1. ¿Ndáaña xa̱a̱ kéʼé ku̱a̱ʼání na̱ ndásakáʼnu Jehová?

 NU̱Ú miíún, ¿á ndáyáʼvi ña̱ kítáʼún xíʼin Jehová? Sana ndáyáʼvivaña nu̱ún, ta su̱ví iinlá yóʼó kúú na̱ kéʼé saá. Saáchi ku̱a̱ʼání na̱ yiví náʼa̱na ña̱ ndáyáʼviní ña̱ kítáʼanna xíʼin Jehová (Sal. 104:​33, 34). Ku̱a̱ʼánína xa̱a̱ ke̱ʼéna sacrificio xa̱ʼa̱ Jehová, tá kúú na̱ nazareo na̱ ni̱xi̱yo ñuu Israel. Soo, ¿ndáana xi̱kuu na̱yóʼo? Ta, ¿ndáaña sakúaʼayó xíʼin ña̱ ke̱ʼéna?

2. a) ¿Ndáana xi̱kuu na̱ nazareo? (Números 6:​1, 2). b) ¿Nda̱chun xi̱ndaka̱xin sava na̱ israelita koona nazareo?

² Tu̱ʼun nazareo ka̱naña ti̱xin iin tu̱ʼun hebreo ña̱ kúni̱ kachi “síín íyona nu̱ú inkana” “nda̱taxina miína ndaʼa̱ Ndióxi̱”. Tu̱ʼun yóʼo va̱ʼaní kítáʼanña xíʼin ña̱ xi̱keʼé sava na̱ ñuu Israel, na̱ xi̱ndaka̱xin koo nazareo. a Ley ña̱ ka̱ʼyí ta̱ Moisés xi̱kaʼa̱nña ña̱ iin ta̱a á iin ñaʼá va̱ʼa ndaka̱xinna koona nazareo loʼo tiempo, ta saxínuna ña̱ ki̱ndoona keʼéna nu̱ú Jehová (kaʼvi Números 6:​1, 2). b Na̱ xi̱ndaka̱xin koo nazareo, ni̱xi̱yo sava ña̱ kivi keʼéna ta ni̱xi̱yotu ña̱ va̱ása níxi̱kivi keʼéna. Tá saá, ¿nda̱chun xi̱ndaka̱xinna ña̱ koona nazareo? Xa̱ʼa̱ ña̱ xi̱kuʼvi̱-inina xi̱xinina Jehová kúú ña̱ xi̱keʼénaña chi xi̱kuni̱na taxina  tíxa̱ʼvi ndaʼa̱ra xa̱ʼa̱ ndiʼi ña̱ va̱ʼa ña̱ xi̱taxira ndaʼa̱na (Deut. 6:5; 16:17).

3. ¿Ndáa ki̱ʼva kítáʼan ña̱ kéʼéyó xíʼin ña̱ ke̱ʼé na̱ nazareo?

³ Tá ki̱xáʼa “ley ta̱ Cristo” saá kúú ña̱ va̱ása níxiniñúʼuka kundiku̱nna ley ña̱ ka̱ʼyí ta̱ Moisés. Ña̱kán na̱ káchíñu nu̱ú Ndióxi̱ tiempo vitin kǒo xíniñú’ukaví koona nazareo (Gál. 6:2; Rom. 10:4). Soo kúni̱vayó ndasakáʼnuyó Jehová nda̱a̱ táki̱ʼva xi̱keʼé na̱ nazareo, chi kúni̱yó ndasakáʼnuyóra xíʼin ndiʼi níma̱yó xíʼin ndiʼi ña̱ tákuyó xíʼin ndiʼi ndee̱yó (Mar. 12:30). Ta ña̱yóʼo kúú ña̱ kéʼéyó tá ndátaxiyó miíyó ndaʼa̱ Jehová ta kíndo̱oyó ña̱ kachíñuyó nu̱ú iinlá miíra. Ta ña̱ va̱ʼa sáxi̱nuyó voto ña̱ ke̱ʼéyó, xíniñúʼu keʼéyó ndiʼi ña̱ kúni̱ Jehová ta saátu keʼéyó sava sacrificio. Ná ka̱ʼa̱nyó xa̱ʼa̱ ndáa ki̱ʼva sa̱xínu na̱ nazareo ña̱ xi̱kindo̱ona keʼéna nu̱ú Jehová ta kotoyó ndáa ki̱ʼva kundiku̱nyó yichi̱na ña̱ saxínuyó ña̱ ki̱ndo̱oyó keʼéyó nu̱ú Ndióxi̱ (Mat. 16:24). c

