1. ¿Ndáaña ndíʼi̱ka-ini na̱ yiví xa̱ʼa̱ tiempo vitin?

 TIEMPO vitin xítoyó ña̱ ku̱a̱ʼání na̱ yiví ndíʼi̱níka-inina xa̱ʼa̱ miína. Tá kúú ku̱a̱ʼání na̱ yiví xíniñúʼuna Internet ña̱ va̱ʼa koto inkana ndáa ki̱ʼva íyona ta ndáaña xa̱a̱ ku̱a̱ʼa̱nna kéʼéna. Soo loʼo kuitíva kúú na̱ yiví na̱ ndásakáʼnu Jehová Ndióxi̱. Nu̱ú artículo yóʼo kotoyó ndáaña kúni̱ kachi ña̱ ndasakáʼnuyó Jehová ta nda̱chun xíniñúʼu keʼéyó ña̱yóʼo. Ta saátu sakúaʼayó ndáa ki̱ʼva ndasakáʼnuyó Ndióxi̱ chi ta̱yóʼo kúú ta̱ xíniñúʼu ndukáʼnu ta saátu sakúaʼayó ndáa ki̱ʼva ndasakáʼnu miíra ki̱vi̱ra chí nu̱únínu.

¿NDÁAÑA KÚNI̱ KACHI ÑA̱ NDASAKÁʼNUYÓ JEHOVÁ?

 2. ¿Ndáa ki̱ʼva ni̱na̱ʼa̱ Jehová ña̱ kúúmiíníra ndee̱ chí yuku̱ Sinaí? (Koto na̱ʼná ña̱ va̱xi chí nu̱ú kíxáʼa tutu yóʼo).

² Ña̱ Biblia káʼa̱nña xíʼinyó ña̱ kúú Jehová iin Ndióxi̱ ta̱ kúúmií ku̱a̱ʼání ndee̱ ta ndáyáʼviníra. Tá ni̱ya̱ʼa loʼo tiempo ña̱ ke̱e na̱ ñuu Israel chí ñuu Egipto nu̱ú ni̱xo̱ʼvi̱nína, Jehová ni̱na̱ʼa̱ra nu̱úna ña̱ kúúmiíníra ndee̱. Ná ndakanixi̱níyó xa̱ʼa̱ ña̱ ku̱u: ku̱a̱ʼání na̱ israelita nda̱kutáʼanna ndítana xa̱ʼa̱ yuku̱ Sinaí ña̱ va̱ʼa kuniso̱ʼona ña̱ ka̱ʼa̱n Ndióxi̱ xíʼinna ta iin vi̱kó ña̱ tu̱únní nda̱kasiña xi̱ní yuku̱ yóʼo. Tasaá ndeéní ki̱xáʼa táan, ki̱xáʼa kée yi̱ʼma̱ xi̱ní yuku̱ yóʼo, ndeéní ndáʼyi̱ sa̱vi̱ ta kóyo taxa ta saátu ndeéní táku̱ ña̱ tívina ndiki̱ (Éx. 19:​16-18; 24:17; Sal. 68:8). Sana nda̱kanda̱ní-ini na̱ israelita tá xi̱nina ña̱ ni̱na̱ʼa̱ Jehová nu̱úna ña̱ kúúmiíníra ndee̱.

 3. ¿Ndáaña kúni̱ kachi ña̱ ndasakáʼnuyó Jehová?

³ ¿Ndáaña kivi keʼé miíyó? ¿Á kivi ndasakáʼnuyó Jehová? Kiviva keʼéyó ña̱yóʼo tá káʼa̱nyó xíʼin ndiʼi na̱ yiví xa̱ʼa̱ ndee̱ ña̱ kúúmiíra ta saátu xa̱ʼa̱ ña̱ va̱ʼa ña̱ kúúmiíra. Inka ki̱ʼva ña̱ kivi keʼéyóña  kúú ña̱ ndasakáʼnuyóra xa̱ʼa̱ ña̱ chíndeétáʼanra xíʼinyó ña̱ va̱ʼa keʼéyó sava ña̱ʼa (Is. 26:12). Ña̱yóʼo kúú ña̱ ke̱ʼé ta̱ rey David. Iin yichi̱ ke̱ʼéra iin oración tá nda̱kutáʼan ndiʼi na̱ ñuu Israel ta ni̱ka̱ʼa̱nra: “Miíún Jehová káʼnuníún, kúúmiíníún ndee̱, kuenta miíún kúú ndiʼi ña̱ʼa ña̱ livi, ndáyáʼviníún ta xíniñúʼu ixato̱ʼóna yóʼó, saáchi ndiʼi ña̱ʼa ña̱ íyo chí ndiví ta saátu nu̱ú ñuʼú kuenta miíún kúúña”. Tá sa̱ndíʼira ke̱ʼéra oración, “ndiʼi na̱ nda̱kutáʼan kán nda̱sakáʼnuna Jehová” (1 Crón. 29:​11, 20).

