Tasaá ndeéní ni̱xa̱ku̱ndai̱ra. Kǒo níndakanixi̱níi̱ ña̱ xi̱kutóo ta̱ migo ka̱ʼa̱nra xa̱ʼa̱ religión. Tasaá ni̱nda̱ka̱tu̱ʼíi̱nra: “¿Ndáaña xíni̱ún xa̱ʼa̱ Biblia?”. Tasaá xi̱ndatu loʼo ta̱ migoi̱, ta tándi̱ na̱túʼunra xíʼi̱n xa̱ʼa̱ siʼíra ña̱ kúúñá testigo Jehová ta ñákán sa̱náʼa̱ñára xa̱ʼa̱ sava ña̱ʼa. Ta nda̱kanda̱ní-inii̱ ta xi̱kuni̱kai̱ kunda̱a̱-inii̱ xa̱ʼa̱ ña̱yóʼo, ña̱kán ni̱ka̱ʼi̱n xíʼinra ña̱ ná natúʼunkara xíʼi̱n xa̱ʼa̱ ña̱yóʼo.

Ku̱a̱ʼání hora na̱túʼunndi̱ ñuú saá. Ta̱ migoi̱ ni̱ka̱ʼa̱nra xíʼi̱n ña̱ ta̱ Ndi̱va̱ʼa kúú ta̱ xáʼndachíñu ñuyǐví yóʼo káchi Biblia (Juan 14:30). Sana yóʼó xa̱a̱ xíni̱vaún xa̱ʼa̱ ña̱yóʼo, soo nu̱ú miíi̱ iin ña̱ xa̱áva xi̱kuu ña̱yóʼo tá tiempo saá ta xi̱kuni̱níi̱ kunda̱a̱-inii̱ xa̱ʼa̱ña. Xi̱xiniso̱ʼi̱ ña̱ xi̱ka̱ʼa̱nna ña̱ Ndióxi̱ kúú ta̱ xáʼndachíñu ñuyǐví yóʼo. Soo xíʼin ndiʼi ña̱ʼa ña̱ xi̱xitoi̱ xi̱xika-inii̱ á ndixa Ndióxi̱ kúú ta̱ ndísochíñu xíʼin ñuyǐví yóʼo. Tiempo saá 26 ku̱i̱ya̱ xi̱kuumiíi̱, soo ku̱a̱ʼání ña̱ʼa ña̱ va̱ása va̱ʼa xi̱xitoi̱.

Avión tú xi̱xika nu̱ú ku̱a̱chi xi̱kava yivái̱ chí Estados Unidos. Ña̱kán nda̱a̱ tá loʼovíi̱ xi̱kunda̱a̱-inii̱ ña̱ iin kama koo iin guerra nu̱ú sákaʼndina bomba. Ta na̱ soldado ni̱xi̱yo tu̱ʼvavana ña̱ sakáʼndina bomba. Tá xi̱ndika̱i̱ universidad chí California su̱ví tiempo va̱ʼa níxi̱yoña, saáchi ndiʼi tiempo ni̱xi̱yo guerra chí Vietnam. Ndiʼi ndi̱ʼi̱ na̱ xi̱kaʼvi escuela xi̱xa̱ʼa̱nndi̱ marcha ta na̱ policía xi̱taxína ndi̱ʼi̱ xíʼin yitu̱n, ta nda̱a̱ xi̱kuni̱ndi̱ kuvindi̱ xa̱ʼa̱ ña̱ gas ña̱ xi̱chika̱a̱na sa̱tándi̱. Yo̱ʼvi̱ní ni̱xi̱yo tiempo saá, xi̱xaʼnína na̱ chíñu, xi̱keʼéna marcha xi̱kanitáʼanna ta ndiʼi na̱ yiví va̱ása vií níxi̱kitáʼanna. Ta yi̱ʼi̱ va̱ása níxi̱kunda̱a̱-inii̱ ndáaña keʼíi̱.

