Ka̱kui̱ chí Quebec iin ñuu ña̱ ndíka̱a̱ chí Canadá, nu̱ú káʼa̱nna tu̱ʼun francés. Yivái̱ ta̱ Louis xíʼin siʼíi̱ ñá Zélia, ni̱kuʼvi̱ní-inina xi̱nina yi̱ʼi̱. Yivái̱ loʼoní xi̱ka̱ʼa̱nra xíʼin na̱ yiví, soo xi̱kutóoníra kaʼvira. Ta yi̱ʼi̱ xi̱kutóoníi̱ kaʼyíi̱, ta xi̱kuni̱i̱ xa̱i̱ koi̱ periodista.

Tá kúúmiíi̱ 12 ku̱i̱ya̱, ni̱xa̱ʼa̱n iin ta̱ xi̱kachíñu xíʼin yivái̱ ta̱ xi̱naní Rodolphe Soucy xíʼin iin ta̱ migora xi̱tona ndi̱ʼi̱, ta testigo Jehová xi̱kuuna. Ta loʼoní xi̱kunda̱a̱-inii̱ xa̱ʼa̱ na̱ testigo, soo va̱ása níxikuni̱kai̱ kunda̱a̱-inii̱ xa̱ʼa̱ ña̱ religión kán. Soo nda̱kanda̱ní-inii̱ tá xi̱nii̱ ña̱ viíní xi̱ndakuiinna ña̱ xi̱nda̱ka̱tu̱ʼunndi̱na, ta xi̱xiniñúʼuna Biblia ña̱ ndakuiinna yuʼúndi̱. Ta saátu nda̱kanda̱ní-ini na̱ yivái̱, ña̱kán ka̱ndíxandi̱ ña̱ kaʼvina Biblia xíʼinndi̱.

Tá tiempo saá, yi̱ʼi̱ xi̱xa̱ʼi̱n iin escuela ña̱ católica. Sava yichi̱ xi̱ka̱ʼi̱n xíʼin na̱ xi̱kaʼvi xíʼi̱n, xa̱ʼa̱ ña̱ xi̱sakuaʼi̱ nu̱ú Biblia. Tá ni̱ya̱ʼa loʼo, na̱ maestro na̱ xi̱kuu su̱tu̱, na̱kunda̱a̱-inina xa̱ʼa̱ ña̱yóʼo. Iin ta̱ maestro kán, nu̱úka ña̱ kuniñúʼura Biblia ña̱ ka̱ʼa̱nra xíʼi̱n ndáaña va̱ása va̱ʼa kéʼíi̱, ni̱ka̱ʼa̱nra xíʼin ndiʼi na̱ xi̱kaʼvi xíʼi̱n ña̱ iin ta̱ va̱ása íxato̱ʼó kúi̱. Ni va̱ása va̱ʼa níkunii̱, soo chi̱ndeétáʼanníña xíʼi̱n, saáchi ku̱ndaa̱-inii̱ ña̱ va̱ása kítáʼan ña̱ sánáʼa̱na kán xíʼin ña̱ va̱xi nu̱ú Biblia. Ki̱ʼii̱n kuenta ña̱ xíniñúʼu sandákoi̱ ña̱ escuela kán. Ni̱ka̱ʼi̱n xíʼin na̱ yivái̱ xa̱ʼa̱ ña̱yóʼo, ta ta̱xina ña̱ ku̱ʼi̱n inka escuela.

Nda̱kundeévai̱ ka̱ʼvii̱ Biblia, soo va̱ása kama níxaʼnui̱ xíʼin tu̱ʼun Ndióxi̱, saáchi xi̱yi̱ʼvíi̱ natúʼi̱n xíʼin na̱ yiví veʼe tá veʼe. Ku̱a̱ʼání na̱ yiví xi̱kitáʼanna xíʼin na̱ veʼe-ñu̱ʼu católica, ta va̱ása níxitaxina ña̱ natúʼunndi̱ xa̱ʼa̱ Ndióxi̱. Ta̱ político Maurice Duplessis ta̱ xi̱kuumií iin chiñu káʼnu chí Quebec, xi̱kitáʼanra xíʼin na̱ veʼe-ñu̱ʼu vatá. Xa̱ʼa̱ ña̱ xi̱chindeétáʼanra xíʼinna xi̱ ixandi̱va̱ʼana  xíʼin na̱ testigo. Ta xi̱niñúʼu ndakúní koo inindi̱ ña̱ va̱ʼa ku̱ʼu̱nndi̱ natúʼunndi̱ xíʼin na̱ yiví xa̱ʼa̱ Ndióxi̱.

