‘KU̱A̱ʼÁNÍ kúú ña̱ xíniñúʼu sákeena ta loʼoní kúú na̱ sákee. Ña̱kán ka̱ʼa̱nkandó xíʼin ta̱ káchíñundó nu̱ú ná taxikara na̱ chindeétáʼan xíʼinndóʼ (Luc. 10:2). Xa̱a̱ yáʼaka u̱vi̱ mil ku̱i̱ya̱ kúú ña̱ ni̱ka̱ʼa̱n ta̱ Jesús tu̱ʼun yóʼo, ta ña̱ ni̱ka̱ʼa̱nra yóʼo va̱ʼaní kítáʼanña xíʼin ña̱ ndóʼo na̱ ñuu Myanmar. ¿Nda̱chun? Saáchi chí ñuu Myanmar íyo ki̱ʼva 4,200 na̱ publicador, ña̱ nátúʼunna xa̱ʼa Ndióxi̱ xíʼin ki̱ʼva 55 millón na̱ yiví.

Soo, Jehová kúú ta̱ kíʼin kuenta xíʼin ña̱yóʼo, ña̱kán chíndeétáʼanra xíʼin ku̱a̱ʼání na̱ hermano na̱ inka país ña̱ ku̱ʼu̱nna chí sureste ña̱ Asia, ña̱ va̱ʼa chindeétáʼanna xíʼin na̱ yiví. ¿Nda̱chun sándákoona ñuuna? ¿Nda̱chun va̱ʼa kéʼéna ña̱yóʼo? ¿Ndáaña va̱ʼa ndákiʼinna xa̱ʼa ña̱ kéʼéna ña̱yóʼo? Ná sakuaʼayó xa̱ʼana.

Xa̱a̱ íyo loʼo tiempo, ta̱ Kazuhiro iin precursor ta̱ ñuu Japón kúú ta̱yóʼo, tá ni̱xi̱ʼi̱ yi̱ʼíra, na̱ndósóra xa̱ʼa ndiʼi ña̱ʼa, ta ni̱xa̱ʼa̱nna xíʼinra nda̱a̱ hospital. Ta̱ doctor ni̱ka̱ʼa̱nra xíʼinra ña̱ va̱ása kívika kavara carro, ki̱ʼva u̱vi̱ ku̱i̱ya̱. Ta̱ Kazuhiro ni va̱ása kándíxara, ta nda̱kanixi̱níra: “¿Ndáaña keʼíi̱? Ña̱ kútóokai̱ kúú ña̱ koi̱ precursor, ta va̱ása kúni̱i̱ sandákoi̱ña”. Xa̱ʼa ña̱yóʼo ni̱ka̱ʼa̱nra xíʼin Jehová ña̱ ná chindeétáʼanra xíʼinra ña̱ koora precursor.

Ta̱ Kazuhiro káchira: “Tá xa̱a̱ ni̱ya̱ʼa iin yo̱o̱ iin ta̱ migoi̱ ta̱ ndíka̱a̱ chí Myanmar na̱kunda̱a̱-inira xa̱ʼa ña̱ ndo̱ʼi̱. Xíʼin teléfono ni̱ka̱ʼa̱nra xíʼi̱n ta ka̱chira: ‘Chí ñuu Myanmar nina tú autobús xíniñúʼuna ña̱ xíkana. Tá ná kixiún yóʼo, kiviva koún precursor chi va̱ása xíniñúʼu kavaún carro yóʼoʼ. Ni̱nda̱ka̱tu̱ʼíi̱n ta̱ doctor á kivi ku̱ʼi̱n koi̱ chí ñuu Myanmar, ni kúúmiíi̱ kue̱ʼe̱. Nda̱kanda̱ní-inii̱ tá ni̱ka̱ʼa̱nra xíʼi̱n: ‘Iin ta̱ doctor ta̱ ñuu Myanmar, xíkara ñuu Japón vitin. Na̱ʼi̱ra nu̱ún, ta tá ná ndoʼo tukún kue̱ʼe̱, ta̱yóʼo kivi chindeétáʼanra xíʼúnʼ. Nu̱ú miíi̱, Jehová kúú ta̱ nda̱kuiin yuʼíi̱”.