Tá ku̱i̱ya̱ 1970 ni̱xa̱ʼi̱n ka̱chíñui̱ chí norte ña̱ Alaska, ta kán ku̱a̱ʼání xu̱ʼún xi̱kiʼi̱n. Tándi̱ʼi, saá ni̱xa̱ʼi̱n chí Londres (Inglaterra), ta sa̱tái̱ iin moto ta ke̱i̱ ku̱a̱ʼi̱n chí sur ña̱ ñuu kán, soo kǒo níndakanixi̱níi̱ ndáa mií kúni̱ ku̱ʼi̱n. Tá ni̱ya̱ʼa loʼo yo̱o̱ saá ni̱xa̱i̱ chí África. Ta ku̱a̱ʼání na̱ yiví xi̱nitáʼi̱n xíʼin chí yichi̱, na̱ xi̱ndakanixi̱ní táki̱ʼva xi̱ndakanixi̱ní yi̱ʼi̱, na̱ kǒo níxi̱kuni̱ ña̱ koo ku̱a̱chi.

Ndiʼi ña̱ xi̱nii̱ xíʼin ña̱ xi̱niso̱ʼi̱ chi̱ndeétáʼanña xíʼi̱n ña̱ kunda̱a̱-inii̱ ña̱ nda̱a̱ kúú ña̱ káʼa̱n ña̱ Biblia, ña̱ ta̱ Ndi̱va̱ʼa kúú ta̱ xáʼndachíñu ñuyǐví yóʼo. Soo xi̱kuni̱i̱ kunda̱a̱-inii̱ ndáaña kúú ña̱ kéʼé Ndióxi̱.

 Tá ni̱ya̱ʼa loʼo yo̱o̱ ni̱xa̱i̱ ku̱ndaa̱-inii̱ xa̱ʼa̱ ña̱yóʼo. Ta tá ni̱ya̱ʼa ku̱i̱ya̱ xi̱nitáʼi̱n xíʼin ku̱a̱ʼá na̱ hermano xíʼin ná hermana ta ni̱xa̱i̱ ni̱kuʼvi̱-inii̱ xi̱nii̱ na̱yóʼo, saáchi ni ku̱a̱ʼání nu̱ú tu̱ndóʼo ni̱ya̱ʼana nda̱kúní ni̱xi̱yo inina xíʼin Ndióxi̱.

Tá ndi̱kói̱ chí Londres, na̱ndukúi̱ siʼí ta̱ migoi̱ ta ñákán ta̱xiñá iin Biblia ndaʼíi̱. Tá ni̱ya̱ʼa tiempo saá nda̱kiʼi̱n ku̱a̱ʼi̱n chí Ámsterdam (Países Bajos). Iin ki̱vi̱ tá íyoi̱ káʼvii̱ Biblia chí calle xa̱ʼa̱ iin poste, ni̱ya̱ʼa iin ta̱ hermano ta ni̱ka̱ʼa̱nra xíʼi̱n á kivi ndakanira nu̱úi̱ xa̱ʼa̱ ña̱ káʼvii̱. Ta tá xa̱a̱ íyoi̱ chí Dublín (Irlanda), ni̱xa̱ʼi̱n Betel na̱ testigo Jehová. Ta kán xi̱nitáʼi̱n xíʼin iin ta̱ hermano, ta̱ Arthur Matthews, ta̱ xa̱a̱ ku̱a̱ʼání ku̱i̱ya̱ ndíkaa̱ ti̱xin ñuu Jehová. Ni̱ka̱ʼi̱n xíʼinra ña̱ kúni̱kai̱ sakúaʼi̱ xa̱ʼa̱ Biblia ta ta̱kán ni̱ka̱ʼa̱nra xíʼi̱n ña̱ sanáʼa̱ra yi̱ʼi̱.