NÁ KEʼÉYÓ SACRIFICIO XA̱ʼA̱ NDIÓXI̱

4. Tá ki̱ʼva káʼa̱n Números 6:​3, 4, ¿ndáaña kǒo níxi̱keʼé na̱ nazareo?

⁴ (Kaʼvi Números 6:​3, 4). d Na̱ nazareo va̱ása níxi̱kivi koʼona ndixi, ni va̱ása níxi̱xiniñúʼu kaxína uva, ni uva tí ni̱yi̱chi̱. Soo, na̱ yiví na̱ kǒo níxi̱keʼé voto xi̱xaxívana uva ta xi̱xiʼina vino. Nu̱ú Biblia káʼa̱nña ña̱ iin regalo Jehová kúú tá vino, saáchi sákusi̱írá-iniyó tá xíʼiyórá (Sal. 104:​14, 15). Soo na̱ nazareo kǒo níxi̱xiʼina tá vino ta kǒo níxi̱kivi kaxína nda̱a̱ ni iin ña̱ʼa ña̱ xi̱ ixava̱ʼana xíʼin uva. e

5. ¿Ndáaña nda̱kaxin ta̱ Madián xíʼin ñá Marcela keʼéna, ta nda̱chun?

⁵ Saátu miíyó kéʼéyó sava sacrificio ña̱ va̱ʼa ndasakáʼnuyó Jehová nda̱a̱ táki̱ʼva xi̱keʼé na̱ nazareo. Ná kotoyó ña̱ ke̱ʼé ta̱ Madián xíʼin ñá Marcela na̱ ñuu Colombia. f Na̱yóʼo va̱ʼaní xi̱ndoona ta kǒo nda̱a̱ ni iin ña̱ʼa níxi̱kuma̱ní nu̱úna. Xa̱ʼa̱ ña̱ va̱ʼaní xi̱chaʼvína ta̱ Madián nu̱ú xi̱kachíñura, liviní ni̱xi̱yo veʼena. Soo na̱yóʼo xi̱kuni̱na kachíñuna ku̱a̱ʼáka tiempo nu̱ú Jehová ta ña̱ va̱ʼa keʼéna  ña̱yóʼo sa̱ndákoona sava ña̱ʼa. Na̱yóʼo káchina: “Nda̱kiʼinndi̱ ku̱a̱ʼa̱nndi̱ koondi̱ inka veʼe ña̱ loʼoka ta ni̱xi̱kóndi̱ carrondi̱”. Kǒo nda̱a̱ ni iinna níka̱ʼa̱n xíʼin ta̱ Madián xíʼin ñá Marcela ña̱ keʼéna ña̱yóʼo, saáchi miívana kúú na̱ nda̱kaxin keʼé ña̱yóʼo chi xi̱kuni̱na natúʼunna xa̱ʼa̱ Ndióxi̱ xíʼin ku̱a̱ʼáka na̱ yiví. Ta kúsi̱íní-inina xa̱ʼa̱ ña̱ ke̱ʼéna ña̱yóʼo.

6. Miíyó na̱ ndásakáʼnu Jehová, ¿nda̱chun kéʼéyó sava sacrificio?

⁶ Miíyó na̱ testigo kúsi̱íní-iniyó kéʼéyó sava sacrificio ña̱ va̱ʼa ku̱a̱ʼáka tiempo kachíñuyó nu̱ú Jehová (1 Cor. 9:​3-6). Va̱ása íxandúxaví Jehová xíʼinyó ña̱ keʼéyó sacrificio xa̱ʼa̱ra, soo sava yichi̱ sándakooyó kéʼéyó ña̱ʼa ña̱ xi̱kutóoyó ña̱ va̱ʼa kachíñukayó nu̱úra. Tá kúú, ña̱ va̱ʼa kachíñuka sava na̱ hermano nu̱ú Jehová sa̱ndákoona chiñu nu̱ú va̱ʼaní xi̱chaʼvinana, saátu veʼena á iin kití sa̱na̱na. Ta savana kǒo xíínna tindaʼa̱na á savatuna tíndaʼa̱vana soo kǒo xíínna koo se̱ʼena. Íyotu na̱ ndáka̱xin ña̱ ku̱ʼu̱nna chindeétáʼanna xíʼin na̱ hermano nu̱ú kúma̱ní na̱ natúʼun xa̱ʼa̱ Ndióxi̱ ni xíniñúʼu sandákoona na̱ veʼena á na̱ migona. Ku̱a̱ʼáníyó kéʼéyó táʼan sacrificio yóʼo saáchi kúni̱yó sakúsi̱íyó-ini Jehová. Ña̱kán, ndiʼi sacrificio ña̱ kéʼéyó ni kúúña ña̱ válí á ña̱ náʼnu ndáyáʼviníña nu̱ú Jehová (Heb. 6:10).

