1. ¿Nda̱chun táxiún tíxa̱ʼvi ndaʼa̱ Jehová xa̱ʼa̱ ña̱ Biblia?

 TÁXINÍYÓ tíxa̱ʼvi ndaʼa̱ Jehová xa̱ʼa̱ ña̱ ta̱xira Biblia ndaʼa̱yó. Chi nu̱ú ña̱yóʼo va̱ʼaní consejo táxira ndaʼa̱yó ña̱ kivi chindeétáʼan xíʼinyó tá yáʼayó nu̱ú tu̱ndóʼo. Ta saátu káʼa̱nña xíʼinyó xa̱ʼa̱ ña̱ va̱ʼa ña̱ ndakiʼinyó chí nu̱únínu. Soo mií ña̱ ndáyáʼvika káʼa̱nña xa̱ʼa̱ kúúña ndáa ki̱ʼva íyo Jehová. Tá ná ndakanixi̱níyó xa̱ʼa̱ ña̱ va̱ʼa ña̱ kúúmií Jehová, ndakanda̱-iniyó, ta ña̱yóʼo chindeétáʼanña xíʼinyó ña̱ koo yatinyó nu̱úra tasaá xa̱a̱yó kooyó migora (Sal. 25:14).

2. ¿Ndáaña ke̱ʼé Jehová ña̱ va̱ʼa sakúaʼayó xa̱ʼa̱ra?

² Jehová kúni̱ra ña̱ ndiʼi na̱ yiví ná kunda̱a̱-ini ndáa ki̱ʼva íyora. Xa̱ʼa̱ ña̱kán tá ya̱chi̱ xi̱niñúʼura visión, xa̱ni ta saátu na̱ ángel ña̱ va̱ʼa sanáʼa̱ra miíyó ndáa ki̱ʼva íyora (Núm. 12:6; Hech. 10:3, 4). Tá kǒo níkaʼyína ndiʼi ña̱yóʼo nu̱ú Biblia sana kǒoví ña̱ sakúaʼayó tiempo vitin. Soo Jehová xi̱niñúʼura sava na̱ ta̱a ña̱ ná kaʼyína nu̱ú iin libro ndiʼi ña̱ kúni̱ra sanáʼa̱ra miíyó (Jer. 30:2). Ndiʼi ña̱ va̱xi nu̱ú tu̱ʼun Ndióxi̱ va̱ʼaníña, chi miíra kúú ta ni̱ka̱ʼa̱n ndáaña ka̱ʼyi̱ nu̱úña ta va̱ʼaní chíndeétáʼanña xíʼinyó (Sal. 18:30).

3. ¿Ndáaña ke̱ʼé Jehová ña̱ va̱ʼa kuumiíyó Biblia nda̱a̱ tiempo vitin? (Isaías 40:8).

³ (Kaʼvi Isaías 40:8). b Xa̱a̱ ku̱a̱ʼání ku̱i̱ya̱ tu̱ʼun Ndióxi̱ va̱ʼaní níʼiña yichi̱ nu̱ú na̱ ñuura. Soo, ¿nda̱chun va̱ʼa kúúmiíyó Biblia nda̱a̱ tiempo vitin? Ña̱ʼa ña̱ xi̱xiniñúʼuna tá xi̱kaʼyína Biblia tá ya̱chi̱ kamaní xi̱ndiʼi-xa̱ʼa̱ña. Ta copia kuitíva Biblia kúúmiíyó tiempo vitin, chi mií ña̱ ka̱ʼyína tá xa̱ʼa̱ ndi̱ʼi-xa̱ʼa̱vaña kǒokaña kúúmiíyó. Soo Jehová ni̱ka̱ʼa̱nra xíʼin na̱ ka̱ʼyíña ña̱ ná kotondaana ña̱ va̱xi nu̱ú ña̱ original ña̱ va̱ʼa sándaya̱ʼanaña nu̱ú inka ña̱ʼa tasaá  tavána ku̱a̱ʼá copiaña. Ni na̱ yiví ku̱a̱chi xi̱kuu na̱ sa̱ndáya̱ʼa ña̱yóʼo, soo viíní sa̱ndáya̱ʼanaña. Iin ta̱ káʼvi va̱ʼa xa̱ʼa̱ ña̱ Escrituras Hebreas ni̱ka̱ʼa̱nra ña̱yóʼo: “Ni nda̱a̱ iin tutu kǒo kítáʼan xíʼin ña̱ Biblia chi nda̱a̱ táki̱ʼva íyo ña̱ ka̱ʼyína tá ya̱chi̱, saá íyo ña̱ sa̱ndáya̱ʼana nu̱ú ña̱ kúúmiíyó vitin”. Ni na̱ yiví ku̱a̱chi kúú na̱ ka̱ʼyíña ta ni ka̱ʼyínaña nu̱ú ña̱ʼa ña̱ kamaní ndíʼi-xa̱ʼa̱, soo ni saá ndiʼi ña̱ va̱xi nu̱úña tu̱ʼun mií Jehová kúúña.

