1. ¿Ndáaña va̱ʼa ndákiʼinyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó?

 JEHOVÁ ta̱xira iin regalo ña̱ ndáyáʼviní ndaʼa̱yó tá chi̱ndaʼára se̱ʼera ki̱xira ni̱xi̱ʼi̱ra xa̱ʼa̱yó (2 Cor. 9:15). Xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó kivi kutáʼan viíyó xíʼin Jehová ta saátu kivi kutakuyó ndiʼi tiempo. Ña̱kán táxiníyó tíxa̱ʼvi ndaʼa̱ Jehová xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó, saáchi ke̱ʼéra ña̱yóʼo xa̱ʼa̱ ña̱ kúʼvi̱ní-inira xínira miíyó (Rom. 5:8). Ña̱ va̱ʼa ndakundeéyó taxiyó tíxa̱ʼvi ndaʼa̱ Jehová xíʼin ta̱ Jesús xa̱ʼa̱ ña̱ ni̱xi̱ʼi̱ra xa̱ʼa̱yó ta saátu ña̱ va̱ʼa kǒo nandóso-iniyó xa̱ʼa̱ ña̱yóʼo, mií ta̱ Jesús xa̱ʼnda chiñu ña̱ ná ndakaʼányó xa̱ʼa̱ ña̱ ni̱xi̱ʼi̱ra ndiʼi ku̱i̱ya̱ (Luc. 22:​19, 20).

 2. ¿Ndáaña sakúaʼayó nu̱ú artículo yóʼo?

² Ku̱i̱ya̱ vitin ndakaʼányó xa̱ʼa̱ ña̱ ni̱xi̱ʼi̱ ta̱ Jesús ki̱vi̱ sábado 12 tí abril, ta ndiʼivayó kúsi̱íní-ini ku̱ʼu̱n ki̱vi̱ yóʼo. Tá ná taváyó tiempo ña̱ ndakanixi̱níyó a xa̱ʼa̱ ña̱ ke̱ʼé Jehová xa̱ʼa̱yó ta saátu ña̱ ke̱ʼé ta̱ Jesús ña̱ ni̱xi̱ʼi̱ra xa̱ʼa̱yó, va̱ʼaní chindeétáʼanña xíʼinyó. Nu̱ú artículo yóʼo sakúaʼayó ndáaña ni̱na̱ʼa̱ Jehová ta saátu ta̱ Jesús tá ni̱xi̱ʼi̱ra xa̱ʼa̱yó. Ta nu̱ú inka artículo sakúaʼayó ndáaña va̱ʼa ndákiʼinyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó ta saátu ndáa ki̱ʼva kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱yóʼo.

¿NDÁAÑA SÁKUAʼAYÓ XA̱ʼA̱ JEHOVÁ XA̱ʼA̱ ÑA̱ TA̱XIRA TA̱ JESÚS NI̱XI̱ʼI̱RA XA̱ʼA̱YÓ?

 3. ¿Nda̱chun va̱ʼa ku̱chiñu iinlá kuití ta̱a nda̱tavára ku̱a̱ʼání na̱ yiví ndaʼa̱ ku̱a̱chi? (Koto na̱ʼná).