Ndi̱ku̱n kama chi̱ndaʼá ta̱ Kazuhiro iin correo nu̱ú na̱ Betel ña̱ Myanmar, ta nu̱ú ña̱yóʼo ni̱ka̱ʼa̱nra ña̱ miíra xíʼin ñá síʼíra kúni̱na ku̱ʼu̱nna koona precursor ñuu kán. Ni̱ya̱ʼa u̱ʼu̱n ki̱vi̱, ta na̱ Betel nda̱kuiinna: “Naʼandó chi xíniñúʼukandi̱ na̱ koo precursor”. Ta̱ Kazuhiro xíʼin ñá Mari ñá síʼíra, ni̱xi̱kóna carrona, ta̱vána tutuna ña̱ ku̱ʼu̱nna ta sa̱tána boleto ña̱ ku̱ʼu̱nna xíʼin avión. Vitin kúsi̱íní-inina ña̱  chíndeétáʼanna xíʼin iin grupo nu̱ú káʼa̱nna tu̱ʼun seña chí ñuu Mandalay. Ta̱ Kazuhiro káchira: “Ndiʼi ña̱ ndo̱ʼondi̱ chi̱ndeétáʼanña xíʼinndi̱ ña̱ ka̱ndíxakandi̱ ña̱ ni̱ka̱ʼa̱n Ndióxi̱ nu̱ú Salmo 37:5 ña̱ káchi: ‘Ka̱ʼa̱n xíʼin Jehová xa̱ʼa ndiʼi ña̱ ndóʼún, ta kandíxara, ta miíra chindeé yóʼóʼ”.

Tá ku̱i̱ya̱ 2014, liviní ña̱ ndo̱ʼona chi ni̱xi̱yo iin asamblea especial ñuuna. Ku̱a̱ʼání na̱ ke̱e inka ñuu ni̱xa̱ʼa̱nna kán. Tá kúú ñá Monique iin ñá hermana ña̱ ñuu Estados Unidos kúú ñáyóʼo, ta kúúmiíñá 34 ku̱i̱ya̱. Miíñá káʼa̱nñá ña̱yóʼo: “Tá xa̱a̱ ndi̱kói̱ ña̱ ni̱xa̱ʼi̱n asamblea ni̱ka̱ʼi̱n xíʼin Jehová, xa̱ʼa ndáaña kivi keʼíi̱. Saátu ni̱ka̱ʼi̱n xíʼin na̱ yivái̱ xa̱ʼa ña̱ kúnii̱ keʼíi̱ chí nu̱únínu. Va̱ʼaníva ña̱ ku̱ʼi̱n ñuu Myanmar túvina saátu mií va̱ʼanívaña túvii̱. Soo tá kúma̱níka ndaka̱xi̱n keʼíi̱ ña̱yóʼo, siʼna ni̱ka̱ʼi̱n xíʼin Jehová, ta ta̱xii̱ ni̱ya̱ʼa loʼo tiempo”. Ñá Monique natúʼunñá xíʼinyó ndáa xa̱ʼa kúú ña̱ ke̱ʼéñá ña̱yóʼo.