Iin ta̱ hermano ta̱ chi̱ndeétáʼanní xíʼi̱n ña̱ va̱ása yi̱ʼvíkai̱, xi̱kuu ta̱ John Rae, ta̱ ni̱xa̱ʼa̱n Escuela ña̱ Galaad ña̱ ni̱xi̱yo yichi̱ i̱i̱n. Ni ku̱a̱ʼání ña̱ʼa xi̱xinira xa̱ʼa̱, soo vitání ni̱xi̱yo inira. Sava yichi̱ ta̱xira consejo ndaʼíi̱, soo ku̱a̱ʼání ña̱ sa̱kuaʼi̱ xíʼin ña̱ xi̱keʼéra. Xa̱ʼa̱ ña̱ xi̱ ixayo̱ʼvi̱ña xíʼinra ña̱ ka̱ʼa̱nra tu̱ʼun francés, xi̱xa̱ʼa̱n ni̱ʼii̱n xíʼinra ña̱ natúʼunndi̱ xíʼin na̱ yiví, ta xi̱chindeétáʼi̱n xíʼinra ña̱ sakuaʼara ña̱ tu̱ʼun yóʼo. Xa̱ʼa̱ ña̱ ku̱a̱ʼá tiempo xi̱táʼi̱n xíʼin ta̱ John, chi̱ndeétáʼanníña xíʼi̱n ña̱ ni̱xa̱i̱ ku̱i̱ testigo Jehová. Nda̱kuchii̱ tá 26 tí mayo ña̱ ku̱i̱ya̱ 1951, tá xa̱a̱ ni̱ya̱ʼa u̱xu̱ ku̱i̱ya̱ ña̱ na̱túʼun na̱ testigo Jehová xíʼi̱n.

Ti̱xin congregación ña̱ xi̱ndikai̱ chí Quebec, ku̱a̱ʼání na̱ precursor ni̱xi̱yo. Xíʼin ña̱ xi̱keʼéna chi̱ndeétáʼanna xíʼi̱n ña̱ ni̱xa̱i̱ ku̱i̱ precursor. Tá tiempo saá, iinlá kuití Biblia xi̱xiniñúʼundi̱ ña̱ va̱ʼa natúʼunndi̱ xíʼin na̱ yiví. Xa̱ʼa̱ ña̱ va̱ása níxikuumiíndi̱ publicación, xi̱xiniñúʼu viíní kuniñúʼundi̱ Biblia. Ña̱kán, chi̱ka̱i̱ ndee̱ ña̱ sakuaʼi̱ texto ña̱ kivi chindeétáʼan xíʼi̱n, ña̱ va̱ʼa ka̱ʼi̱n xa̱ʼa̱ ña̱ nda̱a̱. Soo ku̱a̱ʼání na̱ yiví va̱ása níxiinna kaʼvina Biblia, tá kǒo permiso níxitaxi na̱ veʼe-ñu̱ʼu católica ndaʼa̱na, ña̱ xi̱naní imprimátur.

Tá ku̱i̱ya̱ 1952, ti̱ndaʼíi̱ xíʼin ñá Simone Patry iin ñá hermana ñá nda̱kúní-ini, ñá ñuu Quebec. Tasaá ku̱a̱ʼa̱nndi̱ koondi̱ chí Montreal, ta tá kúma̱níka xi̱nu iin ku̱i̱ya̱, ka̱ku ñá loʼo se̱ʼendi̱ ñá naní Lise. Ni sa̱ndákoi̱ ña̱ koi̱ precursor tá xi̱kuma̱ní si̱lóʼo ña̱ ti̱ndaʼíi̱, ñá Simone xíʼin yi̱ʼi̱ xi̱chika̱a̱ndi̱ ndee̱ ña̱ loʼo ña̱ʼa kuumiíndi̱ ña̱ va̱ʼa ku̱a̱ʼáka chiñu keʼéndi̱ ti̱xin congregación.

