1. Ka̱ʼa̱n xa̱ʼa̱ iin ejemplo ña̱ náʼa̱ ña̱ ndáyáʼviní kuniso̱ʼoyó ña̱ káʼa̱n Jehová.

 NDAKANIXI̱NÍ ña̱ ku̱a̱ʼún yuku̱ ta nda̱ñúʼún ta nu̱ú ku̱a̱ʼún íyoní kití ku̱e̱ʼe̱, íyoní tú iñú, ta sana kivi ndakavaún saáchi íyoní yu̱u̱. Ña̱kán sana kusi̱íníva-iniún tá ná ku̱ʼu̱n iin na̱ xíni̱ va̱ʼa yichi̱ kán xíʼún. Ñuyǐví yóʼo íyoña nda̱a̱ táki̱ʼva íyo yuku̱ ña̱ ni̱ka̱ʼa̱nyó xa̱ʼa̱ yóʼo, saáchi íyo ku̱a̱ʼání ña̱ʼa ña̱ kivi satúkue̱ʼe̱ miíyó, ta xa̱ʼa̱ ña̱yóʼo nda̱a̱ kivi xa̱a̱yó sandákooyó ña̱ ndasakáʼnuyó Ndióxi̱. Soo, Jehová kúú ta̱ va̱ʼaní níʼi yichi̱ nu̱úyó tiempo vitin, ta káʼa̱nra xíʼinyó ndáaña xíniñúʼu keʼéyó tasaá kǒo xo̱ʼvi̱yó, ta kivi chindeétáʼanra xíʼinyó ña̱ xa̱a̱yó nu̱ú ñuyǐví xa̱á nu̱ú kutakuyó ndiʼi tiempo.

2. ¿Ndáa ki̱ʼva níʼi Jehová yichi̱ nu̱úyó?

² ¿Ndáa ki̱ʼva níʼi Jehová yichi̱ nu̱úyó? Iin ña̱ ndáyáʼvi ña̱ xíniñúʼura kúú Biblia. Soo, saátu ndáka̱xinra sava na̱ ndásakáʼnu miíra ña̱ va̱ʼa kuniʼina yichi̱ nu̱ú na̱ ñuura. Tá kúú xíniñúʼura ta̱ “esclavo ta̱ nda̱kúní-ini ta̱ ndíchiní” ña̱ tavára tutu á video ña̱ kivi chindeétáʼan xíʼinyó ña̱ ndaka̱xin viíyó ña̱ keʼéyó (Mat. 24:45). Soo, su̱ví na̱yóʼo kuití kúú na̱ xíniñúʼura ña̱ kuniʼina yichi̱ nu̱úyó chi saátu xíniñúʼura na̱ superintendente ña̱ circuito xíʼin na̱ anciano ña̱ chika̱a̱na ndee̱ xíʼinyó, ta saátu táxina consejo ndaʼa̱yó ña̱ va̱ʼa ya̱ʼayó nu̱ú tu̱ndóʼo. Kúsi̱íní-iniyó ña̱ táxi Jehová na̱ chíndeétáʼan xíʼinyó tiempo so̱ndíʼi ña̱ ndóoyó vitin chi saá kivi kooyó migora ta ni̱ʼíyó ña̱ kutakuyó.

3. ¿Ndáaña ka̱ʼa̱nyó xa̱ʼa̱ nu̱ú artículo yóʼo?