Ñáyóʼo káchiñá: “Ta̱ Jesús ni̱ka̱ʼa̱nra xíʼin na̱ discípulora ña̱ siʼna ná tavána kuenta xíʼin ña̱ keʼéna. Xa̱ʼa ña̱kán ni̱nda̱ka̱tu̱ʼun xíʼin miíi̱: ‘¿Á íyo xu̱ʼíi̱n ña̱ kivi keʼíi̱ ña̱yóʼo? ¿Á nani xu̱ʼíi̱n ña̱ kuniñúʼi̱ ta va̱ása kachíñukai̱ tá ná xa̱i̱ kán?ʼ”. Ñá Monique káchiñá: “Ki̱ʼi̱n kuenta ña̱ kǒo ku̱a̱ʼá xu̱ʼún kúúmiíi̱ ña̱ ku̱ʼi̱n chi xíkava kúúña”. Ña̱kán, ¿ndáaña ke̱ʼéñá ña̱ va̱ʼa ku̱ʼu̱nñá? (Luc. 14:28).

Ñá Monique káchiñá: “Iin ki̱vi̱, ñá káchíñui̱ xíʼin ni̱ka̱ʼa̱nñá xíʼi̱n ña̱ kúni̱ñá ku̱ʼi̱n nu̱úñá. Ni̱yi̱ʼví loʼi̱, chi nda̱kanixi̱níi̱ ña̱ taváñá yi̱ʼi̱ nu̱ú káchíñui̱. Soo inkava ña̱ ke̱ʼéñá, ta̱xiñá tixaʼvi ndaʼíi̱ xa̱ʼa ña̱ va̱ʼaní káchíñui̱, ta ni̱ka̱ʼa̱nñá ña̱ taxina xu̱ʼún ndaʼíi̱ xa̱ʼa ña̱ ke̱ʼíi̱. Ta mií xu̱ʼún ña̱ xíniñúʼi̱ ña̱ va̱ʼa chaʼvii̱ ndiʼi ña̱ nísákái̱ kúú ña̱ ta̱xiñá ndaʼíi̱”.

Ñá Monique nani tá diciembre ña̱ 2014 íyoñá chí ñuu Myanmar. ¿Nda̱saa kúniñá xa̱ʼa ña̱ ndíka̱a̱ñá chíndeétáʼanñá xíʼin na̱ yiví nu̱ú kǒo ku̱a̱ʼá na̱ publicador? Miíñá káʼa̱n ña̱yóʼo: “Kúsi̱íní-inii̱ ña̱ ki̱xa̱i̱ yóʼo. U̱ni̱ na̱ yiví káʼvii̱ Biblia xíʼin. Iin ñáyóʼo xa̱a̱ kúúmiíñá 67 ku̱i̱ya̱ ta kúsi̱íkaví-iniñá tá xái̱ ta númiñá yi̱ʼi̱. Tá ku̱nda̱a̱-iniñá ki̱vi̱ Ndióxi̱ ña̱ naníra Jehová nda̱a̱ xa̱kuñá. Ni̱ka̱ʼa̱nñá xíʼi̱n: ‘Ña̱ yichi̱ nu̱ú kúú ña̱ xíniso̱ʼi̱ xa̱ʼa ki̱vi̱ Ndióxi̱. Loʼokava yóʼó nu̱úi̱, ta sa̱náʼún iin ña̱ ndáyáʼviní yi̱ʼi̱ʼ. Nda̱a̱ yi̱ʼi̱ xa̱kui̱ xa̱ʼa ña̱ ni̱ka̱ʼa̱nñá. Ña̱ ndo̱ʼi̱ yóʼo sákusi̱íníña-inii̱”. Xa̱a̱ íyo loʼo tiempo, ñá Monique ni̱xa̱ʼa̱nñá Escuela nu̱ú Sákuaʼa na̱ Nátúʼun xa̱ʼa ña̱ Kaʼndachíñu Ndióxi̱.