Xa̱a̱ ni̱ya̱ʼa 10 ku̱i̱ya̱ ta ta̱ʼán ndakanixi̱níi̱ xa̱ʼa̱ ña̱ ndikó tukui̱ koi̱ precursor. Tá ku̱i̱ya̱ 1962, ni̱xa̱ʼi̱n Escuela del Ministerio del Reino chí Betel ña̱ Canadá, ta curso ña̱ xi̱kuumiíndi̱ na̱ anciano iin yo̱o̱ ni̱xi̱yoña. Kán inkáchi veʼe ni̱xi̱yoi̱ xíʼin iin ta̱ hermano ta̱ naní Camille Ouellette. Nda̱kanda̱ní-inii̱ xa̱ʼa̱ ña̱ chíka̱a̱ní ta̱ hermano yóʼo ndee̱ ña̱ nátúʼunra xa̱ʼa̱ Ndióxi̱, ni íyo ñá síʼíra xíʼin se̱ʼera. Tá tiempo saá, loʼoní na̱ hermano ña̱ ñuu Quebec xi̱kuu precursor, ta xi̱ndaana na̱ veʼena. Ta ña̱yóʼo kúú ña̱ xi̱kuni̱ ta̱ Camille keʼéra. Ndiʼi tiempo ña̱ ni̱xi̱yoi̱ xíʼinra, chi̱ka̱a̱níra ndee̱ xíʼi̱n ña̱ vií ndakanixi̱níi̱ xa̱ʼa̱ ña̱ keʼíi̱. Tá ni̱ya̱ʼa loʼo yo̱o̱, ki̱ʼii̱n kuenta ña̱ kiviva tuku ndikói̱ koi̱ precursor. Savana ni̱ka̱ʼa̱nna ña̱  va̱ása va̱ʼa ña̱ níndaka̱xii̱n, soo ki̱xáʼa tukui̱ kúi̱ precursor chi xi̱kandíxai̱ ña̱ mií Jehová chindeétáʼan xíʼi̱n ña̱ natúʼi̱n xa̱ʼa̱ra.

Tá ku̱i̱ya̱ 1964, ta̱xina chiñu ndaʼíi̱ xíʼin ñá Simone ña̱ koondi̱ precursor especial chí Quebec, ñuu nu̱ú ka̱kundi̱. Kán ka̱chíñundi̱ sava ku̱i̱ya̱. Tá tiempo saá, si̱lóʼova xi̱sasi na̱ yiví nu̱úndi̱ ña̱ natúʼunndi̱ xa̱ʼa̱ Ndióxi̱.

Tá xi̱ku̱aá sábado, sa̱sina yi̱ʼi̱ chí Sainte-Marie iin ñuu loʼo ña̱ ndíka̱a̱ yatin chí Quebec. Iin ta̱ policía ti̱inra yi̱ʼi̱ ku̱a̱ʼa̱n xíʼinra chí comisaría ta chi̱ka̱a̱ra yi̱ʼi̱ veʼeka̱a, xa̱ʼa̱ ña̱ kǒo permiso kúúmiíi̱ ña̱ natúʼi̱n xíʼin na̱ yiví veʼe tá veʼe. Tá ni̱ya̱ʼa loʼo, ni̱xa̱ʼa̱nna xíʼi̱n nu̱ú iin ta̱ juez ta̱ naní Baillargeon iin ta̱a ta̱ kue̱ʼe̱ní náʼa̱. Ni̱nda̱ka̱tu̱ʼunra yi̱ʼi̱ ndáana kúú na̱ ka̱ʼa̱n xa̱ʼíi̱, tá ná tiinna ku̱a̱chi xíʼi̱n. Tá ni̱ka̱ʼi̱n xíʼinra ña̱ ta̱ Glen How * kúúra, iin abogado ta̱ kúú testigo Jehová ta̱ xíni̱ ku̱a̱ʼánína, ta̱ Baillargeon ni̱yi̱ʼvíra ta ka̱chira: “Va̱ása, va̱ása kixi ta̱kán”. Ku̱a̱ʼánína xi̱xini̱na ta̱ Glen How chi nda̱kiʼinra tu̱ʼun ku̱a̱ʼání na̱ hermano. Tá ni̱ya̱ʼa loʼo tiempo, na̱ chíñu ni̱ka̱ʼa̱nna xíʼi̱n ña̱ kǒoka ku̱a̱chi kúúmiíi̱.