Xi̱kutói̱ ña̱ xi̱sakúaʼi̱ ña̱kán xi̱kaʼvii̱ ndiʼi tutu ña̱ xi̱tavá na̱ ñuu Ndióxi̱ ta saátu xi̱kaʼvii̱ Biblia. Xi̱ndakanda̱ní-inii̱ xíʼin ña̱ xi̱xitoi̱ ti̱xin reunión, chi nda̱a̱ na̱ va̱lí xi̱xini̱ xa̱ʼa̱ ña̱ʼa ña̱ kǒo xíni̱ na̱ ndíchi na̱ íyo ñuyǐví yóʼo. Tá kúú, ¿nda̱chun íyoní ña̱ kini ñuyǐví yóʼo?, ¿ndáa ta̱ kúú Ndióxi̱? Ta, ¿ndáaña ndóʼoyó tá xíʼi̱yó? Nda̱saa na̱ testigo kúú na̱ xi̱kitáʼi̱n xíʼin, saáchi kǒo nda̱a̱ ni iin na̱ yiví níxi̱xinii̱ país yóʼo. Na̱kán chi̱ndeétáʼanna xíʼi̱n ña̱ xa̱i̱ kuʼvi̱-inii̱ kunii̱ Jehová ta kachíñui̱ nu̱úra.

Tá ku̱i̱ya̱ 1972 nda̱kuchii̱. Tá ni̱ya̱ʼa iin ku̱i̱ya̱ saá ni̱xa̱i̱ ku̱i̱ precursor ta na̱samai̱ iin congregación ña̱ loʼo chí Newry (Irlanda del Norte). Xichaʼvii̱ xa̱ʼa̱ iin veʼe loʼo ña̱ yu̱u̱ ña̱ xi̱ndichi chí yuku̱ ta kán ni̱xi̱yoi̱. Yatin kán ni̱xi̱yo ku̱a̱ʼání si̱ndi̱ki̱ ta nu̱ú tíkán xi̱xaʼi̱n xi̱sakúaʼi̱ discursoi̱ nani xíxaʼa̱nrí. Xi̱na̱ʼa̱ ña̱ xi̱xiniso̱ʼovarí yi̱ʼi̱. Á va̱ʼaví iin mu̱u loʼo níxi̱ka̱ʼa̱nrí xíʼi̱n, soo kǒo ña̱ʼa níxi̱ka̱ʼa̱nvírí xíʼi̱n. Soo ña̱yóʼo xi̱chindeétáʼanníña xíʼi̱n tá xi̱taxii̱ discurso nu̱ú na̱ hermano. Tá ku̱i̱ya̱ 1974 ni̱xa̱i̱ ku̱i̱ precursor especial ta ta̱ hermano ta̱ xi̱chindeétáʼan xíʼi̱n ña̱ natúʼi̱n xa̱ʼa̱ Ndióxi̱ xi̱kuu ta̱ Nigel Pitt, ta nda̱a̱ vitin va̱ʼaní kúúndi̱ migo.

Tiempo saá ni̱xi̱yoní ku̱a̱chi chí Irlanda del Norte ta sava na̱ yiví nda̱a̱ xi̱ka̱ʼa̱nna ña̱ xi̱kuuña “ñuu nu̱ú íyoní bomba xíʼin ka̱a tu̱xi̱í”, chi ndiʼi tiempo xi̱kanitáʼanna ñuu yóʼo. Xi̱kinína na̱ yiví, xi̱kanitáʼanna chí calle ta xi̱sakáʼndina bomba. Ndiʼi ku̱a̱chi yóʼo xi̱kuuña xa̱ʼa̱ ku̱a̱chi ña̱ xi̱kuumií na̱ veʼe-ñu̱ʼu xíʼin na̱ chíñu. Soo xa̱ʼa̱ ña̱ xi̱xini̱ na̱ yiví ña̱ kǒo kíʼvi na̱ testigo Jehová xíʼin ña̱ política, va̱ʼa xi̱natúʼunndi̱ xíʼin na̱ yiví veʼe tá veʼe. Sava yichi̱ xi̱ka̱ʼa̱n na̱ yiví xíʼinndi̱ ña̱ ná kǒo ku̱ʼu̱nndi̱ natúʼunndi̱ xíʼin na̱ yiví xa̱ʼa̱ Ndióxi̱ sava lugar ta ndáa hora kǒo xíniñúʼu ku̱ʼu̱nndi̱ chi kuu iin ña̱ va̱ása va̱’a lugar kán.

