Pregunta ña̱ kéʼé na̱ káʼvi tutu yóʼo
¿Á va̱ʼa kuniñúʼu na̱ testigo Jehová Internet ña̱ nandukúna na̱ tindaʼa̱ xíʼinna?
Jehová kúni̱ra ña̱ si̱í ná koo na̱ ti̱ndaʼa̱ ta saátu kúni̱ra ña̱ vií ná kutáʼanna ta va̱ása sandákootáʼanna (Mat. 19:4-6). Tá kúni̱ún tindaʼún, ¿ndáa míí kivi ndani̱ʼún na̱ kivi koo yiíún á ñá síʼún? Jehová kúú ta̱ i̱xava̱ʼa miíyó, xa̱ʼa̱ ña̱yóʼo xíni̱vara ndáaña xíniñúʼu keʼéyó ña̱ va̱ʼa si̱í kooyó xíʼin na̱ tindaʼa̱ xíʼinyó. Tá ná kundiku̱nyó consejo ña̱ va̱xi nu̱ú tu̱ʼun Ndióxi̱, saá kúú ña̱ kuchiñuyó si̱í kooyó. Ná ka̱ʼa̱nyó xa̱ʼa̱ sava consejo yóʼo.
Ña̱ nu̱ú, xíniñúʼu ndakaʼányó xa̱ʼa̱ ña̱yóʼo: “Kúchiñu níma̱yó sándaʼviña miíyó” (Jer. 17:9). Tá kúni̱ u̱vi̱ na̱ yiví tindaʼa̱na ta kíxáʼana xíkana xíʼin táʼanna, loʼo tá loʼo kíxáʼana kútóo táʼankana, ta xa̱ʼa̱ ña̱yóʼo kivi ixayo̱ʼvi̱ña xíʼinna ña̱ vií ndaka̱xinna ña̱ keʼéna. Tá kamaní ná tindaʼa̱na kivi xa̱a̱na ndandikó-inina xa̱ʼa̱ ña̱yóʼo (Prov. 28:26). Ña̱kán tá sa̱kán kíxáʼa xíkana xíʼin-táʼanna, va̱ása xíniñúʼu ka̱ʼa̱nna táʼan tu̱ʼun ña̱ káʼa̱n na̱ xa̱a̱ ti̱ndaʼa̱ xíʼin-táʼanna, ta ni va̱ása kindo̱ona keʼéna iin ña̱ʼa ña̱ va̱ása kuchiñuna saxínuna.
Proverbios 22:3 káchiña: “Na̱ ndíchi kúnda̱a̱-inina ndáaña kúú ña̱ va̱ása va̱ʼa ta kúxíkana nu̱úña, soo na̱ kíʼvi kéʼévanaña ta xóʼvi̱na”. ¿Ndáaña kivi kundoʼoyó tá ná kuniñúʼuyó sitio ña̱ va̱xi nu̱ú Internet á aplicación ña̱ nandukúyó na̱ kivi tindaʼa̱ xíʼinyó? Savana ni̱xo̱ʼvi̱na xa̱ʼa̱ ña̱ ki̱xáʼana xíkana xíʼin iin na̱ yiví na̱ xi̱nitáʼanna xíʼin chí nu̱ú Internet, chi na̱yóʼo sa̱ndáʼvinana. Ta saátu íyo sava na̱ yiví na̱ ndi̱va̱ʼaní-ini chi sándaʼvina inkana ta íxakuíʼnána xu̱ʼúnna. Ta sava na̱ yiví yóʼo ni̱ka̱ʼa̱nna ña̱ kúúna testigo Jehová ña̱ va̱ʼa sandáʼvinana.
Vitin ná ka̱ʼa̱nyó xa̱ʼa̱ inka ña̱ va̱ása va̱ʼa ña̱ kivi kundoʼoyó. Sava sitio ña̱ Internet káʼa̱nña ña̱ kivi ndani̱ʼíña na̱ kivi tindaʼa̱ xíʼinyó, saáchi va̱ʼaní kítáʼan ña̱ʼa ña̱ kútóoyó xíʼin na̱ yiví yóʼo. Soo su̱ví ña̱ nda̱a̱ví kúú ña̱yóʼo. ¿Á taxiyó ná ndaka̱xin iin sitio ña̱ Internet na̱ tindaʼa̱ xíʼinyó? Va̱ása, saáchi miívayó kúú na̱ xíniñúʼu ndaka̱xin na̱yóʼo. Va̱ása kiviví chindeétáʼan ña̱yóʼo xíʼinyó nda̱a̱ táki̱ʼva chíndeétáʼan tu̱ʼun Ndióxi̱ xíʼinyó (Prov. 1:7; 3:5-7).
Nu̱ú Proverbios 14:15 va̱xi inka ña̱ kivi chindeétáʼan xíʼinyó. Káchiña: “Na̱ kíʼvi kándíxana ndiʼi ña̱ káʼa̱nna xíʼinna, soo na̱ ndíchi ndákani va̱ʼa xi̱nína ndáaña keʼéna”. Tá kúma̱ní ndaka̱xinyó na̱ tindaʼa̱ xíʼinyó xíniñúʼu kuxiniva̱ʼayóna. Soo va̱ása kivi kuxini̱va̱ʼayó na̱ yiví tá ná natúʼun táʼanyó xíʼinna ti̱xin sitio ña̱ Internet. Ni xíni̱vayó sava ña̱ʼa xa̱ʼa̱na á ni ku̱a̱ʼá tiempo nátúʼunyó xíʼinna chí nu̱ú Internet, ¿á kúni̱ kachi ña̱yóʼo ña̱ xa̱a̱ xíni̱níyóna? Va̱ása, savana nda̱kanixi̱nína ña̱ xa̱a̱ nda̱ni̱ʼína na̱ kivi tindaʼa̱ xíʼinna, soo tá xi̱nitáʼanna xíʼin na̱yóʼo nda̱kavaní-inina.