³ Sava yichi̱ kivi ixayo̱ʼvi̱ña xíʼinyó keʼéyó ña̱ káʼa̱n Jehová. Ta íxayo̱ʼvi̱níña xíʼinyó kandíxayó tá na̱ káʼa̱n xíʼinyó kúú na̱ nda̱kaxin Jehová. ¿Nda̱chun? Chi sana túviyó ña̱ va̱ása chindeétáʼanví ña̱ ni̱ka̱ʼa̱nna xíʼinyó á sanatu ndákanixi̱níyó ña̱ va̱ása vií íyo consejo ña̱ ta̱xina ndaʼa̱yó, ña̱kán túviyó ña̱ su̱ví consejo Jehová kúúña. Soo, saá kúú ña̱ xíniñúʼu kandíxaníkayó ña̱ mií Jehová kúú ta̱ níʼi yichi̱ nu̱ú na̱ ñuura, ta ña̱ xíniñúʼu keʼéyó kúú ña̱ kandíxayó ña̱ káʼa̱nna xíʼinyó. Nu̱ú artículo yóʼo ka̱ʼa̱nyó xa̱ʼa̱  u̱ni̱ ña̱ʼa ña̱ chindeétáʼan xíʼinyó ña̱ kandíxayó ña̱ mií Jehová kúú ta̱ níʼi yichi̱ nu̱ú na̱ ñuura. Ña̱ nu̱ú, ¿ndáa ki̱ʼva xi̱niʼi Jehová yichi̱ nu̱ú na̱ ñuura tiempo xi̱naʼá? Ña̱ u̱vi̱, ¿ndáa ki̱ʼva níʼira yichi̱ nu̱úyó tiempo vitin? Ta ña̱ u̱ni̱, ¿ndáaña va̱ʼa ndakiʼinyó tá ná kuniso̱ʼoyó ña̱ káʼa̱nra xíʼinyó?

¿NDÁA KI̱ʼVA XI̱NIʼI JEHOVÁ YICHI̱ NU̱Ú NA̱ ÑUU ISRAEL?

4, 5. ¿Ndáa ki̱ʼva ni̱na̱ʼa̱ Jehová ña̱ xi̱niñúʼura ta̱ Moisés ña̱ kuniʼira yichi̱ nu̱ú na̱ ñuu Israel? (Koto na̱ʼná ña̱ va̱xi nu̱ú kíxáʼa tutu yóʼo).

⁴ Jehová nda̱kaxinra ta̱ Moisés ña̱ tavára na̱ ñuu Israel chí ñuu Egipto. Ta ku̱a̱ʼání ña̱ʼa ke̱ʼéra ña̱ va̱ʼa na̱ʼa̱ra nu̱úna ña̱ miíra nda̱kaxin ta̱ Moisés ña̱ kuniʼira yichi̱ nu̱úna. Jehová xi̱niñúʼura iin vi̱kó ña̱ va̱ʼa kuniʼira yichi̱ nu̱úna tá káʼñu, ta tá ñuú xi̱niñúʼura iin ñuʼu̱ (Éx. 13:21). Ta̱ Moisés xi̱ndiku̱nra vi̱kó yóʼo xa̱ʼa̱ ña̱yóʼo miíra xíʼin na̱ ñuu Israel ni̱xa̱a̱na nu̱ú ndíkaa̱ tá mar rojo. Tá xi̱ni na̱ ñuu Israel ña̱ va̱xi na̱ soldado egipcio ni̱yi̱ʼvinína saáchi nda̱kanixi̱nína ña̱ kǒo nu̱ú ku̱ʼu̱nna. Sana nda̱kanixi̱nína ña̱ va̱ása va̱ʼa níkeʼé ta̱ Moisés ña̱ ni̱xa̱a̱ra xíʼinna nu̱ú ndíkaa̱ tá mar. Soo, mií Jehová kúú ta̱ ni̱ka̱ʼa̱n xíʼin ta̱ Moisés ña̱ ku̱ʼu̱nra xíʼinna nda̱a̱ kán (Éx. 14:2). Tándi̱ʼi, Jehová ke̱ʼéra iin milagro ta sa̱kǎkurana (Éx. 14:​26-28).

