Káxiníva káʼa̱n Biblia ña̱ kiviva kunda̱a̱-ini Jehová xa̱ʼa̱ ña̱ koo chi nu̱únínu (Is. 45:21). Soo, kǒo káʼa̱nvíña ndáa ki̱ʼva ké’éraña, ama kéʼéraña á ama ndáka̱xinra keʼéraña, ña̱kán xa̱ʼa̱ ña̱ kǒo xíni̱yó ndiʼi ña̱yóʼo kǒo kívi ka̱ʼa̱nyó ña̱ xíni̱yó ndiʼi ña̱ kéʼé Jehová, soo íyova sava ña̱ xíni̱yó.

Ndiʼiva ña̱ʼa kivi keʼé Jehová soo sava yichi̱ miíra kúú ta̱ ndáka̱xin ña̱ kǒo keʼéra savaña. Xa̱ʼa̱ ña ndíchiníra kivi ka̱ʼa̱nra xa̱ʼa̱ nda̱a̱ ndáaka ña̱ koo chí nu̱únínu (Rom. 11:33). Kiviva kunda̱a̱-ini Jehová xa̱ʼa̱ ndiʼi ña̱ koo chí nu̱únínu, soo miíra kúú ta̱ ndáka̱xin ña̱ kǒo kunda̱a̱-inira xa̱ʼa̱ ña̱yóʼo (chitáʼanña xíʼin Isaías 42:14).

Saxínuva Jehová ña̱ kúnira kuu. Ta, ¿ndáa ki̱ʼva kítáʼan ña̱yóʼo xíʼin ña̱ kúnda̱a̱-inira xa̱ʼa̱ ña̱ koo chí nu̱únínu? Isaías 46:10 káchiña: “Nda̱a̱ tá xa̱ʼa̱ví káʼi̱n xa̱ʼa̱ ña̱ koo so̱ndíʼi, ta xa̱a̱ ya̱chi̱ka káʼi̱n xa̱ʼa̱ ña̱ʼa ña̱ kúma̱níka kuu. ‘Yi̱ʼi̱ káʼi̱n ña̱yóʼo: Ña̱ nda̱kaxii̱n keʼíi̱ kǒo nasa̱maña ta ndiʼi ña̱ kúni̱i̱ keʼíi̱ keʼévai̱ña’”.

Xa̱ʼa̱ ña̱ kúúmiíní Jehová ndee̱ kivi saxínura ña̱ xa̱a̱ ni̱ka̱ʼa̱nra xa̱ʼa̱. Sava yichi̱ xa̱ʼa̱ ña̱ kúni̱yó kunda̱a̱-iniyó ndáa ki̱ʼva ndíʼi iin película sáya̱ʼayóña ta xítoyó nda̱a̱ nu̱ú ndíʼiña. Soo su̱ví saáví kéʼé Jehová ña̱ va̱ʼa kunda̱a̱-inira ndáaña koo chí nu̱únínu saáchi kivi ka̱ʼa̱nra xa̱ʼa̱ iin ña̱ʼa, ta tá ná kixaa̱ ki̱vi̱ kán saxínuvaraña (Éx. 9:​5, 6; Mat. 24:36; Hech. 17:31).

Xa̱ʼa̱ ña̱kán Jehová xíniñúʼura ña̱ tu̱ʼun “i̱xatu̱ʼvai̱”, “i̱xava̱ʼi̱” xíʼin ña̱ “chi̱kaa̱-inii̱ keʼíi̱” ña̱ va̱ʼa ka̱ʼa̱nra xa̱ʼa̱ ña̱ʼa ña̱ xi̱nu chí nu̱únínu (2 Rey. 19:25; nota; Is. 46:11). Tu̱ʼun hebreo ña̱ xi̱niñúʼuna nu̱ú versículo yóʼo inkáchi kúni̱ kachiña xíʼin ña̱ tu̱ʼun “alfarero” (Jer. 18:4). Ta̱ íxava̱ʼa ki̱si ku̱a̱ʼání ña̱ʼa kéʼéra xíʼin ñuʼú ña̱ va̱ʼa ixava̱ʼara iin ki̱si ña̱ liviní, ta saátu kéʼé Jehová chi kivi nasamara sava ña̱ʼa ña̱ va̱ʼa xi̱nu ña̱ kúni̱ra (Efes. 1:11).