 Soo ni saá xi̱yaʼavandi̱ nu̱ú tu̱ndóʼo. Tá kúú, iin ki̱vi̱ tá ni̱xa̱ʼi̱n xíʼin ta̱ Dennis Carrigan ta xi̱kuu precursor, ña̱ natúʼunndi̱ xa̱ʼa̱ Ndióxi̱ iin ñuu nu̱ú kǒo na̱ testigo íyo ta sa̱kán iin yichi̱ kuitíva ni̱xa̱ʼa̱nndi̱. Iin ñaʼá ñá íyo ñuu kán chi̱kaa̱ñá ku̱a̱chi sa̱tándi̱, ni̱ka̱ʼa̱nña ña̱ kúúndi̱ soldado británico na̱ ni̱xa̱a̱ xíto se̱ʼe ñuu kán. Sana chi̱kaa̱ñá ku̱a̱chi sa̱tándi̱ saáchi kǒo níxi̱ka̱ʼa̱nndi̱ táki̱ʼva káʼa̱n na̱ irlandés. Ni̱yi̱ʼvíníndi̱ xa̱ʼa̱ ña̱yóʼo, saáchi ni va̱ʼaní ná ka̱ʼa̱nndi̱ xíʼi̱n na̱ soldado kivi kaʼnívana ndi̱ʼi̱. Ta tá ndóondi̱ ndátundi̱ autobús, ki̱xaa̱ iin carro chí nu̱ú xi̱ndoondi̱ xi̱ʼindi̱ café, nu̱ú chi̱kaa̱ ñá ñaʼá kán ku̱a̱chi sa̱tándi̱. Tasaá ki̱tañá ta nda̱kiʼinñá na̱ ta̱a kán ta ni̱ka̱ʼa̱nña xíʼinna ndáa mií ndóondi̱. Tasaá ki̱xaa̱ na̱ ta̱a kán nda̱a̱ nu̱ú ndóondi̱ ndátundi̱ tú autobús ta ni̱nda̱ka̱tu̱ʼunna ndi̱ʼi̱ ndáa hora ya̱ʼanú. Tá ki̱xaa̱ tú autobús kán na̱ ta̱a kán ni̱ka̱ʼa̱nna xíʼin ta̱ kávanú soo kǒo níxiniso̱ʼondi̱ ña̱ ni̱ka̱ʼa̱nna xíʼinra. Nda̱saa ndi̱ʼi̱ kúú na̱ ni̱xa̱ʼa̱n xíʼin tú autobús kán ta xi̱yiʼvíndi̱ ña̱ tavána ndi̱ʼi̱ ña̱ ñuu kán ta kaʼnína ndi̱ʼi̱, soo kǒo ña̱ níkuuví. Tá nu̱ui̱ tú autobús kán saá ni̱nda̱ka̱tu̱ʼíi̱n ta kávanú ndáaña xi̱kuni̱ na̱ ta̱a kán. Ta ta̱kán ni̱ka̱ʼa̱nra xíʼi̱n: “Va̱ása kundi̱ʼi̱-inindó chi ni̱ka̱ʼa̱nvai̱ xíʼinna ndáana kúúndó, kǒo ña̱ kundoʼondó”.

Tá ku̱i̱ya̱ 1976 ni̱xi̱yo iin asamblea ña̱ distrito a chí Dublín, kán xi̱nitáʼi̱n xíʼin ñá Pauline Lomax. Ñáyóʼo precursora especial xi̱kuuñá chí Inglaterra ta ni̱xa̱a̱ñá asamblea kán. Liviníñá ta va̱ʼaní xi̱kachíñuñá nu̱ú Jehová ta vitání ni̱xi̱yo-iniñá. Miíñá xíʼin ki̱ʼvañá ta̱ naní Ray, nda̱a̱ tá valívína xíni̱na xa̱ʼa̱ Jehová. Tá ni̱ya̱ʼa iin ku̱i̱ya̱ saá ti̱ndaʼíi̱ xíʼin ñá Pauline, ta xi̱kuundi̱ precursor especial chí Ballymena (Irlanda del Norte).

