1. ¿Ama kúú ña̱ ku̱ʼu̱n ndiʼi na̱ ungido chí ndiví?

 XA̱A̱ íyo ku̱a̱ʼá ku̱i̱ya̱, miíyó na̱ ndásakáʼnu Jehová xi̱kuni̱yó kunda̱a̱-iniyó ama kúú ña̱ ku̱ʼu̱n ndiʼi na̱ ungido chí ndiví. Ni̱xi̱yo iin tiempo ña̱ xi̱ndakanixi̱níyó ña̱ ka̱ku na̱ ungido tá ná kixaa̱ ña̱ Armagedón ta koona loʼo tiempo xíʼinyó nu̱ú ñuyǐví xa̱á. Soo nu̱ú La Atalaya 15 tí julio ña̱ ku̱i̱ya̱ 2013, sa̱kúaʼayó ña̱ ndiʼi na̱ ungido ku̱ʼu̱nna chí ndiví tá kúma̱níka kixáʼa ña̱ Armagedón (Mat. 24:31).

2. ¿Ndáaña kivi ndakanixi̱níyó xa̱ʼa̱ ta ndáaña sakúaʼayó nu̱ú artículo yóʼo?

² Soo sanatu ndákanixi̱níyó: ¿Ndáaña kundoʼo miíyó na̱ kundoo nu̱ú ñuʼú yóʼo tá ná kixáʼa ña̱ gran tribulación? (Mat. 24:21; Juan 10:16). Savana kivi ndakanixi̱nína ña̱ ni̱ndo̱o ndaʼa̱na chi kǒoka na̱ ungido koo nu̱ú ñuʼú yóʼo. Ná ka̱ʼa̱nyó xa̱ʼa̱ u̱vi̱ relato ña̱ kivi chindeétáʼan xíʼinyó kunda̱a̱-iniyó ndáa xa̱ʼa̱ kúú ña̱ ndákanixi̱nína saá. Ta saátu sakúaʼayó nda̱chun kǒo xíniñúʼu kundi̱ʼi̱-iniyó tá xa̱a̱ ná ku̱ʼu̱n ndiʼi na̱ ungido chí ndiví.

 ÑA̱ KǑO KUU

3, 4. ¿Ndáaña kivi ndakanixi̱ní savana ta nda̱chun?

³ Xa̱ʼa̱ ña̱ kǒoka na̱ Cuerpo Gobernante koo nu̱ú ñuʼú yóʼo, savana kivi ndakanixi̱nína: ¿Á kǒo ndasakáʼnukayó Ndióxi̱? Ná ka̱ʼa̱nyó xa̱ʼa̱ u̱vi̱ relato ña̱ kivi chindeétáʼan xíʼinyó kunda̱a̱-iniyó ndáa xa̱ʼa̱ kúú ña̱ kivi ndakanixi̱nína saá. Ta̱ siʼna ka̱ʼa̱nyó xa̱ʼa̱ kúú ta̱ su̱tu̱ káʼnu Jehoiadá. Ta̱yóʼo xíʼin ñá síʼíra ñá Jehosabeat xi̱ndaana iin ta̱ loʼo ta̱ xi̱naní Jehoás. Ta chi̱ndeétáʼanna xíʼinra ña̱ xa̱a̱ra koora rey ta̱ va̱ʼaní. Nani xi̱taku ta̱ Jehoiadá ta̱ Jehoás kǒo níkuxíkára nu̱ú Jehová. Soo tá ni̱xi̱ʼi̱ ta̱ Jehoiadá ta̱ Jehoás ki̱xáʼara kéʼéra ña̱ va̱ása va̱ʼa. Xi̱niso̱ʼora consejo ña̱ ni̱ka̱ʼa̱n na̱ príncipe na̱ kǒo ndásakáʼnu Jehová ta xa̱ʼa̱ ña̱kán kǒo níxiniso̱ʼokara ña̱ xi̱kaʼa̱n Jehová ta ku̱xíkára nu̱úra (2 Crón. 24:​2, 15-19).