³ Tá ta̱xi Jehová ta̱ Jesús ña̱ ni̱xi̱ʼi̱ra xa̱ʼa̱yó ni̱na̱ʼa̱ra ña̱ nda̱kúní íyo ña̱ kéʼéra (Deut. 32:4). ¿Nda̱chun káʼa̱nyó ña̱yóʼo? Xa̱ʼa̱ ña̱ i̱xaso̱ʼo ta̱ Adán nu̱ú Ndióxi̱, ndiʼi miíyó na̱ kúú se̱ʼera ndu̱uyó  na̱ yiví ku̱a̱chi ta xíʼi̱yó (Rom. 5:12). Soo Jehová chi̱ndaʼára se̱ʼera ta̱ Jesús ña̱ ndatavára miíyó ndaʼa̱ ku̱a̱chi tasaá va̱ása kuvikayó. ¿Soo á kuchiñu iinlá kuití ta̱a ndatavára ku̱a̱ʼání na̱ yiví ndaʼa̱ ku̱a̱chi? Ta̱ apóstol Pablo ni̱ka̱ʼa̱nra ña̱yóʼo: “Nda̱a̱ táki̱ʼva ni̱xa̱a̱ ku̱a̱ʼánína ndu̱una na̱ yiví ku̱a̱chi xa̱ʼa̱ ña̱ kǒo níkandíxa iin ta̱a [ta̱ Adán], saátu ku̱a̱ʼánína xa̱a̱na koona na̱ nda̱kú-ini xa̱ʼa̱ ña̱ ka̱ndíxa iin kuití ta̱a [ta̱ Jesús]” (Rom. 5:19; 1 Tim. 2:6). Xa̱ʼa̱ ña̱ iin ta̱a ta̱ kǒo ku̱a̱chi kúúmií kúú ta̱ i̱xaso̱ʼo nu̱ú Ndióxi̱, ndiʼiyó ki̱xáʼayó kúúyó na̱ yiví ku̱a̱chi ta xíʼi̱yó, ña̱kán ña̱ va̱ʼa keeyó ndaʼa̱ ku̱a̱chi yóʼo iin ta̱a ta̱ kǒo ku̱a̱chi kúúmií kúú ta̱ xi̱niñúʼu kuvi xa̱ʼa̱yó.

 4. ¿Nda̱chun va̱ása níkivi taxi Jehová ña̱ kutaku nda̱saa na̱ kándíxa miíra?

⁴ ¿Soo á ndixa xi̱niñúʼu kuvi ta̱ Jesús ña̱ va̱ʼa ka̱kuyó? ¿Á va̱ása níkivi taxi Jehová kutaku nda̱saa na̱ kándíxa miíra? Sana nu̱ú miíyó iin ña̱ va̱ʼaní kúúña tá níkeʼéra ña̱yóʼo, soo ná ndakaʼányó chi nina ña̱ nda̱kú kúú ña̱ kéʼé Jehová. Tá nítaxi Jehová ña̱ kutaku na̱ se̱ʼe ta̱ Adán ndiʼi tiempo, va̱ása na̱ʼa̱víra ña̱ kúúmií ta̱ Adán ku̱a̱chi ta saátu na̱ se̱ʼera. Soo kúnda̱a̱-iniyó ña̱ ni̱ki̱ʼviva ta̱ Adán iin ku̱a̱chi ña̱ ndeéní.

 5. ¿Nda̱chun kivi kandíxayó ña̱ ndiʼi tiempo kéʼé Jehová ña̱ nda̱kú?

⁵ Tá nítaxi Jehová ña̱ kutaku na̱ se̱ʼe ta̱ Adán na̱ kúúmií ku̱a̱chi ndiʼi tiempo ta kǒo nítaxira se̱ʼera ta̱ Jesús ña̱ kuvira xa̱ʼa̱yó, ¿ndáaña kuu? Tá saá níkeʼé Jehová, na̱ʼa̱ra ña̱ va̱ása nda̱kú íyo ña̱ kéʼéra ta kivi ndakanixi̱ní na̱ yiví ña̱ saátu keʼéra xíʼin inkaka ku̱a̱chi. Ta nda̱a̱ sana ndakanixi̱nína ña̱ va̱ása saxínukara ña̱ ki̱ndoora keʼéra. Soo va̱ása xíniñúʼu kundi̱ʼi-iniyó xa̱ʼa̱ ña̱yóʼo saáchi nda̱kúníva nda̱tiin Jehová ku̱a̱chi kán ta ta̱xira se̱ʼera ta̱ kúni̱níra xínira ña̱ kuvira xa̱ʼa̱yó. Xa̱ʼa̱ ña̱kán kivi kandíxayó ña̱ ndiʼi tiempo nda̱kúníva íyo ña̱ kéʼé Jehová.

