Na̱ yivái̱ sa̱kuaʼana xa̱ʼa̱ ña̱ nda̱a̱ tá ku̱i̱ya̱ 1920, tá ta̱ʼán tindaʼa̱na. Ka̱kui̱ chí Inglaterra tá ku̱i̱ya̱ 1939. Ña̱kán nda̱a̱ tá loʼovíi̱ xi̱xa̱ʼi̱n reunión xíʼin na̱ yivái̱, ta saátu xi̱yaʼi̱ ti̱xin ña̱ Escuela del Ministerio Teocrático. Va̱ʼaní ndákaʼíi̱n xa̱ʼa̱ ña̱ yichi̱ nu̱ú ni̱ya̱ʼi̱ nu̱ú plataforma. Xa̱ʼa̱ ña̱ xi̱kuumiíi̱ i̱ñu̱ ku̱i̱ya̱ ña̱kán xi̱niñúʼu ndai̱ sa̱tá iin caja ña̱ va̱ʼa kotoi̱ na̱ ndóo kán. Ni̱yi̱ʼvíníi̱ tá xi̱nii̱ ña̱ ku̱a̱ʼání na̱ yiví na̱ xa̱a̱ chée ndóo.

Yivái̱ ka̱ʼyíra iin tutu loʼo ta̱xira ndaʼíi̱, ña̱ va̱ʼa taxii̱ ña̱yóʼo ndaʼa̱ na̱ yiví tá ná ku̱ʼi̱n natúʼi̱n xíʼinna xa̱ʼa̱ Ndióxi̱. U̱na̱ ku̱i̱ya̱ xi̱kuumiíi̱ tá ni̱xa̱ʼa̱n iinlá miíi̱ iin veʼe na̱túʼi̱n xa̱ʼa̱ Ndióxi̱. Iin ta̱a kúú ta̱ ki̱ta ta ka̱ʼvira tutu ña̱ ta̱xii̱ ndaʼa̱ra, ta kama nda̱kiʼinra libro ña̱ naní “Sea Dios veraz”. Ni̱kusi̱íní-inii̱ ta xínui̱ ni̱xa̱ʼi̱n na̱túʼi̱n xíʼin yivái̱ xa̱ʼa̱ ña̱yóʼo. Xi̱kusi̱íní-inii̱ tá xi̱xa̱ʼi̱n xi̱natúʼi̱n xíʼin na̱ yiví xa̱ʼa̱ Ndióxi̱ ta saátu tá xi̱xa̱ʼi̱n reunión, ta ña̱yóʼo chi̱ndeétáʼanña xíʼi̱n ña̱ kunii̱ kachíñui̱ nu̱ú Jehová ku̱a̱ʼáka tiempo.

Ni̱xa̱i̱ ni̱kuʼvi̱ka-inii̱ xi̱nii̱ ña̱ nda̱a̱ ña̱ va̱xi nu̱ú Biblia tá ka̱ʼyí yivái̱ ki̱víi̱ ña̱ va̱ʼa ndakiʼi̱n tutu La Atalaya. Tá xi̱kixaa̱ iinña ndi̱ku̱n kama xi̱kaʼvii̱ña. Tá ni̱xai̱ ka̱ndíxakai̱ Jehová chi̱ka̱a̱-inii̱ ña̱ ndakuchii̱.

