NDIʼI na̱ yiví kúni̱na si̱í koona. Soo tiempo ña̱ ndóoyó vitin yo̱ʼvi̱níña (2 Tim. 3:1). Ku̱a̱ʼání ña̱ʼa sáxo̱ʼvi̱ na̱ yiví tá kúú ku̱a̱chi síkí, kue̱ʼe̱, ña̱ kǒo chiñu kachíñuna á ña̱ ni̱xi̱ʼi̱ iin na̱ táʼanna. Nda̱a̱ na̱ ndásakáʼnu Jehová tá íyo ku̱a̱chi nu̱úna kivi ndakava-inina ta va̱ása si̱íka koona. Tá saá ndóʼoyó, ¿ndáaña kivi keʼéyó ña̱ va̱ʼa tuku kusi̱í-iniyó?

Ña̱ va̱ʼa ndakuiinyó pregunta yóʼo, xíniñúʼu kunda̱a̱-iniyó ndáaña kúni̱ kachiña kusi̱í-iniyó ta ndáaña kéʼé savana ña̱ va̱ʼa si̱í íyo inina ni íyo tu̱ndóʼo nu̱úna. Tándi̱ʼi sakuaʼayó ndáaña keʼéyó ña̱ va̱ʼa kǒo ndiʼi-xa̱ʼa ña̱ kúsi̱í-iniyó.

Ña̱ kusi̱í-iniyó su̱ví iin kúúña xíʼin ña̱ ku̱a̱kuyó. Ná ka̱ʼa̱nyó xa̱ʼa iinña. Iin na̱ yiví tá ku̱a̱ʼání ndixi xi̱ʼina ta ni̱xi̱nina, sana xáku̱ miína xíkana. Soo tá nda̱kaxi-inina va̱ása xákukana ta ndákaʼánna ña̱ íyoní tu̱ndóʼo nu̱úna. Va̱ása naʼá ni̱xi̱yo ña̱ si̱í-ini xíʼinna, iin rato loʼo kuití ta ndi̱ʼivaña (Prov. 14:13).

Na̱ ndixa kúsi̱í-ini nda̱a̱ níma̱na nda̱a̱ maá kána ña̱ si̱í-inina. Nda̱a̱ ndáaka ña̱ va̱xi nu̱úna á ña̱ va̱ʼa kúúña á su̱ví ña̱ va̱ʼa kúúña, xa̱a̱ saá si̱í kúnina xíkavana (1 Tes. 1:6). Ni yáʼa̱na nu̱ú tu̱ndóʼo va̱ása ndíʼi-xa̱ʼa ña̱ si̱í-inina. Tá kúú na̱ apóstol ka̱ninana xa̱ʼa ña̱ na̱túʼunna xa̱ʼa ta̱ Jesús, soo ña̱ Biblia káchiña “saá ke̱ena Sanedrín ta ku̱a̱ʼa̱nvana, kúsi̱íkaví-inina ke̱ena chi ku̱ndi̱va̱ʼanína xíʼinna xa̱ʼa ki̱vi̱ ta̱ Jesús” (Hech. 5:41). Ña̱ nda̱a̱ kúúña va̱ása níkusi̱í-inina xa̱ʼa ña̱ ka̱ninana, soo ni̱kusi̱í-inina xa̱ʼa ña̱ ni̱xi̱yo nda̱kú-inina xíʼin Ndióxi̱.

Nda̱a̱ ni iinyó kǒo káku ña̱ si̱í-ini xíʼinyó. ¿Nda̱chun káʼa̱nyó saá? Saáchi xíʼin espíritu santo Ndióxi̱ táxira ña̱ kusi̱í-iniyó. Espirítu santo yóʼo kúú ña̱ chíndeé miíyó ña̱ va̱ʼa nasamayó miíyó, ta nda̱a̱ xa̱a̱yó kuumiíyó ña̱ si̱í-ini (Efes. 4:24; Gál. 5:22). Tá kúúmiíyó ña̱ si̱í-ini tá va̱xi tu̱ndóʼo nu̱úyó va̱ása kamaní ndákava-iniyó.

Tá i̱xava̱ʼa Jehová ñuʼú yóʼo, xi̱kuni̱ra ña̱ ndiʼiña va̱ʼaní kooña, va̱ása níkuni̱ra koo tu̱ndóʼo. Ni íyo na̱ yiví na̱ kéʼé ña̱ kini tiempo vitin, va̱ása ndákava-inira. Tu̱ʼun Ndióxi̱ káchiña: “Kúúmiíra ndée xíʼin ña̱ kúsi̱í-ini” (1 Crón. 16:27). Saátu kúsi̱íní-inira ña̱ xínira ña̱ va̱ʼa kéʼé na̱ ndásakáʼnu-ñaʼá (Prov. 27:11).

