1, 2. a) ¿Nda̱chun va̱ʼaní tá ná kutáʼanyó xíʼin Jehová? b) ¿Ndáaña sakuaʼayó nu̱ú artículo yóʼo?

IINLÁ Ndióxi̱yó kúú ta̱ íyoní ndée, ndíchiníra ta kúni̱níra xínira miíyó. Xa̱ʼa ña̱yóʼo kúú ña̱ kúni̱níyó koo yatinyó nu̱úra ta kutáʼanyó xíʼinra (Sal. 96:4-6). Soo ni saá, savana kǒo kéʼéna ña̱ kúni̱ Jehová ta sándákoona ña̱ kítáʼanna xíʼinra.

² Nu̱ú artículo yóʼo sakuaʼayó xa̱ʼa sava na̱ xi̱ka̱ʼa̱n ña̱ xi̱táʼanna xíʼin Jehová soo xi̱keʼétuna ña̱ va̱ása va̱ʼa nu̱úra. Kivi sakuaʼayó xíʼin ña̱ ndo̱ʼo na̱yóʼo ña̱ va̱ʼa koo nda̱kú-iniyó xíʼin Jehová.

3. ¿Nda̱chun ni̱ka̱ʼa̱n Jehová xíʼin ta̱ Caín ña̱ ná nasamara ña̱ kéʼéra?

³ Ná sakuaʼayó xa̱ʼa ta̱ Caín. Nu̱ú mií ta̱yóʼo Jehová kúú ta̱ xi̱ndasakáʼnura su̱ví inka ndióxi̱. Soo Jehová va̱ása níxikutóora ña̱ xi̱keʼé ta̱yóʼo, chi xi̱xitora ña̱ ndíka̱a̱ ña̱ va̱ása va̱ʼa níma̱ra (1 Juan 3:12). Ña̱kán ni̱ka̱ʼa̱nra xíʼin ta̱ Caín tá ná nasamara miíra ta keʼéra ña̱ va̱ʼa, kivi kutáʼan tukura xíʼinra. Ta ni̱ka̱ʼa̱nra xíʼinra tá ná kǒo nasamara miíra ndakavara ndaʼa̱ ku̱a̱chi. Tándi̱ʼi ni̱nda̱ka̱tu̱ʼunrara: “Ta miíún, ¿á kuchiñún  xíʼinña?” (Gén. 4:6, 7). Ña̱ kúni̱ Jehová ka̱ʼa̱nra kúúña ta ná ndikó-inira xa̱ʼa ña̱ kéʼéra ta ndakutáʼanra xíʼinra, Jehová va̱ása sandákoorara.

4. ¿Ndáaña ke̱ʼé ta̱ Caín tá ni̱ka̱ʼa̱n Jehová xíʼinra ña̱ ná nasamara ña̱ ndákanixi̱níra?

⁴ Ta̱ Caín kivi ndakutáʼan tukura xíʼin Ndióxi̱ tá ná nasamara ña̱ ndákanixi̱níra. Soo va̱ása níxiniso̱ʼora consejo Jehová. Xa̱ʼa ña̱ nda̱kanixi̱níra ña̱ kini, ke̱ʼéra ña̱ va̱ása va̱ʼa (Sant. 1:14, 15). ¿Á nda̱kanixi̱ní ta̱ Caín tá ni̱xi̱yo loʼora ña̱ xa̱a̱ra koora contra Jehová? Sana kǒo ña̱yóʼo níndakanixi̱níra. Soo tá ni̱ya̱ʼa tiempo ke̱ʼévaraña: ni̱ya̱ʼandosóra ña̱ ni̱ka̱ʼa̱n Ndióxi̱ ta xa̱ʼníra ñanira.

5. ¿Ndáaña kivi sakúxíka miíyó nu̱ú Jehová?