⁵ Ki̱ʼva 40 ku̱i̱ya̱ xi̱niñúʼu ta̱ Moisés vi̱kó ña̱ va̱ʼa kuniʼira yichi̱ nu̱ú na̱ ñuu Israel tá xi̱ñuʼuna desierto. a Sava yichi̱, Jehová xi̱sanuura vi̱kó xi̱ni veʼe ta̱ Moisés ta kán xi̱xito ndiʼi na̱ ñuu ña̱yóʼo (Éx. 33:​7, 9, 10). Tá xi̱nuu vi̱kó yóʼo saá kúú ña̱ xi̱ka̱ʼa̱n Ndióxi̱ xíʼin ta̱ Moisés ta tándi̱ʼi ta̱ Moisés xi̱ka̱ʼa̱nra xíʼin na̱ ñuu ndáaña xi̱xiniñúʼu keʼéna (Sal. 99:7). Ña̱kán, na̱ ñuu Israel xi̱nina prueba ña̱ xi̱naʼa̱ ña̱ ndixa nda̱kaxin Jehová ta̱ Moisés ña̱ kuniʼira yichi̱ nu̱úna.

6. ¿Á xi̱niso̱ʼo na̱ ñuu Israel ta̱ nda̱kaxin Jehová? (Números 14:​2, 10, 11).

⁶ Ni xi̱ni na̱ ñuu Israel ku̱a̱ʼání prueba ña̱ xi̱naʼa̱ ña̱ mií Jehová kúú ta̱ nda̱kaxin ta̱ Moisés ña̱ kuniʼira yichi̱ nu̱úna, soo koo níxiinna kandíxanara (kaʼvi Números 14:​2, b 10, 11). c Xa̱ʼa̱ ña̱ kǒo níxiniso̱ʼona ta̱ Moisés, Jehová kǒo nítaxira ki̱ʼvina nu̱ú ñuʼú ña̱ ni̱ka̱ʼa̱nra taxira ndaʼa̱na (Núm. 14:30).

7. ¿Ndáana xi̱niso̱ʼo ña̱ ni̱ka̱ʼa̱n Jehová? (Números 14:24; koto na̱ʼná).

⁷ Ni̱xi̱yova sava na̱ israelita na̱ xi̱kandíxa ña̱ xi̱ka̱ʼa̱n Jehová. Tá kúú, Jehová ni̱ka̱ʼa̱nra: “Ta̱ Caleb ta̱ káchíñu nu̱úi̱ ndákundeéra ndíku̱nra yi̱ʼi̱ xíʼin ndiʼi níma̱ra” (kaʼvi Números 14:24). d Ni̱kusi̱íní-ini Jehová xíʼin ta̱ Caleb, ta nda̱a̱ ta̱xira ná nda̱kaxinra ndáa táʼví ñuu Canaán xi̱kuni̱ra koora (Jos. 14:​12-14). Nda̱a̱ táki̱ʼva ke̱ʼé ta̱ Caleb, saá ke̱ʼétu sava na̱ israelita na̱ ka̱ku chí desierto. Na̱yóʼo i̱xato̱ʼónína ta̱ Josué chi ta̱yóʼo kúú ta̱ nda̱kaxin Jehová ña̱ kuniʼira yichi̱ nu̱ú na̱ ñuu Israel tá ni̱xi̱ʼi̱ ta̱ Moisés (Jos. 4:14). Xa̱ʼa̱ ña̱kán ta̱xi Jehová ña̱ ndakiʼinna ñuʼú ña̱ ni̱ka̱ʼa̱nra taxira ndaʼa̱na (Jos. 21:​43, 44).

8. ¿Ndáa ki̱ʼva xi̱niʼi Jehová yichi̱ nu̱ú na̱ ñuu Israel tiempo tá xi̱xaʼndachíñu na̱ rey? (Koto na̱ʼná).