NDAKÚ NÁ KOO-INIYÓ ÑA̱ VA̱ʼA SÍÍN KOOYÓ NU̱Ú INKANA

7. ¿Nda̱chun xi̱ ixayo̱ʼvi̱ña xíʼin na̱ nazareo ña̱ sáxi̱nuna voto ña̱ ki̱ndoona keʼéna nu̱ú Jehová? (Números 6:5; koto na̱ʼná).

⁷ (Kaʼvi Números 6:5). g Xa̱ʼa̱ voto ña̱ xi̱keʼé na̱ nazareo kǒo níxi̱xaʼndana yixí xi̱nína, tasaá xi̱naʼa̱na ña̱ xi̱ ixato̱ʼóna Jehová. Tá iin na̱ ñuu Israel xi̱ndaka̱xinna ña̱ koona nazareo ku̱a̱ʼá ku̱i̱ya̱, xi̱xaʼnuní yixí xi̱nína. Tá va̱ʼa xi̱kaʼa̱nna xa̱ʼa̱na, saá kúú ña̱ va̱ása ní ixayo̱ʼvi̱ña xíʼinna ña̱ koona nazareo. Soo ni̱xi̱yo iin tiempo ña̱ kǒo ní xi̱ ixato̱ʼó na̱ ñuu Israel ña̱ xi̱keʼé na̱ nazareo. Tá kúú tá tiempo ña̱ ni̱xi̱yo ta̱ profeta Amós sava na̱ israelita na̱ ndu̱u apóstata xi̱taxina vino xi̱xiʼi na̱ nazareo chi xi̱kuni̱na ña̱ kǒo sáxi̱nuna voto ña̱ ki̱ndoona keʼéna nu̱ú Jehová (Amós 2:12). Xi̱niñúʼu ndakúní koo ini na̱ nazareo ña̱ va̱ʼa síín koona nu̱ú inkana.

8. ¿Ndáaña ke̱ʼé ta̱ Benjamin kúú ña̱ kútóokaún?

⁸ Sava yichi̱ íxayo̱ʼvi̱ña xíʼinyó ña̱ síín kooyó nu̱ú inkana chi sana kúkaʼan nu̱úyó, soo mií Jehová chindeétáʼan xíʼinyó. Ná kotoyó ña̱ ndo̱ʼo ta̱ Benjamin ta̱ kúúmií 10 ku̱i̱ya̱. Testigo Jehová kúúra ta ñuura kúú Noruega. Escuela nu̱ú káʼvira ta̱vána iin vikó ña̱ va̱ʼa  chika̱a̱na ndee̱ xíʼin ñuu Ucrania xa̱ʼa̱ ña̱ íyo ku̱a̱chi. Na̱ va̱lí na̱ xi̱kaʼvi kán xi̱niñúʼu kundixína ti̱ko̱to̱ ña̱ kúúmií color bandera ña̱ ñuu Ucrania ta katana iin yaa. Ta̱ Benjamin xíká xi̱ku̱ndichira ña̱ va̱ʼa kǒo katara yaa kán. Soo iin ñá maestra xi̱niñá ña̱ xíká níndichira, xa̱ʼa̱ ña̱kán ka̱nañára: “Naʼa yóʼo kundichiún xíʼinndi̱, kama koún”. Xa̱ʼa̱ ña̱ ndakú-ini ta̱ Benjamin ni̱xa̱a̱ra nu̱ú ñá maestra kán ta ni̱ka̱ʼa̱nra xíʼinñá: “Yi̱ʼi̱ nda̱kú íyo inii̱ xíʼin Ndióxi̱ ta kǒo kíʼvii̱ xíʼin nda̱a̱ ni iin ña̱ política. Xa̱ʼa̱ ña̱yóʼo ku̱a̱ʼání na̱ testigo Jehová táannana veʼeka̱a xa̱ʼa̱ ña̱ kǒo xáʼa̱nna nu̱ú Guerra”. Ñá maestra yóʼo xi̱niso̱ʼoñá ña̱ ni̱ka̱ʼa̱nra xíʼinñá ta kǒo níka̱ʼa̱nkañá xíʼinra. Soo, na̱ va̱lí na̱ káʼvi xíʼinra ni̱nda̱ka̱tu̱ʼunnara nda̱chun kǒo xítara xíʼinna. Xa̱ʼa̱ ña̱yóʼo ni̱ndi̱ʼi̱ní-ini ta̱ Benjamin ta nda̱a̱ ki̱xáʼa kúni̱ kuakura. Ni saá ndakú ni̱xi̱yo inira ta ni̱ka̱ʼa̱nra xíʼin na̱ va̱lí yóʼo mií ña̱ xa̱a̱ ni̱ka̱ʼa̱nra xíʼin ñá maestra. Tá ni̱xa̱a̱ra veʼera ni̱ka̱ʼa̱nra xíʼin na̱ yivára ña̱ mií Jehová chi̱ndeétáʼan xíʼinra ña̱ ka̱ʼa̱nra xa̱ʼa̱ ña̱ kándíxara.

