TÁ SA̱NÁʼA̱ ta̱ Jesús na̱ discípulora ña̱ ku̱ʼu̱nna natúʼunna xa̱ʼa Ndióxi̱, xi̱kunda̱a̱-inira ña̱ su̱ví ndiʼi na̱ yiví kuniso̱ʼo ña̱ natúʼunna xíʼinna (Luc. 10:3, 5, 6). Sava yichi̱ ndáni̱ʼíyó na̱ yiví na̱ káʼa̱n ndi̱va̱ʼa xíʼinyó á íxandi̱va̱ʼana xíʼinyó. Ta xa̱ʼa ña̱yóʼo íxayo̱ʼvi̱ña xíʼinyó ña̱ kundáʼvi-iniyó kuniyóna.

Na̱ kúndáʼvi-ini xíni inkana xítona ndáaña kúma̱ní nu̱ú na̱ yiví yóʼo ta chíndeétáʼanna xíʼinna. Tá kǒo kúndáʼvi-iniyó xíniyó na̱ yiví, sana kǒo kundi̱ʼi̱ka-iniyó ña̱ ku̱ʼu̱nyó natúʼunyó xa̱ʼa Ndióxi̱, ta nda̱a̱ sana va̱ása va̱ʼa keʼéyóña. Soo tá ná chika̱a̱yó ndée ña̱ kundáʼvi-iniyó kuniyóna nda̱a̱ kuni̱kayó natúʼunyó xa̱ʼa Ndióxi̱ xíʼinna. Ta ña̱yóʼo kooña nda̱a̱ táki̱ʼva íyo iin ñuʼu̱ ña̱ va̱ása ndáʼva̱ chi chíka̱a̱kayó titu̱n nu̱úña (1 Tes. 5:19).

¿Ndáaña keʼéyó ña̱ va̱ʼa kundáʼvika-iniyó kuniyó na̱ yiví ni íxayo̱ʼvi̱ña xíʼinyó? Ka̱ʼa̱nyó xa̱ʼa u̱ni̱ ejemplo na̱ kivi kundiku̱nyó yichi̱: Jehová, ta̱ Jesús xíʼin ta̱ apóstol Pablo.

Xa̱a̱ ku̱a̱ʼání ku̱i̱ya̱ kúndeé-ini Jehová xíʼin ndiʼi ña̱ vatá ña̱ káʼa̱nna xa̱ʼara. Ta ni saáví va̱ʼaní inira xíʼin na̱ ndi̱va̱ʼa-ini (Luc. 6:35). Ndátuníra xíʼinna. Chi “kúni̱ra ná ka̱ku ndiʼi na̱ yiví” (1 Tim. 2:3, 4). Ni kúndasíra xínira ña̱ kini, soo ndáyáʼviní na̱ yiví nu̱úra va̱ása kúni̱ra ña̱ kuvi ni iinna (2 Ped. 3:9).

Jehová xíni̱ra chi ta̱ Ndi̱va̱ʼa kúú ta̱ sási nu̱ú na̱ yiví na̱ kǒo xíni xa̱ʼara (2 Cor. 4:3, 4). Tá válívína sa̱náʼa̱nana ña̱ vatá xa̱ʼa Ndióxi̱. Ña̱kán íxayo̱ʼvi̱ña xíʼinna ña̱ kandíxana ña̱ káʼa̱n Biblia. Soo Jehová kúni̱ra chindeétáʼanra xíʼinna. ¿Nda̱chun va̱ʼa kúnda̱a̱-iniyó ña̱yóʼo?

Ná ka̱ʼa̱nyó xa̱ʼa na̱ xi̱ndoo ñuu Nínive. Ni ndi̱va̱ʼaní ni̱xi̱yo inina, Jehová ni̱ka̱ʼa̱nra xíʼin ta̱ Jonás: “¿Á va̱ása xíniñúʼu kundáʼvi-inii̱ kunii̱ na̱ ñuu Nínive, ki̱ʼva ciento o̱ko̱ mil kúú na̱ yiví ndóo yóʼo ta ni va̱ása xíni̱na ndáaña kúú ña̱ va̱ʼa ta ndáaña va̱ása va̱ʼa[?]” (Jon. 4:11). Jehová ku̱nda̱a̱-inira na̱ ñuu Nínive ni loʼo va̱ása xíni̱na xa̱ʼara. Ña̱kán ku̱ndáʼvi-inira xi̱nirana ta ni̱ka̱ʼa̱nra xíʼin ta̱ Jonás ña̱ ná ku̱ʼu̱nra ka̱ʼa̱nra xíʼinna xa̱ʼa ña̱ ni̱ka̱ʼa̱n Jehová kixi nu̱úna.

Saátu miíyó ndáyáʼviní na̱ yiví nu̱úyó nda̱a̱ táki̱ʼva íxaa Jehová. Kiviva kundiku̱nyó yichi̱ Jehová tá kúni̱yó chindeétáʼanyó xíʼin na̱ yiví na̱ nátúʼunyó xíʼin, ni tá kǒo xíínna kuniso̱ʼona ña̱ nátúʼunyó xíʼinna.