 4. ¿Ndáa ki̱ʼva xi̱ndasakáʼnu ta̱ Jesús Jehová?

⁴ Tá ni̱xi̱yo ta̱ Jesús nu̱ú ñuʼú yóʼo, ku̱a̱ʼání ki̱ʼva nda̱sakáʼnura yivára. Tá kúú, tá xi̱keʼé ta̱ Jesús milagro xi̱kaʼa̱nra xíʼin na̱ yiví ña̱ xíʼin ndee̱ mií Jehová xi̱keʼéraña (Mar. 5:​18-20). Saátu xi̱ndasakáʼnu ta̱ Jesús yivára xíʼin ki̱ʼva ña̱ xi̱kaʼa̱nra xíʼin inkana xa̱ʼa̱ra ta saátu xíʼin ki̱ʼva ña̱ xi̱keʼéra xíʼin inkana. Iin yichi̱, tá ndíkaa̱ ta̱ Jesús ini iin sinagoga sánáʼa̱ra na̱ yiví ta tañu na̱ yiví kán ndíkaa̱ iin ñaʼá ñá xa̱a̱ 18 ku̱i̱ya̱ kúúmií ta̱chí ndi̱va̱ʼa. Xa̱ʼa̱ ña̱ xi̱kuumiíñá ta̱chí ndi̱va̱ʼa yóʼo ku̱toso ndiʼiñá ta va̱ása níxi̱kivi ndaka̱ñá. Xi̱xoʼvi̱nívañá xa̱ʼa̱ ña̱yóʼo. Tá xi̱ni ta̱ Jesús ña̱ xóʼvi̱ní ñá ñaʼá yóʼo, ku̱ndáʼviní-inira xi̱nirañá ta ni̱ka̱ʼa̱nra xíʼinñá: “Xa̱a̱ ku̱a̱ʼa̱nva kue̱ʼe̱ ña̱ kúúmiíún”. Tasaá “chi̱núu ndaʼa̱ra sa̱táñá ta ndi̱ku̱n ndu̱nda̱kúñá ta ki̱xáʼañá ndásakáʼnuñá Ndióxi̱” (Luc. 13:​10-13). Ñá ñaʼá yóʼo nda̱sakáʼnuñá Jehová xa̱ʼa̱ ña̱ ke̱ʼéra xa̱ʼa̱ñá ta saátu miíyó xíniñúʼu ndasakáʼnuyó Jehová xa̱ʼa̱ ña̱ kéʼéra xa̱ʼa̱yó.

¿NDÁA XA̱ʼA̱ KÚÚ ÑA XÍNIÑÚʼU NDASAKÁʼNUYÓ JEHOVÁ?

 5. ¿Ndáa xa̱ʼa̱ kúú ña̱ xíniñúʼu ixato̱ʼóyó Jehová?