9. ¿Ndáaña xíniñúʼu keʼéyó ña̱ va̱ʼa sakúsi̱íyó-ini Jehová?

⁹ Tá xíniso̱ʼoyó ña̱ káʼa̱n Jehová nda̱a̱ na̱ yiví na̱ kǒo ndásakáʼnu miíra kíʼinna kuenta ña̱ síín íyoyó. Ta xíniñúʼu ndakú koo iniyó ña̱ va̱ʼa na̱ʼa̱yó ña̱ kúúyó testigo Jehová nu̱ú káchíñuyó á escuela nu̱ú káʼviyó. Ta saátu xa̱ʼa̱ ña̱ ndi̱va̱ʼaní-ini na̱ yiví na̱ ndóo tiempo so̱ndíʼi vitin, íxayo̱ʼvi̱níña xíʼinyó ña̱ kuniso̱ʼoyó ña̱ káʼa̱n Jehová ta saátu ña̱ natúʼunyó xíʼin na̱ yiví xa̱ʼa̱ Reinora (2 Tim. 1:8; 3:13). Soo ná ndakaʼányó chi sákusi̱íyó-ini Jehová tá síín íyoyó nu̱ú na̱ yiví na̱ kǒo ndásakáʼnu miíra (Prov. 27:11; Mal. 3:18).

SIʼNAKA CHIÑU JEHOVÁ NÁ KUNDI̱ʼI̱-INIYÓ XA̱ʼA̱

10. ¿Nda̱chun xi̱ ixayo̱ʼvi̱níña xíʼin na̱ nazareo keʼéna ña̱ káʼa̱n Números 6:​6, 7?

¹⁰ (Kaʼvi Números 6:​6, 7). h Na̱ nazareo va̱ása níxi̱kuchiñu kuyatinna nu̱ú na̱ ni̱xi̱ʼi̱, ta sana kivi ndakanixi̱níyó ña̱ su̱ví ña̱ ndeéví kúú ña̱yóʼo. Soo sana xi̱ ixayo̱ʼvi̱níña xíʼin iin na̱ nazareo tá iin na̱ veʼe miína kúú na̱ ni̱xi̱ʼi̱. ¿Nda̱chun? Saáchi tá tiempo kán, na̱ yiví xi̱kuumiína costumbre ña̱ kuyatinna nu̱ú na̱ ni̱xi̱ʼi̱ (Juan 19:​39, 40; Hech. 9:​36-40). Ña̱kán, na̱ xi̱kuu nazareo va̱ása níxi̱ndiku̱nna costumbre yóʼo. Sana xi̱ ixayo̱ʼvi̱nívaña  xíʼinna soo saá xi̱naʼa̱na ña̱ xi̱xiniso̱ʼona ña̱ xi̱kaʼa̱n Ndióxi̱. Ta kǒo nísandákoo ndaʼa̱ Jehová na̱yóʼo chi ndiʼi tiempo ta̱xira ndee̱ ndaʼa̱na ña̱ kundeé-inina.

11. ¿Ndáaña kivi kundoʼoyó xa̱ʼa̱ ña̱ kúni̱yó nda̱kú koo iniyó xíʼin Jehová? (Koto na̱’ná).

