1. a) ¿Nda̱chun táxina consejo ndaʼa̱yó sava yichi̱? b) ¿Nda̱chun ndáyáʼviní kundiku̱nyó consejo?

NDIʼIVAYÓ xíniñúʼu consejo sava yichi̱. Ña̱kán, sava yichi̱ ndúkúyó consejo nu̱ú iin na̱ hermano na̱ íxato̱ʼóníyó. Ta sava yichi̱ kivi taxi na̱ hermano iin consejo ndaʼa̱yó xa̱ʼa̱ ña̱ ndíʼi̱-inina xa̱ʼa̱yó, saáchi xítona ña̱ ki̱xáʼayó kéʼéyó iin ña̱ va̱ása va̱ʼa ña̱ kivi ndandikóní-iniyó xíʼin (Gál. 6:1). Á savatu yichi̱, tá xa̱a̱ ni̱ki̱ʼviyó iin ku̱a̱chi ndeé saá kúú ña̱ táxina consejo ndaʼa̱yó. Soo ni nda̱a̱ ndáaka xa̱ʼa̱ kúú ña̱ ná taxina consejo ndaʼa̱yó, ná kundiku̱nyóña saáchi ña̱ va̱ʼa miíyó kúúña ta kivi sakǎkuña miíyó (Prov. 6:23).

2. Nda̱a̱ táki̱ʼva káchi Proverbios 12:15, ¿nda̱chun xíniñúʼu kundiku̱nyó consejo ña̱ táxina ndaʼa̱yó?

² Texto nu̱ú ka̱na artículo yóʼo káʼa̱nña xíʼinyó ña̱ viíní ná kuniso̱ʼoyó “ña̱ káʼa̱n na̱ ndíchi” (Prov. 22:17). Va̱ása xíni̱víyó xa̱ʼa̱ ndiʼi ña̱ʼa saáchi íyo inka na̱ xíni̱níka nu̱úyó (kaʼvi Proverbios 12:15). * Ña̱kán, tá ná kundiku̱nyó consejo ña̱ táxina ndaʼa̱yó saá na̱ʼa̱yó ña̱ vitá íyo iniyó, ta saátu na̱ʼa̱yó ña̱ kúnda̱a̱-iniyó ña̱ íyo sava ña̱ va̱ása kúchiñuyó keʼéyó ta xíniñúʼu chindeétáʼanna xíʼinyó keʼéyóña. Jehová xi̱niñúʼura ta̱ rey Salomón ña̱ va̱ʼa ka̱ʼyíra tu̱ʼun yóʼo: “Viíva kana chiñu nu̱ú íyo ku̱a̱ʼá na̱ táxi consejo” (Prov. 15:22).

3. ¿Ndáa ki̱ʼva ndákiʼinyó consejo?

³ U̱vi̱ ki̱ʼva kivi ndakiʼinyó consejo. Ña̱ nu̱ú: tá káʼviyó tu̱ʼun Ndióxi̱ á iin tutu ña̱ tává na̱ ñuura. Saáchi tá káʼviyóña kivi ndani̱ʼíyó iin ña̱ chindeétáʼan xíʼinyó kotoyó ndáa ki̱ʼva íyo ña̱ kéʼéyó, tasaá nasamayó ña̱ kéʼéyó (Heb. 4:12). Ña̱ u̱vi̱: tá káʼa̱n iin na̱ anciano á iin na̱ hermano na̱ xa̱a̱ xu̱xa-ini xíʼinyó ndáaña xíniñúʼu viíka keʼéyó. Tá táxi iin na̱ hermano consejo ña̱ va̱xi nu̱ú Biblia ndaʼa̱yó, saá náʼa̱na ña̱ kúʼvi̱ní-inina xínina miíyó. Ña̱kán, iin ki̱ʼva  ña̱ taxiyó tíxa̱ʼvi ndaʼa̱na kúú ña̱ viíní kuniso̱ʼoyó ña̱ káʼa̱nna xíʼinyó, ta kundiku̱nyó consejo ña̱ táxina ndaʼa̱yó.