⁵ Ndásakáʼnuyó Jehová saáchi íxato̱ʼóníyóra. Íyo ku̱a̱ʼání xa̱ʼa̱ ña̱ xíniñúʼu ixato̱ʼóyóra. Ku̱a̱ʼání ndee̱ kúúmií Jehová ta kǒo ndíʼi ndee̱ra (Sal. 96:​4-7). Tá xítoyó ndiʼi ña̱ʼa ña̱ i̱xava̱ʼara kíʼinyó kuenta ña̱ kúúmiíníra ña̱ ndíchi. Ta̱xira ña̱ tákuyó ta saátu táxira ndiʼi ña̱ xíniñúʼuyó ña̱ va̱ʼa kutakuyó (Apoc. 4:11). Iinlá Jehová kúú ta̱ nda̱kúní-ini (Apoc. 15:4). Viíní kána ndiʼi ña̱ kéʼéra ta ndiʼi tiempo sáxi̱nura ña̱ káʼa̱nra (Jos. 23:14). Xa̱ʼa̱ ña̱kán, ta̱ profeta Jeremías ni̱ka̱ʼa̱nra ña̱yóʼo xíʼinra: “Nu̱ú ndiʼika na̱ ndíchi xíʼin na̱ chíñu na̱ íyo inka ñuu, kǒo nda̱a̱ ni iin na̱ íyo nda̱a̱ táki̱ʼva íyo yóʼó” (Jer. 10:​6, 7). Xa̱ʼa̱ ña̱kán, íyo ku̱a̱ʼání xa̱ʼa̱ ña̱ xíniñúʼu ixato̱ʼóyó yiváyó ta̱ íyo chí ndiví. Ta su̱ví kuití íxato̱ʼóyóra chi saátu kúʼvi̱-iniyó xíniyóra.

 6. ¿Nda̱chun kúʼvi̱-iniyó xíniyó Jehová?

⁶ Ndásakáʼnuyó Jehová saáchi kúʼvi̱ní-iniyó xíniyóra. Ku̱a̱ʼání ña̱ va̱ʼa kúúmií Jehová, xa̱ʼa̱ ña̱kán kúʼvi̱ní-iniyó xíniyóra. Tá kúú, va̱ʼaní-inira ta kúndáʼviní-inira xínira miíyó (Sal. 103:13; Is. 49:15). Kúndáʼviní-inira xínira miíyó tá xítora ña̱ xóʼvi̱yó (Zac. 2:8). Chíndeétáʼanra xíʼinyó ña̱ kuyatinyó nu̱úra ta saátu ña̱ kooyó migora (Sal. 25:14; Hech. 17:27). Ta saátu vitání-inira ta “sánuura xi̱níra ña̱ va̱ʼa kotora ndiví xíʼin ñuʼú ña̱ va̱ʼa ndaniʼira na̱ vitá-ini tañu yáká” (Sal. 113:​6, 7). Xa̱ʼa̱ ndiʼi ña̱yóʼo kúni̱yó ndasakáʼnuyó Ndióxi̱yó (Sal. 86:12).

 7. Xa̱ʼa̱ ña̱ ku̱a̱ʼání ña̱ vatá káʼa̱n ta̱ Ndi̱va̱ʼa xa̱ʼa̱ Jehová, ¿ndáaña kivi keʼéyó?

⁷ Ndásakáʼnuyó Jehová saáchi kúni̱yó ña̱ ná kunda̱a̱-ini na̱ yiví xa̱ʼa̱ra. Ku̱a̱ʼánína va̱ása va̱ʼa íyo ña̱ ndákanixi̱nína xa̱ʼa̱ Ndióxi̱. ¿Nda̱chun? Saáchi ta̱ Ndi̱va̱ʼa ku̱a̱ʼání ña̱ vatá káʼa̱nra xa̱ʼa̱ Jehová ta sákara xi̱ní na̱ yiví (2 Cor. 4:4). Chíkaa̱ra xi̱ní na̱ yiví ña̱ ndakanixi̱nína ña̱ ndi̱va̱ʼaní-ini Jehová ta va̱ása ndíʼi̱-inira xa̱ʼa̱na, ta saátu ña̱ kúúmiíra ku̱a̱chi xa̱ʼa̱ ndiʼi tu̱ndóʼo ña̱ kúú iníísaá ñuyǐví. Soo miíyó kúnda̱a̱-iniyó ña̱ su̱ví saá íyora ta kivi chindeétáʼanyó xíʼin na̱ yiví ña̱ kunda̱a̱-inina ndáa ki̱ʼva íyo Ndióxi̱yó, tasaá ndasakáʼnuyóra (Is. 43:10). Vitin ka̱ʼa̱nyó xa̱ʼa̱ sava versículo ña̱ va̱xi nu̱ú Salmo 96, ña̱ káʼa̱n xa̱ʼa̱ ña̱ ndasakáʼnuyó Jehová. Ña̱yóʼo chindeétáʼanña xíʼinyó ña̱ kunda̱a̱-iniyó ndáa ki̱ʼva ndasakáʼnuyó Jehová chi ta̱yóʼo kúú ta̱ xíniñúʼu ndukáʼnu.