Xa̱ʼa̱ ña̱ xi̱sasina nu̱úndi̱ ña̱ natúʼunndi̱ xa̱ʼa̱ Ndióxi̱ ña̱ ñuu Quebec, xi̱ ixayo̱ʼvi̱ña xíʼinndi̱ ña̱ ndani̱ʼíndi̱ veʼe nu̱ú va̱ʼa koo reunión. Na̱ congregación nda̱ni̱ʼína iin veʼe loʼo ña̱ yatá, ta vi̱xinní ni̱xi̱yo iniña. Ta ña̱ va̱ʼa nduniʼní-ini ña̱ veʼe kán tiempo ña̱ vi̱xin, na̱ hermano xi̱xiniñúʼuna iin estufa ña̱ xi̱xaʼmi aceite. Tá kúma̱níka kixáʼa ña̱ reunión, ndiʼindi̱ xi̱ndakutáʼanndi̱ nu̱ú níndichiña ña̱ va̱ʼa ndasa̱ándi̱, ta xi̱natúʼunndi̱ experiencia ña̱ xi̱chika̱a̱ní ndee̱ xíʼinndi̱.

Ndiʼi ku̱i̱ya̱ ña̱ xa̱a̱ ni̱ya̱ʼa, iin ña̱ si̱íní-ini kúú ña̱ xítoi̱ ña̱ xa̱a̱ xa̱ʼnuní ña̱ predicación. Tá ku̱i̱ya̱ 1960, loʼova kúú congregación ni̱xi̱yo yatin chí Quebec, tá kúú chí Côte-Nord xíʼin Gaspé. Ta tiempo vitin ku̱a̱ʼání kúú na̱ hermano íyo kán, ta liviní salón nu̱ú ndákutáʼanna.

Tá ku̱i̱ya̱ 1970, ta̱xina chiñu ndaʼíi̱ xíʼin ñá Simone ña̱ koondi̱ superintendente ña̱ circuito, ta tá ku̱i̱ya̱ 1973 ki̱xáʼandi̱ kúúndi̱ superintendente ña̱ distrito. Ndiʼi ku̱i̱ya̱ kán, ku̱a̱ʼání ña̱ sa̱kuaʼi̱ xíʼin ña̱ xi̱keʼé inkaka na̱ superintendente viajante, tá kúú ta̱ Laurier Saumur * xíʼin ta̱ David Splane. * Tá xi̱ndiʼi asamblea, ta̱ David xíʼin yi̱ʼi̱ xi̱ka̱ʼa̱nndi̱ ndáaka ña̱ kivi keʼéndi̱ ña̱ va̱ʼaka sanáʼa̱ndi̱. Ndákaʼíi̱n ña̱ ni̱ka̱ʼa̱nra xíʼi̱n iin yichi̱: “Léonce, ku̱tóoníi̱ discurso so̱ndíʼi ña̱ ta̱xiún. Va̱ʼaní ni̱ka̱ʼún, soo xíʼin ndiʼi ña̱ ni̱ka̱ʼún, u̱ni̱ví discurso ndatavá yi̱ʼi̱ xíʼinña”. Chi yi̱ʼi̱ ku̱a̱ʼání ña̱ʼa xi̱ka̱ʼi̱n xa̱ʼa̱, ña̱kán xi̱niñúʼu sakuaʼi̱ ka̱ʼi̱n xa̱ʼa̱ loʼo ña̱ʼa, ta káxi kooña.