 6. ¿Ndáaña ndáyáʼviní ni̱na̱ʼa̱ Jehová tá chi̱ndaʼára se̱ʼera ni̱xi̱ʼi̱ra xa̱ʼa̱yó? (1 Juan 4:​9, 10).

⁶ Xa̱ʼa̱ ña̱ ta̱xi Jehová se̱ʼera ña̱ ni̱xi̱ʼi̱ra xa̱ʼa̱yó ni̱na̱ʼa̱ra ña̱ nda̱kúní ndátiinra ku̱a̱chi, soo ña̱ ndáyáʼviníka ni̱na̱ʼa̱ra kúú ña̱ kúʼvi̱ní-inira xínira miíyó (Juan 3:16; kaʼvi 1 Juan 4:​9, 10). Jehová chi̱ndaʼára se̱ʼera ni̱xi̱ʼi̱ra xa̱ʼa̱yó chi kúni̱ra ña̱ ná kutakuyó ndiʼi tiempo ta saátu kooyó na̱ veʼera. Ndakanixi̱níndó xa̱ʼa̱ ña̱yóʼo, tá ni̱ki̱ʼvi ta̱ Adán ku̱a̱chi va̱ása níxikuukara táʼan na̱ veʼe Jehová ta xa̱ʼa̱ ña̱yóʼo su̱víka na̱ veʼe Jehová níxikuuyó. Soo xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó, na̱ yiví na̱ kándíxa Jehová ta kéʼéna ña̱ káʼa̱nra kivi xa̱a̱na koona táʼan na̱ veʼe miíra. Ta xa̱ʼa̱ ña̱yóʼo kúú ña̱ va̱ʼa íxakáʼnu-ini Jehová xa̱ʼa̱ ku̱a̱chiyó, ta kivi kutáʼan viíyó xíʼinra ta saátu xíʼin na̱ hermanoyó. Ña̱yóʼo náʼa̱ña nu̱úyó ña̱ kúʼvi̱ní-ini Jehová xínira miíyó (Rom. 5:​10, 11).

 7. Ta̱ Jesús ni̱xo̱ʼvi̱níra ña̱ va̱ʼa chaʼvira xa̱ʼa̱ ku̱a̱chiyó, ¿ndáaña ni̱na̱ʼa̱ ña̱yóʼo?

 ⁷ Kivi kunda̱a̱-iniyó ña̱ kúʼvi̱ní-ini Jehová xínira miíyó tá ná ndakanixi̱níyó xa̱ʼa̱ ña̱ ni̱xo̱ʼvi̱níra tá ta̱xira se̱ʼera ña̱ ni̱xi̱ʼi̱ra xa̱ʼa̱yó. Ta̱ Ndi̱va̱ʼa káʼa̱nra ña̱ nda̱a̱ ni iin na̱ káchíñu nu̱ú Ndióxi̱ va̱ása nda̱kú koo inina xíʼinra tá ná ya̱ʼana nu̱ú tu̱ndóʼo. Ña̱kán ña̱ va̱ʼa na̱ʼa̱ Jehová ña̱ vatá kúú ña̱ káʼa̱n ta̱ Ndi̱va̱ʼa, ta̱xira ña̱ ná xo̱ʼvi̱ní se̱ʼera ta̱ Jesús tá kúma̱níka kuvira (Job 2:​1-5; 1 Ped. 2:21). Nda̱a̱ chí ndiví xi̱ni Jehová ña̱ ku̱sikindaa na̱ yiví ta̱ Jesús, saátu tá ka̱ni na̱ soldadora ta ka̱tikaanara ndaʼa̱ yitu̱n. Saátu xi̱nira ña̱ ni̱xo̱ʼvi̱ní se̱ʼera tá ni̱xi̱ʼi̱ra (Mat. 27:​28-31, 39). Kiviva kasi Jehová nu̱úna ña̱ va̱ʼa kǒo keʼéna ña̱yóʼo xíʼin ta̱ Jesús soo kǒo níkeʼéraña. Tá kúú, kivi kasira nu̱ú na̱ yiví tá ni̱ka̱ʼa̱nna ña̱yóʼo: “Mií Ndióxi̱ ná sakǎku miíra tá kúni̱ra chindeétáʼanra xíʼinra” (Mat. 27:​42, 43). Soo tá níchindeétáʼanra xíʼin ta̱ Jesús, va̱ása ndachaʼvivíra xa̱ʼa̱ ku̱a̱chiyó ta ni kǒo ña̱ va̱ʼa kundatuyó ndakiʼinyó chí nu̱únínu. Xa̱ʼa̱ ña̱kán kúú ña̱ ta̱xi Jehová ña̱ ni̱xo̱ʼvi̱ní se̱ʼera ta ni̱xi̱ʼi̱ra.