Tá kǒo xíín na̱ yiví kuniso̱ʼo va̱ʼana ña̱ káʼa̱nyó xíʼinna, xíniñúʼu kotoyó ndáa xa̱ʼa kúúña kǒo  xíínna. Savana va̱ása xíínna kunina Biblia ku̱a̱chi na̱ yiví na̱ káʼa̱n kúú cristiano ta su̱ví ña̱ va̱ʼa kéʼéna. Savana nina tu̱ʼun vatá ni̱ka̱ʼa̱nna xíʼinna xa̱ʼa ña̱ kándíxayó. Á sanatu yíʼvina tá ná kuniso̱ʼona ña̱ nátúʼunyó xíʼinna kivi kusi̱kindaa na̱ ndóo yatin xíʼinnana á na̱ veʼena.

Savatuna kǒo xíínna kuniso̱ʼona chi ku̱a̱ʼá ña̱ʼa ndo̱ʼona tá ya̱chi̱ á i̱xandi̱va̱ʼana xíʼinna á inkaka ña̱ʼa ndo̱ʼona. Iin ñá misionera ñá naní Kim káchiñá: “Iin ñuu nu̱ú nátúʼunndi̱ xa̱ʼa Ndióxi̱, ndo̱ʼonína tá ni̱xi̱yo guerra á ndi̱ʼi-xa̱ʼa ndiʼi ña̱ʼana. Ta ni kǒo ña̱ va̱ʼa ndátukana chí nu̱únínu. Va̱ása va̱ʼa kúnina ta ni iinna kǒo xíínna kandíxana. Ta na̱ yiví ñuu kán, kǒo xíínna kuniso̱ʼona ña̱ nátúʼunyó xíʼinna. Iin yichi̱ ni̱xa̱a̱na sa̱sina nu̱úi̱ tá xíkai̱ nátúʼi̱n xa̱ʼa Ndióxi̱”.

¿Ndáaña kéʼé ñá Kim ña̱ va̱ʼa náʼa̱ñá ña̱ kúndáʼvi-iniñá xíniñá na̱ yiví yóʼo? Ñáyóʼo káchiñá: “Tá íxandi̱va̱ʼana xíʼi̱n, ndákaʼíi̱n xa̱ʼa tu̱ʼun ña̱ va̱xi nu̱ú Proverbios 19:11: ʻNa̱ va̱ʼaní ndákanixi̱ní va̱ása sáa̱ kamanaʼ. Ña̱ ndákaʼíi̱n xa̱ʼa ña̱ ni̱ya̱ʼa na̱ yiví chíndeétáʼanña xíʼi̱n ña̱ kundáʼvi-inii̱ kunina. Ta su̱ví ndiʼiví na̱ yiví kǒo xíín kuniso̱ʼo ña̱ nátúʼunndi̱ xíʼinna. Ñuu yóʼo íyo ku̱a̱ʼá na̱ revisitandi̱”.

Ta saátu kivi ndakanixi̱níyó ndáaña keʼé miíyó tá miíyó ná koo na̱ yiví na̱ xa̱a̱na natúʼunna xíʼin xa̱ʼa Ndióxi̱. Tá ná kachiyó saá, ku̱a̱ʼání yichi̱ ni̱ka̱ʼa̱nna tu̱ʼun vatá xa̱ʼa na̱ testigo Jehová xíʼinyó, sana va̱ása va̱ʼa ndakuiintu miívayó yuʼúna tá ná xa̱a̱na natúʼunna xíʼinyó ta xíniñúʼu kundáʼvi-inina kunina miíyó ña̱ va̱ʼa tuku ndikóna nu̱úyó. Tá ná ndakaʼányó xa̱ʼa ña̱ ni̱ka̱ʼa̱n ta̱ Jesús ña̱ xíniñúʼu keʼéyó xíʼin na̱ yiví táki̱ʼva kúni̱yó keʼéna xíʼinyó, ña̱yóʼo chindeétáʼan xíʼinyó ña̱ kundáʼvi-iniyó kuniyóna ni íxayo̱ʼvi̱ña xíʼinyó (Mat. 7:12).

