̱ʼná).

⁴ Tá kúni̱yó kunda̱a̱-iniyó xa̱ʼa̱ iin ña̱ʼa, xíniñúʼu nda̱ka̱tu̱ʼunyó. Tá kúú, ndakanixi̱ní ña̱ ka̱nana yóʼó ña̱ ku̱ʼún iin vikó. ¿Á xíniñúʼu ku̱ʼún vikó yóʼo? Tá va̱ása xíni̱ún na̱ kéʼé vikó yóʼo, á va̱ása xíni̱ún ndáaña keʼéna xíniñúʼu nda̱ka̱tu̱ʼúnna ña̱yóʼo: “¿Ndáa míí koo vikó yóʼo ta ama kooña? ¿Nda̱saa na̱ yiví ku̱ʼu̱n? ¿Ndáana kiʼin kuenta xíʼin vikó yóʼo? ¿Ndáana kúú na̱ ku̱ʼu̱n? ¿Ndáaña keʼéna? ¿Á koo ndixi koʼona?”. Ña̱ kunda̱a̱-iniún xa̱ʼa̱ ña̱yóʼo kúú ña̱ chindeétáʼan xíʼún ña̱ vií koo ña̱ ndaka̱xiún keʼún (kaʼvi Proverbios 18:13). a

 5. ¿Ndáaña keʼún tá xa̱a̱ kúnda̱a̱-iniún xa̱ʼa̱ ndiʼi ña̱ kivi kuu?

⁵ Tá xa̱a̱ ku̱ndaa̱-iniún xa̱ʼa̱ ndiʼi ña̱ʼa, ndakanixi̱ní xa̱ʼa̱ña. Tá kúú, ¿ndáaña keʼún tá ku̱ndaa̱-iniún ña̱ ti̱xin vikó kán ku̱ʼu̱n na̱ yiví na̱ kǒo ndíku̱n ña̱ káʼa̱n tu̱ʼun Ndióxi̱? ¿Á ndáaña keʼún tá ku̱ndaa̱-iniún ña̱ koo ndixi koʼona ta kǒo na̱ kiʼin kuenta xíʼinrá? ¿Á kivi xa̱a̱ vikó kán nduuña iin vikó nu̱ú kininí kéʼéna? (1 Ped. 4:3). Tá ná kooña ki̱vi̱ ña̱ xíyo reunión á ki̱vi̱ ña̱ ku̱ʼún natúʼún xa̱ʼa̱ tu̱ʼun Ndióxi̱, ¿ndáaña ndaka̱xiún keʼún? Tá ná ndakanixi̱níún xa̱ʼa̱ ndiʼi ña̱yóʼo saá  kúú ña̱ viíní koo ña̱ ndaka̱xiún keʼún. Ta su̱ví ña̱yóʼo kúú ndiʼi ña̱ kivi keʼún, saáchi íyotu inkaka ña̱ kivi keʼún. Xa̱a̱ kúnda̱a̱va-ini miíún ndáaña kivi keʼún, ¿soo ndáaña ndákanixi̱ní Jehová xa̱ʼa̱ ña̱yóʼo? (Prov. 2:6).

KIʼIN KUENTA XÍʼIN ÑA̱ NDÁKANIXI̱NÍ JEHOVÁ

 6. Nda̱a̱ táki̱ʼva káchi Santiago 1:​5, ¿nda̱chun xíniñúʼu ka̱ʼa̱nyó xíʼin Jehová ña̱ chindeétáʼanra xíʼinyó?

⁶ Ka̱ʼa̱n xíʼin Jehová ná chindeétáʼanra xíʼún kunda̱a̱-iniún ndáaña ndákanixi̱níra xa̱ʼa̱ ña̱yóʼo. Chi káʼa̱nra taxira ña̱ ndíchi “ndaʼa̱ ndiʼi na̱ ndúkúña nu̱úra ta va̱ása ndáʼyi̱ra nu̱úna” (kaʼvi Santiago 1:5). Ña̱ ndíchi ña̱ táxira ndaʼa̱yó kúú ña̱ chindeétáʼan xíʼinyó ña̱ kunda̱a̱-iniyó á kusi̱í-inira xíʼin ña̱ ndaka̱xinyó keʼéyó á va̱ása kusi̱í-inira xíʼinña.

 7. ¿Ndáaña kivi keʼún ña̱ va̱ʼa kunda̱a̱-iniún ndáaña ndákanixi̱ní Jehová? Ka̱ʼa̱n xa̱ʼa̱ iin ejemplo.

