1, 2. ¿Nda̱chun va̱ʼa ta̱xi Jehová ña̱ ná xa̱a̱yó kooyó táʼan na̱ veʼera, ta ndáa ki̱ʼva ke̱ʼéraña?

JEHOVÁ ta̱xira iin ña̱ va̱ʼaní ndaʼa̱yó, ta kúni̱ra ña̱ ná kooyó táʼan na̱ veʼera. Na̱yóʼo kúú na̱ nda̱taxi xíʼin mií ndaʼa̱ra ta kándíxana ña̱ ni̱xi̱ʼi̱ se̱ʼera xa̱ʼa̱na. Ta si̱íní kítáʼanyó. Ta kúsi̱íní-iniyó xíʼin ña̱ tákuyó vitin, ta saátu xa̱ʼa̱ ña̱ ndátuyó ndakiʼinyó ña̱ kutakuyó ndiʼi tiempo, kúúña chí ndiví á nu̱ú ñuʼú yóʼo.

² Xa̱ʼa̱ ña̱ kúʼvi̱ní-ini Jehová xínira miíyó ke̱ʼéra iin ña̱ káʼnuní xa̱ʼa̱yó ña̱ va̱ʼa xa̱a̱yó kooyó táʼan na̱ veʼera (Juan 3:16). Ña̱ Biblia káchiña ña̱ cha̱ʼvira xa̱ʼa̱yó (1 Cor. 6:20). Tíxa̱ʼvi ña̱ ni̱xi̱ʼi̱ ta̱ Jesús xa̱ʼa̱yó, kivi xa̱a̱yó kitáʼanyó xíʼin Ndióxi̱. Kúsi̱íní-iniyó xa̱ʼa̱ ña̱ kivi ka̱ʼa̱nyó yivá xíʼin Ndióxi̱ ta̱ káʼnu iníísaá ñuyǐví. Ta nda̱a̱ táki̱ʼva xa̱a̱ ku̱ndaa̱-iniyó nu̱ú artículo ña̱ ni̱ya̱ʼa, Ndióxi̱ kúúra iin yivá ta̱ va̱ʼaní-ini.

3. ¿Ndáaña kivi nda̱ka̱tu̱ʼun xíʼin miíyó? (Koto recuadro “ ¿Á kíʼin Jehová kuenta xíʼi̱n?”).

³ Sana ndáka̱tu̱ʼunyó miíyó táʼan ña̱ ni̱nda̱ka̱tu̱ʼun xíʼin mií iin ta̱ ka̱ʼyí Biblia, tá ni̱ka̱ʼa̱nra: “¿Ndáa ki̱ʼva chaʼvii̱ Jehová xa̱ʼa̱ ndiʼi ña̱ va̱ʼa ña̱ kéʼéra xa̱ʼíi̱?” (Sal. 116:12). Kǒo nda̱a̱ ni iin ña̱ʼa ña̱ kivi chaʼviyó yiváyó ta̱ íyo chí ndiví. Soo xa̱ʼa̱ ña̱ kúʼvi̱-inira xínira miíyó, saátu miíyó kúʼvi̱-iniyó xíniyóra. Ta̱ apóstol Juan ka̱ʼyíra ña̱yóʼo: “Miíyó kúʼvi̱-iniyó, saáchi siʼnaka miíra ni̱kuʼvi̱-ini xi̱ni miíyó” (1 Juan 4:19). Ña̱kán, ¿ndáa ki̱ʼva kivi na̱ʼa̱yó ña̱ kúʼvi̱-iniyó xíniyó yiváyó?