⁵ Nda̱a̱ táki̱ʼva ni̱xi̱yo ta̱ Caín, sana saá kivi keʼé iin na̱ hermano kivi ka̱ʼa̱nna ña̱ ndásakáʼnuna Ndióxi̱ soo kéʼéna ña̱ va̱ása va̱ʼa nu̱úra (Jud. 11). Sana ku̱a̱ʼání tiempo xíkana nátúʼunna xa̱ʼa Ndióxi̱ á xáʼa̱nna ndiʼi reunión, soo saátu ndákanixi̱nína xa̱ʼa ña̱ kini, á ndákanixi̱nína ña̱ koo ku̱a̱ʼá xu̱ʼúnna á sáa̱-inina xínina inkana (1 Juan 2:15-17; 3:15). Xa̱ʼa ña̱ ndákanixi̱nína ña̱yóʼo kivi xa̱a̱na ki̱ʼvina ku̱a̱chi. Sana savana kǒo kúnda̱a̱-inina xa̱ʼa ña̱ ndákanixi̱níyó á xa̱ʼa ña̱ kéʼéyó, soo Jehová xíni̱ ndiʼira xa̱ʼaña ta kúnda̱a̱-inira á ndixa kítáʼanyó xíʼinra (kaʼvi Jeremías 17:9, 10). *

6. ¿Nda̱saa chíndeétáʼan Jehová xíʼinyó ña̱ kǒo ndakavayó ndaʼa̱ ku̱a̱chi?

⁶ Ta ni saá, Jehová va̱ása ndákanixi̱níra ña̱ va̱ása nasa̱mayó. Tá xítora ña̱ ku̱a̱ʼa̱n kúxíkayó nu̱úra káʼa̱nra ña̱yóʼo xíʼinyó: “Ndikóndó nu̱úi̱ ta yi̱ʼi̱ ndikói̱ nu̱úndó” (Mal. 3:7). Tá íxayo̱ʼvi̱kaña xíʼinyó ña̱ keʼéyó ña̱ va̱ʼa, saá kúú ña̱ kúni̱níka Jehová ña̱ ná kundasíyó ña̱ kini (Is. 55:7). Tá ná keʼéyó ña̱yóʼo, taxira ndée ndaʼa̱yó ña̱ va̱ʼa kuchiñuyó xíʼin ndiʼi tu̱ndóʼo ña̱ va̱xi nu̱úyó (Gén. 4:7).

7. ¿Ndáaña ke̱ʼé ta̱ Salomón ña̱kán sa̱ndákoora ña̱ kítáʼanra xíʼin Jehová?

⁷ Kivi sakuaʼayó ku̱a̱ʼání ña̱ʼa xa̱ʼa ña̱ ke̱ʼé ta̱ Salomón. Tá ni̱xi̱yo loʼora ndu̱kúra yichi̱ nu̱ú Jehová, ta Jehová ta̱xira ku̱a̱ʼání ña̱ ndíchi ndaʼa̱ra ta ni̱ka̱ʼa̱nra xíʼinra ña̱ ná keʼéra iin templo káʼnu chí ñuu Jerusalén. Soo ta̱ Salomón sa̱ndákoora ña̱ kítáʼanra xíʼin Jehová (1 Rey. 3:12; 11:1, 2). Ña̱ ley Ndióxi̱ xi̱ka̱ʼa̱n káxiña xíʼin na̱ rey ñuu Israel ña̱ va̱ása kívi tindaʼa̱na xíʼin ku̱a̱ʼání ná ñaʼá chi kivi kuxíkana nu̱ú Ndióxi̱ (Deut. 17:17). Soo ta̱ Salomón va̱ása níxiniso̱ʼora ña̱ ni̱ka̱ʼa̱n Ndióxi̱, tá ni̱ya̱ʼa tiempo ti̱ndaʼa̱ra xíʼin 700 ná ñaʼá, ta ni̱xi̱yotura xíʼin inka 300 ná ñaʼá (1 Rey. 11:3). Ku̱a̱ʼání náyóʼo su̱ví ná ñuu Israel níxikuuná ta xi̱ndasakáʼnuná ndióxi̱ vatá. Xíʼin ña̱yóʼo kúnda̱a̱-iniyó, ña̱ ni̱ya̱ʼandosóra inka ley ña̱ káʼa̱n ña̱ va̱ása va̱ʼa ti̱ndaʼa̱na xíʼin ná ñaʼá ná inka ñuu (Deut. 7:3, 4).

8. ¿Ndáaña va̱ása va̱ʼa ke̱ʼé ta̱ Salomón nu̱ú Jehová?