Tá ku̱i̱ya̱ 1950 ni̱xa̱ʼi̱n xíʼin na̱ yivái̱ chí ñuu Nueva York, ña̱ va̱ʼa ku̱ʼu̱nndi̱ iin asamblea ña̱ xi̱naní “Aumento de la Teocracia”. Programa ña̱ ni̱xi̱yo tá ki̱vi̱ jueves 3 tí agosto xi̱naníña “Día del misionero”. Ta̱ hermano Carey Barber kúú ta̱ ta̱xi discurso ña̱ nda̱kuchii̱, ta tá ni̱ya̱ʼa tiempo ni̱xa̱a̱ra ndu̱ura táʼan na̱ Cuerpo Gobernante. Tá ndi̱ʼi ta̱xira discurso ke̱ʼéra u̱vi̱ pregunta xíʼinndi̱, yi̱ʼi̱ nda̱kundichii̱ ta ndeéní nda̱kuii̱n ña̱ pregunta  kán. Ni xi̱kuumiíi̱ 11 ku̱i̱ya̱ soo xi̱kunda̱a̱va-inii̱ ña̱ ndáyáʼviní ña̱ nda̱kaxii̱n keʼíi̱. Soo xi̱yi̱ʼvíi̱ ki̱ʼvii̱ ini ti̱kui̱í saáchi va̱ása xínii̱ su̱tíai̱. Ta̱ xitoi̱ ni̱xa̱ʼa̱nra xíʼi̱n nda̱a̱ nu̱ú ndákuchina ta ni̱ka̱ʼa̱nra xíʼi̱n ña̱ kǒo ña̱ kundoʼi̱. Ta kamaní ku̱u ña̱yóʼo saáchi ni va̱ása níxa̱a̱ xa̱ʼíi̱ nda̱a̱ ti̱xinrá. Na̱ hermano chi̱ndeétáʼan xíʼi̱n: iinra sa̱ndákuchi yi̱ʼi̱ ta inkara chi̱ndeétáʼan xíʼi̱n ki̱tai̱ nu̱ú ñúʼu ti̱kui̱í kán. Ta nani saá, Jehová ndákundeéra náʼa̱ra yichi̱ ña̱ va̱ʼa nu̱úi̱.

Tá sa̱ndíʼíi̱ ka̱ʼvii̱ escuela, xi̱kuni̱i̱ xa̱i̱ koi̱ precursor. Soo na̱ maestro ni̱ka̱ʼa̱nnína xíʼi̱n ña̱ ná kuʼi̱n universidad, ta xa̱ʼa̱ ña̱yóʼo ke̱ʼíi̱ña. Soo ki̱ʼi̱n kuenta ña̱ va̱ása kivi ke̱ʼíi̱ u̱vi̱ ña̱ʼa: ña̱ nda̱kú koo inii̱ xíʼin Jehová ta ndakundeíi̱ kaʼvii̱. Ña̱kán chi̱ka̱a̱-inii̱ ña̱ va̱ása kaʼvikai̱. Ni̱ka̱ʼi̱n xíʼin Jehová, tasaá ka̱ʼyíi̱ iin carta ku̱a̱ʼa̱n nu̱ú na̱ maestro ta viíní ni̱ka̱ʼi̱n xíʼinna ña̱ iin ku̱i̱ya̱ kuití kaʼvii̱ tasaá ndakoi̱ ña̱ universidad. Ta xa̱ʼa̱ ña̱ xi̱ndaaní-inii̱ Jehová ki̱xáʼíi̱ káchíñui̱ ku̱a̱ʼáka tiempo nu̱úra.

Tá julio ña̱ ku̱i̱ya̱ 1957 ki̱xáʼíi̱ kúi̱ precursor chí ñuu Wellingborough. Ni̱nda̱ka̱tu̱ʼíi̱n na̱ Betel ña̱ ñuu Londres á íyo iin ta̱ hermano ta̱ xa̱a̱ ku̱a̱ʼá ku̱i̱ya̱ kúú precursor ta̱ kivi ndakutáʼi̱n xíʼin. Ta̱yóʼo xi̱kuu ta̱ hermano Bert Vaisey, ta ku̱a̱ʼání ña̱ʼa sa̱náʼa̱ra yi̱ʼi̱. Xa̱ʼa̱ ña̱ viíní xi̱natúʼunra xíʼin na̱ yiví xa̱ʼa̱ Ndióxi̱ chi̱ndeétáʼanra xíʼi̱n ña̱ viíní ndaka̱xii̱n ndáa hora ku̱ʼi̱n natúʼi̱n xíʼin na̱ yiví. Va̱ása ku̱a̱ʼá níxi̱yondi̱ ti̱xin congregación saáchi ni̱xi̱yo i̱ñu̱ ná hermana ná xa̱a̱ chée, xíʼin ta̱ hermano Vaisey xíʼin yi̱ʼi̱. Xi̱kaʼvi kúei̱ xa̱ʼa̱ ña̱ koo ti̱xin reunión ta saátu xi̱taxii̱ comentario, ña̱yóʼo chi̱ndeétáʼanña xíʼi̱n ña̱ kundaaka-inii̱ Jehová ta saátu ña̱ natúʼi̱n xíʼin inkana xa̱ʼa̱ ña̱ kándíxai̱ra.