Iin ta̱ ka̱ʼyí salmo ka̱chira: “Kǒo kítáʼi̱n xíʼin na̱ yiví na̱ káʼa̱n ña̱ vatá, ni kǒo kítáʼi̱n xíʼin na̱ u̱vi̱ yuʼú” (Sal. 26:4). Sava na̱ yiví va̱ása káʼa̱nna ña̱ nda̱a̱ xa̱ʼa̱ miína chí nu̱ú Internet ña̱ va̱ʼa ná kutóo inkanana. Sana va̱ása náʼa̱na ndáa ki̱ʼva íyona tá chíndaʼána mensaje ndaʼa̱ inkana. Ta savana káʼa̱nna ña̱ kúúna testigo Jehová, soo ¿á ndixa xa̱a̱ nda̱kuchina? ¿Á xa̱a̱ xu̱xa-inina xíʼin tu̱ʼun Ndióxi̱? ¿Á vií kítáʼanna xíʼin Jehová? ¿Á ndixa kivi tindaʼa̱na? ¿Á íxato̱ʼó na̱ congregación na̱yóʼo? ¿Á chínúuna yichi̱ va̱ʼa nu̱ú inkana? (1 Cor. 15:33; 2 Tim. 2:20, 21). Ndiʼi ña̱yóʼo xíniñúʼu kunda̱a̱-iniyó xa̱ʼa̱ña, soo tá va̱ása nátúʼunyó xíʼin na̱ hermano na̱ xíni̱ na̱ yiví yóʼo va̱ása kivi kunda̱a̱-iniyó xa̱ʼa̱na (Prov. 15:22). Ta miíyó na̱ ndásakáʼnu Ndióxi̱ va̱ása kúni̱yó tindaʼa̱yó xíʼin iin na̱ ta̱ʼán ndakuchi (2 Cor. 6:14; 1 Cor. 7:39).
Vitin xa̱a̱ ku̱ndaa̱-iniyó ña̱ va̱ása xíniñúʼu nandukúyó na̱ tindaʼa̱ xíʼinyó nu̱ú Internet á nu̱ú aplicación. Tá saá, ¿ndáa míí kivi ndani̱ʼíyó na̱ kivi tindaʼa̱ xíʼinyó? Tá ndákutáʼanyó ti̱xin reunión, ti̱xin asamblea á inkaka táʼan ña̱yóʼo saá kúú ña̱ kivi kuxini̱yó inkaka na̱ hermano.
Tá ndákutáʼan u̱vi̱ na̱ yiví saá kúú ña̱ kivi kunda̱a̱-inina á inkáchi íyo ña̱ kútóona keʼéna.
Sava yichi̱ va̱ása kívi ndakutáʼanyó xíʼin inkaka na̱ hermano, tá kúú xa̱ʼa̱ kue̱ʼe̱ ña̱ coronavirus, soo na̱ ñuu Ndióxi̱ káʼa̱nna xíʼinyó ndáaña kivi kuniñúʼuyó ña̱ va̱ʼa koo reuniónyó. Ta yóʼo kúú nu̱ú kivi kuxini̱yó inkaka na̱ testigo Jehová na̱ kúa̱an. Yóʼo kivi kuniyó ndáa ki̱ʼva íyo ña̱ kándíxana Ndióxi̱ tá kúú xíʼin comentario ña̱ táxina (1 Tim. 6:11, 12). Ta tá ndíʼi reunión kivi natúʼunyó xíʼinna. Ta saátu, sava na̱ hermano ndákutáʼanna nu̱ú Internet ña̱ va̱ʼa natúʼunna á kusíkína. Tasaá kúú ña̱ kivi kuniyó ndáa ki̱ʼva íyona, ta ndáa ki̱ʼva kéʼéna xíʼin inkana (1 Ped. 3:4). Ta loʼo tá loʼo kivi kixáʼayó kunitáʼanyó xíʼinna, tasaá kotoyó á inkáchi íyo ña̱ kútóoyó á ña̱ kúni̱yó keʼéyó.
Tá iin na̱ hermano nándukúna na̱ tindaʼa̱ xíʼinna ta ndíku̱nna consejo ña̱ va̱xi nu̱ú Biblia, saá kúú ña̱ si̱í koona tá ná tindaʼa̱na. Nda̱a̱ táki̱ʼva káchi Proverbios 18:22: “Ta̱ ndáni̱ʼí iin ñaʼá va̱ʼa ñá koo xíʼinra [á ñá ndáni̱ʼí iin ta̱a va̱ʼa ta̱ koo xíʼinñá] nda̱a̱ táki̱ʼva íyo ta̱ ndáni̱ʼí iin tesoro saá íyora, ta kúsi̱í-ini Jehová xíʼin ña̱ kéʼéra”.