¹¹ Tá nda̱kuchiyó ke̱ʼéyó iin voto nu̱ú Jehová ta ndáyáʼviní ña̱yóʼo nu̱úyó. Ta náʼa̱yó ña̱yóʼo xíʼin ña̱ kéʼéyó ta saátu xíʼin ki̱ʼva ña̱ kítáʼanyó xíʼin na̱ veʼeyó. Chíka̱a̱níyó ndee̱ ña̱ taxiyó ña̱ xíniñúʼu na̱ veʼeyó, soo siʼnaka ña̱ kúni̱ Jehová kúú ña̱ kéʼéyó nu̱úka ña̱ kúni̱ na̱ veʼeyó (Mat. 10:​35-37; 1 Tim. 5:8). Sava yichi̱ xa̱ʼa̱ ña̱ kúni̱yó nda̱kú koo iniyó xíʼin Jehová kivi kaku ku̱a̱chi xíʼin na̱ veʼeyó.

12. Tá ki̱xáʼa ta̱ Alexandru káʼvira, ¿ndáaña ndo̱ʼora, ta ndáaña kǒo níkeʼéra?

¹² Ná ka̱ʼa̱nyó xa̱ʼa̱ ña̱ ndo̱ʼo ta̱ Alexandru xíʼin ñá síʼira Dorina. Tá sa̱kán íyo iin ku̱i̱ya̱ ña̱ ki̱xáʼana káʼvina Biblia. Ñá Dorina sa̱ndákooñá ña̱ kaʼviñá ta saátu xi̱kuni̱ñá ña̱ ná sandákoo ta̱ Alexandru ña̱ kaʼvira. Ta̱yóʼo viíní ni̱ka̱ʼa̱nra xíʼinñá ña̱ kǒo sandákoora ña̱ sakúaʼara xa̱ʼa̱ Jehová, soo kǒo níkútóoñá ña̱ ni̱ka̱ʼa̱nra ña̱kán ki̱xáʼañá íxandi̱va̱ʼañá xíʼinra chi xi̱kuni̱ñá sandákoora ña̱ kaʼvira. Ta̱ Alexandru kǒo níxikunda̱a̱-inira nda̱chun xi̱keʼéña saá. Sava yichi̱ xi̱kuni̱ra sandákoora ña̱ kaʼvira tá xi̱ ixandi̱va̱ʼa ñá Dorina xíʼinra. Soo ni xi̱ndoʼora ña̱yóʼo kǒo nísandákoora ña̱ sakúaʼara xa̱ʼa̱ Ndióxi̱, ta xi̱kuʼvi̱ní-inira xi̱xinirañá ta xi̱ ixato̱ʼónírañá. Xa̱ʼa̱ ña̱ va̱ʼaní yichi̱ chi̱núura nu̱ú ñá síʼíra, ñáyóʼo ki̱xáʼa tukuñá sákuaʼañá xa̱ʼa̱ Ndióxi̱ ta ndu̱uñá testigo Jehová. (Koto video ña̱ naní Ta̱ Alexandru xíʼin ñá Dorina Vacar: Na̱ kúʼvi̱-ini xíni táʼan kúee íyo inina ta va̱ʼaní-inina, ña̱ ka̱na nu̱ú táʼví ña̱ naní “Ña̱ Biblia chíndeéña na̱ yiví ña̱ nása̱mana”, ña̱ va̱xi nu̱ú jw.org).

13. ¿Ndáaña kivi keʼéyó ña̱ va̱ʼa na̱ʼa̱yó ña̱ kúni̱yó xíniyó Jehová ta saátu na̱ veʼeyó?

¹³ Jehová kúú ta̱ i̱xava̱ʼa na̱ familia ta kúni̱ra ña̱ si̱íní koona (Efes. 3:​14, 15). Tá ndixa kúni̱yó kusi̱í-iniyó ná keʼéyó ndiʼi ña̱ kúni̱ Jehová, chi xítora ndiʼi sacrificio ña̱ kéʼéyó. Tá kúú, ña̱ ndáayó na̱ veʼeyó ta saátu ña̱ chíka̱a̱yó ndee̱ ña̱ ndasakáʼnuyóra (Rom. 12:10).

NÁ KEʼÉYÓ NDA̱A̱ TÁKI̱ʼVA XI̱KEʼÉ NA̱ NAZAREO

14. ¿Ndáana kúú na̱ xíniñúʼu chika̱a̱yó ndee̱ xíʼin?