⁸ Tá ni̱ya̱ʼa ku̱i̱ya̱ Jehová nda̱kaxinra na̱ juez ña̱ va̱ʼa kuniʼina yichi̱ nu̱ú na̱ ñuura. Ta saátu tá  xa̱a̱ xáʼndachíñu na̱ rey, Jehová nda̱kaxinra na̱ profeta ña̱ kuniʼina yichi̱ nu̱ú na̱ ñuu. Na̱ rey na̱ nda̱kú ni̱xi̱yo ini xíʼin Jehová xi̱xiniso̱ʼona ña̱ xi̱kaʼa̱n na̱ profeta. Tá kúú, ta̱ rey David vitá ni̱xi̱yo inira ta xi̱niso̱ʼora ña̱ ni̱ka̱ʼa̱n ta̱ profeta Natán xíʼinra (2 Sam. 12:​7, 13; 1 Crón. 17:​3, 4). Ta̱ rey Jehosafat ka̱ndíxara ña̱ ni̱ka̱ʼa̱n ta̱ profeta Jahaziel xíʼinra ta ni̱ka̱ʼa̱nra xíʼin na̱ ñuu Judá ña̱ ná kandíxana ña̱ xi̱ka̱ʼa̱n na̱ profeta Ndióxi̱ (2 Crón. 20:​14, 15, 20). Tá ni̱ya̱ʼa ta rey Ezequías nu̱ú tu̱ndóʼo ni̱ka̱ʼa̱nra xíʼin ta̱ profeta Isaías ña̱ chindeétáʼanra xíʼinra (Is. 37:​1-6). Tá xi̱xiniso̱ʼo na̱ rey ña̱ xi̱kaʼa̱n Jehová miíra xi̱chindeétáʼan xíʼinna ta xi̱ndaara na̱ ñuu (2 Crón. 20:​29, 30; 32:22). Mií Jehová xi̱xiniñúʼu na̱ profeta ña̱ va̱ʼa kuniʼina yichi̱ nu̱ú na̱ ñuu. Soo, ku̱a̱ʼá na̱ rey xíʼin na̱ israelita kǒo níxi̱xiniso̱ʼona ña̱ xi̱ka̱ʼa̱n na̱yóʼo xíʼinna (Jer. 35:​12-15).

¿NDÁA KI̱ʼVA XI̱NIʼI JEHOVÁ YICHI̱ NU̱Ú NA̱ CRISTIANO NA̱ NI̱XI̱YO SIGLO NU̱Ú?

9. ¿Ndáa ki̱ʼva xi̱niʼi Jehová yichi̱ nu̱ú na̱ cristiano na̱ xi̱ndoo tá siglo nu̱ú? (Koto na̱ʼná).

⁹ Tá siglo nu̱ú mií Jehová kúú ta̱ ni̱ka̱ʼa̱n ña̱ kixáʼa koo congregación cristiana. ¿Ndáa ki̱ʼva xi̱niʼi Jehová yichi̱ nu̱ú na̱ ñuura tiempo kán? Jehová nda̱kaxinra ta̱ Jesús ña̱ kuniʼira yichi̱ nu̱ú ña̱ congregación (Efes. 5:23). Soo, ta Jesús va̱ása níka̱ʼa̱nvíra xíʼin iin tá iin na̱ cristiano kán ndáaña xi̱xiniñúʼu keʼéna, saáchi na̱ apóstol xíʼin na̱ anciano na̱ xi̱ndoo ñuu Jerusalén kúú na̱ xi̱niñúʼura ña̱ kuniʼina yichi̱ nu̱úna (Hech. 15:​1, 2). Ta saátu iin tá iin congregación ni̱xi̱yo na̱ anciano ña̱ va̱ʼa chindeétáʼanna xíʼin na̱ hermano (1 Tes. 5:12; Tito 1:5).

10. a) ¿Á xi̱xiniso̱ʼo na̱ cristiano na̱ ni̱xi̱yo tá siglo nu̱ú ña̱ xi̱ka̱ʼa̱nna xíʼinna? (Hechos 15:​30, 31). b) ¿Nda̱chun kǒo níxiin savana kuniso̱ʼona na̱ nda̱kaxin Ndióxi̱ kuniʼi yichi̱ nu̱úna? (Koto recuadro ña̱ naní “ Nda̱chun kǒo xíín savana kuniso̱ʼona”).

