Xi̱nina ña̱ ndixaní kúʼvi̱-inina xíninana
ÑÁ YOMARA, ki̱ʼvañá ta̱ Marcelo xíʼin ta̱ Hiver, íyona iin ñuu loʼo chí Guatemala ta na̱ kúáa kúúna. Ñá Yomara ki̱xáʼaña káʼviñá Biblia xíʼin na̱ testigo Jehová ta tá ni̱ya̱ʼa tiempo u̱vi̱ saá na̱ ki̱ʼvañá ki̱xáʼana sákuaʼana xa̱ʼa̱ Jehová. Soo i̱xayo̱ʼvi̱ña xíʼinna kaʼvina tu̱ʼun braille. Ña̱kán ta̱ xi̱sanáʼa̱-ñaʼá xi̱niñúʼu kaʼvira párrafo nu̱úna ta kaʼvira texto nu̱úna.
Xi̱ ixayo̱ʼvi̱níña xíʼinna ku̱ʼu̱nna reunión. Saáchi ki̱ʼva 40 minuto xi̱kindo̱o salón nu̱ú xi̱xiniñúʼu ndatakana. Ta na̱yóʼo va̱ása kivi ku̱ʼu̱n miína nda̱a̱ kán. Ña̱kán, na̱ hermano na̱ congregación xa̱a̱ síín síínna xi̱xa̱ʼa̱n xi̱ndakiʼin-ñaʼá ña̱ ku̱ʼu̱nna reunión. Tá ki̱xáʼa u̱ni̱ saána yáʼana ti̱xin reunión ña̱ ma̱ʼñú semana, na̱ hermano chi̱ndeétáʼanna xíʼinna ña̱ sakúaʼa xíʼin xi̱nína ndáaña ka̱ʼa̱nna tá ná ya̱ʼana ti̱xin reunión.
Tá mayo ña̱ ku̱i̱ya̱ 2019, na̱ testigo Jehová ki̱xáʼana ndáku̱táʼanna ña̱ va̱ʼa koo reunión ñuu kán, ta iin matrimonio na̱ kúú precursor regular ni̱xa̱a̱na ñuu kán. Ta na̱ hermano yóʼo ni va̱ása níxi̱xini̱na kaʼyína á taana ña̱ tu̱ʼun braille, soo chi̱kaa̱na ndee̱ ña̱ sanáʼa̱na u̱ni̱ saá na̱ hermano yóʼo. Ña̱kán ni̱xa̱ʼa̱nna biblioteca ña̱ va̱ʼa sakúaʼana kaʼvina ña̱ braille tasaá va̱ʼaní sanáʼa̱na inkana.
Ta̱ Marcelo táxira comentario ti̱xin reunión.
Sa̱kán loʼo kuití yo̱o̱ ni̱ya̱ʼa ta u̱ni̱ saá na̱ hermano yóʼo va̱ʼaní ki̱xáʼana káʼvina tu̱ʼun braille, ta ña̱yóʼo chi̱ndeétáʼan xíʼinna ña̱ kamaní ki̱xáʼana káchíñuna nu̱ú Ndióxi̱. a Vitin ñá Yomara xíʼin ta̱ Hiver kúúna precursor regular ta ta̱ Marcelo kúúra siervo ministerial ta saátu kúúra precursor regular. Ku̱a̱ʼání hora káchíñuna nu̱ú Jehová semana tá semana. Ta xa̱ʼa̱ ña̱ kúsi̱íní-inina káchíñuna nu̱ú Ndióxi̱, nda̱a̱ inkana kúni̱ keʼé chiñu yóʼo.
U̱ni̱ saá na̱ hermano yóʼo táxinína tíxa̱ʼvi ndaʼa̱ na̱ congregación xa̱ʼa̱ ña̱ va̱ʼaní chíndeétáʼanna xíʼinna xíʼin ña̱ náʼa̱na ña̱ kúʼvi̱ní-inina xíninana. Ñá Yomara káchiñá: “Ña̱ ki̱vi̱ nu̱ú ña̱ xi̱nitáʼanndi̱ xíʼin na̱ hermano ni̱na̱ʼa̱na ña̱ ndixaní kúʼvi̱-inina xínina ndi̱ʼi̱”. Ta ta̱ Marcelo káchira: “Va̱ʼaní migo kúúmiíndi̱ ti̱xin congregación ta nda̱a̱ táki̱ʼva íyo na̱ veʼendi̱ saá íyo ndiʼi na̱ hermano chi kúʼvi̱ní-inina xínina ndi̱ʼi̱”. Ñá Yomara xíʼin na̱ ki̱ʼvañá kúni̱nína ña̱ ná kixaa̱ ki̱vi̱ ña̱ kunina ña̱ ndasalivi Ndióxi̱ nu̱ú ñuʼú yóʼo (Sal. 37:10, 11; Is. 35:5).
a Folleto ña̱ naní Aprenda a leer braille ku̱vaʼaña ña̱ va̱ʼa chindeétáʼanña xíʼin na̱ yiví kúáa á na̱ íxayo̱ʼvi̱ña xíʼin ña̱ kotona. Folleto yóʼo va̱ʼaní chindeétáʼanña xíʼinna ña̱ sakúaʼana kaʼvina xíʼin ña̱ kaʼyína ña̱ tu̱ʼun braille.