 8. ¿Nda̱chun va̱ʼa kúnda̱a̱-iniyó ña̱ ku̱suchíní-ini Jehová tá xi̱nira ña̱ ni̱xo̱ʼvi̱ní se̱ʼera? (Koto na̱ʼná).

⁸ Jehová va̱ása níxiniñúʼuvíra ndee̱ra ña̱ va̱ʼa sakǎkura se̱ʼera. ¿Soo á kúni̱ kachi ña̱yóʼo ña̱ va̱ása kúsuchí-ini Jehová? Miíyó na̱ yiví kúsuchí-iniyó ta xóʼvi̱yó chi saá i̱xava̱ʼa Jehová miíyó ta Biblia káʼa̱nña ña̱ ku̱vaʼayó nda̱a̱ táki̱ʼva íyo mií Ndióxi̱, ña̱yóʼo kúni̱ kachiña ña̱ saátu ndóʼo miíra. Tu̱ʼun Ndióxi̱ káʼa̱nña ña̱ ni̱xi̱yo sava na̱ yiví na̱ sa̱xóʼvi̱-ini Jehová ta sa̱kúsuchína-inira (Sal. 78:​40, 41). Ná ndakanixi̱níyó xa̱ʼa̱ ta̱ Abrahán ta saátu ta̱ Isaac. Tá kúú, Jehová ni̱ka̱ʼa̱nra xíʼin ta̱ Abrahán ña̱ ná so̱kóra se̱ʼera nu̱úra (Gén. 22:​9-12; Heb. 11:​17-19). Sana ku̱suchíníva-ini ta̱ Abrahán ta ni̱ndi̱ʼi̱ní-inira tá xa̱a̱ ku̱nu̱mí kaʼníra se̱ʼera. ¿Soo á saátu ndo̱ʼo Jehová tá xi̱nira ña̱ sa̱xóʼvi̱na se̱ʼera ta̱ Jesús ta xa̱ʼnínara? Ná ndakanixi̱níyó nda̱saaví ku̱suchí-ini Jehová ta ni̱xo̱ʼvi̱-inira tá xi̱nira ndo̱ʼo se̱ʼera ndiʼi ña̱yóʼo. (Koto nu̱ú jw.org video ña̱ naní Na̱ va̱ʼaní xi̱kandíxa Ndióxi̱: Ta̱ Abrahán [táʼví 2]).

 9. ¿Ndáaña sákuaʼayó xa̱ʼa̱ Jehová nu̱ú Romanos 8:​32, 38, 39?