4. ¿Ndáaña sakúaʼayó nu̱ú artículo yóʼo?

⁴ “Ndiʼi ña̱ʼa ña̱ va̱ʼa, chí ndiví va̱xiña ta Ndióxi̱ kúú ta̱ táxi ña̱yóʼo” (Sant. 1:17). Ña̱ Biblia kúú iin regalo ña̱ va̱ʼaní ta̱xi Ndióxi̱ ndaʼa̱yó. Tá iinna táxina regalo ndaʼa̱yó, náʼa̱na ña̱ ndixa xíni̱na miíyó ta saátu kúnda̱a̱-inina ndáa ña̱ʼa kúú ña̱ xíniñúʼuyó. Saá kúú ña̱ kúu xíʼin Biblia, tá káʼviyóña ku̱a̱ʼání ña̱ʼa sákuaʼayó xa̱ʼa̱ Jehová. Ta xíʼin ña̱yóʼo kúnda̱a̱-iniyó ña̱ va̱ʼaní xíni̱ra miíyó ta kúnda̱a̱-inira ndáa ña̱ʼa kúú ña̱ xíniñúʼuyó. Nu̱ú artículo yóʼo sakúaʼayó xa̱ʼa̱ u̱ni̱ ña̱ va̱ʼa ña̱ kúúmií Jehová: ña̱ ndíchiníra, ña̱ nda̱kúní íyo ndiʼi ña̱ kéʼéra ta kúʼvi̱ní-inira xínira miíyó. Siʼna ná ka̱ʼa̱nyó xa̱ʼa̱ ña̱ ndíchi ña̱ kúúmií Jehová, ña̱ káʼa̱n Biblia xa̱ʼa̱.

5. ¿Ndáaña náʼa̱ nu̱úyó ña̱ ndíchiní Ndióxi̱?

⁵ Jehová xíni̱ra ña̱ xíniñúʼuyó consejora. Xa̱ʼa̱ ña̱kán ta̱xira Biblia ndaʼa̱yó ta nu̱ú ña̱yóʼo va̱xi ku̱a̱ʼání consejo ña̱ ndíchi. Consejora va̱ʼaní chíndeétáʼanña xíʼin na̱ yiví ta nda̱a̱ xáa̱na násamana ta sándakoona ña̱ va̱ása va̱ʼa kéʼéna. Tá ka̱ʼyí ta̱ Moisés u̱ʼu̱n libro ña̱ va̱xi nu̱ú kíxáʼa Biblia, ni̱ka̱ʼa̱nra ña̱yóʼo xíʼin na̱ ñuu Israel: “Saáchi su̱ví ta̱ káʼa̱n mií kuití kuiíi̱ xíʼinndó, saáchi tu̱ʼun yóʼo kivi taxiña ña̱ kutakundó” (Deut. 32:47). Tá níxiniso̱ʼona ndiʼi ña̱ ni̱ka̱ʼa̱n Jehová xíʼinna si̱íní koona ta va̱ʼaní kana ndiʼi ña̱ keʼéna (Sal. 1:2, 3). Ni xi̱naʼání ni̱ka̱ʼyi̱ ña̱ Biblia, soo chíndeétáʼanníña xíʼinyó nda̱a̱ tiempo vitin. Tá kúú, nu̱ú jw.org kivi ndani̱ʼíyó nu̱ú káʼa̱nña “Biblia chi̱ndeétáʼanña xíʼinna ña̱ na̱samana”, yóʼo kivi ndani̱ʼíyó nu̱ú káʼa̱n savana ndáa ki̱ʼva chi̱ndeétáʼan Biblia xíʼinna ña̱ na̱samana (1 Tes. 2:13).