4. Nda̱a̱ táki̱ʼva káchi Eclesiastés 7:9, ¿ndáaña va̱ása xíniñúʼu keʼéyó tá táxina consejo ndaʼa̱yó?

⁴ Va̱ása íxayo̱ʼvi̱ña xíʼinyó ndakuniyó ña̱ kúúyó na̱ yiví ku̱a̱chi. Soo tá káʼa̱n inkana xíʼinyó xa̱ʼa̱ iin ña̱ va̱ása va̱ʼa kéʼéyó, sana íxayo̱ʼvi̱ña xíʼinyó ndakuniyó ña̱yóʼo. Ña̱kán íxayo̱ʼvi̱níña xíʼinyó kundiku̱nyó consejo ña̱ táxi inkana ndaʼa̱yó, ta sana nda̱a̱ sáa̱yó (kaʼvi Eclesiastés 7:9). * Ta sana nda̱a̱ kixáʼayó ka̱ʼa̱nyó ña̱ íyova iin xa̱ʼa̱ kúú ña̱ kéʼéyó saá, á kixáʼayó va̱ása va̱ʼa ndakanixi̱níyó xa̱ʼa̱ na̱ ta̱xi consejo ndaʼa̱yó á nda̱a̱ kivi sa̱a̱yó xíʼinna xa̱ʼa̱ ki̱ʼva ña̱ ni̱ka̱ʼa̱nna xíʼinyó. Ta nda̱a̱ kivi ndakanixi̱níyó ña̱yóʼo: “¿Nda̱chun táxina consejo ndaʼíi̱ tá saátu kéʼé miívana?”. Ta tá va̱ása níkutóoyó consejo yóʼo sana va̱ása kundiku̱nvíyóña, á sana ndukúyó consejo nu̱ú inkana saáchi kúni̱yó ña̱ ná ka̱ʼa̱nna xíʼinyó ña̱ kútóo miíyó.

5. ¿Ndáaña ka̱ʼa̱nyó xa̱ʼa̱ nu̱ú artículo yóʼo?

⁵ Nu̱ú artículo yóʼo ka̱ʼa̱nyó xa̱ʼa̱ sava na̱ va̱ása níxiin kundiku̱n consejo ña̱ ta̱xina ndaʼa̱na, saátu ka̱ʼa̱nyó xa̱ʼa̱ na̱ xi̱ndiku̱n consejo ña̱ ta̱xina ndaʼa̱na. Ta saátu kotoyó ndáaña kivi chindeétáʼan xíʼinyó kundiku̱nyó consejo ña̱ táxina ndaʼa̱yó, ta ndáaña va̱ʼa ndakiʼinyó tá ná kundiku̱nyóña.

6. ¿Ndáaña sákuaʼayó xíʼin ña̱ ke̱ʼé ta̱ Rehoboam?