 ¿NDÁAÑA KIVI KEʼÉYÓ ÑA̱ VA̱ʼA NDASAKÁʼNUYÓ JEHOVÁ?

 8. ¿Ndáa inka ki̱ʼva kivi ndasakáʼnuyó Jehová? (Salmo 96:​1-3).

⁸ (Kaʼvi Salmo 96:​1-3). a Kivi ndasakáʼnuyó Jehová tá káʼa̱nyó xíʼin inkana xa̱ʼa̱ra. Nu̱ú versículo yóʼo káʼa̱nña xíʼin miíyó na̱ ndásakáʼnu Jehová ña̱ ná katayó nu̱úra, káʼa̱n va̱ʼayó xa̱ʼa̱ ki̱vi̱ra, natúʼunyó xa̱ʼa̱ ña̱ sáka̱kura miíyó ta ka̱ʼa̱nyó xa̱ʼa̱ ndee̱ ña̱ kúúmiíra xíʼin inka na̱ yiví. Tá kéʼéyó ndiʼi ña̱yóʼo, saá kúú ña̱ ndásakáʼnuyó yiváyó ta̱ íyo chí ndiví. Tá kúú, na̱ judío na̱ nda̱kúní ni̱xi̱yo ini ta saátu na̱ cristiano na̱ ni̱xi̱yo tá siglo nu̱ú, xi̱chikaa̱nína ndee̱ ña̱ ka̱ʼa̱n va̱ʼana xa̱ʼa̱ Jehová ta saátu ña̱ ka̱ʼa̱nna xa̱ʼa̱ ndiʼi ña̱ va̱ʼa ña̱ ke̱ʼéra xa̱ʼa̱na (Dan. 3:​16-18; Hech. 4:29). ¿Ndáa ki̱ʼva kivi kundiku̱nyó yichi̱ na̱yóʼo?

9, 10. ¿Ndáaña sákuaʼayó xíʼin ña̱ ke̱ʼé ñá Angelina? (Koto na̱ʼná).

⁹ Ná kotoyó ña̱ ndo̱ʼo iin ñá hermana ñá íyo Estados Unidos ñá naní Angelina. b Ñáyóʼo ndakúní ni̱xi̱yo iniñá ta ni̱ka̱ʼa̱n va̱ʼañá xa̱ʼa̱ ki̱vi̱ Jehová nu̱ú káchíñuñá. Xa̱ʼa̱ ña̱ sa̱kán kixáʼañá kachíñuñá, ka̱nanañá ña̱ ku̱ʼu̱nñá iin reunión xíʼin ndiʼi na̱ kixáʼa kachíñu xíʼinñá ña̱ va̱ʼa natúʼunna xa̱ʼa̱ ña̱ kéʼéna tasaá kuxini̱-táʼanna. Ñáyóʼo i̱xatu̱ʼvañá sava na̱ʼná ña̱ va̱ʼa na̱ʼa̱ñá nu̱úna ña̱ kúsi̱íní-iniñá ña̱ kúúñá testigo Jehová. Soo tá kúma̱níka ka̱ʼa̱nñá, iin ta̱ káchíñu xíʼinñá ni̱ka̱ʼa̱nra ña̱ nani tá loʼovíra xa̱a̱ kúú na̱ yivára testigo Jehová ña̱kán xi̱kunda̱a̱va-inira xa̱ʼa̱ Jehová. Soo ki̱xáʼara káʼa̱nra ña̱ va̱ása va̱ʼa xa̱ʼa̱ na̱ testigo Jehová ta saátu xa̱ʼa̱ ña̱ kándíxana. Ñá Angelina káchiñá: “Ni̱ndi̱ʼi̱ní-inii̱ xa̱ʼa̱ ña̱yóʼo. Soo nda̱kanixi̱níi̱: ‘Va̱ása taxii̱ ña̱ ka̱ʼa̱nna ña̱ vatá xa̱ʼa̱ Jehová, xíniñúʼu ka̱ʼi̱n xíʼinna ndáa ki̱ʼva íyo Jehová’”.