⁸ Ta̱ Salomón loʼo loʼo sa̱ndákoora kéʼéra ña̱ káʼa̱n ley Ndióxi̱ ta ki̱xaʼára kéʼéra ña̱ va̱ása va̱ʼa. I̱xava̱ʼara iin altar nu̱ú ñá ndióxi̱ Astoret ta inkaña nu̱ú ndióxi̱ vatá Kemós. Tasaá ki̱xaʼára ndásakáʼnura Ndióxi̱ vatá xíʼin ná síʼíra. Nda̱a̱ ni̱xa̱a̱ra i̱xava̱ʼara altar iin nu̱ú yuku̱ ña̱ xítondaa xíʼin ñuu Jerusalén nu̱ú i̱xava̱ʼara templo Jehová (1 Rey. 11:5-8; 2 Rey. 23:13). Ta̱ Salomón sa̱ndáʼvira miíra ña̱ nda̱kanixi̱níra, ña̱ koo káʼnu-ini Ndióxi̱ xa̱ʼara ni ná keʼéra ña̱ va̱ása va̱ʼa, nda̱a̱ nani  kúúña ná taxira kití ndaʼa̱ Jehová chí templo.

9. ¿Ndáa tu̱ndóʼo ki̱xi nu̱ú ta̱ Salomón xa̱ʼa ña̱ kǒo níxiniso̱ʼora ña̱ ni̱ka̱ʼa̱n Jehová xíʼinra?

⁹ Soo Ndióxi̱ va̱ása sáyaʼandosóra ku̱a̱chi ña̱ kéʼé iinna. Ña̱ Biblia káchiña: “Ta ni̱sa̱a̱ Jehová xíʼin ta̱ Salomón saáchi níma̱ra ku̱xíkaña nu̱ú Jehová [...], ta̱ ki̱ta u̱vi̱ yichi̱ nu̱úra. Ta xa̱a̱ ni̱ka̱ʼa̱n Ndióxi̱ xíʼinra xa̱ʼa ña̱yóʼo ña̱ ná kǒo kundiku̱nra inka ndióxi̱; soo ta̱yóʼo va̱ása níxiniso̱ʼora ndiʼi ña̱ ni̱ka̱ʼa̱n Jehová xíʼinra”. Xa̱ʼa ña̱yóʼo, va̱ása níchindeétáʼanka Ndióxi̱ xíʼinra. Ña̱ reino ñuu Israel, u̱vi̱ nda̱taʼvíña. Na̱ se̱ʼe ta̱ Salomón na̱ xi̱niñúʼu kaʼndachíñu nu̱ú na̱ ñuu Israel va̱ása níxaʼndachíñukana, ta ku̱a̱ʼání tu̱ndóʼo ki̱xi nu̱úna (1 Rey. 11:9-13).

10. ¿Ndáaña kivi sandiʼi-xa̱ʼa ña̱ kítáʼanyó xíʼin Jehová?

¹⁰ Nda̱a̱ táki̱ʼva ndo̱ʼo ta̱ Salomón, iin ña̱ kivi sakúxíka miíyó nu̱ú Jehová kúú ña̱ kutáʼanyó xíʼin na̱ kǒo kéʼé ña̱ káʼa̱nra. Ta sava na̱yóʼo kivi koona na̱ xáʼa̱n xíʼinyó ti̱xin congregación soo va̱ása ndakú íyo inina xíʼin Jehová ta kéʼéna ña̱ va̱ása va̱ʼa. Kivitu koona na̱ veʼeyó na̱ va̱ása ndasakáʼnu Jehová, na̱ ndóo yatin xíʼinyó, na̱ káchíñu xíʼinyó á na̱ káʼvi escuela xíʼinyó. Nda̱a̱ ndáaka na̱ kúúna, tá na̱yóʼo va̱ása íxato̱ʼóna ña̱ káʼa̱n Jehová kivi sakúxíkana miíyó nu̱úra.

11. ¿Ndáaña kivi chindeétáʼan xíʼinyó ña̱ ndaka̱xinyó ndáana koo migoyó?