Ta̱ apóstol Pablo va̱ʼa ni̱xi̱yo inira nda̱a̱ xíʼin na̱ yiví na̱ xi̱sa̱a̱-ini xi̱xiniñaʼá. ¿Nda̱chun va̱ʼa ni̱xi̱yo inira xíʼinna? Saáchi xi̱ndakaʼánra xa̱ʼa ndáa ki̱ʼva ni̱xi̱yo miíra tá ya̱chi̱. Káchira: ʻTá ya̱chi̱ xi̱kui̱ iin ta̱ xi̱ka̱ʼa̱n ndi̱va̱ʼa xa̱ʼa na̱ ndásakáʼnu Ndióxi̱ ta i̱xandi̱va̱ʼi̱ xíʼinna. Soo ku̱ndáʼvi-ini ta̱ Jesús xi̱nira yi̱ʼi̱, chi ndiʼi ña̱ ke̱ʼíi̱ xa̱ʼa ña̱ kǒo kúnda̱a̱-inii̱ xi̱kuuñaʼ (1 Tim. 1:13). Ta̱ Pablo, na̱kunda̱a̱-inira Jehová xíʼin ta̱ Jesús kúú na̱ va̱ʼaní ni̱xi̱yo ini xíʼinra. Ta sana xi̱xitora na̱ xi̱natúʼunra xíʼin ña̱ xi̱keʼéna xíʼinra táki̱ʼva xi̱keʼé miíra.

Sava yichi̱, ta̱ Pablo xi̱ndani̱ʼíra na̱ yiví na̱ ndeéní xi̱kandíxa ña̱ sánáʼa̱ na̱ veʼe-ñu̱ʼu vatá. ¿Ndáaña xi̱keʼé ta̱ Pablo? Hechos 17:16 káchiña  tá iin yichi̱ ña̱ xíkara chí ñuu Atenas ʻni̱sa̱a̱ra ña̱ xi̱nira ña̱ ndeéní ndásakáʼnuna inka ndióxi̱ʼ. Soo ña̱ ke̱ʼéra kúúña na̱túʼunra xíʼinna xa̱ʼa Ndióxi̱ (Hech. 17:22, 23). Ta̱ Pablo xi̱ndukúra ndáa ki̱ʼva ka̱ʼa̱nra xíʼin iin iinna ña̱ va̱ʼa ka̱kuna (1 Cor. 9:20-23).

Tá ndáni̱ʼíyó na̱ yiví na̱ kǒo xíín kuniso̱ʼo ña̱ sánáʼa̱yó, ná keʼéyó táki̱ʼva ke̱ʼé ta̱ Pablo. Ná kuniñúʼuyó ña̱ xíni̱yó xa̱ʼa na̱ yiví yóʼo ña̱ va̱ʼa sánáʼa̱yóna xa̱ʼa Ndióxi̱ (Is. 52:7). Iin ñá hermana ñá naní Dorothy káchiñá: “Ku̱a̱ʼání na̱ yiví na̱ ndóo ñuu nu̱ú nátúʼunndi̱ xa̱ʼa Ndióxi̱, káchina Ndióxi̱ tá tíinra ku̱a̱chi xíʼinyó va̱ása kúndáʼvi-inira xínira miíyó. Siʼna káʼi̱n xíʼinna xa̱ʼa ña̱ va̱ʼaní íxaana ña̱ kándíxana Ndióxi̱ tándi̱ʼi náʼi̱ nu̱úna ña̱ káʼa̱n Biblia xa̱ʼa Jehová ña̱ kúʼvi̱-inira xínira miíyó xíʼin xa̱ʼa ña̱ káʼa̱nra taxira ndaʼa̱yó chí nu̱únínu”.

Saátu xíniñúʼu ndakanixi̱níyó ndáa ki̱ʼva taxiyó ndée ndaʼa̱ na̱ hermano na̱ kítayó xíʼin ña̱ nátúʼunyó xa̱ʼa Ndióxi̱. Ñá Jessica káchiñá: “Tá iindi̱ va̱ása va̱ʼa ña̱ níndoʼondi̱ tá kéendi̱ nátúʼunndi̱ xa̱ʼa Ndióxi̱, chíka̱i̱ ndée ña̱ kǒo ndakaniníxi̱níi̱ xa̱ʼa ña̱yóʼo. Va̱ʼaka kíxáʼíi̱ nátúʼi̱n xa̱ʼa iin ña̱ va̱ʼa, ni íyo na̱ yiví na̱ kǒo xíín kuniso̱ʼo ña̱ káʼa̱nyó, íyotu na̱ va̱ʼaní chíndeétáʼan ña̱ kéʼéyó xíʼin”.

Jehová xíni va̱ʼavara ña̱ yáʼayó nu̱ú tá xíkayó nátúʼunyó xa̱ʼara, ta kúsi̱íní-inira tá xítora ña̱ kúndáʼvi-iniyó xíniyó na̱ yiví táki̱ʼva kéʼé miíra (Luc. 6:36). Ndióxi̱ su̱ví ndiʼi tiempo kundáʼvi-inira kunira na̱ yiví. Ná kandíxaníyó chi xíni̱ va̱ʼavara ama kúú ña̱ sandiʼi-xa̱ʼara ñuyǐví yóʼo. Vitinka kúúña xíniñúʼuní kundi̱ʼi̱-iniyó ña̱ kakayó natúʼunyó xa̱ʼa Ndióxi̱ (2 Tim. 4:2). Ña̱kán ná chika̱a̱kayó ndée ña̱ natúʼunyó xa̱ʼa Ndióxi̱ ta ná kundáʼvi-iniyó kuniyó ndiʼi na̱ yiví.