Loʼo tiempo xi̱ndika̱i̱ veʼeka̱a xa̱ʼa̱ ña̱ va̱ása níxii̱n ndakutáʼi̱n xíʼin na̱ xáʼa̱n nu̱ú ku̱a̱chi. Tá ni̱ya̱ʼa tiempo xi̱nitáʼi̱n xíʼin iin ñá precursora especial ñá naní Barbara. Ti̱ndaʼa̱ndi̱ tá ku̱i̱ya̱ 1959, ta chi̱ka̱a̱-inindi̱ kachíñundi̱ nda̱a̱ ndáaka nu̱ú ná ka̱ʼa̱n na̱ ñuu Ndióxi̱ xíʼinndi̱. Siʼna chi̱ndaʼána ndi̱ʼi̱ chí Lancashire, ña̱ kíndo̱o chí noroeste ña̱ Inglaterra. Ta tá enero ña̱ ku̱i̱ya̱ 1961, ka̱nana yi̱ʼi̱ Betel ña̱ ñuu Londres ña̱ va̱ʼa ku̱ʼi̱n Escuela del Ministerio del Reino, ta iin yo̱o̱ ni̱xi̱yo ña̱yóʼo. Ta nda̱kanda̱ní-inii̱ saáchi tá ndi̱ʼi ka̱ʼvii̱ ni̱ka̱ʼa̱nna xíʼi̱n ña̱ koi̱ superintendente ña̱ circuito. U̱vi̱ semana ni̱xi̱yoi̱ ñuu Birmingham ña̱ va̱ʼa sanáʼa̱ iin ta̱ superintendente yi̱ʼi̱ ndáa ki̱ʼva keʼíi̱ chiñui̱, ta ta̱xina ni̱xa̱ʼa̱n ñá Barbara xíʼi̱n. Tándi̱ʼi nda̱kiʼinndi̱ ku̱a̱ʼa̱nndi̱ chí nu̱ú chi̱ndaʼána ndi̱ʼi̱, ñuu Lancashire xíʼin Cheshire.

Tá agosto ña̱ ku̱i̱ya̱ 1962 tá xíkandi̱ vacación, nda̱kiʼindi̱ iin carta ña̱ chi̱ndaʼá na̱ Betel ndaʼa̱ndi̱. Ta xíʼin ña̱yóʼo chi̱ndaʼána u̱vi̱ tutu ña̱ xíniñúʼu sandákutúndi̱ ña̱ va̱ʼa ku̱ʼu̱nndi̱ Escuela ña̱ Galaad. Ñá Barbara xíʼin yi̱ʼi̱ ni̱ka̱ʼa̱nndi̱ xíʼin Jehová ta sa̱ndákutúndi̱ tutu yóʼo, ta kama sa̱ndándikóndi̱ña chí Betel. Ta tá ni̱ya̱ʼa u̱ʼu̱n yo̱o̱ nda̱kiʼinndi̱ ku̱a̱ʼa̱nndi̱ chí Brooklyn (Nueva York) ña̱ va̱ʼa ku̱ʼu̱nndi̱ clase número  38 Escuela ña̱ Galaad nu̱ú sakuaʼakandi̱ xa̱ʼa̱ tu̱ʼun Ndióxi̱, ta ña̱yóʼo u̱xu̱ yo̱o̱ ni̱xi̱yoña.