⁷ Tá xa̱a̱ ni̱ka̱ʼún xíʼin Jehová ña̱ ná chindeétáʼanra xíʼún ña̱ vií ndaka̱xiún ña̱ keʼún, koto ndáa ki̱ʼva ndákuiinra ña̱ ni̱ka̱ʼún xíʼinra. Ná ka̱ʼa̱nyó xa̱ʼa̱ iin ejemplo, ná kachiyó ña̱ ki̱taún ku̱a̱ʼún inka ñuu ta nda̱ñúʼún, sana ka̱ʼún xíʼin iin na̱ yiví na̱ íyo ñuu kán ña̱ ná chindeétáʼanna xíʼún. ¿Á su̱ví ña̱ nda̱a̱ kúú ña̱ kǒo ku̱ʼu̱nvíún tá kúma̱níka ka̱ʼa̱nna xíʼún? Saáchi ña̱ keʼún kúú ña̱ viíní kuniso̱ʼún tá ná ka̱ʼa̱nna xíʼún ndáaña kivi keʼún. Ki̱ʼva saá íyo ña̱ xíniñúʼu keʼún tá xa̱a̱ ndúkún ña̱ ndíchi nu̱ú Jehová, kivi kotoún ndáaña káʼa̱nra xíʼún nu̱ú tu̱ʼunra xa̱ʼa̱ ña̱ kúni̱ún ndaka̱xiún keʼún. Ná ndakani tuku xi̱níyó xa̱ʼa̱ vikó ña̱ xa̱a̱ ni̱ka̱ʼa̱nyó xa̱ʼa̱. Tá kúma̱níka ndaka̱xiún á  ku̱ʼún vikó kán, ndakanixi̱ní xa̱ʼa̱ ña̱ káʼa̱n Biblia xa̱ʼa̱ vikó nu̱ú kininí kéʼéna, ndakanixi̱ní xa̱ʼa̱ ña̱ káʼa̱nña ña̱ va̱ása kutáʼanyó xíʼin na̱ yiví na̱ kéʼé ña̱ va̱ása va̱ʼa, ta saátu ndakaʼún ña̱ káʼa̱nña ña̱ ná kundi̱ʼika-iniyó xa̱ʼa̱ Reino Ndióxi̱ nu̱úka ña̱ kundi̱ʼi-iniyó xa̱ʼa̱ ña̱ kúni̱ miíyó (Mat. 6:33; Rom. 13:13; 1 Cor. 15:33).

 8. ¿Ndáaña kivi keʼún ña̱ va̱ʼa ndani̱ʼún ña̱ kúni̱ún kunda̱a̱-iniún xa̱ʼa̱? (Koto na̱ʼná).

⁸ Sava yichi̱ kivi chindeétáʼan inkana xíʼún ña̱ va̱ʼa ndani̱ʼún ña̱ kúni̱ún kunda̱a̱-iniún xa̱ʼa̱. Na̱ kivi chindeétáʼan xíʼún kúú iin ta̱ hermano á iin ñá hermana na̱ xa̱a̱ xu̱xa-ini xíʼin tu̱ʼun Ndióxi̱, na̱ xa̱a̱ ni̱ya̱ʼa nu̱ú táʼan ña̱yóʼo. Soo saátu xíniñúʼu chikaa̱ miíún ndee̱ ña̱ nandukún xa̱ʼa̱ ña̱yóʼo. Ta íyo ku̱a̱ʼání ña̱ kivi chindeétáʼan xíʼún, tá kúú nu̱ú Guía de estudio para los testigos de Jehová ta saátu nu̱ú libro ña̱ naní Textos bíblicos para la vida cristiana, kivi ndani̱ʼún ña̱ chindeétáʼan xíʼún. Ta ndakaʼán chi ña̱ kúni̱ún kúú ña̱ sakúsi̱íún-ini Jehová xíʼin ña̱ ndáka̱xiún keʼún.

 9. ¿Ndáa ki̱ʼva kivi kunda̱a̱-iniyó á kutóo Jehová ña̱ ndaka̱xinyó keʼéyó? (Efesios 5:17).