6. ¿Nda̱chun káʼa̱nyó ña̱ kǒo ni iin libro kítáʼan xíʼin Biblia?

⁶ Kǒo nda̱a̱ ni iin libro ña̱ kítáʼan xíʼin Biblia. ¿Nda̱chun káʼa̱nyó ña̱yóʼo? Saáchi mií Jehová kúú ta̱ ni̱ka̱ʼa̱n ña̱ ni̱ka̱ʼyi̱ nu̱úña, ta kúúmiíra ndiʼi ndee̱, ndiʼi tiempo íyora, ndíchiníra ta kǒo nda̱a̱ ni iin na̱ kítáʼan xíʼinra. Íyo ku̱a̱ʼá libro ña̱ káʼvi na̱ yiví tiempo vitin, soo na̱ ni̱ka̱ʼa̱n ña̱ ni̱ka̱ʼyi̱ nu̱úña xa̱a̱ ni̱xi̱ʼi̱vana ta consejo ña̱ va̱xi nu̱ú ña̱yóʼo, tá yáʼa tiempo kǒo chíndeétáʼankaña xíʼin na̱ yiví. Soo consejo ña̱ va̱xi nu̱ú Biblia ndiʼi tiempo chíndeétáʼanña xíʼinyó, nda̱a̱ tiempo xi̱naʼá ta nda̱a̱ tiempo vitin xa̱a̱ ku̱a̱ʼání na̱ yiví chíndeétáʼanña xíʼin. Tá káʼviyó Biblia ta ndákanixi̱níyó xa̱ʼa̱ consejo ña̱ va̱xi nu̱úña, Ndióxi̱ xíniñúʼura espíritu santora ña̱ va̱ʼa chindeétáʼanra xíʼinyó ña̱ va̱ʼa keʼéyó ña̱ káʼa̱nra (Sal. 119:27; Mal. 3:16; Heb. 4:12). Ndakanixi̱ní xa̱ʼa̱ ña̱yóʼo: Jehová kúni̱níra chindeétáʼanra xíʼún. ¿Á su̱ví ña̱yóʼo chíka̱a̱níña ndee̱ xíʼún ña̱ kuni̱ún kaʼviún Biblia ndiʼi ki̱vi̱?

7. ¿Ndáa ki̱ʼva chi̱ndeétáʼan Biblia xíʼin na̱ ñuu Ndióxi̱ ña̱ inkáchi xi̱ndakutáʼan ndiʼina?