Ti̱xin Escuela ña̱ Galaad sa̱kuaʼandi̱ xa̱ʼa̱ tu̱ʼun Ndióxi̱, xa̱ʼa̱ ki̱ʼva ña̱ íyo ñuura ta saátu xa̱ʼa̱ na̱ hermano na̱ íyo iníísaá nu̱ú ñuʼú. Ta̱ʼán xi̱nuvíndi̱ 25 ku̱i̱ya̱ saá, xa̱ʼa̱ ña̱kán ku̱a̱ʼání ña̱ sa̱kuaʼandi̱ xíʼin ña̱ xi̱keʼé na̱ xi̱kaʼvi xíʼinndi̱. Xi̱kusi̱íní-inii̱ saáchi ndiʼi ki̱vi̱ xi̱kachíñui̱ xíʼin iin ta̱ xi̱sanáʼa̱ ndi̱ʼi̱, ta̱ hermano Fred Rusk. Xíʼin ña̱ xi̱keʼéra sa̱kuaʼi̱ ña̱ ndiʼi consejo ña̱ táxii̱ nu̱ú tu̱ʼun Ndióxi̱ xíniñúʼu kanaña. Ta na̱ ta̱xi discurso ti̱xin escuela kán xi̱kuu ta̱ hermano Nathan Knorr, ta̱ Frederick Franz xíʼin ta̱ Karl Klein ta saátu inkakana. Ta ku̱a̱ʼání ña̱ sa̱kuaʼandi̱ xíʼin ña̱ xi̱keʼé ta̱ hermano Alexander Macmillan xa̱ʼa̱ ña̱ vitání ni̱xi̱yo inira. Ta̱yóʼo ta̱xira iin discurso ña̱ chi̱ndeétáʼan xíʼinndi̱ ña̱ va̱ʼa ku̱nda̱a̱-inindi̱ ndáa ki̱ʼva chi̱ndeétáʼan Jehová xíʼin na̱ ñuura, tá ni̱ya̱ʼana nu̱ú tu̱ndóʼo tá ku̱i̱ya̱ 1914 nda̱a̱ 1919.

Tá xa̱a̱ kúni̱ ndiʼi ña̱ káʼvindi̱, ta̱ hermano Knorr ni̱ka̱ʼa̱nra xíʼinndi̱ ña̱ chindaʼána ndi̱ʼi̱ chí Burundi, iin país ña̱ ndíka̱a̱ chí África. Ndi̱ku̱n kama ni̱xa̱ʼa̱nndi̱ biblioteca ña̱ íyo ti̱xin Betel ña̱ va̱ʼa nandukúndi̱ nu̱ú Anuario nda̱saa na̱ publicador íyo chí Burundi tá tiempo saá. Soo kǒoña níndani̱ʼíndi̱. Tasaá ku̱nda̱a̱-inindi̱ ña̱ ku̱ʼu̱nndi̱ iin país nu̱ú ta̱ʼán natúʼunna xíʼin na̱ yiví xa̱ʼa̱ Ndióxi̱, ta ni va̱ása xíni̱níndi̱ xa̱ʼa̱ña. Ña̱kán ni̱ndi̱ʼi̱ní-inindi̱ soo ni̱ka̱ʼa̱nndi̱ xíʼin Jehová, ta ña̱yóʼo chi̱ndeétáʼan xíʼinndi̱ ña̱ táxi̱n ni̱xi̱yo inindi̱.

Síínní ni̱xi̱yo nu̱ú ni̱xa̱a̱ndi̱, saáchi niʼníní ni̱xi̱yoña nu̱ú ñuu ña̱ ke̱endi̱, ta síínní íyo costumbre na̱ yiví saátu tu̱ʼun ña̱ káʼa̱nna. Ta saátu xi̱niñúʼu sakuaʼandi̱ ka̱ʼa̱nndi̱ tu̱ʼun francés. Ta xi̱niñúʼu ndani̱ʼíndi̱ veʼe nu̱ú koondi̱. Tá ni̱ya̱ʼa u̱vi̱ ki̱vi̱ ña̱ ni̱xa̱a̱ndi̱, ni̱xa̱a̱ ta̱ hermano Harry Arnott xi̱tora ndi̱ʼi̱, ta̱yóʼo kúú ta̱ ka̱ʼvi xíʼinndi̱ ti̱xin Escuela ña̱ Galaad ta ku̱a̱ʼa̱nra chí Zambia. Chi̱ndeétáʼanra xíʼinndi̱ ña̱ ndani̱ʼíndi̱ iin veʼe koondi̱. Soo na̱ chíñu ki̱xáʼana sásina nu̱úndi̱ ña̱ natúʼunndi̱ xíʼin na̱ yiví, saáchi va̱ása xíni̱na xa̱ʼa̱ na̱ testigo Jehová. Tá ki̱xáʼandi̱ káa̱nndi̱ país kán, na̱ chíñu ni̱ka̱ʼa̱nna xíʼinndi̱ ña̱ va̱ása kívi koondi̱ kán tá va̱ása kúúmiíndi̱ permiso ña̱ kachíñundi̱. Ta xa̱ʼa̱ ña̱yóʼo ku̱a̱ʼa̱nndi̱ koondi̱ chí país ña̱ Uganda.