⁹ ¿Ndáa ki̱ʼva kivi kunda̱a̱-iniyó á kusi̱í-ini Jehová xíʼin ña̱ ndakaxinyó keʼéyó? Ña̱ nu̱ú, xíniñúʼu kuxini̱ va̱ʼayóra. Ta Proverbios 9:10 káchiña: “Tá ná xa̱a̱yó sakúaʼayó xa̱ʼa̱ra saá kúú ña̱ ndíchiní kooyó”. Ña̱yóʼo kúni̱ kachiña ña̱ va̱ʼa xa̱a̱yó kunda̱a̱-iniyó xa̱ʼa̱ Jehová, xíniñúʼu kunda̱a̱-iniyó xa̱ʼa̱ ña̱ va̱ʼa ña̱ kúúmiíra, xa̱ʼa̱ ña̱ káʼa̱nra keʼéra chí nu̱únínu, xa̱ʼa̱ ña̱ kútóora ta saátu xa̱ʼa̱ ña̱ kúndasíra xínira. Ndakanixi̱ní xa̱ʼa̱ ña̱yóʼo: “Tá ná kuniñúʼi̱ ndiʼi ña̱ xa̱a̱ kúnda̱a̱-inii̱ xa̱ʼa̱ Jehová ña̱ va̱ʼa ndaka̱xii̱n keʼíi̱ iin ña̱ʼa, ¿á kutóora ña̱ ndaka̱xii̱n keʼíi̱?” (kaʼvi Efesios 5:17).

10. ¿Nda̱chun ndáyáʼviníka ña̱ sánáʼa̱ Jehová miíyó nu̱úka costumbre ña̱ ndíku̱n na̱ veʼeyó á na̱ ñuuyó?

¹⁰ Ña̱ va̱ʼa sakúsi̱íyó-ini Jehová, sava yichi̱ xíniñúʼu ndaka̱xinyó keʼéyó ña̱ kǒo kíndo̱o-ini na̱ veʼeyó á na̱ migoyó xíʼin. Ná ka̱ʼa̱nyó xa̱ʼa̱ na̱ íyo iin ñá loʼo se̱ʼe. Xa̱ʼa̱ ña̱ ndíʼi̱-inina xa̱ʼa̱ñá kúni̱na ña̱ ná tindaʼa̱ñá xíʼin iin ta̱ hermano ta̱ íyoní xu̱ʼún ni va̱ása kítáʼan viíra xíʼin Jehová. Ña̱ ndixa kúúva ña̱ kǒo kúni̱na ña̱ ná kuma̱ní xu̱ʼún nu̱ú ñá loʼo se̱ʼena. Soo, ¿ndáana chindeétáʼan xíʼinñá ña̱ vií kutáʼanñá xíʼin Jehová? ¿Ndáaña ndákanixi̱ní Jehová xa̱ʼa̱ ña̱yóʼo? Mateo 6:33 káʼa̱nña xíʼin miíyó na̱ ndásakáʼnu Jehová ña̱ siʼna Reino Ndióxi̱ ná kundi̱ʼi-iniyó xa̱ʼa̱. Ni íxato̱ʼóvayó na̱ yiváyó ta íxato̱ʼóyó inka na̱ yiví, soo ña̱ ndáyáʼviníka nu̱úyó kúú ña̱ keʼéyó ña̱ sákusi̱í-ini Jehová.

NDAKANIXI̱NÍ XA̱ʼA̱ IIN TÁ IIN ÑA̱ KIVI KEʼÚN

11. Nda̱a̱ táki̱ʼva káchi Filipenses 1:​9, 10, ¿ndáaña chindeétáʼan xíʼún ña̱ vií koo ña̱ ndaka̱xiún keʼún?

¹¹ Tá xa̱a̱ ku̱ndaa̱-iniún ndáaña káʼa̱n Biblia xa̱ʼa̱ ña̱ kúni̱ún ndaka̱xiún keʼún, xíniñúʼu ndakanixi̱níún xa̱ʼa̱ iin tá iin ña̱ kivi keʼún (kaʼvi Filipenses 1:​9, 10). ¿Ndáa ki̱ʼva keʼún ña̱yóʼo? Xíniñúʼu viíní ndakanixi̱níún ndáaña kivi kuu tá ná ndaka̱xiún keʼún iin ña̱ʼa. Sava yichi̱ va̱ása ixayo̱ʼvi̱víña xíʼún ndaka̱xiún ña̱ keʼún, soo sava yichi̱ kivi ixayo̱ʼvi̱ña xíʼún ña̱ kunda̱a̱-iniún ndáaña kúú ña̱ va̱ʼaka keʼún. Soo tá viíní ná ndakanixi̱níún, ña̱yóʼo chindeétáʼan xíʼún ña̱ vií ndaka̱xiún ña̱ keʼún ni sava yichi̱ íxayo̱ʼvi̱ña xíʼún.