¹⁰ ¿Á xi̱niso̱ʼo na̱ cristiano na̱ ni̱xi̱yo siglo nu̱ú ña̱ xi̱ka̱ʼa̱nna xíʼinna? Ku̱a̱ʼánína va̱ʼaníva xi̱xiniso̱ʼona ña̱ xi̱ka̱ʼa̱nna xíʼinna ta nda̱a̱ xi̱kusi̱í-inina xíʼin ña̱ xi̱ka̱ʼa̱nna xíʼinna (kaʼvi Hechos 15:​30, 31). Ta, ¿ndáa ki̱ʼva níʼi Jehová yichi̱ nu̱ú na̱ ñuura tiempo vitin?

¿NDÁA KI̱ʼVA NÍʼI JEHOVÁ YICHI̱ NU̱ÚYÓ TIEMPO VITIN?

11. Ka̱ʼa̱n xa̱ʼa̱ iin ejemplo ña̱ náʼa̱ ndáa ki̱ʼva xíniñúʼu Jehová na̱ yiví ña̱ kuniʼina yichi̱ nu̱ú na̱ ñuura.

¹¹ Tiempo vitin Jehová níʼira yichi̱ nu̱ú na̱ ñuura, ta xíniñúʼura tu̱ʼunra xíʼin ta̱ Jesús ña̱  va̱ʼa keʼéra ña̱yóʼo. ¿Á íyo prueba ña̱ náʼa̱ ña̱ xíniñúʼura na̱ yiví ña̱ kuniʼina yichi̱ nu̱úyó tiempo vitin? Íyovaña. Ná ka̱ʼa̱nyó xa̱ʼa̱ ña̱ ku̱u tá kúma̱ní ndiʼi siglo diecinueve. Ta̱ Charles Russell xíʼin na̱ xi̱kitáʼan xíʼinra xi̱kunda̱a̱-inina ña̱ ku̱i̱ya̱ 1914 kooña iin ku̱i̱ya̱ ña̱ ndáyáʼviní (Dan. 4:​25, 26). ¿Nda̱chun va̱ʼa xi̱kunda̱a̱-inina ña̱yóʼo? Saáchi ka̱ʼvina profecía ña̱ va̱xi nu̱ú Biblia. Ta Jehová kúú ta̱ chi̱ndeétáʼan xíʼinna ña̱ va̱ʼa ku̱ndaa̱-inina xíʼinña. Ña̱ ku̱u ku̱i̱ya̱ 1914 náʼa̱ña ña̱ xa̱a̱ ki̱xáʼa xáʼndachíñu Reino Ndióxi̱: chi ku̱i̱ya̱ saá ki̱xáʼa primera guerra mundial, ki̱xáʼa íyo ku̱e̱ʼe̱, so̱ko xíʼin ña̱ táan (Luc. 21:​10, 11). Ña̱yóʼo náʼa̱ káxiña nu̱úyó ña̱ mií Jehová ndáka̱xinra na̱ kuniʼi yichi̱ nu̱ú na̱ ñuura.

12, 13. ¿Ndáaña ke̱ʼé na̱ ñuu Ndióxi̱ tá xi̱ndikaaka segunda guerra mundial ña̱ va̱ʼa natúʼunkana xíʼin na̱ yiví?