Nu̱ú ña̱ Anuario de los testigos de Jehová 2013 ña̱ káʼa̱n xa̱ʼa ñuu Myanmar va̱xika ña̱ chindeétáʼan xíʼin inkana ña̱ va̱ʼa ku̱ʼu̱nna país kán. Iin ñá hermana ñá kúúmií 30 ku̱i̱ya̱ ñá naní Li chí sureste ña̱ ñuu Asia ni̱xi̱yoñá, ta ndiʼi ki̱vi̱ xi̱kachíñuñá, soo ña̱ ka̱ʼviñá nu̱ú Anuario chi̱ndeétáʼanña xíʼinñá ña̱ ku̱ʼu̱nñá chí ñuu Myanmar kachíñuñá nu̱ú Ndióxi̱. Miíñá káʼa̱n ña̱yóʼo: “Tá ku̱i̱ya̱ 2014 ni̱xa̱ʼi̱n iin asamblea especial chí ñuu Yangón, kán xi̱nitáʼi̱n xíʼin iin ta̱ hermano xíʼin ñá síʼíra, na̱yóʼo chíndeétáʼanna xíʼin na̱ yiví na̱ káʼa̱n tu̱ʼun chino chí ñuu Myanmar. Xa̱ʼa ña̱ káʼi̱n tu̱ʼun yóʼo, nda̱kaxi̱n ña̱ ku̱ʼi̱n chí ñuu kán ña̱ chindeétáʼi̱n xíʼin na̱ grupo na̱ káʼa̱n tu̱ʼun chino. Ñá Monique xíʼin yi̱ʼi̱ nda̱kaxindi̱ ña̱ inkáchi ku̱ʼu̱nndi̱ chí ñuu Mandalay. Jehová chi̱ndeétáʼanra xíʼinndi̱, ta̱xina chiñu ndaʼa̱ndi̱ ña̱ koondi̱ maestra ta loʼo kuití tiempo xi̱kachíñundi̱, inkáchi escuela nu̱ú xi̱kachíñundi̱. Saátu nda̱ni̱ʼíndi̱ iin veʼe ña̱ yatin kíndo̱o kán ña̱ va̱ʼa kundoondi̱. Ni niʼníní íyo á ni ku̱a̱ʼáka ña̱ʼa íyo, kúsi̱íní-inii̱ ña̱ káchíñui̱ nu̱ú Jehová ñuu yóʼo. Chí ñuu Myanmar na̱ yiví ndáʼviva íyona, soo va̱ʼaní-inina ta kútóonína sakuaʼana xa̱ʼa Ndióxi̱. Kúsi̱íní-inii̱ ña̱ xítoi̱ ndáa ki̱ʼva chíndeétáʼan Jehová xíʼin na̱ yiví ñuu yóʼo. Kúnda̱a̱va-inii̱ ña̱ kúni̱ Jehová koi̱ yóʼo ña̱ va̱ʼa kachíñui̱ nu̱úra”.

Ku̱a̱ʼání na̱ hermano na̱ ku̱a̱ʼa̱n nu̱ú kǒo ku̱a̱ʼá na̱ káchíñu nu̱ú Jehová, kíʼinna kuenta ndáa ki̱ʼva chíndeétáʼan oración xíʼinna. Tá kúú ta̱ Jumpei xíʼin ñá síʼíra ñá naní Nao, u̱vi̱ saána yáʼaka 30 ku̱i̱ya̱na, na̱yóʼo xi̱ñuʼuna iin congregación nu̱ú káʼa̱nna tu̱ʼun seña chí ñuu Japón. ¿Nda̱chun ku̱a̱ʼa̱nna chí ñuu Myanmar? Ta̱ Jumpei káchira: “Miíi̱ xíʼin ñá síʼíi̱, ña̱ xi̱kuni̱ndi̱ keʼéndi̱ kúú ña̱ ku̱ʼu̱nndi̱ inka ñuu ña̱ kachíñundi̱ nu̱ú Ndióxi̱. Iin ta̱ hermano ta̱ ndíka̱a̱ xíʼinndi̱ ti̱xin congregación ña̱ tu̱ʼun seña, ku̱a̱ʼa̱nra chí ñuu Myanmar. Ta ndi̱ʼi̱ ku̱a̱ʼa̱nndi̱ chí ñuu kán tá mayo ña̱ 2010, ni loʼova xu̱ʼún kúúmiíndi̱. Na̱ hermano na̱ ñuu Myanmar, va̱ʼaní nda̱kiʼinna ndi̱ʼi̱”. ¿Ndáaña káʼa̱n ta̱ hermano Jumpei xa̱ʼa ña̱ predicación chí ñuu Myanmar? Káchira: “Na̱ ñuu kán kúni̱nína sakuaʼana xa̱ʼa tu̱ʼun Ndióxi̱. Na̱ kǒo kivi kuniso̱ʼo, tá xítondeʼéna video ña̱ seña ndákanda̱ní-inina. Kúsi̱íní-inindi̱ ña̱ nda̱ka̱xinndi̱ kixindi̱ yóʼo”.