4. Nda̱a̱ táki̱ʼva káchi Santiago 4:8, ¿nda̱chun xíniñúʼu chika̱a̱yó ndee̱ ña̱ kuyatinyó nu̱ú Jehová?

⁴ Jehová kúni̱ra ña̱ ná kuyatinyó nu̱úra ta ná ka̱ʼa̱nyó xíʼinra  (kaʼvi Santiago 4:8). * Káʼa̱nra xíʼinyó ña̱ ná ka̱ʼa̱n ni̱ʼiyó xíʼinra, ta íyo tu̱ʼvara ña̱ kuniso̱ʼora miíyó (Rom. 12:12). Jehová va̱ása sandákoora ña̱ kuniso̱ʼora miíyó ni chiñu nu̱úra, ta ni va̱ása kúnaara. Ta, ¿ndáa ki̱ʼva xíniso̱ʼo miíyó ña̱ káʼa̱nra? Xíniso̱ʼoyóra tá káʼviyó tu̱ʼunra ña̱ Biblia xíʼin tutu ña̱ chíndeétáʼan xíʼinyó ña̱ kunda̱a̱-iniyó xíʼinña. Ta saátu xíniso̱ʼoyóra tá viíní xíniso̱ʼoyó ña̱ káʼa̱nna ti̱xin reunión. Nda̱a̱ táki̱ʼva íyo na̱ va̱lí tá viíní nátúʼunna xíʼin na̱ yivána va̱ʼaníka xáa̱na kítáʼanna, ki̱ʼva saá íyo miíyó xíʼin Jehová chi tá káʼa̱n ni̱ʼiyó xíʼinra yatinka íyoyó xíʼinra.

5. ¿Nda̱saa kivi viíka ka̱ʼa̱nyó xíʼin Ndióxi̱?

⁵ ¿Ndáa ki̱ʼva íyo ña̱ káʼa̱nyó xíʼin Ndióxi̱? Kúni̱ra ña̱ ná ka̱ʼa̱nyó xíʼinra xíʼin ndiʼi níma̱yó (Sal. 62:8). Xa̱ʼa̱ ña̱yóʼo ná nda̱ka̱tu̱ʼun xíʼin miíyó: “¿Á táki̱ʼva íyo ña̱ xa̱a̱ sa̱kuaʼa xíʼin xi̱níi̱ saá íyo ña̱ káʼi̱n xíʼin Ndióxi̱? ¿Á nda̱a̱ táki̱ʼva íyo ña̱ káʼi̱n xíʼin iin na̱ migoi̱ saá íyo ña̱ káʼi̱n xíʼinra?”. Kúʼvi̱ní-iniyó xíniyó Jehová ta kúni̱yó yatin kooyó xíʼinra. Ta ña̱ va̱ʼa keʼéyó ña̱yóʼo xíniñúʼu ka̱ʼa̱n ni̱ʼiyó xíʼinra. Xíʼin ndiʼi níma̱yó ná ka̱ʼa̱nyó xíʼinra xa̱ʼa̱ ña̱ sákusi̱í-iniyó xíʼin ña̱ sándi̱ʼi̱-iniyó. Ná kandíxayó ña̱ kiviva ka̱ʼa̱nyó xíʼinra ña̱ chindeétáʼanra xíʼinyó.

6. ¿Ndáaña xíniñúʼu keʼéyó ña̱ va̱ʼa yatinka kooyó xíʼin Jehová?

⁶ Ña̱ va̱ʼa yatin kooyó xíʼin Jehová xíniñúʼu taxiyó tíxa̱ʼvi. Inkáchi ndákanixi̱níyó xíʼin ta̱ ka̱ʼyí iin salmo, ta̱yóʼo ka̱chira: “Nda̱asaví kúú ña̱ʼa ña̱ ke̱ʼún Jehová Ndióxi̱ miíi̱. Ku̱a̱ʼání kúú ña̱ʼa ña̱ ke̱ʼún ta saátu ña̱ ndákanixi̱níún xa̱ʼa̱ ndi̱ʼi̱, nda̱a̱ ni iinna va̱ása kivi kitáʼan xíʼin yóʼó. Ku̱a̱ʼání kúúña tá ná natúʼi̱n xa̱ʼa̱ña á tá ná ka̱ʼi̱n xa̱ʼa̱ña, va̱ása kivi kaʼvii̱ ndiʼiña” (Sal. 40:5). Va̱ása kúni̱ kuitíyó taxiyó tíxa̱ʼvi ndaʼa̱ Jehová, chi náʼa̱yóña xíʼin ña̱ káʼa̱nyó ta saátu xíʼin ña̱ kéʼéyó. Xa̱ʼa̱ ña̱yóʼo síín íyoyó nu̱ú ndiʼi na̱ yiví. Ndóoyó nu̱ú ñuyǐví, nu̱ú íyoní na̱ yiví na̱ va̱ása táxi tíxa̱ʼvi ndaʼa̱ Ndióxi̱ xa̱ʼa̱ ña̱ kéʼéra xa̱ʼa̱na. Ña̱yóʼo náʼa̱ña ña̱ ndóoyó ki̱vi̱ so̱ndíʼi chi na̱ yiví va̱ása táxikana tíxa̱ʼvi (2 Tim. 3:1, 2). Ta va̱ása kúni̱yó kooyó táki̱ʼva íyo na̱yóʼo.