Iin chiñu ña̱ xi̱keʼé na̱ superintendente ña̱ distrito  kúú ña̱ chika̱a̱na ndee̱ xíʼin na̱ superintendente ña̱ circuito. Soo ku̱a̱ʼání na̱ publicador ña̱ ñuu Quebec xi̱xini̱na yi̱ʼi̱, ña̱kán tá xi̱xaʼi̱n xi̱xitoi̱ na̱ superintendente ña̱ circuito, xi̱kuni̱na keena xíʼi̱n ña̱ natúʼunndi̱ xa̱ʼa̱ Ndióxi̱. Xi̱kutóoníi̱ ku̱ʼi̱n xíʼinna, soo loʼoní tiempo xi̱xiyoi̱ xíʼin ta̱ superintendente. Iin yichi̱, iin ta̱ superintendente ña̱ circuito viíní ni̱ka̱ʼa̱nra ña̱yóʼo xíʼi̱n: “Iin ña̱ va̱ʼava kúú ña̱ táváún tiempo ña̱ íyoún xíʼin na̱ hermano, soo kǒo nandósóún ña̱ yi̱ʼi̱va va̱xiún kotoún semana yóʼo, xíniñúʼutu yi̱ʼi̱va ña̱ chika̱a̱na ndee̱ xíʼi̱n”. Xa̱ʼa̱ ña̱ viíní ni̱ka̱ʼa̱nra ña̱yóʼo xíʼi̱n, chi̱ndeétáʼanña xíʼi̱n ña̱ viíní kuniñúʼi̱ tiempo ña̱ kúúmiíi̱.

Soo tá ku̱i̱ya̱ 1976 ndo̱ʼíi̱ iin ña̱ suchíní-ini. Ñá síʼíi̱ ñá Simone ki̱ʼin iin kue̱ʼe̱ ña̱ ndeéní miíñá ta ni̱xi̱ʼi̱ñá. Ñáyóʼo va̱ʼaní xi̱chindeétáʼanñá xíʼi̱n, xi̱kuʼvi̱ní-iniñá xi̱xiniñá Jehová, ta xi̱ndi̱ʼi̱ní-iniñá xa̱ʼa̱ inkana. Ña̱ xi̱ndi̱ʼi̱-inii̱ xa̱ʼa̱ chiñu Ndióxi̱, chi̱ndeétáʼanña xíʼi̱n ña̱ ni̱ya̱ʼi̱ nu̱ú ña̱yóʼo, táxiníi̱ tíxa̱ʼvi ndaʼa̱ Jehová xa̱ʼa̱ ña̱ chi̱ndeétáʼanra xíʼi̱n ña̱ ni̱ya̱ʼi̱ nu̱ú tu̱ndóʼo yóʼo. Tá ni̱ya̱ʼa tiempo, ti̱ndaʼíi̱ xíʼin ñá Carolyn Elliott iin ñá precursora ñá si̱íní-ini, ñá káʼa̱n tu̱ʼun inglés, ñá ni̱xa̱a̱ chí Quebec ña̱ chindeétáʼanñá xíʼin na̱ hermano ña̱ natúʼunna xa̱ʼa̱ Ndióxi̱. Iin ñaʼá ñá va̱ʼaní-ini kúúñá ta ndíʼi̱ní-iniñá xa̱ʼa̱ inkana, tá kúú na̱ kúkaʼan nu̱ú á na̱ kúni mitúʼun. Va̱ʼaní chíndeétáʼanñá xíʼi̱n xa̱ʼa̱ ña̱ kúi̱ superintendente viajante.