¹¹ (Kaʼvi 1 Corintios 15:33). * Ku̱a̱ʼání na̱ yiví va̱ʼava ña̱ kéʼéna ni kǒo kúúna testigo Jehová. Soo tá kúú na̱yóʼo migoyó, ¿á kúni̱ kachiña kǒo ña̱ ndoʼoyó xíʼinna? Xíniñúʼu koto va̱ʼayó tá kítáʼanyó xíʼin na̱yóʼo á chindeétáʼanna xíʼinyó ña̱ kutáʼan va̱ʼakayó xíʼin Jehová. Ná kotoyó ndáaña kúú ña̱ ñúʼu níma̱na. Tá kúú ña̱yóʼo, ¿ndáaña káʼa̱nna xa̱ʼa? ¿Á nina xa̱ʼa ña̱ʼa ña̱ sa̱kán kána káʼa̱nna, ña̱ koo si̱ína, ña̱ koo ku̱a̱ʼá xu̱ʼúnna, á ña̱ kuumiína iin celular xa̱á á inkaka ña̱ʼa? Ta̱ Jesús ni̱ka̱ʼa̱nra ña̱yóʼo: “Ña̱ ndíka̱a̱ níma̱yó kúú ña̱ káʼa̱nyó” (Mat. 12:34). Ña̱kán tá xítoyó ña̱ va̱ása va̱ʼa na̱ kítáʼan xíʼinyó ta nda̱a̱ kivi sakúxíkana miíyó nu̱ú Jehová, ná va̱ása kitáʼankayó xíʼinna (Prov. 13:20).

12. a) ¿Ndáaña ni̱ka̱ʼa̱n Jehová xíʼin na̱ ñuu Israel tá xa̱a̱ ke̱ena ñuu Egipto? b) ¿Ndáaña nda̱kuiin na̱ ñuu Israel tá ni̱nda̱ka̱tu̱ʼun Jehová miína?

¹² Kivitu sakuaʼayó xíʼin ña̱ ndo̱ʼo na̱ ñuu Israel tá sa̱kán ke̱ena ñuu Egipto. Tá ni̱xa̱a̱na nu̱ú yuku̱ Sinaí, Jehová ni̱na̱ʼa̱ra nu̱úna ña̱ íyora xíʼinna chi ke̱ʼéra milagro nu̱úna: ka̱na  iin vi̱kó ndáa, ni̱ni̱ʼi chí ndiví, ka̱ni taxa, ka̱na yi̱ʼma ta ndeékaví ka̱ʼa ni kǒo sáyaaña nda̱a̱ táki̱ʼva káʼa ndi̱ki̱ si̱ndi̱ki̱ saá ka̱ʼaña (Éx. 19:16-19). Yóʼo kúú nu̱ú ni̱ka̱ʼa̱n Jehová xíʼin na̱ ñuu Israel ña̱ iinlá miíra kúni̱ra ná ndasakáʼnuna. Ta ni̱ka̱ʼa̱ntura ña̱ nda̱kú koora xíʼin na̱ kúʼvi̱-ini xíniñaʼá ta kándíxana ña̱ káʼa̱nra (kaʼvi Éxodo 20:3, 5, 6). * Xíʼin ña̱ ni̱ka̱ʼa̱nra yóʼo ni̱na̱ʼa̱ra ña̱ va̱ása kuxíkara nu̱úna, tá va̱ása kúxíkana nu̱úra. Soo tá níxi̱yo miíyó tiempo saá ¿ndáaña keʼéyó? Sana keʼéyó nda̱a̱ táki̱ʼva ke̱ʼé na̱ ñuu Israel, ña̱ Biblia káchiña “ta na̱yóʼo inkáchi nda̱kuiin ndiʼina ta ka̱china: ‘Ndiʼi chiñu ña̱ xáʼnda Jehová keʼévandi̱ñaʼ” (Éx. 24:3). Soo loʼo tiempo ni̱ya̱ʼa ki̱xa̱a̱ ki̱vi̱ ña̱ na̱ʼa̱na á ndixa nda̱kú íyo inina xíʼin Jehová.

13. ¿Nda̱chun va̱ása nda̱kú níxi̱yo ini na̱ ñuu Israel xíʼin Ndióxi̱?