¹² Saátu ná ka̱ʼa̱nyó xa̱ʼa̱ ña̱ ku̱u tá ni̱xi̱yo segunda guerra mundial. Na̱ hermano na̱ ñúʼu sede mundial ka̱ʼvi va̱ʼana xíʼin ña̱ káʼa̱n Apocalipsis 17:8 tasaá ku̱ndaa̱-inina ña̱ va̱ása kixaa̱ ña̱ Armagedón tá ná ndiʼi segunda guerra mundial, saáchi xi̱niñúʼu koo iin tiempo nu̱ú kivi natúʼunyó xíʼin na̱ yiví xa̱ʼa̱ Ndióxi̱. Ta tiempo saá na̱ ñuu Ndióxi̱ nda̱kaxinna keʼéna iin ña̱ʼa, ta kivi ndakanixi̱níyó, ¿nda̱chun nda̱kaxinna keʼéna ña̱yóʼo? Saáchi ki̱xáʼa íyo ña̱ Colegio Superior Bíblico de la Watchtower de Galaad, e ke̱ʼéna escuela yóʼo ña̱ va̱ʼa sánáʼa̱na ku̱a̱ʼáka na̱ hermano ña̱ va̱ʼa ku̱ʼu̱nna natúʼunna xíʼin na̱ yiví xa̱ʼa̱ Ndióxi̱ ku̱a̱ʼání ñuu. Ta ni xi̱ndikaa̱kava guerra chi̱ndaʼána na̱ hermano ña̱ ku̱ʼu̱nna ku̱a̱ʼáka ñuu. Ta saátu na̱ ñuu Ndióxi̱ i̱xava̱ʼana iin Curso ña̱ Ministerio Teocrático f ña̱ va̱ʼa chindeétáʼanna xíʼin na̱ publicador ña̱ va̱ʼaka sanáʼa̱na na̱ yiví, ña̱yóʼo chi̱ndeétáʼanña xíʼin na̱ ndásakáʼnu Jehová ña̱ viíka keʼéna chiñu ña̱ kixi nu̱úna.

¹³ Kíʼinyó kuenta ña̱ mií Jehová xi̱niʼi yichi̱ nu̱ú na̱ ñuura tiempo ña̱ yo̱ʼvi̱ní kán. Tándi̱ʼi segunda guerra mundial na̱ ndásakáʼnu Jehová va̱ʼaní ki̱xáʼana nátúʼunna xíʼin na̱ yiví saáchi kǒokana nísasi nu̱úna ta ku̱a̱ʼání na̱ yiví ki̱xáʼa sa̱kúaʼa xa̱ʼa̱ Jehová, ta tiempo vitin xa̱a̱ iníísaá ñuyǐví nátúʼunyó xíʼinna.

14. ¿Nda̱chun xíniñúʼu kuniso̱ʼoyó ña̱ káʼa̱n na̱ Cuerpo Gobernante xíʼin na̱ anciano? (Apocalipsis 2:1; koto na̱ʼná).

¹⁴ Tiempo vitin na̱ Cuerpo Gobernante káʼa̱nna xíʼin ta̱ Jesús ña̱ chindeétáʼanra  xíʼinna. Chíkaa̱na ndee̱ ña̱ ndiʼi ña̱ káʼa̱nna xíʼinyó ná kooña nda̱a̱ táki̱ʼva kúni̱ mií Jehová xíʼin ta̱ Jesús. Ta na̱yóʼo xíniñúʼuna na̱ superintendente ña̱ circuito xíʼin na̱ anciano ña̱ va̱ʼa ka̱ʼa̱nna xíʼinyó ña̱ ndáka̱xinna keʼéna. g Na̱ anciano na̱ kúú ungido xíʼin inka na̱ anciano íyona chí ndaʼa̱ kúaʼa ta̱ Cristo (kaʼvi Apocalipsis 2:1). Na̱ yiví ku̱a̱chi kúú na̱ anciano ña̱kán sava yichi̱ kǒo kéʼé viína sava ña̱ʼa. Nda̱a̱ táki̱ʼva ndo̱ʼo ta̱ Moisés ta̱ Josué xíʼin na̱ apóstol (Núm. 20:12; Jos. 9:​14, 15; Rom. 3:23). Soo, kúnda̱a̱-iniyó ña̱ mií ta̱ Jesús kúú ta̱ níʼi yichi̱ nu̱ú na̱ Cuerpo Gobernante xíʼin na̱ anciano, ta keʼéraña nda̱a̱ ná ndiʼi-xa̱ʼa̱ ñuyǐví yóʼo (Mat. 28:20). Ña̱kán, ná kandíxayó ña̱ káʼa̱n na̱ hermano yóʼo.