⁹ Ni kúni̱níva na̱ veʼeyó xíʼin na̱ migoyó xínina miíyó, soo tá ta̱xi Jehová se̱ʼera ña̱ ni̱xi̱ʼi̱ra xa̱ʼa̱yó ni̱na̱ʼa̱ra ña̱ kúni̱níkara xínira miíyó (kaʼvi Romanos 8:​32, 38, 39). Kúʼvi̱níka-ini Jehová xínira miíyó nu̱úka ña̱ kúʼvi̱-iniyó xíniyó miíyó. Ná ndakanixi̱níyó xa̱ʼa̱ ña̱yóʼo: ¿á kúni̱ún kutakún ndiʼi tiempo? Jehová kúni̱níkara ña̱ ná kutakún ndiʼi tiempo. ¿Á kúni̱ún ná ixakáʼnu-inira xa̱ʼa̱ ku̱a̱chiún? Jehová kúni̱níkavara ixakáʼnu-inira xa̱ʼa̱ ku̱a̱chiún. Ña̱ kúni̱ kuití Jehová ná keʼéyó kúú ña̱ na̱ʼa̱yó ña̱ táxiyó  tíxa̱ʼvi ndaʼa̱ra xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó, saátu ña̱ ná kuniso̱ʼoyó ña̱ káʼa̱nra ta kandíxayóra. Tá ta̱xi Jehová se̱ʼera ta̱ Jesús ña̱ ni̱xi̱ʼi̱ra xa̱ʼa̱yó, saá kúú ña̱ ni̱na̱ʼa̱ra ña̱ kúʼvi̱ní-inira xínira miíyó. Ta nu̱ú ñuyǐví xa̱á ku̱a̱ʼáníka ña̱ʼa sakúaʼayó xa̱ʼa̱ ña̱ kúʼvi̱ní-ini Jehová xínira miíyó (Ecl. 3:11).

¿NDÁAÑA SÁKUAʼAYÓ XA̱ʼA̱ TA̱ JESÚS XA̱ʼA̱ ÑA̱ NI̱XI̱ʼI̱RA XA̱ʼA̱YÓ?

10. a) ¿Ndáaña kúú ña̱ ni̱ndi̱ʼi̱níka-ini ta̱ Jesús xa̱ʼa̱ tá kúma̱níka kuvira? b) ¿Ndáa ki̱ʼva ni̱na̱ʼa̱ ta̱ Jesús ña̱ ta̱ vatá kúú ta̱ Ndi̱va̱ʼa? (Koto recuadro “ Ta̱ Jesús ni̱na̱ʼa̱ra ña̱ ta̱ vatá kúú ta̱ Ndi̱va̱ʼa”).

¹⁰ Ña̱ ni̱ndi̱ʼi̱níka-ini ta̱ Jesús xa̱ʼa̱ kúú ña̱ kivi ndákanixi̱ní na̱ yiví xa̱ʼa̱ yivára (Juan 14:31). Ta̱ Jesús ni̱ndi̱ʼi̱ní-inira ña̱ kixáʼa na̱ yiví ndakanixi̱nína ña̱ va̱ása va̱ʼa xa̱ʼa̱ yivára, saáchi chi̱kaa̱na ku̱a̱chira ña̱ va̱ása íxato̱ʼóra Ndióxi̱. Xa̱ʼa̱ ña̱kán ni̱ka̱ʼa̱nra ña̱yóʼo: “Yivá miíi̱, tá ña̱ kívi kúúña, ná kǒo koʼi̱ copa yóʼo” (Mat. 26:39). Soo xa̱ʼa̱ ña̱ nda̱kúní ni̱xi̱yo ini ta̱ Jesús xíʼin yivára nda̱a̱ tá ni̱xi̱ʼi̱ra, saá ni̱na̱ʼa̱ra ña̱ vatá kúú ña̱ ni̱ka̱ʼa̱n ta̱ Ndi̱va̱ʼa xa̱ʼa̱ yivára.

11. ¿Ndáa ki̱ʼva ni̱na̱ʼa̱ ta̱ Jesús ña̱ kúʼvi̱ní-inira xínira na̱ yiví? (Juan 13:1).