¹⁰ Tá sa̱ndíʼi ta̱ káchíñu xíʼin ñá Angelina ni̱ka̱ʼa̱nra xa̱ʼa̱ ña̱ kéʼéra, ñáyóʼo ndi̱ku̱n ke̱ʼé ya̱áñá oración nu̱ú Jehová ña̱ va̱ʼa chindeétáʼanra xíʼinñá. Tándi̱ʼi, to̱ʼóní ni̱ka̱ʼa̱nñá xíʼinra: “Inkáchiva íyo ki̱ʼva ña̱ xa̱ʼnuyó, saátu yi̱ʼi̱ testigo Jehová kúú na̱ yivái̱ nda̱a̱ tá loʼoví, soo yi̱ʼi̱ ndákundeíi̱ ndásakáʼnui̱ Jehová”. Ni yo̱ʼvi̱ní ña̱ ni̱ya̱ʼa ñáyóʼo nu̱ú, soo kǒo níndi̱ʼiní-iniñá. Tasaá ñá Angelina ni̱na̱ʼa̱ñá nu̱ú na̱ káchíñu xíʼinñá sava na̱ʼná nu̱ú va̱xi miíñá xíʼin na̱ migoñá tá káchíñuna nu̱ú Jehová xíʼin ña̱ si̱í-ini, tasaá xíʼin ña̱ to̱ʼó ni̱ka̱ʼa̱nñá xíʼinna xa̱ʼa̱ ña̱ kándíxañá  Ndióxi̱ (1 Ped. 3:15). Tándi̱ʼi ni̱ka̱ʼa̱nñá xa̱ʼa̱ ña̱ kéʼéñá, ta̱ káchíñu xíʼinñá kǒo ni̱ka̱ʼa̱nkara ña̱ va̱ása va̱ʼa xa̱ʼa̱ na̱ testigo Jehová, ta nda̱a̱ ni̱ka̱ʼa̱nra ña̱ saátu ta̱yóʼo íyo ña̱ liviní ndákaʼánra xa̱ʼa̱ tá xi̱sakúaʼara xa̱ʼa̱ Jehová. Ñá Angelina káchiñá: “Ndáyáʼviní ndakiʼinyó tu̱ʼun Jehová”. Saátu miíyó ndáyáʼviní ka̱ʼa̱n va̱ʼayó xa̱ʼa̱ Jehová ta ndasakáʼnuyóra ni sava yichi̱ káʼa̱nna ña̱ va̱ása va̱ʼa xa̱ʼa̱ra.

11. ¿Ndáa ki̱ʼva ndíku̱n miíyó na̱ ndásakáʼnu Jehová ña̱ káʼa̱n Salmo 96:8?

¹¹ (Kaʼvi Salmo 96:8). c Kivi ndasakáʼnuyó Jehová tá táxiyó ña̱ʼa ña̱ kúúmiíyó ndaʼa̱ra. Na̱ ndásakáʼnu Jehová, xa̱a̱ ku̱a̱ʼání tiempo kéʼéna ña̱yóʼo ña̱ va̱ʼa ndasakáʼnunara (Prov. 3:9). Tá kúú, na̱ israelita ta̱xina ña̱ʼa ña̱ kúúmiína ña̱ va̱ʼa ixava̱ʼana templo ta saátu ña̱ kiʼinna kuenta xíʼinña (2 Rey. 12:​4, 5; 1 Crón. 29:​3-9). Sava na̱ discípulo ta̱ Jesús xi̱xiniñúʼuna ña̱ʼa ña̱ kúúmiína ña̱ va̱ʼa chindeétáʼanna xíʼinra ta saátu xíʼin na̱ apóstolra (Luc. 8:​1-3). Ta saátu ke̱ʼé na̱ cristiano na̱ ni̱xi̱yo tá siglo nu̱ú, saáchi ta̱xina ña̱ʼa ña̱ kúúmiína ña̱ va̱ʼa chindeétáʼanna xíʼin na̱ hermano na̱ inka ñuu (Hech. 11:​27-29). Saátu miíyó na̱ ndóo tiempo vitin xíʼin ndiʼi níma̱yó táxiyó loʼo xu̱ʼún ña̱ kúúmiíyó á inkaka ña̱ʼa ña̱ kúúmiíyó ndaʼa̱ Jehová, chi saá kúú ña̱ ndásakáʼnuyóra.