⁴ Ña̱ u̱vi̱ ña̱ ka̱ʼa̱nyó xa̱ʼa̱ kúú ña̱ ndo̱ʼo na̱ cristiano na̱ xi̱ndoo tá siglo u̱vi̱. Ta̱ apóstol Juan va̱ʼaní chi̱ndeétáʼanra xíʼin na̱ cristiano ña̱ ndakú koo inina xíʼin Jehová (3 Juan 4). Nda̱a̱ táki̱ʼva ke̱ʼé inka na̱ apóstol na̱ nda̱kú ni̱xi̱yo ini xíʼin ta̱ Jesús, saá ke̱ʼé ta̱ Juan saáchi chi̱kaa̱níra ndee̱ ña̱ kundaara na̱ congregación nu̱ú na̱ apóstata (1 Juan 2:18). Soo tá ni̱xi̱ʼi̱ ta̱ Juan, ña̱ xi̱sanáʼa̱ na̱ apóstata ni̱ka̱a̱ña ku̱a̱ʼa̱nña nda̱a̱ táki̱ʼva íyo iin ku̱e̱ʼe̱ xíkun. Ta tá ni̱ya̱ʼa ku̱i̱ya̱ xa̱a̱ ndiʼi congregación ni̱ki̱ʼviña.

5. ¿Ndáaña kǒo xíniñúʼu ndakanixi̱níyó xa̱ʼa̱ tá káʼviyó u̱vi̱ relato yóʼo?

⁵ ¿Á saá kundoʼo ndiʼi na̱ ndásakáʼnu Ndióxi̱ tá ná ku̱ʼu̱n ndiʼi na̱ ungido chí ndiví? ¿Á sandákoona Jehová nda̱a̱ táki̱ʼva ke̱ʼé ta̱ Jehoás? ¿Á kandíxana ña̱ káʼa̱n na̱ apóstata nda̱a̱ táki̱ʼva ke̱ʼé na̱ cristiano na̱ ni̱xi̱yo tá siglo u̱vi̱? Va̱ása. Ni kǒoka na̱ ungido koo nu̱ú ñuʼú yóʼo, soo miíyó kǒo sandákooyó ndasakáʼnuyó Jehová ta koova na̱ kundaa miíyó. ¿Nda̱chun va̱ʼa xíni̱yó ña̱yóʼo?

KǑO SANDÁKOOYÓ ÑA̱ NDASAKÁʼNUYÓ NDIÓXI̱

6. ¿Ndáa u̱ni̱ tiempo kúú ña̱ ka̱ʼa̱nyó xa̱ʼa̱?

⁶ Ni yo̱ʼvi̱ní ña̱ kixi nu̱úyó soo, ¿á sandákooyó ña̱ ndasakáʼnuyó Ndióxi̱? Biblia sánáʼa̱ña ña̱ tiempo ndóoyó vitin síínní íyoña nu̱ú tiempo ña̱ xi̱ndoo na̱ ñuu Israel xíʼin na̱ cristiano na̱ xi̱ndoo tá siglo u̱vi̱. Xa̱ʼa̱ ña̱kán ná ka̱ʼa̱nyó xa̱ʼa̱ u̱ni̱ ña̱yóʼo: Ña̱ nu̱ú, tiempo ña̱ xi̱ndoo na̱ ñuu Israel. Ña̱ u̱vi̱, tá ni̱ya̱ʼa tiempo ña̱ ni̱xi̱ʼi̱ na̱ apóstol. Ña̱ u̱ni̱, “tiempo ña̱ ndasavií Ndióxi̱ ndiʼi ña̱ʼa ña̱ ni̱ka̱ʼa̱nra xa̱ʼa̱”. Ta ña̱yóʼo kúú tiempo ña̱ ndóo miíyó vitin (Hech. 3:21).

7. ¿Nda̱chun kǒo níxi̱xiniñúʼu ndakava-ini sava na̱ ñuu Israel tá xi̱xitona ña̱ va̱ása va̱ʼa ña̱ xi̱keʼé iinka na̱ israelita?