⁶ Ná ka̱ʼa̱nyó xa̱ʼa̱ ña̱ ke̱ʼé ta̱ Rehoboam. Tá ni̱xa̱a̱ra ndu̱ura rey ti̱xin ñuu Israel, na̱ ñuu ni̱ka̱ʼa̱nna xíʼinra ña̱ loʼoka ña̱ʼa ná ndukúra nu̱úna, saáchi yivára ta̱ Salomón ku̱a̱ʼání ña̱ʼa xi̱ndukúra nu̱úna. Ta va̱ʼava íyo ña̱ ke̱ʼé ta̱ Rehoboam, saáchi ni̱nda̱ka̱tu̱ʼunra na̱ anciano na̱ ni̱xi̱yo ti̱xin ñuu Israel xa̱ʼa̱ ña̱yóʼo. Ta na̱yóʼo ni̱ka̱ʼa̱nna xíʼinra ña̱ tá ná keʼéra ña̱ ni̱ka̱ʼa̱n na̱ ñuu xíʼinra, saá kúú ña̱ chindeétáʼanna xíʼinra ndiʼi tiempo (1 Rey. 12:3-7). Soo ta̱ Rehoboam va̱ása níkutóora consejo yóʼo, ña̱kán ni̱xa̱ʼa̱nra ni̱nda̱ka̱tu̱ʼunra na̱ ta̱a na̱ inkáchi xa̱ʼnu xíʼinra. Ta su̱ví na̱ va̱líví níxi̱kuu na̱yóʼo, saáchi sana yáʼaka 40 ku̱i̱ya̱ xi̱kuumiína, ña̱kán xi̱xini̱nívana (2 Crón. 12:13). Soo su̱ví consejo va̱ʼa nítaxina ndaʼa̱ ta̱ Rehoboam, saáchi ni̱ka̱ʼa̱nna xíʼinra ña̱ ku̱a̱ʼáka ña̱ʼa ná ndukúra nu̱ú na̱ ñuu Israel (1 Rey. 12:8-11). U̱vi̱ consejo nda̱kiʼin ta̱ Rehoboam, ña̱kán xi̱niñúʼu nda̱ka̱tu̱ʼunra Jehová ndáa consejo kúú ña̱ kundiku̱nra. Soo va̱ása níkeʼéra ña̱yóʼo, chi xi̱ndiku̱nra consejo ña̱ ta̱xi na̱ ta̱a kán ndaʼa̱ra xa̱ʼa̱ ña̱ ku̱tóokaraña. Ta xa̱ʼa̱ ña̱yóʼo ku̱a̱ʼání tu̱ndóʼo ki̱xi nu̱úra ta saátu nu̱ú na̱ ñuu. Ta sana saátu kivi kundoʼoyó, chi kivi taxina iin consejo ndaʼa̱yó ña̱ va̱ása kutóoyó. Soo tá nu̱ú tu̱ʼun Ndióxi̱ ta̱vánaña xíniñúʼu kundiku̱nvayóña.

7. ¿Ndáaña sákuaʼayó xíʼin ña̱ ndo̱ʼo ta̱ Uzías?

⁷ Saátu ta̱ rey Uzías va̱ása níxiinra kundiku̱nra consejo ña̱ ta̱xina ndaʼa̱ra. Iin yichi̱ va̱ása va̱ʼa íyo ña̱ ke̱ʼéra, saáchi ni̱ki̱ʼvira ti̱xin templo ña̱ va̱ʼa kaʼmira incienso nu̱ú Jehová, soo na̱ su̱tu̱ kuitíva kúú na̱ xi̱kiʼvi yóʼo. Ña̱kán ni̱ka̱ʼa̱nna xíʼinra ña̱ su̱ví ta̱yóʼo kúú ta̱ xíniñúʼu kaʼmi incienso nu̱ú Jehová, saáchi chiñu na̱ su̱tu̱va xi̱kuu ña̱kán. ¿Ndáaña ke̱ʼéra? Tu̱ʼun Ndióxi̱ káʼa̱nña ña̱ ndeéní ni̱sa̱a̱ra ta va̱ása níxi̱ndiku̱nra consejo ña̱ ta̱xina ndaʼa̱ra. ¿Nda̱chun? Sana nda̱kanixi̱níra ña̱ kivi keʼéra nda̱a̱ ndáaka ña̱ kúni̱ miíra, saáchi rey xi̱kuura. Soo su̱ví saá níxi̱ndakanixi̱ní Jehová xa̱ʼa̱ra. Tá vitá níxi̱yo ini ta̱ Uzías, ta tá níxi̱ndiku̱nra consejo ña̱ ta̱xina ndaʼa̱ra ta saátu tá kama níkitara ti̱xin templo, sana ixakánuva-ini Jehová xa̱ʼa̱ra. Soo xa̱ʼa̱ ña̱ ke̱ʼéra iin ña̱ va̱ása níxiniñúʼu keʼéra, Jehová ta̱xira kue̱ʼe̱ lepra ndaʼa̱ra ta xi̱kuumiíra kue̱ʼe̱ yóʼo nda̱a̱ tá ni̱xi̱ʼi̱ra (2 Crón. 26:16-21). ¿Ndáaña sákuaʼayó xíʼin ña̱ ndo̱ʼo ta̱ Uzías? Tá ná va̱ása  kundiku̱nyó consejo ña̱ va̱xi nu̱ú tu̱ʼun Ndióxi̱, va̱ása kusi̱íka-inira xíʼinyó ni nda̱a̱ ndáaka chiñu kúúmiíyó ti̱xin ñuura.