Ni̱xi̱yo iin tiempo ña̱ xi̱kui̱ superintendente ña̱ circuito chí Belfast, Londonderry xíʼin inkaka lugar nu̱ú i̱yoní ni̱xi̱yo. Xi̱ndakanda̱ní-inindi̱ ña̱ va̱ʼaní xi̱kandíxa na̱ hermano kán Jehová chi sa̱ndákoona ndiʼi ña̱ xi̱keʼéna ti̱xin veʼe-ñu̱ʼu vatá ta ki̱xáʼana ndásakáʼnuna Jehová. Ta ki̱xáʼana kúʼvi̱ní-inina xínina na̱ yiví ta va̱ása kúndasíkanana. Xi̱chindeétáʼanní Jehová xíʼin na̱ hermano kán ta xi̱ndaarana.

U̱xu̱ ku̱i̱ya̱ xi̱ndoondi̱ chí Irlanda. Tá ku̱i̱ya̱ 1981 ka̱nana ndi̱ʼi̱ ña̱ ku̱ʼu̱nndi̱ clase 72 ña̱ Galaad. Tá sa̱ndíʼindi̱ ña̱ escuela kán, saá chi̱ndaʼána ndi̱ʼi̱ chí Sierra Leona (África Occidental).

U̱xu̱ iin xi̱kuu ndi̱ʼi̱ na̱ misionero na̱ xi̱ndoo iin veʼe. Ini veʼe kán ni̱xi̱yo iin cocina, u̱ni̱ baño u̱vi̱ nu̱ú xi̱chichindi̱, iin teléfono, iin tú xi̱ndakata ti̱ko̱to̱ ta saátu ni̱xi̱yo iin tú sáyi̱chi̱ña á xi̱sandáyaaña. Xi̱xa̱ʼa̱nní luz ta chí xi̱ní veʼe nu̱ú ni̱xi̱yondi̱ ni̱xi̱yoní ti̱ín ta saátu ni̱xi̱yoní cobra chí xa̱ʼa̱ veʼendi̱.

Ni va̱ása viíníví níxi̱yo nu̱ú xi̱ndoondi̱ kán, soo xi̱kusi̱íní-inindi̱ xi̱natúʼunndi̱ xa̱ʼa̱ Jehová. Na̱ yiví kán xi̱ ixato̱ʼónína ña̱ káʼa̱n Biblia ta va̱ʼaní xi̱xiniso̱ʼona ndi̱ʼi̱. Ku̱a̱ʼání na̱ xi̱kaʼvindi̱ xíʼin ni̱xa̱a̱na ku̱una testigo Jehová. Na̱ yiví kán “táta Robert” xi̱ka̱ʼa̱nna xíʼi̱n ta ñá Pauline, “nána Robert” xi̱ka̱ʼa̱nna xíʼinñá. Soo tándi̱ʼi, ki̱xáʼíi̱ káchíñui̱ xíʼin na̱ Betel ta si̱lóʼoní ki̱vi̱ xi̱kei̱ xi̱natúʼi̱n xa̱ʼa̱ Ndióxi̱. Tasaá ki̱xáʼana káʼa̱nna xíʼin ñá Pauline “nána Pauline” ta yi̱ʼi̱ xi̱ka̱ʼa̱nna xíʼin “táta Pauline”. Ta xi̱kusi̱íva-ini ñá Pauline xíʼin ña̱yóʼo.