⁷ Tiempo ña̱ xi̱ndoo na̱ ñuu Israel. Tá si̱lóʼo kúma̱ní kuvi ta̱ Moisés ni̱ka̱ʼa̱nra ña̱yóʼo xíʼin na̱ ñuu Israel: “Kúnda̱a̱-inii̱ tá ná kuvii̱, ndóʼó kixáʼandó keʼéndó ña̱ va̱ása va̱ʼa. Ta kuxíkándó nu̱ú yichi̱ ña̱ ni̱ka̱ʼi̱n xíʼinndó kakandó” (Deut. 31:29). Ta saátu ni̱ka̱ʼa̱nra xíʼinna ña̱ tá íxaso̱ʼona, inka na̱ yiví ki̱ʼvina ñuuna ta tiinnana ku̱ʼu̱n xíʼinna ña̱ koona esclavo (Deut. 28:​35, 36). ¿Á ni̱xi̱nu ña̱ ni̱ka̱ʼa̱n ta̱ Moisés? Ni̱xi̱nuvaña. Ku̱a̱ʼání tiempo na̱ rey kǒo níxiniso̱ʼona ña̱ ni̱ka̱ʼa̱n Jehová, ta saátu ke̱ʼé na̱ ñuu. Ña̱kán Jehová ta̱xira castigo ndaʼa̱ na̱ kǒo níxiniso̱ʼo ta kǒo nítaxikara ña̱ koo na̱ rey (Ezeq. 21:​25-27). Soo sava na̱ israelita na̱ nda̱kú ni̱xi̱yo ini xíʼin Jehová, tá xi̱nina ña̱ ni̱xi̱nu ndiʼi ña̱yóʼo chi̱kaa̱níña ndee̱ xíʼinna ña̱ nda̱kúka koo inina xíʼinra (Is. 55:​10, 11).

8. ¿Nda̱chun kǒo ndákanda̱-iniyó xíʼin ña̱ ke̱ʼé na̱ cristiano na̱ xi̱ndoo tá siglo u̱vi̱?

⁸ Tá ni̱ya̱ʼa tiempo ña̱ ni̱xi̱ʼi̱ na̱ apóstol. Kǒo ndákanda̱ví-iniyó ña̱ va̱ása nda̱kúka níxi̱yo  ini na̱ cristiano na̱ ni̱xi̱yo tá siglo u̱vi̱. ¿Nda̱chun? Saáchi xa̱a̱ ni̱ka̱ʼa̱nva ta̱ Jesús ña̱ saá kuu (Mat. 7:​21-23; 13:​24-30, 36-43). Tá siglo nu̱ú ta̱ apóstol Pablo, ta̱ Pedro xíʼin ta̱ Juan ni̱ka̱ʼa̱nna ña̱ xa̱a̱ ki̱xáʼa íyo na̱ apóstata nda̱a̱ táki̱ʼva ni̱ka̱ʼa̱n ta̱ Jesús (2 Tes. 2:​3, 7; 2 Ped. 2:1; 1 Juan 2:18). Tá ni̱ya̱ʼa loʼo ku̱i̱ya̱ ña̱ ni̱xi̱ʼi̱ ta̱ Juan, na̱ cristiano na̱ ndu̱u apóstata ni̱xa̱a̱na ndu̱una táʼan Babilonia ña̱ káʼnu, na̱ kúú veʼe-ñu̱ʼu vatá ta xíʼin ña̱yóʼo ni̱xi̱nu ña̱ ni̱ka̱ʼa̱n ta̱ Jesús.

9. ¿Nda̱chun síín íyo tiempo vitin nu̱ú u̱vi̱ saá tiempo ña̱ xa̱a̱ ni̱ka̱ʼa̱nyó xa̱ʼa̱?