12. ¿Ndáa ki̱ʼva ndásakáʼnuyó Jehová xíʼin donación ña̱ táxiyó? (Koto na̱ʼná).

¹² Ná kotoyó iin ejemplo ña̱ náʼa̱ ña̱ ndásakáʼnuyó Jehová tá táxiyó donación. Tá ku̱i̱ya̱ 2020, ku̱a̱ʼání tiempo kǒo sa̱vi̱ níkuun chí Zimbabue ta xa̱ʼa̱ ña̱yóʼo kǒo ña̱ʼa ni̱xi̱yo kuxu na̱ yiví ta nda̱a̱ kivi kuvina xa̱ʼa̱ ña̱yóʼo. Ta ñuu yóʼo ni̱xi̱yo iin ñá hermana ñá naní Prisca. Ñá hermana yóʼo kǒo nísandákooñá ña̱ ku̱ʼu̱nñá natúʼunñá xa̱ʼa̱ Ndióxi̱ ki̱vi̱ miércoles xíʼin viernes ni xi̱kuuña tiempo ña̱ xíniñúʼu taʼvína ñuʼú ña̱ va̱ʼa chiʼina. Na̱ yiví na̱ xi̱ndoo yatin xíʼinñá xi̱xaku̱ndaanañá xa̱ʼa̱ ña̱ xi̱xaʼa̱nñá xi̱natúʼunñá xa̱ʼa̱ Ndióxi̱ nu̱úka ña̱ taváñá tiempo ña̱ chiʼiñá. Na̱yóʼo xi̱kaʼa̱nna xíʼinñá: “Kuvivaún xíʼin so̱ko chi va̱ása káchíñún”. Ta ñáyóʼo xi̱kaʼa̱nñá xíʼinna: “Nda̱a̱ ni iin yichi̱ va̱ása sándakoondaʼa̱ Jehová na̱ káchíñu nu̱úra”. Tá ni̱ya̱ʼa loʼo tiempo, na̱ ñuu Ndióxi̱ xi̱niñúʼuna donación ña̱ táxiyó ti̱xin congregación ña̱ va̱ʼa taxina ña̱ kuxu ñá hermana yóʼo. Sava na̱ ndóo yatin xíʼin ñá hermana yóʼo nda̱kanda̱ní-inina ta ni̱ka̱ʼa̱nna xíʼinñá: “Ndióxi̱ va̱ása nísandákoonda̱ʼara yóʼó, kúni̱ndi̱ kunda̱a̱-inindi̱ xa̱ʼa̱ra”. Ta u̱xa̱ na̱yóʼo ki̱xáʼana xáʼa̱nna reunión.

13. Nda̱a̱ táki̱ʼva káchi Salmo 96:​9, ¿ndáaña xíniñúʼu keʼéyó ña̱ va̱ʼa ndasakáʼnuyó Jehová?

 ¹³ (Kaʼvi Salmo 96:9). d Kivi ndasakáʼnuyó Jehová xíʼin ki̱ʼva ña̱ kéʼéyó. Na̱ su̱tu̱ na̱ xi̱kachíñu nu̱ú Jehová tiempo xi̱naʼá xi̱xiniñúʼu ndakatana ndaʼa̱na xíʼin xa̱ʼa̱na ta ndii koona tá xi̱kachíñuna ini tabernáculo xíʼin ini templo (Éx. 40:​30-32). Saátu miíyó chíkaa̱yó ndee̱ ña̱ ndii kooyó, soo ña̱ ndáyáʼvika kúú ña̱ chíkaa̱yó ndee̱ ña̱ kǒo keʼéyó ña̱ʼa ña̱ kúndasí Ndióxi̱ xínira (Sal. 24:​3, 4; 1 Ped. 1:​15, 16). Biblia káʼa̱nña ña̱ xíniñúʼu sandákooyó ki̱ʼva ña̱ ni̱xi̱yoyó tá ya̱chi̱ ta kixáʼayó ndasaxa̱áyó ki̱ʼva ña̱ keʼéyó. Ña̱yóʼo kúni̱ kachiña ña̱ chikaa̱yó ndee̱ ña̱ va̱ása keʼékayó ña̱ kǒo kútóo Jehová, ni ña̱ ndakanixi̱níyó xa̱ʼa̱ ña̱ʼa ña̱ kǒo kútóora ta chikaa̱yó ndee̱ ña̱ ndakanixi̱níyó táki̱ʼva ndákanixi̱níra ta keʼéyó ña̱ kútóora tasaá na̱ʼa̱yó ña̱ va̱ʼa ña̱ kúúmií Jehová (Col. 3:​9, 10). Jehová kivi chindeétáʼanra xíʼin na̱ yiví na̱ kéʼé ña̱ kini á na̱ ndi̱va̱ʼaní-ini ña̱ nasamana ki̱ʼva ña̱ íyona ta kixáʼana keʼéna ña̱ va̱ʼa.