¹³ Na̱ ñuu Israel ni̱yi̱ʼvína tá xi̱nina vi̱kó ndáa, xíʼin taxa xíʼin ndiʼika ña̱ ke̱ʼé Ndióxi̱. Ña̱kán ni̱ka̱ʼa̱nna xíʼin ta̱ Moisés va̱ʼaka ta̱kán ná ka̱ʼa̱n xíʼin Jehová (Éx. 20:18-21). Xa̱ʼa ña̱yóʼo ta̱ Moisés nda̱ara xi̱ní yu̱ku̱ Sinaí, ta ku̱a̱ʼání tiempo ki̱ndo̱ora kán. Xa̱ʼa ña̱ kǒo ta̱ níʼi yichi̱ nu̱úna íyo xíʼinna ¿á ni̱ndo̱o miína kán? Na̱ ñuu yóʼo ta̱ Moisés xi̱nda̱a-inina ña̱ chindeétáʼanra xíʼinna ña̱ kandíxana Ndióxi̱. Xa̱ʼa ña̱yóʼo tá xa̱a̱ ku̱a̱ʼá tiempo ni̱ya̱ʼa ta kǒo ta̱ Moisés ndíkó, ni̱ndi̱ʼi̱-inina ta ni̱ka̱ʼa̱nna xíʼin ta̱ Aarón: “Xaún ta keʼé iin ndióxi̱ ña̱ kuniʼi yichi̱ nu̱úyó chi ta̱ Moisés ta̱ ta̱vá miíyó chí ñuu Egipto va̱ása xíni̱yó ndáaña ndo̱ʼora” (Éx. 32:1, 2).

14. a) ¿Ndáaña va̱ása va̱ʼa nda̱kanixi̱ní na̱ ñuu Israel? b) Soo, ¿ndáaña ke̱ʼé Jehová?

¹⁴ Na̱ ñuu Israel kúnda̱a̱-inina ña̱ va̱ása va̱ʼa ndasakáʼnuna inka Ndióxi̱ chi iin ku̱a̱chi káʼnu kúúña nu̱ú Jehová (Éx. 20:3-5). Soo ni saá loʼo tiempo ni̱ya̱ʼa ta ki̱xaʼána ndásakáʼnuna si̱ndi̱ki̱ tí oro. Xi̱xini̱vana ña̱ va̱ása va̱ʼa ña̱ kéʼéna, soo ni saá sa̱ndáʼvi xíʼin miína chi nda̱kanixi̱nína ña̱ ndasakáʼnuna Jehová. Nda̱a̱ ta̱ Aarón ni̱ka̱ʼa̱nra xíʼin na̱ ñuu kán ña̱ kúúña vikó ña̱ ndasakáʼnuna Jehová. Soo Jehová kǒo níkutóora ña̱ ke̱ʼéna. Ni̱ka̱ʼa̱nra xíʼin ta̱ Moisés xa̱ʼa na̱ ñuu Israel ña̱ va̱ása va̱ʼaka kéʼéna ta va̱ása ndíku̱nkana ña̱ ni̱ka̱ʼa̱nra xíʼinna. Ni̱sa̱a̱ní Jehová xíʼin na̱ ñuu kán ta nda̱a̱ nda̱kanixi̱níra ña̱ sandiʼi-xa̱ʼarana (Éx. 32:5-10).

15, 16. ¿Nda̱saa ni̱na̱ʼa̱ ta̱ Moisés xíʼin ta̱ Aarón ña̱ kítáʼanna xíʼin Jehová? (Koto na̱ʼná ña̱ va̱xi chí xa̱ʼa).

¹⁵ Xa̱ʼa ña̱ va̱ʼa ini Jehová kǒo nísandiʼi-xa̱ʼara na̱ ñuu Israel yóʼo. Na̱ íyo nda̱kú-ini xíʼinra ta̱xira ña̱ ná na̱ʼa̱na á ndixa kítáʼanna xíʼinra (Éx. 32:14). Tá xi̱ni ta̱ Moisés ña̱ tíxaʼána, xítana ta ndáʼyi̱ kóʼona xíkana nu̱ú tí si̱ndi̱ki̱ tí oro, sa̱ndiʼi-xa̱ʼararí ta nda̱a̱ ndu̱urí ya̱a̱. Tándi̱ʼi ni̱ka̱ʼa̱nra xíʼinna: “¿Ndáandó kítáʼan xíʼin Jehová? Chí yóʼo kixindó”. Xa̱ʼa ña̱yóʼo, “ndiʼi na̱ se̱ʼe ta̱ Leví nda̱takana nu̱úra” (Éx. 32:17-20, 26).