⁷ Tá káʼviyó Biblia saá kúnda̱a̱-iniyó ña̱ ndíchiní Jehová, saáchi chíndeétáʼanra xíʼin na̱ ñuura ña̱ inkáchi kutáʼanna. Tá ni̱xa̱a̱ na̱ ñuu Israel ni̱ki̱ʼvina nu̱ú ñuʼú ña̱ ni̱ka̱ʼa̱n Ndióxi̱ taxira ndaʼa̱na, xa̱a̱ síín síín lugar ni̱xi̱yona. Savana xi̱kuumiína chiñu ña̱ xi̱tiinna ti̱a̱ká, savana xi̱ndaana kití ta savana xi̱chiʼina ña̱ʼa. Ña̱kán na̱ ñuu Israel kivi nandósóna xa̱ʼa̱ táʼanna xa̱ʼa̱ ña̱ xíkaní xi̱ndoona. Soo Jehová ni̱ka̱ʼa̱nra xíʼin na̱ ñuura ña̱ ná ndakutáʼan ni̱ʼina ña̱ va̱ʼa kuniso̱ʼona tu̱ʼunra ta sakúaʼana xa̱ʼa̱ña (Deut. 31:10-13; Neh. 8:2, 8, 18). Ná ndakanixi̱níyó ndáa ki̱ʼva xi̱ndoʼo na̱ ñuu Israel tá xi̱xaa̱na ñuu Jerusalén ta xi̱ndakutáʼanna xíʼin ku̱a̱ʼáníka na̱ Israel na̱ ke̱e inka ñuu, ta ndiʼina  ki̱xaa̱na ña̱ ndasakáʼnuna Jehová. Saá kúú ña̱ chi̱ndeétáʼan Jehová xíʼinna ña̱ va̱ʼa inkáchi kutáʼan ndiʼina. Tá siglo nu̱ú, ti̱xin ña̱ congregación xi̱ñuʼu ta̱a xíʼin ná ñaʼá na̱ xa̱a̱ síín ñuu na̱ xa̱a̱ síín chiñu xi̱kuumií, ni̱xi̱yo na̱ nda̱ʼví xíʼin na̱ ku̱i̱ká ta saátu na̱ xi̱ka̱ʼa̱n inka tu̱ʼun. Xa̱ʼa̱ ña̱ xi̱ndayáʼviní Biblia nu̱ú ndiʼina, inkáchi xi̱ndasakáʼnuna Jehová. Ta na̱ sa̱kán xi̱kiʼvi ti̱xin congregación va̱ʼava xi̱xaa̱na xi̱kunda̱a̱-inina xa̱ʼa̱ tu̱ʼun Ndióxi̱ xa̱ʼa̱ ña̱ inkáchi xi̱ndakutáʼan ndiʼina ta saátu xa̱ʼa̱ ña̱ xi̱chindeétáʼan inkana xíʼinna ña̱ ndakanina nu̱úna xa̱ʼa̱ ña̱ káʼa̱nña (Hech. 2:42; 8:30, 31).

8. ¿Ndáa ki̱ʼva xíniñúʼu Jehová Biblia ña̱ va̱ʼa inkáchi ndakutáʼan na̱ ñuura tiempo vitin?

⁸ Saátu tiempo vitin Jehová xíniñúʼura tu̱ʼunra ña̱ Biblia ña̱ va̱ʼa chindeétáʼanra xíʼin na̱ ñuura ña̱ va̱ʼa inkáchi kutáʼanna. Nu̱ú ña̱ Biblia távána ndiʼi ña̱ sákuaʼayó xa̱ʼa̱ra. Miíyó na̱ ndásakáʼnu Jehová xáʼa̱nyó reunión ta saátu xáʼa̱nyó asamblea ta kán káʼviyó ta sákuaʼayó ña̱ va̱xi nu̱ú Biblia ta ku̱a̱ʼáníka ña̱ kúnda̱a̱-iniyó xa̱ʼa̱. Ta xíʼin ña̱yóʼo kúnda̱a̱ káxi iniyó ña̱ mií Jehová xíniñúʼura Biblia ña̱ va̱ʼa sáxi̱nura ña̱ kúni̱ra: ña̱ ndiʼi na̱ ñuura inkáchi ná ndasakáʼnunara ta kachíñuna nu̱úra (Sof. 3:9).

9. ¿Ndáa na̱ yiví xíniñúʼu kooyó ña̱ va̱ʼa kunda̱a̱-iniyó xíʼin ña̱ Biblia? (Lucas 10:21).

⁹ Ná ka̱ʼa̱nyó xa̱ʼa̱ inka ña̱ náʼa̱ nu̱úyó ña̱ kúúmií Jehová ña̱ ndíchi. Jehová viíní ki̱ʼinra kuenta ndáaña ka̱ʼyi̱ nu̱ú Biblia ta nda̱saa na̱ yiví na̱ vitá-ini kuití kúú na̱ kunda̱a̱-ini  xíʼinña (kaʼvi Lucas 10:21). Biblia kúú iin libro ña̱ káʼvi ku̱a̱ʼání na̱ yiví na̱ íyo iníísaá nu̱ú ñuʼú. Iin ta̱ xíni̱ va̱ʼa ni̱ka̱ʼa̱nra: “Ña̱ Biblia kúú iin libro ña̱ ku̱a̱ʼáníka na̱ yiví kaʼvi, ta iinlá ña̱yóʼo kúú ña̱ nándukúkana xa̱ʼa̱”. Soo nda̱saa na̱ yiví na̱ vitá-ini kúú na̱ kivi kunda̱a̱-ini xíʼinña ta keʼéna ña̱ káʼa̱nña (2 Cor. 3:15, 16).