14. ¿Ndáaña sákuaʼayó xíʼin ña̱ ke̱ʼé ta̱ Jack? (Koto na̱ʼná).

¹⁴ Ná ka̱ʼa̱nyó xa̱ʼa̱ iin ta̱a ta̱ xi̱naní Jack, ta̱yóʼo xi̱kuura iin ta̱a ta̱ ndi̱va̱ʼaní-ini ta xi̱kutóoníra kanitáʼanra xa̱ʼa̱ ña̱kán xi̱kaʼa̱nna xíʼinra ña̱ xi̱naníra ta̱ Ndi̱va̱ʼa. Ta xa̱ʼa̱ ndiʼi ku̱a̱chi ña̱ ni̱ki̱ʼvira xi̱niñúʼu kuvira. Soo tá kúma̱ní kixaa̱ ki̱vi̱ ña̱ kaʼnínara, ka̱ndíxara kaʼvira Biblia xíʼin iin ta̱ hermano ta̱ xi̱xaʼa̱n xi̱natúʼun xa̱ʼa̱ Ndióxi̱ ini veʼeka̱a. Ni ku̱a̱ʼání ña̱ va̱ása va̱ʼa ke̱ʼé ta̱ Jack tá ya̱chi̱, soo na̱samavara ki̱ʼva ña̱ ni̱xi̱yora ta tá ni̱ya̱ʼa loʼo tiempo nda̱kuchira. Xa̱ʼa̱ ña̱ na̱samaní ki̱ʼva ña̱ ni̱xi̱yora, tá ki̱xaa̱ ki̱vi̱ ña̱ kuvira, sava na̱ policía na̱ xi̱ndaa veʼeka̱a kán ni̱nda̱yínara ta nda̱a̱ xa̱kuna xa̱ʼa̱ra. Ta̱ policía ta̱ kíʼin kuenta xíʼin veʼeka̱a kán ni̱ka̱ʼa̱nra: “Tá ya̱chi̱, nu̱ú ndiʼika na̱ ñúʼu veʼeka̱a yóʼo, ta̱ Jack kúú ta̱ ndi̱va̱ʼaníka ni̱xi̱yo ini soo vitin ta̱yóʼo kúú ta̱a ta̱ va̱ʼaníka-ini nu̱ú ndiʼina”. Tá ni̱ya̱ʼa iin semana ña̱ xa̱ʼnína ta̱ Jack, na̱ hermano ndi̱kó tukuna veʼeka̱a kán ña̱ va̱ʼa kuumiína reunión xíʼin inkaka na̱ ñúʼu veʼeka̱a. Ta ki̱ʼinna kuenta ña̱ ni̱xa̱a̱ iin ta̱a ta̱ ndíka̱ veʼeka̱a kán, ta̱ nda̱a̱ ni iin yi̱chi̱ va̱ása níxi̱xaʼa̱n reunión. ¿Nda̱chun va̱ʼa ni̱xa̱ʼa̱nra reunión ki̱vi̱ kán? Saáchi nda̱kanda̱ní-inira xa̱ʼa̱ ña̱ na̱samaní ki̱ʼva ña̱ ni̱xi̱yo ta̱ Jack ta xi̱kuni̱ra kunda̱a̱-inira ndáaña xíniñúʼu keʼéra ña̱ va̱ʼa ndasakáʼnura Jehová. Xíʼin ña̱yóʼo kúnda̱a̱-iniyó ña̱ kiviva ndasakáʼnuyó yiváyó ta̱ íyo chí ndiví xíʼin ki̱ʼva ña̱ kéʼéyó (1 Ped. 2:12).