Ku̱a̱ʼání na̱ hermano kán na̱ nda̱ʼvíva xi̱kuuna, soo Jehová xi̱taxira ña̱ xi̱xiniñúʼuna ta nda̱a̱ xi̱ndakanda̱-inina ndáa ki̱ʼva xi̱taxiraña ndaʼa̱na (Mat. 6:33). Ndákaʼíi̱n xa̱ʼa̱ ña̱ ke̱ʼé iin ñá hermana. Nda̱saa xu̱ʼún ña̱ satáñá ña̱ kuxuñá xíʼin na̱ va̱lí se̱ʼeñá kúú ña̱ kúúmiíña ki̱vi̱ saá, soo ta̱xiñá ndiʼi  ña̱yóʼo ndaʼa̱ iin ta̱ hermano ta̱ xi̱xiniñúʼu ta̱tán xíʼin kue̱ʼe̱ ña̱ malaria. Soo mií ki̱vi̱ saá ni̱xa̱a̱ iin ñá nána veʼe ñá hermana kán ta ni̱ka̱ʼa̱nñá xíʼinñá ña̱ chaʼviñañá tá ná ndachuʼunñá xi̱níñá, tasaá ku̱uva. Ku̱a̱ʼání yichi̱ xi̱chindeétáʼan Jehová xíʼin na̱ hermano kán.

I̱i̱n ku̱i̱ya̱ xi̱ndoondi̱ chí Sierra Leona. Soo tándi̱ʼi, chi̱ndaʼána ndi̱ʼi̱ ku̱a̱ʼa̱nndi̱ iin Betel ña̱ káʼnuní ña̱ ndíkaa̱ chí Nigeria. Suvi chiñu ña̱ xi̱keʼíi̱ chí Sierra Leona kúú ña̱ xi̱keʼíi̱ yóʼo, soo ñá Pauline inkava chiñu ki̱xáʼañá kéʼéñá ta xi̱ ixayo̱ʼvi̱ loʼoña xíʼinñá. Ñáyóʼo 130 hora xi̱natúʼunñá xíʼin na̱ yiví xa̱ʼa̱ Ndióxi̱ yo̱o̱ tá yo̱o̱ ta xi̱kaʼviñá xíʼinna, soo vitin ini iin veʼeva ndíkaa̱ñá ta sándaʼañá ti̱ko̱to̱ ti̱xin Betel. Tá xa̱ʼa̱ xi̱ ixayo̱ʼvi̱vaña xíʼinñá ka̱anñá, soo tándi̱ʼi xi̱kiʼinñá kuenta ña̱ xi̱taxiníva na̱ hermano kán tíxa̱ʼvi ndaʼa̱ñá xa̱ʼa̱ ña̱ xi̱keʼéñá. Xa̱ʼa̱ ña̱kán ki̱xáʼañá chíkaa̱ñá ndee̱ xíʼin inka na̱ hermano na̱ xi̱ñuʼu kán.

Síínva costumbre kúúmiína chí Nigeria, ta xi̱niñúʼu sakúaʼandi̱ ña̱yóʼo. Ndákaʼíi̱n ña̱ ni̱xa̱a̱ iin ta̱ hermano oficina nu̱ú xi̱kachíñui̱ ta ndákara iin ñá hermana ni̱xa̱a̱ra. Ñákán ñá sa̱kán ni̱xa̱a̱ Betel kúúñá, ta sa̱ndákai̱ ndaʼíi̱ ña̱ chindeéi̱ñá soo ñákán xi̱ku̱xítíñá nu̱úi̱. Ta Nda̱kanda̱ní-inii̱, tasaá kama nda̱kaʼíi̱n ña̱ káʼa̱n Hechos 10:25, 26 xíʼin Apocalipsis 19:10. Ta xi̱kuni̱ ka̱ʼi̱n xíʼinñá xa̱ʼa̱ ña̱yóʼo. Soo tándi̱ʼi, ndakanixi̱níi̱: “Tá ka̱nanañá ña̱ ki̱xaa̱ñá Betel yóʼo, sana xa̱a̱ kúnda̱a̱va-iniñá ña̱ káʼa̱n Biblia xa̱ʼa̱ ña̱yóʼo”.