8. ¿Ndáaña ke̱ʼé ta̱ Job tá ta̱xina consejo ndaʼa̱ra?

⁸ Tu̱ʼun Ndióxi̱ káʼa̱ntuña xíʼinyó xa̱ʼa̱ sava na̱ yiví na̱ xi̱ndiku̱n consejo ña̱ ta̱xina ndaʼa̱na, ta ku̱a̱ʼání ña̱ va̱ʼa ta̱xi Jehová ndaʼa̱na xa̱ʼa̱ ña̱ xi̱ndiku̱nnaña. Ná ka̱ʼa̱nyó xa̱ʼa̱ ña̱ ndo̱ʼo ta̱ Job. Ni xi̱kuni̱ra sakúsi̱íra-ini Ndióxi̱, soo tá xi̱ndika̱a̱ra ndaʼa̱ tu̱ndóʼo ni̱ka̱ʼa̱nra sava ña̱ va̱ása va̱ʼa, saáchi iin ta̱ ku̱a̱chiva xi̱kuura. Ña̱kán ta̱xi Jehová xíʼin ta̱ Elihú consejo ndaʼa̱ra. ¿Ndáaña ke̱ʼéra tá ta̱xina consejo ndaʼa̱ra? Vitá ni̱xi̱yo inira ta xi̱ndiku̱nraña, ta nda̱kunira ña̱ va̱ása va̱ʼa íyo ña̱ ni̱ka̱ʼa̱nra. Ña̱kán ni̱ka̱ʼa̱nra ña̱yóʼo: “Ndíkóní-inii̱ xa̱ʼa̱ ña̱ ni̱ka̱ʼi̱n, ña̱kán xíkundúʼíi̱ nu̱ú ya̱a̱ ta saátu nu̱ú yáká”. Ku̱a̱ʼání ña̱ va̱ʼa ta̱xi Jehová ndaʼa̱ ta̱ Job xa̱ʼa̱ ña̱ vitá ni̱xi̱yo inira (Job 42:3-6, 12-17).

9. ¿Ndáaña ke̱ʼé ta̱ Moisés tá ni̱ka̱ʼa̱n Jehová xíʼinra, ta nda̱chun va̱ʼaní yichi̱ sa̱ndákoora nu̱úyó?