10. ¿Ndáa inka ki̱ʼva náʼa̱ Biblia ña̱ ndíchiní Jehová?

¹⁰ Ná kotoyó inka ki̱ʼva ña̱ náʼa̱ Jehová ña̱ ndíchi ña̱ kúúmiíra. Jehová xíniñúʼura tu̱ʼunra ña̱ sanáʼa̱ra ndiʼiyó ta saátu xíniñúʼuraña ña̱ sanáʼa̱ra iin tá iinyó ta sandíkora-iniyó. Tá káʼviyó tu̱ʼunra saá xáa̱yó kúnda̱a̱-iniyó ña̱ ndixaní ndíʼi̱-inira xa̱ʼa̱ iin tá iinyó (Is. 30:21). Tá yáʼayó nu̱ú iin tu̱ndóʼo ta kaʼviyó iin texto, ña̱yóʼo va̱ʼaní chíndeétáʼanña xíʼinyó, saáchi ña̱yóʼo kúú ña̱ xíniñúʼuyó mií tiempo saá. Biblia ni̱ka̱ʼyi̱ña ña̱ va̱ʼa kaʼvi ku̱a̱ʼání na̱ yivíña, soo xa̱a̱ naʼání ni̱ka̱ʼyi̱ña. Ña̱kán, ¿nda̱chun va̱ʼa chíndeétáʼanña xíʼin na̱ yiví na̱ íyo tiempo vitin? Saáchi tu̱ʼun mií Jehová kúú ña̱ ni̱ka̱ʼyi̱ nu̱úña ta ta̱yóʼo ndíchiníra (2 Tim. 3:16, 17).

11. Tá ni̱ka̱ʼyi̱ ña̱ va̱xi nu̱ú Biblia, ¿ndáa ki̱ʼva ni̱na̱ʼa̱ Ndióxi̱ ña̱ va̱ʼa ndiʼi na̱ yiví nu̱úra?

¹¹ Inka ña̱ va̱ʼa ña̱ kúúmií Jehová kúú ña̱ nda̱kúní íyo ndiʼi ña̱ kéʼéra (Deut. 32:4). Saáchi va̱ása kúndasíra na̱ yiví, chi na̱ va̱ʼa kúú ndiʼina nu̱úra (Hech. 10:34, 35; Rom. 2:11). Ta tu̱ʼun ña̱ ni̱ka̱ʼyi̱ Biblia náʼa̱ káxiña nu̱úyó ña̱ saá íyo Jehová. Saáchi tá ki̱xáʼana ka̱ʼyína 39 libro ña̱ va̱xi nu̱ú Biblia, ku̱a̱ʼání ña̱yóʼo ni̱ka̱ʼyi̱ña tu̱ʼun hebreo, tu̱ʼun yóʼo xi̱ka̱ʼa̱n na̱ ñuu Ndióxi̱ tiempo saá. Soo tá siglo nu̱ú, ku̱a̱ʼání na̱ yiví xi̱ka̱ʼa̱nna tu̱ʼun griego. Xa̱ʼa̱ ña̱kán tá ka̱ʼyína 27 libro ña̱ so̱ndíʼi ña̱ va̱xi nu̱ú Biblia, ni̱ka̱ʼyi̱ña tu̱ʼun griego. Soo Jehová va̱ása níndaka̱xinra ña̱ iinlá kuití tu̱ʼun ná ka̱ʼyi̱ ña̱ va̱xi nu̱ú Biblia chi ta̱xira ña̱ ku̱a̱ʼá tu̱ʼun ná ka̱ʼyíña. Tiempo ña̱ ndóoyó vitin yáʼaka 8,000 millón na̱ yiví kúúyó iníísaá ñuyǐví ta xa̱a̱ síín síín tu̱ʼun káʼa̱nyó. Ña̱kán, ¿ndáaña chíndeétáʼan xíʼinyó ña̱ xa̱a̱yó sakúaʼayó xa̱ʼa̱ Jehová?