Tá enero ña̱ ku̱i̱ya̱ 1978, ni̱ka̱ʼa̱nna xíʼi̱n ña̱ koi̱ instructor ña̱ Escuela nu̱ú Sákuaʼa na̱ Precursor, ña̱ nu̱ú ni̱xi̱yo chí Quebec. Ni̱yi̱ʼvíníi̱, saáchi va̱ása xíni̱ va̱ʼi̱ ndáaña kúú ña̱ sanáʼi̱na, ta ni miína va̱ása xíni̱ va̱ʼa xa̱ʼa̱ ña̱yóʼo. Ta nda̱a̱ va̱ʼa ku̱nii̱, chi ku̱a̱ʼání na̱ precursor na̱ ni̱xa̱ʼa̱n kán na̱ xíni̱ va̱ʼa kúúna, ña̱kán ni yi̱ʼi̱ kúú ta̱ xi̱sanáʼa̱-ñaʼá, ku̱a̱ʼání ña̱ sa̱kuaʼi̱ xíʼin ña̱ ke̱ʼéna.

Ta mií ku̱i̱ya̱ saá ni̱xi̱yo iin Asamblea Internacional ña̱ xi̱naní “Fe victoriosa”, chí Estadio Olímpico ña̱ Montreal. Ña̱yóʼo kúú asamblea ña̱  káʼnuníka ni̱xi̱yo chí Quebec, ta yáʼaka 80,000 na̱ yiví ni̱xa̱ʼa̱n. Ta̱xina chiñu ndaʼíi̱ ña̱ ka̱ʼi̱n xíʼin ku̱a̱ʼání na̱ periodista, ta ni̱kusi̱íní-inii̱ tá xi̱nii̱ ña̱ ku̱a̱ʼání ña̱ va̱ʼa ni̱ka̱ʼa̱nna xa̱ʼa̱ na̱ ñuu Ndióxi̱. Ta yáʼaka 20 hora sa̱yáʼana ña̱ ni̱nda̱ka̱tu̱ʼunna ndi̱ʼi̱ ti̱xin radio xíʼin nu̱ú televisión, ta saátu ku̱a̱ʼání ña̱ ka̱ʼyína xa̱ʼa̱ ña̱yóʼo. Ta ku̱a̱ʼání na̱ yiví xi̱kuni̱ kunda̱a̱-ini xa̱ʼa̱ Jehová xíʼin na̱ ñuura.

Tá ku̱i̱ya̱ 1996, na̱sama ña̱ tákui̱. Nda̱a̱ tá nda̱kuchii̱, iinlá chí ñuu Quebec nu̱ú káʼa̱nna tu̱ʼun francés, kúú nu̱ú xi̱kachíñui̱ nu̱ú Ndióxi̱. Soo ta̱xina chiñu ndaʼíi̱ ña̱ ku̱ʼi̱n chí Toronto nu̱ú káʼa̱nna tu̱ʼun inglés. Xi̱ndakanixi̱níi̱ ña̱ va̱ása íyo tu̱ʼvai̱, ta saátu xi̱yi̱ʼvíi̱ ña̱ taxii̱ discurso chi va̱ása xíni̱ va̱ʼi̱ ka̱ʼi̱n inglés. Ña̱kán xi̱xiniñúʼu ka̱ʼa̱n ni̱ʼikai̱ xíʼin Jehová ta kandíxakai̱ra.

Ta vitin, kivi ka̱ʼi̱n ña̱ kúsi̱íní-inii̱ ña̱ ni̱xi̱yoi̱ u̱vi̱ ku̱i̱ya̱ chí Toronto. Ñá Carolyn va̱ʼaní chi̱ndeétáʼanñá xíʼi̱n ta kúeení ni̱xi̱yo iniñá ña̱ sa̱náʼa̱ñá yi̱ʼi̱ tu̱ʼun inglés, ta na̱ hermano va̱ʼaní chi̱ndeétáʼanna xíʼi̱n ta chi̱ka̱a̱na ndee̱ xíʼi̱n. Ta kamaní nda̱ni̱ʼíndi̱ ku̱a̱ʼá na̱ migondi̱.