⁹ “Tiempo ña̱ ndasavií Ndióxi̱ ndiʼi ña̱ʼa ña̱ ni̱ka̱ʼa̱nra xa̱ʼa̱”. Tiempo ña̱ ndóoyó vitin síínní káaña nu̱ú tiempo ña̱ ni̱xi̱yo na̱ ñuu Israel xíʼin ña̱ siglo u̱vi̱, tá ni̱xa̱a̱ na̱ cristiano ndu̱una apóstata. ¿Nda̱saa naní tiempo ña̱ ndóoyó vitin? Miíyó káʼa̱nyó xíʼinña ki̱vi̱ nu̱ú ndíʼi (2 Tim. 3:1). Soo Biblia káʼa̱nña ña̱ mií tiempo yóʼo, kixáʼa iin tiempo ña̱ ndáyáʼviní ta na’áka koo ña̱yóʼo. Ña̱yóʼo naníña “tiempo ña̱ ndasavií Ndióxi̱ ndiʼi ña̱ʼa ña̱ ni̱ka̱ʼa̱nra xa̱ʼa̱” (Hech. 3:21). Ña̱yóʼo ki̱xáʼaña ku̱i̱ya̱ 1914 ta ndiʼiña tá ná ndulivi nu̱ú ñuʼú yóʼo, tasaá kǒoka ku̱a̱chi kuumií na̱ yiví tá ná kaʼndachíñu ta̱ Jesús. ¿Ndáa ña̱ʼa nda̱savií Jehová ku̱i̱ya̱ 1914? Ta̱ Jesús ki̱xáʼara xáʼndachíñura chí ndiví tasaá ki̱xáʼa kúúmií Jehová iin ta̱ rey ta̱ ke̱e ti̱xin na̱ veʼe ta̱ David. Tá ni̱ya̱ʼa loʼo tiempo ki̱xáʼana ndásakáʼnuna Jehová nda̱a̱ táki̱ʼva kúni̱ miíra (Is. 2:​2-4; Ezeq. 11:​17-20). Soo, ¿á kuxíká tukuna nu̱ú Jehová?

10. a) ¿Ndáaña ni̱ka̱ʼa̱n Biblia xa̱ʼa̱ ña̱ ndásakáʼnuyó Ndióxi̱ tiempo vitin? (Isaías 54:17). b) ¿Ndáa ki̱ʼva chíndeétáʼan ña̱ káʼa̱n Isaías xíʼinyó?

¹⁰ (Kaʼvi Isaías 54:17). a Iin táʼví ña̱ profecía yóʼo káchiña: “Ni nda̱a̱ ndáaka ña̱ʼa ná kuniñúʼuna ña̱ kanitáʼanna xíʼún, va̱ása kuchiñuna”. Tiempo vitin xínu tu̱ʼun yóʼo, soo saátu íyo inkaka ña̱ʼa ña̱ xínu tiempo vitin: “Ta mií Jehová kúú ta̱ sanáʼa̱ ndiʼi na̱ se̱ʼún, ta va̱ʼaní kundoo ndiʼi na̱ se̱ʼún. Nina ña̱ nda̱kú kúú ña̱ keʼún. Va̱ása saxóʼvi̱na yóʼó, va̱ása yi̱ʼvíún xíʼin nda̱a̱ ni iin ña̱ʼa ta ni va̱ása koo ña̱ sayíʼvi yóʼó, saáchi va̱ása kuyatin ña̱yóʼo nu̱ún” (Is. 54:​13, 14). Ni ta̱ Ndi̱va̱ʼa ta̱ xáʼndachíñu nu̱ú ñuʼú yóʼo kǒo kuchiñura kasira nu̱ú na̱ ñuu Ndióxi̱ ña̱ sanáʼa̱na na̱ yiví xa̱ʼa̱ra (2 Cor. 4:4). Vitin iinlá mií Jehová kúú ta̱ ndásakáʼnuyó. Ña̱kán, nda̱a̱  ndáaka ña̱ kúni̱na keʼéna xíʼinyó va̱ása kuchiñuna.

ÑA̱ NDIXA KUU

11. ¿Nda̱chun va̱ʼa kúnda̱a̱-iniyó ña̱ kǒo kindo̱o mitúʼun na̱ ndásakáʼnu Jehová tá ná ku̱ʼu̱n ndiʼi na̱ ungido chí ndiví?

¹¹ ¿Ndáaña kuu tá ná ku̱ʼu̱n ndi’i na̱ ungido chí ndiví? Ná ndakaʼányó chi ta̱ Jesús kúú ta̱ ndáa miíyó ta ta̱yóʼo kúú ta̱ níʼi yichi̱ nu̱ú na̱ congregación. Ta miíra ni̱ka̱ʼa̱n ña̱yóʼo: “Saáchi iinláva kúú maestrondó, ta̱ Cristo” (Mat. 23:10). Ta̱ Rey Jesucristo koora ndiʼi tiempo ta kiʼinra kuenta xíʼinyó, ña̱kán na̱ cristiano na̱ kundoo nu̱ú ñuʼú yóʼo va̱ása xíniñúʼu yi̱ʼvína. Ña̱ nda̱a̱ va̱ása kúnda̱a̱-iniyó ndáa ki̱ʼva kundaa ta̱ Cristo miíyó tiempo saá, soo ña̱ ku̱u tiempo xi̱naʼá chíndeétáʼanña xíʼinyó ña̱ kunda̱a̱-iniyó ña̱ viíní kundaara miíyó, ná ka̱ʼa̱nyó xa̱ʼa̱ savaña.