12, 13. Ña̱ vií ndakanixi̱níún, ¿ndáa ki̱ʼva chindeétáʼanña xíʼún ña̱ ndaka̱xiún iin chiñu kachíñún?

¹² Ndakanixi̱ní ña̱ xíkaún ndúkún iin chiñu nu̱ú kachíñún ña̱ va̱ʼa taxiún ña̱ xíniñúʼu na̱ veʼún, tasaá nda̱ni̱ʼún u̱vi̱ lugar nu̱ú kivi kachíñún. Tá kúma̱níka kiʼún chiñu yóʼo xíniñúʼu ndakanixi̱níún ndáa chiñu kúúña, ndáa hora kúú ña̱ xíniñúʼu kachíñún ta saátu á yatin á xíká kíndo̱oña. Tá ki̱ʼún kuenta ña̱ kǒo yáʼandosoví u̱vi̱ saá chiñu yóʼo ña̱ káʼa̱n Biblia, sana ndaka̱xinvaún kiʼún iin chiñu yóʼo xa̱ʼa̱ ña̱ kútóúnña á xa̱ʼa̱ ña̱ ku̱a̱ʼáka xu̱ʼún chaʼvina yóʼó. Soo íyo inkaka ña̱ xíniñúʼu kiʼún kuenta xíʼin tá kúma̱níka kiʼún chiñu yóʼo.

 ¹³ Tá ná kiʼún iin chiñu yóʼo, ¿á kasiña nu̱ú ña̱ ku̱ʼún reunión? ¿Á kasiña nu̱ún ña̱ chindeétáʼún xíʼin na̱ veʼún ta saátu ña̱ sanáʼúnna xa̱ʼa̱ Jehová? Tá ná ndakanixi̱níún xa̱ʼa̱ ña̱yóʼo, chindeétáʼanña xíʼún keʼún ña̱ ndáyáʼvika, tá kúú ña̱ ndasakáʼnún Jehová ta saátu ña̱ taxiún ña̱ xíniñúʼu na̱ veʼún, nu̱úka ña̱ kundi̱ʼiní-iniún xa̱ʼa̱ xu̱ʼún. Tasaá kúú ña̱ va̱ʼaní koo ña̱ ndaka̱xiún keʼún ta mií Jehová taxi ku̱a̱ʼání bendición ndaʼún.

14. Tá viíní ndákanixi̱níyó ta kúʼvi̱-iniyó xíniyó inkana, ¿ndáa ki̱ʼva chindeétáʼanña xíʼinyó?

¹⁴ Ña̱ vií ndakanixi̱níyó chindeétáʼanña xíʼinyó ña̱ kiʼinyó kuenta ndáa ki̱ʼva xíto inkana ña̱ ndáka̱xinyó keʼéyó, tasaá kǒo sandákavayó-ini inkana (Filip. 1:10). Ta ndáyáʼviní ña̱yóʼo tá ndáka̱xinyó ndáa ti̱ko̱to̱ kúú ña̱ kundixiyó á ndáa ki̱ʼva ndasaviíyó miíyó. Tá kúú, tá íyo iin ti̱ko̱to̱ ña̱ kútóoníyó kundixiyó, ná ndakanixi̱níyó á kivi sandakavaña-ini na̱ hermano á inka na̱ yiví.  Ta ña̱ viíní ndakanixi̱níyó kúú ña̱ chindeétáʼan xíʼinyó ña̱ ixato̱ʼóyó ña̱ ndákanixi̱ní inkana. Ta ña̱ kúʼvi̱-iniyó xíniyó inkana kúú ña̱ chindeétáʼan xíʼinyó ña̱ kundi̱ʼi-iniyó xa̱ʼa̱na ta vií ndaka̱xinyó ti̱ko̱to̱ kundixiyó (1 Cor. 10:​23, 24, 32; 1 Tim. 2:​9, 10). Saá kúú ña̱ viíní koo ña̱ ndaka̱xinyó keʼéyó ta na̱ʼa̱yó ña̱ kúʼvi̱-iniyó xíniyó inkana ta saátu íxato̱ʼóyóna.

15. ¿Ndáaña xíniñúʼu ndakanixi̱níún xa̱ʼa̱ tá kúma̱níka ndaka̱xiún keʼún iin ña̱ ndáyáʼviní?