Xi̱yi̱ʼvíndi̱ ku̱ʼu̱nndi̱ chí Uganda xa̱ʼa̱ ña̱ kǒo visa kúúmiíndi̱, soo xi̱ndaa-inindi̱ Jehová.  Iin ta̱ hermano ta̱ ke̱e chí Canadá ta íyora país kán, na̱túʼunra xíʼin iin ta̱ káchíñu xíʼin na̱ inmigración xa̱ʼa̱ ña̱ ndo̱ʼondi̱. Ta tíxa̱ʼvi ña̱yóʼo ni̱ka̱ʼa̱nna xíʼinndi̱ ña̱ kiviva ku̱a̱ʼá yo̱o̱ koondi̱ país kán nda̱a̱ ná taxina permiso ndaʼa̱ndi̱. Tasaá xi̱nindi̱ ña̱ chi̱ndeétáʼan Jehová xíʼinndi̱.

Síínníva ni̱xi̱yo Uganda saáchi xa̱a̱ ni̱xi̱yova na̱ xi̱natúʼun xíʼin na̱ yiví xa̱ʼa̱ Ndióxi̱, ni 28 kuití na̱ testigo Jehová ni̱xi̱yo iníísaá país kán. Ta kán xi̱ndani̱ʼíndi̱ ku̱a̱ʼání na̱ yiví na̱ xi̱ka̱ʼa̱n tu̱ʼun inglés. Soo ki̱ʼinndi̱ kuenta ña̱ xi̱niñúʼu sakuaʼandi̱ ka̱ʼa̱nndi̱ iin tu̱ʼun ña̱ káʼa̱nna tá xi̱kuni̱ndi̱ ná kuaʼnu na̱ yiví xíʼin tu̱ʼun Ndióxi̱. Ku̱a̱ʼání tu̱ʼun xi̱ka̱ʼa̱nna, ña̱kán nda̱kaxinndi̱ sakuaʼandi̱ tu̱ʼun luganda, saáchi tu̱ʼun yóʼo kúú ña̱ xi̱ka̱ʼa̱nnína chí Kampala ñuu nu̱ú ki̱xáʼandi̱ nátúʼunndi̱ xíʼin na̱ yiví xa̱ʼa̱ Ndióxi̱. Ku̱a̱ʼá ku̱i̱ya̱ ni̱ya̱ʼa ta saáví sa̱kuaʼandi̱ vií ka̱ʼa̱nndi̱ tu̱ʼun yóʼo, soo ki̱ʼinndi̱ kuenta ña̱ xi̱chindeétáʼanníña xíʼinndi̱ tá xi̱natúʼunndi̱ xíʼin na̱ yiví. Tasaá ni̱xa̱a̱ndi̱ na̱kunda̱a̱-inindi̱ ndáa ki̱ʼva chindeétáʼanndi̱ xíʼin na̱ káʼvindi̱ xíʼin ña̱ kuaʼnuna xíʼin tu̱ʼun Ndióxi̱, ta saátu na̱yóʼo ki̱xáʼana nátúʼunna xíʼinndi̱ xa̱ʼa̱ ña̱ ndákanixi̱nína xa̱ʼa̱ ña̱ sákuaʼana.