12. a) ¿Ndáa ki̱ʼva xi̱ndaa Jehová na̱ ñuura tá ni̱xi̱ʼi̱ ta̱ Moisés? b) ¿Ndáa ki̱ʼva xi̱ndaa Jehová na̱ ñuura tá kǒoka ta̱ Elías níxi̱yo? (Koto na̱ʼná).

¹² Ta̱ Moisés ni̱xi̱ʼi̱ra tá kúma̱níka ki̱ʼvi na̱ ñuu Israel nu̱ú ñuʼú ña̱ ni̱ka̱ʼa̱n Jehová taxira ndaʼa̱na. ¿Ndáaña ku̱u xíʼin na̱ ñuu Ndióxi̱? ¿Á ki̱ndoo mitúʼunna xa̱ʼa̱ ña̱ ni̱xi̱ʼi̱ ta̱ Moisés? Va̱ásaví. Jehová ni̱xi̱yora xíʼinna nani nda̱kú ni̱xi̱yo inina xíʼinra. Tá kúú, tá kúma̱níka kuvi ta̱ Moisés ni̱ka̱ʼa̱n Jehová xíʼinra ña̱ sanáʼa̱ra ta̱ Josué chi ta̱yóʼo kúú ta̱ kuniʼi yichi̱ nu̱ú na̱ ñuu (Éx. 33:11; Deut. 34:9). Ta saátu ni̱xi̱yo ta̱a ta̱ va̱ʼaní xi̱niʼi yichi̱ nu̱ú na̱ ñuu, “ni̱xi̱yo na̱ xi̱niʼi yichi̱ nu̱ú iin mil na̱ yiví, nu̱ú iin ciento na̱ yiví, nu̱ú u̱vi̱ xiko u̱xu̱ na̱ yiví, nu̱ú u̱xu̱ na̱ yiví” (Deut. 1:15). Viíníva xi̱ndaana na̱ ñuu Ndióxi̱. Ná ka̱ʼa̱nyó xa̱ʼa̱ ta̱ Elías, ku̱a̱ʼání ku̱i̱ya̱ chi̱ndeétáʼanra xíʼin na̱ ñuu Israel ña̱ ndasakáʼnuna Jehová. Soo tá ni̱ya̱ʼa tiempo, Jehová chi̱ndaʼárara ña̱ ku̱ʼu̱nra chí sur ña̱ Judá (2 Rey. 2:1; 2 Crón. 21:12). ¿Á ki̱ndoo mitúʼun na̱ u̱xu̱ tribu ña̱ Israel na̱ xi̱ndasakáʼnu Ndióxi̱? Va̱ásaví. Saáchi ta̱ Elías ku̱a̱ʼání ku̱i̱ya̱ sa̱náʼa̱ra ta̱ Eliseo ña̱ keʼéra chiñu kán. Ta saátu tiempo kán ni̱xi̱yo na̱ se̱ʼe na̱ profeta (2 Rey. 2:7). Táki̱ʼva xítoyó, ndiʼi tiempo ni̱xi̱yo na̱ ta̱a na̱ nda̱kú-ini na̱ xi̱niʼi yichi̱ nu̱ú na̱ ñuu Ndióxi̱. Sa̱xínuva Jehová ña̱ xi̱kuni̱ra keʼéra ta va̱ʼaní xi̱ndaara na̱ xi̱ndasakáʼnu miíra.

13. ¿Ndáaña káʼa̱n Hebreos 13:5b xíʼinyó? (Koto na̱ʼná).