Tá xi̱ku̱aá ña̱ ki̱vi̱ viernes tá kúma̱níka koo asamblea ña̱ circuito, ni ni̱xi̱yoní chiñu nu̱úi̱, xi̱kutóoníi̱ ku̱ʼi̱n veʼe tá veʼe ña̱ natúʼi̱n xíʼin na̱ yiví xa̱ʼa̱ Ndióxi̱. Sana kivi nda̱ka̱tu̱ʼun xíʼin mií savana, nda̱chun xi̱xa̱ʼi̱n xi̱natúʼi̱n xíʼin na̱ yiví ta kúnda̱a̱-inii̱ ña̱ kooní chiñu nu̱úi̱. Soo tá xi̱xa̱ʼi̱n xi̱natúʼi̱n xíʼin na̱ yiví xi̱chika̱a̱níña ndee̱ xíʼi̱n. Ta nda̱a̱ vitin va̱ʼa kúni̱i̱ tá xáʼi̱n nátúʼi̱n xíʼin na̱ yiví.

Tá ku̱i̱ya̱ 1998, ta̱xina chiñu ndaʼíi̱ xíʼin ñá Carolyn ña̱ koondi̱ precursor especial chí Montreal. Ti̱xin ku̱a̱ʼání ku̱i̱ya̱ xi̱kuumiíi̱ chiñu ña̱ kiʼii̱n kuenta xíʼin ña̱ nátúʼunyó nu̱ú íyo ku̱a̱ʼá na̱ yiví, ta saátu ña̱ ku̱ʼi̱n ka̱ʼi̱n xíʼin na̱ tává noticia, ña̱ va̱ʼa ná kǒo kundasíka na̱ yiví kunina na̱ testigo Jehová. Ta vitin, ñá Carolyn xíʼin yi̱ʼi̱ nátúʼunndi̱ xíʼin na̱ yiví na̱ sa̱kán ki̱xaa̱ chí Canadá, ta kúni̱nína kunda̱a̱-inina xa̱ʼa̱ ña̱ sánáʼa̱ Biblia, ta kúsi̱íní-inindi̱ xíʼin ña̱yóʼo.

Tá ndákanixi̱níi̱ xa̱ʼa̱ ña̱ 68 ku̱i̱ya̱ ña̱ xa̱a̱ nda̱kuchii̱, táxiníi̱ tíxa̱ʼvi ndaʼa̱ Jehová. Kúsi̱íní-inii̱ chi sa̱kuaʼi̱ natúʼi̱n xíʼin na̱ yiví xíʼin ña̱ si̱í-ini, ta chi̱ndeétáʼi̱n xíʼin inka na̱ yiví ña̱ ku̱ndaa̱-inina xa̱ʼa̱ Ndióxi̱. Tándi̱ʼi sa̱kuaʼnu se̱ʼei̱ ña̱ Lise xíʼin yiíñá na̱ va̱lí se̱ʼena, ki̱xáʼana kúúna precursor regular. Kúsi̱íní-inii̱ ña̱ xítoi̱ ña̱ va̱ása sándakoo ñá Lise ña̱ kúsi̱í-iniñá nátúʼunñá xíʼin na̱ yiví. Ta táxiníi̱ tíxa̱ʼvi ndaʼa̱ na̱ hermano, saáchi va̱ʼaní yichi̱ chi̱núuna nu̱úi̱ ta saátu consejo ña̱ ta̱xina ndaʼíi̱, chi̱ndeétáʼanníña xíʼi̱n ña̱ xa̱ʼnui̱ xíʼin tu̱ʼun Ndióxi̱, ta saátu ña̱ ke̱ʼíi̱ ndiʼi chiñu ña̱ ta̱xi na̱ ñuu Ndióxi̱ ndaʼíi̱. Sa̱kuaʼi̱ ña̱ kivi nda̱kú koo iniyó ta saxínuyó chiñu ña̱ táxina ndaʼa̱yó, tá kándíxayó ña̱ chindeétáʼan espíritu santo Jehová xíʼinyó (Sal. 51:11). Nda̱a̱ ni iin yichi̱ va̱ása sandákoi̱ ña̱ taxii̱ tíxa̱ʼvi ndaʼa̱ra xa̱ʼa̱ ña̱ ta̱xira ndásakáʼnui̱ ki̱vi̱ra (Sal. 54:6).