Xi̱kusi̱íní-inindi̱ tá xi̱nda̱ni̱ʼíndi̱ na̱ yiví na̱ vitá-ini na̱ xi̱kuni̱ kuniso̱ʼo xa̱ʼa̱ ña̱ nda̱a̱, ta saátu nda̱kiʼinndi̱ inkaka chiñu ña̱ ndáyáʼviní saáchi ki̱xáʼíi̱ kúi̱ superintendente viajante, ta ni̱xa̱ʼa̱nndi̱ ku̱a̱ʼání ñuu ña̱ íyo país kán. Ta na̱ Betel ña̱ Kenia ni̱ka̱ʼa̱nna xíʼinndi̱ ña̱ ná ku̱ʼu̱nndi̱ kotondi̱ ku̱a̱ʼá ñuu ña̱ va̱ʼa kunda̱a̱-inindi̱ ndáa míí kivi chindaʼána na̱ precursor especial. Ku̱a̱ʼá yichi̱, na̱ yiví na̱ nda̱a̱ ni iin yichi̱ ta̱ʼán natúʼun xíʼin na̱ testigo Jehová va̱ʼaní ni̱xi̱yo inina xíʼinndi̱. Viíní nda̱kiʼinna ndi̱ʼi̱ veʼena ta nda̱a̱ xi̱keʼéna ña̱ xi̱xixindi̱.

Tándi̱ʼi ki̱xáʼíi̱ xáʼi̱n inkaka ñuu. Ke̱i̱ ñuu Kampala ta u̱vi̱ ki̱vi̱ ni̱xa̱ʼi̱n xíʼin tren ña̱ va̱ʼa xa̱i̱ ñuu Mombasa ña̱ íyo chí Kenia. Ñuu yóʼo ndíka̱a̱ña yuʼú tá mar, ta ni̱xa̱ʼi̱n xíʼin barco ña̱ va̱ʼa xa̱i̱ chí isla Seychelles ña̱ ndíka̱a̱ chí océano Índico. Tá ni̱ya̱ʼa loʼo tiempo, tá ku̱i̱ya̱ 1965 nda̱a̱ 1972 yi̱ʼi̱ xíʼin ñá Barbara ni̱xa̱ʼa̱n ni̱ʼindi̱ isla kán, saáchi u̱vi̱ na̱ publicador ni̱xi̱yo. Tá tiempo saá ni̱xa̱a̱na ndu̱una iin grupo, tándi̱ʼi ndu̱una iin congregación. Ta saátu ni̱xa̱ʼi̱n xi̱toi̱ na̱ hermano na̱ íyo chí Eritrea, Etiopía xíʼin Sudán.

Iin kama na̱sama ki̱ʼva ña̱ xáʼndachíñuna chí Uganda. Saáchi na̱ soldado kúú na̱ ki̱xáʼa xáʼndachíñu, ta xa̱ʼa̱ ña̱yóʼo ku̱a̱ʼání ku̱i̱ya̱ i̱yoní ni̱xi̱yo ñuu kán. Tasaá ni̱xa̱i̱ ku̱nda̱a̱-inii̱ ña̱ ndáyáʼviní keʼéyó ña̱ káʼa̱n tu̱ʼun Ndióxi̱: “Chaʼvindó ña̱ʼa ta̱ César ndaʼa̱ra” (Mar. 12:17). Iin yichi̱, na̱ chíñu ni̱ka̱ʼa̱nna xíʼin na̱ ke̱e inka ñuu ña̱ ná ku̱ʼu̱nna nu̱ú na̱ policía na̱ íyo yatin nu̱ú íyona, ta kaʼyína ki̱vi̱na. Ta kama ke̱ʼéndi̱ ña̱yóʼo. Tá ni̱ya̱ʼa loʼo ki̱vi̱, tá kávai̱ ku̱a̱ʼi̱n chí Kampala xíʼin inkaka ta̱ misionero, na̱ policía sa̱sina ndi̱ʼi, ta ni̱yi̱ʼvíníndi̱. Ta ni̱ka̱ʼa̱nna ña̱ kúúndi̱ na̱ xíto na̱ní ñuu kán, tasaá nda̱kiʼinna ndi̱ʼi̱ ku̱a̱ʼa̱n xíʼinna chí comisaría. Kán ni̱ka̱ʼa̱nndi̱ xíʼinna ña̱ kúúndi̱ misionero ta va̱ása kúni̱ndi̱ ku̱a̱chi, ta saátu xa̱a̱ ka̱ʼyívandi̱ ki̱vi̱ndi̱ nu̱ú ni̱ka̱ʼa̱nna. Soo va̱ása níkandíxana ña̱ ni̱ka̱ʼa̱nndi̱. Sava na̱ policía ni̱xa̱ʼa̱nna xíʼinndi̱ nda̱a̱ nu̱ú íyo inkaka na̱ policía yatin veʼendi̱. Ta va̱ʼaní ku̱ni̱ndi̱ tá nda̱kuni iin ta̱ policía yóʼo ndi̱ʼi̱, chi xi̱kunda̱a̱-inira ña̱ xa̱a̱ ka̱ʼyívandi̱ ki̱vi̱ndi̱. Ta ni̱ka̱ʼa̱nra xíʼinna ña̱ ná sañána ndi̱ʼi̱.