ÑA̱ VA̱ʼA NDÁKIʼINYÓ XA̱ʼA̱ ÑA̱ XÍNISO̱ʼOYÓ ÑA̱ KÁʼA̱N JEHOVÁ

15, 16. ¿Ndáaña sákuaʼún xíʼin ña̱ kéʼé sava na̱ hermano?

¹⁵ Ku̱a̱ʼání ña̱ va̱ʼa ndákiʼinyó tiempo vitin tá xíniso̱ʼoyó ña̱ káʼa̱n Jehová. Tá kúú, ta̱ Andy xíʼin ñá síʼíra Rose h xi̱niso̱ʼona consejo ña̱ va̱xi nu̱ú Biblia ta vitin kuumiína loʼo ña̱ʼa (nu̱ú Biblia de estudio kivi nandukún Mateo 6:22 ta kotoún nota ña̱ u̱vi̱ ña̱ va̱xi xíʼin ña̱yóʼo). Ña̱yóʼo chi̱ndeétáʼan xíʼinna ña̱ ku̱ʼu̱nna kachíñuna nu̱ú íxava̱ʼana veʼe nu̱ú ndásakáʼnuyó Ndióxi̱. Ñá Rose káchiñá: “Sava yichi̱ xa̱a̱ xíyondi̱ ini veʼe ña̱ loʼoní ta kǒo nu̱ú ixava̱ʼandi̱ ña̱ kuxundi̱. Ta saátu kútóoníi̱ tavái̱ na̱ʼná soo ni̱xi̱koi̱ ku̱a̱ʼání cámara ña̱ xi̱kuumiíi̱ xíʼin inkaka ña̱ʼa ña̱ xi̱xiniñúʼi̱ xíʼin ña̱yóʼo. Ku̱suchíní-inii̱ xa̱ʼa̱ ña̱yóʼo soo xi̱kunii̱ koi̱ nda̱a̱ táki̱ʼva ni̱xi̱yo ñá Sara ñá síʼi ta̱ Abrahán. Kǒo kúnii̱ ndakaʼíi̱n xa̱ʼa̱ ña̱ sa̱ndákoi̱ chi kúnii̱ keʼíi̱ ña̱ kúni̱ Ndióxi̱” (Heb. 11:15). ¿Á kúsi̱í-inina xíʼin ña̱ nda̱kaxinna keʼéna? Ñá Rose káchikañá: “Kúsi̱íní-inindi̱ saáchi táxindi̱ ndiʼi ña̱ kúúmiíi̱ndi̱ ndaʼa̱ Jehová, saáchi tá káchíñundi̱ nu̱ú Jehová saá kúú ña̱ kíʼinndi̱ kuenta ndáa ki̱ʼva kundooyó tá xa̱a̱ ná kixaa̱ ñuyǐví xa̱á”. Ta, ¿ndáaña ndákanixi̱ní ta̱ Andy? Ta̱yóʼo káchira: “Kúsi̱íní-inindi̱ ña̱ káchíñundi̱ xa̱ʼa̱ Reino Ndióxi̱”.