¹³ Tá ndákaʼányó xa̱ʼa̱ ña̱ ku̱u tiempo xi̱naʼá, ¿ndáaña túviún kuu xíʼin na̱ ndásakáʼnu Ndióxi̱ tá ná ku̱ʼu̱n ndiʼi na̱ ungido chí ndiví? Va̱ása yo̱ʼvi̱ví kunda̱a̱-iniyó ndáaña kuu, saáchi Biblia káʼa̱nña ña̱ nda̱a̱ ni iin yichi̱ kǒo sandákoo ndaʼa̱ Jehová na̱ ñuura na̱ íyo  nu̱ú ñuʼú yóʼo (kaʼvi Hebreos 13:5b). Nda̱a̱ táki̱ʼva ke̱ʼé ta̱ Moisés xíʼin ta̱ Elías, na̱ Cuerpo Gobernante xa̱a̱ ku̱a̱ʼá ku̱i̱ya̱ sánáʼa̱na inka na̱ hermano ña̱ va̱ʼa kuniʼina yichi̱ nu̱ú na̱ ñuu Ndióxi̱. Tá kúú, kéʼéna escuela nu̱ú sánáʼa̱na na̱ anciano, na̱ superintendente ña̱ circuito, na̱ hermano na̱ kúú Comité ti̱xin sucursal, na̱ superintendente ña̱ Betel xíʼin inkaka escuela. Ta saátu na̱ Cuerpo Gobernante xa̱a̱ viíní sánáʼa̱na na̱ chíndeétáʼan xíʼinna. Na̱ hermano yóʼo ku̱a̱ʼání chiñu kúúmiína ta va̱ʼaní kéʼénaña, ña̱kán xa̱a̱ íyo tu̱ʼvavana ña̱ kundaana ndikachi sa̱na̱ ta̱ Cristo.

14. ¿Ndáaña ndáyáʼviní sa̱kúaʼayó?

¹⁴ Nu̱ú artículo yóʼo sa̱kúaʼayó iin ña̱ ndáyáʼviní: tá xa̱a̱ ku̱nu̱mí ndiʼi ña̱ gran tribulación saá kúú ña̱ ku̱ʼu̱n ndiʼi na̱ ungido chí ndiví. Xa̱ʼa̱ ña̱ kuniʼi ta̱ Jesús yichi̱ nu̱úna, na̱ ndásakáʼnu Ndióxi̱ kǒo sandákoonara. Tiempo saá iin tiʼvi na̱ yiví kuni̱na ixandi̱va̱ʼana xíʼin na̱ ñuu Ndióxi̱, Biblia káʼa̱nña xa̱ʼa̱ na̱yóʼo ña̱ nanína Gog de Magog (Ezeq. 38:​18-20). Loʼova tiempo ixandi̱va̱ʼana xíʼinyó, soo kǒo kuchiñuna sandíʼi-xa̱ʼa̱na miíyó. Kǒo kuchiñuna sakúxíkana miíyó nu̱ú Jehová chi miíra sáka̱ku miíyó. Nu̱ú iin visión ta̱ apóstol Juan xi̱nira ku̱a̱ʼání na̱ yiví, ta ni̱ka̱ʼa̱nra ña̱ na̱yóʼo kúú na̱ ni̱ka̱ku nu̱ú ña̱ gran tribulación. Ña̱kán kúnda̱a̱-iniyó ña̱ ka̱kuva miíyó na̱ ndásakáʼnu Jehová (Apoc. 7:​9, 14).

15, 16. Nda̱a̱ táki̱ʼva káchi Apocalipsis 17:​14, ¿ndáaña keʼé na̱ ungido tá ná koo Armagedón, ta ndáaña ndó’oyó tá kúnda̱a̱-iniyó xa̱ʼa̱ ña̱yóʼo?