Tá tiempo saá xi̱ndani̱ʼíníndi̱ na̱ soldado chí yichi̱, saáchi xi̱ndaanínaña. I̱yoní ni̱xi̱yo  saáchi sava yichi̱ xi̱xiʼinína ndixi. Xi̱ka̱ʼa̱nníndi̱ xíʼin Jehová, ta tá xi̱taxina xi̱yaʼandi̱ va̱ʼaní xi̱kunindi̱. Soo ku̱suchíní-inindi̱ tá ku̱i̱ya̱ 1973, chi ni̱ka̱ʼa̱nna xíʼin ndiʼi na̱ misionero na̱ ke̱e inka ñuu ña̱ ná keena país ña̱ Uganda.

Ña̱kán chi̱ndaʼána ndi̱ʼi̱ ku̱a̱ʼa̱nndi̱ chí Costa de Marfil ña̱ ndíka̱a̱ chí África occidental. Xa̱ʼa̱ ña̱yóʼo xi̱niñúʼu nasama tukundi̱ ña̱ kéʼéndi̱, saáchi xi̱niñúʼu sakuaʼandi̱ ndáa ki̱ʼva íyo na̱ yiví ñuu kán, ka̱ʼa̱n tukundi̱ tu̱ʼun francés, ta saátu xi̱niñúʼu ka̱anndi̱ koondi̱ xíʼin na̱ misionero na̱ ke̱e xa̱a̱ síín síín país. Soo xi̱nindi̱ ndáa ki̱ʼva chi̱ndeétáʼan Jehová xíʼinndi̱, saáchi ku̱a̱ʼání na̱ yiví na̱ vitá-ini ki̱xáʼana sákuaʼana xa̱ʼa̱ tu̱ʼun Ndióxi̱. Xi̱ndaa-inindi̱ Jehová ta nda̱kundeéra ni̱na̱ʼa̱ra yichi̱ ña̱ va̱ʼa nu̱úndi̱.

Iin kama ni̱ka̱ʼa̱nna xíʼinndi̱ ña̱ kúúmií ñá Barbara cáncer. Ku̱a̱ʼá yichi̱ ni̱xa̱ʼa̱nndi̱ chí Europa ña̱ va̱ʼa ixatátannañá. Soo tá ku̱i̱ya̱ 1983 ndu̱ndeéka kue̱ʼe̱ yóʼo, ta va̱ása níkivika koondi̱ chí África. Ta u̱vi̱ saándi̱ ku̱suchíní-inindi̱ xa̱ʼa̱ ña̱yóʼo.