¹⁶ Ni ta̱ Aarón kúú ta̱ ke̱ʼé tí si̱ndi̱ki̱ yóʼo, soo tándi̱ʼi nda̱ndikó-inira ta nda̱kutáʼanra xíʼin Jehová xíʼin inkaka na̱ levita. Na̱yóʼo su̱ví nda̱saa nda̱kutáʼanna xíʼin Jehová chi ku̱xíkana nu̱ú na̱ va̱ása nda̱kú íyo ini xíʼinra. Va̱ʼaníva ña̱ ke̱ʼéna, saáchi mií ki̱vi̱ saá ku̱a̱ʼání na̱ ñuu Israel ni̱xi̱ʼi̱ xa̱ʼa ña̱ nda̱sakáʼnuna ndióxi̱ vatá. Soo na̱ nda̱kutáʼan xíʼin Jehová ni̱ka̱ʼa̱nra xíʼinna ña̱ ku̱a̱ʼání bendición ndakiʼinna (Éx. 32:27-29).

17. ¿Ndáaña sákuaʼayó xíʼin ña̱ ni̱ka̱ʼa̱n ta̱ Pablo xa̱ʼa tí si̱ndi̱ki̱ tí oro?

 ¹⁷ Ta̱ apóstol Pablo ni̱ka̱ʼa̱nra xa̱ʼa ña̱ ku̱u xíʼin tí si̱ndi̱ki̱ tí oro ta ni̱ka̱ʼa̱ntura ña̱yóʼo: “Ndiʼi ña̱yóʼo kúú iin yichi̱ ña̱ ki̱ndo̱o nu̱úyó ña̱ va̱ása kuni̱yó [...] ndasakáʼnuyó inka ndióxi̱ vatá táki̱ʼva ke̱ʼé na̱kán”. Ta saátu ni̱ka̱ʼa̱nra, ña̱yóʼo “ni̱ka̱ʼyi̱ña ña̱ va̱ʼa taxiña iin yichi̱ nu̱ú miíyó na̱ ndóo tiempo vitin” ta ni̱ka̱ʼa̱ntura: “Xa̱ʼa ña̱yóʼo, na̱ ndákanixi̱ní ña̱ kǒo ndakavana, kuenta ná koona chi kivi ndakavana” (1 Cor. 10:6, 7, 11, 12). Nda̱a̱ táki̱ʼva ni̱ka̱ʼa̱n ta̱ Pablo nda̱a̱ na̱ ndásakáʼnu Ndióxi̱ kivi xa̱a̱na keʼéna ña̱ va̱ása va̱ʼa. Na̱ kéʼé ña̱ va̱ása va̱ʼa sana ndakanixi̱nína ña̱ kúúkana migo Jehová. Savana kivi ka̱ʼa̱nna ña̱ kúúna migo Jehová á nda̱kú íyo inina xíʼinra, soo su̱ví ña̱yóʼo kúni̱ kachiña ña̱ kúsi̱í-ini Jehová xíʼin ña̱ kéʼéna (1 Cor. 10:1-5).

18. ¿Ndáaña kivi sakúxíka miíyó nu̱ú Jehová, ta ndáaña kivi xa̱a̱yó ndoʼoyó?

¹⁸ Nda̱a̱ táki̱ʼva xi̱niyó, na̱ ñuu Israel ni̱ndi̱ʼiní-inina tá xa̱a̱ ku̱a̱ʼá tiempo ni̱ya̱ʼa ta kǒo ndíkó ta̱ Moisés. Ta kivi saá ndoʼo miíyó na̱ ndásakáʼnu Ndióxi̱, kivi kixaʼá ndi̱ʼi̱ní-iniyó xa̱ʼa ña̱ kǒo ki̱vi̱ Jehová kíxa̱a̱, á ña̱ kǒo ñuyǐví xa̱á kíxa̱a̱. Sana ndakanixi̱níyó ña̱ kúma̱ní ku̱a̱ʼání tiempo tasaá xi̱nu ndiʼi ña̱yóʼo á ña̱ sana va̱ása xi̱nuña. Tá va̱ása kíʼinyó kuenta xíʼin ña̱yóʼo kivi kixaʼáyó keʼéyó inkaka ña̱ʼa, nu̱úka ña̱ keʼéyó ña̱ kúni̱ Jehová. Tásaá ná kéʼéyó ki̱xa̱a̱ iin tiempo ta kuxíkayó nu̱ú Jehová ta nda̱a̱ xa̱a̱yó keʼéyó ña̱ʼa ña̱ kǒo níndakanixi̱níyó keʼéyó.