Ni̱ndi̱ʼi loʼo inii̱ soo va̱ʼaníva na̱túʼunndi̱, tándi̱ʼi saá na̱ndukúi̱ xa̱ʼa̱ costumbre kán. Ta ku̱ndaa̱-inii̱ ña̱ saá kéʼévana tá chíndeéna iin na̱ yiví iin táʼví país kán. Ta su̱ví nda̱saa ná ñaʼá xi̱keʼé ña̱yóʼo, chi saátu xi̱keʼé na̱ ta̱ava. Tá xi̱kuxítína nu̱ú iin na̱ yiví, saá xi̱na̱ʼa̱na ña̱ xi̱ ixato̱ʼónana ta va̱ása níxi̱ke̱ʼénaña xa̱ʼa̱ ña̱ xi̱kuni̱na ndasakáʼnuna iin na̱ yiví. Ta Biblia káʼa̱nña xa̱ʼa̱ sava na̱ xi̱keʼé saá (1 Sam. 24:8). Va̱ʼaníva ke̱ʼíi̱ ña̱ kǒo níka̱ʼi̱n iin ña̱ kivi sandákava-ini ñá hermana kán.

Xi̱nitáʼanndi̱ xíʼin ku̱a̱ʼání na̱ hermano na̱ va̱ʼaní xi̱kandíxa Ndióxi̱ chí Nigeria. Iin na̱ hermano yóʼo kúú ta̱ Isaiah Adagbona. b Nda̱a̱ tá loʼovíra ni̱xa̱a̱ra ku̱ndaa̱-inira xa̱ʼa̱ Jehová, soo tándi̱ʼi ki̱ʼinra  kue̱ʼe̱ lepra. Ta chi̱ndaʼánara ku̱a̱ʼa̱nra koora nu̱ú ndóo na̱ kúúmií kue̱ʼe̱ yóʼo ta iinlá miíra xi̱kuu testigo Jehová kán. Ni xi̱sanina nu̱úra ña̱ natúʼunra xa̱ʼa̱ tu̱ʼun Ndióxi̱, chi̱ndeétáʼanra xíʼin yáʼaka 30 na̱ kúúmií lepra ña̱ xa̱a̱na koona testigo Jehová, tasaá ki̱xáʼa íyo iin congregación kán.

Tá ku̱i̱ya̱ 1996 chi̱ndaʼána ndi̱ʼi̱ ku̱a̱ʼa̱nndi̱ chí Betel ña̱ Kenia. Ta xa̱a̱ naʼáníva ta̱ʼán ndikóndi̱ chí yóʼo, ta ña̱yóʼo kúú ñuu ña̱ natúʼi̱n xíʼinndó tá xa̱ʼa̱. Ti̱xin Betel yóʼo xi̱xaa̱ní kití tí xi̱xito ndi̱ʼi̱: Ta iin tíyóʼo xi̱kuu tí mono cercopiteco verde. Tí mono yóʼo xi̱ ixakuíʼnárí ña̱ xi̱xaxí ná hermana. Iin ki̱vi̱, xu̱ná ñá hermana ventana veʼe nu̱ú ni̱xi̱yoñá ta tá ndi̱kóñá iin chútú mono ini veʼeñá ta kúsi̱íkaví-inirí xíʼin ku̱i̱ʼi ña̱ íyo kán. Ni̱yi̱ʼvíníñá ta ndeéní ni̱nda̱ʼyi̱ kóʼóñá ta ki̱tañá ini veʼe kán. Saátu tí mono kán ndeéní ni̱yi̱ʼvírí ta ni̱nda̱ʼyi̱ kóʼórí ta xi̱nurí ku̱a̱ʼa̱nrí.