Tá xa̱a̱ íyondi̱ ti̱xin Betel ña̱ ñuu Londres, ndu̱ndeéka kue̱ʼe̱ yóʼo xíʼin ñá Barbara ta ni̱xi̱ʼi̱ñá. Na̱ íyo ti̱xin Betel va̱ʼaní chi̱ndeétáʼanna xíʼi̱n. Soo iin na̱ matrimonio kúú na̱ va̱ʼaníka chi̱ndeétáʼan xíʼi̱n ña̱ ka̱i̱n ta ndakundeíi̱ kundaa-inii̱ Jehová. Tá ni̱ya̱ʼa tiempo xi̱nitáʼi̱n xíʼin ñá Ann, tá ya̱chi̱ xi̱kuuñá precursora especial, soo tiempo saá xi̱kachíñuñá loʼo ki̱vi̱ ti̱xin Betel. Ki̱ʼii̱n kuenta ña̱ kúʼvi̱ní-iniñá xíniñá Jehová ta xi̱chikaaníñá ndee̱ ña̱ sakuaʼañá xa̱ʼa̱ra. Ña̱kán tá ku̱i̱ya̱ 1989 ti̱ndaʼa̱ndi̱ ta nda̱kundeéndi̱ káchíñundi̱ ti̱xin Betel ña̱ ñuu Londres.

Tá ku̱i̱ya̱ 1995 nda̱a̱ 2018 ni̱xa̱ʼi̱n xi̱toi̱ ki̱ʼva 60 país, saáchi xi̱kui̱ representante ña̱ central mundial (á superintendente de zona, chi saá xi̱ka̱ʼa̱nna xíʼin na̱yóʼo tá ya̱chi̱). Ña̱yóʼo chi̱ndeétáʼanña xíʼi̱n ña̱ kotoi̱ ndáa ki̱ʼva táxi Jehová bendición ndaʼa̱ na̱ káchíñu nu̱úra ni nda̱a̱ ndáaka ña̱ yáʼana nu̱ú.

Xa̱ʼa̱ chiñu ña̱ xi̱kuumiíi̱, tá ku̱i̱ya̱ 2017 ni̱xa̱ʼa̱n tukui̱ chí África. Ni̱kusi̱íní-inii̱ tá ni̱xa̱ʼa̱n ñá Ann xíʼi̱n ña̱ yichi̱ nu̱ú chí Burundi. Ta ni̱kusi̱íní-inindi̱ tá xi̱nindi̱ ña̱ ku̱a̱ʼání na̱ yiví xa̱a̱ sa̱kuaʼana xa̱ʼa̱ ña̱ nda̱a̱. Ta chí calle nu̱ú ni̱xi̱kai̱ na̱túʼi̱n xíʼin na̱ yiví tá ku̱i̱ya̱ 1964, vitin íyo iin Betel ña̱ kíʼin kuenta xíʼin yáʼaka 15,500 na̱ publicador.

Tá nda̱kiʼi̱n programa nu̱ú va̱xi ki̱vi̱ ñuu ña̱ ku̱ʼi̱n kotoi̱ tá ku̱i̱ya̱ 2018, ni̱kusi̱íní-inii̱ tá xi̱nii̱ ña̱ va̱xi ki̱vi̱ Costa de Marfil. Ta va̱ʼaní ku̱nii̱ tá ni̱xa̱a̱ndi̱ ñuu Abiyán, iin ñuu ña̱ chéení íyo país kán. Tá ni̱xa̱i̱ Betel ki̱xáʼíi̱ xítoi̱ lista nu̱ú va̱xi número ña̱ teléfono, tasaá nda̱kunii̱ ki̱vi̱ iin ta̱ íyo yatin kán, ta̱ naní Sossou. Nda̱kanixi̱níi̱ ña̱ kúúra iin ta̱ hermano ta̱ xi̱kuu superintendente de ciudad, tá ni̱xi̱yoi̱ chí Abiyán. Soo su̱ví mií ta̱ hermano kán kúúra chi se̱ʼevara kúúra.

Jehová sa̱xínura ña̱ ni̱ka̱ʼa̱nra. Ta ndiʼi tu̱ndóʼo ña̱ ni̱ya̱ʼi̱ nu̱ú, sa̱náʼa̱ña yi̱ʼi̱ ña̱ tá ndáa-iniyóra na̱ʼa̱ra yichi̱ ña̱ va̱ʼa nu̱úyó. Kúni̱níndi̱ ndakundeéndi̱ ku̱ʼu̱nndi̱ yichi̱ ña̱ va̱ʼaní yóʼo, tasaá xa̱a̱ndi̱ nu̱ú ñuyǐví xa̱á nu̱ú kutakuyó ndiʼi tiempo (Prov. 4:18).