7. ¿Ndáaña kúni̱ Jehová ná keʼéyó, ta nda̱chun?

⁷ Na̱ íyo se̱ʼe kúni̱na ña̱ viíní ná kutáʼan na̱ va̱lí se̱ʼena ta va̱ása kanitáʼanna. Tasaá kúni̱ Jehová ná keʼéyó. Ña̱ kúʼvi̱-iniyó xínitáʼanyó náʼa̱ña ña̱ kúúyó cristiano na̱ nda̱a̱ (Juan 13:35). Iin ta̱ xi̱ndasakáʼnu Ndióxi̱ ka̱ʼyíra ña̱yóʼo: “Kotondó. Iin ña̱ va̱ʼaní kúúña ña̱ inkáchi kítáʼan na̱ ndásakáʼnu Ndióxi̱” (Sal. 133:1). ¿Á su̱ví ña̱ nda̱a̱ kúú ña̱ ndóʼoyó nda̱a̱ táki̱ʼva ndo̱ʼo ta̱ salmista yóʼo? Ki̱vi̱ kúʼvi̱-iniyó xíniyó na̱ hermanoyó, saátu náʼa̱yó ña̱ kúʼvi̱-iniyó xíniyó Jehová (1 Juan 4:20). Xa̱ʼa̱ ña̱ kítáʼanyó xíʼin na̱ hermano na̱ va̱ʼaní-ini xíʼin inkana, na̱ viíní kítáʼan ta kúndáʼvi-inina xíni táʼanna sákusi̱íníña-iniyó (Efes. 4:32).

8. Nda̱a̱ táki̱ʼva káchi 1 Juan 5:3, ¿ndáa xa̱ʼa̱ kúú ña̱ kándíxayó Jehová?

⁸ Jehová kúni̱ra ña̱ na̱ va̱lí ná kandíxana na̱ yivána, ta saátu kúni̱ra ña̱ ná kandíxayóra (Efes. 6:1). Ta xíniñúʼu kandíxayóra saáchi miíra kúú ta̱ i̱xava̱ʼa miíyó, ta táxira ña̱ tákuyó ta kúúra iin yivá ta̱ ndíchiní. Soo iin xa̱ʼa̱ ña̱ kándíxayó Jehová kúú ña̱ kúʼvi̱ní-iniyó xíniyóra (kaʼvi 1 Juan 5:3). * Ku̱a̱ʼáníva xa̱ʼa̱ kúú ña̱ xíniñúʼu kandíxayó Jehová, soo  va̱ása íxandúxara xíʼinyó ña̱ keʼéyóña. Ta̱xira ña̱ ná ndaka̱xin miíyó ña̱ keʼéyó, ña̱kán kúsi̱íní-inira tá ndáka̱xinyó ña̱ kandíxayóra xa̱ʼa̱ ña̱ kúʼvi̱-iniyó xíniyóra.

9, 10. ¿Nda̱chun ndáyáʼviní kunda̱a̱-iniyó ndáaña kúú ña̱ kúni̱ Jehová ta keʼéyóña?

⁹ Na̱ íyo se̱ʼe kúni̱na ña̱ vií ná kutaku na̱ va̱lí se̱ʼena, ña̱kán káʼa̱nna xíʼinna ndáaña xíniñúʼu keʼéna. Na̱ va̱lí na̱ xíniso̱ʼo ña̱yóʼo, náʼa̱na ña̱ kándíxana na̱ yivána ta íxato̱ʼónana. Ta ña̱ ndáyáʼviníka kúú ña̱ kunda̱a̱-iniyó ndáaña kúú ña̱ kúni̱ yiváyó ta̱ íyo chí ndiví, ta keʼéyó ña̱ kúni̱ra. Saá náʼa̱yó ña̱ kúʼvi̱-iniyó xíniyó Jehová ta íxato̱ʼóyóra. Ta ña̱ va̱ʼa ña̱ ndákiʼinyó kúú ña̱ vií tákuyó (Is. 48:17, 18). Soo na̱ va̱ása kándíxa ña̱ káʼa̱n Ndióxi̱ sáxo̱ʼvi̱na miína (Gál. 6:7, 8).