⁹ Saátu ta̱ Moisés va̱ʼaní yichi̱ sa̱ndákoora nu̱úyó, saáchi va̱ʼaní xi̱ndiku̱nra ña̱ ni̱ka̱ʼa̱n Jehová xíʼinra tá ke̱ʼéra iin ña̱ va̱ása va̱ʼa. Iin yichi̱ va̱ása níndasakáʼnura Jehová nu̱ú na̱ ñuu Israel xa̱ʼa̱ ña̱ ni̱sa̱a̱níra. Ña̱kán, va̱ása nítaxi Jehová ya̱ʼara nu̱ú ñuʼú ña̱ ni̱ka̱ʼa̱nra taxira ndaʼa̱ na̱ ñuu Israel (Núm. 20:1-13). Ta tá ni̱ka̱ʼa̱n ta̱ Moisés xíʼin Jehová ña̱ ná taxira ya̱ʼara nu̱ú ñuʼú kán, Jehová ni̱ka̱ʼa̱nra xíʼinra ña̱ ná va̱ása ndikókara ka̱ʼa̱nra xíʼinra xa̱ʼa̱ ña̱yóʼo (Deut. 3:23-27). Va̱ása nísa̱a̱ra ta ka̱ndíxavara ña̱ ni̱ka̱ʼa̱n Jehová xíʼinra, ña̱kán nda̱kundeéva Jehová xi̱niñúʼurara ña̱ xi̱niʼira yichi̱ nu̱ú na̱ ñuu Israel (Deut. 4:1). Va̱ʼaní yichi̱ sa̱ndákoo ta̱ Job ta saátu ta̱ Moisés nu̱úyó. Chi ta̱ Job na̱samara ki̱ʼva ña̱ ndákanixi̱níra, ta va̱ása níka̱ʼa̱nra ña̱ íyova iin xa̱ʼa̱ kúú ña̱ ni̱ka̱ʼa̱nra ña̱ va̱ása va̱ʼa. Ta ta̱ Moisés ka̱ndíxavara ña̱ ni̱ka̱ʼa̱n Jehová saáchi nda̱kundeéra ka̱chíñura nu̱úra ni va̱ása níkivika ki̱ʼvira nu̱ú ñuʼú ña̱ ki̱ndoora taxira ndaʼa̱ra.

10. a) Nda̱a̱ táki̱ʼva káchi Proverbios 4:10-13, ¿ndáaña va̱ʼa ndákiʼinyó tá ndíku̱nyó consejo ña̱ táxina ndaʼa̱yó? b) ¿Ndáaña ke̱ʼé sava na̱ hermano tá nda̱kiʼinna consejo?

¹⁰ Ku̱a̱ʼání ña̱ va̱ʼa ndakiʼinyó tá ná kundiku̱nyó yichi̱ ta̱ Job xíʼin ta̱ Moisés (kaʼvi Proverbios 4:10-13). * Tasaá kéʼé ku̱a̱ʼání na̱ hermano tiempo vitin. Iin ta̱ hermano ta̱ naní Emmanuel * ta̱ íyo chí República Democrática del Congo, nátúʼunra xa̱ʼa̱ consejo ña̱ ta̱xi sava na̱ hermano ndaʼa̱ra. Ña̱yóʼo kúú ña̱ káʼa̱nra: “Sava na̱ hermano ki̱ʼinna kuenta ña̱ ki̱xáʼíi̱ kéʼíi̱ ña̱ va̱ása va̱ʼa ña̱ kivi sakúxíka yi̱ʼi̱ nu̱ú Jehová, ña̱kán va̱ʼaní consejo ta̱xina ndaʼíi̱. Ta xa̱ʼa̱ ña̱ xi̱ndiku̱i̱n consejo ña̱ ta̱xina ndaʼíi̱, va̱ása níkixika tu̱ndóʼo nu̱úi̱”. Iin ñá precursora ñá naní Megan ñá íyo chí Canadá káchiñá: “Sava yichi̱ tá táxina consejo ndaʼíi̱ va̱ása kútói̱ña, soo mií ña̱yóʼo kúú ña̱ xíniñúʼuvai̱”. Ta inka ta̱ hermano ta̱ naní Marko, ta̱ íyo chí Croacia káchira: “Ki̱ndaana chiñu ña̱ xi̱kuumiíi̱ ti̱xin congregación, soo ndákunivai̱ ña̱ va̱ʼaníva consejo ta̱xina ndaʼíi̱ chi chi̱ndeétáʼanña xíʼi̱n ña̱ nda̱kutáʼan vií tukui̱ xíʼin Jehová”.

11. ¿Ndáaña ku̱nda̱a̱-ini ta̱ hermano Karl Klein?