¿Ndáaña va̱ʼa keʼéyó ta saá va̱ʼa kundiku̱nyó yichi̱ Jehová? Va̱ása ndi̱ʼi̱ní-iniyó tá va̱ása kána va̱ʼa ña̱ kéʼéyó. Nu̱úka ña̱ ndakava-iniyó ná ndakanixi̱níyó xa̱ʼa ña̱  va̱ʼa kúúmiíyó vitin ta ná kundatuyó ña̱ chí nu̱únínu sana ya̱ʼa̱ña nu̱úyó. *

Nu̱ú Biblia, ndáni̱ʼíyó sava yichi̱ na̱ xi̱ndasakáʼnu Ndióxi̱ ta xi̱kusi̱í-inina tá xi̱yaʼana nu̱ú tu̱ndóʼo. Iin ta̱yóʼo xi̱kuu ta̱ Abrahán. Ta̱yóʼo ni̱ya̱ʼara nu̱ú tu̱ndóʼo ña̱ ke̱ʼé sava na̱ yiví xíʼinra á nda̱a̱ si̱lóʼo kúni̱ kuvira (Gén. 12:10-20; 14:8-16; 16:4, 5; 20:1-18; 21:8, 9). Soo va̱ása nísandákoora ña̱ kusi̱í-inira. ¿Nda̱chun? Saáchi ndiʼi tiempo xi̱ndakanixi̱níra xa̱ʼa ña̱ ndátura kutakura nu̱ú ñuyǐví xa̱á tá ná kaʼndachíñu ta̱ Mesías (Gén. 22:15-18; Heb. 11:10). Ta̱ Jesús ni̱ka̱ʼa̱nra: “Ta̱ Abrahán yivá miíndó ni̱kusi̱íní-inira tá na̱kunda̱a̱-inira ña̱ kixii̱” (Juan 8:56). Miíyó va̱ʼa kundiku̱nyó yichi̱ ta̱ Abrahán tá xíʼin ña̱ si̱í-iniyó ndakanixi̱níyó xa̱ʼa ndiʼi ña̱ va̱ʼa ña̱ ndátuyó koo chí nu̱únínu (Rom. 8:21).

Táki̱ʼva ni̱xi̱yo ta̱ Abrahán, saátu ni̱xi̱yo ta̱ apóstol Pablo xíʼin ta̱ Silas na̱yóʼo xi̱ndakanixi̱nína xa̱ʼa ña̱ taxi Ndióxi̱ ndaʼa̱na chí nu̱únínu. Xa̱ʼa ña̱ ndeéní xi̱kandíxana, ni̱kusi̱í-inina tá ni̱ya̱ʼana nu̱ú tu̱ndóʼo. Iin yichi̱ tá ka̱ninana xíʼin yitu̱n ta chi̱ka̱a̱nana ini veʼeka̱a. Tu̱ʼun Ndióxi̱ kachiña, “mií ma̱ʼñú ñu̱ú ta̱ Pablo xíʼin ta̱ Silas ni̱ka̱ʼa̱nna xíʼin Jehová, ta xi̱tana yaa nu̱úra” (Hech. 16:23-25). Ku̱ndeé-inina xa̱ʼa ña̱ ndátuna taxi Ndióxi̱ ndaʼa̱na chí nu̱únínu, ta saátu xi̱kusi̱í-inina chi xa̱ʼa ña̱ ndíku̱nna ta̱ Cristo ni̱xo̱ʼvi̱na. Tá kúni̱yó kundiku̱nyó yichi̱ na̱yóʼo, xíniñúʼu ndakanixi̱níyó xa̱ʼa ña̱ va̱ʼa ni̱ʼíyó tá ná ndasakáʼnuyó Ndióxi̱. (Filip. 1:12-14).