¹⁶ ¿Ndáaña kúú inka ña̱ va̱ʼa ndákiʼinyó tá xa̱a̱ xíniso̱ʼoyó ña̱ káʼa̱n Jehová xíʼinyó? Ná ka̱ʼa̱nyó xa̱ʼa̱ ña̱ ndo̱ʼo iin ñá hermana ñá naní Marcia. Tá sa̱ndíʼiñá ka̱ʼviñá escuela ki̱xáʼañá kúúñá precursora (Mat. 6:33; Rom. 12:11). Ñáyóʼo káchiñá: “Iin universidad ni̱ka̱ʼa̱nna xíʼi̱n ña̱ taxina iin beca ndaʼíi̱ ta ni̱ka̱ʼa̱nna ña̱ ku̱mí  ku̱i̱ya̱ taxinaña. Soo, yi̱ʼi̱ xi̱kunii̱ kachíñui̱ nu̱ú Jehová ña̱kán ni̱xa̱ʼi̱n iin escuela nu̱ú sa̱náʼa̱na yi̱ʼi̱ keʼíi̱ iin chiñu ña̱ va̱ʼa koo xu̱ʼíi̱n ta koi̱ precursora. Va̱ʼaníva ña̱ nda̱kaxii̱n keʼíi̱, saáchi xa̱ʼa̱ ña̱ loʼo hora káchíñui̱ va̱ʼa kúii̱ precursora regular ta saátu kúi̱ voluntaria externa ti̱xin Betel ta kéʼékai̱ inka chiñu ti̱xin ñuu Ndióxi̱”.

17. ¿Ndáa inka ña̱ va̱ʼa ndakiʼinyó tá xíniso̱ʼoyó ña̱ káʼa̱n Jehová xíʼinyó? (Isaías 48:​17, 18).

¹⁷ Na̱ ñuu Jehová táxina consejo ndaʼa̱yó ña̱ kiʼinníyó kuenta xíʼin xu̱ʼún á káʼa̱nna xíʼinyó ña̱ kǒo keʼéyó ña̱ʼa ña̱ kivi sakúyaku̱a̱ miíyó nu̱ú Jehová, ña̱kán tá ná kuniso̱ʼoyó ña̱ káʼa̱n Jehová ku̱a̱ʼáníva ña̱ va̱ʼa ndakiʼinyó. Tá kúú, kǒo ña̱ʼa sándi̱ʼi̱-iniyó ta kǒo ki̱ʼviyó nu̱ú ku̱a̱chi (1 Tim. 6:​9, 10). Saá kivi chikaa̱yó ndee̱ ña̱ kachíñukayó nu̱ú Jehová. Kúsi̱íní-iniyó tá káchíñuyó nu̱ú Jehová ta kǒo ña̱ʼa sándi̱ʼi̱-iniyó (kaʼvi Isaías 48:​17, 18). i

18. ¿Nda̱chun ndiʼi tiempo kúni̱ún kuniso̱ʼún ña̱ káʼa̱n Jehová?

¹⁸ Kuniñúʼukava Jehová na̱ nda̱kaxinra ña̱ kuniʼina yichi̱ nu̱ú na̱ ñuura tá xa̱a̱ ná koo ña̱ gran tribulación ta saátu ti̱xin ña̱ mil ku̱i̱ya̱ tá xa̱a̱ ná kaʼndachíñu ta̱ Cristo (Sal. 45:16). Tiempo kán, ¿á kuniso̱ʼoyó ña̱ káʼa̱n Jehová ni kǒo kúni̱yó keʼéyóña? Tá xíniso̱ʼoyó ña̱ káʼa̱nra xíʼinyó tiempo vitin saátu kuniso̱ʼoyó ña̱ ka̱ʼa̱nra xíʼinyó chí nu̱únínu. Ña̱kán, ndiʼi tiempo ná kuniso̱ʼoyó ña̱ káʼa̱n Jehová xíʼinyó ta saátu ná kuniso̱ʼoyó na̱ nda̱kaxinra kuniʼi yichi̱ nu̱úyó (Is. 32:​1, 2; Heb. 13:17). Va̱ʼaní níʼi Jehová yichi̱ nu̱úyó saáchi chíndeétáʼanra xíʼinyó ña̱ va̱ása kuxíkayó nu̱úra tasaá va̱ʼa xa̱a̱yó kooyó nu̱ú ñuyǐví xa̱á ta kutakuyó ndiʼi saá tiempo.