 ¿NDÁA KI̱ʼVA NDASAKÁʼNU JEHOVÁ KI̱VI̱RA CHÍ NU̱ÚNÍNU?

15. ¿Ndáaña keʼé Jehová ña̱ va̱ʼa ndasayi̱i̱ra ki̱vi̱ra chí nu̱únínu? (Salmo 96:​10-13).

¹⁵ (Kaʼvi Salmo 96:​10-13). e Nu̱ú ndíʼi Salmo 96 káʼa̱nña xa̱ʼa̱ Jehová ña̱ kúúra iin Rey ta̱ nda̱kúní ndátiin ku̱a̱chi. ¿Ndáa ki̱ʼva ndasakáʼnu Jehová ki̱vi̱ra chí nu̱únínu? Keʼéra ña̱yóʼo tá ná kixaa̱ ki̱vi̱ ña̱ nda̱kúní ndatiinra ku̱a̱chi. Si̱lóʼoní kúma̱ní ta sandíʼi-xa̱ʼa̱ra Babilonia ña̱ káʼnu xa̱ʼa̱ ña̱ íxayaku̱a̱ña ki̱vi̱ra ña̱ yi̱i̱ (Apoc. 17:​5, 16; 19:​1, 2). Tá ná kuni na̱ yiví ña̱ ndiʼi-xa̱ʼa̱ veʼe-ñu̱ʼu vatá, savana kuni̱na ndasakáʼnuna Jehová xíʼinyó. Tá ná kixaa̱ Armagedón, Jehová sandíʼi-xa̱ʼa̱ra ndiʼi na̱ kéʼé ña̱ kútóo ta̱ Ndi̱va̱ʼa. Sandíʼi-xa̱ʼa̱ra na̱ sáa̱-ini xíniñaʼá ta saátu na̱ íxayaku̱a̱ ki̱vi̱ra, soo sakǎkura ndiʼi na̱ kúʼvi̱-ini xíniñaʼá ta kándíxana ña̱ káʼa̱nra ta kúsi̱í-inina ndásakáʼnunara (Mar. 8:38; 2 Tes. 1:​6-10). Tá ná ndiʼi kaʼndachíñu ta̱ Jesús ti̱xin ña̱ mil ku̱i̱ya̱ ta saátu tá ná ya̱ʼa prueba ña̱ so̱ndíʼi, Jehová ndasayi̱i̱ra ki̱vi̱ra tasaá na̱ʼa̱ra ña̱ iinlá miíra xíniñúʼu ndasakáʼnuyó (Apoc. 20:​7-10). Tiempo saá, “iníísaá nu̱ú ñuʼú kunda̱a̱-inina ña̱ káʼnuní Jehová ta kutúña nda̱a̱ táki̱ʼva chútú ti̱kui̱í ini mar” (Hab. 2:14).

16. ¿Ndáaña chíkaa̱-iniyó keʼéyó? (Koto na̱ʼná).

¹⁶ Liviní koo tá ná kixaa̱ ki̱vi̱ ña̱ ndiʼina ná ndasakáʼnuna ki̱vi̱ Jehová. Ta nani ndátuyó kixaa̱ ki̱vi̱ kán, kivi chikaa̱yó ndee̱ ña̱ ndasakáʼnuyó Jehová xíʼin ndiʼi ña̱ kéʼéyó. Ta xa̱ʼa̱ ña̱ ndáyáʼviní keʼéyó ña̱yóʼo, na̱ Cuerpo Gobernante nda̱kaxinna Salmo 96:8 ña̱ kooña texto ña̱ ku̱i̱ya̱ 2025, ña̱yóʼo káchiña: “Ndasakáʼnundó ki̱vi̱ Jehová chi ña̱yóʼo kúú ña̱ xíniñúʼu ndukáʼnu”.