Vitin íyotu ku̱a̱ʼání na̱ hermano ni ndóʼona tu̱ndóʼo kúsi̱íva-inina. Tá noviembre ku̱i̱ya̱ 2013, tá ko̱on sa̱vi̱ ndeé tá naní Haiyan sa̱ndiʼi-xa̱ʼará ñuu Filipinas. Sa̱ndiʼi-xa̱ʼará yáʼaka mil veʼe na̱ Testigo. Iin veʼe ña̱ ndi̱ʼi-xa̱ʼa kúú veʼe iin ta̱ hermano naní George, ta̱ ñuu Tacloban. Ta̱yóʼo ni̱ka̱ʼa̱nra: “Ni ni̱ya̱ʼa tu̱ndóʼo yóʼo, na̱ hermano kúsi̱í-inina. Ni va̱ása níʼii̱ tu̱ʼun ña̱ káʼi̱n xa̱ʼa ña̱ kúsi̱íní-inindi̱”. Tá ná ndakanixi̱níyó xa̱ʼa ndiʼi ña̱ kéʼé Jehová xa̱ʼayó ta táxiyó tixaʼvi ndaʼa̱ra, kusi̱íní-iniyó ni ná ya̱ʼayó nu̱ú tu̱ndóʼo. ¿Ndáakaña táxi Jehová ndaʼa̱yó ña̱ va̱ʼa kusi̱í-iniyó?

Iin ña̱ táxi ña̱ kúsi̱í-iniyó kúú ña̱ kítáʼan va̱ʼayó xíʼinra. Xíni̱yó ta̱yóʼo kúú ta̱ xáʼndachíñu nu̱ú iníísaá ñuyǐví. Ta̱yóʼo kúú Ndióxi̱ miíyó, kúúra yiváyó, ta kúúra migoyó (Sal. 71:17, 18).

Inka ña̱ táxi ña̱ kúsi̱í-iniyó kúú ña̱ tákuyó (Ecl. 3:12, 13). Mií Jehová kúú ta̱ nda̱ka̱xin miíyó ña̱ kachíñuyó nu̱úra, xa̱ʼa ña̱yóʼo xíni̱yó ndáaña kúni̱ra kéʼéyó (Col. 1:9, 10). Tixaʼvi ña̱yóʼo, íyo iin ña̱ ndátuyó chí nu̱únínu. Soo, ku̱a̱ʼání na̱ yiví va̱ása xíni̱na ndáaña keʼéna xíʼin ña̱ tákuna. Ta̱ Pablo ni̱ka̱ʼa̱nra xa̱ʼa ña̱yóʼo: “‘Ni iinna ta̱ʼán kuni ta ni iinna ta̱ʼán kuniso̱ʼo, ni va̱ása ndákanixi̱nína ndáaña va̱ʼa taxira ndaʼa̱ na̱ kúʼvi̱-ini xíniñaʼáʼ. Ndióxi̱ xi̱niñúʼura espíritura ña̱ va̱ʼa kunda̱a̱-iniyó xíʼinña” (1 Cor. 2:9, 10). Tá kúnda̱a̱-iniyó xa̱ʼa ña̱ kúni̱ Ndióxi̱ xíʼin xa̱ʼa ña̱ koo chí nu̱únínu, kúsi̱íníva-iniyó.

Ná sakuaʼayó xa̱ʼa inka ña̱ kéʼé Jehová xa̱ʼa na̱ ñuura. Íyo iin ña̱ ke̱ʼéra ña̱ va̱ʼa koo káʼnu-inira xa̱ʼayó (1 Juan 2:12). Xa̱ʼa ña̱ va̱ʼa inira táxira ña̱ va̱ʼa xa̱a̱yó kutakuyó ti̱xin ñuyǐví xa̱á, ta ña̱yóʼo xa̱a̱ ku̱yatinníña (Rom. 12:12). Nda̱a̱ vitin, Jehová táxira ku̱a̱ʼání na̱ hermano na̱ kítáʼan xíʼinyó ña̱ va̱ʼa ndasakáʼnuyóra (Sal. 133:1). Ña̱ Biblia káʼa̱ntuña xíʼinyó, Jehová ndáara  na̱ ñuura nu̱ú ta̱ Ndi̱va̱ʼa xíʼin nu̱ú na̱ ta̱chí ndi̱va̱ʼa (Sal. 91:11). Tá ná ndakanixi̱níyó xa̱ʼa ndiʼi ña̱ va̱ʼa ña̱ táxi Ndióxi̱ ndaʼa̱yó, xa̱a̱yó si̱íníka koo iniyó (Filip. 4:4).