Ni̱ka̱ʼa̱nna xíʼin ñá síʼíi̱ xíʼin yi̱ʼi̱ ña̱ ná ku̱ʼu̱nndi̱ chindeétáʼanndi̱ xíʼin iin congregación nu̱ún káʼa̱nna tu̱ʼun suajili. Ta tá ni̱ya̱ʼa tiempo, ni̱ka̱ʼa̱nna xíʼi̱n ña̱ ná taxii̱ Estudio de Libro de Congregación (tiempo vitin naníña Estudio ña̱ congregación) Soo mií ña̱ nda̱a̱ va̱ása níxi̱kuchiñui̱ ka̱ʼi̱n ña̱ tu̱ʼun kán, xa̱ʼa̱ ña̱kán xi̱ ixayo̱ʼvi̱níña xíʼi̱n. Soo ya̱chi̱ka xi̱kaʼvi kúei̱ ña̱ va̱ʼa kunda̱a̱-inii̱ ndáa ki̱ʼva keʼíi̱ pregunta xíʼin na̱ hermano. Tá va̱ása níxi̱ndakuiinna ña̱ va̱xi nu̱ú libro, va̱ása níxi̱kunda̱a̱ka-inii̱ ndáaña ka̱ʼa̱nkai̱ xíʼinna. Ta xa̱ʼa̱ ña̱yóʼo xi̱ndi̱ʼi̱ní-inii̱ ta va̱ása níxi̱kunda̱a̱ka-inii̱ ndáa ki̱ʼva chindeétáʼi̱n xíʼin na̱ hermano. Xi̱ndakanda̱ní-inii̱ ña̱ vitání ni̱xi̱yo-ini na̱ hermano ta saátu va̱ʼaní chi̱ndeétáʼanna xíʼi̱n.

Ni iin ku̱i̱ya̱ va̱ása níxi̱yondi̱ chí Kenia. Saáchi tá ku̱i̱ya̱ 1997 ni̱ka̱ʼa̱nna xíʼinndi̱ ña̱ ku̱ʼu̱nndi̱ Betel ña̱ Brooklyn (Nueva York). Iin país ña̱ kúíkání kúú ña̱yóʼo, xa̱ʼa̱ ña̱kán kivi ixayo̱ʼvi̱ña xíʼinndi̱ (Prov. 30:8, 9). Soo na̱ hermano na̱ íyo país yóʼo nda̱kúní íyo inina xíʼin Ndióxi̱. Saáchi va̱ása xíniñúʼuna tiempona xíʼin ña̱ kúúmiína ña̱ koona na̱ yiví kúíká, chi xíniñúʼunaña ña̱ va̱ʼa chindeétáʼana xíʼin na̱ ñuu Ndióxi̱.

Ndiʼi tiempo ña̱ ni̱xi̱kandi̱ país yóʼo ki̱ʼinndi̱ kuenta ña̱ kándíxaní na̱ hermano Ndióxi̱ ni xa̱a̱ síín síín ña̱ yáʼana nu̱ú. Tá kúú, chí Irlanda ni íyoní ku̱a̱chi nda̱kúní íyo ini na̱ hermano xíʼin Ndióxi̱, chí África ni íyoní ña̱ ndáʼvi ta xíkaní ndóona soo kándíxanína Ndióxi̱, ta na̱ hermano na̱ íyo Estados Unidos, nda̱kúní-inina xíʼin Ndióxi̱ ni iin país ña̱ kúíkání kúú ña̱ ndóona. Ta tá xíto Jehová ña̱ kúʼvi̱ní-ini na̱ hermano yóʼo xíninara, ni xa̱a̱ síín síín ña̱ yáʼana nu̱ú kúsi̱íní-inira xíʼin ña̱ kéʼéna.

Kamaní ni̱ya̱ʼa tiempo nda̱a̱ táki̱ʼva íyo ña̱ káʼa̱n Job 7:6. Vitin káchíñundi̱ chí central mundial ña̱ Warwick (Nueva York), ta kúsi̱íní-inindi̱ ña̱ inkáchi káchíñundi̱ xíʼin na̱ hermano na̱ íyo yóʼo. Kúsi̱íní-inindi̱ ña̱ chíndeétáʼanndi̱ xíʼin ta̱ kúú Rey Jesucristo, ta̱yóʼo si̱lóʼoní kúma̱ní ta taxira ku̱a̱ʼání ña̱ va̱ʼa ndaʼa̱ na̱ nda̱kúní íyo ini xíʼin Ndióxi̱ (Mat. 25:34).