¿Ndáaña ke̱ʼé ta̱ Jumpei xíʼin ñá síʼíra xa̱ʼa ña̱ kǒo xu̱ʼún ndaʼa̱na? Miíra káʼa̱n: “Xu̱ʼún ña̱ níʼindi̱ ku̱a̱ʼa̱nndi̱ ti̱xin ña̱ u̱ni̱ ku̱i̱ya̱ ndi̱ʼivaña, ta kǒokaña ña̱ chaʼvindi̱ nu̱ú kundoondi̱ inka ku̱i̱ya̱. Ni̱ka̱ʼa̱nníndi̱ xíʼin Jehová. Ta mií tiempo saá na̱ Betel ni̱ka̱ʼa̱nna xíʼinndi̱ ña̱ koondi̱ precursor especial. Ka̱ndíxaníndi̱ Jehová ta miíra chi̱ndeé ndi̱ʼi̱. Ndiʼi tiempo ndáara ndi̱ʼi̱”. Ta̱ Jumpei xíʼin ñá síʼíra ni̱xa̱ʼa̱nna Escuela nu̱ú Sákuaʼa na̱ Nátúʼun xa̱ʼa ña̱ Kaʼndachíñu Ndióxi̱.

Ta̱ Simone 43 ku̱i̱ya̱ra ta ta̱ ñuu Italia kúúra, ta ñá síʼíra ñá Anna ñá ñuu Nueva Zelanda kúúñá, ta 37 ku̱i̱ya̱ñá, na̱yóʼo ku̱a̱ʼa̱nna chí ñuu Myanmar. ¿Nda̱chun ke̱ʼéna ña̱yóʼo? Ñá Anna káchiñá: “Ña̱ Anuario 2013 ña̱ ni̱ka̱ʼa̱n xa̱ʼa ña̱ ñuu Myanmar chi̱ndeé yi̱ʼi̱”. Ta̱ Simone káchikara: “Kúsi̱íní-inindi̱ ña̱ ki̱xa̱a̱ndi̱ ñuu Myanmar. Kǒo ku̱a̱ʼá ña̱ʼa xíniñúʼuyó ña̱ kundooyó yóʼo, ta ku̱a̱ʼáka tiempo káchíñui̱ nu̱ú Jehová. Kíʼinníndi̱ kuenta ndáa ki̱ʼva chíndeétáʼan Jehová xíʼinndi̱ xa̱ʼa ña̱ ki̱xa̱a̱ndi̱ ñuu nu̱ú kǒo ku̱a̱ʼá na̱ públicador” (Sal. 121:5). Ñá Anna káchiñá: “Vitin kúú ña̱ kúsi̱íní-inii̱. Kǒo ku̱a̱ʼá ña̱ʼa kúúmiíi̱, ta ku̱a̱ʼáka tiempo íyoi̱ xíʼin yiíi̱; va̱ʼaníka kítáʼanndi̱ vitin. Saátu ku̱a̱ʼáníka kúú na̱ migondi̱ vitin. Na̱ yiví na̱ íyo yóʼo va̱ása sáa̱-inina xínina na̱ testigo Jehová, ta kútóonína sakuaʼana xa̱ʼa Ndióxi̱”. ¿Ndáaña kéʼéna?