¿Á kivi xa̱a̱yó si̱íka koo iniyó? Ta̱ Jesús ni̱ka̱ʼa̱nra: “Káʼi̱n ña̱yóʼo xíʼinndó ña̱ va̱ʼa ná kusi̱íní-inindó táki̱ʼva íyo miíi̱ tasaá ndixa kusi̱í-inindó” (Juan 15:11). Tu̱ʼun yóʼo náʼa̱ña ña̱ kiviva xa̱a̱yó ndiʼi tiempo si̱í koo iniyó. Ña̱ kúsi̱í-iniyó táki̱ʼva íyo iin ñuʼu̱ saá íyoña. Tá va̱ása kúni̱yó ndaʼva ñuʼu̱ xíniñúʼu chika̱a̱kayó titu̱n ña̱ va̱ʼa ná kokoña. Saátu íyo ña̱ kúsi̱í-iniyó tá kúni̱yó kuaʼnuka ña̱yóʼo, xíniñúʼuyó espíritu santo Ndióxi̱. Ña̱kán ná ka̱ʼa̱nyó xíʼin Jehová ná taxikara espíritu santo ndaʼa̱yó, ta ná ndakanixi̱níyó xa̱ʼa ña̱ káʼviyó nu̱ú Biblia chi ña̱yóʼo tu̱ʼun Ndióxi̱ kúúña (Sal. 1:1, 2; Luc. 11:13).

Inkatu ña̱ kivi keʼéyó ña̱ kuaʼnuka ña̱ kúsi̱í-iniyó kúú ña̱ keʼéyó ña̱ kútóo Jehová (Sal. 35:27; 112:1). ¿Nda̱chun káʼa̱nyó ña̱yóʼo? Saáchi miíra i̱xava̱ʼa miíyó ña̱ keʼéyó ña̱ kúni̱ra. Ña̱ Biblia káʼa̱nña: “Ixato̱ʼó Ndióxi̱ ta keʼé ña̱ káʼa̱nra. Chi ña̱yóʼo kúú ña̱ xíniñúʼu keʼé ndiʼi na̱ yiví” (Ecl. 12:13). Ña̱kán kúúña tá ndásakáʼnuyó Jehová, kúsi̱íní-iniyó. *

Tá si̱í kúniyó nda̱a̱ níma̱yó va̱ʼa kúniña, ta ku̱a̱ʼáka ña̱ va̱ʼa ni̱ʼíyó. Tá kúú tá ndásakáʼnuyó Jehová xíʼin ña̱ si̱í-ini ni íyo tu̱ndóʼo nu̱úyó, sákusi̱íyó-inira (Deut. 16:15; 1 Tes. 5:16-18). Tá ndixa kúúmiíyó ña̱ si̱í-ini va̱ása ndíku̱nyó sa̱tá ña̱ ku̱i̱ká ta chíka̱a̱kayó ndée ña̱ keʼéyó chiñu Ndióxi̱ (Mat. 13:44). Ndiʼi ña̱yóʼo taxikaña ña̱ kusi̱í-iniyó, va̱ʼa kuniyó xíʼin miíyó ta nda̱a̱ sakusi̱ítuyó-ini inkana (Hech. 20:35; Filip. 1:3-5).

Tá si̱íní íyo iniyó va̱ása kíʼin kue̱ʼe̱ miíyó. Ña̱ Biblia káchiña: “Tá kúsi̱í-iniyó táki̱ʼva íyo iin ta̱tán ña̱ sándáʼa miíyó saá íyoña” (Prov. 17:22, nota). Iin ta̱ médico ta̱ Universidad de Nebraska (Estados Unidos) ni̱ka̱ʼa̱nra iin ña̱ kítáʼan xíʼin ña̱ káʼa̱n Biblia. Káchira: “Ta tiempo vitin si̱í íyo iniyó, chí nu̱únínu kǒo kue̱ʼe̱ kuumiíyó”.

Táki̱ʼva sa̱kuaʼayó ni ndóoyó tiempo ña̱ yo̱ʼvi̱ní kiviva si̱í koo iniyó. Ña̱kán xíniñúʼu ndukúyó espíritu santo Ndióxi̱, kaʼviyó Biblia ta ndakanixi̱níyó xa̱ʼa ña̱ káʼviyó. Tá kúni̱yó kuaʼnuka ña̱ si̱í-iniyó, xíniñúʼu ndakanixi̱níyó xa̱ʼa ña̱ táxi Ndióxi̱ ndaʼa̱yó, kundiku̱nyó yichi̱ na̱ xi̱ndasakáʼnu-ñaʼá tá ya̱chi̱, ta chika̱a̱yó ndée ña̱ keʼéyó ña̱ kúni̱ra. Tasaá kivi kuniyó xínu ña̱ káʼa̱n Salmo 64:10: “Iin ta̱a ta̱ va̱ʼa ini kándíxara Jehová ta kúsi̱íní-inira”.