¹¹ Ña̱ ni̱xi̱ʼi̱ ta̱ Jesús xa̱ʼa̱yó sánáʼa̱ña miíyó ña̱ ndíʼi̱ní-inira xa̱ʼa̱ na̱ yiví ta na̱ ndíʼi̱níka-inira xa̱ʼa̱ kúú na̱ ndíku̱n sa̱tára (Prov. 8:31; kaʼvi Juan 13:1). Ta̱ Jesús xi̱kunda̱a̱-inira ña̱ tá ná koora nu̱ú ñuʼú yóʼo ya̱ʼara nu̱ú ku̱a̱ʼání tu̱ndóʼo ta xo̱ʼvi̱níra tá ná kuvira. Soo ni saá chi̱kaa̱ní ta̱ Jesús ndee̱ ña̱ ka̱chíñura nu̱ú Ndióxi̱ nani ni̱xi̱yora nu̱ú ñuʼú yóʼo, soo va̱ása níkeʼéra ña̱yóʼo xa̱ʼa̱ ña̱ xi̱kuni̱ kuitíra keʼéra ña̱ ni̱ka̱ʼa̱n yivára chi ke̱ʼéraña xa̱ʼa̱ ña̱ kúʼvi̱-inira xínira na̱ yiví xa̱ʼa̱ ña̱kán na̱túʼunra xíʼinna xa̱ʼa̱ Ndióxi̱, sa̱náʼa̱rana ta chi̱ndeétáʼanra xíʼinna. Ta tá xa̱a̱ ku̱nu̱mí kuvira nda̱katara xa̱ʼa̱ na̱ apóstolra, sa̱náʼa̱rana ta chi̱kaa̱ra ndee̱ xíʼinna ta saátu sa̱ndíkora-inina (Juan 13:​12-15). Ta tá  xa̱a̱ tíkaara ndaʼa̱ yitu̱n ni̱ka̱ʼa̱nra xíʼin iin ta̱ kui̱ʼná ta̱ xi̱tikaa síi̱nra ña̱ koora nu̱ú ñuyǐví xa̱á ta saátu ni̱ka̱ʼa̱nra xíʼin ta̱ Juan ña̱ ná kundaara siʼíra ñá María (Luc. 23:​42, 43; Juan 19:​26, 27). Ta̱ Jesús ni̱na̱ʼa̱ra ña̱ xi̱kuʼvi̱ní-inira xi̱xinira na̱ yiví ndiʼi tiempo ña̱ ni̱xi̱kara na̱túʼunra xa̱ʼa̱ yivára ta saátu tá ni̱xi̱ʼi̱ra xa̱ʼa̱yó.

12. ¿Ndáaka ña̱ kéʼé ta̱ Jesús xa̱ʼa̱yó?

¹² Iinva yichi̱ ni̱xi̱ʼi̱ ta̱ Cristo soo íyokava ña̱ kéʼéra xa̱ʼa̱yó (Rom. 6:10). Tá kúú, ndákundeéra káchíñura xa̱ʼa̱yó ña̱ va̱ʼa ni̱ʼíyó ku̱a̱ʼání ña̱ va̱ʼa xa̱ʼa̱ ña̱ ni̱xi̱ʼi̱ra xa̱ʼa̱yó. Ná ndakanixi̱níyó xa̱ʼa̱ ndiʼi ña̱ kéʼéra xa̱ʼa̱ ña̱ kúúra Rey, su̱tu̱ káʼnu ta saátu xa̱ʼa̱ ña̱ níʼira yichi̱ nu̱ú na̱ congregación (1 Cor. 15:25; Efes. 5:23; Heb. 2:17). Kúúmiíra chiñu ña̱ sandátakara na̱ ku̱ʼu̱n chí ndiví ta saátu na̱ kundoo nu̱ú ñuʼú yóʼo ta sandíʼira keʼéra chiñu yóʼo tá kúma̱níka ndiʼi ña̱ gran tribulación (Mat. 25:32; Mar. 13:27). b Ta saátu tiempo so̱ndíʼi ña̱ ndóoyó vitin táxira ña̱ xíniñúʼuyó ña̱ va̱ʼa ndakundeéyó kachíñuyó nu̱ú Jehová ta sakúaʼayó xa̱ʼa̱ra (Mat. 24:45). Tá ná kaʼndachíñura ti̱xin ña̱ mil ku̱i̱ya̱ ndakundeévara chindeétáʼanra xíʼinyó. Ña̱kán tá ta̱xi Jehová se̱ʼera, va̱ása nítaxi kuitírara ña̱ kuvira xa̱ʼa̱yó chi saátu ta̱xirara ña̱ va̱ʼa keʼéra inkaka ña̱ʼa xa̱ʼa̱yó.