12. ¿Ndáa ki̱ʼva xínu ña̱ va̱xi nu̱ú Daniel 12:4 tiempo vitin?

¹² Jehová ni̱ka̱ʼa̱nra xíʼin ta̱ profeta Daniel ña̱ tiempo so̱ndíʼi ku̱a̱ʼání na̱ yiví nandukúna xa̱ʼa̱ ña̱ nda̱a̱, ta ku̱a̱ʼánína xa̱a̱na kunda̱a̱-inina xa̱ʼa̱ ña̱ va̱xi nu̱ú Biblia (kaʼvi Daniel 12:4). c Ta xa̱a̱ xínuva ña̱yóʼo tiempo vitin, saáchi iinlá Biblia kúú iin libro ña̱ sándaya̱ʼana ku̱a̱ʼání nu̱ú tu̱ʼun. Ta saátu na̱ ñuu Ndióxi̱ távána inkaka tutu ña̱ kána nu̱ú Biblia ta sándaya̱ʼanaña nu̱ú inkaka tu̱ʼun ta xáxanaña ku̱a̱ʼa̱nña iníísaá ñuyǐví. Na̱ ñuu Ndióxi̱ va̱ʼaní káchíñuna saáchi xa̱a̱ yáʼaka 200 nu̱ú tu̱ʼun kána ña̱ Biblia, sava ña̱yóʼo xa̱a̱ íyo inííña ta savaña káchíñukana xa̱ʼa̱ña ña̱ va̱ʼa kana inííña. Ta ndiʼi na̱ yiví na̱ íyo iníísaá ñuyǐví kivi xa̱a̱na kuumiína ña̱ Biblia yóʼo saáchi va̱ása íxi̱kóyóña. Soo inka na̱ yiví yaʼviní íxi̱kóna ña̱ Biblia. Soo miíyó na̱ ñuu Ndióxi̱ xa̱ʼa̱ ña̱ kǒo íxi̱kóyóña, ¿ndáaña va̱ʼa ndákiʼin na̱ yiví xa̱ʼa̱ ña̱yóʼo? Ku̱a̱ʼání na̱ yiví na̱ íyo iníísaá ñuyǐví xáa̱na kúnda̱a̱-inina xa̱ʼa̱ Reino Ndióxi̱ vitin tá kúma̱níka kixaa̱ ña̱ ndiʼi-xa̱ʼa̱ ñuyǐví yóʼo (Mat. 24:14). Xa̱ʼa̱ ña̱ va̱ʼaní-ini Jehová kúni̱ra ña̱ ndiʼi na̱ yiví ná kuumiína Biblia ta xa̱a̱na sakúaʼana xa̱ʼa̱ra. ¿Nda̱chun kéʼéra ña̱yóʼo? Xa̱ʼa̱ ña̱ kúʼvi̱ní-inira xínira miíyó kúú ña̱ kéʼéraña.

13. ¿Ndáa ki̱ʼva náʼa̱ Biblia ña̱ ndixaní kúʼvi̱-ini Ndióxi̱ xínira miíyó? (Juan 21:25).

¹³ Biblia káʼa̱nña ña̱ kúʼvi̱ní-ini Jehová xínira miíyó (1 Juan 4:8). Tá kúú, ná ndakanixi̱níyó xa̱ʼa̱ ña̱ʼa ña̱ ni̱ka̱ʼa̱n Ndióxi̱ nu̱ú Biblia ta saátu xa̱ʼa̱ ña̱ kǒo va̱xi nu̱úña. Nu̱ú Biblia  káʼa̱n Jehová xíʼinyó ndáaña xíniñúʼu keʼéyó ña̱ va̱ʼa kooyó migora, ña̱ va̱ʼa kusi̱í-iniyó ta saátu ni̱ʼíyó ña̱ kutakuyó ndiʼi tiempo. Soo xa̱ʼa̱ ña̱ kúni̱níra xínira miíyó kǒo níka̱ʼa̱nra xa̱ʼa̱ ku̱a̱ʼání ña̱ʼa nu̱úña, saáchi kúnda̱a̱-inira ña̱ kǒo xíniñúʼuyó ña̱yóʼo (kaʼvi Juan 21:25).