Ñá Anna káʼa̱nñá xa̱ʼa ña̱yóʼo: “Iin ki̱vi̱, na̱túʼi̱n xíʼin iin ñá loʼo, ñá xáʼa̱n universidad ta ni̱ka̱ʼi̱n xíʼinñá ña̱ ndikó tukui̱ nu̱úñá. Tá ndi̱kói̱ xa̱a̱ ki̱xa̱a̱ inka ñá loʼo xíʼinñá. Tá ndi̱kó tukui̱ inka yichi̱ xa̱a̱ tukuñá ki̱xa̱a̱ xíʼinñá, ta inka ki̱vi̱ ña̱ ndi̱kói̱ xa̱a̱ ku̱a̱ʼáka kúúná. Ta vitin xa̱a̱ u̱ʼu̱n náyóʼo káʼvii̱ xíʼin”. Ta̱ Simone káchira: “Na̱ yiví na̱ nátúʼunndi̱ xíʼin yóʼo va̱ʼaní-inina, ta ku̱a̱ʼání ña̱ʼa ndáka̱tu̱ʼunna. Kútóonína sakuaʼana. Ta nda̱a̱ va̱ása kíta tiempo nu̱úndi̱ ña̱ chindeétáʼanndi̱ xíʼinna”.

¿Ndáaña ke̱ʼéna tá kúma̱níka ku̱ʼu̱nna chí ñuu Myanmar? Ñá Mizuho ñá ñuu Japón káchiñá: “Yiíi̱ ta̱  naní Sachio xíʼin yi̱ʼi̱ xi̱kuni̱ndi̱ ku̱ʼu̱nndi̱ inka ñuu nu̱ú kǒo ku̱a̱ʼá na̱ publicador ña̱ va̱ʼa chindeétáʼanndi̱ xíʼinna, soo ¿ndáa mií kivi ku̱ʼu̱nndi̱? Ña̱ va̱xi nu̱ú ña̱ Anuario 2013 chi̱ndeétáʼan xíʼinndi̱, nda̱a̱ níma̱ndi̱ ni̱xa̱a̱ña. Xa̱ʼa ña̱yóʼo nda̱kanixi̱níndi̱ ña̱ ku̱ʼu̱nndi̱ ñuu Myanmar”. Ta̱ Sachio káchira: “Ni̱xa̱ʼa̱nndi̱ ki̱ʼva iin semana chí ñuu Yangón, mií ñuu káʼnu ña̱ ndíka̱a̱ chí ñuu Myanmar. Xi̱kuni̱ndi̱ kunda̱a̱-inindi̱ ndáa ki̱ʼva íyo ñuu kán. Ña̱ semana ña̱ xi̱ndoondi̱ yóʼo chi̱ndeétáʼanña xíʼinndi̱ ña̱ nda̱ka̱xinndi̱ ku̱ʼu̱nndi̱ chí ñuu kán”.