CHIKAA̱KA NDEE̱ ÑA̱ SAKÚAʼÚN

13. Tá ná ndakanixi̱níyó xa̱ʼa̱ ña̱ káʼviyó, ¿ndáa ki̱ʼva chindeétáʼanña xíʼinyó?

¹³ Tá ná ndakanixi̱níún xa̱ʼa̱ ña̱ sákuaʼún, ña̱yóʼo chindeétáʼan xíʼún ña̱ kunda̱a̱-iniún ña̱ kúʼvi̱ní-ini Jehová ta saátu ta̱ Jesús xínina miíyó. Kivi kaʼviún iin á ku̱a̱ʼáka Evangelio tá kúma̱níka koo ña̱ Conmemoración ta saátu tá xa̱a̱ ndi̱ʼiña. Va̱ása ku̱a̱ʼání capítulo kaʼviún iin kuití yichi̱, chi kivi kaʼviún loʼo tá loʼo ña̱ va̱ʼa kunda̱a̱ka-iniún ña̱ kúʼvi̱ní-ini Jehová xíʼin ta̱ Jesús xínina miíyó. Ta kǒo nandósoún ña̱ natúʼún xíʼin inkana xa̱ʼa̱ ña̱ sákuaʼún.

14. Nda̱a̱ táki̱ʼva káchi Salmo 119:97 ta saátu nota, ¿ndáaña xíniñúʼu keʼéyó ña̱ va̱ʼa ndakundeéyó sakúaʼayó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó ta saátu xa̱ʼa̱ inkaka ña̱ʼa? (Koto na̱ʼná).

¹⁴ Tá xa̱a̱ ku̱a̱ʼání ku̱i̱ya̱ nda̱kuchiún, kivi kixáʼún ndakanixi̱níún á íyo inkaka ña̱ xa̱á kivi sakúaʼún xa̱ʼa̱ ña̱ nda̱kúní íyo ini Ndióxi̱, ña̱ kúʼvi̱ní-inira xínira miíyó ta saátu xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó. Soo mií ña̱ nda̱a̱, íyo ku̱a̱ʼáníkava ña̱ kivi sakúaʼayó xa̱ʼa̱ ña̱yóʼo. ¿Ndáaña kivi chindeétáʼan xíʼún ña̱ ndakundeún sakúaʼún? Ña̱ chika̱ún ndee̱ ña̱ kaʼviún  ndiʼi tutu ña̱ tává na̱ ñuu Ndióxi̱. Tá ndáni̱ʼún iin texto ña̱ kǒo kúnda̱a̱-iniún xa̱ʼa̱, nandukú xa̱ʼa̱ña. Ta tá xa̱a̱ na̱ndukún xa̱ʼa̱ña, ndakanixi̱ní xa̱ʼa̱ ña̱ nda̱ni̱ʼún saátu ndakanixi̱ní xa̱ʼa̱ ña̱ sa̱kúaʼún xa̱ʼa̱ Jehová xíʼin se̱ʼera ta saátu xa̱ʼa̱ ña̱ kúʼvi̱ní-inina xínina miíyó (kaʼvi Salmo 119:97 ta saátu koto nota). c

15. ¿Nda̱chun xíniñúʼu ndakundeéyó nandukúyó ña̱ʼa ña̱ ndáyáʼviní va̱xi nu̱ú tu̱ʼun Ndióxi̱?