14. ¿Ndáa ki̱ʼva náʼa̱ka Biblia ña̱ kúʼvi̱ní-ini Jehová xínira miíyó?

¹⁴ Inka ki̱ʼva ña̱ náʼa̱ Jehová ña̱ kúʼvi̱ní-inira xínira miíyó kúú ña̱ viíní íyo ña̱ káʼa̱nra xíʼinyó. Kǒo iin lista va̱xi nu̱ú Biblia nu̱ú káʼa̱n Jehová xíʼinyó xa̱ʼa̱ iin tá iin ña̱ xíniñúʼu keʼéyó. Chi Jehová ta̱xira ña̱ ná ka̱ʼyi̱ ña̱ ke̱ʼé na̱ ni̱xi̱yo tiempo xi̱naʼá ña̱ va̱ʼa chindeétáʼanña xíʼinyó, saátu va̱xi profecía nu̱úña xíʼin consejo ña̱ ndáyáʼviní ña̱ va̱ʼaní chíndeétáʼan xíʼinyó ña̱ vií koo ña̱ ndaka̱xinyó keʼéyó. Ña̱yóʼo chíndeétáʼanña xíʼinyó ña̱ kuʼvi̱ní-iniyó kuniyó Jehová ta kuniso̱ʼoyó ndiʼi ña̱ káʼa̱nra.

15. a) ¿Ndáa ki̱ʼva náʼa̱ Biblia ña̱ ndáyáʼviníyó nu̱ú Jehová? b) Ñá loʼo ñá va̱xi nu̱ú na̱ʼná yóʼo, ta̱ hermano xíʼin ñá hermana ñá xa̱a̱ chée, ¿ndáa relato ña̱ va̱xi nu̱ú Biblia ndákanixi̱nína xa̱ʼa̱? (Gén. 39:1, 10-12; 2 Rey. 5:1-3; Luc. 2:25-38).

¹⁵ Biblia káʼa̱nña xíʼinyó ña̱ ndáyáʼviníyó nu̱ú Jehová. Kúnda̱a̱-iniyó xa̱ʼa̱ ña̱yóʼo saáchi nu̱ú Biblia va̱xi ku̱a̱ʼání ña̱ káʼa̱n ndáaña ndo̱ʼo na̱ yiví na̱ ni̱xi̱yo xi̱naʼá. Ta kivi xa̱a̱yó chitáʼanyó ña̱ ndóʼoyó xíʼin ña̱ ndo̱ʼo na̱ yiví yóʼo, saáchi nda̱a̱ táki̱ʼva íyo miíyó saá ni̱xi̱yona (Sant. 5:17). Tá xítoyó ndáa ki̱ʼva ke̱ʼé Jehová xíʼin na̱ yiví na̱ ni̱xi̱yo xi̱naʼá, saá kúnda̱a̱-iniyó ña̱ kúni̱ní Jehová xínira miíyó ta kúndáʼviní-inira xínira miíyó (Sant. 5:11).

16. ¿Ndáaña sákuaʼayó xa̱ʼa̱ Jehová xíʼin ña̱ ke̱ʼéra xíʼin na̱ ni̱ki̱ʼvi ku̱a̱chi tiempo xi̱naʼá? (Isaías 55:7).