19. ¿Ndáaña va̱ása xíniñúʼu nandósóyó xa̱ʼa, ta nda̱chun?

¹⁹ Va̱ása xíniñúʼu nandósóyó, Jehová kúni̱ra ña̱ iinlá miíra ná ndasakáʼnuyó (Éx. 20:5). Tá va̱ása kéʼéyó ña̱ kúni̱ Jehová, ña̱ kúni̱ ta̱ Ndi̱va̱ʼa kéʼéyó ta ku̱a̱ʼání tu̱ndóʼo kixi nu̱úyó. Xa̱ʼa ña̱yóʼo ta̱ Pablo ni̱ka̱ʼa̱nra: “Kǒo kívi koʼondó copa Jehová ta koʼondó copa na̱ demonio; kǒo kívi keʼéndó ‘ña̱ kúni̱ Jehováʼ ta keʼéndó ña̱ kúni̱ na̱ demonio” (1 Cor. 10:21).

20. Ni kíʼviyó ku̱a̱chi ¿ndáaña kéʼé Jehová xa̱ʼa ña̱ kúni̱ra chindeétáʼanra xíʼinyó?

²⁰ Inkáchi íyo ña̱ káʼa̱n Biblia xa̱ʼa ta̱ Caín, ta̱ Salomón xíʼin na̱ ñuu Israel. Ndiʼi na̱yóʼo ni̱xi̱yo tiempo nu̱úna ña̱ ndandikó-inina ta nasamana ña̱ kéʼéna (Hech. 3:19). Xíʼin ña̱yóʼo kúnda̱a̱-iniyó tá iinna ni̱ki̱ʼvina ku̱a̱chi ndátuva Jehová ña̱ ndikó-inina xa̱ʼa ña̱ ke̱ʼéna. Ná ndakaʼányó chi ni̱xi̱yora ña̱ káʼnu-ini xa̱ʼa ta̱ Aarón. Tiempo vitin xíniñúʼura ña̱ va̱xi nu̱ú Biblia, tutu ña̱ tává na̱ ñuura á consejo ña̱ táxi iinna ndaʼa̱yó ña̱ káʼa̱nra xíʼinyó ña̱ kuenta ná kooyó. Tá xíniso̱ʼoyó ndiʼi ña̱ káʼa̱nra, kúchiñu kandíxayó ña̱ koora ña̱ káʼnu-ini xa̱ʼayó.

21. ¿Ndáaña xíniñúʼu keʼéyó tá íyo ña̱ kúni̱ sakúxíka miíyó nu̱ú Jehová?

²¹ Jehová va̱ʼaní-inira soo íyo xa̱ʼa ña̱ kéʼéra ña̱yóʼo (2 Cor. 6:1). Táxira tiempo ndaʼa̱yó “ña̱ sandákooyó keʼéyó ña̱ kini xíʼin ña̱ kúni̱yó keʼéyó ña̱ íyo ñuyǐví yóʼo” (kaʼvi Tito 2:11, 12). * Nani tákuyó ti̱xin ña̱ ñuyǐví ña̱ íyoní ña̱ kini, íyo ku̱a̱ʼání ña̱ʼa ña̱ kivi sakúxíka miíyó nu̱ú Jehová ta ndakooyó ña̱ ndasakáʼnuyóra. Xa̱ʼa ña̱yóʼo ná chika̱a̱yó ndée ña̱ ndasakáʼnuyó iinlá Jehová, chi ta̱kán kúú ta̱ xíniñúʼu kuniso̱ʼoyó ña̱ káʼa̱n, ta iinlá ta̱yóʼo kúú ta̱ xíniñúʼu ndasakáʼnuyó ta va̱ása xíniñúʼu sandákooyóra (Deut. 10:20).