¹⁵ Tá iin ña̱ ndáyáʼviní kúú ña̱ ndáka̱xiún keʼún, xíniñúʼu viíní ndakanixi̱níún ndáaña kúú ña̱ kivi keʼún ña̱ va̱ʼa saxínún ña̱yóʼo. Ta̱ Jesús sa̱náʼa̱ra miíyó ña̱ taváyó ki̱ʼva xíʼin ña̱ kéʼéyó (Luc. 14:28). Ña̱kán ndakanixi̱ní nda̱saa ndeún kuniñúʼún, nda̱saa tiempo kuniñúʼún ta saátu nda̱saa xu̱ʼún kuniñúʼún ña̱ va̱ʼa saxínún ña̱ nda̱kaxiún keʼún. Sava yichi̱ xíniñúʼu ka̱ʼún xíʼin na̱ veʼún xa̱ʼa̱ ña̱yóʼo ña̱ va̱ʼa kotona ndáaña kivi keʼéna ña̱ va̱ʼa chindeétáʼanna xíʼún ña̱ saxínún ña̱ nda̱kaxiún keʼún. ¿Nda̱chun ndáyáʼviní keʼún ndiʼi ña̱yóʼo? Saáchi ña̱yóʼo kivi chindeétáʼan xíʼún ña̱ kotoún á xíniñúʼu nasamaún sava ña̱ʼa á sanatu íyo inka ña̱ va̱ʼaka kivi keʼún. Tá ná nda̱ka̱tu̱ʼún na̱ veʼún xa̱ʼa̱ ña̱yóʼo, kuniso̱ʼo ña̱ ka̱ʼa̱nna xíʼún chi saá kúú ña̱ va̱ʼaníka chindeétáʼanna xíʼún ña̱ viíní kana ña̱ nda̱kaxiún keʼún (Prov. 15:22).

IIN ÑA̱ VA̱ʼANÍKA NDAKA̱XIÚN KEʼÚN

16. ¿Ndáaña xíniñúʼu keʼún ña̱ va̱ʼa vií kana ndiʼi ña̱ kúni̱ún keʼún? (Koto recuadro “ ¿Ndáa ki̱ʼva viíní ndaka̱xiún ña̱ keʼún?”).

¹⁶ Tá xa̱a̱ ke̱ʼún ndiʼi ña̱ xa̱a̱ ni̱ka̱ʼa̱nyó xa̱ʼa̱ yóʼo, vitin xa̱a̱ íyo tu̱ʼvaún ña̱ viíní ndaka̱xiún ña̱ keʼún. Ndakaʼán, siʼna xíniñúʼu kunda̱a̱-iniún xa̱ʼa̱ ndiʼi ña̱ʼa ta saátu nandukún ndáaña káʼa̱n tu̱ʼun Ndióxi̱ xa̱ʼa̱ ña̱yóʼo chi saá kúú ña̱ sakúsi̱íún-ini Jehová. Saátu kivi ka̱ʼún xíʼin Jehová ña̱ ná chindeétáʼanra xíʼún ña̱ vií kana ndiʼi ña̱ xa̱a̱ ndaka̱xiún keʼún.

17. ¿Ndáana kivi chindeétáʼan xíʼinyó ña̱ viíní koo ña̱ ndaka̱xinyó keʼéyó?

¹⁷ Sana tá ya̱chi̱ xa̱a̱ ku̱a̱ʼání ña̱ nda̱kaxiún ke̱ʼún ta viíníva ka̱naña. Soo ni saá xíniñúʼu ndakaʼún ña̱ su̱ví xa̱ʼa̱ ña̱ ndíchiníún á xa̱ʼa̱ ña̱ xíni̱níún kúú ña̱ chindeétáʼan xíʼún ña̱ ndaka̱xin viíún ña̱ keʼún, chi ña̱ xíniñúʼu keʼún kúú ña̱ kundaa-iniún Jehová saáchi ndíchiníka ta̱yóʼo. Iinlá ta̱yóʼo kúú ta̱ kivi taxi ña̱ ndíchi ndaʼún, tasaá vií ndakanixi̱níún ta viíní koo ña̱ ndaka̱xiún keʼún (Prov. 2:​1-5). Ña̱kán mií Jehová kúú ta̱ kivi chindeétáʼan xíʼún ña̱ vií koo ña̱ ndaka̱xiún keʼún tasaá sakúsi̱íún-inira (Sal. 23:​2, 3).