Jehová táxira ña̱ ndaka̱xinyó ña̱ keʼéyó. Kǒo ndáka̱xin Jehová ña̱ kundoʼo iin tá iin na̱ yiví ta ni kǒo íxanduxa̱ra xíʼin na̱ yiví va̱ʼa ña̱ keʼéna iin ña̱ʼa ña̱ sandíʼi-xa̱ʼa̱ miína, saáchi sánáʼa̱ra miíyó ndáa ki̱ʼva kooyó, ta saátu táxira ña̱ ndaka̱xinyó á kuniso̱ʼoyó ña̱ káʼa̱nra á ña̱ kǒo kuniso̱ʼoyóra.

Ná ka̱ʼa̱nyó xa̱ʼa̱ u̱vi̱ ejemplo. Na̱ nu̱ú na̱ ka̱ʼa̱nyó xa̱ʼa̱ kúú na̱ xi̱ndoo ñuu Nínive. Kininí xi̱keʼé na̱ yiví na̱ xi̱ndoo kán, xa̱ʼa̱ ña̱yóʼo ni̱ka̱ʼa̱n Jehová ña̱ sandíʼi-xa̱ʼa̱rana. Soo na̱yóʼo nda̱ndikóva-inina xa̱ʼa̱ ña̱kán na̱samara ña̱ nda̱kanixi̱níra keʼéra xíʼinna ta kǒo níchíndaʼákara tu̱ndóʼo nu̱úna (Jon. 3:​1-10). ¿Nda̱chun kǒo nísandíʼi-xa̱ʼa̱ Jehová na̱ xi̱ndoo ñuu Nínive? Saáchi xi̱niso̱ʼona ña̱ ni̱ka̱ʼa̱nra ta nda̱ndikó-inina.

Inka ejemplo kúú profecía ña̱ ni̱ka̱ʼa̱n xa̱ʼa̱ ta̱ Ciro. Profecía ni̱ka̱ʼa̱nña xa̱ʼa̱ra ña̱ sañára na̱ judío nu̱ú xi̱ndasina ta ka̱ʼa̱nra ña̱ ndasaviína templo Jehová (Is. 44:​26–45:4). Jehová xi̱niñúʼura ta̱ rey Ciro ta̱ ñuu Persia ña̱ va̱ʼa xi̱nu profecía yóʼo (Esd. 1:​1-4). Soo, ta̱ Ciro kǒo níxi̱ndasakáʼnuvíra Jehová, nisaá xi̱niñúʼuvarara ña̱ va̱ʼa xi̱nu profecía yóʼo ta kǒo ní ixandúxara xíʼinra ña̱ ndasakáʼnurara (Prov. 21:1).

Íyo ku̱a̱ʼákava ña̱ kivi ka̱ʼa̱nyó xa̱ʼa̱, soo miíyó na̱ yiví kǒo kívi kunda̱a̱-iniyó ndáa ki̱ʼva ndákanixi̱ní Jehová á ndáa ki̱ʼva kéʼéra iin ña̱ʼa, ña̱kán kǒo kúnda̱a̱-iniyó ndáaña kéʼéra ña̱ va̱ʼa kunda̱a̱-inira xa̱ʼa̱ ña̱ koo chí nu̱únínu (Is. 55:​8, 9). Soo, loʼo ña̱ kúnda̱a̱-iniyó xa̱ʼa̱ Jehová chíndeétáʼanña xíʼinyó ña̱ kandíxayó ña̱ nina ña̱ va̱ʼa kéʼéra tiempo vitin ta saátu ña̱ keʼéra chí nu̱únínu.