¹⁴ Ndiʼiyó na̱ kúni̱ kachíñu nu̱ú Jehová xíniñúʼu keʼéyó sava sacrificio ña̱ va̱ʼa ndasakáʼnuyóra, ta sava yichi̱ kivi ixayo̱ʼvi̱ña xíʼinyó keʼéyóña. Ña̱kán, ¿ndáaña kivi keʼéyó ña̱ va̱ʼa chindeétáʼanyó xíʼin inkana ña̱ keʼéna sacrificio xa̱ʼa̱ Jehová? Kivi ka̱ʼa̱nyó tu̱ʼun va̱ʼa xíʼinna (Job 16:5). Íyo sava na̱ hermano na̱ loʼoní ña̱ʼa kúúmií xa̱ʼa̱ ña̱ kúni̱na ku̱a̱ʼáka  tiempo kachíñuna nu̱ú Jehová, ¿á íyo táʼan na̱yóʼo ti̱xin congregación nu̱ú ndíka̱ún? ¿Á xíni̱ún iin na̱ chíkaa̱ ndee̱ ña̱ síín koona nu̱ú na̱ va̱lí na̱ káʼvi xíʼinna escuela? ¿Á xíni̱ún iin na̱ sa̱kán ki̱xáʼa káʼvi xa̱ʼa̱ Ndióxi̱ ña̱ íxandi̱va̱ʼa na̱ veʼena xíʼinna xa̱ʼa̱ ña̱ nda̱kú íyo inina xíʼin Jehová? Ná ka̱ʼa̱nyó xíʼinna ña̱ va̱ʼaní kéʼéna saáchi chíka̱a̱na ndee̱ ña̱ ndasakáʼnuna Jehová (Filem. 4, 5, 7).

15. ¿Ndáaña ke̱ʼé iin ñá hermana ña̱ va̱ʼa chindeétáʼanñá xíʼin inkana?

¹⁵ Kivi chindeétáʼanyó xíʼin na̱ hermano na̱ káchíñu ndiʼi tiempo nu̱ú Jehová (Prov. 19:17; Heb. 13:16). Ña̱yóʼo kúú ña̱ ke̱ʼé iin ñá hermana ñá xa̱a̱ chée ñá íyo ñuu Sri Lanka. Ni̱xi̱yo u̱vi̱ ná hermana ná kúú precursora, soo mií tiempo kán xi̱ ixama̱ní loʼo xu̱ʼún nu̱úná. Xa̱ʼa̱ ña̱kán, ñá hermana yóʼo chi̱ndeétáʼanñá xíʼinná xa̱ʼa̱ ña̱ ku̱a̱ʼá loʼoka xu̱ʼún xi̱taxi na̱ chíñu ndaʼa̱ñá (sáachi ñáyóʼo xi̱ndakiʼinñá pensión). Ndiʼi yo̱o̱ xi̱taxiñá loʼo xu̱ʼún ndaʼa̱ ná hermana kán ña̱ va̱ʼa chaʼvíná xa̱ʼa̱ teléfono. Liviní ña̱ ke̱ʼé ñá hermana yóʼo.

16. ¿Ndáaña sákuaʼayó xíʼin ña̱ ke̱ʼé na̱ nazareo?

¹⁶ Ku̱a̱ʼání ña̱ va̱ʼa sákuaʼayó xíʼin ña̱ kéʼé Jehová ta saátu ku̱a̱ʼání ña̱ sákuaʼayó xíʼin ña̱ xi̱keʼé na̱ nazareo. Jehová kíʼinra kuenta ña̱ xíʼin ndinuʼu-iniyó káchíñuyó nu̱úra, xa̱ʼa̱ ña̱kán chíka̱a̱níyó ndee̱ ña̱ saxínuyó ña̱ ki̱ndooyó keʼéyó nu̱úra tá nda̱kuchiyó. Ta saátu táxira ña̱ na̱ʼa̱yó nu̱úra ña̱ kúʼvi̱ní-iniyó xíniyóra (Prov. 23:​15, 16; Mar. 10:​28-30; 1 Juan 4:19). Jehová kíʼinra kuenta xíʼin ndiʼi sacrificio ña̱ kéʼéyó nu̱úra ña̱ va̱ʼa ndasakáʼnuyóra, ta ndáyáʼviníña nu̱úra nda̱a̱ táki̱ʼva xi̱keʼéra xíʼin na̱ nazareo. Ña̱kán ná chika̱a̱yó ndee̱ ña̱ kachíñuyó nu̱ú Jehová xíʼin ndinuʼu-iniyó.