Ta̱ Rodney xíʼin ñá síʼíra ñá Jane, na̱ ñuu Australia kúúna ta kúúmiína ki̱ʼva 50 ku̱i̱ya̱. Miína xíʼin se̱ʼena, ta̱ Jordan xíʼin ñá Danica, nani tá 2010 xa̱a̱ ndóona ñuu yóʼo ña̱ nátúʼunna xa̱ʼa Ndióxi̱. Ta̱ Rodney káchira: “Ndákanda̱ní-inindi̱ ña̱ kúni̱ní na̱ yiví sakuaʼana xa̱ʼa Ndióxi̱. Káʼi̱n xíʼin ndiʼindó ña̱ ná ndaka̱xinndó ku̱ʼu̱nndó iin ñuu ña̱ íyo táki̱ʼva íyo Myanmar”. ¿Nda̱chun káʼa̱nra ña̱yóʼo? Miíra ndákuiin: “Nda̱a̱ ni iin ña̱ʼa va̱ása kítáʼan xíʼin ña̱ ndákiʼinndi̱ xa̱ʼa ña̱ íyondi̱ yóʼo. Ku̱a̱ʼání na̱ va̱lí ndíʼi̱-inina xa̱ʼa teléfono, á carro, a chiñu á inkaka ña̱ʼa. Soo na̱ se̱ʼendi̱ ña̱ ndíʼi̱-inina xa̱ʼa kúú ña̱ sakuaʼana ku̱a̱ʼáka tu̱ʼun ña̱ va̱ʼa natúʼunna xíʼin na̱ yiví. Kúni̱na sakuaʼana ña̱ viíka ka̱ʼa̱nna xíʼin na̱ yiví na̱ kǒo xíni̱ xa̱ʼa tu̱ʼun Ndióxi̱, ta kúni̱tuna taxina comentario ti̱xin reunión. Ña̱yóʼo kúú ña̱ ndíʼi̱ka-inina xa̱ʼa, xíʼin inkaka ña̱ʼa ña̱ ndáyáʼviní”.

Ta̱ Oliver kúúmiíra 37 ku̱i̱ya̱ ta ta̱ ñuu Estados Unidos kúúra. Káʼa̱nra xíʼinyó nda̱chun kúú ña̱ va̱ʼaní ña̱ ku̱ʼu̱nyó inka ñuu ña̱ sanáʼa̱yó inka na̱ yiví, káchira: “Ku̱a̱ʼání ña̱ va̱ʼa ndákiʼi̱n xa̱ʼa ña̱ káchíñui̱ nu̱ú Jehová. Ña̱ káchíñui̱ nu̱ú Jehová inka ñuu chíndeéña yi̱ʼi̱ ña̱ kandíxakai̱ Jehová ni nda̱a̱ ndáaka ña̱ ná kuu. Ña̱ kéi̱ predicación xíʼin inka na̱ hermano na̱ kǒo xíni̱i̱, soo inkáchi káchíñundi̱ nu̱ú Jehová, chíndeéña yi̱ʼi̱ ña̱ chindayáʼvikai̱ chiñu Ndióxi̱”. Tiempo vitin ta̱ Oliver xíʼin ñá síʼíra ñá Anna xíkana nátúʼunna xa̱ʼa Ndióxi̱ xíʼin na̱ yiví na̱ káʼa̱n tu̱ʼun chino.

Ñá Trazel kúúmiíñá 52 ku̱i̱ya̱ ta ñá ñuu Australia kúúñá, nda̱a̱ tá ku̱i̱ya̱ 2004 íyoñá ñuu Myanmar ña̱ nátúʼunñá xa̱ʼa Ndióxi̱. Miíñá káʼa̱n: “Ndiʼi ndóʼó na̱ kivi ku̱ʼu̱n inka ñuu nu̱ú kǒo ku̱a̱ʼá na̱ nátúʼun xa̱ʼa Ndióxi̱, keʼéndóña. Kíʼi̱n kuenta, Jehová chíndeéra na̱ chíka̱a̱ní ndée ña̱ kachíñuna nu̱úra. Ña̱ keʼéyó ña̱yóʼo kúú ña̱ va̱ʼaníka nu̱ú ndiʼi ña̱ʼa”.

Kúni̱ndi̱ ña̱ ndiʼi ña̱ ni̱ka̱ʼa̱n na̱ hermano yóʼo ná chindeéña ndóʼó ña̱ kachíñundó nu̱ú Ndióxi̱ ta chindeétáʼanndó xíʼin na̱ yiví na̱ ta̱ʼán sakuaʼa xa̱ʼara. Ndiʼi na̱ hermano yóʼo nda̱a̱ táki̱ʼva íyo na̱ káʼa̱n xíʼinndó kúúna: “Naʼandó ñuu Myanmar ta chindeétáʼanndó xíʼinndi̱”.