¹⁰ Tá tákuyó nda̱a̱ táki̱ʼva kúni̱ mií Jehová ndáayó miíyó nu̱ú ña̱ kivi saxóʼvi̱ miíyó, ta va̱ása ndiʼi-xa̱ʼa̱ ña̱ kítáʼanyó xíʼinra. Chi ta̱kán kúú ta̱ xíni̱ ndáa ña̱ va̱ʼa chindeétáʼan xíʼinyó. Iin ñá hermana ñá íyo chí Estados Unidos ñá naní Aurora káchiñá: “Kúnda̱a̱-inii̱ ña̱ tá kándíxayó Jehová, va̱ʼaníka tákuyó”. Ta ña̱ ndixa kúúva ña̱yóʼo. Ná nda̱ka̱tu̱ʼun xíʼin miíyó: “¿Ndáaña va̱ʼa ndákiʼii̱n xa̱ʼa̱ ña̱ ndíku̱i̱n ndiʼi ña̱ káʼa̱n Jehová?”.

11. ¿Ndáa ki̱ʼva chíndeétáʼan oración xíʼinyó?

¹¹ Ña̱ oración kivi chindeétáʼanña xíʼinyó ña̱ kandíxayó Ndióxi̱ ni íxayo̱ʼvi̱ña xíʼinyó. Xa̱ʼa̱ ña̱ kúúyó na̱ yiví ku̱a̱chi, sava xíniñúʼu chika̱a̱yó ndee̱ ña̱ kandíxayó Jehová. Soo xíniñúʼu ndakundeéyó keʼéyó ña̱yóʼo. Iin ta̱  salmista ndu̱kúra ña̱yóʼo nu̱ú Ndióxi̱: “Taxi ña̱ ná kunii̱ kandíxai̱ yóʼó” (Sal. 51:12). Iin ñá precursora regular ñá naní Denise káchiñá: “Tá íxayo̱ʼvi̱ña xíʼi̱n ña̱ kandíxai̱ ña̱ káʼa̱n Jehová, káʼi̱n xíʼinra ña̱ ná taxira ndee̱ ndaʼíi̱ ña̱ keʼíi̱ ña̱ va̱ʼa”. Ná kǒo kaka-iniyó, chi Ndióxi̱ ndákuiinvara táʼan oración yóʼo (Luc. 11:9-13).

12. ¿Ndáaña káʼa̱n Efesios 5:1 xíʼinyó keʼéyó?

¹² (Kaʼvi Efesios 5:1). * Xa̱ʼa̱ ña̱ kúúyó se̱ʼe Jehová na̱ kúʼvi̱ní-inira xínira, chíka̱a̱yó ndee̱ ña̱ kundiku̱nyó yichi̱ra. Náʼa̱yó ña̱ va̱ʼa ña̱ kúúmií Jehová, tá kúni̱yó xíniyó inkana, ta va̱ʼa íyo iniyó, ta íxakáʼnu-iniyó xa̱ʼa̱ inkana. Ki̱vi̱ xíto na̱ yiví na̱ va̱ása xíni̱ xa̱ʼa̱ Ndióxi̱ ña̱ va̱ʼa ña̱ kéʼéyó, sana kuni̱na sakuaʼana xa̱ʼa̱ra (1 Ped. 2:12). Na̱ íyo se̱ʼe xíniñúʼu vií keʼéna xíʼin se̱ʼena, nda̱a̱ táki̱ʼva kéʼé mií Jehová xíʼinyó. Tá saá ná keʼéna, na̱ va̱lí se̱ʼena sana kuni̱na xa̱a̱na koona migo yiváyó Jehová.

13. ¿Ndáaña xíniñúʼu ndakanixi̱níyó xa̱ʼa̱, ña̱kán va̱ása yi̱ʼvíyó ka̱ʼa̱nyó xa̱ʼa̱ Jehová xíʼin inkana?

