LEY ña̱ ta̱xi Jehová ndaʼa̱ na̱ ñuu Israel xi̱ka̱ʼa̱nña ña̱ kivi taxina tórtola á paloma ndaʼa̱ra. Ta nu̱ú ley yóʼo káʼa̱nña xa̱ʼa̱ u̱vi̱ saá tí saa yóʼo. Ta na̱ ñuu Israel va̱ʼa xi̱taxina nda̱a̱ ndáaka tíyóʼo (Lev. 1:14; 12:8; 14:30). Ta iin ña̱ va̱ʼaní xi̱kuu ña̱yóʼo, saáchi sava yichi̱ xi̱ ixayo̱ʼvi̱ña xíʼinna ndani̱ʼína tí tórtola. Ná kotoyó nda̱chun.

Tiempo niʼní kuití kúú ña̱ xi̱xiyo tí tórtola chí ñuu Israel. Saáchi tá xi̱ndakiʼin yo̱o̱ octubre (tiempo vi̱xin) xi̱xa̱ʼa̱nrí inka país chi kán kúú nu̱ú niʼníka, ta xi̱ndandikórí ñuu Israel tá tiempo niʼní (Cant. 2:11, 12; Jer. 8:7). Ña̱kán, tá xi̱kuuña tiempo vi̱xin xi̱ ixayo̱ʼvi̱ña xíʼin na̱ ñuu Israel ndani̱ʼína tí tórtola ña̱ va̱ʼa so̱kónarí nu̱ú Ndióxi̱.

Soo tí paloma va̱ása xáʼa̱nvírí inka lugar, ña̱kán iníísaá ku̱i̱ya̱ xi̱xiyorí ñuu Israel. Ta saátu xi̱xiyorí veʼe na̱ yiví (chitáʼanña xíʼin Juan 2:14, 16). Ña̱yóʼo káʼa̱n iin libro xa̱ʼa̱rí: “Na̱ yiví na̱ ni̱xi̱yo chí Palestina ku̱a̱ʼání tí paloma xi̱satáʼvi̱na. Ndiʼi veʼe xi̱kuumiíña iin ya̱vi̱ kándíkaña nu̱ú xi̱ñuʼu tí paloma yóʼo” (chitáʼanña xíʼin Isaías 60: 8).

¿Ndáaña sánáʼa̱ña miíyó xa̱ʼa̱ Jehová? Ña̱ kúúra iin Ndióxi̱ ta̱ kúʼvi̱ní-ini xíni miíyó ta kúnda̱a̱-inira ndáaña kivi taxiyó. Saáchi ni̱ka̱ʼa̱nra xíʼin na̱ ñuu Israel ña̱ kiviva taxina saa tí kivi ndani̱ʼína iníísaá ku̱i̱ya̱.