¹¹ Inka ta̱ va̱ʼaní chi̱ndeétáʼan consejo xíʼin kúú ta̱ hermano Karl Klein, ta̱ xi̱kuu táʼan na̱ Cuerpo Gobernante. Iin yichi̱ ta̱ hermano Joseph Rutherford ta̱ va̱ʼaní xi̱kitáʼan xíʼinra, káxiní íyo consejo ña̱ ta̱xira ndaʼa̱ra. Ta̱ hermano Klein, va̱ása níkutóora consejo yóʼo. Ña̱yóʼo ni̱ka̱ʼa̱nra: “Tá nda̱kutáʼi̱n xíʼin ta̱ hermano Rutherford, kúsi̱íkaví-inira ni̱ka̱ʼa̱nra ña̱yóʼo xíʼi̱n: ‘Kúaʼún  Karl’. Soo xa̱ʼa̱ ña̱ táʼan sáa̱kai̱ xíʼinra, va̱ása vií níndakuii̱n yuʼúra. Tasaá ni̱ka̱ʼa̱nra xíʼi̱n: ‘Kuenta koún Karl, ta̱ Ndi̱va̱ʼa kúni̱ra sandákavara yóʼó’. Ku̱kaʼankaví nu̱úi̱ ta nda̱kuii̱n yuʼúra: ‘Ñani Rutherford, su̱ví ta̱ sáa̱ví kúi̱ xíʼún’. Soo ki̱ʼinvara kuenta ña̱ su̱ví ña̱ ndixa kúúña, ña̱kán tuku ni̱ka̱ʼa̱nra xíʼi̱n: ‘Va̱ʼava, soo kuenta koún chi ta̱ Ndi̱va̱ʼa kúni̱ra sandákavara yóʼó’. Ndixaní kúú ña̱ ni̱ka̱ʼa̱nra xíʼi̱n, saáchi tá sáa̱yó xíʼin iin na̱ hermano xa̱ʼa̱ ña̱ ta̱xina consejo ndaʼa̱yó ni kúnda̱a̱va-iniyó ña̱ xi̱niñúʼu taxina consejo yóʼo ndaʼa̱yó [...], saá kúú ña̱ kamaníka sándakava ta̱ Ndi̱va̱ʼa miíyó” * (Efes. 4:25-27). Ta̱ hermano Klein xi̱ndiku̱nra consejo ña̱ ta̱xi ta̱ hermano Rutherford ndaʼa̱ra, ta nda̱kundeévana va̱ʼaní xi̱táʼanna.

12. Tá vitá íyo iniyó, ¿ndáa ki̱ʼva chíndeétáʼanña xíʼinyó kundiku̱nyó consejo ña̱ táxina ndaʼa̱yó? (Salmo 141:5).

¹²Ña̱ vitá koo iniyó kúú ña̱ chindeétáʼan xíʼinyó kundiku̱nyó consejo ña̱ táxina ndaʼa̱yó. Saáchi ña̱yóʼo chindeétáʼanña xíʼinyó ndakaʼányó ña̱ kúúyó na̱ yiví ku̱a̱chi, ta saátu chindeétáʼanña xíʼinyó kotoyó ña̱ va̱ása va̱ʼa íyo ña̱ kéʼéyó sava yichi̱. Nda̱a̱ táki̱ʼva xa̱a̱ sa̱kúaʼayó xa̱ʼa̱ ta̱ Job, ta̱yóʼo va̱ása vií níxi̱ndakanixi̱níra soo tándi̱ʼi na̱samavara ña̱ ndákanixi̱níra. Vitá ni̱xi̱yo inira ta xi̱ndiku̱nra consejo ña̱ ta̱xi ta̱ Elihú ndaʼa̱ra ni loʼoka ta̱yóʼo nu̱úra (Job 32:6, 7). Ta ta̱xiva Jehová ku̱a̱ʼá ña̱ va̱ʼa ndaʼa̱ ta̱ Job xa̱ʼa̱ ña̱ vitá ni̱xi̱yo inira. Ta saátu miíyó tá vitá íyo iniyó, kundiku̱nvayó consejo ña̱ táxina ndaʼa̱yó ni túviyó ña̱ va̱ása xíniñúʼu ndakiʼinyóña á ni válíní na̱ táxiña ndaʼa̱yó. Iin ta̱ anciano ta̱ ñuu Canadá káchira: “Nu̱ú miíyó va̱ʼaníva íyo ña̱ kéʼéyó soo inkana kíʼinvana kuenta xíʼin ña̱ va̱ása va̱ʼa kéʼéyó. Ña̱kán va̱ása kuchiñuyó nasamayó ña̱ kéʼéyó tá va̱ása táxina consejo ndaʼa̱yó”. Ndiʼivayó xíniñúʼu chika̱a̱ ndee̱ ña̱ kuumiíyó ña̱ va̱ʼa ña̱ táxi espíritu santo Ndióxi̱, ta saátu xíniñúʼu viíka sanáʼa̱yó inkana (kaʼvi Salmo 141:5). *