¹³ Na̱ va̱lí kúsi̱íní-inina xíʼin yivána, ña̱kán va̱ʼaní kúnina tá káʼa̱nna xa̱ʼa̱na. Ki̱ʼva saátu kúsi̱í-ini miíyó xa̱ʼa̱ yiváyó ta̱ íyo chí ndiví, ta kúni̱yó ña̱ ná kunda̱a̱-ini inkana xa̱ʼa̱ra. Ndóʼoyó nda̱a̱ táki̱ʼva ndo̱ʼo ta̱ rey David ta̱ ka̱ʼyí ña̱yóʼo: “Xíʼin ña̱ si̱í-ini ka̱ʼi̱n xa̱ʼa̱  Jehová” (Sal. 34:2). Soo savayó kivi yi̱ʼvíyó ka̱ʼa̱nyó xa̱ʼa̱ra xíʼin inkana. ¿Ndáaña kivi chindeétáʼan xíʼinyó? Ña̱ ndakanixi̱níyó xa̱ʼa̱ ña̱ sákusi̱íníyó-ini Jehová, xíʼin xa̱ʼa̱ ña̱ va̱ʼa ña̱ ndákiʼin na̱ kúnda̱a̱-ini xa̱ʼa̱ra. Miíra chindeétáʼan xíʼinyó ña̱ va̱ása yi̱ʼvíyó. Nda̱a̱ táki̱ʼva chi̱ndeétáʼanra xíʼin na̱ hermanoyó na̱ ni̱xi̱yo tá siglo nu̱ú, ki̱ʼva saátu chindeétáʼanra xíʼin miíyó (1 Tes. 2:2).

14. ¿Ndáa xa̱ʼa̱ kúú ña̱ ndáyáʼviní ku̱ʼu̱nyó natúʼunyó xíʼin na̱ yiví?

¹⁴ Jehová va̱ása ndáka̱xinra na̱ yiví, ta kúsi̱í-inira tá xítora ña̱ náʼa̱yó ña̱ kúʼvi̱-iniyó xíniyó inkana, ni xa̱a̱ síín ñuuna (Hech. 10:34, 35). Iin ki̱ʼva ña̱ náʼa̱yó ña̱ kúʼvi̱-iniyó xíniyó na̱ yiví, kúú ña̱ natúʼunyó xíʼinna xa̱ʼa̱ Ndióxi̱ (Mat. 28:19, 20). ¿Ndáaña va̱ʼa ndakiʼinna tá ná keʼéyó chiñu yóʼo? Ña̱ na̱ xíniso̱ʼo ña̱ káʼa̱nyó viíka kutakuna tiempo vitin, ta chí nu̱únínu ndakiʼinna ña̱ kutakuna ndiʼi tiempo (1 Tim. 4:16).

15, 16. ¿Ndáa xa̱ʼa̱ kúú ña̱ kivi kusi̱í-iniyó?

¹⁵ Jehová kúúra iin yiváyó ta̱ kúni̱ní xíni miíyó, ta kúni̱ra ña̱ si̱í ná koo na̱ veʼera (Is. 65:14). Ni yáʼayó nu̱ú tu̱ndóʼo, íyo ku̱a̱ʼá xa̱ʼa̱ kúú ña̱ kivi kusi̱í-iniyó vitin. Tá kúú, va̱ása xíka-iniyó ña̱ kúʼvi̱ní-ini yiváyó ta̱ íyo chí ndiví xínira miíyó. Ta kúnda̱a̱ káxi iniyó xa̱ʼa̱ ña̱ káʼa̱n tu̱ʼunra ña̱ Biblia (Jer. 15:16). Kúúyó táʼan na̱ veʼe Jehová na̱ kúʼvi̱ní-ini xíniñaʼá, kúʼvi̱-inina xínina ña̱ káʼa̱nra ta saátu kúʼvi̱-inina xíni táʼanna (Sal. 106:4, 5).

¹⁶ Saátu kivi kusi̱í-iniyó chi kúnda̱a̱ káxi iniyó ña̱ chí nu̱únínu va̱ʼaníka kutakuyó. Kúnda̱a̱-iniyó ña̱ si̱lóʼo kúma̱ní ta sandiʼi-xa̱ʼa̱ Jehová na̱ kéʼé ña̱ kini, ta tíxa̱ʼvi ña̱ chíñura ndulivi nu̱ú ñuʼú yóʼo. Saátu ndátuyó ña̱ ná kixaa̱ kivi ña̱ ndataku na̱ ni̱xi̱ʼi̱, ta ndakutáʼanna xíʼin na̱ veʼena (Juan 5:28, 29). ¿Á su̱ví iin ña̱ liviní kúú ña̱yóʼo? Ta ña̱ ndáyáʼviníka kúú ña̱ kúnda̱a̱-iniyó ña̱ si̱lóʼo kúma̱ní, ta ndiʼi na̱ íyo chí ndiví xíʼin nu̱ú ñuʼú yóʼo ndasakáʼnuna iinlá mií yiváyó Jehová.