¹⁶ Nu̱ú Biblia va̱xi inka ki̱ʼva ña̱ náʼa̱ Jehová ña̱ ndixaní kúʼvi̱-inira xínira miíyó. Nu̱ú tu̱ʼunra káʼa̱nña xíʼinyó ña̱ va̱ása sandákoo ndaʼa̱ra miíyó  tá ná ki̱ʼviyó iin ku̱a̱chi ndeé. Na̱ ñuu Israel ku̱a̱ʼání yichi̱ xi̱kiʼvina ku̱a̱chi nu̱ú Jehová, soo tá ndixaní xi̱ndandikó-inina Jehová xi̱ ixakáʼnu-inira xa̱ʼa̱ ku̱a̱china (kaʼvi Isaías 55:7). d Na̱ cristiano na̱ ni̱xi̱yo tá siglo nu̱ú saátu xi̱kunda̱a̱-ini na̱yóʼo ña̱ xi̱kuʼvi̱ní-ini Jehová xi̱xinirana. Tá kúú, ni̱ka̱ʼa̱nra xíʼin ta̱ apóstol Pablo ña̱ ná kaʼyíra carta ku̱ʼu̱n nu̱ú na̱ cristiano ña̱ ná ixakáʼnu-inina ta kundáʼvi-inina kunina ta̱ ta̱a ta̱ ni̱ki̱ʼvi iin ku̱a̱chi ndeé, ta̱ xa̱a̱ nda̱ndikó-ini xa̱ʼa̱ ku̱a̱chi ña̱ ni̱ki̱ʼvira (1 Cor. 5:1-5; 2 Cor. 2:6, 7). Ndákanda̱ní-iniyó tá xáa̱yó kúnda̱a̱-iniyó ña̱ va̱ása nísandákoo ndaʼa̱ Jehová na̱ ni̱ki̱ʼvi ku̱a̱chi nu̱úra tiempo xi̱naʼá. Saáchi xa̱ʼa̱ ña̱ xi̱kuʼvi̱ní-inira xi̱xinirana chi̱ndeétáʼanra xíʼinna, ta̱xira consejo ndaʼa̱na ta ta̱xi tukura ña̱ ná ndikó tukuna ndasakáʼnunara. Ña̱kán tá iin na̱ ni̱ki̱ʼvi ku̱a̱chi nu̱úra ndándikó-inina, íxakáʼnuva-inira xa̱ʼa̱ ku̱a̱china (Sant. 4:8-10).

17. ¿Nda̱chun iin regalo ña̱ ndáyáʼviní kúú Biblia?

¹⁷ Jehová ta̱xira Biblia ndaʼa̱yó ta iin regalo ña̱ ndáyáʼviní kúú ña̱yóʼo. ¿Nda̱chun ndáyáʼviníña? Saáchi nda̱a̱ táki̱ʼva íyo ña̱ xa̱a̱ sa̱kuaʼayó, ña̱ Biblia sánáʼa̱ña miíyó ña̱ va̱ʼaní íyo ndiʼi ña̱ kéʼé Ndióxi̱, ña̱ ndíchiníra ta kúʼvi̱ní-inira xínira miíyó. Ta saátu chíndeétáʼanña xíʼinyó ña̱ va̱ʼa kunda̱a̱-iniyó ndáa ki̱ʼva íyo Jehová ta xa̱a̱yó kooyó migora.

18. ¿Ndáa ki̱ʼva na̱ʼa̱yó ña̱ chíndayáʼviníyó regalo ña̱ ta̱xi Jehová ndaʼa̱yó?

¹⁸ Ná kǒo nandósóyó ña̱ iin regalo ña̱ va̱ʼaní kúú ña̱ Biblia chi mií Jehová kúú ta̱ ta̱xiña ndaʼa̱yó (Sant. 1:17). Ña̱kán ndiʼi tiempo ná taxiyó tíxa̱ʼvi ndaʼa̱ra xa̱ʼa̱ regalo yóʼo. Ta iin ki̱ʼva ña̱ na̱ʼa̱yó ña̱ táxiyó tíxa̱ʼvi ndaʼa̱ra kúú ña̱ keʼéyó oración, kaʼviyó tu̱ʼunra ta ndakanixi̱níyó xa̱ʼa̱ ña̱ káʼa̱nña. Ta tá chíka̱a̱yó ndee̱ ña̱ kaʼvi ni̱ʼiyóña, miíra chindeétáʼan xíʼinyó ña̱ xa̱a̱yó kunda̱a̱-iniyó xa̱ʼa̱ ña̱ káʼa̱nña (Prov. 2:5).