13. ¿Ndáaña xíniñúʼu ndakaʼányó xa̱ʼa̱ consejo ña̱ táxi Jehová ndaʼa̱yó?

¹³Ná ndakaʼányó chi xa̱ʼa̱ ña̱ kúʼvi̱-ini Jehová xínira miíyó kúú ña̱ táxira consejo ndaʼa̱yó, ta va̱ása kúni̱ra ná xo̱ʼvi̱yó (Prov. 4:20-22). Tá táxira consejo ndaʼa̱yó nu̱ú tu̱ʼunra, nu̱ú tutu ña̱ tává na̱ ñuura á tá xíniñúʼura iin na̱ hermano na̱ xu̱xa-ini ña̱ taxina iin consejo ndaʼa̱yó, saá náʼa̱ra ña̱ kúʼvi̱-inira xínira miíyó. Ta nda̱a̱ táki̱ʼva káchi Hebreos 12:9, 10: “Táxira consejo ndaʼa̱yó xa̱ʼa̱ ña̱ va̱ʼa miíyó”.

14. ¿Ndáaña xíniñúʼu kundi̱ʼi̱ka-iniyó xa̱ʼa̱ tá táxina consejo ndaʼa̱yó?

¹⁴Ná kundi̱ʼi̱ka-iniyó xa̱ʼa̱ consejo ña̱ táxina ndaʼa̱yó ta su̱ví ndáa ki̱ʼva táxinaña. Sava yichi̱  kivi ndakanixi̱níyó ña̱ va̱ása vií nítaxina consejo ndaʼa̱yó. Ña̱ nda̱a̱ kúúña, tá táxiyó consejo ndaʼa̱ iin na̱ hermano xíniñúʼu chika̱a̱yó ndee̱ ña̱ viíní taxiyóña, tasaá va̱ása ixayo̱ʼvi̱ña xíʼinna kundiku̱nnaña (Gál. 6:1). * Soo, tá miíyó kúú na̱ ndákiʼin consejo ná kotoyó ndáaña kivi sakúaʼayó xíʼinña ni túviyó ña̱ va̱ása vií nítaxinaña ndaʼa̱yó. Kivi ndakanixi̱níyó xa̱ʼa̱ ña̱yóʼo: “Ni va̱ása níkutói̱ ndáa ki̱ʼva ta̱xina consejo ndaʼíi̱, soo ¿á íyo iin ña̱ kivi sakúaʼi̱ xíʼinña? ¿Á kivi nandósó-inii̱ xa̱ʼa̱ ña̱ va̱ása va̱ʼa kéʼé miína ta kundiku̱i̱n consejona?”. Ndáyáʼviní kundiku̱nyó nda̱a̱ ndáaka consejo táxina ndaʼa̱yó (Prov. 15:31).