¹⁵ Va̱ása ndakava-iniún tá kǒo iin ña̱ʼa xa̱á nísakúaʼún nu̱ú Biblia á iin ña̱ sándakanda̱ní-iniún, saáchi nda̱a̱ táki̱ʼva íyo ña̱ nandukúyó oro saá íyo ña̱ kaʼviyó tu̱ʼun Ndióxi̱. Na̱ yiví na̱ nándukú oro ku̱a̱ʼání hora xíniñúʼuna ña̱ nandukúnaña ta saátu ku̱a̱ʼání ki̱vi̱ nándukúnaña. Na̱yóʼo ndákundeéna nándukúnaña ta kúeení íyo inina, ta ni loʼoní kúú ña̱ ndáni̱ʼína kúnda̱a̱-inina ña̱ ndáyáʼviníña. Soo ña̱ʼa ña̱ ndáni̱ʼíyó nu̱ú Biblia ndáyáʼviníkaña nu̱ú oro (Sal. 119:127; Prov. 8:10). Xa̱ʼa̱ ña̱kán kúee koo iniún ta kǒo sandákoún ña̱ viíní kaʼviún tu̱ʼun Ndióxi̱ (Sal. 1:2).

16. ¿Ndáa ki̱ʼva kivi kundiku̱nyó yichi̱ Jehová ta saátu ta̱ Jesús?

¹⁶ Tá káʼviún tu̱ʼun Ndióxi̱, ndukú ki̱ʼva ña̱ keʼún ña̱ káʼa̱nña. Tá kúú, tá sa̱kúaʼún ña̱ va̱ʼaní-ini Jehová chikaa̱ ndee̱ ña̱ saátu keʼún xíʼin inkana. Kivi kuʼvi̱-iniún kuniún Jehová ta saátu na̱ yiví nda̱a̱ táki̱ʼva ke̱ʼé ta̱ Jesús, saátu kandíxaún keʼún ña̱ kúni̱ Jehová ta chindeétáʼún xíʼin na̱ hermano ni ná ixayo̱ʼvi̱ña xíʼún. Saátu kivi natúʼún xíʼin inkana xa̱ʼa̱ ña̱ ndáyáʼviní ke̱ʼé Jehová ña̱ ta̱xira se̱ʼera ni̱xi̱ʼi̱ra xa̱ʼa̱yó.

17. ¿Ndáaña sakúaʼayó nu̱ú inka artículo?

¹⁷ Tá ná ndakundeéyó sakúaʼayó xa̱ʼa̱ ña̱ ta̱xi Jehová se̱ʼera ni̱xi̱ʼi̱ra xa̱ʼa̱yó, saá kúú ña̱ xa̱a̱yó kuʼvi̱ka-iniyó kuniyó Jehová xíʼin se̱ʼera ta̱ Jesús. Ta saátu miína kuʼvi̱níka-inina kunina miíyó (Juan 14:21; Sant. 4:8). Xa̱ʼa̱ ña̱kán ná chikaa̱níkayó ndee̱ ña̱ kaʼviyó xa̱ʼa̱ ndiʼi ña̱ táxi Jehová ndaʼa̱yó ña̱ va̱ʼa sakúaʼakayó xa̱ʼa̱ ña̱ ni̱xi̱ʼi̱ se̱ʼera xa̱ʼa̱yó. Nu̱ú inka artículo sakúaʼayó ndáaña va̱ʼa ndákiʼinyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó ta saátu sakúaʼayó ndáa ki̱ʼva na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ ni̱kuʼvi̱ní-inira xi̱nira miíyó.