¹⁵ Ta sanatu kivi nda̱ka̱tu̱ʼunyó miíyó: ¿Ndáaña keʼé na̱ ungido tá ná ku̱ʼu̱nna chí ndiví? Biblia káʼa̱nña ña̱ chindeétáʼanna xíʼin tí ndikachi tí ndánaʼa̱ ta̱ Jesús ña̱ kanitáʼanna xíʼin na̱ chíñu na̱ íyo nu̱ú ñuʼú yóʼo, soo ta̱ Jesús xíʼin na̱ ungido kúú na̱ kuchiñu sandíʼi-xa̱ʼa̱ na̱ sáa̱-ini xíni miíyó. Ña̱ versículo yóʼo káʼa̱nkaña: “Na̱ ka̱na Ndióxi̱ na̱ nda̱kaxinra ta nda̱kúní íyo inina xíʼinra kuchiñutu na̱yóʼova xíʼinna”. Ña̱yóʼo káʼa̱nña xa̱ʼa̱ na̱ ungido na̱ xa̱a̱ íyo chí ndiví (ka’vi Apocalipsis 17:14). Tá xa̱a̱ ná koo ndiʼi na̱ ungido chí ndiví, chiñu ña̱ nu̱ú ña̱ taxi Jehová ndaʼa̱na kúú ña̱ kanitáʼanna. Iin chiñu ña̱ ndáyáʼviní kúú ña̱yóʼo.  Sava na̱ ungido xi̱kutóona kanitáʼanna tá kúma̱níka koona testigo ta savana xi̱kuuna soldado. Soo tá sa̱kúaʼana xa̱ʼa̱ Ndióxi̱ sa̱ndákoona ndiʼi ña̱ va̱ása va̱ʼa xi̱keʼéna ta ki̱xáʼana kéʼéna ña̱ káʼa̱n tu̱ʼun Ndióxi̱ (Gál. 5:22; 2 Tes. 3:16). Soo tá xa̱a̱ ná koona chí ndiví, kitáʼanna xíʼin ta̱ Cristo ta saátu xíʼin na̱ ángel ña̱ kanitáʼanna xíʼin na̱ sáa̱-ini xíni Ndióxi̱.

¹⁶ Ná ndakanixi̱níyó xa̱ʼa̱ ña̱yóʼo: Sava na̱ ungido na̱ ndóo nu̱ú ñuʼú yóʼo xa̱a̱ chéenína ta kǒoka ndee̱ kúúmiína. Soo tá ná koona chí ndiví ndakúní koona ta va̱ása kuvikana ta inkáchi kitáʼanna xíʼin ta̱ rey Jesucristo ña̱ kanitáʼanna xíʼin na̱ sáa̱-ini xíni Ndióxi̱. Tá ná ndiʼi ña̱ Armagedón chindeétáʼanna xíʼin na̱ yiví ña̱ ndoo ku̱a̱china. Va̱ʼaníkava chindeétáʼanna xíʼin na̱ ñuu Ndióxi̱ tá ná koona chí ndiví, nu̱úka ña̱ kéʼéna nu̱ú ñuʼú yóʼo saáchi tiempo vitin na̱ yiví ku̱a̱chiva kúúna.

17. ¿Nda̱chun va̱ʼa kúnda̱a̱-iniyó ña̱ ndiʼi na̱ ndásakáʼnu Ndióxi̱ kǒo ña̱ʼa kundoʼona tá ná kixi ña̱ Armagedón?

¹⁷ Ta miíún, ¿á nu̱ú ñuʼú yóʼo koún? Tá saá, ¿ndáaña xíniñúʼu keʼún tá ná kixáʼa ña̱ Armagedón? Xíniñúʼu kundaa-iniún Jehová ta kandíxaún ña̱ káʼa̱nra. Saá kúú ña̱ keʼún ña̱ káʼa̱n Isaías 26:20: “Ki̱ʼvindó ini cuarto ña̱ ñúʼu chí ma̱á, tá xa̱a̱ ni̱ki̱ʼvindó ndakasindó yéʼé. Chise̱ʼéndó miíndó loʼo tiempo nda̱a̱ ná ya̱ʼa tu̱ndóʼo”. Kúsi̱íní-iniyó saáchi na̱ ndásakáʼnu Ndióxi̱, na̱ íyo chí ndiví xíʼin na̱ íyo nu̱ú ñuʼú yóʼo kǒo ña̱ kundoʼona. Nda̱a̱ táki̱ʼva ndo̱ʼo ta̱ apóstol Pablo, miíyó va̱ása xíka-iniyó ña̱ “ni na̱ chíñu, ni ña̱ʼa ña̱ íyo vitin, ni ña̱ʼa ña̱ kúma̱ní kixi, kǒo kivi sakúxíkáña miíyó nu̱ú ña̱ kúʼvi̱-ini Ndióxi̱ xínira miíyó” (Rom. 8:​38, 39). Kǒo nandósóún xa̱ʼa̱ ña̱yóʼo: Jehová kúʼvi̱-inira xínira yóʼó ta nda̱a̱ ni iin yichi̱ va̱ása sandákoora yóʼó.