15. ¿Nda̱chun iin ña̱ va̱ʼaní kúú ña̱ ndukúyó consejo?

¹⁵ Tu̱ʼun Ndióxi̱ káʼa̱nña xíʼinyó ña̱ ná ndukúyó consejo. Proverbios 13:10 káchiña: “Na̱ ndúkú consejo, ndíchi íyona”. Ña̱ nda̱a̱ní kúú ña̱ káʼa̱n texto yóʼo. Na̱ ndúkú consejo nu̱úka ña̱ kundatuna ña̱ taxinaña ndaʼa̱na, kamaníka xáʼnuna xíʼin tu̱ʼun Ndióxi̱. Ña̱kán, siʼnaka miíyó ná ndukú consejo.

16. ¿Ama kivi ndukúyó consejo?

¹⁶ ¿Ama kúú ña̱ kivi ndukúyó consejo nu̱ú iin na̱ hermano? Ná ka̱ʼa̱nyó xa̱ʼa̱ sava ejemplo. Ña̱ nu̱ú: iin ñá hermana káʼa̱nñá xíʼin inka ñá hermana ña̱ ná ku̱ʼu̱nñá xíʼinñá kaʼviñá xíʼin iin na̱ yiví, ta tándi̱ʼi ndáka̱tu̱ʼunñáñá ndáaña kivi keʼéñá ña̱ viíka sanáʼa̱ñá na̱ káʼviñá xíʼin. Ña̱ u̱vi̱: iin ñá hermana ñá kúa̱an kúni̱ñá satáñá xatu kundixiñá, ña̱kán ndáka̱tu̱ʼunñá iin ñá hermana ndáaña ndákanixi̱níñá xa̱ʼa̱ xatu ña̱ kúni̱ñá satáñá. Ña̱ u̱ni̱: sa̱kán ña̱ nu̱ú yichi̱ kúú ña̱ taxi iin ta̱ hermano discurso ti̱xin congregación. Ña̱kán, káʼa̱nra xíʼin iin ta̱ hermano ta̱ xa̱a̱ xíni̱ka ña̱ ná kuniso̱ʼora discursora tá ná taxiraña ti̱xin congregación, tasaá kivi taxira consejo ndaʼa̱ra ña̱ viíka taxira discurso. Ta saátu nda̱a̱ na̱ xa̱a̱ ku̱a̱ʼání ku̱i̱ya̱ táxi discurso kivi ndukúna consejo nu̱ú inka na̱ hermano, ta kivi kundiku̱nna consejo yóʼo.

17. ¿Ndáaña xíniñúʼu keʼéyó ña̱ va̱ʼa chindeétáʼan consejo xíʼinyó?

¹⁷ Sana semana va̱xi, á yo̱o̱ va̱xi kivi ndani̱ʼíyó iin consejo nu̱ú tu̱ʼun Ndióxi̱ á nu̱ú tutu ña̱ tává na̱ ñuura. Á sanatu iin na̱ anciano á iin na̱ hermano taxina consejo ndaʼa̱yó. Tá ná kuu ña̱yóʼo ná ndakaʼányó xa̱ʼa̱ ña̱ sa̱kúaʼayó nu̱ú artículo yóʼo: vitá ná koo iniyó, ta ná kundi̱ʼi̱ka-iniyó xa̱ʼa̱ consejo ña̱ táxina ndaʼa̱yó ta su̱ví ndáa ki̱ʼva táxinaña ndaʼa̱yó, ta saátu ná kundiku̱nyóña. Nda̱a̱ ni iinyó su̱ví na̱ ndíchiví kúúyó. Soo tu̱ʼun Ndióxi̱ káʼa̱nña xíʼinyó ña̱ ndíchiní xa̱a̱yó kooyó tá ná kuniso̱ʼoyó consejo ña̱ táxina ndaʼa̱yó, ta saátu tá ná kundiku̱nyóña (Prov. 19:20).